Tag: Imikino

Abakinnyi bakina umupira w’amaguru mu buryo buzwi, ni bo bacye ku bakinnyi b’abanyarwanda bakina hanze ndetse bifuza ko ari byo byazabatunga.

U Rwanda rukunze kugorwa no kubona abakinnyi bakina nk’ababigize umwuga bakina hanze, kuko usanga kubumvisha ko bakwiriye gutanga umutaha mu ikipe y’igihugu “Amavubi” y’umupira w’amaguru, ari ibintu bigoye ndetse bisaba ibishoboka bikomeye.

Abakinnyi tugiye kugarukaho, ni abari munsi y’imyaka 15 bakina mu bice bindukanye by’Isi, u Rwanda rushobora kwifashisha mu makipe y’abakiri bato, nibura bakazagera ku rwego rwo gukinira ikipe nkuru bamaze kumva u Rwanda neza. Ni inkuru yakozwe ku bufatanye n’umunyeshuri witwa Ntwari Gad akaba yiga muri Kaminuza ya INES Ruhengeri.

1. Axel Muramira

Axel Muramira ni umukinnyi uvuka ku babyeyi b’abanyarwanda, akaba afite imyaka 15 y’amavuko. Uyu musore akinira ikipe ya Standard de Liege yo mu Bubiligi mu cyiciro cy’abatarengeje imyaka 16, akaba ari myugariro w’inyuma hagati.

2. Hirwa Rwabuzisoni Noah

Rwabuzisoni akinira ikipe ya Club Bruge yo mu Bubiligi akaba akina nka nimero 10. Uyu musore w’imyaka 16 ari mu bakinnyi bahize abandi mu irushanwa ry’igikombe cya Kevin De Bruyne Cup.

3. Noah Bushayija

Noah Bushayija Karera, akinira irerero rya ProGen Academy yo muri Ghana akaba ari umusore ufite imyaka 14. Uyu musore aherutse kwitabira irushanwa rya Gothia Cup ryabereye muri Norway, aho akina nka rutahizamu uca mu mpande, ndetse akaba yakina no mu kibuga hagati.

4. Jean Luc Mukiza

Jean Luc akinira ikipe ya Lillestrømo SK y’abatarengeje imyaka 16. Uyu musore ukina inyuma iruhande rw’iburyo, ikipe ye yageze ku mukino wa nyuma w’igikombe cya Gothia Cup aho batsinzwe n’ikipe yo muri Espagne.

5. Randy Mbaguta

Mbaguta, akinira ikipe ya Vaughan Soccer Academy yo muri Canada. Mu mwaka ushize w’imikino, yatsinze ibitego 7, atanga imipira 17 ivamo ibitego. Uyu musore w’imyaka 13, nta gihindutse ashobora kwerekeza mu irerero rya Anderlecht akaba akina nka nimero 10.

6. Yves Muhire Buhake

Ni murumuna wa Clauvis Buhake uheruka guhamagarwa mu ikipe y’igihugu “Amavubi”. Uyu musore w’imyaka 16, akaba rutahizamu wuzuye, akinira ikipe IL Norild yo muri Norway.

7. Jean Christopher Habimana Muanza

Christopher Habimana ni umunyarwanda w’imyaka 16, ukinira FC Laval yo muri Canada. Ni umukinnyi ukina imyanya yose y’inyuma mu kibuga. Nyina akomoka muri Haiti, mu gihe Se ari umunyarwanda.

8. Nkunzurwanda Alliance

Nkunzurwanda ni umusore w’imyaka 16 akaba akinira ikipe ya KMSK Deinze yo mu Bubiligi. Uyu musore akina inyuma ibumoso, ndetse no mu mutima w’ubwugarizi.

9. Bradley Safari

Safari akinira ikipe ya RWDM yo mu Bubiligi, akaba ari na Kapiteni w’ikipe y’abatarengeje imyaka 15.  Yatangiye no kwifashishwa mu ikipe y’abatarengeje imyaka 17, akaba akina nka nimero 6.

10. Joshua Karangwa

Karangwa ni umukinnyi wa Soccer St Leonard yo muri Canada akaba afite imyaka 14.

