Author: webrwanda

Uko tunenga ibitagenda, tujye tunafata umwanya dushime abitwaye neza, umutoza w’ikipe y’igihugu, Stephen Constantine akwiye gushimwa, ahabwe indabo ze, amanota yose kuko nubwo hari abatangiye batemera imikinire ye ubu nta ruvugiro.

Ubu uyu mutoza w’imyaka 63 w’Umuhinde wavukiye mu Bwongereza, yego n’ubuze icyo asebya inka aravuga ati 'Dore icebe ryayo', gusa muri aka kanya biragoye ko wamubonaho inenge, n’iyo yaba ihari yaba ari ya ntuza y’uwo ukunda ubonamo amaribori.

Iyi nkuru se nyihere muri 2014? Ariko mureke nyihere muri Werurwe 2026 ubwo Stephen Constantine yongeraga kugirwa umutoza w’ikipe y’igihugu Amavubi. Ntabwo byatinze kujya mu kwezi kwa buki n’Abanyarwanda kuko yahise atwara irushanwa rya FIFA Series yabereye mu Rwanda.

Bamwe ntabwo babihaye agaciro kuko bavugaga ko ari imikino ya gicuti kandi bakinnye n’ibihugu bidakomeye.

Yatangiye gutegwa imikino yo gushaka itike y’igikombe cya Afurika cya 2027 aho u Rwanda rwahereye kuri Liberia tariki ya 25 Nzeri 2026 i Kigali, aho mbere y’uyu mukino abantu bose bahurizaga ku kuba nta gisobanuro yari kubona aramutse atsinzwe nayo.

Byaje kurangira Amavubi atsinze 3-1. Nubwo yatsinze ntabwo benshi bamwemeye aho bavugaga yakinnye nabi kuko Liberia yamurushije ndetse imikinire ye itanyuze benshi.

Urugamba rwari rukurikiyeho ni umukino wo mu itsinda K w’umunsi wa kabiri mu gushaka itike y’Igikombe cya Afurika cya 2027 aho rwasuye Cape Verde.

Uyu mukino wabereye muri Cape Verde ejo hashize ku wa Kabiri, nta muntu wakekaga ko yajya gutsindira Cape Verde iwayo aho bavugaga ko icyo yakora gikomeye ari ukunganya nayo.

Stephen Constantine yaje gucecekesha buri wese atsindira Cape Verde iwayo ibitego 2-1 binatuma ayobora itsinda K n’amanota 6 kuri 6.

Constantine yahinduye iki mu Mavubi?

Gutsinda imikino ine yikurikiranya, ntabwo ari impanuka ahubwo ni ibintu biba byateguwe cyane ndetse n’abakinnyi bakumva umutoza.

Ni umutoza waje agarura gahunda yo gukina sisiteme ya 4-4-2, abantu batabyumvaga kuko hari bamwe bafata nk’abeza bigaragara ko bashobora kutazigera bibona muri iyi mikinire nka Hakim Sahabo na Samuel Gueulette kuko iyi mikinire nta nimero 10 aba akeneye mu kibuga.

Iyo urebye ibitego Constantine atsinda kuva muri FIFA Series kugeza muri iyi mikino yo gushaka itike y’Igikombe cya Afurika, ibitego atsinda biba ari bimwe, byateguwe mu buryo busa kandi bigatanga umusaruro.

Ikindi kintu gikomeye ni umutoza wirinda guhindura ikipe ye itsinda kuko 11 yabanjemo muri FIFA Series nibo yabanjemo ku mukino wa Liberia, kuri Cape Verde ahinduramo Jojea azana Mugisha Gilbert, ni ikipe imaze kumenyerana kandi bumva ibyo umutoza ababwira. Iki ni kimwe mu bifasha Constantine.

Iyo uteye icyumvirizo, bakubwira ko ari umutoza ugira igitsure ariko na none wumva abakinnyi be, wubatse umubano ukomeye n’abakinnyi ku buryo bamufata nk’umubyeyi. Yagaruye abakinnyi basaga n’abaciwe mu ikipe y’igihugu kandi babanye neza n’abandi nka Samuel Gueulette, Hakim Sahabo nubwo atahamagawe ni uko adakina ariko muri FIFA Series yari yaramuhamagaye.

