Category: Uncategorized

Mu 2025 mu Rwanda hatangijwe internet ya 5G ndetse mu mpera za Nyakanga 2026, hatangizwa gahunda yo guhagarika ikoreshwa ry'imiyoboro ya telefone igendanwa ya 2G na 3G, mu rwego rwo kwimukira ku ikoranabuhanga rigezweho rizatanga internet yihuta, ihamye kandi igere ku Banyarwanda benshi.

Kopa Telecom ni ki mwe mu bigo biri gufasha u Rwanda mu gutera iyi ntambwe iruganisha ku iterambere no kuba igicumbi cy'ikoranabuhanga mu Rwanda.

Ni ikigo gitanga serivisi za internet cyakomotse ku ihuzwa rya Popconn na Truconnect, ibigo bibiri byari bisanzwe bitanga serivisi za internet mu Rwanda.

Ibyo bigo byombi byari bizwi cyane mu gutanga internet yihariye (Dedicated Fiber Internet) ku bigo, ibiro n'imiryango ikenera internet yizewe kandi ifite umuvuduko uhoraho.

Umuyobozi Mukuru wa Kopa Telecom, Umurutasate Chamilla yabwiye IGIHE, ko bibanda cyane ku gutanga internet yihariye (Dedicated Fiber Optic Internet) ku bigo, ibiro, amashuri, amahoteli, ibigo by'imari n'indi miryango ikenera internet yihuta, ihoraho kandi yizewe.

Ati 'Isoko rya internet mu Rwanda riragenda ryaguka kandi ririmo ibigo bitanga iyo service byinshi. Icyakora, Kopa Telecom yihariye mu gutanga internet yizewe ku bakiliya bakeneye umuvuduko uhoraho ndetse n'ubufasha bwihariye.'

Umurutasate Chamilla yavuze ko abakiliya babo bahabwa ubufasha bwa tekiniki bwihuse kandi bukorwa n'abakozi babihuguriwe, ndetse ko internet batanga yubatswe ku buryo idacika biturutse ku miyoboro y'inyongera (backup connectivity) ishobora guhita yifashishwa igihe habaye ikibazo.

Iki kigo kandi gifite ubufatanye n'abafatanyabikorwa barimo KTRN, butuma babasha babasha kugera ku bakiliya bose hirya no hino.

Umurutasate Chamilla ati 'Abakiliya bakomeje kutugaragariza icyizere kubera ubwiza bwa serivisi, ubufasha bahabwa ndetse n'imikoranire myiza hagati yabo na Kopa Telecom.'

Kopa Telecom ifite abakiliya bo mu nzego zitandukanye zirimo amashuri makuru, amahoteli, ibigo by'imari, imiryango mpuzamahanga, ibigo bya Leta n'iby'abikorera.

Serivisi zayo zibasha kugera hafi mu gihugu hose, ku kigero cya 99,8%, harimo n'ibice bya kure ndetse n'ibyegereye imipaka y'u Rwanda.

Ibiciro bya Kopa Telecom bitegurwa hashingiwe ku byo umukiliya akeneye, kandi bihura n'ubwiza bwa serivisi iki kigo gitanga.

Kopa Telecom ifite internet packs zitandukanye, zirimo izagenewe ibigo binini bikenera internet y'umuvuduko mwinshi, ibigo biciriritse ndetse n'abandi bakenera internet yizewe ku giciro kiboroheye.

Umurutasate Chamilla yavuze ko 'Intego ya Kopa Telecom ni ugukomeza kwagura ibikorwa byayo no kugeza internet yizewe ku bakiliya benshi kurushaho mu gihugu hose. Turifuza gukomeza gufasha abakiliya hakoreshejwe ikoranabuhanga rigezweho, kongera ubushobozi bw'imiyoboro no gukomeza gutanga serivisi zinoze zituma abakiliya bacu bakora ibikorwa byabo badafite impungenge z'ihungabana rya internet.'

Uwase Muyango Claudine yavuze ko umunyamakuru Phil Peter yamuhemukiye akamufata amajwi batabyumvikanye yarangiza akayasakaza mu gihe yari yamusezeranyije ko adasohoka.

Byabaye ejo hashize ku wa Kane ubwo Muyango Claudine yari mu nzira ajya kwitaba Polisi kubera gutwara atambaye umukandara aho yarezwe n’umwe mu bakoresha imbuga nkoranyambaga na Polisi ikavuga ko agomba kubahanirwa.

