Webrwanda Backend

Author: webrwanda

  • Bwa mbere mu mateka u Rwanda rwabonye umudali mu Mikino ya Commonwealth #rwanda #RwOT

    Niyonkuru Florence usiganwa ku maguru yabaye umukinnyi wa mbere wo mu Rwanda wegukanye umudali mu Mikino ya Commonwealth, aho yatwaye uw'Umuringa mu gusiganwa mu ntera ya metero 10.000.

    Ku wa 27 Nyakanga 2026, ni bwo mu Mujyi wa Glasgow muri Écosse, hakomeje kubera Imikino ya Commonwealth ihuza abakinnyi bo mu bihugu bihuriye muri uyu muryango w'ibikoresha Icyongereza, aho barushanwa muri siporo zitandukanye buri myaka ine.

    Uyu mwaka, u Rwanda rwitabiriye iyi Mikino ku nshuro ya gatanu, aho ruhagarariwe n'abakinnyi 10, barimo batanu bo mu byiciro bitandukanye byo gusiganwa ku maguru. Aba ni Iribagiza Honorine, Niyonkuru Florence, Uwitonze Claire, Imanizabayo Emeline na Umutesiwase Magnifique.

    Aba bakinnyi batozwa na Ndacyayisenga Jean Pierre, barushanwa mu gusiganwa mu ntera ya metero 200, 400, 800, 5000 n'intera ya metero 10.000.

    Ku wa 27 Nyakanga, Niyonkuru yahatanye mu basiganwa mu ntera ya metero 10.000 mu bagore, agera ku murongo ari uwa gatatu, akoresheje iminota 31, amasegonda 55 n'ibyijana 47.

    Yahise ahabwa umudali w'Umuringa ari na wo wa mbere u Rwanda rubonye muri iyi mikino, akaba yakurikiye Rose Davies wo muri Australia wabaye uwa mbere amurusha amasegonda 16, na Diana Wanza wo muri Kenya wamurushije amasegonda atanu.

    Niyonkuru Florence yamaze amezi abiri yitozanya na Imanizabayo Emeline kugira ngo bazitware neza muri iri rushanwa, ibyatumye bombi batitabira 'Kigali International Peace Marathon' yabaye ku wa 14 Kamena 2026.

    Andi mateka Niyonkuru Florence aheruka kwandika ni ukwegukana umudali wa Zahabu mu gusiganwa metero ibihumbi 10 muri 'TCS World 10K Bengaluru' yabereye mu Buhinde.

    Muri siporo yo koga, u Rwanda ruhagarariwe na Ntwali Jayden, Murenzi Sheja Kean na Echessah Axela Marta aho barushanwa mu koga mu ntera ya metero 50, 100 na 200 (mu gukura umusomyo), metero 50 (bunyugunyugu), mu ntera ya metero 50 n'iya 100 (ngarama) na metero 50 (makeri).

    Echessah Axela Marta na Ntwali Jayden bombi basoreje ku mwanya wa gatanu bakinnye mu koga bunyugunyugu.

    U Rwanda rwinjiye mu Muryango wa Commonwealth mu 2009, rutangira kwitabira imikino yawo mu 2010 ubwo yari yabereye i Delhi mu Buhinde.

    Ahandi u Rwanda rwabonye umudali ni mu Mikino y'Urubyiruko (Commonwealth Youth Games) wegukanywe n'Ikipe ya Beach Volleyball, yari igizwe na Munezero Valentine na Musabyimana Penelope, aho begukanye umudali w'Umuringa babaye aba gatatu i Bahamas mu 2017.

    IGIHE.COM

    Source : https://rushyashya.net/bwa-mbere-mu-mateka-u-rwanda-rwabonye-umudali-mu-mikino-ya-commonwealth/

  • Ikanzu igaragaza amateka y’u Rwanda yahawe Guinness World Records igiye kuzanwa i Kigali #rwanda #RwOT

    Ikanzu itukura izwi nka 'The Red Dress', yamamaye ku Isi kubera kuba yaradozwe n’abantu bo mu bihugu 51, biteganyijwe ko izamurikirwa mu Rwanda mu Ugushyingo 2026. Mu bice biyigize harimo n’icyakozwe n’abagore batandatu bo mu Mujyi wa Kigali.

