Category: Uncategorized

Paul Rusesabagina, wamenyekanye cyane binyuze muri filimi Hotel Rwanda, nyuma akajya kuyobora umutwe w'iterabwoba wa FLN/MRCD yongeye kugaragara mu itangazamakuru atanga ibitekerezo bigamije gusebya u Rwanda, ariko ibibazo bikomeye bijyanye n'uruhare rwe mu bikorwa by'iterabwoba bya FLN/MRCD yakunze kwirengagiza.

Mu kiganiro yagiranye n'umunyamakuru w'Umunyekongo Stanislas Bujakera, Rusesabagina yongeye kugaruka kuri byabinyoma ahora ashinja u Rwanda. Iki kiganiro kije mu gihe Perezida wa Repubulika Iharanira Demokarasi ya Congo, Félix Tshisekedi, amaze igihe agaragaza amagambo n'ibikorwa bikomeje bishotora u Rwanda agakoresha n'itangazamakuru, Rusesabagina akaba yavuze ko amushyigikiye 150% kandi ko abadipolomate bavugana bashyigikiye Tshisekedi.

Icyakora, icyagaragaye kuri Rusesabagina si amagambo yavuze gusa, ahubwo ni n'imimerere y'umubiri we. Mu mashusho y'ikiganiro, yagaragaraga afite imvugo n'imigendekere y'iminwa bitari bisanzwe, ku buryo byateye kwibaza ku buzima bwe. Ibi ntibihagije kugira ngo umuntu amupime indwara runaka, ariko bigaragaza ko hakwiye kwitabwaho ubuzima bwe aho guhora ahabwa urubuga rwo gukwirakwiza amagambo y'urwango n'ibirego bidafite gihamya.

Rusesabagina yarekuwe ku mbabazi za Perezida wa Repubulika y'u Rwanda, Paul Kagame, nyuma yo kwandikira Leta y'u Rwanda ibaruwa asaba imbabazi, aniyemeza kutazongera kugira uruhare mu bikorwa by'imitwe yitwaje intwaro. Nyamara, yongeye kugaragara mu itangazamakuru avuga amagambo agarura impaka ku bikorwa bye bya politiki n'uruhare yagize mu mutwe wa FLN.

Ikiganiro cya Bujakera cyasize icyuho gikomeye: kuki atigeze abaza Rusesabagina ku ruhare rwe muri MRCD/FLN, by'umwihariko ku bitero byagabwe mu turere twa Nyaruguru na Nyamagabe mu 2018 na 2019, bigahitana abaturage b'inzirakarengane, abandi bagakomereka, ndetse imitungo igasahurwa ikanatwikwa?

Ibyo ni byo bibazo byari bikwiye guhabwa umwanya mu kiganiro n'umuntu wigeze kuyobora ihuriro rya MRCD ryari rifite umutwe witwaje intwaro wa FLN.

Ibyaha umunani Rusesabagina yahamijwe n'Urukiko

Ku wa 20 Nzeri 2021, Urukiko Rukuru, Urugereko ruburanisha ibyaha mpuzamahanga n'ibyambukiranya imipaka, rwakatiye Paul Rusesabagina igifungo cy'imyaka 25 nyuma yo kumuhamya ibyaha umunani muri icyenda yari akurikiranyweho: Kuba mu mutwe w'iterabwoba, gutera inkunga iterabwoba., ubwicanyi bwakozwe nk'igikorwa cy'iterabwoba., gushimuta abantu mu rwego rw'ibikorwa by'iterabwoba, ubujura bwitwaje intwaro, gutwika ibintu n'imitungo., kugerageza kwica.no gukubita no gukomeretsa mu rwego rw'ibikorwa by'iterabwoba.

Icyaha kimwe atahamijwe ni icyo gushinga umutwe witwaje intwaro utemewe.

Ibyaha yahamijwe bifitanye isano n'ibitero umutwe wa FLN wagabye mu Ntara y'Amajyepfo mu 2018 na 2019, aho nibura abantu icyenda bishwe, abandi bagakomereka, ndetse imitungo y'abaturage igasahurwa cyangwa igatwikwa.

Urukiko rwagaragaje uruhare rwa Rusesabagina mu buyobozi bwa politiki bwa MRCD no gushyigikira ibikorwa bya gisirikare bya FLN.

