Author: webrwanda

Amakipe yombi yari ahagarariye u Rwanda muri CAF Champions League na Confederation Cup yasezerewe atabashije kugera mu matsinda.

Uyu munsi APR FC yari ihagarariye u Rwanda muri Champions League na Rayon Sports yakinaga Confederation Cup zakinaga umukino wo kwishyura wari gutuma zigera mu matsinda y’imikino Nyafurika.

Rayon Sports yari ifite urugamba rukomeye rwo gutsindira Black Bulls iwayo muri Mozambique kuko yari yayitsindiye mu Rwanda ibitego bibiri ku busa.

Yagiye ibizi ko ari umukino wo gupfa no gukira aho yatangiye isatira cyane ndetse ibona igitego hakiri kare ku munota wa 18 cyatsinzwe na Elie Mokono ku mupira yari ahawe na Iradukunda Elie Tatou.

Mozambique yaje kucyishyura ku munota wa 49 cyatsinzwe na Anuario, Muderi Akbar atsindira Rayon Sports icya kabiri ku munota wa 85 ariko mu gihe yarimo ishaka igitego cya gatatu cyari gutuma bajya mu matsinda, inzozi zaje kuzimangatana ku munota wa 87 ubwo Mouctar Ndiaye yatsindaga icya kabiri umukino warangiye ari 2-2, Black Bulls ikomeza ku giteranyo cy’igitego 4-2.

APR FC yo yari mu Misiri gukina na Zamalek SC yayitsindiye mu rugo igitego kimwe ku busa.

Imibare yari yoroshye kuri APR FC kugira ngo ijye mu matsinda yasabwaga gutsinda uyu mukino hejuru y’igitego kimwe.

Ntibyaje gukunda kuko inzozi zarangiye ku munota wa mbere ubwo Sherif yatsindiraga Zamalek SC igitego cya mbere.

APR FC yagerageje gushaka uko yakwishyura iki gitego ariko biranga umukino urangira ari 1-0 maze Zamalek ikomeza ku giteranyo cy’igitego bibiri ku busa.

Black Bulls yasezereye Rayon Sports

APR FC yasezerewe na Zamalek SC

Binyuze muri Kompanyi ye irereberera inyungu z’abahanzi ya Giti Inc, Junior Giti yamaze gusinyisha umuhanzi mushya, Chiboo.

Binyuze ku mbuga nkoranyambaga ze, umusobanuzi wa filime akaba n’umujyanama w’abahanzi, Junior Giti yahaye ikaze Chiboo.

Junior Giti wari umaze iminsi yemeje ko hari umuhanzi mushya agiye kwinjiza muri Giti Inc, yabishyizeho akadomo kuri uyu wa Gatandatu tariki ya 24 Ukwakira 2026 yakira umwe mu bahanzi bagezweho kandi bafite impano.

Chiboo ni umwe mu bahanzi bagezweho muri iyi minsi aho akunzwe mu ndirimbo nka ‘Mbali’, ‘Okipe’, ‘Vazi’, ‘Jehova’, na ‘Kale’, yasinye amasezerano y’imyaka itanu muri Giti Inc.

Chiboo abaye umuhanzi wa kabiri winjiye muri Giti Inc ni nyuma ya Chriss Eazy umazemo igihe.

Chiboo yamaze kwinjira muri Giti Inc

Junior Giti yasinyishije umuhanzi wa kabiri

Umuhanzikazi Nyiranyamibwa Suzanne yaherekejwe mu cyubahiro mu muhango waranzwe no kuvuga ubuzima bwe, urukundo yakundaga Igihugu n’uruhare yagize mu kubungabunga umuco nyarwanda.

Kuri uyu wa Gatandatu tariki ya 24 Ukwakira 2026 nibwo Nyiranyamibwa Suzanne uheruka kwitaba Imana azize uburwayi yasezeweho bwa nyuma.

Ni umuhango witabiriwe n’abagize umuryango we, inshuti, abahanzi, abayobozi ku rwego rw’Igihugu ndetse n’ibindi byamamare.