Kuri iki cyumweru tariki 3 Nzeri, ni bwo umunsi wa gatatu wa shampiyona wasojwe aho n’ubundi usize ikipe ya Musanze FC ikiyoboye urutonde rw’agateganyo. Uyu munsi, watangiye ku wa 5 tariki 1 Nzeri aho Rayon Sports yari yakiriye Amagaju FC. Ni umukino warangiye amakipe yombi anganya igitego kimwe kuri kimwe.

Bucyeye bwaho, habaye imikino igera kuri 5, aho ikipe ya As Kigali yatsinzwe na Gasogi United ibitego 2-1, Bugesera FC itsinda Kiyovu Sports ibitego 4-0, Etoile de L’Est itsindwa na APR FC igitego 1-0, Marine FC itsinda Etincelles FC igitego kimwe ku busa, naho Musanze FC itsinda Sunrise FC ibitego 2-1.

Ku cyumweru, ikipe ya Police FC yanganyije na Mukura Victory Sports igitego 1-1, Muhazi United nayo inganya na Gorilla FC 1-1.

Mu mikino 8 yabaye, yabonetsemo ibitego 18, bivuze ko nibura ari ibitego 2.25 kuri buri mukino. Ikipe ya Bugesera FC niyo yatsinze ibitego byinshi bigera kuri 4, ikurikirwa na Musanze FC na Gasogi United zatsinze 2, bivuze ko amakipe bahuye ariyo yatsinzwe byinshi.

Usibye ikipe ya Etoile de L’Est niyo itarabashije kubona inota yakiriye umukino, kuko yatsinzwe na APR FC. Amakipe abiri gusa niyo atarabashije kureba mu izamu, ayo akaba ari Kiyovu Sports yatsinzwe 4-0 ndetse na Etincelles FC yatsinzwe 1-0.

Igitego Joseph Sackey yatsinze Gorilla FC, cyatumye nibura buri kipe imaze kureba mu izamu. Muhazi United niyo kipe yari isigaye itarabasha gutsinda igitego muri shampiyona y’u Rwanda 2023-24.

Eric Ndizeye ukinira ikipe ya Kiyovu Sports, yabaye umukinnyi wa mbere ubimburiye abandi kwitsinda igitego, aho mu bitego 4 Kiyovu Sports yatsinzwe, harimo igitego yitsinze.

Kubwimana Cedric ukinira Mukura Victory Sports, igitego yaraye atsinze Police FC, cyabaye igitego cya gatatu cyikurikiranya muri shampiyona, bikaba ibintu akoze bwa mbere kuva yatangira umwuga w’umupira w’amaguru.

Urutonde rwa shampiyona

Musanze FC ikomeje kuyobora urutonde rwa shampiyona n’amanota 9, Gasogi United ikaba ifite amanota 6, APR FC amanota 6 iri ku mwanya wa gatatu, mu gihe Muhazi United iri ku mwanya wa 14 n’amanota 2, Etincelles FC ku mwanya wa 15 n’inota rimwe, mu gihe Etoile de L’Est iri ku mwanya wa nyuma n’ubusa bw’inota.

Mu gusoza amahugurwa y’iminsi 3 yateguwe na Japan Karate Association Rwanda (JKA – Rwanda), Umufaransa Christophe Pinna wayatanze yanyuzwe n’urwego rw’abakinnyi u Rwanda rufite cyane cyane ku bijyanye n’imbaraga (Physique).

Ni amahugurwa ajyanye na tekinike yo kurwana (Kumite) mu mukino wa Karate yatanzwe na Christophe Pinna wegukanye shampiyona y’Isi 2000.

Yatangiye tariki ya 1 Nzeri akaba yarasojwe ku munsi w’ejo hashize ku Cyumweru tariki 3 Nzeri 2023, yasojwe n’irushanwa rya “Grand Prix JKA-RWANDA Open Kumite Championship 2023' ryegukanywe na Ntwali Fiston wahembwe umudali n’ibihumbi 300, Niyitanga Harifa aba uwa kabiri akaba yarahawe umudali n’ibihumbi 200 ndetse Shyaka Ndutiye Maic wabaye uwa 3 wahawe umudali n’ibihumbi 100.

