Tag: Imikino

Rutahizamu Lionel Messi aganira n’ikinyamakuru France Football, yatangaje ko byaba byiza mu gihe Kylian Mbappe atagira aho ajya, kuko byabafasha kugera ku ntego zabo. Yagize ati: 'Nisanze hano kandi Mbappe simuzi neza kuburyo nagira byinshi namuvugaho. Simpamya neza niba Mbappe azajya muri Real Madrid, gusa buri umwe wese ategereje uko bizagenda. Gusa mu gihe byarangira agumye hano, byaba ibyishimo ndetse n’ubundi buryo bwo kudufasha kugera ku ntego zacu.”

Messi ntashaka ko Mbappe agenda

Messi akomeza avuga ko yanyuzwe n’ibihe yagiranye na Mbappe, ubwo yageraga mu Bufaransa. Yagize ati: Mu by'ukuri, nanyuzwe n’umunsi wa mbere nkihura na Mbappe. Nkigera mu Bufaransa, icyumweru cya mbere nakimaranye na Mbappe nasanze avuga neza ikinya-Espagne  byatumye mwisangaho. Burya umuntu iyo mubanye neza hanze y’ikibuga, bituma ibintu byoroha. Ku bw'ibyo, ndahamya ko ibintu bizagenda neza Mbappe akaguma hano.”

Mbappe aherutse gutangaza ko yagize ibyishimo ubwo yisangaga arimo gukinana na Messi, kuko ari ibintu atatekerezaga.  Messi na we yifuza ubufatanye bwe na Neymar na Mbappe, ko bwafasha ikipe ya PSG kwegukana igikombe cya Champions League bwa mbere mu mateka.

Umukinnyi w’umunyarwanda ukina muri Sweden, Rafael York ashobora kudakina umukino wa Uganda kwishyura kubera uburwayi.

Rafael York ukinira AFC Eskilstuna, yakinnye umukino we wa mbere mu Mavubi ku wa Kane tariki ya 7 Ukwakira u Rwanda rutsindwa na Uganda 1-0 mu gushaka itike y’igikombe cy’Isi cya 2022.

Umukino wo kwishyura uzakinwa ku munsi w’ejo ku Cyumweru tariki ya 10 Ukwakira 2021, uyu mukinnyi akaba ashobora kudakina uyu mukino nyuma y’uko yarwaye ibicurane.

Uyu mukinnyi yakoze imyitozo y’ejo ku wa Gatanu, ariko akaba atagaragaye mu myitozo ya nyuma itegura uyu mukino bitewe n’uko yarwaye ibicurane.

Andi makuru avuga ko uyu mukinnyi atishimiye uburyo yasimbujwe ku mukino ubanza wabereye mu Rwanda ndetse nyuma y’uyu mukino yifuje kuba yasubira muri Uganda adakinnye wo kwishyura.

Rafael York ashobora kudakina umukinonwa

Ku wa Gatanu, tariki ya 8 Ukwakira 2021, Kiyovu Sports yerekanye rutahizamu akanaba kapiteni w'ikipe y'igihugu ya Uganda 'Uganda Cranes', Emmanuel Arnold Okwi, wasinye amasezerano y'umwaka umwe nk'umukinnyi mushya.

Okwi yerekeje muri Kiyovu Sport nyuma yo gutandukana na Ittihad of Alexandria yo mu Misiri yari amazemo imyaka ibiri. Uyu mukinnyi wanarebye umukino wa gicuti Kiyovu yatsinzwemo na APR FC 4-2 i Shyorongi kuri uyu wa Gatanu, yasinye amasezerano y'umwaka umwe.

Mu muhango wo kwerekana uyu mukinnyi ufite izina rikomeye mu karere ka CECAFA, Perezida wa Kiyovu Sports, Mvukiyehe Juvénal, yakomoje ku makipe yashatse gutera gapapu Kiyovu Okwi akigera i Kigali, arimo Rayon Sports na AS Kigali, anashimangira ko bongeye gutitiza Umujyi.

Yagize ati 'Ikipe duhanganye na bo batekereje gukora gapapu nk'uko mwahoze mubivuga, niba barabikoze, ngira ngo byarabananiye kuko uyu munsi aho Kiyovu Sports iri biragiye kugira ngo mujyane kuri iryo soko'.

'Ahubwo wakabaye umbwira ko ejo Umujyi watitiye, niba Umujyi utaratitiye ejo ubwo hagombye kuba hari ikindi kibazo. Waratitiye ejo, abantu bose barabimbwiye ko ejo Kiyovu Sports yari yasubiranye Umujyi. Hari abari barawitije, ariko ngira ngo ejo barawusubije. Tuyitege rero, kandi ngira ngo aho umufana wa Kiyovu Sports ari aranezerewe. Uyu mwaka, Imana nidufasha umufana wa Kiyovu Sports ashobora kwishima'.

