Tag: Imikino

Ikipe y’Igihugu y’u Rwanda y’abagabo yazamutse iyoboye itsinda rya mbere mu gikombe cya Afurika cya Volleyball kiri kubera muri Kigali Arena, ni nyuma yo gutsinda Uganda amaseti 3-2.

Ni umukino wagoye u Rwanda aho byasabye iseti ya Kamarampaka, nyuma y’uko amakipe yombi yagombi yanganyije amaseti 2-2.(25-16, 21-25, 23-25, 25-11 na 15-9) mu mukino wabaye kuri uyu wa Gatanu.

Wari umukino w’ishiraniro hashakwa ikipe izamuka iyoboye itsinda, ni nyuma y’uko amakipe yombi yari yamaze kubona itike ya ¼.

Ikipe y’u Rwanda yinjiye neza mu mukino, ibifashijwe n’abarimo Akumuntu Kavalo Patrick wari umeze neza uyu munsi, itsinda iseti ya mbere ku manota 25-15.

Gusa, Abagande bahinduye umukino batsinda amaseti 2 akurikiyeho, iseti ya kabiri bayitsinda kuri 25-21 iya gatatu bayitsinze 25-23.

Iseti ya kane, umutoza w’u Rwanda yakoze impinduka azanamo Ndamukunda Flavien, byafashije u Rwanda kwibona mu mukino rutsinda iyi seti amanota 25-11, iseti ya kamarampaka ruyitsinda ku manota 15-9.

Ikipe y’u Rwanda yazamutse iyoboye itsinda A ndetse izahura n’ikipe ya kabiri mu Itsinda D ririmo Maroc, Misiri, Kenya na Tanzania (yasezerewe). Uganda, yo izahura n’ikipe ya mbere muri iryo tsinda.

Mutabazi Yves umwe mu bakinnyi bahagaze neza muri iki gikombe cy’Afurika

Muvara Ronald umwe mu bakinnyi bazonze Uganda

Madson na Kavalo bazamutsi bajya gutangira umupira wari utewe n’abakinnyi ba Uganda

Umutoza w’u Rwanda ashimira Kavalo

Uganda yatsindiwe ku iseti ya kamarampaka

Mahora Yvan passeur w’u Rwanda

Thierry Hitimana watoje amakipe atandukanye mu Rwanda no hanze yarwo, yagizwe umutoza wungirije mu ikipe ya Simba SC yo muri Tanzania.

Iyi kipe yemeje aya makuru ku mugoroba wo kuri uyu wa Gatanu, aho yavuze ko yiyongereye mu batoza b’iyi kipe.

Thierry Hitimana akaba agiye kungiriza Didier Gomez Da Rosa, umutoza mukuru wa Simba SC n’ubundi bakoranye mu Rwanda ubwo yari umutoza wa Rayon Sports bakanegukana igikombe cya shampiyona muri 2013.

Uyu mutoza akaba yaratoje amakipe atandukanye arimo Rayon Sports, Bugesera FC zo mu Rwanda, Namungo na Mtibwa Sugar zo muri Tanzania.

Thierry Hitimana yagizwe umutoza wungirije wa Simba SC

AS Kigali yatangiye neza imikino Nyafurika itsinda Olympique de Missiri-Sima yo mu Birwa bya Comoros mu ijonjora ry’ibanze rya CAF Confederations Cup.

Iyi kipe y’abanyamujyi yitwaye neza itsindira muri Comoros ibitego 2-1 mu mukino wabaye kuri uyu wa Gatanu.

Kwizera Pierrot ni we wabanje gufungura amazamu ku ruhande rwa AS Kigali ku munota wa 19 kuri kufura.

Iyi kipe yarushaga Olympique de Missiri-Sima yaje no kubona igitego cya 2 gitsinzwe na Aboubakar Lawal. Amakipe yagiye kuruhuka ari 2-0.

Igice cya kabiri Olympique de Missiri-Sima yaje yikosoye ndetse itangira no gusatira AS Kigali byaje kuyiha igitego ku munota wa 53 gitsinzwe na Hadji, yakomeje gushaka uko yishyura ikindi gitego biranga umukino urangira ari 2-1.

Biteganyijwe ko umukino wo kwishyura uzabera mu Rwanda tariki ya 18 Nzeri 2021.

AS Kigali yatangiye neza imikino Nyafurika

Harabura amasaha make ikipe ya AS Kigali igacakirana na Olympique de Missiri-Sima yo mu Birwa bya Comoros mu ijonjora ry’ibanze rya CAF Confederations Cup.

Ni umukino uri bubere muri Comoros ku isaha ya saa 15:00′ zo muri icyo gihugu, bikaba saa 14:00′ z’i Kigali mu Rwanda.

Umutoza Eric Nshimiyimana akaba yamaze guhitamo abakinnyi 11 ari buze kwifashisha kuri uyu mukino.

Nyuma yo kugira ibibazo by’imvune ntajyane umunyezamu Bate Shamiru, mu izamu yabanjemo Ntwari Fiacre, kuba adafite Kalisa Rashid na Mugheni Kakule Fabrice kubera imvune byatumye mu kibuga hagati ari bubanzemo Kwizera Pierrot na Uwimana Guillain.

Dore 11 bose bari bubanzemo

Umunyezamu: Ntwari Fiacre

Ba myugariro: Rukundo Denis, Ishimwe Christian, Rugwiro Herve na Bishira Latif

Abakina hagati: Kwizera Pierrot, Uwimana Guillain na Haruna Niyonzima

Ba rutahizamu: Saba Robert, Shabani Hussein Tchabalala na Aboubacar Lawal

AS Kigali igiye gucakirana na Olympique de Missiri-Sima

Mu nama yahuje abakinnyi n’abayobozi b’ikipe ya Rayon Sports, bagejejweho gahunda yose ijyanye n’imyiteguro ya shampiyona aho bazatangira imyitozo ku wa Mbere w’icyumweru gitaha.

Iyi nama yabaye mu gitondo cyo kuri uyu wa Gatanu tariki ya 10 Nzeri 2021, ibera ku cyicaro cy’iyi kipe Kimihurura.

Amakuru ISIMBI yamenye ni uko muri rusange abayobozi b’iyi kipe bashakaga guha gahunda y’imyitozo abakinnyi mu gihe bitegura shampiyona y’umwaka w’imikino wa 2021-2022.

Abakinnyi babwiwe ko imyitozo izatangira ku wa mbere tariki ya 13 Nzeri 2021, ikazajya ibera mu Nzove nk’uko bisanzwe.

Bamenyeshejwe ko bazajya bakora imyitozo bataha iwabo, ntabwo bazaba mu mwiherero nk’umwaka ushize w’imikino.

Ikindi nk’uko amabwiriza abiteganya ko mbere yo gutangira imyitozo bapimwe icyorezo cya Coronavirus, bahise bapimwa iki cyorezo, ni igikorwa cyabereye ku biro by’iyi kipe aho yazanye abaganga bakabapima.

Ku kijyanye n’ibirarane bafitiwe, abakinnyi basabwe kwihangana kuko birimo gukorwaho bazayabona vuba, ni mu gihe bamwe mu bakinnyi bumvaga batatangira imyitozo batayahawe.

Rayon Sports yahawe gahunda yo gutangira imyitozo