Author: webrwanda

Gucanira abaturage bose bitarenze mu 2029 hakubiyemo abazaba bafite amashanyarazi ashamikiye ku muyoboro mugari n'abandi bazaba bakoresha akomoka ku ngufu zisubira nk'imirasire y'izuba.

MININFRA igaragaza ko u Rwanda rwateye intambwe ikomeye mu kugeza amashanyarazi ku baturage, kuko mu 1994 amashanyarazi yari ageze ku bantu bangana na 1% gusa, mu 2016 agera kuri 29,4% none mu 2026 ageze kuri 84%.

Ni mu gihe u Rwanda rwihaye intego yo kugeza amashanyarazi ku 100% by'abaturage mu 2029, ndetse ubu kugira ngo iyi ntego igerweho hasigaye abaturage 1.350.415 bagomba gucanirwa.

Muri abo bazagerwaho n'amashanyarazi, hari abazahabwa ayo ku muyoboro mugari ndetse ndetse n'abazahabwa akomoka ku mirasire y'izuba.

MININFRA iteganya guha amashanyarazi ingo nshya 131.252 yo mu muyoboro mugari mu gihe ingo 196.877 zizacanirwa binyuze mu mirasire y'izuba.

Ku bijyanye no kongera ubushobozi bwo gutanga amashanyarazi, u Rwanda rufite gahunda yo kuzamura kuva megawatt 472 zikagera kuri 1.032 mu 2030.

Iyi gahunda izagerwaho igizwemo uruhare no kongera amasoko y'amashanyarazi harimo umushinga wiswe Nyabarongo Floating Solar w'imirasire izashyirwa hejuru y'amazi y'urugomero rwa Nyabarongo II itange megawatt 200 kuva mu 2028.

Hari kandi uwa Bugesera na Rwabusoro Solar IPP na wo w'imirasire uzatanga megawatt 100 mu 2029 ndetse n'umushinga wa Gasmeth to Power uzabyaza gaz methane yo mu Kiyaga cya Kivu amashanyarazi, uzatanga megawatt 185 mu 2030 n'indi inyuranye.

MININFRA kandi igaragaza ko mu 2030 hazakenerwa megawatt 566 z'amashayarazi nshya, aho imishinga yabyo ifunguriye ku bashoramari bigenga binyuze mu bufatanye bwa Leta n'abikorera buzwi nka 'Public Private Partnership'.

Kugira ngo bigerweho kandi u Rwanda ruteganya gushora miliyari 3.05 z'Amadolari mu rwego rw'ingufu aho muri ayo, miliyari 2,13 z'Amadolari angana na 70% zizava muri Leta naho andi angana na 30% azave mu bikorera.

Muri gahunda yo kongera amashanyarazi, u Rwanda kandi rushaka kuzamura ishoramari ry'abikorera mu rwego rw'ingufu rikava kuri miliyoni 100 z'Amadolari rikagera kuri miliyari imwe y'Amadolari mu 2030.

U Rwanda kandi rufite intego yo kuzamura ikoreshwa ry'ingufu zitangiza ikirere mu guteka, rikava kuri 5,6% ririho ubu rikagera kuri 31% mu 2030.

Muri iyi gahunda harimo gushyiraho uburyo bwo gutekera abanyeshuri hakoreshejwe ingufu zitangiza ikirere no kubaka sitasiyo z'imodoka zikoresha amashanyarazi ahantu 218 bitarenze mu 2027.

U Rwanda kandi rurateganya kongera amashanyarazi rutumiza mu bihugu byo mu Karere, akava kuri megawatt 100 akagera kuri megawatt 200 mu 2030.

Muri iki gikorwa, u Rwanda rumaze kugira imiyoboro ihuza igihugu na Uganda, Tanzania, u Burundi na Repubulika Iharanira Demokarasi ya Congo (RDC), kandi hari gahunda yo gukomeza kuyongerera ubushobozi.