Ibirenze kuri ibi, ubu u Rwanda rufite abakinnyi beza, bakina ku rwego rwiza hari nk’abavandimwe Leroy-Jacques Mickels na Joy-Lance Mickels ubu noneho biyongereweho na Emeran Noam bakina ku rwego rwiza nib o baheruka kwinjira mu Mavubi, basanzemo abandi bakinnyi nabo bakina ku rwego rwiza nka Mutsinzi Ange, Kavita, Mugisha Bonheur, Bizimana Djihad, Kwizera Jojea n’abandi.

Stephen Constantine akaba ari mu nzira zo kongera gukora ibyo yakoze muri 2014 kuko yatoje u Rwanda kuva 2014-2015 aho yari yafashije Amavubi kubona itike y’Igikombe cya Afurika cya 2015 ariko rwaje guhanwa nyuma yo kuregwa gukinisha Daddy Birori wari ufite imyirondoro itandukanye.

Ubwo yatozaga kandi Amavubi nibwo u Rwanda rwigeze kugira umwanya mwiza ku rutonde ngaruka kwezi rwa FIFA aho mu Kuboza 2014 rwabaye urwa 68 ku Isi.

Stephen Constantine impinduka ze mu Mavubi ziragaragara

Amavubi ubu ari mu bihe byiza ibifashijwemo na Stephen Constantine

Hari na benshi bavuga ko batarabona Umuyobozi w'umudugudu w'umugore. Imibare igaragaza ko abayobozi b'umudugudu b'abagore ubu ari 18%. Ni mugihe Itegeko Shinga ry'u Rwanda rigena ko abagore bagomba guhagararirwa ku kigero cya 30% mu nzego zose zirimo iz'ibanze.

Komisiyo y'Igihugu y'Amatora (NEC) iri gutegura igikorwa cy'amatora y'inzego z'imitegekere y'igihugu yegerejwe abaturage, ndetse n'ay'Inama z'Igihugu, azaba mu mpera z'umwaka.

Iyi komisiyo ivuga ko muri aya matora, urubyiruko rw'ingeri zitandukanye, abagore ndetse n'abafite ubumuga bashishikarizwa kwiyamamariza imyanya yose ishoboka mu gihe bujuje ibisabwa kugira ngo hazibwe icyuho cy'umubare muke w'ibi byiciro mu nzego zitandukanye z'ubuyobozi.

IGIHE yagiranye ikiganiro cyihariye n'Umunyabanga Nshingwabikorwa wa Komisiyo y'Igihugu y'Amatora, Musabyimana Jean Claude, maze asubiza ibibazo buri wese yakwibaza kuri aya matora.

IGIHE: Ni iki muri rusange abantu bamenya kuri aya matora?

Musabyimana Jean Claude: Muri rusange ni amatora ateganyijwe hagati y'ukwezi kwa cumi n'ukwa cumi na kumwe. Tuyita amatora y'inzego z'imitegekere y'igihugu yegerejwe abaturage, ndetse n'amatora ya komite nyobozi z'Inama z'Igihugu. Tugira inama z'igihugu eshatu; Inama y'igihugu y'Urubyiruko, Inama y'Igihugu y'Abagore ndetse n'Inama y'Igihugu y'Abafite ubumuga. Aya matora akorwa nyuma y'imyaka itanu bivuze ko ubu abayobozi dufite muri iyo myanya batowe mu 2021.

Aya matora kandi agirwamo uruhare n'abaturage b'ingeri zose guhera no ku nzego z'ibanze. Ahera hasi kuva aho abantu batuye ku midugudu ukazamuka ukagera ku rwego rw'akarere, nko ku Nama z'Igihugu ho agera no ku rwego rw'igihugu.

Muri aya matora abantu batora mu buryo bibiri; uburyo butaziguye: aho abaturage batora ku mugaragaro nko ku rwego rw'umudugudu, naho uburyo buziguye bwo ni aho abantu batorwa n'abandi batowe. Ibi biba iyo amatora ageze mu nzego zo hejuru, ni ho abatorewe guhararira ibyiciro bitandukanye ku rwego rw'umudugudu bagenda bitoramo ababahagarira uko inzego zizamuka.

Buri wese ari afite uburenganzira n'inshingano byo kwitabira aya matora?