    Iyi kanzu yatangijwe n’umuhanga mu guhanga imideli wo mu Bwongereza, Kirstie Macleod, guhera mu ntangiriro zo mu 2009, umushinga urangira mu 2023 nyuma y’imyaka 14. Yaje guhabwa agaciro na Guinness World Records nk’umushinga munini ku Isi w’ubudozi bwahuriyemo abantu benshi.

    The Red Dress ifite urudodo ruyigize rukozwe inshuro zigera kuri miliyari imwe, ikozwe mu mwenda wa silk dupion kandi ipima ibiro 6.8. Yadozwe n’abantu 380 barimo abagore 367, abagabo 11 n’abandi batibona muri ibyo byiciro.

    Igice cyakozwe n’Abanyarwandakazi batandatu kigaragaza urugendo rw’u Rwanda rwo kuva mu mateka y’ububabare, by’umwihariko Jenoside yakorewe Abatutsi, rugana ku gukira no kongera kubaka ubuzima.

    Iyi kanzu yamaze kumurikirwa ahantu hatandukanye harimo ku Muryango w’Abibumbye i Genève no mu nzu ndangamurage zitandukanye. Kugeza ubu, abantu 28 gusa ni bo bamaze kuyambara.

    Mbere yo kugera mu Rwanda, The Red Dress iri kumurikirwa mu Nzu Ndangamurage ya Brisbane muri Australia kugeza ku wa 13 Nzeri 2026, nyuma ikazakomereza urugendo rwayo mu Rwanda mbere yo kujyanwa mu Bwongereza mu 2027.

    Iyi kanzu ifite amateka akomeye igiye kuzanwa mu Rwanda

    Source : http://isimbi.rw/ikanzu-igaragaza-amateka-y-u-rwanda-yahawe-guinness-world-records-igiye-kuzanwa.html

  • Uko ibuye rimwe ryishe inyoni ebyiri kuri Muhoza Daniel wa Rayon Sports #rwanda #RwOT

    Rutahizamu wa Rayon Sports, Muhoza Daniel yakabije inzozi yarotaga icya rimwe ni nyuma yo kwisanga muri Rayon Sports yakuze yarihebeye.

    Uyu mukinnyi ukina ku mpande asatira, muri uku kwezi kwa Nyakanga 2026 ni bwo yasinyiye Rayon Sports avuye muri Etoile del’Est.

    Umwaka ushize nibwo yigeze gutangaza ko inzozi ze ari ugukina mu cyiciro cya mbere, akaba yarabigezeho noneho ahera mu ikipe ya Rayon Sports yakuze akunda.

    Ati “Inzozi zanjye za mbere ni ugukina mu cyiciro cya mbere, ngize Imana hanze, buri mukinnyi wese ni byo aba yifuza.”

    “Ntabwo najyaho ngo mbeshye, nkunda Rayon Sports.”

    Akaba amaze gukinira Rayon Sports imikino ibiri harimo uwa Gor Mahia kuri Rayon Day na KVZ FC muri CECAFA Kagame Cup yanatsinzemo igitego.

    Muhoza Daniel yakabije inzozi ze

    Source : http://isimbi.rw/uko-ibuye-rimwe-ryishe-inyoni-ebyiri-kuri-muhoza-daniel-wa-rayon-sports.html

  • NESA YASHYIZE HANZE INGENGABIHE Y'UMWAKA W'AMASHURI 2026/2027 #rwanda #RwOT

    Ikigo cy'Igihugu gishinzwe Ibizamini n'Ubugenzuzi bw'Amashuri (NESA) cyatangaje ku mugaragaro ingengabihe y'umwaka w'amashuri wa 2026–2027, igaragaza uko amasomo azagenda kuva umwaka utangiye kugeza usojwe, ndetse n'amatariki y'ibizamini bya Leta ku byiciro byose.