Muri ubu bufatanye, u Rwanda rufitanye amasezerano na Tanzania agamije gutangira kuruha megawatt 26 mu cyiciro cya mbere mu 2027, mu gihe icyiciro cya kabiri giteganyijwe kugeza kuri megawatt mu 100 mu 2030.

Gateka Esther wamamaye nka Dj Brianne mu kuvangavanga imiziki, yageze muri Canada aho yitabiriye ibitaramo azahuriramo na Element Eleéeh, Nel Ngabo na Kevin Kade.

Ku mugoroba w’ejo hashize nibwo yageze muri Canada aho yitabiriye ibi bitaramo bizenguruka Canada byiswe “Beyond Borders Canada Tour.”

Dj Brianne wari umaze iminsi i Burayi mu Bubiligi, ageze muri Canada mu gihe igitaramo cye cya mbere azacurangamo kizaba tariki ya 3 Ukwakira 2026. Brianne yageze Canada mu ruhererekane rw’ibitaramo

Bagiye gukora ibitaramo bizenguruka Canada

Dj Brianne yageze Canada

Abahanzi b’indirimbo zo kuramya no guhimbaza Imana, Cynthia na Hyguette barakotse impanuka ikomeye iba yaranatwaye ubuzima bwabo ubwo barimo berekeza ku ishuri.

Ni impanuka yabaye ku wa Mbere w’iki cyumweru tariki ya 7 Nzeri 2026 ibera mu Karere ka Nyabihu aho imodoka yari ibatwaye yagonganye n’ikamyo.

Aba bakobwa b’impanga basanzwe batuye mu Karere ka Rubavu, amakuru ISIMBI yamenye ni uko ku mugoroba wo ku wa Mbere ari bwo bari basubiye ku ishuri aho biga Musanze maze bageze hafi n’Akarere ka Nyabihu neza baba ari bwo bakora iyi mpanuka.

Bahise bihutanwa kwa muganga kugira ngo bitabweho n’abaganga ariko Cynthia we akaba yari yagiye no muri koma, gusa ku bw’amahirwe yaje kugarura ubwenge ubu baranabasezereye barwariye mu rugo iwabo nk’uko umwe wo mu muryango wabo bari kumwe yabihamirije ISIMBI.

Amakuru avuga ko benshi mubo bari bari kumwe bakiri mu bitaro bitambaho n’abaganga cyane cyane abari bicaye begereye idirishya.

Cynthia na Hyguette ni bamwe mu bahanzi bamaze kwandika izina mu muziki wo kuramya no guhimbaza Imana aho izina ryabo rimaze kumenyekana, bakunzwe mu ndirimbo nka ‘Ibihe’, ‘Amen,’ ‘Wera,’ ‘Iherezo’ n’izindi.

Bakoze impanuka ikomeye

Impanuka ntabwo yari yoroshye

Cynthia na Hyguette barorohewe bari mu rugo

Uwizeye Enock uzwi nka Kagarara cyangwa Ashton Small, yanditse igitabo 'Muraho! Nitwa Kagarara’ gikubiyemo amateka ye, ubuzima bushaririye yanyuzemo ariko akaba ataracitse intege ubu hakaba hari intambwe amaze gutera.

Kagarara ni umwe mu bantu bagezweho ku mbuga nkoranyambaga bakurikirwa n’abantu benshi kandi bamaze kwandika izina bitewe n’ibikorwa bye, aho agendera ku ntero igira iti 'Disability is not inability', bivuze ngo 'Kuba ufite ubumuga ntibivuze ko udashoboye.'

Yanditse igitabo kivuga ku buzima bwe, cyamaze no kugera ku isoko, yabwiye ISIMBI ko ubuzima yanyuzemo iyo hataba Imana we nta kintu na kimwe yari kwishoboza byose ari yo yabikoze akaba ari naho yakuye igitekerezo cyo kucyandika.

