Tag: Muzika

Jay Polly wari uherutse gufatirwa icyemezo cyo gufungwa by’agateganyo kubera ibyaha yakekwagaho, yitabye Imana mu ijoro rishyira kuri uyu wa Kane mu bitaro bimwe biherereye mu Mujyi wa Kigali nk’uko tubikesha umwe mu bazi amakuru y’urupfu rw’uyu muraperi.

Uyu muhanzi yagejejwe bitaro bikuru bya Muhima biherereye mu Karere ka Nyarugenge mu Mujyi wa Kigali aho yajyanywe akuwe muri gereza aho yari afungiye.

Ngo yafashwe n’uburwayi aho yari afungiye muri Gereza ya Mageragere, ahita ajyanwa kuri biriya bitaro ariko ahita yitaba Imana.

Uyu muhanzi wigeze kuyobora injyana ya Hip Hop mu Rwanda dore ko yanegukanye irushanwa ryigeze kubaho ari na ryo rya mbere ryabayeho rikomeye mu Rwanda ra PGGSS, yari afite abakunda ibihangano bye batari bacye.

Jay Polly wari ukurikiranyweho icyaha cyo gukoresha ibiyobyabwenge, yari yahawe itariki yo kuzaburaniraho mu mizi aho yagombaga kuzasubira imbere y’urukiko tariki 02 Ukuboza 2021.

Tariki 20 Gicurasi 2021, Urukiko rw’Ibanze rwa Gasabo rwari rwafashe icyemezo cyo gufunga by’agateganyo iminsi 30 Jay Polly n’abo baregwa hamwe.

Ni icyemezo bajuririye mur rukiko Rwisumbuye rwa Gasabo aho ku ya 11 Kamena 2021 na rwo rwemeje ko abaregwa bakomeza gufungwa by’agateganyo.

UKWEZI.RW

Alex Muyoboke warebereye inyungu abahanzi bakomeye barimo Tom Close, Urban Boys n’abandi, atabiciye ku ruhunda yagaragaje ko yatunguwe n’aya mafaranga y’akayabo Bruce Melodie yavuze ko yasinyiye maze aha umukoro uyu muhanzi ndetse n’umujyanama we.

Mu kiganiro Alex Muyoboke yagiranye na TRANSIT LINE TV hari aho yageze maze Lucky Nizeyimana usazwe unakorera RBA amusaba kugira icyo avuga kuri iriya kontaro ya miliyari Burce Melodi aherutse gusinyana na sosiyete yitwa “Food Bundles Ltd” kora ibijyanye no kugura ndetse no kugurisha ku ikoranabuhanga ibikomoka ku buhinzi.

Muyoboke akibazwa kuri iki kibazo yatangiye agira ati: “Miliyoni igihumbi! Bruce Melodie na Lee this time ntabwo ndi bubyemere. Abantu bataza kugira ngo nabihakanye ko batayasinyiye, bashobora kuba bayasinyiye”.

Muyoboke yahaye umukoro Bruce Melodie n’umujyanama we uzagaragaza ko yasinyiye miliyari cyangwa se yabeshye

Yakomeje avuga ko habaho ibyo bita Cash in Hand [Niba barahawe aya mafaranga cyangwa se wenda niba yarashyizwe kuri konte yabo runaka], nibyo bita cash in kind ashimangira ko niba ibyakozwe ari Cash in-kind miliyari yayemera”. Yashimangiye ko bibaye ari Cash in Hand Bruce [baramuhaye amafaranga mu buryo bufatika cyangwa barayashyize kuri konte] Melodie yakorana indirimbo n’umuntu wa mbere ugezweho ku Isi. Aha yagize ati: “Niba ari in kind ndabyemera ariko ari In Cash, Lee niba undeba, Itahiwacu niba undeba ndashaka Collabo n’umuntu wa mbere ugezweho ku Isi”.

Yakomeje agira ati: “Umfatire idarapo ry’u Rwanda Lee nawe Bruce murimanike nijye uzaba umufana wanyu bwa mbere”. Yongeye asaba Lee amubwira ko niba ayo mafaranga [miliyari] ahari ashaka ko Bruce Melodie aba umuhanzi wa mbere muri Africa nk’uko abandi bahari.

Yagaragaje ko Bruce Melodie ari umuhanga ku buryo ariya mafaranga aramutse yarayasinyiye yaba umuhanzi wa mbere ukomeye muri Africa.

Yashimangiye ko ibi bitagorana kuko Bruce Melodie ari umuhanzi ukomeye warusha Wizkid, Davido n’abandi kuririmba atanga umukoro wo kumugira umuhanzi wa mbere niba koko ariya mafaranga ahari. Mu minsi ishize Ama G nawe aherutse gushinja Bruce Melodie kubeshya ko yasinyiye kontaro ya miliyari y’amanyarwanda.