Umuntu wese uri kuri lisite y'itora afite inshingano n'uburenganzira byo gutora. Itandukaniro ry'aya matora n'andi tujya dutegura ni uko kuri aya umuntu wese atorera aho ari cyangwa atuye. Ni mu gihe mu yandi bisaba ko umuntu utora abanza kwireba kuri lisite y'itora, akareba aho agomba gutorera bitewe n'aho yiyandikishirije. Aya matora ni aya rubanda, bivuze ko abaturage batora abantu babana na bo kandi banaturanye muri rusange. Utora si ngombwa ngo abe ari kuri lisite y'itora y'aho ari mu gihe cy'amatora.

Abazatorwa bazatoranywa bate? Hazabaho gutanga kandidatire?

Muri aya matora hari aho bidasaba gutanga kandidatire nko ku rwego rw'umudugudu, akagari n'umurenge. Muri izi nzego, abifuza kwiyamamaza batangaza cyangwa bakamamazwa n'abandi ako kanya mu gikorwa cy'amatora imbere y'inteko ibatora. Iyo abakandida bamaze kuboneka, bahagarara imbere maze abatora uwo bahisemo bakamuhagarara inyuma.

Ku rundi ruhande hari aho dusaba kandidatire. Kandidatire tuzisaba ku bantu bifuza kuba abanjyanama mu karere. Ni ukuvuga kubifuza kuba mu bajyanama umunani rusange b'akarere ndetse no ku bifuza kujya mu bajyanama bagize 30% by'abajyanama bagize njyanama y'akarere.

Aha hatorwa abajyanama batanu b'abagore basanga abandi bajyanama 17 bagize akarere aribo; abajyanama rusange umunani, ndetse n'abandi bane bahagarariye ibyiciro; by'uhagarariye abagore, urubyiruko, abafite ubumuga ndetse n'uhagarariye abikorera mu karere.

Ni ibihe bisabwa abashaka kwiyamamariza kujya muri njyanama ndetse no mu Nama y'Igihugu guhera ku karere kuzamura?

Itegeko rivuga ko kugira ngo wiyamamarize kujya muri njyanama no mu Nama y'Igihugu ugomba kuba uri umunyarwanda, ufite imyaka yemewe n'amategeko (21), kandi ukaba utazitiwe n'imwe mu ngingo z'Itegeko Ngenga rigenga amatora.

Ugomba kandi kuba byibura ufite icyiciro cya mbere cya kaminuza (A1) cyatanzwe n'urwego rubifitiye ububasha.

Umuntu w'ingaragu na we yemerewe kwiyamamariza kujya muri njyanama cyangwa komite nyobozi guhera ku karere kuzamura?

Kuba wubatse ntabwo ari impamvu yatuma wiyamamaza cyangwa ntiwiyamamaze. Ntabwo ari ko itegeko ritenganya. Bivuze ko n'ingaragu na bo bemerewe kwiyamamariza iyo myanya yose.

Abazabafasha mu migendekere myiza y'amatora ni bande? Bateguwe bate?

Kubera ko muri komisiyo dufite abakozi bake batakwira mu gihugu hose, mu gihe cy'amatora nk'iki tuzifashisha abakozi b'igihe gito ndetse n'abakorerabushake. Mu gihugu hose twateguye abakorerabushake barenga ibihumbi 70 bazadufasha mu midugudu yose no mu byumba by'itora.

Barahari, ubu turi kubategurira amahugurwa abanziriza amatora. Hari na komite mpuzabikorwa z'uburere mboneragihu ziri ku nzego z'imitegekere y'igihugu zegerejwe abaturage, na zo zizadufasha.

Abo bose hazakorana n'abakozi bacu baduhagarariye ku rwego rw'intara na zone (uturere dutatu). Abakozi bacu bo mu biro na bo bazajya hanze bakore nk'abakozi mu matora.

Site z'itora zizaba ziri he?

Mbere na mbere site y'itora ihera ku mudugudu. Abatuye umudugudu bazatorera aho basanzwe bahurira nk'iyo bagize inteko z'abaturage. Ku rwego rw'akagari hari amasite yatoranyijwe. Ubu dufite amasite 2255 mu tugari 2148. Hari utugari dufite amasite arenze imwe bitewe n'uko tungana. Ku rwego rw'umurenge, akarere n'intara bazagenda bahitamo aho batorera basanzwe bakorera ibindi bikorwa bihuza abantu nko muri za salle.