Ati 'Maze kureba ibyo naciyemo, maze kureba amateka naciyemo, ibyo naciyemo byose byari urugendo rutoroshye, ku giti cyanjye sinari kubyishoboza. Mbaye ndi umuntu w’imbwa naza hano nkavuga ngo ndarenze, Imana niyo irenze.'

Yavuze ko mu buzima bubi bwose yanyuzemo, yajygaga asenga Imana ngo imufashe ntajye mu bibi ahubwo anyurwe na duke yakoreye tubashe kumutunga kandi byagenze neza nta muntu yigeze abangamire cyangwa ngo arye utwo atakoreye.

Yavuze ko ibintu yanyuzemo yabonaga bitazashoboka ko ubuzima arimo uyu munsi yari kubugeraho, gusa kwihangana no kudacika intege ni byo byamufashije.

Ati 'Nk’umuntu nkanjye ufite ubumuga, nk’ibintu naciyemo nabonaga bitazashoboka ariko nkabasha kwihangana ariko nkabicamo, nkabasha kuvuga ngo 'kuva mfite ubumuga ntibivuze ko ntashoboye’, nkarwana nkarwana uyu munsi hakaba hari agatafari kamwe maze guterakaho kugira ngo mbashe kuzamura inzu, ntabwo byari urugendo rworoshye, rwari urugendo rukomeye, hajemo kugucika intege, hajemo abantu bambwira ngo uri iki ngiki ntacyo uzageraho.'

Yakomeje avuga ko iki gitabo ikintu kirimo ari inkuru y’ubuzima bwe ariko izanatanga isomo ku bana bato by’umwihariko abafite ubumuga.

Ati 'Ikintu kiri muri kino gitabo, ni inkuru y’ubuzima bwanjye, si n’inkuru y’ubuzima bwanjye gusa ahubwo ni isomo rizigisha abantu bose ariko by’umwihariko abana bato n’abandi bafite ubumuga.'

Agaruka ku mpamvu yagize ati 'Si inkuru yabaye mpari, ni inkuru yambayeho. Ibirimo si inkuru nabonye ahubwo byambayeho, nzi ukuntu bigoye cyane k’umuntu ufite ubumuga kugira ngo yumve ko agomba kwiyakira, kugira ngo yumve ko aho hantu ari ashobora kuharenga.'

Yavuze ko abafite ubumuga bafite ibintu byinshi bakora ariko ikibazo gihari ukwiyizera bo ku giti cyabo bakumva ko bashoboye.

Kagarara yabwiye abafite ubumuga 'ugomba kumenya ko uko wavutse si wowe wabihisemo, niba waravutse ukisanga umeze uko umeze, si ibintu uri bubyuke ngo ukarabe mu maso bihite bigenda, iga kubana nabyo, nibakubwira ngo dore uko kimeze uvuge ngo ariko uzi ko ndi mwiza kuruta abandi bantu bose.'

Ashton Small cyangwa Kagarara avuga ko hari abana benshi yafashije bagasubira ku ishuri, hari abumvise inkuru ye ikabafasha. Yasabye ababyeyi kandi kwita ku bana babo ntibatume biheba.

Yavuze ko uko abana bahezwa mu muryango ari kimwe mu bituma biheba cyane, bikabica no mu mitekerereze bakumva ko badashoboye.

Ati 'Icyo nshimira Imana, mu rugo ntibigeze bampeza, ariko nko mu baturanyi no gusangira ntibyashobokaga. Ni yo nkuru yambayeho ntazibagirwa, nigeze kujya gusangira n’umuntu andebye aravuga ngo ntitwasangira. Baranyarurira nicara hanze yicara mu nzu.'

Igitabo 'Muraho! Nitwa Kagarara' yasohoye kopi 35 ubu nibyo biri ku isoko akaba ateganya kukimurikira kumugaragaro tariki ya 26 Nzeri 2027 muri Kigali Convetion Center.

