Tag: Imikino

N'ubwo ibintu bitoroshye kubera icyorezo cya coronavirus, biteganijwe ko ku nshuro ya 14  mu Rwanda hagiye kongera kubera isiganwa mpuzamahanga rizenguruka u Rwanda (Tour du Rwanda 2022).

Iri siganwa rizitabirwa n'amakipe 19 arimo amakipe y'ibihugu, amakipe y'ababigize umwuga, ndetse n'ikipe imwe ikina amasiganwa akomeye ku isi.

Ni isiganwa rizakinwa hubahirizwa ingamba zo kwirinda COVID-19 nk'uko byagenze umwaka ushize, aho uduce twose tw'irushanwa amakipe azajya akina akarara mu mujyi wa Kigali ahari Hotel zizaba zateguwe.

Gahunda uko izaba iteye

Ku Cyumweru tariki 20/02/2022, Kigali-Kigali Arena (gusiganwa umuntu ku giti cye), 4 km ITT)

Ku wa Mbere tariki 21/02/2022 Kigali-Rwamagana (148,3 km)

Ku wa Kabiri tariki tariki 22/02/2022, Kigali-Rubavu, (152 km)

Ku wa Gatatu tariki tariki 23/02/2022, Kigali-Gicumbi (124,3 km)

Ku wa Kane tariki tariki 24/02/2022, Muhanga-Musanze( 124,7 km)

Ku wa Gatanu tariki tariki 25/02/2022, Musanze-Kigali (152 km)

Ku wa Gatandatu tariki tariki 26/02/2022, Kigali-Kigali (152,6 km)

Ku Cyumweru tariki tariki 27/02/2022, Kigali-Kigali (75,3 km)

 Ibishya biri muri Tour du Rwanda 2022
 • Umuyobozi wa Tour de France Christian Prudhomme azaba ari muri Tour du Rwanda 2022 nta gihindutse

• Imodoka nyinshi zizaba ziri muri Tour du Rwanda zizaba ari iza Volks Wagen ziteranyirizwa mu Rwanda

• Uzegukana agace azajya yambara umwambaro wa Amstel

• Uyoboye isiganwa (Maillot Jaune) azambara Visit Rwanda

• Uhiga abandi mu kuzamuka Meilleur Grimpeur: Cogebanque

• Umunyarwanda uri imbere azaba yambaye Forzza Rwanda

• Umunyafurika wa mbere: Rwandair

• Uwa mbere mu guhatana (Most Co,bative): Horizon

• Ikipe ya mbere: Inyange

U Rwanda ruzahagararirwa n’ikipe y'igihugu ndetse na UCI Continental Benediction.

Abanyarwanda bakina hanze yarwo bamwe ntibahiriwe n’impera z’icyumweru aho umunyezamu Twizere Buhake Clement yakinnye umukino we wa mbere, Rafael York na AFC Eskilstuna baguma mu cyiciro cya mbere ni mu gihe Meddie Kagere akomeje gutsindira Simba SC.

Muri Kenya, ku munsi w’ejo umunyezamu Emery Mvuyekure yari yabanje ku ntebe y’abasimbura ikipe ye ya Tusker FC aho yari yakiriye CS Sfaxien yo muri Tunisia mu ijonjora rya nyuma ya CAF Confederation Cup, umukino warangiye ari 0-0, umukino wo kwishyura uzaba tariki ya 5 Ukuboza.

Ntabwo muri Zambia, Mirafa Nizeyimana yari mu kibuga mu mukino ikipe ye ya Zanaco FC yaraye itsinzemo Binga FC yo muri Mali 3-0 mu ijonjora rya nyuma ya CAF Confederation Cup, umukino wo kwishyura uzaba tariki ya 5 Ukuboza muri Mali.

Simba SC mui Tanzania yaraye itsindiye Red Arrows yo muri Zambia muri Tanzania ibitego 3-0, harimo igitego cya rutahizamu w’umunyarwanda, Meddie Kagere ni mu gihe ibindi byatsinzwe na Bernard Morrison, n’aho hari muri CAF Confederation Cup aho umukino wo kwishyura uzabera muri Zambia tariki ya 5 Ukuboza.