    Ingengabiye y'umwaka w'amashuri wa 2026/2027 yasohotse

    Nkuko bigaragara kuri iyi ngengabihe, umwaka mushya w'amashuri uzatangira ku wa 07 Nzeri 2026, usozwe ku wa 02 Nyakanga 2027. NESA ivuga ko iyi gahunda igamije gufasha amashuri, abarimu, abanyeshuri n'ababyeyi gutegura ibikorwa by'uburezi hakiri kare no kugabanya imbogamizi zaterwaga no kutagira gahunda isobanutse.

    Igihembwe cya mbere

    Abanyeshuri bazatangira kwiga ku wa 07 Nzeri 2026, igihembwe cya mbere kirangire ku wa 18 Ukuboza 2026. Iki gihembwe kizamara ibyumweru 15, nyuma yacyo abanyeshuri bajye mu biruhuko by'ibyumweru bibiri mbere yo gutangira igihembwe gikurikiraho.

    Igihembwe cya kabiri

    Igihembwe cya kabiri kizatangira ku wa 04 Mutarama 2027 kirangire ku wa 02 Mata 2027, kimare ibyumweru 13. Nyuma yacyo hazakurikiraho ibiruhuko by'ibyumweru bibiri, mbere y'uko abanyeshuri basubira ku ishuri.

    Igihembwe cya gatatu

    Igihembwe cya gatatu, ari na cyo gisoza umwaka w'amashuri, kizatangira ku wa 19 Mata 2027 kirangire ku wa 02 Nyakanga 2027, kimare ibyumweru 11. Nyuma yacyo abanyeshuri bazajya mu kiruhuko kirekire cy'amezi abiri.

    Amatariki y'ibizamini bya Leta

    NESA yanatangaje gahunda y'ibizamini bya Leta, aho ibizamini bya PBA, TSS, TTC, ACC na ANP bizatangira ku wa 31 Gicurasi 2027 bikarangira ku wa 18 Kamena 2027, bikazamara ibyumweru bitatu.

    Ku banyeshuri barangiza amashuri abanza, ibizamini bya PLE bizakorwa kuva ku wa 06 Nyakanga kugeza ku wa 08 Nyakanga 2027.

    Naho ibizamini bya Leta by'amashuri yisumbuye bizatangira ku wa 14 Nyakanga 2027 bisozwe ku wa 23 Nyakanga 2027.

    Icyo iyi ngengabihe isobanuye

    Itangazwa ry'iyi ngengabihe ritanga umurongo usobanutse ku mashuri yose yo mu Rwanda, rikanafasha abanyeshuri n'abarimu gutegura amasomo n'isubiramo ry'ibizamini hakiri kare. Biteganyijwe ko kubahiriza aya matariki bizarushaho kunoza imigendekere y'umwaka w'amashuri no guteza imbere ireme ry'uburezi mu gihugu.

    Source : https://flash.rw/2026/07/29/nesa-yashyize-hanze-ingengabihe-yumwaka-wamashuri-2026-2027/

  • ABASIRIKARE BA ZIMBAMBWE BARI MU RUGENDOSHURI MU RWANDA #rwanda #RwOT

    Itsinda ry'abofisiye biga mu Ishuri Rikuru rya Gisirikare rya Zimbabwe riri mu ruzinduko rw'iminsi 14 mu Rwanda, rugamije kungurana ubumenyi no gukomeza gushimangira umubano usanzwe hagati y'ibihugu byombi mu rwego rw'igisirikare n'umutekano.

    Mu ruzinduko rwabo, aba bofisiye basuye Minisiteri y'Ingabo ndetse n'Icyicaro Gikuru cy'Ingabo z'u Rwanda (RDF), aho bakiriwe n'abayobozi bakuru b'ingabo banahabwa ibiganiro byibanze ku mateka n'iterambere by'Ingabo z'u Rwanda.