Nk’uko byumvikana mu majwi, ubwo yafashwe, ubwo yari mu nzira agenda yahamagawe na Phil Peter basanzwe bakorana umunsi ku munsi agira ngo ni akazi.

Mu kiganiro bagiranye, Phil Peter yabajije Muyango niba atarajya kuri Polisi cyangwa niba batamuhamagaye, undi amusubiza ati “Ubu niho ndimo kujya.”

Yaramubajije niba atari kohererezwa konterivasiyo akishyura atagiyeyo, undi ati “Ayo mahitamo ntabwo bigeze bayampa.”

Phil Peter yamubajije niba atari buze gusabwa gusaba imbabazi, undi yamusubije ati “Bashobora kubimbwira kuko bambwiye ko kutambara umukandara ari ibisanzwe ariko bidakuyeho ko ari ikosa.”

Yahise abwira Muyango ko bari mu kiganiro, undi biramurakaza ahita amukupa.

Mu butumwa Muyango Claudine yanyujije ahatangirwa ubutumwa bumara amasaha 24 kuri Instagram, yagaragaje ko Phil Peter yamuhemukiye.

Ati “Ejo hashize ndimo njya kuri polisi kubirebana n’amashusho yanjye nashyize hanze ntambaye umukandara, nshaka kubanza kubabwira ko nemera ko ari ikosa. Ndakeka buri umwe yabyigiramo mu rwego rwo kwirinda impanuka n’ibindi bihano.”

Yakomeje agira ati “Abatazi ibyabaye, Phil Peter yarampamagaye byari nka saa 13h, nari ndimo njya kuri polisi. Bwa mbere naketse ko ari ibijyanye n’akazi kubera nta muntu nashakaga kuvugana na we ku byabaye, narayifashe. Yari atuje ambaza niba polisi yampamagaye. Mubwira ko yabikoze ari nayo mpamvu ndi mu nzira njyayo. Yakomeje kumbaza utubazo ariko kuko ikiganiro cye ari saa 17h, sinatekereje ko naba ndi ‘live’.”

Yavuze ko yahise amubwira ko ari live undi amubwira ko atabyishimiye ndetse ahita amukupa anamwandikira amusaba ko atabyishyira hanze (yahise ashyiraho text bagiranye undi amusezeranya ko atabikora).

Yakomeje avuga ko impamvu yabimusabye atari uko yavuze nabi ahubwo ari uko buri kimwe uyu munsi gishobora kuvamo ikintu kinini.

Yashimiye Imana ko nta kintu kibi yavuze gishobora gutuma yicuza.

Yahise abaza niba bazi ukuntu telefoni imwe iguhamagaye yakwangiza ubuzima bw’umuntu burundu.

Ati “nakoze ikosa ryo gutwara imodoka ntambaye umukandara ndanaryemera, gusa wowe wakoze ikosa ryo kumfasha amajwi ukanayasakaza ntabizi.”

Yamusabye ko mbere yo kugira ikintu akora yajya atekereza ingaruka gishobora kugira ku muntu.

Ubutumwa bwa Muyango

Muyango Claudine yavuze ko Phil Peter yamuhemukiye

Phil Peter yahamagaye Muyango amufata amajwi atamuteguje

Nyuma gutombora ikipe ya Les Aigles du Congo mu ijonjora ry’ibanze rya CAF Champions League, APR FC yiteguye gusaba CAF ikabahindurira ikibuga kuko iyi kipe y’ingabo z’igihugu itajya gukinira muri DR Congo.

Amakuru avuga ko iyi kipe yamaze gutekereza kubwira FERWAFA kwandikira CAF ikayisaba ko imikino izahuza aya makipe yabera ku kibuga kitari icyo muri DR Congo cyangwa mu Rwanda (terrain neutre).

Mu gihe CAF yakwanga iki cyemezo, ntabwo APR FC yiteguye kujya muri DR Congo gukinirayo ndetse ishobora no guhita iva mu irushanwa maze Les Aigles du Congo igakomeza mu kindi cyiciro.

APR FC itekereje ibi mu gihe umubano w’ibihugu byombi utemeze neza ikaba itizeye umutekano w’abakozi bayo bajya muri iki gihugu kuko bakeka ko bashobora guhohoterwa cyangwa hakagira ikindi kibabaho.