Meddie Kagere yaraye atsindiye Simba SC

Muri iki gihugu KMC itari ifite Migi muri shampiyona yanganyije na Mbeya City 2-2. Nyuma y’umunsi wa 7, KMC ni iya 14 mu makipe 16 n’amanota 4 mu gihe Yanga ari yo iyoboye n’amanota 16.

Nirisarike Salomon ku munsi w’ejo yabanje ku ntebe y’abasimbura ubwo ikipe ye ya Urartu FC yatsindwaga na Pyunik yahoze akinira 2-0 mu mukino w’umunsi wa 15 muri shampiyona ya Armenia. Urartu iri ku mwanya wa 6 n’amanota 18, Ararat-Armenia niyo iyoboye n’amanota 40.

Zari impera z’icyumweru nziza cyane kuri FC Shkupi na Rwatubyaye Abdul aho batsinze Struga mu mukino w’umunsi wa 15 wa shampiyona y’icyiciro cya mbere muri Macedonia aho baraye bayinyagiye 4-0. FC Shkupi niyo iyoboye n’amanota 35.

Rwatubyaye na FC Shkupi bakomeje kuyobora shampiyona

Mu cyiciro cya kabiri mu Bubiligi, KMSK Deinze ya Djihad Bizimana yaraye inganyije na RWDM 2-2 mu mukino w’umunsi wa 13 w’iyi shampiyona. Ni umukino Djihad Bizimana yakinnye 71 aho yasimbuwe na Leconte. KMSK Deinze iri ku mwanya wa 4 n’amanota 17, Westerlo ya mbere ifite 30.

Ku wa Gatandatu, umunyezamu Twizere Clement Buhake yinjiye mu kibuga ku munota wa 46 asimbura Lillevik mu mukino wa shampiyona w’umunsi wa 30 iyi kipe yatsinzemo Byrine 2-0. Iyi kipe iri ku mwanya wa nyuma n’amanota 24 ku rutonde ruyobowe na HamKam ifite 69.

Buhake Clement yakinnye umukino we wa mbere muri Strommen IF kuva uyu mwaka w’imikino watangira

Mu cyiciro cya mbere muri Georgia, FC Dila Gori ya Manzi Thierry, ku Cyumweru yatsinzwe na Telavi 2-1 mu mukino w’umunsi wa 35, ni umukino Manzi Thierry iminota 90 yayimaze ku ntebe y’abasimbura. Iyi kipe iri ku mwanya wa 3 n’amanota 60, Dinamo Batumi ya mbere ifite 71.

Muri Sweden mu cyiciro cya 2 bakinaga umunsi wa nyuma wa w’iyi shampiyona, ku wa Gatandatu AFC Eskilstuna ya Rafel York yatsinze Landskrona 1-0, ni umukino uyu munyarwanda yinjiye mu kibuga ku munota wa 87. Iyi kipe yasoje ku mwanya wa 9 n’amanota 40 mu gihe Värnamo na GIF Sundsvall zazamutse mu cyiciro cya mbere.

Yark na AFC Eskilstuna basoje shampiyona ntibabona amahirwe yo kuzamuka mu cyiciro cya mbere

Kuri sitade ya Kigali harangiye umukino wahuzaga ikipe ya RS Berkane yari yakiriwe na APR FC, gusa umukino urangiye nta kipe irebye mu izamu.

Abakinnyi APR FC yabanje mu kibuga: Ishimwe Pierre Ombolenga Fitina, Ndayishimiye Dieudonne, Nsabimana Aimable, Prince Buregeya, Ruboneka Bosco, Rwabuhihi Placide, Mugisha Gilbert, Manishimwe Djabel, Kwitonda Alain na Bizimana Yannick.

Wari Umukino ubanza wo gushaka amakipe azajya mu matsinda y’igikombe cya CAF Confederation Cup aho APR FC yatombowe na RS Berkane, nyuma yo kuva mu mikino ya CAF Champions League isezerewe na Etoile du Sahel.