    Umuvugizi w'Ingabo z'u Rwanda akaba n'Umuyobozi Mukuru ushinzwe Ubufatanye Mpuzamahanga mu bya Gisirikare, Brig Gen Patrick Karuretwa, yasobanuriye iri tsinda uko RDF yavutse mu rugamba rwo kubohora igihugu, ikaza kwiyubaka ikaba imwe mu ngabo z'umwuga zifite uruhare rukomeye mu kubungabunga umutekano, guteza imbere igihugu no gufasha abaturage mu bikorwa bitandukanye by'iterambere.

    Yanagarutse ku ruhare Ingabo z'u Rwanda zikomeje kugira mu butumwa mpuzamahanga bwo kubungabunga amahoro hirya no hino ku mugabane wa Afurika, agaragaza ko ubunyamwuga bwazo bwatumye zubaka izina ryiza ku rwego mpuzamahanga.

    Umuyobozi w'itsinda ry'abofisiye bo muri Zimbabwe, Col Cosmore Kaondera, yashimiye uburyo bakiriwe mu Rwanda ndetse anashima intambwe igihugu kimaze gutera mu kubaka amahoro, umutekano n'iterambere rirambye. Yavuze ko ibikorwa by'Ingabo z'u Rwanda, haba imbere mu gihugu no mu butumwa mpuzamahanga, ari urugero rwiza rw'igisirikare gifatanya n'abaturage mu kubaka igihugu.

    Mu rwego rwo gusobanukirwa amateka y'u Rwanda, iri tsinda ryanasuye Urwibutso rwa Jenoside rwa Kigali ndetse n'Ingoro y'Amateka y'Urugamba rwo Kubohora Igihugu. Aho bahafatiye umwanya wo kwiga amateka ya Jenoside yakorewe Abatutsi mu 1994, banamenya inzira u Rwanda rwanyuzemo rugera ku bumwe, ubwiyunge n'amahoro arambye.

    Aba bofisiye bagaragaje ko ayo mateka yabahaye amasomo y'ingenzi ku kamaro ko kubungabunga amateka no gukumira ibyaha bya Jenoside n'andi mahano ashobora kwibasira inyokomuntu.

    Mu minsi isigaye y'urwo rugendoshuri, bazanasura ibindi bigo bya Leta n'inzego zitandukanye kugira ngo barusheho gusobanukirwa uburyo u Rwanda rwubatse imiyoborere ishingiye ku mutekano, iterambere ry'ubukungu n'imibereho myiza y'abaturage.

    Uru ruzinduko rugaragaza umubano ukomeje gukomera hagati y'u Rwanda na Zimbabwe, cyane cyane mu bijyanye n'amahugurwa ya gisirikare, gusangizanya ubunararibonye no guteza imbere amahoro n'umutekano ku mugabane wa Afurika.

    Banasangijwe amateka yarenze Jenoside yakorewe abatutsi mu 1994

    Source : https://flash.rw/2026/07/29/abasirikare-ba-zimbambwe-bari-mu-rugendoshuri-mu-rwanda/

  • Turabakeneye, turabakunda ariko mwiyiteho: Impanuro za Perezida Kagame ku Indangamira (Video) – #rwanda #RwOT

    Yabigarutseho mu butumwa yabahaye ubwo yabaganirizaga kuri uyu wa 28 Nyakanga 2026 mu Kigo cy'Amahugurwa cya Gisirikare cya Gabiro (CTC Gabiro) i Gatsibo.

    Umukuru w'Igihugu yibukije uru rubyiruko ko rukwiye kurangwa n'ikinyabupfura mu byo rukora byose kuko ari cyo gifasha umuntu kugera ku cyo yifuza kugeraho.

