Blog

Imihanda ya miliyari 39 Frw mu mihigo: Umwaka uzarangira iri kuri 5% na 15%

Isesengura ry'imihigo ya Minisiteri y'Ibikorwa Remezo, MININFRA, y'umwaka wa 2026/27 rigaragaza ko imishinga itanu y'imihanda ifite uburebure bwa kilometero hafi 149 yagenewe hamwe amafaranga agera kuri miliyari 39,4 Frw, nyamara biteganyijwe ko umwaka uzarangira imirimo yayo igeze hagati ya 5% na 15% gusa.

Iyo mihanda ni Kigali–Muhanga wa kilometero 45, Prince House–Giporoso–Masaka wa kilometero 10, Shyira–Vunga–Musanze–Cyanika wa kilometero 51,2, Kinigi–Kora wa kilometero 28, ndetse n'imihanda ibiri yo mu Mujyi wa Kigali ifite kilometero 14,73, ihuza Zindiro, Masizi, Birembo, Kami, Gasanze, Cyamitsingi na Bibare.

Kuba iyi mishinga izarangiza umwaka igeze ku gipimo gito ntibisobanuye ko nta bikorwa bizaba byarayikozweho. Gahunda ya MININFRA igaragaza ko kuri myinshi muri yo, 2026/27 uzaba ari umwaka wo kuyivana mu byiciro byo gutegura no gutanga amasoko, ikinjira mu mirimo nyir'izina y'ubwubatsi.

Mbere y'uko imashini zitangira imirimo ikomeye, hari amasoko agomba kurangira, amasezerano agasinywa, abaturage bafite imitungo izangizwa n'imishinga bakishyurwa, ibikorwa remezo birimo imiyoboro y'amazi, amashanyarazi n'itumanaho bikimurwa, ndetse n'abatsindiye amasoko bakabona aho bashyira ibikoresho n'abakozi.

Umuhanda Kigali–Muhanga ni umwe mu mishinga igaragaza neza uko ibyo byiciro bizagenda.

Kigali–Muhanga: Amasezerano y'ubwubatsi ashobora gusinywa mu gihembwe cya gatatu

Leta iteganya kuvugurura no kwagura kilometero 45 za mbere z'umuhanda mugari Kigali–Muhanga–Akanyaru ufite kilometero 157.

MININFRA yagennye hafi miliyari 6,36 Frw kuri uyu mushinga mu mwaka wa 2026/27.

Imibare igaragaza ko uyu mushinga utaratangira kubakwa kuko urwego uriho rugaragazwa nk'urw'inyigo irambuye aho kuba urw'imirimo y'ubwubatsi.

Mu gihembwe cya mbere cy'uyu mwaka w'ingengo y'imari biteganyijwe ko amasoko azaba akomeje, mu cya kabiri akazaba ageze kure, naho mu gihembwe cya gatatu hakazasinwa amasezerano yo kubaka.

Ni mu gihembwe cya kane gusa hateganyijwe gutangira kubona igipimo gifatika cy'imirimo y'ubwubatsi, umwaka wose ukazarangira umushinga ugeze ku 8%.

Ibi bivuze ko igice kinini cy'umwaka w'ingengo y'imari kizakoreshwa mu gushyiraho ibyangombwa byose bituma imirimo y'ubwubatsi itangira, aho kuba mu kubaka umuhanda ubwawo ku kigero kinini.

Mu bikorwa biteganyijwe harimo kurangiza amasoko no gutangira imirimo y'ubwubatsi. Uturere twa Nyarugenge na Muhanga tuzagira uruhare mu bukangurambaga no mu korohereza ibikorwa byo kwimura no kwishyura abaturage bazagirwaho ingaruka n'umushinga.

Gahunda y'imihigo ihura n'ibikorwa by'amasoko byari byaratangiye muri RTDA. Iki kigo cyatangaje isoko ry'imirimo yo kubaka Kigali–Muhanga ku wa 8 Kamena 2026, nyuma ku wa 4 Kanama 2026 gitangaza ko igihe cyo gutanga inyandiko z'ipiganwa cyongerewe.

