Tag: uburezi

Mu 2021, Rwanda Inspiration Back Up yagiranye amasezerano y'umwaka umwe na Kaminuza ya Kigali. Aya masezerano yavugaga ko iyi Kaminuza izatanga Buruse (Bourse), ku bakobwa 20 bazagera mu mwiherero wa Miss Rwanda 2021. Niko byagenze!

Kuri uyu wa Gatatu tariki 22 Ukuboza 2021, Kaminuza ya Kigali iri mu baterankunga bakuru ba Miss Rwanda, yongereye amasezenaro y'imyaka itatu ku mwaka umwe yari ifitanye na Rwanda Inspiration Back Up. 

Abategura Miss Rwanda babwiye INYARWANDA, ko aya masezerano agamije ko abakobwa 10 bazajya bagera mu cyiciro cya nyuma muri Miss Rwanda, ari bo bazajya bahabwa Buruse y’ubuntu yo kwiga muri iyi Kaminuza.

Ukoze imibare neza, ubona ko iyi Kaminuza izatanga Buruse ku bakobwa 50. Harimo 20 yahaye Buruse mu 2021, 10 izaha Buruse mu 2022, 10 izaha Buruse mu 2023 n'abandi 10 izaha Buruse mu 2024.

Umuyobozi Wungurije ushinzwe Amasomo muri Kaminuza ya Kigali, Prof. Dr. Tombola M. Gustave yashimye abategura irushanwa rya Miss Rwanda ku bwo guhozaho mu guteza imbere abakobwa, bihura neza n'intego y'iyi Kaminuza yo guteza imbere urubyiruko binyuze mu Burezi bufite ireme “kugira ngo bazavemo abayobozi b'ejo hazaza.”

Uyu muyobozi yavuze ko 'Binyuze muri Miss Rwanda, Kaminuza ya Kigali ikomeje gusingira gahunda ya Leta yo guteza imbere umwana w'umukobwa binyuze mu kumuha uburezi bufite ireme.'

Prof. Dr Tombola avuga ko nk'umuterankunga Mukuru w'iri rushanwa, biyemeje gufasha abakobwa kugira ubumenyi, kubatoza indangagaciro “bitabagirira akamaro bonyine gusa ahubwo n'imiryango yabo, sosiyete bikarandanda kugeza ku bisekuru.”

Umuyobozi wa Rwanda Inspiration Back Up, Ishimwe Dieudonne [Prince Kid], yashimye ubuyobozi bwa Kaminuza ya Kigali ku bwo gufatanya nabo mu gushyigikira urugendo rw'iterambere rw'umwana w'umukobwa ugana ku kuba Nyampinga ubereye u Rwanda.

Uyu muyobozi kandi avuga ko abakobwa bazahabwa amahirwe yo kwiga muri iyi Kaminuza, bakwiye kuyakoresha neza kugira ngo bizabagirire akamaro.

Kuri uyu wa Kane tariki 23 Ukuboza 2021, ni bwo abakobwa batangira kwiyandikisha muri Miss Rwanda 2022.

Kaminuza ya Kigali yongereye amasezerano y'imikoranire yari ifitanye na Rwanda Inspiration Back Up itegura Miss Rwanda

Umuyobozi Wungurije ushinzwe Amasomo muri Kaminuza ya Kigali, Prof. Dr. Tombola M. Gustave, yavuze ko iyi Kaminuza irajwe ishinga no gutanga uburezi bufite ireme ku bakobwa

Prof. Dr. Tombola M. yavuze ko bishimira kuba Miss Rwanda ari igikorwa ngaruka mwaka, kandi bagafasha abakobwa kwitinyuka no gusingira amahirwe ahari

Umuyobozi wa Rwanda Inspiration Back Up, Ishimwe Dieudonné [Prince Kid], yashimye Kaminuza ya Kigali izajya itanga Buruse ku bakobwa 10 bageze mu cyiciro cya nyuma muri Miss Rwanda