    Ati 'Ikinyabupfura, kirakuyobora, kigatuma muri kwa guhitamo ugira ibyo uhitamo bizima. Kubaha, kwiyubaha na kwagushakisha kumenya. Ikinyabupfura iyo ugifite n'ubumenyi byongera agaciro kuri bya bindi wamenye. Ikinyabupfura ni ngombwa. Gituma utava ku ntego ngo ujye mu bindi bintu harimo n'ibitakubaka bishobora kugusenya.

    Yakomeje ati 'No kuza kwigira hano muri aya mahugurwa, muri iri torero, uko mumeze uku, ibyo mwavuze mwize muri hano n'iki, ni ibigushyiramo ikinyabupfura, ubishaka rero bimugeza kure, ubisuzuguye, ntabikurikize uko bikwiye, wenda bimugeza hafi bikarangira.'

    Yasabye uru rubyiruko guharanira ko buri gihe rwaharanira kwishakamo ibisubizo kandi rwifitiye icyizere kuko rufite ubushobozi bwo gushaka no kugera ku bisubizo birambye.

    Perezida Kagame yerekanye ko urubyiruko rukwiye kugira uruhare mu iterambere kandi rukwiye kwiyitaho uko bikwiriye.

    Ati 'Mbasabe urubyiruko, turabakeneye, turabakunda ariko mbere na mbere mwiyiteho ubwanyu.'

    Yerekanye ko kunywa ibisindisha bidakwiye kubata abantu kuko byangiza ahazaza h'urubyiruko n'igihugu muri rusange.

    Ati 'Ndashaka kubaburira. Ndabasabye ko ibi byose tuvuga, ibyabazanye hano, imigambi dufite nk'igihugu n'iki, ibi bintu bizabica mbere y'uko mugera ku ntego zanyu. Niba muzifite, ntimukangize ubuzima bwanyu kubera ibintu bidafite umumaro.'

    Nta muntu kunywa urumogi byakijije

    Perezida Kagame kandi yagaragaje ko urubyiruko rukwiriye kwirinda gukoresha ibiyobyabwenge by'umwihariko urumogi.

    Ati 'Uwababwiye ko rwamukijije, rwakijije umuryango we cyangwa rwakijije igihugu ni inde? Ndabatumye, muzanshakire umuntu umwe, umwe gusa ntabwo nshaka babiri, ushobora gutanga ubuhamya akavuga ko kunywa urumogi byamukijije.'

    Yavuze ko nta muntu ushobora guhagarara ashize amanga, ngo atange ubuhamya bw'uko kunywa ibiyobyabwenge byamukijije, byakijije umuryango we cyangwa se igihugu.

    Yashimangiye ko uwamubonera umuntu ubitangamo ubuhamya yazamuhemba nubwo yemeza ko ntawe ahubwo n'uwaba yabonetse yaba abeshya kuko bidashoboka ko kunywa ibiyobyabwenge n'ibisindisha bikiza umuntu ahubwo ko bimwangiriza ubuzima.

    Yagaragaje ko iyo bibaye byinshi mu rubyiruko atari rwo rwonyine byica, ahubwo byica n'ahazaza h'igihugu, arusaba kwirinda kubyishoramo.

    Minisitiri w'Ubumwe bw'Abanyarwanda n'Inshingano Mboneragihugu, Dr. Jean Damascene Bizimana, yasobanuye ko mu batangiye Itorero Indangamirwa icyiciro cya 16, bane batakomeje amahugurwa kuko babiri basanze batwite inda zitateganyijwe mu gihe abandi birukanywe kubera gukoresha ibiyobyabwenge.

    Perezida Paul Kagame yerekanye ko nta muntu wakijijwe no kunywa ibiyobyabwenge

    Umukuru w’Igihugu, Paul Kagame yasabye urubyiruko kugira ikinyabupfura

    Perezida Kagame yabwiye urubyiruko kwirinda ubusinzi

    Perezida Kagame yasabye urubyiruko kugira uruhare mu kwishakamo ibisubizo

    Perezida Kagame yasabye urubyiruko kwiyitaho uko bikwiriye

    Perezida Kagame yasabye urubyiruko kwikunda kuko igihugu kirukeneye

    Perezida Kagame yihanangirije urubyiruko ku gukoresha ibiyobyabwenge

    Urubyiruko rwatorejwe mu Itorero Indangamirwa icyiciro cya 16 rwiyemeje gushyira mu bikorwa impanuro z’umukuru w’igihugu