Kagarara yanditse igitabo kivuga ku buzima

Tekereza iyo bigeze saa saba z'amanywa nta kantu wigeze ukoza ku munwa ngo kajye mu nda ukuntu uba wumva umubiri wacitse intege, ibyo ukora byose ugenda gake ariko wafata ibiribwa ugasubira ku murongo ndetse ugakora cyane.

Ni kumwe imodoka cyangwa moto yawe uyitwara yatangira gushiramo lisansi igacika intege kugeza ihagaze.

Izo mbaraga umubiri ukoresha zivuye mu biribwa ni zo zipimwa muri kilocalories. Umubiri uzikoresha mu buryo bwawo kugira ngo umuntu abeho kandi ibice biwugize bishobore gukora neza.

Raporo y'Ikigo cy'Igihugu cy'Ibarurishamibare (NISR) yitwa Rwanda Food Balance Sheets 2025 yashyizwe hanze muri Nzeri 2026, igaragaza ko indyo y'Abanyarwanda ishingiye cyane ku biribwa bikomoka ku bihingwa, mu gihe ibikomoka ku matungo bikiri bike mu mafunguro yabo ya buri munsi.

Raporo ya NISR isesengura uko ibiribwa biboneka mu gihugu, bikoreshwa, ndetse n'intungamubiri Abanyarwanda babona buri munsi zirimo proteine, amavuta, vitamine n'imyunyungugu. Ibi bifasha gusobanukirwa uko imirire mu Rwanda ihagaze ndetse n'ahakenewe imbaraga.

Ifunguro rya buri munsi ry'Abanyarwanda, rigaragaramo bimwe mu bihingwa nk'ibirayi, ibijumba, imyumbati, ibitoki, umuceri, ibigori n'ibishyimbo.

Raporo igaragaza ko mu biribwa bikomoka ku bihingwa birimo ibinyabijumba ari byo bigaragara ku meza cyane, aho umuntu umwe abarirwa 256,5 kg ku mwaka mu gihe imbuto umuntu arya ari 99,8 kg, naho ibinyampeke bigera ku bilo 90,4 kg ku mwaka ku muntu.

Mu cyiciro cy'ibiribwa birimo ibinyabijumba, ibijumba, imyumbati n'ibirayi ni byo biza ku isonga mu biribwa cyane, mu gihe imineke yiharira ikibuga ku meza y'Abanyarwanda ugereranyije n'izindi mbuto barya.

Mu cyiciro cy'ibinyampeke, ibigori, umuceri, amasaka n'ingano, hamwe n'ibibikomokaho, ni byo byiganje kandi bikoreshwa cyane.

Ibi bisobanura ko ku miryango myinshi yo mu Rwanda, ifunguro rya saa sita cyangwa irya nimugoroba mu Banyarwanda rigizwe n'ibitera imbaraga nka kawunga, ibirayi, ibijumba, imyumbati cyangwa ibitoki, bigaherekezwa n'ibishyimbo, imboga n'ibindi.

Raporo igaragaza ko mu 2025, Umunyarwanda yabonaga impuzandengo ya kilocalories 2.366,7 ku munsi, ziyongereye ugereranyije na 2.328,9 yabonaga mu 2024. Imibare igaragaza ko hafi 98,1% by'izi mbaraga zinjira mu mubiri w'umuntu ziva ku biribwa bikomoka ku buhinzi.

By'umwihariko, ibinyampeke n'ibinyabijumba ni byo byatanze kilocalories nyinshi, aho ibinyampeke byatanze kilocalories 732,9 ku muntu ku munsi, naho ibinyabijumba bitanga kilocalories 644,1.