Muri aya matora hazaba hari indorerezi? Bazaba ari bantu ki?

Zizaba zihari gusa si twe tuzihitamo. Twe tumenyesha inzego zose zumva zifuza kohereza abantu kureba ayo matora. Dukunda kubona akenshi indorerezi zivuye mu miryango itegamiye kuri Leta ndetse na za ambasade. N'ubu twiteze ko bashobora kuzaza.

Amajwi y'abatsinze atangazwa ryari?

Mu nzego zo hasi nko ku midugudu, abatsinze bava aho bamenyekanye, ariko iyo bigeze ku bo hejuru baba batanze kandidatire bo bagira igihe Komisiyo y'Igihugu y'Amatora igatangaza ibyavuye mu matora.

Utazishimira ibyavuye mu matora azajuririra he?

Itegeko ngenga rigenga amatora riteganya ko utanyuzwe n'ibyavuye mu matora aregera umuyobozi w'icyumba cy'itora. Iyo atanyuzwe kandi ashobora gukomeza kujurira bikaba byagera kuri komisiyo ndetse no mu nkiko.

Ni iki musaba Abaturarwanda muri rusange barebwa n'aya matora?

Turashishikariza abaturage bose kuzitabira ibi bikorwa by'amatora no kuziyamamaza ku myanya yose. Ntihazagire abumva ko hari imyanya mito n'iminini kuko yose ikeneye abantu. Turashishikariza by'umwihariko urubyiruko, abagore n'abafite ubumuga kwiyamamariza imyanya yose aho bujuje ibisabwa.

Turasaba abatora kandi gushishoza no kudakoresha amarangamutima. Bagomba guhitamo abayobozi bashoboye, bazahagararira neza.

Uko ugenda umanuka mu nzego zo hasi ni nako iyi mibare igenda igabanuka cyane. Imibare ikomeza igaragaza nko mu mirenge 416 iri mu Rwanda, abanyamabanga nshingwabikorwa b'imirenge b'abagore bari kuri 28%, ni mu gihe nk'abayobozi b'uturere bungirije bashinzwe ubukungu b'abagore bari kuri 15% mu turere 30. Mu midugudu 14.837, usanga ba Mudugudu b'abagore bangana na 18%.

Umuyobozi w'Akarere ka Burera, Mukamana Soline, yabwiye IGIHE ko uko inzego z'ubuyobozi ziva hejuru zigana hasi ari nako usanga abagore bazirimo bagaragaza ukwitinya.

Akomeza agaragaza kandi ko mu nzego zo hasi ari naho higanje abantu benshi bakunda guca intege abagore, ndetse banafite ubumenyi buke ku mategeko n'uburenganzira bw'umugore mu kubaka igihugu.

Meya Mukamana atanga urugero rwo mu Karere ka Burera ayoboye, ko hari nk'utugari usanga nta mu muyobozi w'umudugudu w'umugore uharangwa kuko abenshi baba ari abagabo.

Yagize “Hari abacyumva ko kuba umugore ajya anyuzamo akagira ibihe byo gutwita no kubyara bikwiriye kuba imbogamizi yatuma atajya mu myanya y'ubuyobozi ifata ibyemezo. Politiki y'igihugu cyacu iha uburenganzira bungana umugore n'umugabo mu myanya yose ishoboka y'ubuyobozi.'

Uyu muyobozi akomeza avuga ko mu busanzwe, inzego z'ibanze z'ubuyobozi ari ingenzi mu miyoborere y'igihugu kuko nk'urwego rw'umudugudu usanga ari rwo rutanga amakuru y'imibereho y'abaturage, urw'akagari rugakora ibijyanye n'ubukangurambaga noneho urw'umurenge rwo rukibanda mu gutanga serivisi z'ibanze abaturage bakenera.

Agaragaza ko iyo abagore badahagarariwe aha hose bituma habaho icyuho mu kugera ku ihame ry'uburinganire mu miyoborere y'igihugu.

