Blog

Umuherwekazi ukomoka muri Uganda uba muri Afurika y’Epfo, Zari Hassan mu mvugo irimo uburakari yasubije umunyamakuru wavuze ko urupfu rw’uwahoze ari umugabo we rurimo urujijo ko ashobora kuba akiriho, yamwibukije ko iyo umuntu akennye adatekereza neza.

Simon Kaggwa Njala akaba umunyamakuru wa NBS TV abinyujije ku rukuta rwe rwa X, yavuze ko kugeza uyu munsi urupfu rwa Ivan Ssemwanga ari rwo rupfu rurimo urujijo.

Ati “Ni rwo rupfu rurimo urujijo kugeza uyu munsi. Nagize amatsiko y’ibyakurikiye urupfu. Ubwo nahamagaraga ku bitaro bya Steve Biko bampamirije ko nta murwayi witwa Ssemwanga wageze muri ibyo bitaro.”

Yakomeje avuga ko ashidikanya ku kuba Ivan Ssemwanga yapfuye. Ati “Ndashidikanya niba Ssemwanga yarapfuye. Nta muntu wabonye raporo y’icyamwishe, yewe na Ambassade ya Uganda muri Afurika y’Epfo.”

Ibi ntabwo byashimishije Zari Hassan uzi neza ko Ivan Ssemwanga yapfuye muri Gicurasi 2017 aho yamubwiye ko atari byo ari imitegerereze ya gikene, ko n’ikimenyimenyi umuhungu we ari we wamukarabije mbere yo kumushyingura nk’uko umuco wa Uganda ubiteganya.

Ati “Naje gusanga iyo udatekereza neza unakennye, utangira gutekereza ibintu bidahari. Yavuze ko yahamagaye Ibitaro muri Afurika y’Epfo asaba raporo, yabikoze nka nde? Ibitaro inaha ni abanyamwuga. Ntabwo wapfa guhamagara uko wiboneye usaba raporo y’umurwayi ngo bayiguhe. Ni amategeko agenga amabanga y’abarwayi.”

Yakomeje agira ati “Icya kabiri ubwo yahamagaraga ni uwuhe Ssemwanga yabajije? Ko ubwo twajyaga hanze twahinduye amazina. Ubundi ni gute ujya gushaka umuntu wapfuye? Ni iby’iki?”

Yashimangiye ko bo bizera ko yapfuye kandi bakoze ibyo basabwaga byose kugira ngo ashyingurwe mu cyubahiro.

Ati “Turabizi ko yapfuye, twarabyemeje, tumufungira mu gikapu cy’imirambo, dushaka impapuro kugira ngo tumugarure muri Uganda. No muri Uganda barasuzumye ngo bamenye icyamwishe, abahungu be nibo bamwongeje nk’uko umuco ubiteganya. None muntu ushaje urashaka iki hano?”

Zari Hassan na Ivan Ssemwanga bakoze ubukwe muri 2001 baza gutandukana muri 2013, maze muri Gicurasi 2017 aza kwitaba Imana aho yasize abahungu batatu yabyaranye na Zari.

Zari Hassan yavuze ko Ivan Ssemwanga yapfuye

Njala yavuze ko hari urujijo mu rupfu rwa Ivan Ssemwanga

Iradukunda Nadine wamamaye nka Nana Nadine muri Sinema Nyarwanda yasezeranye imbere y’amategeko n’umukunzi we bamaze igihe bakundana .

Ni umuhango wabaye ejo hashize ku wa Kane tariki ya 29 Ukwakira 2026, ubwo Nana yamanikaga akaboko akemera kuzabana akaramata n’uwo yihitiyemo, Fredoh nk’amazina akoresha ku mbuga nkoranyambaga.

Basezeranye imbere y’amategeko nyuma y’uko mu minsi ishize yasangije abamukurikira ku mbuga nkoranyambaga yakorewe ibirori byo gusezera ku bukumi bizwi nka Bridal Shower.

Ibi byose bibaye mu gihe tariki ya 15 Nyakanga 2026 ari bwo Nana Nadine yambitswe impeta ya Fiançailles n’umusore bamaze igihe bakundana biyemeza kuzabana akaramata.

