Rutahizamu wa APR FC, Cheick Djibril Ouattara, yamaze kongera amasezerano y'imyaka ibiri muri iyi kipe, ibi bije nyuma yahoo uyu rutahizamu ari umwe mu bagize uruhare rukomeye mu bikombe bitandukanye iyi kipe yegukanye.
Mu butumwa ikipe ya APR FC yatangaje, yemeje ko uyu munya-Burkina Faso yashyize umukono ku masezerano mashya azamara imyaka ibiri. Ouattara yashimiye ubuyobozi bw'ikipe, abo bakinana, abafana ndetse n'abandi bose bagize umuryango wa APR FC ku ruhare bagize mu rugendo rwe.
Mu bihe bitandukanye amaze muri APR FC, Cheick Djibril Ouattara yagaragaje ubushobozi bwo gutsinda ibitego no gufasha ikipe ye kugera ku ntego zirimo kwegukana ibikombe.
Outtara yagize uruhare mu gufasha APR FC kwegukana ibikombe bibiri bya Shampiyona y'u Rwanda biheruka ndetse n'ibinfi bikombe bibiri by'Amahoro ndetse na Super Cup.
Umunya-Portugal Cristiano Ronaldo yatangaje ko asezeye mu Ikipe y'Igihugu ya Portugal, ni nyuma y'urugendo rwatwaye imyaka 23 yamugize umwe mu bakinnyi b'ibihe byose bagize uruhare rukomeye mu mateka y'umupira w'amaguru ku Isi.
Uyu mukinnyi w'imyaka 41 y'amavuko yatangaje iki cyemezo ku wa Kane, tariki ya 5 Ugushyingo 2026, abinyujije mu butumwa bw'amashusho yashyize ku mbuga nkoranyambaga, agaragaza ko igihe kigeze ngo ashyikirize abandi nimero 7 yambaraga mu Ikipe y'Igihugu.
Mu butumwa bwe yagize ati: 'Igihe kirageze ngo nsubize nimero 7 y'Ikipe y'Igihugu. Mu myaka 23 nayambaye, nayifashe nk'inshingano ikomeye yo kuyihagararira no kuyitwarana ishema mu bibuga bitandukanye byo ku Isi.'
Yongeyeho ko atari icyemezo cyoroshye gufata, kuko hari ibyemezo bitafatwa n'ubwenge gusa, ahubwo n'umutima ugira uruhare mu kubifata.
Ronaldo asezeye afite amateka akomeye cyane muri ruhago mpuzamahanga, aho yakiniye Portugal imikino 234, ayitsindira ibitego 146, akaba ari we uyoboye abandi bakinnyi bose mu mateka y'umupira w'amaguru mu bagabo haba mu mikino mpuzamahanga yakinnye no mu bitego yatsinze.
Yatangiye gukinira Portugal mu 2003, ayifasha kugera ku mateka atandukanye arimo kwegukana igikombe cy'u Burayi (EURO 2016), cyari icya mbere gikomeye mu mateka y'iki gihugu, ndetse n'ibikombe bibiri bya UEFA Nations League yegukanye mu 2019 no mu 2025.
Mu myaka Ronaldo amaze mu mupira w'amaguru, uyu rutahizamu yubatse izina rikomeye ku Isi, abifashijwemo n'ibitego, ibikombe, ibihembo ku giti cye ndetse n'ubuhanga mu guhatana ku rwego rwo hejuru mu makipe atandukanye yakiniye.
Mu butumwa bwe bwo gusezera, yashimiye umuryango we, Abanya-Portugal, abakinnyi bakinanye, abatoza n'abandi bose bagize uruhare muri uru rugendo.
Umunyabigwi mu mupira w’amaguru, Cristiano Ronaldo yamaze gusezera mu ikipe y’igihugu ya Portugal yari abereye kapiteni, ni nyuma y’imyaka 23 ayikinira.
Ronaldo ufatwa nk’umwe mu bakinnyi beza Isi yagize, kuri uyu wa Kane tariki ya 5 Ugushyingo 2026 nibwo yasomye ibaruwa isezera mu ikipe y’igihugu yanditse nyuma y’Igikombe cy’Isi cya 2026.