Abagore batinyuke, biyamamaze

Kuva hagati y'ukwezi k'Ukwakira kugeza mu Ugushyingo, mu Rwanda hategerejwe igikorwa cy'amatora y'inzego z'imitegekere y'igihugu zegerejwe abaturage, ndetse n'amatora ya komite nyobozi z'inama z'igihugu.

Muri aya matora, Meya Mukamana akangurira abagore ko bakwiye gutinyuka bakiyamamariza imyanya yose ishoboka aho bujuje ibisabwa.

Ati 'Ndakangurira abagore bagenzi banjye ko bakwiriye gutinyuka bakiyamamariza imyanya yose guhera ku rwego rw'umudugudu. Mutima w'Urugo yanaba mutima w'umudugudu, akaba Perezida w'inama njyanama y'akagari, umurenge ndetse n'iya akarere.'

Mu kiganiro cyihariye na IGIHE, Umunyamabanga Nshingwabikorwa wa Komisiyo y'Igihugu y'Amatora (NEC), Musabyimana Jean Claude, yavuze ko abagore badakwiriye kwiyamamariza kujya mu nama y'igihugu y'abagore gusa ahubwo ko bakwiye no kujya mu yindi myanya y'ubuyobozi kandi ifata ibyemezo.

Yagize ati 'Muri aya matora turakangurira abagore guhagurukira kujya mu yindi myanya y'ubuyobozi nko muri za komite ndetse na Nyanama kuva ku mudugudu kugera ku karere. Turakangurira n'ibindi byiciro birimo urubyiruko n'abafite ubumuga kwiyamamariza iyi myanya.'

Mu nzego z'igihugu z'imitegekere zegerejwe abaturage, hazatorwa abagize komite nyobozi y'umudugudu kugera kuri komite nyobozi na njyanama by'akarere. Ni mu gihe mu nama z'igihugu uko ari eshatu, inama y'igihugu y'abagore, iy'urubyiruko ndetse n'iy'abafite ubumuga hazatorwa abazihagarariye ku mudugudu kugera ku rwego rw'igihugu.

Yabigarutseho mu Nama y'Akanama ka Loni Gashinzwe Umutekano mu nama yaganiraga ku bikorwa bya MONUSCO yabaye ku wa 29 Nzeri 2026.

Amb. Ngoga Rwanda yagaragarije Akanama ka Loni gashinzwe Umutekano ko kurandura burundu umutwe wa FDLR ukorera mu burasirazuba bwa Repubulika Iharanira Demokarasi ya Congo (RDC) ari imwe mu ngingo z'ingenzi zigomba gushyirwa mu bikorwa kugira ngo haboneke amahoro arambye mu karere.

U Rwanda rwavuze ko rwakiriye neza ubuhuza bwakozwe binyuze mu biganiro bya Washington na Doha, ndetse ko rukomeje kwiyemeza kubahiriza amasezerano ya Washington n'inzira zashyizweho zo gukurikirana ishyirwa mu bikorwa ryayo.

Hashyizweho itsinda rihuriweho ryo gukurikirana ishyirwa mu bikorwa ry'amasezerano ya Washington rizwi nka Joint Security Coordination Mechanism (JSCM), rigamije kureba niba ibyemezo byafashwe birimo no gusenya FDLR no gukuraho ingamba z'ubwirinzi u Rwanda rwafashe.

U Rwanda rwavuze ko rwamaze guera intambwe mu gukuraho ingamba z'ubwirinzi kandi rwabimenyesheje inzego zashyizweho n'amasezerano ya Washington.

Amb Ngoga yagaragaje yagaragaje ko hari icyuho gikomeye mu ishyirwa mu bikorwa ry'amasezerano, cyane cyane ku kibazo cyo kurandura FDLR.

Raporo y'Umunyamabanga Mukuru w'Umuryango w'Abibumbye igaragaza ko FDLR igikomeje ibikorwa mu bice birimo Rutshuru, Masisi, Nyiragongo na Walikale.

Amb. Ngoga yavuze ko yavuze ko amakuru u Rwanda rufite agaragaza ko mu mwaka wa 2026 habayeho gukorana mu bikorwa bya gisirikare hagati ya FARDC, FDLR, Wazalendo n'indi mitwe ifatanya na bo.

Ati 'Amakuru ahari agaragaza ibikorwa by'ubufatanye hagati ya FADRC, FDLR, Wazalendo n'indi mitwe bafatanyije mu 2026.'