Binyuze muri Ntazinda Marcel, Minisiteri y’Urubyiruko n’Iterambere ry’Ubuhanzi, Nyiranyamibwa yari abereye umwe mu bajyanama yashimiye uruhare yagize mu guteza imbere umuco n’ubuhanzi bw’u Rwanda kandi amushimira uruhare yagize mu guteza imbere umuco nyarwanda n’urukundo rw’Igihugu yatoje benshi, ishimangira ko ibisekuru bizaza bizakomeza kumenya indirimbo ze, bigasobanukirwa amateka zibumbatiye n’imbaraga z’ubuhanzi mu gutanga icyizere no kunga abantu.

Uhagarariye umuryango wa Nyiranyamibwa, yavuze ko urupfu rw’uyu mubyeyi rwabatunguye kuko nubwo yavuye mu Bubiligi avuye kwivuza afite imbaraga nke, baketse ko ari umunaniro w’urugendo, ariko nyuma y’iminsi itatu yaje kuremba bahamagara imbangukiragutabara ariko ihagera yamaze kwitaba Imana.

Yavuze ko kandi yari umubyeyi ukunda igihugu cyane.

Ati “Nyiranyamibwa Suzanne yaranzwe no gukunda umuryango we, gukunda abe, ntiyarekeraho, akunda n’Igihugu ku buryo abenshi icyo kintu bakimuziho binyuze mu ndirimbo yahanze abenshi bazi. Muri izo ndirimbo yagaragaje urukundo akunda Igihugu cye, akunda umuryango we, akunda abe, akunda inshuti, akunda abantu muri rusange.'

Nyiranyamibwa Suzanne akaba yaritabye Imana azize uburwayi tariki ya 16 Ukwakira 2026 aho yari afite imyaka 83.

Nyiranyamibwa Suzanne yasezeweho bwa nyuma uyu munsi, igitambo cyo kumusabira kikaba cyabereye muri Regina Pacis ni mu gihe yashyinguwe mu irimbi rya Rusororo.

Nyiranyamibwa Suzanne yaherekejwe mu cyubahiro

Mariya Yohana yari yaje guherekeza Nyiranyamibwa Suzanne

Umuhanzi Nyarwanda usigaye utuye muri Leta Zunze Ubumwe za Amerika, Nsengiyumva Emmanuel wamamaye nka Emmy we n’umugore we Umuhoza Joyce[Hoza] bari mu byishimo bikomeye byo kwibaruka imfura yabo.

Mu butumwa yanyujije ku rukuta rwe rwa Instagram, Emmy yagize ati “Imana yaduhaye impano ihebuje kurusha izindi! Umwana wacu w’imfura akaba umuhungu. Nshimye Imana yamurinze akavuka amahoro, kandi nzahora nshimira umugore wanjye ku rukundo rwe, imbaraga n’ibyo yanyuzemo byose kugira ngo azane uyu mwana ku Isi. Imitima yacu yuzuye ibyishimo n’umunezero. Ikaze ku isi, mwana wanjye Ocean!'

Bibarutse imfura yabo nyuma y’uko mu Kuboza 2021 ari bwo bakoze ubukwe maze muri 2023 umugore we amusanga muri Leta Zunze Ubumwe za Amerika ari naho batuye uyu munsi.

Emmy na Hoza bibarutse imfura yabo

Imfura ya Emmy na Hoza

Umunyarwandakazi wabaye Nyampinga w’u Bufaransa wa 2000, Sonia Rolland filime yakoze akinamo ari umukinnyi wa Basketball yise ‘Kwibuka, se souvenir’ igiye kwerekanwa mu mijyi irindwi igize iki gihugu.

Ni filime izerekanwa kuva tariki ya 26 kugeza tariki ya 30 Ukwakira 2026, mu mijyi ya La Baule, La Roche-sur-Yon, Royan, Rochefort, La Rochelle, Lomme na Mâcon.

Ni mbere y’uko isohoka kumugaragaro tariki ya 4 Ugushyingo 2026.