Uyu mushinga uri mu igenzurwa rya RTDA binyuze muri gahunda yayo y'ubwikorezi bwo mu mijyi no guteza imbere imihanda ihuza u Rwanda n'akarere, ikubiyemo kandi umuhanda ugana ku Kibuga cy'Indege Mpuzamahanga gishya cya Bugesera, Nyacyonga–Mukoto na Prince House–Masaka.

Prince House–Giporoso–Masaka wagenewe amafaranga menshi kurusha indi mihanda

Umuhanda Prince House–Giporoso–Masaka ufite kilometero 10 ni wo ufite umwihariko ukomeye kurushaho.

Mu mwaka wa 2026/27, uyu mushinga wagenewe hafi miliyari 22,26 Frw.

Aya mafaranga yonyine arenga kimwe cya kabiri cy'ingengo y'imari ya miliyari 39,4 Frw yagenewe imishinga itanu y'imihanda twasesenguye turebye mu mihigo y'iyi minisiteri.

MININFRA iteganya ko uzagera kuri 6% mu gihembwe cya mbere, 8% mu cya kabiri, 12% mu cya gatatu, hanyuma ukarangiza umwaka ugeze kuri 15%.

Ibikorwa byo gutangiza nyir'izina kwagura uyu muhanda, biteganyijwe kuri uyu wa Kabiri.

Shyira–Vunga–Musanze–Cyanika

Umuhanda Shyira–Vunga–Musanze–Cyanika ufite kilometero 51,2 ni urundi rugero rugaragaza ko igice kinini cy'umwaka kizakoreshwa mu bikorwa by'amasoko.

Utangira umwaka wa 2026/27 ugeze kuri 0% y'imirimo y'ubwubatsi, ukaba wagenewe hafi miliyari 2,82 Frw.

MININFRA iteganya ko amasoko azatangizwa mu gihembwe cya mbere, agakomeza mu cya kabiri, naho amasezerano yo kubaka agasinywa mu gihembwe cya gatatu.

Umwaka wose uzarangira umuhanda ugeze kuri 5% gusa.

Uretse amasoko, RTDA igomba kwishyura abaturage bazagirwaho ingaruka n'umushinga ndetse igatangira gutegura aho imirimo izakorerwa, kuzana abakozi n'ibikoresho.

Uturere twa Musanze na Nyabihu duteganyijwe kugira uruhare mu korohereza ibikorwa byo kwimura no kwishyura abaturage, gukurikirana umushinga no gufasha mu gukemura ibibazo byavuka mu ishyirwa mu bikorwa.

Muri Kamena 2026 RTDA yongereye igihe cyo kwakira inyandiko z'abapiganira imirimo yo kuvugurura no kubaka kilometero 51,2 z'uyu muhanda.

Kinigi–Kora na wo uzarangiza umwaka kuri 5%

Umuhanda Kinigi–Kora, ufite uburebure bwa kilometero hafi 28. MININFRA yawugeneye hafi miliyari 4,57 Frw.

Utangira umwaka ugeze kuri 0%, mu gihe intego y'umwaka wose ari 5%.

Biteganyijwe ko amasoko azatwara ibihembwe bibiri bya mbere, amasezerano agasinwa mu gihembwe cya gatatu, naho imirimo ya mbere y'ubwubatsi igatangira mu gihembwe cya kane.

Imihanda ya Zindiro izagera kuri 10%

Undi mushinga uteganyijwe kumara igice kinini cy'umwaka mu bikorwa by'amasoko ni uwo kuvugurura imihanda ibiri yo mu Karere ka Gasabo.

Umuhanda wa mbere ufite kilometero 10,23, uva Zindiro unyuze Masizi, Birembo na Kami ukagera Gasanze, mu gihe undi ufite kilometero 4,5 uhuza Cyamitsingi, Bibare na Zindiro.
Yombi hamwe ifite kilometero 14,73.

Mu mwaka wa 2026/27, iyi mihanda yagenewe hafi miliyari 3,37 Frw.

Urwego iriho ubu rugaragazwa nk'urw'inyigo irambuye.