RS Berkane yabanjemo Elouaad, Elmoussaoui, Bentarcha, Regragui, Baadi, Naji, Elhilali, Elmoudane, Alfahli, Twisila, Elbahraui.

Umukino haba mu gice cya Mbere ndetse n’icya kabiri Nta buryo bukaze bwabayemo dore ko yaba Berkane yakinaga yifashe cyane, ndetse na APR FC yari mu rugo ikina idashaka kwinjizwa igitego, byatumye umukino urangira ari ubusa ku busa.

Umukino wo kwishyura uzaba Tariki 5 Ukuboza uyu mwaka, ubere kuri  Stade Municipal de Berkane, ikibuga cya Berkane cyakira ibihumbi bigera ku 10.

Umukinnyi Nyafurika wari wahuje APR FC na RS Berkane warangiye amakipe yombi anganyije 0-0, ni umukino RS Berkane yabonyemo ikarita itukura.

APR FC yari yakiriye RS Berkane mu mukino ubanza w’ijonjora rya nyuma rya CAF Confederation Cup bahatanira kujya mu matsinda.

Uyu mukino wabereye kuri Stade Regional i Nyamirambo, iminota ya mbere yaranzwe no kwigana ku mpande zombi.

Umupira wakinirwaga hagati mu kibuga cyane amakipe ashaka uburyo agera imbere y’izamu ariko nta mahirwe menshi yigeze aboneka mu gice cya mbere.

Amahirwe akomeye APR FC yabonye ni ayo ku munota wa 41, ni ku mupira Djabel yacomekeye Bizimana Yannick yisanga wenyine mu rubuga rw’amahina ariko yatera mu izamu unyura hanze yaryo.

RS Berkane niyo yabonye amahirwe menshi muri iki gice cya mbere ariko abakinnyi barimo Kisinda Tuisila ntibabasha kubyaza umusaruro amahirwe babonye.

Ku munota wa 38, Lague yinjiye mu kibuga asimbura Kwitonda Alain Bacca wagize ikibazo cy’imvune. Igice cya mbere cyarangiye ari 0-0.

Ku munota wa 60 APR FC yakoze impinduka 2, Yannick Bizimana na Mugisha Gilbert bavamo hajyamo Mugunga Yves na Ishimwe Anicet, ku munota wa 80, Nsanzimfura Keddy yasimbuye Rwabuhihi Placide.

Muri iki gice cya kabiri APR FC yagerageje gushaka igitego abasore barimo Lague na Bosco bagerageza amahirwe ariko ntibagira amahirwe yo kubona igitego.

Ku munota wa 82, Hamza Regragui yahawe ikarita y’umutuku nyuma yo kubona ikarita ya kabiri y’umuhondo ku ikosa yakoreye Mugunga Yves.

Nsanzimfura Keddy ku munota wa 85, yagerageje ishoti rikomeye yatereye inyuma y’urubuga rw’amahina ariko umunyezamu Amine El Ouaad awukuramo. Umukino warangiye ari 0-0.

Umukino wo kwishyura uzabera muri Maroc tariki ya 5 Ukuboza 2021, izatsinda izahita ijya mu matsinda ya CAF Confederation Cup.

Senegal yahisemo kuza kwitegurira igikombe cya Afurika mu Rwanda, kubera ko ikirere cya Kigali kimeze neza nk'icyo mu mujyi wa Bafoussam izakinira.

Ikinyamakuru Senego cyanditse ko Aliou Cissé n'itsinda ry'abatoza bafatanya akazi muri iyi kipe y'igihugu babonye ko Bafoussam, umujyi Senegal izakiniramo imikino yo mu matsinda uri mu misozi, bahitamo kuzajyana abakinnyi mu gace gafite ikirere nk'icyo muri ako gace, birangira bahisemo u Rwanda.

Kuva Senegal yabona itike yo kwitabira iyi mikino itaha yo ku mugabane wa Afurika, ababishinzwe batangiye kwitegura iri rushanwa banyotewe kwegukana.