Amb. Ngoga yatanze ingero zirimo urwo ku wa 10 na 11 Gashyantare 2026, ubwo indege ya FARDC n'amakamyo ya gisirikare byajyanye toni 13 z'amasasu mu bice bya Pinga na Kibua, aho ngo toni esheshatu zagenewe abayobozi ba FDLR n'indi mitwe yitwaje intwaro.

Ku wa 8 Werurwe 2026, indege ya FARDC yajyanye toni 12 z'amasasu n'ibiribwa mu Ntoto, bikaza kugabanywa hagati ya FARDC, FDLR, PARECO na APCLS.

Ku wa 31 Werurwe 2026, indege za FARDC zajyanye intwaro zirimo imbunda 693, toni esheshatu z'amasasu n'amafaranga byari bigenewe FDLR n'indi mitwe.

Yasobanuye ko imikoranire nk'iyi yakomeje kugaragara mu mezi ya Mata, Kamena na Nyakanga, ndetse ko ku wa 15 Kanama 2026 hari amakuru agaragaza ko FARDC yakoranaga na CNRD/FLN, FDLR na Wazalendo/Nyatura muri Teritwari ya Walungu.

U Rwanda rwanenze ibiganiro bya RDC na FDLR

Amb. Ngoga yavuze ko ibiganiro cyangwa amasezerano ayo ari yo yose hagati ya Guverinoma ya RDC na FDLR adakwiye gusimbura ibiteganyijwe mu masezerano ya Washington.

Ati 'U Rwanda rwamaganye uburyo bwose bwo kugerageza guhindura ibikubiye mu byemeranyijweho. Uburyo bwose bwashyirwaho butandukanye n'ibyateganyijwe mu masezerano ya Washington yo kurandura FDLR, kuko butari mu bigize ayo masezerano.'

Yavuze ko gahunda yo kurandura FDLR ari kimwe mu bikorwa by'ingenzi byemeranyijweho, kandi ko igomba gukorwa mu buryo bugaragara kandi bwuzuye.

U Rwanda rwagaragaje ko amasezerano ya Washington na gahunda y'imikorere izwi nka CONOPS na OPORD, bisobanura uburyo ibikorwa bigomba gukorwa, uko bizakurikiranywa n'igihe bigomba kurangirira.

FDLR, ikibazo cy'umutekano ku Rwanda

Amb. Ngoga yagaragaje ko kuba FDLR igikomeje gukorera mu burasirazuba bwa RDC, ndetse igikwirakwiza ingengabitekerezo ya Jenoside n'ibikorwa byibasira umutekano w'igihugu.

Ati 'Umutwe witwaje intwaro ufite ingengabitekerezo ya Jenoside, ufite igisirikare cyateguwe neza ndetse n'amateka y'ibitero wagabye ku Rwanda, ukorera hafi y'umupaka wacu kandi ugafatanya n'ingabo z'igihugu duturanye, ntushobora gufatwa nk'ikibazo cy'umutekano kiri kure gusa kubera ko ukorera kure y'umurwa mukuru w'icyo gihugu.'

'Ku Rwanda, kuba FDLR igikomeje kugira ibikorwa bya gisirikare mu burasirazuba bwa RDC bifatwa nk'ikibazo cy'umutekano cyihutirwa kandi gikomeye nk'uko byagenda iyo umutwe w'abarwanyi ufite ubushobozi nk'ubwo uba ukorera imbere mu Rwanda.'

Yashimangiye ko ari yo mpamvu gahunda yo kurandura uyu mutwe ikwiye gushyirwa imbere nk'uko biteganywa mu masezerano ya Washington.

U Rwanda rwongeye gusaba ko amasezerano ya Washington na Doha ashyirwa mu bikorwa n'impande zose kandi ko buri ruhande rugomba kubazwa ibyo rwiyemeje.