Amasoko azaba akomeje mu gihembwe cya mbere, ageze kure mu cya kabiri, amasezerano asinywe mu gihembwe cya gatatu.

Nyuma yaho ni bwo imirimo izatangira, umwaka ukazarangira umushinga ugeze kuri 10%.

Akarere ka Gasabo kazagira uruhare mu korohereza ibikorwa byo kwimura no kwishyura abaturage, mu gihe RTDA izaba ishinzwe amasoko no gutangiza imirimo y'ubwubatsi.

Base–Butaro–Kidaho wo ufite ikibazo gitandukanye n'indi

Umuhanda Base–Butaro–Kidaho wo ufite umwihariko utandukanye n'indi.

Uyu muhanda ufite kilometero 63 ntabwo utangirira kuri zeru.

Imihigo ya 2026/27 igaragaza ko ugeze kuri 57,1%, ukaba wagenewe hafi miliyari 8,29 Frw muri uyu mwaka.

Icyakora, MININFRA iteganya ko uzakomeza kuba kuri 57,1% mu gihembwe cya mbere, icya kabiri n'icya gatatu, hanyuma ukagera kuri 60% gusa mu mpera z'umwaka.

Mu Ugushyingo 2024, RTDA yatangaje ko umuhanda Base–Butaro–Kidaho wari ugeze kuri 38,2%, icyo gihe ikavuga ko wari uteganyijwe kurangira mu mpera za 2025.

Raporo yakurikiyeho y'ishyirwa mu bikorwa ry'ingengo y'imari ya Leta yagaragaje ko mu gihembwe cya mbere cya 2025/26 umushinga wari ugeze kuri 55,3%, urenze gato intego ya 55% yari yarashyizweho.

Gahunda nshya ya 2026/27 ishyira aho umushinga ugeze kuri 57,1%, ariko ikagaragaza ko nta terambere rinini ry'imirimo riteganyijwe mbere y'uko isoko rishya rirangira.

Uyu muhanda ufite akamaro kanini mu Ntara y'Amajyaruguru, unyura mu Turere twa Rulindo na Burera, ukoroshya ingendo zijya i Butaro no ku bikorwa remezo bikomeye birimo Ibitaro bya Butaro ndetse na University of Global Health Equity.

Si imihanda yose minini izagenda gahoro

Kuba hari imishinga izarangiza umwaka igeze ku gipimo gito ntibikwiye gufatwa nk'ikimenyetso cy'uko gahunda yose y'u Rwanda yo kubaka imihanda izagenda gahoro muri 2026/27.

Hari indi mishinga iri muri gahunda imwe ya MININFRA ifite intego zikomeye cyane.

Umuhanda Ngoma–Ramiro ufite kilometero 52,8, urugero, utangira umwaka ugeze kuri 71,6%, ukaba uteganyijwe kugera kuri 100%.

Imirimo y'inyongera ku gice cya Base–Rukomo cya kilometero 15,5 hagati ya Byumba na Ngondore izava kuri 50% igere kuri 100%.

Umuhanda Nyacyonga–Mukoto wa kilometero 36 uteganyijwe kuva kuri 56% ukagera kuri 95%.
Imihanda Masaka–Kabukuba–Riziyeri na Kabukuba–Nyamata/Gahembe–Kindama izava kuri 5% igere kuri 60%.

Umuhanda Bugarama–Bweyeye ufite kilometero 60,11 n'uwa Kazabe–Rutsiro ufite kilometero 55,3, yombi izatangira kuri zeru ariko iteganyijwe kugera kuri 30% mu mwaka umwe.

Perezida Kagame yasuye Inzu Ndangamurage ya Frankincense Land, aho yatemberejwe mu byumba bitandukanye byayo, anasobanurirwa mu buryo burambuye ibyerekanwa bigaragaza amateka n'umurage ndangamuco bya Oman.

Iyi nzu ndangamurage igaragaza amateka maremare ya Oman, umuco n'imigenzo byaranze iki gihugu uko ibihe byagiye bihinduka, igafasha abayisura gusobanukirwa inkomoko yacyo n'umurage kimaze ibinyejana gisigasira.