Aho guhabwa mikoro, hakwiye kwitabwaho ubuzima bwe, amashusho  agaragaza ibimenyetso by'uko atameze neza mu mubiri, igikwiye ni uko yakwitabwaho n'abaganga bakagenzura ubuzima bwe, aho guhindura buri kiganiro n'itangazamakuru urubuga rwo gukomeza impaka za politiki no gutangaza ibihuha ku Rwanda.

Rusesabagina si uwo gukomeza guha mikoro ngo yongere kuvuga ibyo ashaka byose; mbere na mbere, ubuzima bwe bukwiye kwitabwaho n'abaganga.

Source : https://rushyashya.net/rusesabagina-si-uwo-guhabwa-mikoro-ahubwo-akeneye-kwitabwaho-nabaganga/

Ingabire Apollinaire warambitse ibiganza muri filime nyinshi zitandukanye hano mu Rwanda zigakundwa, yasohoye filime yise ‘Ikanzu Yera’ igitekerezo cyayo yari amaranye imyaka icumi.

Mu kiganiro yagiranye n’Ikinyamakuru ISIMBI, Apollinaire yavuze ko nyuma yo gusohora filime nka Giramata n’Inzira y’Umusaraba ari bwo yategereje gukora iyo yari amaranye imyaka 10.

Ati “Nyuma nibwo naje gutekereza gukora filime yitwa Ikanzu Yera, Ikanzu Yera igitekerezo cyayo nari nkimaranye imyaka 10 ari nayo twasohoye uyu munsi.”

Yavuze ko atari inkuru mpamo ahubwo ari igitekerezo cyavuye ku kuntu ababyeyi kera bahuraga bakaba ari bo bahitiramo abana babo abo bazashaka, akibaza niba ubu nubwo uwo muco wagiye nta kuntu bahamagara abakobwa bakabahuza maze bagahitiramo umusore umugeni ariko akumva haraburamo ikintu.

Ati “Nakumva hari ikiburamo nkaba nyishyize ku ruhande, ejobundi nibwo nongeye kuyubura, nyiganiriza umushuti wanjye arambwira ngo yaba nziza cyane, ndavuga ngo reka nyirambure nyandike, ndayirambura, ndayandika, maze kuyandika ntangira no gutekereza abantu bazayikina.”

Ni filime igaragaramo amazina akomeye muri Sinema Nyarwanda nka Igihozo Nshuti Mireille cyangwa Mimi Mireille, Nick wakunzwe cyane muri City Maid, Mama Zulu n’abandi.

Ingabire Apollinaire yatangiye sinema muri 2008 yanditse filime nka Intare y’Ingore, akora izirimo Giramata, Inzira y’Umusaraba n’izindi.

Apollinaire yasohoye filime Ikanzu Yera

Mama Zulu na Mimi Mireille ni abakinnyi iyi filime ishingiyeho

Source : http://isimbi.rw/apollinaire-yasohoye-filime-ikanzu-yera-amaze-imyaka-10-akoraho.html

Umunyezamu wa APR FC, Ernan Siluane yongeye kugirirwa icyizere cyo guhamagarwa mu ikipe y’igihugu cye, Mozambique nubwo yabuze umwanya wo gukina.

Uyu mugabo w’imyaka 28, tariki ya 3 Nyakanga 2026 nibwo yahawe ikaze mu muryango mugari wa APR FC.

Yaje afatwa nka nimero ya mbere muri iyi kipe y’Ingabo z’Igihugu, ni nako byari bimeze ariko muri CECAFA Kagame Cup, APR FC imaze gutsindwa na Gor Mahia yatangiye gukenda aterwa icyizere.

Imikino ya gicuti yakurikiyeho yarayikinnye ariko bigeze mu marushanwa, Hakizimana Adolphe aba ari we ufata umwanya, gusa na none ntawakwirengagiza ko yanagizemo imvune.

Ibyo byose ntibyabujije Mozambique kumuhamagara muri Nzeri 2026 mu mikino ibiri yo gushaka itike y’Igikombe cya Afurika banganyijemo na Sénégal ndetse banatsinda Mozambique, aho yagize umukino mwiza.