Nana Nadine ni umwe mu bakinnyi ba filime bagezweho mu Rwanda. By’umwihariko, yakunzwe muri filime zirimo City Maid, Maya, Hurts Harder n’izindi nyinshi zatumye izina rye rirushaho kwamamara.

Mu mezi ashize, Nana Nadine, wari umaze kuzamura izina rye muri sinema y’u Rwanda, yatangiye gukora filime ye bwite yise Stain.

Nana Nadine yasezeranye imbere y’amategeko na Fredoh

Impera z’icyumweru ku bakunzi ba ruhago ndetse n’abanyabirori, amaso bayerekeje i Rubavu aho amakipe abiri akomeye mu Rwanda, Rayon Sports na APR FC zizaba zerekeje gukinira muri uyu mujyi.

Kujya gukinirayo ni kimwe no kuhakura intsinzi ni ikindi cyane ko aya makipe atajya akunda guhirwa n’uyu mujyi iyo yamanukiyeyo rimwe.

Uzaba ari umunsi wa karindwi wa BK Pro League aho ejo ku wa Gatandatu tariki ya 31 Ukwakira 2026, APR FC izaba ikina na Etincelles FC.

Umukino uheruka guhuza aya makipe yombi i Rubavu muri shampiyona, hari tariki ya 18 Mata 2026, APR FC yahatsindiwe ibitego bibiri kuri kimwe.

Bukeye bwaho ku Cyumweru, Marine FC izaba yakiriye Rayon Sports. Umukino uheruka guhuza ya makipe i Rubavu tariki ya 2 Ukwakira 2025, Rayon yayitsinze igitego kimwe ku busa.

Uretse iyi mikino, iyo aya makipe yagiye i Rubavu biba ari ibindi bindi kuko abakunzi bayo benshi baba bamanutseyo hari n’abajyayo kuryoshya gusa iby’umupira bitabareba, muri rusange aba ari urujya n’uruza rw’abantu, muri make haba hahiye ak’aya mvugo y’ubu.

Gahunda y’umunsi wa Karindwi wa BK Pro-League 2026-27

Ku wa Gatanu tariki ya 30 Ukwakira 2026

Kiyovu Sports vs Kigali FC

Ku wa Gatandatu tariki ya 31 Ukwakira 2026

Amagaju FC vs Musanze FC
Etincelles FC vs APR FC
Gasogi United vs Al Hilal SC
Etoile del’Est vs Gorilla FC
Al Merrikh SC vs Mukura VS

Ku Cyumweru tariki ya 1 Ugushyingo 2026

Gicumbi FC vs Sunrise FC
Marine FC vs Rayon Sports
Police FC vs Bugesera FC

Rayon Sports na APR FC ziramanuka i Rubavu mu mpera z’iki cyumweru

Gateka Esther wamamaye nka Dj Brianne yavuze ko urwibutso afite kuri mama we uheruka kwitaba Imana ari uburyo yamwigishije gusenga no gutanga icya cumi.

Tariki ya 23 Ukwakira 2026 nibwo mama wa Dj Brianne, Mukantabana Dative yitabye Imana, ikaba ari inkuru yashenguye umuryango we n’inshuti ze muri rusange.

Dj Brianne yavuze ko yari inshuti ye cyane, amushimira kuba yarabigishije gusenga ndetse no gutanga icya cumi.

Ati “Mama wanjye yari inshuti yanjye twari tumeze nk’abantu bakurikirana atari na mama wanjye gusa ahubwo ari n’umuvandimwe wanjye, yadutoje gusenga, adutoza gutanga icya cumi, ikindi kintu nishimiye njyewe icya cumi cyanjye ngitanga kuri ADEPR ya Kimihurura.”

Yakomeje avuga ko hari igihe yabonaga agiye gutanga amafaranga menshi akumva atayatanga ariko nyina yamwigishije akamaro n’igisobanuro cy’icya cumi.