Perezida Kagame kandi yasuye Ubworozi n'Ubuhinzi bwa Royal Razat, aho yagaragarijwe uburyo Oman iri kuvugurura urwego rw'ubuhinzi.

Yasobanuriwe amateka y'aho hantu, intego zabwo, ibikorwaremezo ndetse n'ibikoresho bikoreshwa mu guteza imbere umusaruro w'ubuhinzi n'ubworozi.

Royal Razat ikoresha uburyo bugezweho mu buhinzi n'ubworozi, ariko umwihariko wayo ni uko itagarukira gusa ku gutanga umusaruro. Yanashyizweho ku buryo ubuhinzi buhuzwa n'ubukerarugendo.

Binyuze muri ubu buryo buzwi nka agritourism, ibikorwa by'ubuhinzi bihindurwa kimwe mu bikurura ba mukerarugendo, bikanafasha urwego rw'ubuhinzi kugira uruhare rwagutse mu guteza imbere ubukerarugendo n'ubukungu.

Ibi biri mu murongo wa gahunda ya Oman yo kuvugurura no guteza imbere ubuhinzi, ikanashaka uburyo bushya bwo kongera agaciro k'ibikorwa bikorerwa muri uru rwego.

Ni amasezerano yasinyiwe mu ruzinduko Perezida Kagame yagiriye muri Oman.

Aya masezerano yasinywe ku wa Kabiri, tariki ya 8 Nzeri 2026, mu Ngoro ya Al Hosn i Salalah, aho Perezida Kagame yagiriye ibiganiro na Sultan Haitham bin Tarik.

Gusinya aya masezerano byakurikiye ibiganiro byo ku rwego rwo hejuru byahuje abayobozi bombi ku munsi wabanje, byibanze ahanini ku buryo umubano w'u Rwanda na Oman warushaho kwinjira mu cyiciro cy'ubufatanye bushingiye ku bukungu n'ishoramari.

Amasezerano abiri yashyizweho umukono arimo ajyanye no gukuriraho visa abafite pasiporo za dipolomasi, iz'akazi ka Leta n'izidasanzwe, ndetse n'amasezerano agamije gukuraho gusoresha kabiri.

Inyandiko esheshatu z'imikoranire zasinywe zo zireba ubuhinzi; ibijyanye n'ubwikorezi n'ibikoresho birimo guteza imbere ibyambu no guteza imbere serivisi zijyanye n'uruhererekane rw'ibicuruzwa; guteza imbere ishoramari; umurimo; ubufatanye bw'igihe kirekire ku rwego rw'ingamba; ndetse no gushyira mu bikorwa no kwihutisha ishoramari.

Amasezerano ajyanye no gukuraho visa ntabwo asobanuye ko Abanyarwanda n'Abanya-Oman bose bashobora gutemberana hagati y'ibihugu byombi nta visa. Yibanda by'umwihariko ku bafite pasiporo za dipolomasi, iz'akazi ka Leta n'izidasanzwe.

Ni intambwe ikomeye kuko ikuraho zimwe mu mbogamizi zo mu rwego rw'ubuyobozi ku bayobozi n'abandi bafite izo pasiporo, mu gihe ingendo n'imikoranire hagati ya Guverinoma zombi bigenda birushaho kwiyongera.

Amasezerano yo kwirinda gusoresha kabiri agamije gutuma inyungu cyangwa amafaranga umuntu cyangwa ikigo cy'ubucuruzi cyinjije mu bihugu bibiri adasoreshwa kabiri, ndetse akanagena neza igihugu gifite ububasha bwo gusoresha ubwoko runaka bw'amafaranga yinjiye.

Mbere y'uruzinduko rwa Perezida Kagame, Minisiteri y'Ubukungu ya Oman yari yagaragaje ko u Rwanda rushobora kuba irembo ry'ishoramari ry'abashoramari bo muri Oman bashaka kugera ku isoko ryo muri Afurika y'Iburasirazuba.