Yongeye kwisanga ku rutonde rw’abakinnyi 26 bagomba guhangana na Ethiopia muri uku kwezi k’Ugushyingo aho bazakina imiki ibiri, ni mu gushaka itike y’Igikombe cya Afurika cya 2026.

Ernan Siluane yahamagawe mu ikipe y’igihugu ya Mozambique

Source : http://isimbi.rw/ernan-siluane-udakina-muri-apr-fc-yagiriwe-icyizere.html

Nyuma y’amagambo yatangaje nyuma y’umukino wabahuje na Rayon Sports, umutoza wa Marine FC, Yves Rwasamanzi ashobora gufatirwa ibihano.

Wari umukino w’umunsi wa karindwi wa BK Pro League wabaye ku Cyumweru tariki ya 1 Ugushyingo 2026 kuri Stade Umuganda maze Rayon Sports itsinda Marine ibitego bibiri kuri kimwe.

Nyuma y’uyu mukino Rwasamanzi yavuze amagambo akomeye ku misifurire aho yagaragaje kutishimira ibyimezo bimwe na bimwe by’abasifuzi aho yavuze ko Issa Djiguiba na Kabange baba barabonye ikarita itukura kubera amakosa abakoze.

Yanakoresheje amagambo akomeye aho yagize ati “Birutwa n’uko umusifuzi wo ku ruhande hano, iyo bashyiraho Haringingo agasifura.”

Yanavuze ko “Bajye bakomeza babateteshe buriya nibagera hanze hari igihe kizagera bajye babatetesha.”

Aya magambo umutoza wa Marine FC yatangaje, ISIMBI yamenye ko ashobora kuza gufatirwa ibihano n’inzego zibishinzwe.

Yves Rwasamanzi ashobora guhanwa

Source : http://isimbi.rw/yves-rwasamanzi-ashobora-guhanwa-kubera-rayon-sports.html

Umuraperi Gatsinzi Emery wamamaye nka Riderman yateguje abakunzi be ko agiye gusohora ‘EP’ iriho indirimbo eshanu yise ‘1500’ yavuze ko ifite imyandikire yihariye.

Mu kiganiro yagiranye n’ikinyamakuru ISIMBI, Riderman yavuze ko iyi EP yarangiye ndetse azanayisohora mu cyumweru gitaha.

Ati “EP yose yararangiye, hariho indirimbo eshanu gusa, ikaba izajya hanze tariki ya 11 z’uku kwezi.”

Yakomeje avuga ko kugeza ubu indirimbi imaze gusohoka kuri iyi EP ari imwe gusa ari iyo yise ‘Imikungu y’Inyenyeri.’

Ati “Oya nta yindi irasohoka. Imikungugu y’Inyenyeri ni yo yonyine imaze gusohoka iri kuri iyi EP.”

Agaruka ku mwihariko wayo, Riderman yavuze ko abantu bagiye kongera kumva Hip Hop yanditse neza, ifite ubutumwa bwiza nka kumwe kera bajyaga babikora.

Ati “Hariho ikaramu, hariho ikaramu rwose. Hariho indirimbo zanditse mu buryo bw’ihariye kandi zifite ubutumwa, ni kwa kundi twajyaga tubikora, ni ya Hip Hop ya kera twakoraga, bitegure Hip Hop y’umwimerere.”

“Navuga ko indirimbo ziriho zo zikaze kurushaho kuko ho harimo no kujya inama, iyo umuntu agenda akura ni nako ubunararibonye bw’ubuzima bugenda buhinduka, ubu umuntu aravuga ibintu bukuzemo ukuntu.”

Ku kuba zose zizaba zifite amashusho, yavuze ko ako ari agaseke abantu bakwiye gutegerezanya amatsiko ariko “nababwira ngo umuntu ukunda Hip Hop umwaka arawusoza afite akantu ko kumva gasobanutse kameze neza.”

Uyu muraperi kandi akaba yemeje ko nubwo nta makuru menshi yabitangaho ariko arimo no gutekereza gukora igitaramo cye mu minsi iri imbere abantu bazamenya amakuru arambuye.