Emmanuel Okwi wakiniye amakipe atandukanye yo mu karere arimo Simba SC, Yanga Africans na Villa SC, akaba kandi yarakiniye Étoile du Sahel yo muri Tunisia, yaherukaga gutandukana na Al Ittihad yo mu Misiri yari amazemo imyaka ibiri.

Kiyovu Sport yasinyishije uyu rutahizamu w'imyaka 28 y'amavuko, nyuma yo gusinyisha abakinnyi batandukanye barimo Fiston Nkinzingabo, Ishimwe Kevin n'umutoza Haringingo Francis, aho ifite intego y'igikombe cya shampiyona uyu mwaka, iheruka mu 1993.

 

Emmanuel Okwi yasinye amasezerano y’umwaka umwe 

Perezida wa Kiyovu Sport ahamya ko bisubije umujyi nyuma yo kugura rutahizamu ukomeye mu karere ka CECAFA

Umutoza w’ikipe y’igihugu y’u Rwanda, Mashami Vincent arasaba abantu kudaha agaciro umuntu wamwiyitiriye kuri Twitter akajya atangaza ibintu mu izina rye.

Nyuma y’uko Amavubi atsinzwe na Uganda 1-0 ku wa Kane w’iki cyumweru tariki ya 7 Ukwakira, abantu benshi basabye uyu mutoza kwegura ndetse ko bamwe mu bakinnyi barimo Haruna Niyonzima, Meddie Kagere na Jacques Tuyisenge bakwiye gusezerera bagaharira abakiri bato.

Uwiyise amaburakindi kuri Twitter, yagiyeho yandika ati 'breaking news: Umutoza Mashami Vincent atangaje ko rwose akiri umutoza w’Amavubi'

Hahise haza umuntu ukoresha amazina ya Mashami Vincent kuri Twitter, amusubiza ko ntaho azajya rwose ndetse ko n’abo bakinnyi avuga bashaje bazabanzamo.

Ati 'Ntaho nzajya, ikindi mumenye ko Kagere, Jacques na Haruna sinzigera nkina ntababanjemo.'

Ntaho nzajya, ikindi mumenye ko kagere, Jacques , na haruna sinzigera nkina ntababanjemo

— Mashami Vincent (@mashami_v) October 8, 2021

Uyu muntu kandi wiyitiriye Mashami Vincent, yagiye kuri post yari yashyizweho n’umunyamakuru Oswald wa Radio TV10 avuga abanyamakuru beza bagira icyo bahindura muri siporo y’u Rwanda, Uyu wiyise Mashami yagiye asubizanya n’abantu rimwe na rimwe avuga ibintu bitekerekeranye.

Si ukwirirwa bantuka se harikindi bavuga?

— Mashami Vincent (@mashami_v) October 8, 2021

Ibi byashyize igitutu kuri Mashami Vincent ajya kuri Twitter avuga ko atari we, ari umuntu wamwiyitiriye akoresha amazina ye ndetse n’ifoto ye nk’uko na we ayakoresha kuri Twitter.

Ati 'nasuhuje buri umwe. Ndagira ngo mumenye ko hari umuntu washinze urubuga rwa Twitter mu mazina yanjye ndetse akoresha ifoto imeze nk’iy’iri ku rukuta rwanjye. Ndagira ngo nsabe buri umwe kwitondera ibyo babona, basoma banasubiza. Iyi niyo Twitter yanjye. Murakoze.'

U Rwanda ubu ruri muri Uganda aho ruzakina n’iki gihugu umukino wo kwishyura ku munsi w’ejo ku Cyumweru tariki ya 10 Ukwakira 2021.

Hello everyone.
Please note know that someone has created a Twitter account in my names and the similar photo on my official account.
I kindly ask everyone not to pay attention on whatever they see,read and respond to.
This is my official Twitter Account.
Thank you!🙏

— MashamiVincent (@Mashavince) October 9, 2021

Mashami Vincent yasabye abantu kwitondera ibyandikwa mu mazina ye

Joseph Rutabana wasuye aba bakinnyi ku myitozo bakoze kuri uyu wa Gatanu tariki 08 Ukwakira 2021, yari kumwe na Perezida w’Ishyirahamwe ry’Umupira w’Amaguru mu Rwanda, Olivier Nizeyimana.