Ishimwe Dieudonne [Prince Kid] avuga ko abakobwa bahabwa Buruse bakwiye kwiga bashyizeho umwete 

Umuhango wo gusinya aya masezerano, wabereye Kacyiru aho iyi Kaminuza ikorera. Witabiriwe n'Umuyobozi Ushinzwe amasomo, Prof. Robert Ebo Hinson n'Umuyobozi Ushinzwe iyamamazabikorwa muri iyi Kaminuza, Gifty Aduamah

NABU niyo porogaramu iyoboye mu gufasha gusoma neza hamwe n'inkuru zishimishije zingana n'ubushobozi bw'umwana mu gusoma.

Kuri ubu, NABU yagejeje abagera muri miliyoni bamaze kumanura (Download) Porogaramu yayo mu Burasirazuba bwa Afurika. Nta kiguzi cyo gusoma kuri iyi porogaramu.

Uyu muryango udaharanira inyungu, NABU, kuri ubu uratangaza impinduka mu mimerere ya porogaramu ikazitwa 'NABU: Multilingual kids book app' ikazaba iboneka kuri Google Play Store  na  iOS app store.

Iyo mpinduka muri porogaramu ifite ibiyiranga bishya bishimishije harimo, ibishushanyo-mbonera byasubiwemo byorohereza abana gushaka no gusoma ibitabo bakunda, bityo bakigenga mu misomere yabo.

NABU yizera ko uko umwana arushaho gusoma, ari nako aba inararibonye mu gusoma ibitabo. Ubushobozi bwe bwo gusobanukirwa, kwandika, kuvuga no kuboneza imvugo buriyongera.

Isomero rya NABU kuri ubu rigaragaza inkuru zirenga 1000 zishimishije, zivuga indimi nyinshi zirimo ibyegeranyo mu Kinyarwanda, Igishwahili, igikerewole n'Icyongereza.

Kubera impinduka muri porogaramu, NABU ivuga ko ababyeyi n’abarezi noneho bazashobora gukora imyirondoro itandukanye ku bana benshi mu rugo, bityo bagakurikirana uburambe bwo gusoma kuri buri mwana.

Ngo ibi bituma ubushobozi bwo gukurikirana urugendo rwo gusoma kuri buri mwana n'ubushobozi bwe buzamuka mu rwego rwisumbuyeho.

Gushakisha ibitabo bizarushaho kunezeza kuko isomero ryahinduwe kugira ngo ihuze ibihugu porogaramu rusange ikoreramo.

Abiga, ababyeyi n’abarimu bashobora kandi gushakisha ibitabo mu byiciro bitandukanye no kumenya ibihuye n'urwego rw'umwana.

Amashusho nayo yongerewe ubushobozi bwo kuboneka hakoreshejwe igihe gito na interineti nkeya.

Ikirango(feauture) gishya cyo gusoma udafite internet (offline) gifitiye inyungu cyane kizagirira akamaro gakomeye abakoresha porogaramu ya NABU baherereye aho interineti itagera neza.

Ibitabo by'inkuru birashobora gukururwa aho umuntu ashobora kubona interineti, hanyuma bikabikwa mu isomero agasoma ku murongo mu gihe kizaza. Ibi bifasha abarimu gukundisha abanyeshuri ibitabo by'ururimi rwabo kavukire nta mpungenge yo kutabona interineti.

Umubyeyi witwa Uwiringiyimana Marie Claudine, avuga ko urubuga rwa NABU rwafashije cyane abana be kumenya gusoma.

Ati 'Ni byinshi byahindutse kuva abana banjye batangira gusoma ibitabo kuri porogaramu ya NABU. Bashobora kumva no gusobanura ibishushanyo bitandukanye biba biri mu bitabo. Abana banjye kandi basigaye bashobora guhanga inkuru zabo bagendeye ku bitabo bagiye basoma kuri NABU.'