Ntwali Fiston wegukanye irushanwa yavuze ko tekinike yigishijwe na Pinna mu mahugurwa ari zo zamufashije gutsinda.

Ati “Nkanjye nkina kurwana, ni amahirwe kuba Pinna yaraje kandi na we ari indwanyi rero yaduhuguye byinshi bijyanye na tekinike zo kurwana zo ku rwego mpuzamahanga ndetse ibyo yatwigishije ni byo byamfashije kuba nakwegukana umudali.”

Christophe Pinna watanze mahugurwa akaba yavuze ko yishimiye urwego yasanzeho abakinnyi bo mu Rwanda cyane cyane ku bijyanye n’imbaraga by’umwihariko.

Ati “Mu Rwanda mufite abakinnyi bahagaze neza mu bijyanye n’imbaraga utapfa kubona aho ari hose, baracyari bato kandi barakora cyane.”

Yakomeje kandi avuga ko muri iyi minsi 3 abakinnyi bize tekinike zo kurwana, amayeri bakoresha cyane cyane ugendeye ku buryo uwo muhanganye yitwaye ndetse no kuba watesha umutwe uwo muhanganye akaba yava mu mukino.

Perezida wa JKA-Rwanda, Rurangayire Guy yavuze ko bagiye gukorana na Pinna akajya aza byibuze rimwe mu mezi 3.

Ati “Na Christophe twemeranyijwe ko azajya aza rimwe mu mwaka ariko turifuza ko byarenga rimwe mu mwaka, muri gahunda zacu zo gutegura amarushanwa aya y’aba basore tukabitaho, abatsinze tugakora shampiyona y’inyamwuga biri mu nzira turi kubyigaho ku buryo yazajya aza hano rimwe mu gihembwe, gukosora abana, gukosora abatoza.”

Yakomeje kandi avuga ko aya mahugurwa yabagaragarije ko abakinnyi bafite hari urwego bamaze kugeraho rushimishije mu bijyanye na tekinike zo kurwana.

Aya mahugurwa yamaze iminsi 3 akaba yaritabiriwe n’abakinnyi (abakuru b’abato) bagera kuri 200.

Imikino ya Kamarampaka muri Basketball “betPawa Playoffs” yari yakomeje aho hakinwaga umukino wa 2 wa nyuma nawo wegukanywe na APR BBC yatsinze REG BBC amanota 69-59.

Ni umukino wabanjirijwe n’umukino wa 1/2 mu bagore wahuje REG WBBC na IPRC Huye maze REG itsinda 78-55 ndetse ihita igera ku mukino wa nyuma kuko wari umukino 3 itsinze ku busa bwa IPRC Huye.

Hari hateganyijwe kandi umukino wa w’umwanya wa 3 mu bagabo wagombaga guhuza Patriots BBC na Espoir BBC ariko Patriots BBC ntiyagaragara ku kibuga maze iterwa mpaga.

Hahise hakurikiraho umukino wa nyuma, APR BBC nyuma yo gutsinda umukino wa mbere hari hategerejwe kureba niba itsinda n’uwa kabiri.

REG yitwaye neza cyane mu gace ka mbere igatsinda amanota 20-12. Gusa yaje guhindukiranwa mu gace ka kabiri aho abasore ba APR bayobowe na Holland bagatsinze 24-16 amakipe yombi akajya kuruhuka ari 36-36.

Agace ka gatatu n’ubundi APR yanze kurekura ariko REG nayo irizirika binyuze mu basore nka Adonis watsinze amanota menshi muri uyu mukino (23), gusa APR yaje kukekugana ku manota 16-13. APR yanakomerejeho itsinda agace ka nyuma ku manota 22-13 ya REG maze umukino urangira ari 74-62. APR irasabwa gutsinda imikino 2 gusa ubundi igahita yegukana igikombe cya Kamarampaka.

Police FC niyo yafunguye amazamu ku gitego cyatsinzwe na Mugisha Didier, mu gihe Mukura yabonye igitego mu minota ya nyuma y’umukino, ku gitego cyatsinzwe na Kubwimana Cedric usanzwe ukina inyuma.