Muri Nzeri 2026 ubwo yavaga mu mwiherero w’ikipe y’igihugu ya Portugal kubera kutishimira uko yafatwaga, yavuze ko yari yateguye gusezera mu ikipe y’igihugu ariko bamusaba kuba aretse.
Mu mashusho ye ashyize ku mbuga nkoranyambaga asoma ibaruwa isezera mu ikipe y’igihugu, Cristiano yagize ati “Ku Banya-Portugal, umunsi wageze kuri njye wo gusubiza nimero karindwi nambaraga ku mwambaro w’Ikipe y’Igihugu ya Portugal. Sinigeze na rimwe numva ko ari njye gusa ikwiriye.'
'Mu myaka 23 ishize numvaga ko ari ishema n’inshingano zo kuyambara. Kuyambara neza nkayijyana muri stade zitandukanye ku Isi, byari agaciro gakomeye. Igihe cyageze ngo nhyitange ku hazaza.'
Uyu rutahizamu wa Al Nassr muri Saudi Arabia yakomeje agira ati 'Si umwanzuro wari woroshye, kuko imyanzuro imwe n’imwe ntifatwa n’ubwonko gusa, ahubwo isaba umutima. Urugendo rwatangiye mu 2003 rwahinduye ubuzima bwanjye bwose. Ubu rugeze ku iherezo.'
'Iyo nsubije amaso inyuma ku byo nahuriye na byo mu Ikipe y’Igihugu, ntabwo mbona imikino gusa, ibitego, uduhigo cyangwa ibikombe, ahubwo mbona abantu, Abanya-Portugal bari hirya no hino ku Isi bumvaga ko bari hafi y’igihugu cyabo.'
'Mbona miliyoni z’abantu ntigeze mpura na bo, ariko babaye bamwe mu muryango wanjye kuko byarangiraga umupira w’amaguru urenze kuba umukino. Umupira w’amaguru ni abantu.'
Ku giti cye abona ntacyo atatanze ahubwo yanatanze ibirenze ibyo yari afite kandi igihe cyose yari yambaye umwenda wa Portugal byabaga bimuteye ishema.
Asezeye mu ikipe y’igihugu amaze kuyikinira imikino 234, atsinda ibitego 146, ari na we rukumbi wabikoze mu mateka ya ruhago.
Yayihesheje ibikombe bitatu birimo icy’u Burayi cya 2016, UEFA Nations League ya 2019 na 2025.
Asezeye nyuma yo gushyamirana n’umutoza we mu ikipe y’Igihugu ya Portugal, Jorge Jesus, ibyanatumye ava mu mwiherero, anafatirwa ibihano birimo guhagarikwa iminsi 30 no gutanga amande angana na 255€ bivuze 422,280 Frw.
Umuhanga mu gutunganya indirimbo mu buryo bw’amajwi akaba n’umuhanzi, Element Eleéeh yateguje ibitaramo bitanu agomba gukorera muri Leta Zunze Ubumwe za Amerika.
Igitego cya Muhoza Daniel cyo mu minota ya nyuma cyafashije Rayon Sports kunganya na Al Hilal SC kimwe kuri kimwe mu mukino w’umunsi wa munani.
Nyuma yo gutsinda Gasogi United, Al Hilal SC yari yakiriye Rayon Sports yaherukaga gukura amanota atatu i Rubavu itsinze Marine FC.
Uyu mukino w’umunsi wa munani wa Shampiyona ya 2025-26, watangiye amakipe yombi asatirana ashaka igitego hakiri kare, gusa ubwugarizi n’abanyezamu ku mpande zombi babyitwaramo neza.
Ku munota wa 23, ku makosa ya Luzalo watakaje umupira, Elie Tatou yawufashe atera ishoti rikomeye ariko umunyezamu awukuramo na Issa Djiguiba asubijemo unyura hanze yaryo.
Ku burangare bw’ubwugarizi bwa Rayon Sports, ku munota wa 35, Abdelrazig Taha yacometse umupira unyura mu bakinnyi batatu maze kapiteni wa Al Hilal SC, Mohamed Yousif Yagub ahita atsinda igitego cya mbere. Amakipe yagiye kuruhuka ari kimwe ku busa.
Al Hilal SC yatangiye igice cya kabiri ishaka igitego ku kabi n’akeza igenda igaba udutero ku izamu rya Rayon Sports ariko umunyezamu Dande Junior abyitwaramo neza akuramo imipira ikomeye ya Ansumana Samura winjiye mu kibuga asimbura Adama Coulibari.