Ni mu gihe Joseph Nzioka Umuyobozi w'abarimu mu ikigo Kenya Primary School, avuga ko iyi porogaramu ya NABU yaje ari ingongera 'ishimishije kuri sisitemu y'uburezi cyane cyane ku banyeshuli bakiri bato.'

Ati 'Kuba babona iyi porogaramu ku buntu bisobanura ko bashobora gusoma inkuru zabo bari mu rugo.'

Porogaramu ya NABU ifite ibyiciro bitandukanye. Hari icyiciro cy'ibigezweho (Trending now), ibyo NABU yahisemo (NABU top picks) n'abasoma kare (easy and early readers).

Iri somero ryemerera abana, ababyeyi n'abarimu guhitamo ibitabo bitandukanye, rikereka abanyeshuri itandukaniro ry'ibitabo binabahishurira ubuzima bw'isi itandukanye.

Amor Furaha Umuyobozi Ushinzwe gukurikirana abakoresha iyi porogaramu, ati 'Ibintu byiyongereye kuri porogaramu yacu yo gusoma bivuze ko dushobora noneho gupima neza uburyo abakoresha porogaramu bitabira ibyo dukora ndetse no kumenya aho dukeneye kwagura ibikorwa byo gusoma.”

Arongera ati 'Turimo kubona iterambere ryinshi haba mu Rwanda no muri Kenya mu muryango w'abambasaderi, bivuze ko intego yacu yo kugera ku basomyi miliyoni imwe mu mpera za 2021 igenda yegereza.'

Ubushakashatsi bwerekana ko abana basoma ibitabo mu rurimi rwabo kavukire bakiri bato bituma ikiraro cyo gusoma mu cyongereza no mu zindi ndimi cyihuta cyane.

Muri NABU, baharanira gusangiza inkuru nziza, zishishikaje aho abana bashobora kwibona ubwabo bagaragara ku mpapuro basomye, bityo bakura bakigirira icyizere kandi bakagira uruhare runini mu miryango yabo.

Ibitabo by’ururimi kavukire nabyo byagaragaye ko bivamo uruhare rukomeye rw’ababyeyi mu myigire y’abana babo.

Iyi porogaramu ntabwo ari igikoresho cyo kurema urukundo rwo gusoma kubana, ahubwo inemerera abakuze gusoma mu cyongereza. Ntabwo ari kare cyane gutangira gusoma hamwe n'umwana wawe- downloadinga Nabu App uyu munsi.

Ku bijyanye na NABU

NABU ni umuryango udaharanira inyungu, ufite ubutumwa bwo gukemura ikibazo cyo kudasoma no kwandika ku Isi hose kugira ngo buri mwana abashe gusoma no kuzamuka mu bushobozi bwe bwose.

Guhagarika inzitizi y'ubukene, bakoresha ikoranabuhanga kugira ngo basohore ibitabo by'abana ku buntu ku rubuga rwa sisitemu mu ndimi kavukire.

Urubuga rwa NABU rwatangaje impinduka nshya muri porogaramu yayo imaze kumanurwa (Downlaod) n'abasaga miliyoni

Umubyeyi ari gukoresha porogaramu ya NABU afasha umwana we gusoma ibitabo, inkuru n’ibindi

  

Kaliza Barbara avuga ko umwana we ameze kumenya gusoma neza abicyesha kwifashisha urubuga rwa NABU

Abagera kuri miliyoni bamaze kumanura (Download) porogaramu ya NABU

Abanyamakuru barenga 30 bo mu Bitangazamakuru bitandukaye bikorera mu Rwanda, bahuguwe kuri uyu wa Gatandatu tariki 13 Ugushyinga 2021 aho beretswe imikino ishobora kwifashishwa n’ababyeyi mu gukangura ubwenge bw’abana babo.

Abanyamakuru nk’abantu bafite ijambo rigera kure, bahawe amahugurwa kugira ngo bashishikarize ababyeyi gukoresha buriya buryo bifashishije imikino irimo n’iyagiye imenyekana mu bihe byo hambere na Patayari, saye, gukina amagorori, ndetse n’umupira wa karere.

