Category: Uncategorized

Umutoza wa Marine FC, Yves Rwasamanzi yavuze ko bagerageje gukina neza ariko baza gukoramo amakosa yatumye APR FC ibatsinda.

Ni nyuma y’umukino w’umunsi wa gatatu wa Shampiyona ya 2026-27 APR FC yari yakiriyemo Marine FC inayitsinda ibitego 4-2.

Muri uyu mukino, Marine FC niyo yabanje ibitego bibiri ariko APR FC yaje kubyishyura iranayitsinda.

Aganira n’itangazamakuru, Yves Rwasamanzi yavuze ko bagize igice cya mbere cyiza ariko mu gice cya kabiri bakoze amakosa APR FC irabahana.

Ati “Twagize igice cya mbere cyiza, tugira igice cya kabiri kibi. Twakoze amakosa ikipe iraduhana. APRFC ni ikipe nkuru, ivuye muri ChampionsLeague, itwara ibikombe rero iyo ukoze ikosa ntabwo yakubabarira.”

Yakomeje avuga ko nubwo atabigira urwitwazo ariko yaburaga abakinnyi mu busatirizi bwe.

Ati “Twagize ikibazo cyo kubura abakinnyi babiri mu busatirizi nubwo atari urwitwazo ariko byadukozeho, gusa tugiye kwikosora nibaza iwacu natwe dushobora kuzabatsinda.”

Yves Rwasamanzi kandi yavuze ko kandi amakosa bakoze bagiye kuyakosora akazabafasha gutegura imikino iri imbere.

Yves Rwasamanzi yavuze ko bakoze amakosa APR FC ikabakosora

Kapiteni wa APR FC, Cheikh Djibril Ouattara yavuze ko kuba azakomezanya n’iyi kipe cyangwa batazakomezanya yabihariye Imana.

Uyu rutahizamu ukomoka muri Burkina Faso ari ku mpera z’amasezerano ye y’imyaka ibiri muri APR FC aho azarangira muri Mutarama 2026.

Nyuma y’umukino wa Shampiyona batsinzemo Marine FC ibitego 4-2 akanatsinda ibitego, Cheikh Djibril yavuze ko ikizakurikiraho n’asoza amasezerano muri APR FC ari Imana ibizi.

Ati “Ikizakurikiraho nabirekeye Imana ni yo ibizi. Aka kanya ndafite amasezerano njye ndi umukinnyi wa APR FC.”

Abajijwe niba hari ibiganiro byatangiye ku kuba yakongera amasezerano muri APR FC, yavuze ko aba aganira n’amakipe atandukanye amwifuza ariko “Imana ni yo izagena aho nzaguma.”

Cheikh Djibril Ouattara wageze muri APR FC muri Mutarama 2025, uwo mwaka yayitsindiye ibitego 13 mu mikino yo kwishyura mu gihe umwaka ushize w’imikino wa 2025-26 yabaye rutahizamu watsinze ibitego byinshi aho yatsinze ibitego 18.

Cheikh Djibril yavuze ko kuguma muri APR FC biri mu biganza by’Imana

Muri Kamena 2026, nibwo rwatanze ibisobanuro byarwo ku byifuzo rwahawe mu isuzuma rya Kane rya Universal Periodic Review (UPR), rugaragaza ko rwashyigikiye ibyifuzo 249 muri 286 rwari rwahawe, ibi bingana na 87%, ubwo bishatse kuvuga ko 38 byashyizwe ku ruhande kugira ngo bisuzumwe neza bijyanye n'imiterere y'igihugu.

Iyo ugereranyije n'ibyifuzo u Rwanda rwakiraga mu myaka yo ha mbere ubona ko byazamutse, bikaba bituma bamwe bibaza niba nta kibazo.

Ubundi iki gikorwa kiba buri myaka ine aho aka kanama kagenera ibihugu biri muri Loni ibyifuzo by'amategeko yubahiriza uburenganzira bwa muntu bikwiye kuvugururwa mu guteza imbere uburenganzira bwa muntu.