Ati “Nabaga nakoze ibiraka byinshi nkabona amafaranga menshi, nareba icya cumi ngiye gutanga nkabona ni amafaranga menshi, nkabwira mama nti ‘mama njyewe aho kugira ngo nyatange mu cya cumi nta kuntu nayafashisha abana ko nabwo naba nkoreye umugisha?’ Mama agerageza kunshobanurira icyo icya cumi kivuga n’aho gitakundukanira n’amafaranga yo gufasha abana, ndamushimira kuko yarabintoje.”

Yishimiye ko kandi aho atanga icyo cya cumi ari n’aho umuhango wa nyuma wo kumusezeraho wabereye.

Yashimiye buri umwe wese wababaye hafi, aho yahamije ko kandi uyu mubyeyi yari inshuti ya buri wese.

Ati “Mama sinzi ukuntu namuvuga, yari inshuti ya buri wese, yari inshuti y’inshuti zanjye, inshuti zanjye zamukundaga kubera ukuntu akunda kubasetsa cyane, ni umuntu wagiye atwitangira aho bishoboka, aturera wenyine. Ejobundi nabajije Sarah nti ese ko mama apfuye ugiye kuba umuntu mukuru dufatanye inshingano, arambwira ngo sinabishobora.”

Yamushimiye kuba yaramufashije kurera umwana yiyemeje kurera, aho ahamya ko iyo ataba we atari kubishobora.

Ati “Mama namushyiriye umwana nari nabonye ndamubwira nti mfasha umunderere njyewe ibintu by’abana ntabyo nzi n’uwanjye urabizi ko ari wowe wamureze, ni umwana Imana yampaye, yamufashe afite amezi atandatu ubu yari agize imyaka ine.”

Yavuze ko atavuga ngo nyuma y’ibi byago bigiye kugenda gutya na gutya, gusa icyo yavuga ni uko Imana yamukunze ikaba yamwisubije.

Nyina wa Brianne yitabye Imana

Dj Brianne yashenguwe n’urupfu rwa mama we

Umuhanzi w’indirimbo zo kuramya no guhimbaza Imana, Yves Rwagasore uba muri Canada, yashyize hanze indirimbo nshya yise 'Nizeye', avuga ko yayanditse ashingiye ku buhamya bw’ibyo Imana yamukoreye mu buzima bwe, ndetse n’amasezerano yayihaye akabona asohora.

Uyu muhanzi avuga ko iyi ndirimbo igamije gukomeza abantu banyura mu bihe bikomeye, kubibutsa ko bakwiye gukomeza kwiringira Imana no kwihangana, kuko isohoza ibyo yasezeranyije.

Yves Rwagasore asobanura ko 'Nizeye' atari indirimbo yanditse agamije kuririmba gusa, ahubwo ari igihangano gikubiyemo ubuhamya bw’ibyo yanyuzemo, ibyamugoye ndetse n’uburyo yabonye Imana ikora mu buzima bwe.

Mu kiganiro yagiranye n’itangazamakuru yasobanuye impamvu yahisemo kwita iyi ndirimbo 'Nizeye', ubutumwa ayifuriza abazayumva n’ibindi bikorwa afite muri gahunda z’ivugabutumwa.

Yves Rwagasore yavuze ko indirimbo 'Nizeye' yayanditse ashingiye ku byo Imana yamukoreye mu gihe cy’imyaka myinshi, aho yagiye ahura n’ibintu byasaga n’ibigoye ariko nyuma akabona Imana ibikuraho.

Ati: 'Nizeye yaje mu buryo bw’ubuhamya. Ni indirimbo nanditse ishingiye ku byo Imana yankoreye. Nyuma y’imyaka myinshi, uwabibara ntiyabishobora. Hari ibyo nabonaga bigoye ariko Imana ikabikuraho. Amasezerano menshi yarasohoye, andi na yo nizeye ko azasohora.'

Yavuze ko ubutumwa nyamukuru buri muri iyi ndirimbo ari ugukomeza abantu no kubibutsa ko bakwiye gukomeza kwiringira Imana, kuko isohoza ibyo yavuze.

Yongeyeho ko kwihangana no gutegereza ari ingenzi mu rugendo rwo kwizera, kuko amasezerano y’Imana ashobora gusohora nubwo umuntu yaba yarategereje igihe kirekire.