Inyama, amata n'amafi ntibigaragara ku meza…

Ubuhinzi mu Banyarwanda bujyana n'ubworozi by'umwihariko mu bice binyuranye by'icyaro aho amatungo magufi nk'inkoko, ihene, ingurube, inkwavu n'andi matungo atanga inyama mu buryo bwihuse ariko abenshi bahitamo kugurisha aho kuyarya.

Mu 2025, amata n'ibiyakomokaho ni byo byari bifite uruhare runini mu biribwa bikomoka ku matungo, aho Umunyarwanda yafashe 11,3 kg ku mwaka, bingana na 66% by'ibiribwa byose bikomoka ku matungo. Inyama zari 2,6 kg, naho amafi n'ibikomoka mu mazi bikagera kuri 2,2 kg ku muntu ku mwaka.

NISR igaragaza ko ibi bigira ingaruka ku buryo umubiri ubona intungamubiri zimwe na zimwe, kuko ibiribwa bikomoka ku matungo ari isoko ikomeye ya proteine, vitamin B12 na vitamin D.

Raporo igaragaza ko proteine umuntu abona ku munsi ziyongereye zigera kuri garama 59,8 mu 2025, bigaragaza inyongera ya 1,2% ugereranyije na 2024. Imibare igaragaza ko 94,2% bya proteine zinjiye mu mubiri w'umuntu zikomoka ku bihingwa.

Ibinyampeke byatumye abantu babona garama 19,8 za proteine ku munsi, naho ibishyimbo n'ibindi bihingwa by'ibinyampeke byatanze garama 17,8kg.

Ibi bigaragaza uruhare rukomeye rw'ibishyimbo n'ibindi bihingwa mu mirire y'Abanyarwanda, kuko usanga ari bimwe mu biribwa biribwa na benshi mu ngo.

Umusaruro w'imbere mu gihugu watumye abaturage bihaza

U Rwanda rukomeje kugira ubushobozi bwo kwihaza mu biribwa, aho igipimo cy'ibiribwa biva imbere mu Rwanda cyazamutse kikagera kuri 79,7% mu 2025 kivuye kuri 79,4% mu 2024.

Ariko raporo igaragaza ko igihugu kigikenera ibiribwa bituruka hanze, aho 56,1% by'ibiribwa bikomoka ku buhinzi n'ibikomoka ku matungo byagaragaye ko bifite aho bihurira n'ibitumizwa mu mahanga.

Ku bijyanye no gutakaza ibiribwa, hari intambwe yatewe kuko Food Loss Index yagabanyutse, igipimo cy'igihombo cy'ibiribwa kigera kuri 4,27%, kivuye kuri 5% mu 2017.

Ubushakashatsi bwa karindwi ku Mibereho y'Ingo muri Rusange (EICV7) bwagaragaje kugira ngo Abanyarwanda babashe kugira imbaraga zo gukora barya kilocalorie 2400 ku munsi.

NISR igaragaza ko kugira ngo Umunyarwanda umwe abashe kubona ibiribwa n'ibindi by'ibanze nkenerwa mu mibereho ya buri munsi, bimusaba kuba afite nibura 560.127 Frw mu mwaka.

Abafite imirire mibi baragabanyutse…

Mu 2025, ingano fatizo y'ingufu zikomoka ku biribwa umubiri ukenera ku munsi mu Rwanda yabarirwaga muri kilocalories 1.814 ku muntu umwe ku munsi.

Hashingiwe kuri iki gipimo, byagaragaye ko hafi 29,9% by'abaturage b'u Rwanda bafite imirire mibi, bangana na miliyoni 4,1, bafite ikibazo cyo kutabona amafunguro ahagije yabaha ingufu zikenewe kugira ngo bagire ubuzima buzira umuze.

Kugira ngo ubyumwe neza umwe muri aba bantu ku munsi aba akeneye kubona garama 300 z'umuceri mubisi, garama 150 z'ibishyimbo, ibiyiko bibiri by'amavuta (25 gm), na garama 300 z'imboga kugira ngo mu mubiri we hinjiremo kilocalories 1.814.