Uretse kuba ikirere cy'u Rwanda kimeze neza nk'icya Bafoussam bazakinira, Aliou Cissé hamwe n'abamwungirije barashaka gukorera imyitozo mu mutuzo mwinshi mbere y'uko binjira mu irushanwa.

Amakuru avuga ko na mbere yo gutsinda Congo 2-0, abakinnyi ba Senegal bari bamenyeshejwe n'abatoza ko bazakorera imyitozo mu Rwanda.

Senegal iri mu itsinda rya 2 muri iyi mikino, aho iri kumwe n'ibihugu nka Malawi, Guinea na Zimbabwe.

N'ubwo ari ikipe y'ikigugu ifite amateka akomeye ndetse yanagize abakinnyi bakomeye kuri uyu mugabane, Senegal ntiratwara na rimwe igikombe cya Afurika, igikomeye yakoze ni ukugera ku mukino wa nyuma inshuro ebyiri, mu 2009 na 2019.

Kuri iyi nshuro nta kosa na rimwe iki gihugu gishaka gukora, kuko intego ari ukwegukana iki gikombe ku nshuro ya mbere.

Ikipe y’igihugu ya Senegal igiye gukorera umwiherero i Kigali yitegura CAN 2022

Kuri uyu wa Gatandatu tariki ya 27 Ugushyingo 2021, mu karere ka Huye habereye umuhango wo gufungura ku mugaragaro ishuri ry'umupira w'amaguru rya Paris Saint Germain, ryitezweho impinduka muri ruhago nyarwanda.

Uyu muhango wari witabiriwe na Ambasaderi w'u Bufaransa mu Rwanda, Antoine Anfré, abayobozi batandukanye mu nzego za Leta barimo n'umunyamabanga uhoraho muri Minisiteri ya Siporo, Bwana Shemamaboko Didier, umunyabigwi wakiniye Paris Saint Germain ukomoka muri Brazil, Raimundo Souza Veira de Oliveira uzwi nka Rai ndetse n'abandi bayobozi muri iyi kipe y'ubukombe ku Isi.

Umuhango wo gufungura iri shuri wabereye kuri Stade mpuzamahanga ya Huye, ukaba kandi witabiriwe n'ababyeyi b'aba bana, itangazamakuru ryo mu Rwanda no mu mahanga n'abandi.

Nyuma yo gufungura ku mugaragaro iri shuri, umunyamabanga uhoraho muri Minisiteri ya Siporo, Shemamaboko Didier yatangaje ko i Huye hagiye kuba igicumbi cy'impinduka muri ruhago nyarwanda.

Yagize ati: 'Turishimye cyane ku bw'iki gikorwa gikomeye PSG ikoze kigiye guha amahirwe abana b'abanyarwanda kugaragaza impano zabo mu mupira w'amaguru, twizeye ko ejo h'umupira w'amaguru w'u Rwanda ari heza, twizeye abakinnyi beza bazava muri iri shuri'.

Iri shuri rikaba ryatangiranye abana 172 barimo abahungu 110 n'abakobwa 62, bagabanyije mu byiciro 9, uhereye ku myaka 6 kugeza kuri 14.

Nyinawumuntu Grace ushinzwe tekinike muri iri shuri, yavuze ko n'ubwo batangiranye abana 172 bafite intego yo kuzatoza abana 200 kandi ko bagomba kubigeraho vuba.

Byitezwe ko iri shuri rya ruhago rigiye gufungurwa i Huye rizaba umusemburo mwiza w'impano nyarwanda zizagera ku rwego rushimishije mu mupira w'amaguru, harimo no gukina mu makipe akomeye i Burayi arimo na PSG.

PSG yafunguye ku mugaragaro ishuri rya ruhago i Huye

Ishuri ryatangiranye abana 172

Iri shuri ryitezweho kuzaba umusemburo w’impinduka muri ruhago nyarwanda

Abayobozi bitabiriye uyu muhango bafata ifoto y’urwibutso