Tag: Imikino

‘Seleçao’ ya Brazil iraye igeze muri ¼ cy’igikombe cy’isi gikomeje kubera muri Qatar, nyuma yo kunezeza abafana bayo mu mukino wa ⅛ yanyagiyemo Koreya y’Epfo ibitego 4-1 mu mukino wabaye kuri uyu wa Mbere.

Mu mukino watangiye i Saa 21:00 kuri Stadium 974, Brazil yari yabanjemo abakinnyi bayo bose bakomeye, itangirana umuvuduko n’imbaraga nyinshi ibasha gutsinda ibitego byose mu minota y’igice cya mbere.

Vinicius Jr (Uri hasi) yahatanye n’abanya-Koreya

Rutahizamu Vinicius Jr ni we wafunguye amazamu ku munota wa 7′ aho yahawe umupira mwiza na Neymar, na we agacunga uko abugarizi n’umunyezamu wa Koreya bahagaze, aboneza umupira mu nshundura.

Ku munota wa 13′ Brazil yabonye igitego cya kabiri, cyinjijwe na Neymar wateye Penaliti nziza ahana ikosa ryari rikorewe Richarlison.

Ku munota wa 29, Richarlison wavudukaga yakoresheje ubuhanga bwinshi aha umupira Thiago Silva ndetse ahita awusubizwa mu rubuga rw’amahina, awinjiza mu izamu rya Koreya ryari ririnzwe na Kim Seung Gyu.

Richarlison yahindukije Kim Gyu

Ku munota wa 36′ Lucas Paqueta yatsinze agashinguracumu ka Brazil, aho yakiriye umupira mwiza yari ahawe na Vinicius Junior, na we awutera adahagaritse, uboneza mu izamu.

Mu minota wa 45′ y’igice cya kabiri, Brazil ntabwo yigeze yinjiza igitego, ahubwo Koreya y’Epfo yabonye igitego kimwe cy’impozamarira gitsinzwe na Seung-Ho Paik.

Muri uyu mukino, Tite utoza Brazil yahaye umwanya Dani Alves wasimbuye Eder Militao ndetse n’umunyezamu Weverton Silva wasimbuye Alisson Becker, Brazil iba ikipe ya mbere ikoresheje abakinnyi bose (26) yajyanye mu gikombe cy’isi.

‘Seleçao’ ya Brazil yabaye ikipe ya Gatandatu igeze muri ¼ mu gikombe cy’isi, nyuma y’ Ubufaransa, Ubuholandi, Ubwongereza, Argentine na Croatia. Amakipe asigaye azava hagati ya Marooc izakina na Espagne ndetse na Portugal izakina n’Ubusuwisi.

Startimes nk'ikigo kinini cy'isakazamashusho mu Rwanda, izanerakana imikino ya Bundesliga, CAF Champions League, CAF Confederation Cup hamwe na shampiyona y'ibihugu y’umupira w'amaguru muri Afrika, CHAN, mu mwaka wa 2023.

Startimes irakugezaho imikino y’igikombe cy’isi kugeza kuri Final

Alain-André Landeut wari umutoza mukuru wa Kiyovu Sports yamaze guhindurirwa inshingano aho yagizwe “Manager Sportif”, ni nyuma yo gutsindwa umusubirizo.

Byatangiye ubwo yatsindwaga na Gasogi United 3-1 mu mukino w’umunsi wa 11 wa shampiyona, perezida w’iyi kipe yaje gutangaza ko ahagaritse uyu mutoza ndetse ko ashobora no kumwirukana.

Gusa nyuma yaje kuvuga ko yabitewe n’umujinya amugarura mu kazi, yahise atakaza umukino ukurikiyeho wa AS Kigali yabatsinze 4-2 ku wa Gatandatu w’icyumweru gishize.

Iyi kipe kuri uyu wa Mbere tariki ya 5 Ukuboza 2022 ikaba yatangaje ko bari mu biganiro n’umutoza mushya ni mu gihe André Landeut yagizwe Manager Sportif.

Bagize bati “Tunejejwe no kumenyesha abakunzi ba Kiyovu Sports ko turi kwitegura kwakira umutoza mushya, mu gihe Alain-André Landeut yasubiye mu nshingano ze ari zo kuba Manager Sportif wa Kiyovu Sports. Abatoza bari bungirije ni bo bari bube bafite ikipe mu gihe turi mu biganiro n’umutoza mushya.”

Alain-André Landeut watangiye gutoza Kiyovu Sports muri shampiyona ya 2022-23, ayisize ku mwanya wa 3 n’amanota 21 aho mu mikino 12 yatsinzemo 6, atsindwa 3 banganya 3.

Tunejejwe no kumenyesha abakunzi ba Kiyovu Sports ko turi kwitegura kwakira umutoza mushya, mu gihe Alain-André Landeut yasubiye mu nshingano ze arizo kuba manager Sportif wa KIYOVUSPORTS. Abatoza bari bungirije nibo bari bube bafite ikipe mugihe turi mubiganiro n’umutoza mushya. pic.twitter.com/G8y19JgDuu

— Kiyovu Sports (@SCKiyovuSports) December 5, 2022

Umutoza wa Rayon Sports, Haringingo Francis yashimagije umunyezamu we yari amaze igihe adakinisha, Hakizimana Adolphe avuga ko yitwaye nk’umunyezamu mukuru mu mukino baraye batsinzemo Bugesera FC.