Umunyabanga Nshingwabikorwa w’Urwego rw’Abanyamakuru bigenzura (RMC/Rwanda Media Commission), Emmanuel Mugisha yashimiye amahugurwa yahawe abanyamakuru, avuga ko bizatuma batanga umusanzu ukomeye mu kwigisha ababyeyi gukina n’abana.

Ati 'Reka dukoreshe ububasha itangazamakuru rifite kandi dukorere hamwe nk’itsinda kugira ngo duhindure sosiyete binyuze mu buryo twigisha abana. Itangazamakuru rifite ububasha bwo gukora abantu ku mutima ndetse no guhindura ubuzima bwabo.'

Abanyamakuru kandi beretswe uko bagira uruhare muri ibi bikorwa haba mu nkuru bakora ndetse no mu biganiro bakora aho banibukijwe akamaro k’umubyeyi mu kwita ku burere n’uburezi by’umwana we.

Umwe mu batoza ba Kina Rwanda, Arthur Nkusi usanzwe ari n’umunyamakuru, yavuze ko bahisemo gukorana n’abanyamakuru bafite uruhare rukomeye mu guhugura sosiyete.

Ati 'Intego ya Kina Rwanda ni ukwagura ubukangurambaga bugaragaza akamaro gukina bigira mu buzima bw’abana, kandi mu gukorana n’itangazamakuru twizera ko abanyamakuru hari umusanzu munini batanga mu kugeza ubu bukangurambaga hose mu gihugu.'

Ushinzwe Uburezi bufite ireme muri UNICEF Rwanda, Yonah Nyundo yavuze ko hari ibintu by’ingenzi umwana aba akeneye mu mikurire ye kugira ngo bimufashe kuvumbura ubundi bumenyi.

Yavuze ko kutabikorera umwana ari ukumudindiza cyane. Ati 'Mu rugendo rw’imikurire y’abana hari intambwe tutakwifuza ko basimbuka. Ni inshingano zacu nk’ababyeyi ndetse n’abarimu kwifashisha imikino kugira ngo tworohereze abana kumenya bimwe mu bintu by’ibanze nko gusoma no kubara kuko ari byo bizabafasha kwiga n’ibindi byinshi mu buzima bwabo. Kwifashisha imikino mu myigishirize bisanga abana aho bari, bikabajyana aho bagomba kugera'.

Umuyobozi w’ikigo Inspire, Educate and Empower (IEE), Rwanda, Emmanuel Murenzi yavuze ko gukina n’umwana bikozwe n’umubyeyi ari ikintu gikomeye cyane.

Ati 'Iyo ababyeyi bakinnye n’abana, abana barushaho kuryoherwa kandi bakiga byinshi. Ibi kandi bifasha ababyeyi kurushaho gusabana n’abana kandi bakamenya uko buri wese ateye.'

Abanyamakuru bahuguwe na bo bavuze ko binjiye mu ngamba ku buryo bagiye kwibutsa uruhare rw’ababyeyi mu gukangura ubwenge bw’abana babo bakoresheje imikino kuko uretse kubi bikarishya ubwenge bw’abana binatuma urukundo hagati y’umubyeyi n’umwana rurushaho kwiyongera.

UKWEZI.RW

Yabigarutseho ubwo urubyiruko ruturuka mu miryango inyuranye itari iya Leta yo mu Rwanda no muri Repubulika Iharanira Demukarasi ya Congo, yahuriraga mu biganiro bigamije ubufatanye mu kuzamura uburinganire kugira ngo umubare w’Abagore baba mu nzego zifata ibyemezo wiyongere.

Uru rubyiruko rwitabiriye ibi biganiro ruvuga ko bigiyemo byinshi bigaruka ku iterambere ry’Umugore haba mu Rwanda no mu biyaga bigari, bagaragaza ko hagikenewe ubukangurambaga mu gukangurira Abagore kwitinyuka.

