Tag: Imikino

Ishyirahamwe ry’umupira w’amaguru ryamaze gutangaza ibisabwa kugira ngo amakipe y’icyiciro cya mbere atangire imyitozo, ni mu gihe nta kipe yemerewe kuba mu mwiherero nta ruhushya babiherewe na FERWAFA kandi bakubahiriza amabwiriza yo kwirinda icyorezo cya Coronavirus.

Mu ibaruwa yasinyweho n’umunyamabanga wa FERWAFA, Uwayezu Francois Regis yamenyesheje amakipe ko ikipe yifuza gutangira imyitozo igomba kugaragaza abakinnyi, staff technique n’itariki yifuza gutangiriraho imyitozo. Urwo rutonde kandi rugomba kuba ruherekejwe n’ibisubizo by’uko abagiye gutangira imyitozo bapimwe icyorezo cya Coronavirus byafashwe mu minsi 3 mbere yo gutangira imyitozo.

Ikipe igomba kugaragaza ikibuga izajya ikoreraho imyitozo n’aho ikipe izajya yakirira imikino, aha kandi bakagaragaza n’ingengabihe igaragaza igihe bazajya bakorera imyitozo.

Ikipe yifuza gushyira abakinnyi mu mwiherero igomba kwandikira FERWAFA ibisaba kandi ikubahiriza ibikubiye mu ngingo ya 2.3 y’amabwiriza yo kwirinda Coronavirus( aha amakipe agomba kubaho nk’uko yari abayeho mu mwaka ushize w’imikino, aho bose baba mu mwiherero hagira usohoka akagarukamo ari uko yamaze kongera gupimwa, n’ibindi).

Bivuze ko uyu mwaka w’imikino wa 2021-22 amakipe azajya akora imyitozo bataha mu ngo zabo.

Iyi baruwa kandi ivuga ko mu minsi iri imbere batangaza ingengabihe ya shampiyona, ni mu gihe shampiyona biteganyijwe ko izatangira tariki ya 16 Kanama 2021.

Abakinnyi bazajya bakina bataha

Umunya-Brésil Paulo De Tarso Milagres utoza ikipe y’Igihugu ya Volleyball mu bagabo n’abagore yafashe umwanzuro wo gusezerera abandi bakinnyi batandatu mu ikipe y’igihugu irimo kwitegura igikombe cty’Afurika kizabera mu Rwanda.

Hari hahamagawe abakinnyi 36 mu bagabo na 28 mu bagore aho batangiye umwiherero tariki ya 8 Kanama 2021.

Tariki ya 15 Kanama akaba yarafashe umwanzuro wo gusezerera abakinnyi 26 barimo 16 mu bagabo n’10 mu bagore, asigarana 20 mu bagabo na 18 mu bagore.

Nyuma nibwo Mukunzi Christophe yahise asohoka mu mwiherero w’ikipe y’igihugu, ni nabwo baje kongeramo Musoni Fred.

Ku munsi w’ejo akaba yarafashe umwanzuro wo gusezerera abandi batatu mu ikipe y’igihugu y’abagabo barimo Muvara Ronald, Gisubizo Merci na Musoni Fred.

Mu bagore yasezereye Niyomukesha Euphrance, Uwamariya Jacqueline na Hakizimana Judith.

Asigaranye 17 mu bagabo na 15 mu bagore bazatoranywamo(14 buri ruhande) abazakina igikombe cy’Afurika kizaba kuva tariki ya 5 n’iya 20 Nzeri 2021 muri Kigali Arena.

Abakinnyo bose basigaye

Ikipe y’igihugu y’abagore: Akimanizanye Ernestine, Dusabe Flavia, Igihozo Cyuzuzo Yvette, Mukandayisenga Benitha, Musaniwabo Hope, Mukantambara Séraphine, Ndagijimana Iris, Nyirahabimana Divine, Nzamukosha Olive, Nzayisenga Charlotte, Uwamahoro Béatrice, Uwiringiyimana Albertine, Munezero Valentine, Nyirarukundo Christine na Yankurije Françoise.