Mu nama y'Akanama k'Umutekano ka Loni yiga ku kibazo cy'umutekano muri Repubulika Iharanira Demokarasi ya Congo (RDC) na MONUSCO, Ambasaderi Martin Ngoga yavuze ko Amasezerano y'Amahoro ya Washington yamaze gushyiraho uburyo bwo gukemura ikibazo cy'umutwe wa FDLR, harimo… pic.twitter.com/2x4f3pqfiX

— IGIHE (@IGIHE) September 29, 2026

Yabikomojeho ku wa 29 Nzeri 2026, mu muhango w'ihererekanyabubasha hagati ye na Munyaneza Charles, wabereye mu Karere ka Karongi ahari icyicaro cy'iki kigo, witabiriwe n'abayobozi barimo Minisitiri w'Ubutegetsi bw'Igihugu Habimana Dominique, Guverineri w'Intara y'Iburengerazuba, Ntibitura Jean Bosco n'Umuyobozi w'Akarere ka Karongi Muzungu Gerald.

Inama by'Inama y'Abaminisitiri yateranye kuri uyu 18 Nzeri muri Village Urugwiro niyo yagennye Munyaneza Charles nk'Umuyobozi Mukuru wa NRS.

Mufulukye Fred wari kuri uyu mwanya kuva mu 2021, yashimiye ubuyobozi bukuru bw'igihugu ku cyizere bwamugiriye n'ubufasha bwamuhaye mu myaka amaze ayobora iki kigo avuga ko mu we n'itsinda bari bafatanyije bagezeho harimo kuba ibigo ngororamuco byaravuye kuri 3 bikaba bine no kuba isura abantu bari bafite kuri ibi bigo yarahindutse igana aheza.

Ati “Igihe cyari iki. Iyo utekereje imyaka itanu, haba hakenewe undi uza agakomereza aho wari ugejeje nawe agatekereza kugira ngo umuvuduko ibintu byari biriho ukomeze”.

Munyaneza Charles wagiye muri izi nshingano yavuze ko hari amakuru make yari asanzwe afite ku bigo ngororamuco kuko hari inama yajyaga ahuriramo na Mufulukye.

Ati “Iyo menya ko nzakurikizaho kuyobora iki kigo mba narakurikiye kurushaho ibiganiro watangaga mu nama twahuriragamo. Gusa abakozi mwakoranaga ndabona ari atari abana bazamfasha kubisobanukirwa vuba”.

Munyaneza agiye kuyobora iki kigo mu gihe hagiye gushira amezi abiri Leta itangiye ubukangurambaga bwo guca inzoga zitujuje ubuziranenge by'umwihariko inzoga z'ibyuma akaba afite icyizere ko bizatuma abajyanwa mu bigo ngororamuco bagabanuka.

Minisitiri w'Ubutegetsi bw'Igihugu, Habimana Dominique yavuze ko ari ibisanzwe ko inshingano ziva ku bantu bamwe zikajya ku bandi kugira ngo bakomerezeho abwira Munyaneza Charles ko agiye kuyobora NRS mu gihe cyiza.

Ati “Turi mu bukangurambaga bwo kurwanya imico mibi y'ubusinzi. Nk'igihugu twifuza kugira abaturage basobanutse. Uje mu gihe cyiza cyo guca ibintu bijyana abantu mu buzererezi”.

Kuri ubu ibigo ngororamuco birimo Iwawa, Gitagata, Nyamagabe na Ngarama harimo abantu 8222.

Abarebwa n'uyu musoro ni abamenyekanishije bakanishyura umusoro ku nyungu w'umwaka wa 2025 mu kwezi kwa gatatu. Abamenyekanishije zeru nibo batarebwa n'izi nshingano.

Komiseri wungirije Ushinzwe Serivisi z'Abasora n'Itumanaho, Uwitonze Jean Paulin, yibukije abarebwa n'uyu musoro ko iminsi yagiye, bityo abasaba kwihutira kumenyekanisha no kwishyura iyi avansi, bakirinda ingorane zibaho mu minsi ya nyuma.

Yakomeje ati 'Utaramenyekanisha ubu yamenya ko umunsi wa nyuma ari ejo [ku wa Gatatu tariki 30 Nzeri], ku buryo uyu munsi ugucitse ntumenyekanishe ngo uhite unishyura, byaba ari ikibazo. Mu mibare turi kubona abagera hafi 40% ubu ngubu ntabwo baramenyekanisha. Kugeza ku wa Gatanu abagera hafi 50% bari bataramenyekanisha.'