Icyakora, imibare iheruka igaragaza ko umubare w'abafite imirire idahagije ugenda ugabanyuka buhoro buhoro kuko bavuye kuri 40,2% mu 2019 bagera kuri 29,9% mu 2025.

Ibi bigaragaza intambwe imaze guterwa mu kongera ubushobozi bwo kubona ibiribwa no kunoza imirire mu gihugu.

Umubare w'abantu bafite imirire mibi nawo wavuye kuri miliyoni 5 mu 2019 ugera kuri miliyoni 4.1 mu 2025.

Muri iki cyumweru u Rwanda rwohereje mu mahanga toni 9.145.

Ikawa ni yo yinjirije u Rwanda amafaranga menshi muri icyo gihe, aho zari toni 961 zinjije miliyoni 6,67 z'Amadolari. Ibi bituma ikawa ikomeza kuba kimwe mu bicuruzwa by'ingenzi mu byinjiriza igihugu amadovize menshi.

Icyayi cyinjirije igihugu miliyoni 1,28 z'Amadolari, nyuma yo kohereza mu mahanga toni 419. Imboga nazo zinjije 991.055 $, aho toni 270 zazo zoherejwe ku masoko yo mu mahanga.

Ku rundi ruhande, toni 364 z'imbuto zoherejwe mu mahanga zinjiza 454.980$. Izi mbuto zagurishijwe cyane cyane muri Leta Zunze Ubumwe z'Abarabu, u Buholandi no mu bihugu bya Afurika.

Indabo na zo zoherejwe ku masoko yo mu Buholandi no mu Bwongereza, aho toni 10 zazo zinjije 50.898 $. Ibikomoka ku matungo byo byinjije 425.294 $ nyuma yo kohereza toni 295, ahanini ku masoko yo muri Afurika.

Ibi byabaye mu gitondo cyo kuri uyu wa gatatu, tariki 9 Nzeri 2026, mu Murenge wa Gisenyi, Akagari ka Kivumu, Umudugudu w'Itangazamakuru, mu masaha ya saa 7h00.

Umuvugizi wa Polisi mu ntara y'Iburengerazuba, SP Sylvestre Twajamahoro yabwiye IGIHE ko amakuru bayamenye ubwo bari bahawe amakuru ko hari intsinga z'amashanyarazi zafashwe n'inkongi y'umuriro.

Ati 'Amakuru twayamenye nyuma y'uko umuturage ahamagaye avuga ko insinga z'amashanyarazi zirimo kwaka, tuhageze dusanga n'umuntu wibaga insinga z'amashanyarazi, aho yari amaze gushishura insinga zingana na metero 25, dusaba REG kuba ivanyeho amashanyarazi, birababaje kandi bigaragara ko atakoraga ubu bujura wenyine.'

SP Twajamahoro akomeza agaragaza ko bibabaje kuba umuntu umwe ashobora kwishora mu bujura bw'insinga z'amashanyarazi agatuma umujyi wa Gisenyi wose ubura umuriro w'amashanyarazi, ndetse batazihanganira uwo ari we wese wishora mu bujura bw'insinga z'amashanyarazi.

SP Twajamahoro yahishuye ko abaguzi b'izi nsinga biganje mu gihugu cy'abaturanyi cya Repubulika iharanira Demukarasi ya Congo, na bake b'imbere mu gihugu bacyishora muri ubu bucuruzi.

Yanaboneyeho kwibutsa abaturage ko bibujijwe kugura ibikoresho byibwe ku bikorwaremezo ko ubifatiwemo abihanirwa n'amategeko, ababigura ko bagomba kumenya inkomoko zabyo ndetse no kugira ibitabo bandikamo.

Umurambo wa nyakwigendera utaramenyekana imyirondoro wajyanwe mu bitaro bya Gisenyi gukorerwa isuzumwa mbere y'uko ushyingurwa.