Riderman yateguje EP

Source : http://isimbi.rw/harimo-ikaramu-riderman-ku-mwihariko-w-icyatanu.html

Urwego rw'Igihugu rw'Ubugenzacyaha (RIB) rwerekanye abantu 11 bakekwaho kugira uruhare mu bikorwa byo kwiba no kwangiza insinga z'amashanyarazi n'ibindi bikoresho bigize ibikorwaremezo by'amashanyarazi, aho agaciro k'ibikoresho bikekwa ko byibwe kagereranywa na miliyoni 20 z'amafaranga y'u Rwanda.

Aba bantu bakurikiranyweho ibyaha birimo kurema umutwe w'abagizi ba nabi cyangwa kuwujyamo, kwangiza ibikorwaremezo ndetse n'ubujura.

RIB ivuga ko ibikorwa nk'ibi byo kwangiza ibikorwaremezo by'amashanyarazi ari ibyaha bikomeye kuko bigira ingaruka ku mutungo rusange no ku mitangire ya serivisi z'amashanyarazi.

Kwiba insinga n'ibindi bikoresho byifashishwa mu kugeza amashanyarazi ku baturage bishobora gutuma ibikorwa byo kuyatanga bihagarara mu bice byangijwe, bigasaba ko hakorwa imirimo yo gusana no gusimbuza ibyangiritse.

Abakekwa 11 bafungiye kuri sitasiyo za RIB za Nyarugenge na Kicukiro, mu gihe iperereza rikomeje kugira ngo hamenyekane uruhare rwa buri wese muri ibyo bikorwa no gutegura dosiye zabo zishyikirizwe Ubushinjacyaha.

Itegeko Nº 68/2018 ryo ku wa 30 Kanama 2018 riteganya ko umuntu wangiza ku bushake ibikorwaremezo by'amashanyarazi bitari ibye, iyo abihamijwe n'urukiko, ashobora guhanishwa igifungo cy'imyaka itatu kugeza kuri itanu n'ihazabu iri hagati ya miliyoni eshatu na miliyoni eshanu z'amafaranga y'u Rwanda.

Gusa aba bantu bafashwe bakekwaho ibyo byaha, bityo icyemezo cya nyuma ku kuba babihamwa cyangwa batabihamwa kizafatwa n'inkiko.

Source : https://flash.rw/2026/11/03/rib-yerekanye-abantu-11-bakekwaho-kwiba-no-kwangiza-ibikorwaremezo-byamashanyarazi/

Umunsi wa karindwi wa Shampiyona y'Icyiciro cya Mbere mu Rwanda, BK Pro League 2026-2027, waranzwe no kwitwara neza ku makipe makuru, aho Rayon Sports yatsinze Marines FC ibitego 2-1, Police FC itsinda Bugesera FC igitego 1-0, mu gihe Gorilla FC yakomeje kuyobora urutonde rw'agateganyo.

Rayon Sports yatsinze Marine FC ibitego 2-1 mu mukino wabereye kuri Stade Umuganda i Rubavu, ku Cyumweru, tariki ya 1 Ugushyingo 2026. Wari umukino waranzwe no guhangana gukomeye, aho amakipe yombi yashakaga kwigarurira umukino no kubona amanota atatu.

Junior Kameni ni we wabaye umucunguzi ya Rayon Sports, atsinda ibitego byombi. Icya mbere yagitsinze ku munota wa 14, nyuma y'uko umunyezamu wa Marine FC akoze ikosa ryo gutanga umupira nabi. Icya kabiri yagitsinze ku munota wa 71, yongera guhesha Rayon Sports amahirwe yo kwegukana amanita atatu y'umunsi.

Marines FC yari yabanje kwishyura ku munota wa 26, igitego cyatsinzwe na Niyibizi Ramadhan, watsinze igitego ku ishoti yatereye inyuma y'urubuga rw'amahina.

Iyi ntsinzi yafashije Rayon Sports kugeza amanota arindwi no kuzamuka ku rutonde rw'agateganyo aho kuri ubu iri ku mwanya wa karindwi, ni mu gihe Marine FC yagumye ku mwanya wa kabiri n'amanota 11.

Ku rundi ruhande, Police FC na yo yongeye kubona intsinzi, itsinda Bugesera FC igitego 1-0. Igitego cyabonetse ku munota wa 71, gitsinzwe na Christian Ingabire uzwi nka Tia, gihesha iyi kipe amanota atatu y'ingenzi. Iyi yari intsinzi ya kabiri Police FC ibonye muri uyu mwaka w'imikino, ikaba imaze kugira amanota arindwi.