    Amafoto: Himbaza Pacifique

    Source : http://igihe.com/amakuru/u-rwanda/article/ikinyabupfura-kwikunda-no-kwirinda-ibiyobyabwenge-impanuro-za-perezida-kagame

  • Marc Cucurella yasohoje isezerano rye, nyuma yo gushyirwaho tatto y'isura y'umutoza Luis de la Fuente #rwanda #RwOT

    Myugariro w'Ikipe y'Igihugu ya Espagne, Marc Cucurella, yongeye kuvugisha abakunzi ba ruhago nyuma yo gushyira mu bikorwa isezerano yari yaratanze mbere y'Igikombe cy'Isi. Uyu mukinnyi wa Chelsea yari yavuze ko mu gihe Espagne yaba yegukanye igikombe, azishushanya (tattoo) y'isura y'umutoza wa Espagne, Luis de la Fuente, ku mubiri we nk'ikimenyetso cy'icyubahiro n'ishimwe akwiye.

    Kuri uyu munsi wo ku wa kabiri tariki ya 28 Kamena, aho Cucurella yatangiye gushushanywaho iyo tattoo mu gikorwa cyakurikiwe n'abafana benshi ku mbuga nkoranyambaga. Amafoto n'amashusho byakwirakwiye agaragaza uyu mukinnyi aseka ndetse yiteguye kwakira ububabare bwo gushushanywa, ibintu byashimishije cyane abakunzi b'ikipe y'igihugu ya Espagne.

    Luis de la Fuente yashimiwe cyane nyuma yo kuyobora Espagne ikegukana Igikombe cy'Isi, intsinzi yagaragaye nk'iyatewe n'ubumwe, imyitwarire myiza ndetse n'ubuhanga bw'umutoza. Abakinnyi benshi bagiye bagaragaza ko bamufitiye icyizere n'icyubahiro, ariko Cucurella we yahisemo kubigaragaza mu buryo budasanzwe.

    Abafana ba Espagne bakomeje kugaragaza ko Cucurella ari umwe mu bakinnyi bafite urwenya, umutima mwiza ndetse banakunda cyane ikipe yabo. Bamwe bavuga ko iyi tattoo izahora imwibutsa amateka akomeye yanditse hamwe n'abo bakinnyi bagenzi be ndetse n'umutoza wabagejeje ku ntsinzi.

    Iki gikorwa cyatumye Marc Cucurella yongera kuba ikiganiro ku mbuga nkoranyambaga, aho benshi bamushimira kuba yubahirije ijambo rye, bavuga ko ari urugero rw'umukinnyi uhora ashyira mu bikorwa ibyo yemereye abafana. Ibikorwa nk'ibi bikomeza gushimangira uburyo intsinzi y'igikombe cy'Isi izahora yibukwa nk'imwe mu bihe bikomeye mu mateka y'umupira w'amaguru wa Espagne.

    Marc Cucurella yasohoje isezerano rye, nyuma yo gushyirwaho tatto y'isura y'umutoza Luis de la Fuente

    Source : https://kasukumedia.com/umcucurella-yasohoje-isezerano-rye-nyuma-gushyirwaho-tatto-yisura-yumutoza-luis-de-la-fuente/

  • Impamvu Dauda na Siluane boherejwe mu bafana #rwanda #RwOT

    Umutoza wa APR FC, Talib Abderrahman yavuze ko nta kindi kibazo gihari cyatumye abakinnyi be Seidu Yussif Dauda n’umunyezamu Ernani Siluane bajya mu bafana uretse uburwayi.

    Abantu batunguwe no kubona aba bakinnyi bombi ejo hashize ku wa Mbere tariki ya 27 Nyakanga 2026 batari mu bakinnyi bakinnye umukino wa Garde Républicaine w’itsinda A muri CECAFA Kagame Cup.