Ubundi iyi gahunda yatangiye mu 2006, ariko u Rwanda rwagenzuwe bwa mbere mu mwaka wa 2011 maze ruhabwa imyanzuro rugomba gushyira mu bikorwa mu gihe cy'imyaka ine.

Muri uwo mwaka, u Rwanda rwahawe ibyifuzo 73, gusa rwemera ko ruzashyira mu bikorwa 67.

Mu 2015, u Rwanda rwongeye guhabwa indi myanzuro 229 ariko rwemera ko ruzashyira mu bikorwa 50 gusa.

Mu 2021 bwo u Rwanda rwakiriye ibyifuzo 284, ariko rwemera ko ruzashyira mu bikorwa 160.

Perezida wa Komisiyo y'Uburenganzira bwa Muntu (NCHR), Umurungi Providence, yavuze ko impamvu u Rwanda rwakiriye ibyifuzo byinshi ari ukubera ko umubare w'ibihugu bigira uruhare muri ako kanama biba byiyongereye.

Ati 'Iyo ugereranyije no mu 2011, ibihugu byari 48 gusa, bitanga ibyifuzo bigera kuri 73, ubwa kabiri mu 2015, habonetse ibihugu 88, urumva ko umubare wikubye kabiri, batanga ibyifuzo-nama birenga 200, n'ejo bundi mu 2021, nabwo byabaye ibihugu 99, mu 2026 bwo biba 100.'

Yakomeje avuga ko kuba u Rwanda rwarakiriye ibyifuzo byo gukurikiza byinshi bitavuze ko uburenganzira bwa muntu mu gihugu buba buhungabanye.

Ati 'Umubare mwinshi ntabwo uvuga ko uburenganzira bwahungabanye, ahubwo werekana ubushake bw'igihugu biba byemeye kuganira ku bijyanye n'ishusho rusange ku burenganzira bwa muntu n'ibyo bizashyira mu bikorwa.'

Yasabye imiryango itari iya Leta ariko ishingiye ku guharanira uburenganzira bwa muntu, kuzagira uruhare mu ishyirwa mu bikorwa ry'iyi myanzuro ya UPR.

Umuyobozi w'Ihuriro ry'Imiryango itari iya Leta iharanira uburenganzira bwa muntu, Silas Nkusi yavuze ko gushyira mu bikorwa iyi myanzuro bidakwiriye gukorwa na Komisiyo y'Uburenganzira bwa Muntu n'Urwego rw'Umuvunyi gusa kuko bireba buri rwego mu gihugu.

Ati 'Birakenewe ko inzego zose zibishyiramo imbaraga mu kubishyira mu bikorwa. Buri wese afite uburenganzira kandi buri muntu afite inshingano ku burenganzira bwa mugenzi we, hakwiriye kuba imikoranire, ubuvuguzi kandi buri Munyarwanda akumva ko akwiriye kugira uruhare muri uru rugendo.'

Imyanzuro 249 u Rwanda rwahawe mu 2026 yiganjemo uburenganzira bw'imbonezamubano, ubujyanye n'ubukungu, ubuha uburenganzira ibyiciro byihariye birimo abafite ubumuga, abana, abagore ubw'abimukira n'ibindi.

Muri uru ruzinduko rwabaye kuri uyu wa Gatatu, Perezida Wadagni yasuye ibice bitandukanye by'uru rwibutso, asobanurirwa amateka ya Jenoside yakorewe Abatutsi ndetse n'urugendo u Rwanda rwanyuzemo rwiyubaka nyuma yayo.

Perezida Wadagni ari mu Rwanda mu ruzinduko rw'akazi rw'iminsi ibiri, rugamije kurushaho gushimangira umubano n'ubufatanye hagati y'u Rwanda na Benin.

