Mu gihe U Rwanda rukataje mu guteza imbere impano binyuze mu mikino itandukanye, ni nako hakomeje kugaragara imikino mishya itamenyerewe mu Rwanda nk'umukino wo gusiganwa kuri Skette.
Kuri iki Cyumweru tariki 26 Nyakanga Inyamirambo kuri Pele stadium hazabera amarushanwa yo gusiganwa hifashishijwe inkweto zifite amapine ibizwi nka Skette mu ndimi z'amahanga. Ni ku nshuro ya kane aya marushanwa agiye kuba akaba ku nshuro ya mbere agizwe mpuzamahanga dore ko mbere yitabirwaga n'abanyarwanda gusa.
Mu Kiganiro n'itangazamakuru cyabaye kuri uyu wa gatanu ku kigo cy'urubyiruko cya Kimisagara, Byukusenge Jean de Dieu ukuriye abategura aya marushanwa yavuze ko kuri iyi nshuro bashatse gukuza iri rushanwa baboneraho kwakira abandi bakinnyi bazaturuka mu bihugu nk'Ubuhinde,Uganda na Kenya mugihe abagombaga guturuka mu gihugu cy'abaturanyi cya Congo batazitabira kubera icyorezo cya Ebola kiri kuvuza ubuhuha muri icyo gihugu.
Abagera kuri 90 biganjemo abakiri bato nibo bamaze kwemeza ko bazitabiraba mugihe ubuyobozi buvuga ko kwiyandikisha bigikomeje.
Nubwo umukino ukuri mushya kandi n'amikoro akaba ari make, abategura aya marushanwa bavuga ko bashimira Leta ishishikariza abantu guhanga ibishya haba mu mikino n'ibindi kandi bakanashimira abandi bafatanyabikorwa barimo ababaha ibibuga byo kwifashisha nka Maison de Juenes n'abandi.
Mu rwego rwo gukundisha abakinnyi uyu mukino, abazatsinza bazahembwa mu byiciro bitatu aho hazahembwa ikipe ya mbere, iya kabiri n'iya gatatu naho abakinnyi ku giti cyabo nabo bakazahabwa imidali n'andi mashimwe atahise atangazwa.
Abategura aya marushanwa kandi baboneyeho gusaba abanyarwanda kuzaza kubashyigikira banasaba abagira impungenge ku mutekano w'uyu mukino kumva ko ari umukino nk'indi yose bityo bakarushaho kuwitabira.
Leave a Reply