REBA HANO IKIGANIRO CYOSE

Mu cyumweru gishize umuhanzi ukomeye mu Rwanda, Bruce Melodie yasinye amasezerano afite agaciro ka Miliyari 1 Frw yaje akurikira kurarika abakunzi be bari bamaze icyumweru bategereje ikintu kidasanzwe kigiye kuba kuri we.

Ubu umuhanzi Butera Knowless na we yararitse abantu ko ku munsi w’ejo saa tanu z’amanywa hari ikidasanzwe kizamubaho.

Mu butumwa yashyize kuri Instagram ye, yagize ati 'Igikorwa kidasanzwe ejo saa tanu [11:00′]'

Uwitwa Karex yahise asubiza ubu butumwa agira ati 'Wowe ugiye gusinyira Miliyari 2.'

Knowless yahise amusubiza agira ati 'Njye mfite agaciro karenze ayo muvandimwe.'

Undi witwa Balaka Eric we yahise avuga ko ahubwo ari Miliyari 12, ati 'Urazitubiriza iki. Butera uramushyira ku rwego nk’urwa bariya, rata ujye wigurira akantu.'

Uretse kuba bamwe bakomeje gukeka ko uyu muhanzikazi uyoboye mu bahanzikazi bo mu Rwanda agiye gusinya amasezerano, haranakekwa ko yaba agiye gushyira hanze indirimbo ye nshya aherutse kujya gufatira amashusho i Dubai.

UKWEZI.RW

Abahanzi nyarwanda bagera kuri 13 bahuriye mu ndirimbo bise 'Joe Wacu’ igaruka kuri nyakwigendera Amb. Habineza Joseph uherutse kwitaba Imana wabaye Minisitiri w’Urubyiruko, Umuco na Siporo.

Ni indirimbo yahuriyemo abahanzi bakomeye mu gihugu barimo nka King James, Yvan Buravan, Butera Knowless, Jules Sentore, Masamba, Mani Martin, Uncle Austin, Platini P, Patrick Nyamitari, Chris Hat, Alyn Sano, Muneza Christopher na Tonzi.

Uyu mugabo wabaye Minisitiri wa Siporo n’Umuco, benshi mu bahanzi bamufata nk’umwe mu baharaniye iterambere ry’imyidagaduro.

Bakaba bayikoze mu rwego rwo kuzirikana ibyiza yakoze igihe yari akiri ku Isi mbere y’uko yitaba Imana aguye mu bitaro Nairobi muri Kenya ku wa 20 Kanama 2021.

Ni indirimbo yakorewe mu Ishusho Studio, ikorwa na Niz Beats afatanyije na Producer Nicolas.

Nsengiyumva Francois yarekuwe mu cyumweru gishize nyuma y’uko Urukiko Rwisumbuye rwa Nyagatare rutesheje agaciro icyemezo cy’Urukiko rw’Ibanze rwa Kiramuruzi rwari rwemeje ko afungwa by’agateganyo iminsi 30.

Nyuma y’iminsi micye arekuwe, hagaragaye amashusho amugaragaza ari muri Studio ari kuvuza umuduri we akora indirimbo yumvikanamo amagambo y’ishimwe.

Mu mashusho yashyizwe ku mbuga nkoranyambaga n’usanzwe areberera inyungu ze, Alain Mukurarinda, agaragaza Igisupusupu asa nk’usubiramo indirimbo yamaze gufatwa amajwi.

Ubutumwa bwa Mukurarinda buherekejwe n’amagambo atari menshi agira ati 'Isubiriza igihe.' Ku buryo bikekwa ko iyo ndirimo ari ko izaba yitwa.

Muri iyi ndirimbo iri mu njyana n’ubundi imenyerewe kuri uyu muhanzi, mu nyikirizo agira ati 'Babwire ko ari iyo Mana nziza…'

Nsengiyumva Francois AKA Igisupusupu, yari yatawe muri yombi n’Urwego rw’Igihugu rw’Ubugenzacyaha RIB tariki 30 Kamena 2021 rwari rumukurikiranyeho ibyaha bibiri birimo icyo gusambanya umwana w’umukobwa w’imyaka 13 n’icyaha cyo gukoresha umwana imirimo ivunanye.

Nyuma yakorewe Dosiye ishyikirizwa Ubushinjacyaha na bwo bwahise bumuregera Urukiko rw’Ibanze rwa Kiramuruzi ruza no gufata icyemezo cyo gufungwa by’agateganyo iminsi 30 ariko yahise ajuririra iki cyemezo mu rukiko rwisumbuye rwa Nyagatare.

Uyu muhanzi uburana ahakana icyaha avuga ko ntacyabaye, mu cyumweru gishize ni bwo Urukiko yajuririye rwafashe icyemezo cyo kumurekura nyuma yo gusanga impamvu zashingiweho afungwa zidafite ishingiro.

UKWEZI.RW