Ni filime ishingiye ku nkuru ya Sonia Rolland, akinamo yitwa Lia ari umukinnyi wa Basketball ufite unkomoko mu Rwanda no mu Bufaransa aho ihuza inkuru y’ubuzima bwe n’amateka y’u Rwanda, by’umwihariko ingaruka Jenoside yakorewe Abatutsi mu 1994 yasigiye abayirokotse n’imiryango yabo.

Muri filime yerekana Lia yahamagawe mu ikipe y’igihugu y’u Rwanda ya Basketball igiye kwitabira igikombe cya Afurika, akabona amahirwe yo kugaruka mu Rwanda, ibintu bimwibutsa ibihe bikomeye yanyuzemo akiri umwana, bigatuma yongera gutekereza ku nkomoko ye n’uruhare kwibuka amateka bigira mu buzima bwe.

Iyi filime irimo abandi bakinnyi nka Jean-Hugues Anglade, Parfait Mugiraneza Ntambiyindekwe, Isabelle Kabano, Jean-Henri Compère na Jacques Bahige.

Imijyi iyi filime izerekanwamo

Sonia Rolland akina muri iyi filime yitwa Lia

Gateka Esther Brianne wamamaye mu ruganda rw’imyidagaduro nka DJ Brianne, ari mu gahinda gakomeye nyuma yo gupfusha nyina umubyara.

Yitabye Imana mu gitondo cyo kuri uyu wa Gatanu tariki ya 23 Ukwakira 2026 aho yazize uburwayi yari amaranye iminsi.

ISIMBI yamenye amakuru ko uyu mubyeyi yari amaze iminsi arwaye ariko nk’uko umwe mu bantu ba hafi b’uyu muryango yabivuze, yari yatangiye koroherwa bizeye ko agiye gukira.

Yitabye Imana mu gihe DJ Brianne yari amaze iminsi Mike yimukiye gutura muri Canada aho yabonye umuryango umwakira.

DJ Brianne ni umwe mu bagezweho mu Rwanda mu ruganda rw’imyidagaduro by’umwihariko mu kuvangavanga imiziki.

DJ Brianne yapfushije umubyeyi we

Rayon Sports yamaze kumenyesha CAF ikibazo yahuriye nacyo muri Mozambique aho ikipe ya Black Bulls yayimye imodoka, bikayikereza gukora imyitozo.

Rayon Sports yageze muri Mozambique ejo hashize ku wa Gatatu, ikaba yaragiye gukina na Black Bulls umukino wo kwishyura wa CAF Confederation Cup.

Umukino ubanza wabereye mu Rwanda, Black Bulls yatsinze Rayon Sports ibitego bibiri ku busa umukino wo kwishyura ukaba uzaba ku wa Gatandatu muri Mozambique.

Uyu munsi nibwo yakoze imyitozo ya mbere muri Mozambique yabaye mu gitondo na nimugoroba, gusa ntiyishimiye uko yakiriwe.

Murenzi Abdallah yavuze ko imyitozo ya mbere yabaye mu gitondo cyo kuri uyu wa Kane tariki ya 22 Ukwakira ariko iyagombaga kuba nimugoroba yatinze kubera ko bari bimwe imodoka (bus) ibatwara ku kibuga.

Ati “imyitozo ya kabiri yari iteganyijwe uyu munsi saa moya ariko kubera imitegurire itari myiza y’ikipe yatwakiriye murabona ko igiye gutangira hafi saa 20h30′ kubera ko badukerereje kubona imodoka ariko ibyo turabimenyereye hari amakipe utarebye neza atakwakira neza.”

Yakomeje avuga ko banamaze kubimenyesha CAF ko batakiriwe neza muri Mozambique.

Ati “Twagerageje kuvugana n’ubuyobozi ntibyakunda, icyo twakoze twakoze raporo ijya muri CAF kuko niko amategeko aba abiteganya ariko twagerageje kuvugana hari uwatubwiye ngo ari mu rusengero, undi atubwira ko twibeshye nimero.”

Murenzi Abdallah yemeza ko babonye neza ko babikoreye ubushake nta kindi kibazo kirimo.

Rayon Sports yakoze imyitozo ya mbere muri Mozambique, gusa ntiyishimiye uko yakiriwe