Kuri uyu wa 16 Nzeri 2026, yakiriwe na Perezida Paul Kagame muri Village Urugwiro, aho bagiranye ibiganiro byibanze ku kwagura ubufatanye hagati y'ibihugu byombi.

U Rwanda na Benin bisanzwe bifitanye ubufatanye mu nzego zirimo ubucuruzi n'ishoramari, ikoranabuhanga, ubuhinzi, igenamigambi ry'imijyi, kunoza serivisi za Leta n'umutekano.

Mu 2023, ubwo Perezida Kagame yagiriraga uruzinduko muri Benin, ibihugu byombi byashyize umukono ku masezerano 10 y'ubufatanye, arimo ajyanye no gukuraho gusoresha kabiri.

Perezida Wadagni w'imyaka 50 yatorewe kuyobora Benin ku wa 12 Mata 2026, abonye amajwi arenga 94%. Yarahiriye iyo nshingano ku wa 24 Gicurasi 2026, asimbura Patrice Talon wari usoje manda ebyiri yemererwaga n'Itegeko Nshinga.

Yatangiye manda y'imyaka irindwi nyuma y'imyaka 10 yari amaze ari Minisitiri w'Imari n'Ubukungu wa Benin. Si ubwa mbere Wadagni yari ageze mu Rwanda, kuko muri Nzeri 2023 yarusuye nk'intumwa yihariye y'uwari Perezida wa Benin, Patrice Talon.

Ibi biri mu bikubiye mu bushakashatsi bw'Umuryango urwanya Ruswa n'Akarengane (TI Rwanda).

Ubushakashatsi bwakorewe ku igenamigambi ry'uturere 10 ari two Gisagara, Ngoma, Ngororero, Nyanza, Nyagatare, Nyaruguru, Nyamagabe, Rusizi, Ruhango na Rutsiro bugamije kureba uko DDS zubahiriza gahunda y'Igihugu yo guhangana n'imihindagurikire y'ibihe, icyiciro cya gatatu (NDC 3.0).

Hasuzumwe inzego zinyuranye muri DDS zirimo ubuhinzi buyubahiriza kuri 80%, kubungabunga amazi kuri 63%, ingufu 53%, ubwikorezi 48%, imitunganyirize y'imijyi 45%, mu gihe ubucukuzi bw'amabuye y'agaciro buri hasi ku kigero cya 28%.

Ibi bivuze ko mu igenamigambi ry'uturere ryasuzumwe, hari icyuho kinini mu kwinjiza ingamba z'imihindagurikire y'ibihe mu bikorwa by'ubucukuzi bw'amabuye y'agaciro kingana na 72%.

Ni mu gihe muri NDC 3.0, u Rwanda rwiyemeje ko 90% by'ibikorwa by'ubucukuzi bw'amabuye y'agaciro bigomba kuba byubahiriza ingamba zo guhangana n'imihindagurikire y'ibihe mu 2030 kandi iki gipimo kizakomeza kuzamuka kigere ku 100% mu 2035.

Muri iyo gahunda kandi u Rwanda rufite intego yo gusana ahantu 994 hasizwe hadasubiranyijwe mu bikorwa by'ubucukuzi bw'amabuye y'agaciro bitarenze mu 2030.

Ubu bshakashatsi bugaragaza ko icyuho mu bucukuzi gifitanye isano n'uko ingamba zo kubahiriza ibisabwa mu bijyanye n'ihindagurika ry'ikirere zitinjijwe ku rugero rukwiye mu igenamigambi ry'uturere.

Bugaragaza ko hashyirwaho amabwiriza yihariye kuri buri rwego, akagaragaza gahunda ihari yo guhangana n'ingaruka z'imihindagurikira y'ikirere kandi bikagenerwa ingengo y'imari bijyanye.

Itegeko rigenga iby'ubucukuzi bw'amabuye y'agaciro mu Rwnada rigena ko mbere yo gutangira ubucukuzi, ikigo cyangwa ugiye kubukora atanga ingwate ya 2% by'agaciro k'umushinga.