Mu yindi mikino y'umunsi wa karindwi, APR FC yatsinze Etincelles FC ibitego 2-0, Kiyovu Sports itsinda AS Kigali ibitego 2-0, naho Musanze FC itsinda Amagaju FC ibitego 3-1. Al Hilal SC na yo yatsinze Gasogi United ibitego 2-0.

Gorilla FC yakomeje kuyobora Shampiyona n'amanota 12, nyuma yo kunganya na Etoile de l'Est igitego 1-1. Marine FC na Mukura VS zikurikiyeho, buri imwe ifite amanota 11.

Mu mikino itarabereye igihe ya BK Pro League  ndetse indi ikaba iri bukinwe ku munsi wa munani, Rayon Sports izahura na Al Hilal SC ku wa 4 Ugushyingo 2026, mu gihe Police FC izasura Marine FC ku wa 5 Ugushyingo 2026.

Source : https://rushyashya.net/rayon-sports-yatsinze-marines-fc-police-fc-yongera-kubona-intsinzi-gorilla-fc-iracyayoboye-bk-pro-league/

Umugaba Mukuru w'Ingabo za Repubulika ya Centrafrique, Gen Zephirin Mamadou, yashimiye Guverinoma y'u Rwanda n'ubuyobozi bw'Ingabo z'u Rwanda (RDF) ku ruhare bagize mu guhugura abasirikare 254 b'igihugu cye, basoje imyitozo y'ibanze y'ibikorwa bya gisirikare bidasanzwe.

Ibi yabigarutseho ku wa 2 Ugushyingo 2026, ubwo hasozwaga aya mahugurwa yari amaze amezi atandatu atangirwa mu Kigo cya Gisirikare cya Nasho, giherereye mu Karere ka Kirehe.

Ingabo za Centrafrique zatorejwe mu Rwanda zasoje imyitoze

Abayobozi bakuru b'ingabo mu bihugu byombi bitabiriye uyu muhango

Yavuze ko amasomo n'ubumenyi abasirikare bungutse, by'umwihariko mu bijyanye n'ibikorwa bya gisirikare bidasanzwe, bizabafasha kurushaho kuzuza inshingano zabo zo kurinda igihugu n'abaturage bacyo.

Aba basirikare 254, barimo ba ofisiye n'abandi bafite amapeti atandukanye, bahuguwe ku bumenyi burimo kurasa ku ntego, gukoresha intwaro zitandukanye, kurwana bakoresheje amaboko, kwambuka imigezi n'andi mazi, gusoma amakarita ya gisirikare ndetse no gukora ibikorwa bifashishije kajugujugu.

Umuhango wo gusoza ayo mahugurwa wayobowe n'Umugaba Mukuru w'Ingabo z'u Rwanda, Gen MK Mubarakh, ari kumwe na mugenzi we wa Centrafrique, Gen Zephirin Mamadou, witabirwa n'abandi basirikare bakuru b'ibihugu byombi.

Gen MK Mubarakh na we yashimiye abasirikare basoje amahugurwa ku muhate, ikinyabupfura n'ubudaheranwa bagaragaje mu gihe cy'amezi atandatu bamaze batozwa.

Yabasabye gukomeza kubahiriza amahame y'ubunyamwuga no gukoresha neza ubumenyi bungutse mu gukorera igihugu cyabo.

Yongeye gushimangira ko u Rwanda rukomeje kwiyemeza gusangiza ibihugu by'inshuti ubunararibonye n'ubumenyi rufite mu bijyanye n'imyitozo ya gisirikare, hagamijwe guteza imbere ubufatanye mu kubungabunga amahoro n'umutekano ku mugabane wa Afurika.

Ubufatanye bw'u Rwanda na Repubulika ya Centrafrique mu bya gisirikare bukubiyemo guhugura abasirikare, kubongerera ubushobozi no guteza imbere ubunyamwuga, bikaba ari imwe mu nzira ibihugu byombi bikoresha mu gukomeza umubano wabyo.