Umukino ubanza ukaba ugomba kubera muri DR Congo hagati ya tariki ya 4 na 6 Nzeri 2026 mu gihe uwo kwishyura wabera mu Rwanda hagati ya tariki 11 na 13 Nzeri 2026.

APR FC ishobora kwikura muri CAF Champions League

Nyuma y’uko ubu abasifuzi bishyuza Ishyirahamwe ry’Umupira w’Amaguru mu Rwanda ibirarane by’amezi ane, kuri ubu nabo batangiye kutavuga rumwe ku mafaranga bakatwa buri uko bahembwe.

Inkuru y’uko abasifuzi basifura icyiciro cya mbere, icya kabiri n’icya gatatu mu mupira w’amaguru mu Rwanda bamaze igihe badahebwa ntabwo ari nshya.

Amakuru ISIMBI yamenye ni uko aba basifuzi baheruka guhabwa amafaranga muri Mutarama 2026, nyuma y’aho kugeza umwaka w’imikino urangiye (Gashyantare-Gicurasi) nta giceri bigeze bahabwa, ibintu batazi impamvu ibitera.

Gusa nubwo bafite ibyo bibazo, kuri ubu noneho hagati yabo batangiye kutumvikana kubera amafaranga bakatwa buri uko bahembwe.

Si ibintu bishya kuri bo kuko bisanzwe bikorwa aho buri uko bahembwe bakatwa 10% akajya mu kigega cyabo aho yifashishwa mu bikorwa bitandukanye nko gutwerera uwagize ubukwe, uwagize ibyago ndetse n’umuntu akaba yaguzamo mu gihe ayakeneye.

Ikibazo cyavutse aba basifuzi bakeneye ibisobanuro by’ubuyobozi bw’ishyirahamwe ryabo rya ARAF ni uko bafite impungenege y’uburyo akoreshwamo kuko batajya babimurikirwa.

Ikindi ni uko banashaka ko iri 10% rigabanuka kuko basanze ari amafaranga menshi cyane aho byibuze bavuga ko bagiye bakatwa 5% ntacyo byaba bitwaye.

Biteganyijwe ko mu mpera z’uku kwezi, nta gihindutse tariki ya 23 Kanama 2026 bazakora inama yiga kuri ibi bibazo byose bakabiha umurongo.

Komisiyo ishinzwe Imyitwarire mu Ishyirahamwe ry'Umupira w'Amaguru mu Rwanda (FERWAFA) yahanishije Umutoza Wungirije w'Amagaju FC, Imurora Hakizimana Japhet, guhagarikwa mu bikorwa byose by'umupira w'amaguru mu gihe cy'imyaka itanu no kwishyura miliyoni 6,2 Frw kubera kugena ibiva mu mukino.

Mu butumwa Ikigo cy'Igihugu cy'Ubuzima (RBC) cyashyize hanze kuri uyu wa Gatanu, kibukije abaturage ko 'kuganura neza ari ukuganura utangiza ubuzima bwawe', ndetse kibasaba kwishimira uyu munsi w'umuco nyarwanda birinda ibikorwa byashyira ubuzima bwabo mu kaga.

RBC yagaragaje ko nta kigero cy'inzoga gishobora kuvugwa ko kitagira ingaruka ku mubiri, isaba abatanywa inzoga gukomeza kuzibukira no kwirinda ibintu byose byabashora mu kuzinywa.

Ku banywa inzoga, basabwe kugabanya ingano y'izo banywa binyuze muri gahunda ya #TunyweLess, ndetse bakirinda by'umwihariko inzoga z'ibyuma, zishobora guteza ibibazo bikomeye ku buzima.

Mu gihe Abanyarwanda bitegura kwizihiza Umuganura, RBC yabasabye kandi kwita ku buzima bwabo binyuze mu kuruhuka bihagije, kunywa amazi menshi, kurya indyo yuzuye igizwe n'imboga n'imbuto ndetse no gukora imyitozo ngororamubiri.

Umuganura ni umwe mu minsi ikomeye mu muco nyarwanda, aho Abanyarwanda bahurira hamwe mu kwishimira umusaruro babonye mu buhinzi n'ubworozi, ndetse no mu zindi nzego. Uyu munsi wihizwa tariki 7 Kanama buri mwaka.

Umuganura w'uyu mwaka uje mu gihe Guverinoma y'u Rwanda imaze iminsi mike ishyize imbaraga mu kurwanya inzoga zitujuje ubuziranenge. Ni icyemezo cyatumye inganda nyinshi zakoraga izi nzoga zifungwa, ndetse zikurwa ku isoko.