Gusa Minisiteri y'Ibidukikije yagaragaje ko hatangiye kuganirwa uko aya mafaranga yakongerwa kuko hari aho byagaragaye ko aba make, ntagire ibyo asana byangiritse, bikaba imwe mu mpamvu zikoma mu nkokora iyubahirizwa ry'ibikubiye muri NDC 3.0.

Ibi byabaye ku gicamunsi cyo kuri uyu wa Gatatu tariki ya 16 Nzeri 2026 bibera mu Mudugudu wa Kiboha mu Kagari k'Akabatasi mu Murenge wa Rubona mu Karere ka Rwamagana.

Umuvugizi wa Polisi y'u Rwanda mu Ntara y'Iburasirazuba, SSP Twizeyimana Hamduni, yabwiye IGIHE ko uwo musore yagiye kunywera mu kabari k'abavandimwe babiri, nyuma aza kurwana na bo umwe amukubita majagu ahita apfa.

Yagize ati ' Uwo musore yavuye mu kazi ajya kunywa inzoga, amaze kunywa inzoga n'abandi bari kumwe barya n'inyama bari basinze. Mu mafaranga yishyuye bagombaga kumugaruriramo ibiceri 200 Frw, atera amahane ngo bamugarurire, abo bacuruza inzoga baravukana, umwe aza amubaza impamvu ari gutera amahane birangira barwanye.''

SSP Twizeyimana yavuze ko abo bavandimwe babiri bahise bamuviraho inda imwe baramukubita hiyongeraho na mucoma na we araza bafatanya gukubita wa musore. Umwe muri abo bavandimwe ngo yahise azana majagu ayimukubita mu gahanga undi ahita apfa.

SSP Twizeyimana yavuze ko abamukubise bahise batoroka, Polisi n'izindi nzego z'umutekano batangira kubashakisha aho umwe yafatiwe mu Murenge wa Nzige ari guhunga mu gihe abandi babiri bakiri gushakishwa.

Ati ' Abaturage turabasaba kwirinda ubusinzi no kunywa inzoga zitujuje ubuziranenge, ibiyobyabwenge. Ikindi turabasaba kwirinda amakimbirane igihe cyose abantu bagiranye amakimbirane umwanzuro ntabwo ari ukurwana ahubwo bajye begera ubuyobozi bubafashe kuyakemura.''

Kuri ubu umurambo w'uyu musore wajyanywe mu bitaro bya Rwamagana gukorerwa isuzuma mu gihe abagize uruhare mu rupfu rwe babiri bagishakishwa n'inzego z'umutekano.

Mu mukino wari uryoheye ijisho, APR FC yatsinze Marine FC ibitego 4-2 mu mukino w’umunsi wa gatatu Shampiyona y’icyiciro cya mbere mu Rwanda BK Pro League 2026-27.
Wari umukino wa mbere APR FC yakinaga kuva Shampiyona ya 2026-27 yatangira aho imikino ibiri ya mbere ya Shampiyona itayikinnye kuko yari mu mikino Nyafurika.

Yari yakiriye Marine FC irimo abakinnyi nka Ishimwe Pierre na Niyibizi Ramadhan bayikiniraga umwaka ushize w’imikino.

Ni umukino watangiye wihuta cyane umupira uva ku izamu rimwe ujya ku rindi aho ku munota wa 3 APR FC iba yafunguye amazamu ku mupira William Togui Mel yacomekeye Memel Dao ariko ateye ukubita igiti cy’izamu.

Marine FC nayo yahushije amahirwe akomeye ku munota wa 10 nyuma yo guhererekanya neza maze Niyibizi Ramadhan ahindura umupira mwiza ariko Ntirushwa Aime ateye mu izamu ujya hanze yaryo.

Marine wabonaga ikina neza yaje gufungura amazamu ku munota wa 17 gitsinzwe na Sibomana Sultan Bobo ku mupira yari ahawe na Bizimana Yannick.