Rayon Sports iba yishyuye iki gitego ku munota wa 67 ubwo Muderi Akbar yahinduraga umupira imbere y’izamu maze Junior Kameni ateye mu izamu umunyezamu awushyira muri koruneri itagize icyo itanga.
Rayon Sports yakomeje gushaka igitego cyo kwishyura ndetse iza kukibona ku munota wa 89 cyatsinzwe na Muhoza Daniel winjiye mu kibuga asimbura Iasa Djiguiba.
Rayon Sports yakomeje gushaka igitego cya kabiri ariko umukino urangira ari kimwe kuri kimwe.
Urwego rw'Igihugu rw'Ubugenzacyaha/RIB nyuma yo kwerekana abantu 11 barimo babiri bafite Ubwenegihugu bwa Uganda ari nabo bakekwaho gushora abandi mu kwangiza Ibikorwaremezo by'umwihariko mu bujura bw'intsinga z'Umuriro, hatanzwe ubutumwa busaba buri wese kwirinda ibikorwa ibyo aribyo byose bigize icyaha by'umwihariko ku biba Intsinga z'Umuriro basabwe kubivamo hakiri kare. Bibukijwe ko nta n'umwe uzihanganirwa kuko RIB na Polisi bari maso.
Umuvugizi w'Urwego rw'Igihugu rw'Ubugenzacyaha/RIB, Dr Murangira B Thierry asaba uwo ariwe wese ujya mu bikorwa byo kwangiza ibikorwaremezo by'umwihariko ubujura bw'itsinga z'Umuriro ndetse n'uwumva abitekereza ko kubireka ariyo mahitamo meza yo kutagongana n'Amategeko. Avuga ko RIB itazigera na rimwe yihanganira abakora ibikorwa nk'ibyo, ko ndetse idateganya kubireka kuko nta mwanya w'abakora ibyaha uhari.
Ati' Turabagira inama yo kubireka kuko tutazabyihanganira kubirwanya, nta n'umuntu ukwiye kwihanganira icyaha icyo aricyo cyose'. Avuga ko 11 berekanywe ari abafatiwe mu bikorwa byo gusenya no kwangiza ibikorwaremezo, cyane cyane mu kwiba Intsinga z'Umuriro mu turere twa; Kamonyi, Nyarugenge, Kicukiro, Gasabo na Bugesera.
Agira kandi ati' Turagira ngo tubwire Abanyarwanda ko badakwiye gushishikazwa cyangwa no kubeshywa n'utwo dufaranga bakuramo nyamara bisenyera Igihugu cyabo'. Akomeza avuga ko nyuma yo kwegeranya amakuru, basanze ubu bujura bw'Insinga z'Umuriro atari ubujura busanzwe, ahubwo ari ubujura buteguye kandi buyobowe cyane kuko n'abaziba batazijyana ku isoko ryo mu Rwanda, ahubwo bazishishura bakazambutsa imipaka mu bihugu bituranyi.
Dr Murangira B Thierry, avuga ko abafashwe bose byakozwe mu bufatanye bwa RIB na Polisi y'u Rwanda mu rwego rwo kubungabunga ndetse no guhashya umuntu wese wishora mu bikorwa bishobora kubangamira iterambere.
Abafashwe bari mu byiciro, ari byo; Abarangura insinga(ba nyiri imari) ari nabo babishishikariza abandi bababwira ko ari imari. Hari Abazikusanyiriza hano mu Gihugu, Hari abazigura n'Abajura, Hakaba n'Abazitunda barimo Abamotari n'Abashoferi.
Insinga zafashwe zingana na Toni imwe n'Igice(1,5T), aho agaciro kazo ubaze mu mafaranga y'u Rwanda ari asaga Miliyoni 20.
Abafashwe bakurikiranyweho ibyaha bitatu aribyo; Kurema Umutwe w'Abagizi ba nabi cyangwa kuwujyamo, Hari Ukwangiza Ibikorwaremezo cyangwa kwangiza ibikoresho Bitanga Amashanyarazi n'Ubujura. Bafungiye kuri Sitasiyo ya RIB ya Nyarugenge na Kicukiro, aho Dosiye zabo zamaze gushyikirizwa Ubushinjacyaha.