Ku rwego rw'igihugu, Umuganura w'uyu mwaka wizihirijwe mu Karere ka Rusizi.

Kuva mu mpera za Nyakanga 2026, Guverinoma y'u Rwanda yakajije ingamba zo guhagarika ibinyobwa bitujuje ubuziranenge birimo ibyitwa ibyuma no gufunga inganda zibikora.

Ku ikubitiro, ikigo cy'igihugu gishinzwe ubuziranenge bw'ibiribwa n'imiti, Rwanda FDA, cyahagaritse ibikorwa byo gutumiza mu mahanga ikinyabutabire cya ethanol cyifashishwa mu gukora ibi binyobwa.

Isuzuma ryakozwe ryagaragaje ko mu gukora izi nzoga, izi nganda zashyiragamo ethanol idatunganyije neza zigamije kugira ngo zigire ubukana; ibyatumaga zangiza ubuzima bw'abazinywa.

Leta y'u Rwanda yasobanuye ko kuva muri Mutarama 2026, abantu 50 bishwe n'izi nzoga, abandi 100 barahuma. Habaruwe abantu ibihumbi 11 babaye imbata z'izi nzoga.

Kugeza ku wa 6 Kanama 2026, Rwanda FDA yari imaze gufunga inganda 148 zikora ibi binyobwa. Ikigo cy'igihugu gitsura ubuziranenge, RSB, na cyo cyambuye izi nganda impushya zo gukora.

Mu kiganiro na Royal FM, Umuvugizi wa Guverinoma y'u Rwanda, Yolande Makolo, yasobanuye ko hari ibyuho byagaragaye mu igenzura byatumye abakora ibitujuje ubuziranenge bakora igihe kirekire, bikaba byaragize ingaruka ku buzima rusange bw'abaturage.

Makolo yavuze ko Guverinoma y'u Rwanda yafashe umwanzuro wo gushyiraho ihame ryo kutihanganira na gato abakora ibicuruzwa bitujuje ubuziranenge.

Yasobanuye ko iperereza rikomeje kandi ko abazagaragaraho uruhare mu makosa yatumye abaturage bakomeza guhabwa ibinyobwa byangiza ubuzima bwabo bazabibazwa, baba abikorera ndetse n'abo mu nzego za Leta.

Umuvugizi wa Guverinoma yavuze ko hari abamaze gutabwa muri yombi ariko ko inzego z'ubutabera n'iz'umutekano ari zo zizatanga ibisobanuro birambuye uko iperereza rizagenda rikorwa.

Yagize ati “Hari abatawe muri yombi. Ntekereza ahari ko uyu munsi cyangwa iki cyumweru, tuzabona amakuru arambuye. Ariko iperereza riri gukorwa kugira ngo tumenye abagomba kubibazwa…baba abikorera ndetse n'abo muri Leta. Rero tuzagenda tubona amakuru mu gihe iperereza rikomeje kandi inzego nkomezamategeko ziri mu kazi kazo.”

Ingaruka ku bukungu

Ku kibazo cy'abacuruzi n'abandi bakozi bagizweho ingaruka n'igikorwa cyo guhagarika inzoga zitujuje ubuziranenge, Makolo yavuze ko Guverinoma iri kureba uburyo iki kibazo cyakemurwa.

Makolo ariko yashimangiye ko abakora ibicuruzwa bitujuje ubuziranenge ari bo ba mbere bakwiye kwirengera ingaruka z'ibikorwa byabo.

Ku bakozi bashobora gutakaza akazi kubera ihagarikwa ry'izi nganda, yavuze ko kurinda ubuzima bw'abaturage ari byo bibanza kandi ko nta mpamvu yo gukomeza ibikorwa byangiza ubuzima kugira ngo abantu batabura akazi.

Umuvugizi wa Guverinoma yavuze ko gahunda za Leta zizakomeza gufasha abaturage kubona andi mahirwe y'akazi mu bikorwa byemewe n'amategeko.

Ati 'Icya mbere ni ugukiza ubuzima bw'abaturage. Ubuzima bw'abaturage ni bwo buza imbere y'ibindi. Ibyo ntibisaba imishyikirano, nta masezerano akorerwa ku buzima bw'abaturage.'