UKO UMUKINO WAGENZE

94″ umukino wahuzaga ikipe ya Police FC n’ikipe ya Mukura VS, urangiye amakipe yombi anganya igitego kimwe kuri kimwe mu mukino w’umunsi wa gatau wa shampiyona.

90″ umusifuzi yongeyeho iminota ine

86″ Igitego cya Mukura. Mukura ibonye igitego cyo kwishyura, ku mupira uzamukanwe na Bukuru ashota mu izamu biranga umupira uragaruka, usanga Kubwimana Cedric ahagaze mu rubuga rw’amahita, arekura ishoti rikomeye, umupira uruhukira mu izamu.

80″ Mukura ihushije igitego cyabazwe ku mupira uzamukanwe na Bukuru, ahereza Pimpong wasigaranye n’umunyezamu ariko yifunze mu izamu ashose umupira ukubita umunyezamu ujya hanze.

75″ Police FC ihushije igitego ku mupira uzamukanwe na Mugisha Didier, ahereza Shami wahise ashitura umunyezamu ko agiye gupasa, ubundi umunyezamu, agwa hasi, ubundi shami ateye umupira ujya hanze.

70″ Mukura yari ibonye amahirwe agana imbere y’izamu, ku mupira utewe na Bukuru, ariko umunyezamu awushyira muri koroneri

Kwitonda Ally yavuye mu kibuga yababaye, ahita asimbuzwa

Umutoza wa Mukura afashe umwanzuro wo kwataka Police FC, nyuma yo kugabanya abakinnyi bakina mu kibuga bugarira.

64″ Mukura irasimbuje. Mukura isimbuje abakinnyi bagera kuri bane, Iradukunda, Gerard, Mohamed na Aboubakar bavuye mu kibuga, hinjira Bukuru, Nkinzingabo Fiston, Pimpomg, na Nsabimana Emmanuel

58″ Igitego cya Police FC. Police FC ibonye igitego cya mbere gitsinzwe na Mugisha Didier ku mupira ahawe na Bigirimana Abedi, asigarana n’umunyezamu, umupira awutera munguni atarimo igitego kina kiranyoye

Amakipe atangiye igice cya kabiri kuko yakinnye igice cya mbere, ubona ko bari gukinira mu kibuga hagati

45″ Igice cya kabiri kiratangiye

45″ igice cya mbere kitaranzwe n’uburyo bwinshi kirarangiye, amakipe yombi anganya ubusa ku busa 

Umukino uheruka guhuza aya makipe mu mukino wa Shampiyona, wabaye tariki 11 Gashyantare, 2023 ubwo Police FC yatsindaga Mukura ibitego 2-0. Mukura ariko nayo yari yatsinze umukino ubanza igitego 1-0, mu mukino wari wabaye tariki 17 Ukuboza 2022, ubera i Huye

30″ Police FC ikoze isimbuza ritunguranye kubera imvune Kwitonda Ally agize, ahita ava mu kibuga, hijira Rurangwa Mose

20″ Mukura VS ihushije igitego cyari cyabazwe ku mupira uzamukanwe na Manishimwe Djabel ahereza Iradukunda, wahise akata umupira imbere y’izamu, umupira usanga Aboubakar ahagaze wenyinye, ahita yamurura izamu ryari ryambaye ubusa

Abakinnyi 11 Police FC yabanje mu kibuga

Rukundo Onésime

Shami 

Rutanga Eric

Ndizeye Samuel

Kwitonda Ally

Ngabonziza 

Aboubakar Akuki

Nshuti Savio

Bigirimana Abedi

Mugisha Didier

Niyonsaba

15″ Koroneri ya Police FC itewe na Savio ntiyagira icyo itanga

Gasana Jerome wahoze ari MD wa Mukura, Musoni Protais MD wa Mukura ndetse na Perezida wa Mukura, bose babukereye