Source : https://flash.rw/2026/11/03/umugaba-mukuru-wingabo-za-centrafrique-yashimiye-u-rwanda-ku-myitozo-rwahaye-abasirikare-be/

Umukino uhuza Atlético Madrid yo muri Espagne na Bayern Munich yo mu Budage, utegerejwe kuri uyu wa Kabiri tariki ya 3 Ugushyingo 2026, ni umwe mu mikino ikomeye mu ijonjora rya UEFA Champions League. Imibare y'uko amakipe yombi ahagaze, amateka y'uko yagiye ahura n'uburyo akina, igaragaza ko Bayern Munich ifite imbaraga mu busatirizi, mu gihe Atlético Madrid yizewe cyane mu bwugarizi, cyane cyane iyo ikiniye imbere y'abafana bayo.

Uyu mukino urabera kuri Stade Riyadh Air Metropolitano, aho Atlético Madrid yakirira Bayern Munich. Amakipe yombi akeneye amanota kugira ngo yongere amahirwe yo kurangiza mu makipe umunani ya mbere ahita ajya mu cyiciro gikurikiyeho.

Amateka. 

Mu mateka yo guhura hagati y'aya makipe mu marushanwa y'i Burayi, Bayern Munich ni yo ifite imibare iri hejuru. Mu mikino umunani imaze guhuza impande zombi, Bayern yatsinzemo ine, Atlético itsinda ibiri, indi ibiri irangira amakipe anganya.

Bayern kandi imaze imikino itatu idatsindwa na Atlético, aho yatsinze ibiri inganya umwe. Gusa Atlético ifite ikintu gikomeye ishobora kwishingikirizaho: mu mikino itatu iheruka kwakirira Bayern i Madrid, ntiyigeze itsindwa, itsinda ibiri inganya umwe.

Ikindi ni uko Atlético imaze imikino 16 yakira amakipe yo mu Budage itaratsindwa. Yatsinze 12 inganya ine. Ibi bigaragaza ko Bayern itazoroherwa no kubona intsinzi imbere y'abafana ba Atlético.

Bayern irusha Atlético ubushobozi mu busatirizi

Imibare y'imikino iheruka igaragaza ko Bayern Munich ifite uburyo bwo gusatira butanga umusaruro mwinshi. Mu mikino itanu iheruka, iyi kipe yatsinze ibitego 20, mu gihe Atlético Madrid yatsinze ibitego umunani mu mikino itanu yayo iheruka.

Mu isesengura ry'imibare ya Football Signal, Bayern igaragaza impuzandengo y'ibitego bine kuri buri mukino mu gihe Atlético ifite 1.6. Bayern kandi igerageza amashoti agera kuri 25 kuri buri mukino, mu gihe Atlético igerageza 18.

Mu mahirwe akomeye yo gutsinda ibitego, Bayern igira impuzandengo ya 6.8 kuri buri mukino, Atlético ikagira 2.8. Ibi bishimangira ubushobozi bwa Bayern bwo gushyira ikipe bahanganye ku gitutu no guhora ishaka uburyo bwo kubona igitego.

Gusa Atlético ifite intwaro ikomeye mu bwugarizi. Mu mikino yayo itanu iheruka, yinjijwe ibitego bibiri gusa, mu gihe Bayern yinjijwe ibitego bitandatu. Atlético kandi ifite impuzandengo y'ibitego 0.4 yinjizwa kuri buri mukino, ugereranyije na 1.2 bya Bayern muri iyo mibare.

Abatoza n'abakinnyi bavuga iki?

Umutoza wa Atlético Madrid, Diego Simeone, yavuze ko yiteguye guhangana n'ikipe ikomeye, agaragaza ko Bayern Munich iri mu makipe akomeye muri iri rushanwa. Yavuze ko Atlético igomba kujya muri uyu mukino ifite ubushake n'ibyishimo, ariko izi neza ubukana bw'uwo bahanganye.

Ku ruhande rwa Bayern Munich, umutoza wungirije Aaron Danks yavuze ko bazi neza ko Atlético ari ikipe ikomeye mu bwugarizi kandi ishoboye kugumana umupira. Yagaragaje ko Bayern ishaka gukina isatira, kugumana umupira no gukoresha neza amahirwe izabona.