APR FC yarimo irushwa muri iyi minota, Adolphe Hakizimana yaje kuyitabara ku munota wa 22 ubwo yakuragamo umupira ukomeye wa Bizimana Yannick.

APR FC yashoboraga kwishyura iki gitego ku munota wa 24 ubwo Memel Dao yazamukanaga umupira agacomekera Amani Michel maze aramusubiza ariko umupira umubana muremure.

Marines FC yaje kubona igitego cya kabiri ku munota wa 34 cyatsinzwe na Ntirushwa Aime ku mupira yari ahawe na Sultan Bobo.

APR FC yahise ihindura ibintu maze ishaka igitego yahise igitsinda ku munota wa 36 gitsinzwe na Cheikh Djibril Ouattara ku mupira yari ahawe na Amani Michel.

Muri iyi minota APR FC yari yashyize igitutu kuri Marine FC ishaka igitego cya kabiri, ku munota wa 40, Ishimwe Pierre yaje kuyirokora ubwo yakuragamo umupira ukomeye wa Memel Dao. Amakipe yombi yagiye kuruhuka ari 2-1.

APR FC yatangiranye impinduka igice cya kabiri aho Hakim Kiwanuka yasimbuye Amani Michel.

Izi mpinduka zafashije APR FC kuko ku munota wa 53 zayihaye igitego cya kabiri cyatsinzwe na Memel Dao ku mupira wari uhinduwe Hakim Kiwanuka.

Ku munota wa 55 Ishimwe Christian aba yatsindiye APR FC igitego cya gatatu kuri kufura yateye ariko Ishimwe Pierre awukuramo.

Marine yayishyizemo imbaraga ishaka igitego maze ku munota wa 59 Ntirushwa Aime yateye ishoti rikomeye ariko Hakizimana Adolphe awukuramo.

Ku munota wa 63 APR FC yaje kubona igitego cya gatatu gitsinzwe na Cheikh Djibril Ouattara ku mupira wari uhinduwe na Hakim Kiwanuka.

APR FC yongeye gukora impinduka ku munota wa 71 aho Memel Dao yahaye umwanya Uwiyaremye Fidali. William Togui Mel na we yaje guha umwanya Jean Pierre Rubuguza ku munota wa 83.

Uwiyaremye Fidali yaje no gutsinda igitego cya kane ku munota wa 82 ku mupira yari ahawe na William Togui Mel. Umukino warangiye ari 4-2.

Undi mukino w’umunsi wa gatatu wabaye uyu munsi, Al Hilal SC yatsinze Kigali FC ibitego 2-1.

Marine FC yabanje APR FC ibitego bibiri

Wari umukino uryoheye ijisho

APR FC yaje kugaruka mu mukino

Byari ibyishimo bikomeye kuri APR FC

Ikipe y’Igihugu y’u Rwanda ya Volleyball yatsinze Repubulika Iharanira Demokarasi ya Congo amaseti 3-1 mu Gikombe cya Afurika kirimo kubera muri Tunisia.

U Rwanda rwatangiye rutsinda Centrafrique amaseti atatu ku busa, uyu munsi ku wa Kabiri tariki ya 16 Nzeri 2026 rwakinaga umukino wa kabiri wo mu itsinda D.

Abasore b’u Rwanda batangiye neza batsinda iseti ya mbere ku manota 25-22 gusa DR Congo yahise itsinda iya kabiri ku manota 25-21.

Ibi byabaye nko gukoza agati mu ntozi kuko bagarutse mu iseti ya gatatu bayitsinda amanota 25-21 ni mu gihe iya kane bahise bayitsinda 25-20. Umukino warangiye ari amaseti 3-1.

U Rwanda rufite amahirwe menshi yo kurenga itsinda, ruzagaruka mu kibuga rukina umukino usoza itsinda D na Cameroun ku wa Kabe w’iki cyumweru.