    Abantu bahise babihuza n’uko bagize umukino mubi tariki ya 24 Nyakanga 2026 banyagirwa na Gor Mahia 5-0.

    Nyuma y’umukino batsinzemo Garde Républicaine yo muri Djibouti 3-1 ejo hahize, umutoza Talib yavuze ko aba bakinnyi barwaye ari yo mpamvu batagaragaye.

    Ati “Dauda ntabwo yakinnye kubera ko yababaye ku kagombambari. Ernani Siluane uyu munsi yagiye kunyura mu cyuma i Kanombe kuko afite ikibazo mu ivi.”

    APR FC izagaruka mu kibuga ku wa Kane tariki ya 30 Nyakanga 2026 ikina na Vipers FC mu mukino usoza itsinda C.

    Seidu Yussif Dauda yababaye akagombambari

    Ernani Siluane afite ikibazo mu ivi

    Source : http://isimbi.rw/impamvu-dauda-na-siluane-boherejwe-mu-bafana.html

  • UNAIDS iraburira ko igabanuka ry'inkunga rishobora kongera ubukana bwa VIH/SIDA ku Isi #rwanda #RwOT

    Ishami ry'Umuryango w'Abibumbye rishinzwe kurwanya SIDA (UNAIDS) ryatangaje ko UNAIDS iraburira ko igabanuka ry'inkunga rishobora kongera ubukana bwa VIH/SIDA ku Isi ishobora kongera guhura n'izamuka ry'ubwandu bwa VIH/SIDA mu gihe amafaranga akoreshwa mu bikorwa byo kuyikumira no kuyivura akomeje kugabanuka.

    Raporo yashyizwe ahagaragara ku wa Mbere, ubwo hafungurwaga inama mpuzamahanga ku kurwanya SIDA yabereye muri Burezili, igaragaza ko inkunga yahawe gahunda zo kurwanya VIH/SIDA yagabanutseho arenga miliyari 7 z'Amadolari ya Amerika mu mwaka ushize. Ni igabanuka rikomeye ritigeze ribaho mu myaka hafi 20 ishize.

    UNAIDS ivuga ko iri gabanuka ryatewe ahanini n'impinduka zabaye mu nkunga zatangwaga n'ibihugu bikize, cyane cyane Leta Zunze Ubumwe za Amerika, zari zisanzwe zitanga umusanzu munini mu bikorwa byo kurwanya iki cyorezo ku rwego rw'isi. Gahunda zimwe na zimwe zo gukumira ubwandu ndetse no gufasha ababana na VIH zahise zigira ibibazo by'amikoro.

    Nk'uko raporo ibigaragaza, abantu bagera kuri miliyoni 1.2 banduye VIH mu mwaka ushize, mu gihe abantu barenga miliyoni 9 mu babana na virusi ya VIH ku isi bagikennye kubona imiti igabanya ubukana bwayo. Abagera ku 570,000 na bo bapfuye bazize indwara ziterwa na SIDA cyangwa zifitanye isano na yo.

    UNAIDS ishimangira ko isi iri mu bihe bikomeye bitewe n'ibibazo bya politiki, ubukungu ndetse n'ibindi byorezo bikomeje gukoma mu nkokora gahunda zo kurwanya VIH/SIDA. Iryo shami riburira ko nihadashyirwaho ingamba nshya zo kongera inkunga no gushimangira ibikorwa byo gukumira ubwandu, intego yo kurangiza ikibazo cya SIDA bitarenze mu mwaka wa 2030 ishobora kutagerwaho.