Rutahizamu Harry Kane na we yavuze ko Bayern itegereje umukino ukomeye, ashimangira ko Atlético ishobora guteza akaga mu busatirizi bwihuse ndetse ikaba ikipe igoye gucamo, cyane cyane iyo ikiniye kuri stade yayo.

Ibibazo kuri Bayern 

Bayern Munich irakina idafite bamwe mu bakinnyi bayo b'ingenzi barimo Jamal Musiala, Luis Díaz na Serge Gnabry kubera ibibazo by'imvune. Manuel Neuer na Michael Olise bari mu bakinnyi bajyanye n'ikipe i Madrid, ariko icyemezo cyo kumenya niba baza gukina kikaba kigomba gufatwa nyuma yo kureba uko bameze.

Ikindi ni uko umutoza mukuru Vincent Kompany arwaye, bigatuma umutoza wungirije Aaron Danks ari we utegura ikipe muri uyu mukino.

Ku ruhande rwa Atlético Madrid, Diego Simeone azaba yizeye ko gukinira mu rugo, ubunararibonye bw'abakinnyi be n'uburyo ikipe ye ikina yugarira bizayifasha guhangana n'imbaraga za Bayern.

Ni iyihe kipe ifite amahirwe menshi?

Nubwo Bayern Munich ifite imibare myiza mu busatirizi, Atlético Madrid ifite inyungu yo gukinira imbere y'abafana bayo ndetse n'uburyo bukomeye bwo kwugarira.

Isesengura ry'imibare ya My Football Facts riha Atlético amahirwe ya 42% yo gutsinda, Bayern ikagira 37%, mu gihe amahirwe yo kunganya ari 22%. Iyi mibare ni icyegeranyo cy'ibiteganywa n'icyitegererezo cy'ibarurishamibare, si igisubizo cy'umukino.

Source : https://flash.rw/2026/11/03/ucl-bayer-munich-ntiratsindira-atletico-muri-espagne-icyo-imibare-ivuga/

Perezida wa Repubulika y'u Rwanda, Paul Kagame, yifatanyije n'abakuru b'ibihugu na za Guverinoma ndetse n'abayobozi bakomeye mu nzego z'ubucuruzi n'ishoramari mu muhango wo kwakirwa na Nyiricyubahiro Umwami Charles III w'u Bwongereza, nyuma y'uko hasojwe inama yahuje abayobozi ba Commonwealth n'abashoramari bakomeye ku rwego mpuzamahanga.

Uyu muhango wabaye mu gihe abayobozi batandukanye bari bateraniye muri Antigua na Barbuda, ahabereye ibikorwa bijyanye n'inama ya 28 y'Abakuru b'ibihugu na za Guverinoma bigize Umuryango wa Commonwealth (CHOGM 2026).

Amakuru yatangajwe n'ibiro by'Umukuru w'Igihugu, Village Urugwiro, mu gitondo cyo ku wa 3 Ugushyingo 2026, yemeje ko Perezida Kagame yari mu bitabiriye ibi birori.

Mbere y'uyu muhango wo kwakirwa na King Charles III, abayobozi ba za Guverinoma n'abahagarariye ibigo bikomeye by'ubucuruzi bari bitabiriye inama yari igamije kurebera hamwe amahirwe mashya y'ishoramari mu bihugu bigize Commonwealth.

Iyi nama yahaye umwanya abayobozi n'abashoramari wo kungurana ibitekerezo ku buryo ibihugu byarushaho gufatanya mu guteza imbere ubucuruzi, gukurura ishoramari rirambye no gushyiraho uburyo bworohereza ibigo by'abikorera gushora imari mu nzego zitandukanye.

Mu byaganiriweho harimo guteza imbere ibikorwa remezo, ingufu, ikoranabuhanga, ubukungu burengera ibidukikije, ubucuruzi bwambukiranya imipaka no kongera amahirwe ku bigo bito n'ibiciriritse.

Ubufatanye hagati ya za Guverinoma n'abikorera bwagarutsweho nk'imwe mu nzira zishobora gufasha ibihugu bya Commonwealth kwihutisha iterambere ry'ubukungu no guhanga imirimo mishya.

Source : https://flash.rw/2026/11/03/perezida-kagame-yitabiriye-umuhango-wo-kwakirwa-numwami-charles-iii/