Ibyaha bakurikiranyweho bihanwa mu buryo butandukanye, aho nk'Icyo Kurema Umutwe w'Abagizi banabi igihano ari Igifungo kiva ku myaka irindwi kugera ku myaka icumi(7-10), kikaba gihanwa n'igingo ya 224 y'Itegeko riteganya Ibyaha n'Ibihano muri rusange. Ikindi cyaha ni icyo kwangiza Ibikorwaremezo cyangwa Ibikoresho bitanga Amashanyarazi, gihanwa n'Ingingo ya 51 aho Igifungo kiva ku myaka itatu ariko kikaba kitarenza imyaka itanu(3-5) n'amafaranga y'u Rwanda ava kuri Miliyoni imwe kugera kuri Miliyoni eshanu.
Hari kandi Icyaha cyo Kwiba aho gihanwa n'Ingingo y'166 y'Itegeko riteganya ibyaha n'Ibihano muri rusange, aho Igifungo ari ukuva ku Mwaka umwe kugera ku myaka ibiri n'Ihazabu iva kuri Miliyoni imwe kugera kuri Miliyoni ebyiri. Iki cyaha kandi iyo urukiko rusanze harimo Impamvu nkomezacyaha nko Kwitwikira ijoro, kuba bagiye ari igico( barenze umwe), Igihano kikuba inshuro 2.
Dr Murangira B Thierry, Asaba buri wese kumva uburemere bw'ibi bikorwa ndetse n'ibihano byabyo, bityo bibatere kuzibukira bave ku kwijandika mu byaha bashake ibintu bizima bakora byemewe n'Amategeko. Asaba buri munyarwanda wese kubihagurukira, nti habeho kurebera no guhishira abakora ibikorwa bibi nk'ibi kuko ingaruka zabyo ntawe zitageraho.
Dr Murangira B Thierry, atanga ingero nk'Igihe hari ahibwe intsinga z'Umuriro nko ku mavuriro, Amashuri muri Karitsiye n'ahandi, ko nk'iyo umuriro uhabuze bitewe n'abantu nk'abo b'abajura igikurikira ari Ibura ry'umuriro, abari kwa muganga ibyuma byari bicometse, abari bafite ubuzima ku bwo kuba umuriro uhari biba ibindi bindi( yaba wowe cyangwa uwawe n'undi), ku mashuri abana biga isomo rifatiye ku kuko Umuriro uhari biba ibindi iyo ntawo, yemwe no muri Karitsiye iyo nta muriro buri wese yibaze uko bigenda.
Korali Yakini yasohoye indirimbo nshya yise ‘Hamagara’ yakomotse kuri umwe mu baririmbyi bigendanye n’ibyo Imana yamukoreye.
Nk’uko bigarukwaho na Mwalimu, Mupenzi Niyonshuti akaba n’ushinzwe itangazamakuru, yavuze ko ubusanzwe ibitekerezo biba ari iby’abanditsi ariko kuri Hamagara harimo itandukaniro.
Ari “Akenshi ibitekerezo biba Ari iby’abanditsi ku giti cyabo ariko uri ‘Hamagara’ ni igitekerezo cy’umuririmbyi bisanzwe cyavuye mu gusenga, nyuma asubijwe n’Imana biba impamvu yo guhumuriza abandi arababwira ngo muhamagare mu ijuru hari lmana.”
“Wenda ibiyigize byagiye bivugwaho gato no muzindi ariko yo ivuga byimbitse ku bisubizo byavuye mu guhamagara lmana.”
Yanateguje Album bitiriye iyi ndirimbo izaba igizwe n’indirimbo 10, izaba iriho ubutumwa butandukanye.
Ati “Abantu bakunda Yakini icyo bakwitega ni uko Yakini ihari kandi ikomeje ivugabutumwa mu buryo butandukanye. Ibitaramo ikindi ni uko kuri iyi album izaba yitwa Hamagara nubundi iriho indirimbo 10 zose zamaze gutunganwa amajwi n’amashusho, ‘Hamagara’ ni iya gatatu, bivuze ngo haracyari indirimbo 7 batarumva.”