Ikipe y’igihugu y’abagabo: Nsabimana Mahoro Yvan, Dusabimana Vincent, Dusenge Wickliff, Kanamugire Prince, Mukunziza John, Mutabazi Yves, Murangwa Nelson, Karera Emile, Ndahayo Dieu Est Là, Rwigema Simon, Ndamukunda Flavien, Ndayisaba Sylvestre, Ngaboyintwari Cédric, Niyogisubizo Samuel, Sibomana Placide, Yakan Guma Lawrence na Akumuntu Kavalo Patrick.

Mutsinzi Ange yatanzweho ibihumbi 150 by'amadolari ya Amerika, ni ukuvuga hafi Miliyoni 150 z'amanyarwanda.

Mutsinzi yerekeje muri Portugal nyuma yo gutsindwa igeragezwa yari yagiyemo mu ikipe ya Oud-Heverlee Leuven yo mu Bubiligi.

Tariki ya 27 Nyakanga 2021, ni bwo myugariro Mutsinzi Ange yerekeje mu gihugu cy'u Bubiligi mu igeragezwa ryagombaga kumara Ibyumweru bibiri.

Ntabwo iri geragezwa ryagenze neza nk'uko Mutsinzi yabyifuzaga kuko byarangiye atsinzwe, ahita yerekeza muri Portugal mu ikipe ya CD Trofense, aho yasinye amasezerano y'umwaka umwe ushobora kongerwa bigendanye n'uko azitwara.

Nyuma yo gushyira umukono ku masezerano muri iyi kipe yo muri Portugal, Mutsinzi yagize ati “Nje mfite intego nyinshi, nzibanda ku gufasha ikipe yanjye kugera ku ntego zayo. Kuri njye ni ibintu bishya ariko ndizera ko mu minsi micye mba namaze kumenyerana na bagenzi banjye”.

Uyu mukinnyi yageze muri APR FC muri Nyakanga 2019, avuye muri Rayon Sports FC na yo yari amazemo imyaka ibiri nyuma yo kuva muri AS Muhanga yamenyekaniyemo.

Mutsinzi ari mu bakinnyi 39 bahamagawe n’umutoza Mashami Vincent mu ikipe y’igihugu Amavubi iri kwitegura imikino yo gushaka itike y’igikombe cy’Isi 2022.

Ange Mutsinzi wakiniraga APR FC yerekeje muri Portugal

Mutsinzi yasinye amasezerano y’umwaka umwe muri CD Trofense

Mutsinzi Ange yamaze gusinyira ikipe ya Clube Desportivo Trofense yo mu gihugu cya Portugal iri mu cyiciro cya Kabiri ikaba yarasoje shampiyona iri ku mwanya wa kane.

Mutsinzi Ange akaba yasinye imyaka ibiri muri iyi kipe nyuma yo gusoza amasezerano ye mu ikipe y’ingabo z’igihugu ya APR FC.

Bivugwa ko Mutsinzi yasinye muri iriya kipe aguzwe ibihumbi 150 USD ni ukuvuga agera muri Miliyoni 150 Frw.

Mutsinzi yishimiye iyi ntambwe yateye aho yanyujije ubutumwa kuri Twitter avuga ko ashimiye Imana kuri ibi bitangaza imukoreye.

Yagize ati “Iyo Imana yagusezeranyije ikintu, irakiguha. Igihe cyayo gihora ari ntamakemwa. Urakoze Mana.”

Bamwe mu nshuti za hafi z’uyu musore w’imyaka 23 y’amavuko, bari batangaje iby’amakuru yo gutsindwa igerageza mu ikipe yo mu cyiciro cya mbere mu Bubiligi, bari bavuze ko ari kugerageza mu yandi makipe amwifuza yo ku mugabane w’u Burayi.

Ange Mutsinzi uri mu bakinnyi bato batanga icyizere mu Rwanda, yari yerekeje mu Bubiligi gushaka ikipe nyuma y’uko arangije amasezerano ye muri APR FC yafashije kwegukana shampiyona ebyiri idatsinzwe.

UKWEZI.RW