Uyu muhanzi yavuze ko izina 'Nizeye' rifite igisobanuro gikomeye mu buzima bwe, kuko rimwibutsa ko akwiriye kubaho yiringira Imana kandi adashidikanya ku bushobozi bwayo.

Ati: 'Izina Nizeye rifite igisobanuro gikomeye mu buzima bwanjye; ko nkwiriye kubaho nizeye Imana kuko ntishidikanywaho, ikora icyo yavuze kandi ntishobora kwivuguruza.'

Yasobanuye ko ibyo aririmba muri iyi ndirimbo ari ubuhamya bushingiye ku byo Imana ikomeza kumukorera buri munsi, ndetse n’ibyo yari yarayisezeranyije mu bihe byashize ikaza kubisohoza.

Kuri we, iyi ndirimbo ni uburyo bwo kugaragaza ko kwizera Imana bidakwiye gushingira gusa ku byo umuntu arimo kubona muri ako kanya, ahubwo ko bikwiye no gushingira ku byo yabonye Imana imukorera mu bihe byatambutse.

Yves Rwagasore yavuze ko yifuza ko umuntu wese uri mu bihe bikomeye cyangwa wacitse intege azumva 'Nizeye' akabona imbaraga zo gukomeza urugendo rwe rwo kwizera.

Yifuza ko abazayumva bazayigiramo ibyiringiro byo gukomeza kwiringira Imana, kabone nubwo baba banyura mu bihe bitoroshye cyangwa batarabona ibisubizo by’ibyo bayisaba.

Ati: 'Umuntu uri mu bihe bikomeye cyangwa wacitse intege, Nizeye yongere imubere inkomezi, ibyiringiro byo gukomeza kugirira Imana icyizere yonyine, kuko ari yo umuntu yizera ntimukoze isoni kandi byose irabishoboye kubikora izabikora. Kwizera Imana ni urufunguzo rukingura imigisha yacu.'

Yavuze ko yifuza ko ubutumwa buri muri iyi ndirimbo bwagera ku bantu benshi, bukabafasha gukomeza kugira ibyiringiro no kutadohoka mu kwizera kwabo.

Yves Rwagasore yavuze ko gutegura indirimbo bisaba imbaraga n’ubwitange mu byiciro bitandukanye, kuva igitekerezo cyayo gitangiye kugeza igihangano gisohotse.

Yasobanuye ko ari ngombwa kudashyira amarangamutima y’umuntu imbere, ahubwo akemera kuyoborwa n’Umwuka Wera kugira ngo ubutumwa arimo gutegura bugere ku bo bugenewe.

Ati: 'Gutegura indirimbo bisaba imbaraga mu buryo bunyuranye. Kuva umushinga wayo utangiye, kimwe n’izindi zose, bigusaba kudashyira amarangamutima yawe imbere, ukumvira Umwuka Wera ko akuyobora, kuko ubwo butumwa uba wahawe buba bufite umuntu runaka bugenewe.'

Yongeyeho ko mu rugendo rwo gutegura indirimbo ahura n’imbogamizi zitandukanye, ariko ko bisaba kuzihangana no kudacika intege kugeza igihangano kigeze ku rwego rwo gushyirwa hanze.

Uyu muhanzi yavuze ko iyi ndirimbo ifite umwihariko wayo ugereranyije n’izindi yari yarasohoye, cyane cyane ku buryo yakozwe no ku rwego rw’imicurangire n’itunganywa ry’amajwi.

Yasobanuye ko 'Nizeye' iri mu buryo bwa live, ikaba ifite umwihariko yifuza ko abakunzi b’umuziki we bazibonera ubwabo.

Ati: 'Icyo abakunzi bakwiye kwitega muri Nizeye ni ubudasa bwayo. Iri mu buryo bwa live kandi ifite umwihariko wayo ugereranyije n’izindi zabanje. Ubona ko urwego rwayo rwazamutse mu buryo bwa production. Ndashishikariza buri wese kuyiha umwanya akayigira iye.'

