The Ben yashyize hanze indirimbo ye nshya ‘Inshallah’ #rwanda #RwOT

Umuhanzi The Ben yashyize hanze amashusho y’indirimbo ye nshya yise 'Inshallah', nyuma y’umunsi umwe gusa ashyize hanze amajwi yayo.

Kuri uyu wa Gatandatu tariki ya 15 Ukwakira nibwo yashyize aya mashusho y’iyi ndirimbo kuri shene ya youtube , muri aya mashusho agaragaramo ababyinnyi benshi ndetse n’ibindi byamamare nka Made Beats na Keza Trisky .

Ni indirimbo igaruka ku rukundo umusore agirira umukobwa yakunze bitari iby’agahararo akaba anamaze igihe amufitiye urukumbuzi rudasanzwe ,akamwizeza kuzamwumvisha umunyenga w’urukundo kugeza kumwambika impeta yo kubana ubuziraherezo.

Indirimbo 'Inshallah' yatunganyijwe na MadeBeat mu buryo bw’amajwi, mu gihe amashusho yayo yayobowe na Julien Bmjizzo afatanyije na Bright Ngabo.

Gushyira hanze aya mashusho bibaye nyuma y’uko The Ben yari amaze igihe gito atangaje amajwi y’iyi ndirimbo ku rubuga rwa Audiomack.

The Ben kandi aherutse gutangaza ko afite gahunda yo gukomeza gusohora izindi ndirimbo nyinshi muri aya mezi ari imbere, nyuma yo gusoza ibitaramo bitandukanye bya NU-Year Groove, yakoranye na Bruce Melodie bikabera mu bice bitandukanye by’igihugu.

Uyu muhanzi waherukaga igihangano mu mezi arindwi ashize ubwo yashyiraga hanze indirimbo 'Indabo Zanjye’,yanateguje indi mishinga mishya izakomeza kwagura ibikorwa bye bya muzika.

The Ben yashyize hanze indirimbo Inshallah