Yakini ikorera umurimo w’lmana kuri ADEPR Kicukiro ikaba yaratangiye ivuga butumwa mu ndirimbo mu mwaka 1992 aho ubu igizwe n’abaririmbyi 105 ariko kubera inshingano zitandukanye mu bitaramo hakunda kuboneka hagati ya 60 na 70.
Yampano yatawe muri yombi tariki ya 16 Gicurasi 2026 aho akurikiranyweho ibyaha birimo gukubita no gukomeretsa ku bushake, gukoresha ibikangisho, kwangiza ikintu cy’undi, kunywa ibiyobyabwenge n’ubwinjiracyaha ku cyaha cy’ubwicanyi no gufunga umuntu mu buryo bunyuranyije n’amategeko.
Tariki ya 9 Kamena 2026, Urukiko rw’Ibanze rwa Kicukiro rwanzuye ko agomba gufungwa iminsi 30 y’agateganyo nyuma yo gusganga ibyaha bitatu; kwangiza ikintu cy’undi, gukubita no gukomeretsa ndetse no kunywa urumogi bifitiwe ibimenyetso bihagije kandi bikomeye bituma akurikiranwa afunzwe by’agateganyo. Ibindi byaha bibiri rusanga nta bimenyetso bihari byatuma akomeza kubikurikiranwaho.
Uyu munsi tariki ya 4 Ugushyingo 2026, Yampano akaba yatangiye kuburana mu mizi mu Rukiko Rwisumbuye rwa Nyarugenge aho akurikiranyweho gukoresha ibikangisho, kwangiza ikintu cy’undi, kunywa urumogi, gukubita no gukomeretsa ku bushake n’ivangura.
Yampano akaba yemera ibyaha byo gukubita no gukomeretsa, kwangiza ikintu cy’undi no kunywa urumogi. ibindi akaba yabihakanye.
Ubushinjacyaha bwabwiye urukiko ko mu bihe bitandukanye, Yampano yagiye atoteza umugore we, Uwineza Denise, amukubita ndetse ko yigeze kumugongesha imodoka ku bushake. Yigeze kumukubita urushyi mu maso, amuruma mu kwaha, amurya inzara mu ijosi, amuruma izuru ararikomeretsa
Yampano aregwa kuba igihe yakubitaga umugore we, yamubwiraga ko azamwica, akajya kwirega ku Rwego rw’Ubugenzacyaha.
Ku cyaha cy’ivangura, umushinjacyaha yavuze ko ubwo yaramaga izuru umugore yamubwiye ko Abatutsi nta bwenge bagira biratana amazuru kandi nayo umuntu yayaca, aya ngo ni amagambo umugore we yivugiye.
Yampano yavuze ko atibuka avuga ayo magambo, gusa ngo nawe yibuka ko umugore we yamubwiye ko impamvu iwabo batabasura ari uko yashatse mu bahutu. Ashimangira ko iyo aba agira ivangura ari kwemera kubana na Diane imyaka ibiri bari bamaranye mu nzu.
Yampano kandi yabwiye urukiko ko Uwineza yigeze kwandika ko yagiye kumurega abitewe n’uburakari, yerekana ko icyaha cy’ivangura yakimushinje abitewe n’ayo marangamutima nyamara ngo nta bimenyetso cyatangirwa.
Uyu muhanzi yahakanye gukangisha umugore we kumwica nyuma akirega, agaragaza ko kuba yaritabye Ubugenzacyaha Uwineza akiriho ari ikimenyetso cy’uko atagize uwo mugambi.
Yampano yasobanuye ko gushyamirana hagati ye n’umugore we byaturutse ku kuba ubwo yari yaragiye i Burayi, yagarutse asanga umugore yaragurishije ibintu byose, undi amutegereka kubigarura, ni byo byabaye intandaro yo kurwana bya hato na hato.
Uyu muhanzi kandi yatunguwe no kubona hiyongereyemo icyaha cy’ivangura atigeze aregwa mu ifungwa n’ifungurwa. Mu byaha bitatu yemera kandi akaba yaramaze kubyingaho n’umugore we.
Umunyamategeko yasabye umucamanza kuzabirebaho neza kuko uretse n’inyandiko hari n’amashusho ya Diane agaragaza ko we yababariye Yampano.
Ku cyaha yo gukoresha urumogi anemera, yavuze ko yari yaratangiye kwivuza ngo arureke kandi yabikoze ku giti cye nta zindi mbara.