Yasabye abakunzi be n’abandi bakunda indirimbo zo kuramya no guhimbaza Imana guha umwanya iki gihangano, bakakumva kandi bakazirikana ubutumwa bukirimo.

Nubwo yashyize hanze indirimbo 'Nizeye', Yves Rwagasore yavuze ko ibikorwa bye by’umuziki bikomeje, aho ari no gukora kuri album ye ya gatatu yise 'Ndakomeje'.

Yavuze ko nyuma y’iyi ndirimbo hari izindi azakomeza gushyira hanze, mu rwego rwo gukomeza kugeza ubutumwa bw’ivugabutumwa ku bantu batandukanye.

Ati: 'Nyuma ya Nizeye nzashyira hanze izindi ndirimbo, kuko ndi gukora kuri album ya gatatu (3), ni yo indaje inshinga. Ndakomeje album 3.'

Yongeyeho ko afite ibikorwa byinshi ateganya gukora mu gihe kiri imbere, birimo gutunganya ibihangano bishya, gukora ibitaramo no gukomeza ivugabutumwa hirya no hino.

Yves Rwagasore akorera ibikorwa bye ku mbuga nkoranyambaga zitandukanye, aho abakunzi be bashobora gukurikiranira hafi ibihangano bye n’andi makuru ajyanye n’umuziki we.

Yves Rwagasore yasohoye indirimbo Nizeye

Umutoza wa Rayon Sports, Haringingo Francis yavuze ko nta kibazo na kimwe afitanye na Elie Tatou ari itangazamakuru rirema ibyo bibazo.

Yabigarutsemo mu kiganiro n’itangazamakuru nyuma y’umukino wa Shampiyona yaraye atsinzemo Musanze FC bitatu ku busa.

Hamaze iminsi bivugwa ko umubano utari mwiza hagati ya Haringingo Francis na Iradukunda Elie Tatou ari nayo mpamvu hari imikino imwe n’imwe atakinaga.

Haringingo Francis yavuze ko nta kibazo gihari, itangazamakuru ari ryo rishaka kuzana ibyo bibazo.

Ati “Ikibazo kiri he? Ikibazo ni mwe mushaka kukizana, ni mwe mushaka kukizana rwose. Nyuma y’umukino twakinnye wa Panthère, umukino ukurikira Tatou yarakinnye, n’ukurikira yarakinnye, kuki mutabivuze icyo gihe? Muhengereye igihe adakinnye muvuga ko ari ikibazo.”

Yakomeje avuga ko ubwo yageraga muri Rayon Sports ari we washyizemo imbaraga nyinshi ngo Tatou ayizemo, rero ntacyo yaba apfa na we.

Ati “Nageze muri Rayon Sports nashyizemo imbaraga kugira ngo tugure Elie Tatou, yari amaze imyaka ingahe muri Mukura VS? Imyaka ine. Ese andi makipe ntabwo yamubonaga? Kuki nageze muri Rayon Sports nkababwira turashaka Tatou? Muzi uko Tatou twakoze amasezerano ye?”

Yanahishuye ko umukino wa gicuti bavuga bapfuye amubwira kwishyushya ngo ajye mu kibuga undi akamubwira ko ajyamo atishyuhije, Tatou atari anawuriho yari i Huye.

Ati “Uwo mukino wa gicuti Tatou ntabwo yari ahari we na Zuberi nari nabahaye uruhushya rwo kujya i Huye bakazana ibintu byabo bari batarazana, twari twabivuganye, nari mbizi ninjye wabahaye uruhushya.”

“Hari abantu bavuga ibintu ugasanga barakwizakwiza amakuru ariko rimwe na rimwe tujye tuvuga ngo reka tubaze amakuru tubaze uwo bireba, ibi bintu bimeze gute?”

Haringingo Francis kandi yavuze ko ibimaze iminsi bivugwa ko ashobora kwirukanwa atabizi kuko ntabyo araganira n’ubuyobozi.

Haringingo Francis yavuze ko nta kibazo afitanye na Elie Tatou

Tatou bimaze iminsi bivugwa ko afitanye ikibazo na Haringingo Francis