    UNAIDS iraburira ko igabanuka ry'inkunga rishobora kongera ubukana bwa VIH/SIDA ku Isi

    Source : https://kasukumedia.com/unaids-iraburira-ko-igabanuka-ryinkunga-rishobora-kongera-ubukana-bwa-vih-sida-ku-isi/

  • U Rwanda mu nzira yo guca burundu imiyoboro ya 2G na 3G hakimakazwa 4G na 5 G #rwanda #RwOT

    Mu rwego rwo gukomeza kubaka igihugu gishingiye ku ikoranabuhanga rigezweho, Guverinoma y'u Rwanda yatangaje gahunda yo gusezerera burundu imiyoboro ya 2G na 3G, hagamijwe kwimukira ku miyoboro yihuta kandi ikora neza ya 4G, ndetse no gutegura uburyo bwo gukwirakwiza 5G mu gihugu hose.

    Iyi gahunda yatangajwe na Minisiteri y'Ikoranabuhanga na Inovasiyo (MINICT), igaragaza ko ku wa 30 Kamena 2027 ari bwo serivisi za 3G zizahagarikwa burundu, mu gihe umuyoboro wa 2G nawo uzakurwaho nyuma y'isuzuma rizemeza ko abaturage bafite ibikoresho bihagije bishyigikira 4G kandi ko serivisi z'itumanaho zitazagira ikibazo.

    Iki cyemezo ni kimwe mu ngamba Guverinoma yafashe zigamije guha Abanyarwanda internet yihuta, ihamye kandi ihendutse. Biteganyijwe ko kwimukira kuri 4G bizongera umuvuduko wa internet, bunoze ireme ry'itumanaho ndetse bigabanye ibibazo by'ihuzanzira bikunze kugaragara.

    Abakoresha serivisi z'ikoranabuhanga na bo bazungukiramo cyane, kuko serivisi zirimo Mobile Money, izitangwa n'inzego za Leta hifashishijwe ikoranabuhanga, uburezi ndetse n'ubuvuzi bizarushaho gukora neza kubera umuyoboro ufite ubushobozi burenze ubwari busanzwe.

    MINICT ivuga ko iri hinduka rizajyana no gukomeza kwagura umuyoboro wa 4G mu gihugu hose, kugira ngo abaturage bo mu mijyi no mu byaro bawubonereho serivisi zingana kandi zifite ireme. Hanateganyijwe gukomeza kubungabunga serivisi z'ingenzi zirimo guhamagara, ubutumwa bugufi (SMS), Mobile Money ndetse n'ubutabazi bwihutirwa, kugira ngo bitazahungabana mu gihe izi mpinduka zizaba zikorwa.

    Mu mwaka wa 2026 hazakorwa igerageza ryo kuzimya zimwe muri serivisi za 2G na 3G, hagamijwe kureba uko umuyoboro mushya uhagaze no gukemura ibibazo byose bishobora kuvuka mbere y'uko gahunda ishyirwa mu bikorwa burundu.

    Abaturage basabwe gutangira kugenzura niba telefoni na SIM card zabo bishyigikira 4G. Abakoresha MTN Rwanda bashobora gukanda *4561#, mu gihe abakoresha Airtel Rwanda bashobora gukoresha *2555*4# kugira ngo bamenye niba SIM card zabo ziteguye gukoresha umuyoboro wa 4G.

    Ibigo n'inzego za Leta zigikoresha ibikoresho bishingiye kuri 2G cyangwa 3G, cyane cyane mu nzego z'ubuzima, ubwikorezi, ubwishyu n'umutekano, na zo zasabwe gutangira kuvugurura ibikoresho byazo kugira ngo zitazahura n'imbogamizi igihe iyi miyoboro izaba yahagaritswe.

    MINICT ifatanyije na RURA ndetse n'ibigo by'itumanaho, yavuze ko izakomeza gutanga amabwiriza, ubufasha n'ubukangurambaga kugira ngo iri hinduka rikorwe neza, abaturage bose baryungukiremo, kandi u Rwanda rukomeze urugendo rwo kuba igihugu gifite ikoranabuhanga rigezweho.

    Source : https://flash.rw/2026/07/28/u-rwanda-mu-nzira-yo-guca-burundu-imiyoboro-ya-2g-na-3g-hakimakazwa-5-g/