Mu butumwa yatambukije kuri Twitter, Ambasaderi Col Joseph Rutabana, yavuze ko abakinnyi b’Amavubi 'Biteguye kubikora kuri iki Cyumweru. Barasezeranya kandi turabashyigikiye. Birashoboka.'

Abakinnyi b’Amavubi ndetse n’ababaherekeje barimo abatoza, buriye tutemikirere mu ijoro ryo ku wa Kane tariki 07 Ukwakira berecyeza muri Uganda nyuma y’uko ikipe ya kiriya Gihugu Uganda Cranes ibatsinze igitego kimwe.

Ni igiteko cyashenguye Abanyarwanda benshi ndetse n’abakinnyi ubwabo bababajwe no gutsindwa uriya mukino w’ishiraniro usanzwe uba witezwe na benshi mu karere.

U Rwanda rwatinzwe uriya mukino rwakinnye ruyoboye ndetse mu minota 20 ya mbere yawo abakinnyi b’Amavubi bagerageje gushaka igitego ariko biranga birangira ku munota wa 40 Uganda Cranes ibinjije igitego cyatsinzwe na Bayo Fahad Aziz.

UKWEZI.RW

Abakinnyi bane bakomeye kandi banakunzwe ku Isi, Lionel Messi, Cristiano Ronaldo, Neymar na Mbappe bose bari ku rutonde rw’abakinnyi 30 bagomba gutoranywamo umukinnyi uhiga abandi, muri shampiyona z’i Burayi uzegukana umupira wa zabahu(Ballon d’Or) itangwa na France Football.

Lionel Messi ukinira PSG ufite Ballon d’Or 6 aho aheruka kuyegukana 2019, ni umwe mu bahabwa amahirwe, ni nyuma y’uko afashije igihugu cye kwegukana igikombe cya mbere kuva yatangira kuyikinira, Copa America ya 2021.

Undi mukinnyi uhabwa amahirwe ni Kylian Mbappe bakinana muri PSG, akaba ari umukinyi ukizamuka.

Cristiano Ronaldo ukomoka muri Portugal ukiniro Manchester United, n’ubwo atagize Euro 2021 nziza aho ikipe ye yavuyemo hakiri kare, na we ari kuri uru rutonde.

Kopa Trophy, igihembo gihabwa umukinnyi utarengeje imyaka 21, gihataniwe n’abakinnyi 10 harimo abongereza 3, Jude Bellingham (Borussia Dortmund), Mason Greenwood (Manchester United) na Bakayo Saka (Arsenal).

Igihembo cy’umunyezamu mwiza 'Yashin Trophy’ gihataniwe n’abanyezamu 10 barimo umunya-Senegal ukinira Chelsea,Edouard Mendy, Umunya-Brazil ukinira Manchester City, Ederson, Umunya-Denmark ukinira Leicester City, Kasper Schmeichel, of Denmark, n’Umunya-Argentine ukinira Aston Villa, Emiliano Martinez.

Abakinnyi bahataniye Ballon d’Or
Cesar Azpilicueta (Chelsea, Spain)
Nicolo Barella (Inter Milan, Italy)
Karim Benzema (Real Madrid, France)
Leonardo Bonucci (Juventus, Italy)
Kevin de Bruyne (Manchester City, Belgium)
Giorgio Chiellini (Juventus, Italy)
Ruben Dias (Manchester City, Portugal)
Gianluigi Donnarumma (PSG, Italy)
Bruno Fernandes (Manchester United, Portugal)
Phil Foden (Manchester City, England)
Erling Braut Haaland (Borussia Dortmund, Norway)
Jorginho (Chelsea, Italy)
Harry Kane (Tottenham, England)
N’Golo Kante (Chelsea, France)
Simon Kjaer (AC Milan, Denmark)
Robert Lewandowski (Bayern Munich, Poland)
Romelu Lukaku (Chelsea, Belgium)
Riyad Mahrez (Manchester City, Algeria)
Lautaro Martinez (Inter Milan, Argentina)
Kylian Mbappe (PSG, France)
Lionel Messi (PSG, Argentina)
Luka Modric (Real Madrid, Croatia)
Gerard Moreno (Villarreal, Spain)
Mason Mount (Chelsea, England)
Neymar (PSG, Brazil)
Pedri (Barcelona, Spain)
Cristiano Ronaldo (Manchester United, Portugal)
Mohamed Salah (Liverpool, Egypt)
Raheem Sterling (Manchester City, England)
Luis Suarez (Atletico Madrid, Uruguay)

Lionel Messi(iburyo), Nyermar(hagati) na Mbappe(iburyo) bakina muri PSG abahataniye Ballon d’Or

Cristiono Ronaldo na we ahanganiye iki gihembo