Nyirigira Yves Perezida wa Mukura, yitabiriye uyu mukino

Abakinnyi 11 Mukura yabanje mu kibuga

Sebwato Nicolas

Alex Ngirimana

Kayumba Soter

Hakizimana Zubel

Cedric

Aimable

Gerard

Manishimwe Djabel

Iradukunda Elie Tatu

Aboubakar

Mohamed Sally

10″ Mukura yaciriye umurongo ikipe ya Police FC, ariko nayo kubona igitego biragoye

01″ kufura ya mbere ya Mukura, ikaba kufura ya mbere muri uyu mukino, ibonetse ku ikosa rikorewe Iradukunda Elie Tatou ari nawe uhannye ikosa umupira ujya muri koroneri

15:05″ Umukino uratangiye. Reka twongere tubahe ikaze nshuti bakunzi ba InyaRwanda, ku mukino wa shampiyona y’u Rwanda y’ umunsi wa 3, aho ikipe ya Police FC yakiriye ikipe ya Mukura, kuri sitade ya Kigali Pele Stadium. Mugisha Didier wa Police FC niwe utangije umukino.

15:00″ Police FC na Mukura VS barimo kwifotoza amafoto y’u rwibutso

14:55″ amakipe agarutse mu kibuga, ikipe ya Mukura ikaba igiye gushaka amanota 6 yikurikiranya, mu gihe Police FC igiye gushaka amanota 3 ya mbere nyuma yo gitsindwa na APR FC.

Manishimwe Djabel ari mu bakinnyi bari bubanze mu kibuga

14:45″ abakinnyi bashoje kwishyushya, basubiye mu rwambariro, bakaba baribugaruke batangira umukino.

14:30″ akavura katangiye kujojoba, kuri sitade ya Pele. Ni imvura itari nyinshi, umuntu atagerekaho impamvu y’uko abafana bakiri bacye

Mukura Victory Sports igiye gukina umukino wayo wa mbere hanze ya sitade mpuzamahanga y’akarere ka Huye, nyuma y’umukino w’umunsi wa mbere yakiriwemo n’Amagaju FC, ndetse n’umukino yakiriyemo Marine FC.

Police FC ifite amanota 3 kuri 6, nyuma yo ngutsinda umukino umwe, igatsindwa uwa kabiri.

Mukura ifite amanota 4 kuri 6, aho yanganyije umukino wa Amagaju FC itsinda Marine FC

Nk'uko byari biteganijwe tariki 02 Nzeri 2023, ahazwi nka Rwandex i Gikondo kuri Mundi Center ahakorera Kompanyi isanzwe imenyerewe mu gutanga serivisi zirimo gukodesha umwanya abantu bakiniramo imikino itandukanye, Funkey Monkey Arcade hari hateraniye abantu banyuranye biyandikishije mu irushanwa ryiswe 'eGamers Pro Championship in Rwanda.'

Abantu bose uko ari 68 biyandikishije siko bahagereye icyarimwe. Bagendaga baza gake gake, bagahabwa umwanya bagakina ubundi hakavamo abatsinda banakomeje ku cyiciro gikurikiyeho cy'aya marushanwa giteganijwe tariki 09 Nzeri 2023, hanyuma abatsinzwe nabo bagataha.

Hasojwe icyiciro cya mbere cy’amarushanwa y’imikino y’amashusho (Video Game)

Ku ikubitiro abahanganye bahereye ku mikino ibiri ariyo 'Mortal Combat,' y'imirwano n'uwitwa 'Fifa,' w'umupira w'amaguru.

Uyu mukino mushya mu Rwanda, witabiriwe  ugereranije n’abari bishyuye 5,000Frw yo kwiyandikisha

Rugema Ishimwe Danny, ushinzwe icungamutungo muri Funky Monkey Arcade yabwiye InyaRwanda ko batangiza aya marushanwa, bari bafite intumbero yo gushyira ahagaragara impano zisa nk'izapfukiranwe zo gukina imikino y'amashusho, umukino mushya mu Rwanda.

Danny asobanura uko irushanwa ku cyiciro cya mbere ryari riteye yagize ati: 'Umuntu arimo kuza agahatana na mugenzi we batomboranye bagakina Game imwe y'iminota 10 hakavamo ukomeza ku kindi cyiciro cya 'Semi Finals.' Icyasabwaga gusa ni ugutsinda igitego mugenzi wawe ubundi ugakomeza.'