Kankindi Vanessa wo mu Rwanda avuga ko abagore bakitinya mu kwitabira ibikorwa byabateza imbere ariko bazakomeza kubakangurira kwitinyuka bakitabira ku bwinshi imirimo igaragara nk’aho yahariwe abagabo.

Ati 'Abagore ntabwo barabasha kwisanga ku buryo bugaragara mu myanya y’ikoranabuhanga nko mu gutwara abantu, naho mu myanya y’inzego zifata ibyemezo bamaze kwisangamo ari benshi tugiye gushyira imbaraga mu bukangurambaga, kuko abenshi mu gitsinagore barakitinya.'

Kankindi yagaragaje ko igihe kigeze ngo no mu burezi bihinduke, Abana b’Abahungu n’abakobwa bahabwe amahirwe angana, kuko atumva impamvu abantu bakora ibizamini bimwe ariko mu gutanga amahirwe yo kujya mu cyiciro gikurikiyeho Abakobwa bagahabwa amahirwe menshi, ibi bibagaragaza nk’abanyantege nke imbere ya basaza babo.

Kankindi avuga ko ibi bidakwiye kuko abanyeshuri bose baba barize kimwe kandi bakabazwa bimwe ku buryo iyo ubasumbanyije ku manota mu kubazamura mu byiciro runaka, biba bigaragaza ko hari uruhande rufite intege nke mu gihe ubu bizwi ko icyo umuhungu yakora n’umukobwa yakibasha.

Musha Placide uturuka mu mugi wa Goma avuga ko iwabo uburinganire nubwo bwemejwe butubahirizwa, akavuga ko bazakomeza kubiharanira ko byubahirizwa nko mu Rwanda.

Ati 'Twebwe iwacu muri Congo usomye neza Itegeko Nshinga ryacu mu ngingo ya 14 ryemeza uburinganire hagati y’umugabo n’umugore mu myanya ya politike ariko ntibyigeze byubahirizwa kuva ryatorwa muri 2006, mu Rwanda byarubahirijwe ku buryo 30% y’abagore irubahirizwa tuzakomeza urugamba natwe bizagera ubwo byubahirizwa.'

Frère Vital Ringuyeneza, umuyobozi wa Vision Jeneusse Nouvelle avuga ko bahuje uru rubyiruko kubera ko mu Rwanda hari intambwe igaragara mu buringanire ugereranije na Congo.

Ati 'Twahuje Urubyiruko 15 rwaturutse mu rwanda, turuhuza ni abandi 15 bo muri RD Congo mu kugira ngo urubyiruko rube umusemburo w’uburinganire hagati y’Abagabo n’Abagore kuko mu Rwanda hari intambwe tumaze gutera ku buringanire, ndetse n’imyumvire y’Abanyarwandakazi bamaze kwitinyuka, ugereranyije n’ibyo urubyiruko rwo mu gihugu cy’abaturanyi ruvuga.'

Mugisha Francois, Umukozi w’Akarere ka Rubavu ushinzwe guhuza ibikorwa by’itorero n’ubukangurambaga rusange avuga ko barebeye hamwe uko bazajya bahanahana amakuru y’uburinganire

Ati 'Twasangiye amakuru y’uko uburinganire buhagaze muri ibi bihugu byombi, maze turebera hamwe aho abagore bageze bitinyuka ndetse baninjira mu nzego zifata ibyemezo.'

Mugisha avuga ko abagore bashoboye, basabwa kwitinyuka bakagaragaza ibyo bashoboye.

Ati 'Kuvuga uburinganire n’ubwuzuzanye ntibivuze ko abagabo n’abagore bahinduka kimwe. Ahubwo bivuze ko uburenganzira n’amahirwe bihari bombi babihabwa kimwe.'

Imibare y’abagore yagiye izamuka mu nzego zifata ibyemezo aho ubu muri Guverinoma ari 51%, gusa mu bakuriye Intara enye (4) n’Umujyi wa Kigali ubu umwe kuri batanu ni umugore.

UKWEZI.RW