Uko iyi avansi ibarwa

Uyu musoro utangwa mu bihembwe washyiriweho korohereza abacuruzi, umuntu akishyura make make kugira ngo umwaka nuragira atazaba asabwa amafaranga menshi icyarimwe. Amafaranga yishyuwe mu bihembwe aherwaho mu kubara umusoro w'umwaka wose.

Ubarwa uhereye ku musoro wishyuwe ku mwaka ushize, ukagabanya n'igicuruzo cy'uwo mwaka, ugakuba n'igicuruzo cy'igihembwe gisorerwa.

Abantu batamenyekanishije umusoro ku nyungu w'umwaka ushize n'igihembwe gishize nabo basabwa kubikora hakiri kare.

Uwitonze kandi yibukije abacuruzi ko ibyatunze umwuga bidashyigikiwe na fagitire za EBM cyangwa imenyekanisha rya Gasutamo bigomba kuba byinjizwa muri sisiteme, kugira ngo mu kubara inyungu zisoreshwa z'uyu mwaka, bizakurwe mu musaruro usoreshwa.

Itegeko rigena uburyo bw'isoresha riteganya ko ku basora bato utamenyekanisha umusoro ku gihe, acibwa amande adahinduka ya 50.000 Frw, naho ku basora baciriritse ndetse n'Ibigo bya Leta bagacibwa 300.000 Frw, mu gihe Abasora banini bo bacibwa 500.000 Frw.

Iyo usora atishyuye umusoro mu gihe giteganywa n'amategeko, awishyura hiyongereyeho inyungu z'ubukererwe zingana na 0,5% iyo yarengejeho igihe kitarenze amezi atandatu; 1% iyo yarengejeho atandatu ariko ntarenze amezi 12; na 1,5% iyo usora yarengeje amezi 12 atishyuye umusoro.

Abasora bakangurirwa kubikora hakiri kare kugira ngo birinde kugonganira muri sisiteme ku munota wa nyuma. Imenyekanisha rikorwa unyuze ku rubuga rwa RRA. Abasora bato nk'abamotari bo bakoresha *800# bagakurikiza amabwiriza.

Ubuyobozi bwa Pariki y'Akagera bwerekanye ko izi nkongi ahanini zagiye ziterwa n'umuriro waturutse mu mpanuka z'abaturiye Pariki cyangwa umuriro wacanywe nkana na ba rushimusi.

Ubuyobozi bwa Pariki y'Akagera bwavuze ko muri uyu mwaka hegitari ibihumbi 11 arizo zimaze gushya, bukagaragaza ko inkongi nyinshi zatangijwe n'ibikorwa bito birimo nko gutwika ibisigazwa by'imyaka mu mirima cyangwa gucana umuriro mu gihe cyo guhakura ubuki.

Buti ' Mu gihe cy'izuba n'umuyaga, ikibatsi gito gishobora gukwirakwira vuba kandi kigafata ahantu hanini, turashishikariza abantu bose batuye hafi ya Pariki ndetse n'abaturage muri rusange, kudacana umuriro hafi ya Pariki, kwirinda gutwika ibimera cyangwa ibyatsi mu gihe cy'impeshyi cyangwa mu gihe hari umuyaga. Turabasaba gutanga amakuru ako kanya ku bayobozi ba Pariki cyangwa ku bayobozi b'inzego z'ibanze.''

Pariki y'Akagera yibukije abaturage ko kurinda iyi Pariki ari inshingano za buri wese.

Iti ' Twese hamwe dushobora gufatanya kuyirinda no kuyibungabunga kugira ngo izakomeze kubaho no mu gihe kizaza.''

Pariki y'Igihugu y'Akagera iherereye mu Ntara y'Iburasirazuba aho ikora ku turere dutatu turimo Kayonza, Gatsibo na Nyagatare. Ifite ubuso bungana na kilometero kare 1.122, Kuri ubu ikaba icungwa ku bufatanye bw'Urwego rw'Igihugu rw'Iterambere (RDB) n'Umuryango African Parks.

Pariki y'Igihugu y'Akagera iherutse gutangaza ko kuva muri Mata kugeza muri Kamena 2026 yinjije arenga miliyoni imwe y'Amadolari ya Amerika, yaturutse muri ba mukerarugendo 8.919 bayisuye muri icyo gihe.

Amafoto: Gael Vande Weghe