Sheja Queen Linda, ushinzwe gushaka amasoko muri iyi kompanyi yavuze ko yishimiye kuba abantu bitabiriye ku bwinshi aya marushanwa, kandi hakaba nta kavuyo cyangwa umutekano muke byahabonetse.

Abaje kwihera amaso uko aya marushanwa agenda akanyamuneza kari kose

Nubwo bimeze bityo ariko, Sheja yavuze ko bahuye n'imbogamizi zitandukanye zirimo ubukererwe bwa bamwe mu biyandikishije muri aya marushanwa no kuba hari bamwe mu babyeyi bazanaga abana b'imyaka iri munsi y'iyashyizweho muri iri rushanwa ariyo 16.

Ati: 'Kuko n'ubundi hano haza abana bato bagakina, niyo mpamvu ababyeyi babo babaga bazi ko nabo bagomba gukina. Urumva byari bigoye kubasobanurira ukuntu abana batemerewe uyu munsi.'

Yavuze ko kandi mu rwego rwo kumenyekanisha gikorwa cy'aya marushanwa, basakaje ubutumwa ku mateleviziyo, ku mbuga nkoranyambaga n'ahandi hantu hatandukanye kugira ngo abantu babasure bamenye n'aho bakorera, cyane ko bafite n'ibindi bikorwa bateganya bitari aya marushanwa gusa.

Isheja yavuze ko nka kompanyi batekereza cyane no ku bantu bo mu ntara, aho yagize ati: 'Imwe mu mpamvu twashyizeho aya marushanwa ni ukugira twaguke vuba, tugere ahantu hagiye hatandukanye kuko nk'ubu ngubu twari twapanze ko nko mu mezi makeya ari imbere tuzaba twageze mu ntara zitandukanye. Ku buryo nituzajya dukora n'andi marushanwa bose aho bari bazajya bagenda bagakina.'

Umwe mu batsinze muri ‘Fifa’ wavuze ko amaze igihe kinini akina uyu mukino

Bamwe mu babashije gutsinda abagakomeza ku cyiciro cya Kabiri cy'aya marushanwa baganiriye na InyaRwanda bavuze ko bari basanzwe bakina iyi mikino y'amashusho ndetse ko bishimiye ko yahawe agaciro mu Rwanda, ariko bifuza ko aho ikinirwa hakwaguka hagashyirwaho n'abatoza mu rwego rwo kurushaho kwagura uyu mukino mu banyarwanda.

Abatsinze bavuze ko icyo barushije abandi ari imyitozo myinshi no kugira impano mu gukina iyi mikino

Aba basore bavuze ko nta kindi barushije abandi kugira ngo batsinde usibye uko barakinnye iyi mikino cyane bakaba basanzwe babifitemo n'impano.

Aba bakinnyi batanze icyifuzo cy’uko ahakinirwa uyu mukino hakwaguka ndetse bakanashakirwa abatoza

Bavuze ko bishimiye kuba batekerejweho bagahabwa umwanya ariko na none basaba ko hakongerwamo imbaraga kuko iyi mikino ikiri ku rwego rwo hasi mu Rwanda kandi ababifitemo impano bahari. Banashishikarije abataritabira iyi mikino babikunda kuba babyinjiramo kuko nawo ari umukino ushimishije nk'iyindi kandi ushobora kukubeshaho.

Byagaragaye ko uyu nawo ari umukino ushimishije nk’iyindi ndetse ukwiye kongerwamo imbaraga mu Rwanda

Mu bantu 68 biyandikishije hitabiriye abantu 34  gusa mu irushanwa, muri abo hakomeza 17 ku cyiciro cya kabiri cya 'Semi finals' harimo 11 bahatanaga mu mukino wa Fifa na 6 b'umukino wa Mortal Combat.

Biteganijwe ko ikindi cyiciro kizaba tariki 09 Nzeri aho hazaba hari n'abahanga mu kuvanga umuziki [Aba-Djs] bagasusurutsa ababashije gutsinda ku cyiciro cya mbere. Igice cya Gatatu giteganijwe tariki 22 Nzeri, hakabaho imikino izahanganisha abahanga mu gukina umukino wa 'Billiards.'