Yakomeje ati 'Ku birenze ibyo, dukomeje gahunda zitandukanye za Leta kugira ngo Abanyarwanda babone amahirwe yo gukorera mu zindi nzego nyinshi zirimo inganda zikora ibyubahiriza amategeko.'

Makolo yavuze ko inzego bireba zizakomeza gukorana n'abaturage kugira ngo babone amahirwe yo kubona akazi ahantu hatari mu nganda zikora ibikorwa byangize ubuzima bw'imiryango yabo cyangwa sosiyete muri rusange.

Ati 'Gufasha urubyiruko kubona imirimo ni kimwe mu byo dushyize imbere. Dukwiye kubikora kurushaho kandi ibyo ntibikwiye kuba urwitwazo rwo kudahagarika ikidakwiye, iyo abantu bari kugira uruhare mu bikorwa byangiza sosiyete, na bo barimo.'

Umuvugizi wa Guverinoma y'u Rwanda yasabye abaturage kunywa inzoga mu rugero, kandi bakazirinda abari munsi y'imyaka 18, abibutsa ko n'iyo zaba zemewe n'amategeko, kuzinywa nabi na byo bishobora kwangiza ubuzima bwabo.

Umuhanzikazi Butera Knowless n’umugabo we Ishimwe Clement barizihiza imyaka 15 aho bombi bavuga ko kwemeranya kubana ari icyo cyemezo cyiza bafashe mu buzima bwabo.

Mu butumwa yanyujije ku mbuga nkoranyambaga ze, Ishimwe Clement yagize ati “Imyaka 10 irashize tuvuze yego tutazi ko ubuzima budufitiye byinshi mu bubiko.”

“Imyaka 10 ishize, mvugishije ukuri kuguhitamo byaguma ari cyo cyemezo cyiza nafashe mu buzima bwanjye. Ntabwo buri gihe byari byoroshye. “

Yakomeje avuga ko banyuze muri byinshi bikomeye ibyiza, ibibi ariko “muri ibyo byose buri gihe urukundo rwacu rwakomeje gukomera kurusha buri kibazo cyose twahuye nacyo.”

Yakomeje agira ati “Warakoze kumpagarara iruhande, kunyizera, kunkunda no mu gihe ntari mu bihe byiza.”

Ishimwe Clement kandi yamubwiye ko nubwo bamaranye imyaka 10 ariko ubu intego ari imyaka 100, yamubwiye ko amukunda cyane buri munsi.

Knowless we yavuze ko kuba bamaranye iyi myaka atari uko ibintu byari byiza ahubwo kuba barahisemo kubana mu bibi n’ibyiza ari byo byabafashije cyane.

Ati “Imyaka 15 turi kumwe, imyaka 10 dukoze ubukwe. Mbega impano muri iyi myaka ishize. Si uko buri kimwe cyari cyiza, ahubwo ni uko buri gihe twakomeje kubaka, gukura no kurota na buri umwe guhitamo undi uko byagenda kose.”

“Iyo nsubije amaso inyuma mbona akaboko k’Imana muri buri ‘chapter’ y’inkuru yacu. Yabaye umwizerwa, ntabwo nari gukora uru rugendo n’undi muntu.”

Yakomeje ashimira Imana ati “Ndayishimira buri munsi kubwo kuduhuza no kumpa inshuti magara mu nshuti magara. Umuntu buri gihe unshyigikira, urirana nanjye, tugasekana, uwo nkunda kwendereza.”

Yanashimiye Imana kuba yarabahaye abakobwa beza, kuba ikomeje kuyobora no kurinda urugo rwabo, kubaha umugisha batari biteguye.

Yavuze ko yishimira aho bavuye ndetse n’aho Imana irimo kubatwara. Yasoje ubutumwe agira ati “Warakoze kuri buri kimwe wampaye mugabo wanjye. Imyaka 15 yacu, imyaka 10 dushyingiranywe. Hari ibindi byinshi byiza imbere yacu bidutegereje. Ndagukunda cyane uyu munsi kurusha ejo hashize.”

Tariki ya 07 Kanama 2016 ni bwo Butera Knowless na Ishimwe Clement basezeranye imbere y’Imana, ndetse banambikana impeta y’urudashira mu birori bitagira uko bisa byabereye mu busitani bwa Golden Tulip hotel i Nyamata.

Knowless na Clement barizihiza imyaka 10 bamaze bakoze ubukwe

Bavuga icyemezo cyo kubana ari cyo cyemezo cyiza bafasha mu buzima bwabo