Ubushinjyacyaha bukaba bwasabiye Yampano igifungo cy’umwaka umwe ku cyaha cyo gukubita no gukomeretsa no gucibwa ihazabu y’ibihumbi 300 Frw, gufungwa imyaka itanu no gucibwa ihazabu y’ibihumbi 500 Frw ku cyaha cy’ivangura.
Ubushinjacyaha bwasobanuye ko igiteranyo cy’igihano busabira Yampano ari igifungo cy’imyaka irindwi n’amezi 11 no gucibwa ihazabu y’ibihumbi 800 Frw.
Urukiko Rwisumbuye rwa Nyarugenge rwagaragaje ko umwanzuro kuri uru rubanza uzasomwa tariki ya 16 Ukuboza 2026.
Umuraperi Hakizimana Murerwa Amani wamamaye nka P FLA, yavuze ko kera bumvaga ko kugira ngo babe abaraperi bakomeye bagomba kuba barafunzwe.
Ibi yabigarutseho mu kiganiro yagiranye n’ikinyamakuru ISIMBI aho yavuze ko bakuze bafite imyumvire ko bagomba gufungwa kugira ngo babe abantu bakomeye.
Ibi ngo babishingiraga ku kuba abaraperi benshi bo muri Amerika baragiye baba abantu barenze nyuma yo gufungurwa.
Ati “Twumvaga ko kugira ngo ube umuraperi wa nyawe ari uko ufite CV y’uko wagiye muri Gereza, ba 50 Cent babaye abaraperi bakomeye ari uko bose bavuye mu magereza, abandi bagiye babarasa bararokoka, byagiye byubaka inkuru z’ibitangaza ko uriya muntu atabaho, ngo uriya baranamurasa ntapfe, wakumva nka 50 Cent ukumva ari umuntu utabaho.”
“Nanjye nkavuga ngo uzi ko biriya bintu bimbayeho ari bwo nahita mba umuntu urenze, gusa ibyo wiyaturiraho cya kintu kiragenda kikaba.”
P Fla yavuze ko kugira ngo amenye ko gufungwa ari bibi, atabimenye ari muri gereza, ahubwo yabimenye umunsi ayisohokamo, akandagije ikirenge hanze.
Ati “Gereza irababaza. Kugira ngo menye ko gufungwa ari ikintu giteye ubwoba, ntabwo nabimenye ndi muri gereza, nabimenye umunsi wo gutaha, nyuma y’amezi 12 nari nkoze, ijoro rya nyuma bambwira ngo ejo ntabwo uzarara hano, saa sita zigomba kugera wavuye muri iki gipangu, iryo joro ryambanye rirerire, nta n’isegonda nasinziriye.”
“Si uko natekerezaga ngo karitsiye nzasanga imeze ite, ndahita njya studio, njye kureba abajama banjye, ahubwo nari mfite ikintu cy’ubwoba muri njye ntazi aho kiri guturuka, ibitekerezo nari mfite mu mezi nka tatu ashize,ibintu byahindutse.”
Ati “Iyo ukandagije ikirenge hanze ya kiriya gipangu wambaye imyenda isanzwe? Kandi usanzwe usohoka ugiye kuri visite, gusa si byo byiyumviro ugira bakubwiye ngo ngaho genda wambaye imyenda isanzwe, biratandukanye cyane. Uhita ubona ikirere cyahindutse, umwuka wahindutse, buri kimwe cyahindutse.”
Yavuze ko ubwo bazaga kumufata batashye bari mu modoka abandi babaga bari mu nkuru zashyushye ariko we ari bwo arimo kumva agaciro ko kwicara mu modoka kuko yumvaga atazongera kwicara mu modoka, hari n’aho bagiye kunywa ‘essence’ yumva bahamusiga bakigendera we akahasigara kuko yari akumbuye kuba ari kuri sitasiyo.
Yunzemo ati “Noneho nkabona nk’umwana w’umukobwa ndamurangariye nkamara nk’iminota itanu mureba, uwo mbonye wese nkabona ni mwiza.”
Ku giti cye yemeza ko nta kintu cyiza kuri we cyaruta kubaho adafunzwe kuko yabaye muri gereza azi ububi bwayo n’uko ishobora kwangiza umuntu.