Hakizimana Adolphe wari umaze iminsi atagaragara mu bakinnyi ba Rayon Sports yifashisha, Haringingo Francis ni we yari yagiriye icyizere cyo gukinisha ku mukino w’umunsi wa 12 baraye batsinzemo Bugesera FC 1-0.

Uyu munyezamu akaba yagize umukino mwiza cyane kuko yagiye akuramo imipira yabazwe myinshi.

Nyuma y’uyu mukino, Haringingo Francis akaba yaratangaje ko yashimishijwe cyane n’uburyo uyu munyezamu yitwaye.

Yavuze ko ari umunyezamu ufite impano ariko na none ko idahagije ngo abe umunyezamu mwiza bimusaba gukora cyane ndetse n’ubunararibonye.

Ati “Adolphe ni umunyezamu ufite impano ikomeye hano mu Rwanda, gusa impano ntihagije hariho no gukora n’ubunararibonye ntekereza ko imikino twagiye dukina yamuhaye ubunararibonye nanjye nk’umutoza nkomeza kumugirira icyizere.”

“Hari ibintu byinshi twakosoye kandi uyu munsi mwabonye umukino yakinnye, nibaza ko n’ahazaza tuzakomeza kugenda dukosora, tumugirira icyizere kugeza aduhaye ibyo tumushakaho, uyu munsi yakinnye nk’umunyezamu mukuru, nk’umunyezamu ukinira ikipe nkuru navuga ko uyu munsi Adolphe yabaye umukinnyi w’umukino kuko yakuyemo imipira myinshi yabazwe nubwo natwe twarimo turata imbere ariko yabashije kuduhesha amanota 3.”

Muri 2019 ni bwo Hakizimana Adolphe wakuriye mu ishuri ryigisha umupira ry’Isonga, yasinyiye Rayon Sports amasezerano y’imyaka 4, ubu akaba ari ku mwaka we wa nyuma.

Mu mukino wa mbere mu itsinda rya gatatu ry’igikombe cy’isi 2022 wabaye kuri uyu wa kabiri, ikipe y’igihugu ya Arabie Saoudite yatunguranye itsinda Argentine (…)

Kuri uyu wa mbere hakinwe imikino y’umunsi wa kabiri w’igikombe cy’Isi 2022 aho u Bwongereza bwanyagiye Iran ibitego 6-2 naho u Buholandi bigoranye butsinda (…)

Kuri iki cyumweru mu nyubako y’imikino izwi nka BK ARENA, hasojwe irushanwa ngarukamwaka ryo gushimira abasora aho ikipe y’ikigo cy’igihugu gishinzwe ingufu (…)

Ikipe y’Igihugu y’Umukino wo Koga yaraye ihagurutse ku Kibuga Mpuzamahanga cy’Indege cya Kigali, yerekeza mu Mujyi wa Dar es Salaam muri Tanzaniya, aho igiye gukina Irushanwa rya CANA ZONE 3 Swimming Championship.

Abakinnyi bitabiriye iri rushanwa bakaba bazahatana mu ntera ya Metero 800 muri Pisine ndetse na 5000 mu Kiyaga.

Ni imikino igiye gukinwa ku nshuro ya yo ya karindwi (7), mu gihe u Rwanda rumaze kuyitabira inshuro enye (4) n’iyi ya gatanu (5) ruzaba rwitabiriye.

Uretse iyi mikino igiye kubera muri Tanzaniya, u Rwanda kandi rwitabiriye imikino nk’iyi yabereye mu gihugu cya Kenya mu Mwaka wa 2019.

Gusa, bitewe n’inkubiri zitandukanye z’Icyorezo cya Covid-19, yageze mu Isi mu Mwaka wa 2020, imikino nk’iyi yakinwe muri 2020 mu gihugu cya Tanzaniya na 2021 muri Uganda ntabwo Ikipe y’Igihugu yabashije kuyitabira.

Ntwabwo u Rwanda rwitabira imikino nk’iyi yabereye ahandi gusa, kuko mu Mwaka wa 2016 rwarayakiriye ibera mu Karere ka Bugesera kuri Pisine ya Hoteli La Palisse.

Ikipe y’igihugu ikaba yahagurukanye abakinnyi 5 ndetse n’umutoza wa yo, Niyomugabo Jackson.

Ishimwe Claudette: Cercle Sportif de Karongi
Maniraguha Eloi: Mako Sharks Swimming Club
Iradukunda Eric: Cercle Sportif de Karongi
Dusabe Claude: Cercle Sportif de Karongi
Neema Clemantine: Cercle Sportif de Karongi

Uretse aba bakinnyi bagiye guhatana, Bwana Bazatsinda James, Umunyamabanga w’Ishyirahamwe ry’Umukino wo Koga mu Rwanda 'Rwanda Swimming Federation’, na we yajyanye n’iri tsinda, aho biteganyijwe ko azahagararira Ishyirahamwe ry’Umukino wo Koga mu Rwanda mu nama izahuza abayobozi b’Amashyirahamwe agize CANA ZONE 3.

Iyi mikino izabera kuri Pisine y’Ikipe ya Gymkhana Club, iherereye mu Mujyi wa Dar es Salaam mu gihugu cya Tanzania guhera tariki ya 17 kugeza ku ya 20 Ugushyingo, 2022.

Ni imikino izitabirwa n’ibihugu 6, U Rwanda, Uganda, Burundi, Sudan, Eritrea na Tanzania izaba yakiriye iyi mikino.