Biteganijwe ko abazahiga abandi bazegukana ibihembo

Tariki 29 Nzeri 2023 niwo munsi wa nyuma wo gusoza ku mugaragaro aya marushanwa aho abagera kuri 34 bazahatana mu yindi mikino, bagatoranywamo batatu ba mbere bazahabwa ibihembo birimo ibihumbo 250Frw bizahabwa uzaba yabaye uwa mbere, uwa kabiri azahembwa 'Abonema' yo gukina ku buntu kugeza yujuje imikino ihwanye n'ibihumbi 50Frw, hanyuma uwa gatatu ahabwe impamyabumenyi ishobora kumufasha kwitabira ayandi marushanwa akomeye.

Reba hano andi mafoto yaranze icyiciro cya mbere cy’amarushanwa y’imikino y’amashusho “Video Games”

https://www.flickr.com/photos/195392601@N08/53159905944/

Amafoto: Freddy Rwigema -Inyarwanda.com

APR BBC yateye intambwe ya mbere igana aho igikombe cy’imikino ya kamarampaka muri Basketball “BetPawa Playoffs” giteretse nyuma yo gutsinda REG BBC.}}

Mu ijoro ryakeye nibwo hatangiye imikino ya nyuma ya kamarampaka mu mukino wa Basketball mu bagabo aho APR BBC na REG BBC zatangiye urugendo rwo gutanguranwa imikino 4 muri 7.

APR BBC yatangiye neza cyane aho yatsinze umukino wa mbere ku manota 68-62.

APR BBC yatangiye neza cyane itsinda agace ka mbere amanota 20-16, ibifashijwemo kandi na Nshobozwabyosenumukiza Jean Jacques Wilson wavuye muri REG BBC watsinze n’amanota menshi muri uyu mukino (23) yatsinze agace ka kabiri ku manota 16-14 bajya kuruhuka ari 36 kuri 30.

Abasore ba APR BBC bagarutse ku gace ka 3 bafite imbaraga nyinshi bagatsinda ku manota 17-12 ni mu gihe REG BBC yatsinze agace ka nyuma ku manota 20-15 maze umukino urangira 68-62.

Nyuma yo gutsinda umukino wa mbere, aya makipe azahura mu mukino wa 2 ejo ku Cyumweru tariki ya 3 Nzeri 2023.

Mu bagore kandi APR WBBC nayo yaraye itsize The Hoops 84-47, ikaba yahise igera ku mukino wa nyuma kuko itsinze iyi kipe imikino 3-0, itegereje iyo bizahura hagati ya REG WBBC yaraye itsinze IPRC Huye 85-66, yahise igira imikino 2-0, itsinze undi yahita igera ku mukino wa nyuma.

Umukino watangijwe n’ikipe ya Rayon Sports yari mu rugo, gusa nyuma y’amasegonda 40 bahita bawutakaza. Ku munota wa kabiri, Rayon Sports yabonye koroneri yatewe na Luvumbu ariko ntiyagira icyo itanga.

Ku munota wa 17, Amagaju FC yahushije igitego cyari cyabazwe, ku mupira Rukundo yasigaranye n’umunyezamu ashaka gutsinda igitego ashose cyane, umupira ujya hanze. Ku munota wa 28 Amagaju FC yabonye igitego cya mbere cyatsinzwe na Rukundo Aboudrahmani.

Abakinnyi 11 Rayon Sports yabanje mu kibuga

Hategekimana Bonheur

Didier Mucyo

Elie Ganijuru

Aimable Nsabimana

Rashid Kalisa

Emmanuel Mvuyekure

Hertier Luvumbu

Eric Ngendahimana

Charles Bbaale

Joackiam Ojera

Amakipe yakomeje gukina mu kibuga hagati, Rayon Sports abakinnyi yabanje mu kibuga, guhuza umukino byagumye kwanga, ndetse Amagaju FC atangira gutegereza Rayon Sports ngo baze bakine. Igice cya mbere cyarangiye Rayon Sports irushanwa n’Amagaju FC yari azigamye igitego.

Abakinnyi Amagaju FC yabanje mu kibuga

Ndikuriyo Patient

Masudi Narcisse

Dushimirimana Janvier

Tuyishime Emmanuel

Bizimana Hadji

Dusabimana Jean Claude

Rukundo Aboubarahmani

Nkurunziza Seth

Ndizeye Innocent

Ndayishimiye Edouard

Maranda Destin Exauce

Mu gice cya kabiri umutoza wa Rayon Sports yakoze impinduka, Mucyo Didier ava mu kibuga, hijira Serumogo Ali. Rayon Sports yagarutse ishaka igitego ku buryo bubi na bwiza, ariko Amagaju FC akomeza kugarira neza.

Rayon Sports yakomeje gukora impinduka ishaka igitego, abakinnyi nka Youssef, Tuyisenge Arsene binjira mu kibuga ariko bikomeza kwanga. Ahagana ku munota wa 65, Amagaju FC yafashe umwanzuro wo kuryama mu izamu ashaka gutsimbarara ku gitego cyayo, byatumye Rayon Sports iyicurikiraho ikibuga.

Ntabwo byagarukiye aho, kuko Rayon Sports yakomeje gukora impinduka, Mugadam wari akinnye umukino we wa mbere yinjiye mu kibuga ndetse nyuma na Rudasingwa Prince aza gushakisha.

Mu minota micye Rudasingwa Prince yinjiye, ku munota wa 88 yabonye igitego cyo kwishyura ku mupira yateye n’umutwe, unyura mu maguru y’umunyezamu w’Amagaju FC. Umusifuzi Mukansaga yongeyeho iminota 4, itagize icyo itanga, umukino urangira ari igitego kimwe kuri kimwe.

Nyuma y’imikino 3 ya shampiyona izi kipe zombi zimaze gukina, ziranganya amanota atanu kuri atanu, kuko zimaze gutsinda umukino umwe zinganya ibiri.

Igitego kimwe kuri kimwe byatumye Rayon Sports na Amagaju FC zigabana amanota mu mukino wa shampiyona.

Rayon Sports yari yakiriye Amagaju mu mukino w’umunsi wa 3 wa shampiyona y’icyiciro cya mbere mu Rwanda umwaka w’imikino 2023-24 wabereye kuri Kigali Pelé Stadium saa 18h00′ ku itara.

Rayon yaherukaga kunganya na Gorilla FC 0-0 mu mukino w’umunsi wa 2 yagombaga kwiyunga n’abafana itsinda Amagaju.

Amagaju yaherukaga kunyagira Etincelles, yaje nta gahunda afite yo korohera Rayon aho yayisatiriye kuva umukino watangira.

Nyuma yo guhusha uburyo butandukanye, rutahizamu wa Amagaju FC, Abdul Rahman ku munota wa 28 yayitsindiye igitego cya mbere.

Amagaju yongeye kubona andi mahirwe akomeye ku munota wa 40 ariko Narcisse awuteye umunyezamu Bonheur awukuramo.

Rayon Sports nta mahirwe afatika yabonye mu gice cya mbere maze igice cya mbere kirangira ari 1-0.

Rayon Sports yatangiye igice cya kabiri ikora impinduka, Mucyo Junior yahaye umwanya Serumogo Ali.

Rayon Sports yatangiye gusatira cyane, icurika ikibuga ndetse mu minota 10 ya mbere y’igice cya kabiri ibinamo amahirwe akomeye ariko umunyezamu Patient akuramo imipira ikomeye ya Ojera na Ganijuru Elie.

Ku munota wa 62, Mugadam Abakar yagiye mu kibuga asimbura Ngendahimana Eric, ku munota wa 70, Yousef Rharb na Tuyisenge Arsene binjiye mu kibuga basimbura Kalisa Rashid na Ganijuru Elie.

Rayon yakoze impinduka za nyuma ku munota wa 87, Prince Rudasingwa wasimbuye Luvumbu.

Uyu ni we wabaye umucunguzi wa Rayon Sports aho yaje kuyitsindira igitego ku munota wa 89. Umukino warangiye ari 1-1.