Mu byiciro by'ubukungu byagaragajwe nk'ibifite amahirwe harimo ubukerarugendo n'amahoteli, ubuhinzi, ubucukuzi bw'amabuye y'agaciro, ubuzima n'imiti, ikoranabuhanga n'itumanaho, ibyanya byahariwe ibikorwa by'ubukungu ndetse n'ibikorwaremezo.

Kimwe mu bimenyetso bigaragara cyane by'umubano ugenda ukomera ni ishyirwaho ry'ingendo z'indege hagati ya Kigali na Muscat.

Muri Nyakanga 2026, SalamAir yatangiye ingendo z'indege zitaziguye hagati y'imijyi mikuru y'ibihugu byombi, zikaba zikorwa kabiri mu cyumweru.

Abayobozi ba Oman bagaragaje ko iyo nzira ari ingenzi mu guteza imbere ubukerarugendo, ubucuruzi n'ishoramari hagati y'u Rwanda na Oman.

Izi ngendo zifite agaciro karenze gutwara abagenzi gusa.

Kugira ngo ubucuruzi n'ishoramari bikure, abashoramari n'abayobozi bakeneye uburyo bworoshye kandi buhoraho bwo kugenda hagati y'ibihugu byombi.

Indege zishobora kandi guteza imbere ubucuruzi bw'ibicuruzwa bifite agaciro kanini cyangwa bisaba kugera ku isoko vuba, ubukerarugendo n'ingendo z'ubucuruzi.

Zishobora kandi guhuza Kigali, binyuze muri Oman, n'andi masoko yo mu Kigobe Oman iherereyemo, Aziya no mu Burasirazuba bwo Hagati.

Ku ruhande rwa Oman, u Rwanda rushobora kuyifungurira isoko ryo muri Afurika y'Iburasirazuba riri kugenda rirushaho kwihuza.

Umukinnyi wa filime Nyarwanda, Mukazayire Djalia Nelly wamamaye nka Kecapu yavuze ko mu buzima bwe ashimira Benimana Ramadhan [Bamenya] kuko yamugize uwo ari we uyu munsi.

Kecapu yamenyekanye cyane muri filime y’uruhererekane ya ‘Bamenya’ ya Benimana Ramadhan na we akinamo yitwa Bamenya.

Mu kiganiro yagiranye n’ikinyamakuru ISIMBI, Kecapu yavuze ko umuntu ashimira mu buzima bwe ari Bamenya kuko yamufashe akaboko.

Ati “Ni Bamenya. Impamvu mpisemo Bamenya yamfashe akaboko atuma mba Kecapu wa wundi izina rigaburira, kuva igihe narifatiye kugeza uyu munsi.”

“Rero Bamenya yamfashe akaboko na mbere hose bitarakunda akajya anjyana nkabona n’ayo mafaranga iryo zina ritaraza. Kugera aho izina rije, ibaze kuva icyo gihe imyaka Bamenya imaze kugera uyu munsi, hari amafaranga ndya kuko nitwa Kecapu. Rero umuntu nshimira mu buzima bwanjye, ni we pe.”

Yakomeje amubwira ko amushimira cyane ndetse ko nta mpano abona yamuha uretse kumusabira umugisha ku Mana.

Ati “Benima, ndagushimira, hari benshi wari uzi, hari benshi mwari muziranye wari bufate akaboko ukagira aho ubageza, ukabikora nk’uko wabikoze, njya ntekereza ko yamfashe akaboko avuga ngo reka ibi bintu tubijyemo afite ibyo atekereza, uyu Nelly arakuramo amafaranga ariko nkeka atatekerezaga ko bizagera aha.”

Yakomeje agira ati “Warakoze! Njye nk’umuntu nta mafaranga runaka naguha, nta kintu runaka nakuzanira nko kugushimira, mpora ngusabira umugisha kwa Nyagasani. Icyiza cya Benimana iyo abonye ntabwo yibagirwa abari inyuma, arazirikana uko azirikana ni nako nanjye muzirikana, ni byinshi cyane tuziranyeho, Imana ijye imuha umugisha, imurinde kuba mu banyabihombo.”

Kecapu kandi yavuze ko iyo adahura na Bamenya ubu ashobora kuba yari atakiba mu Rwanda yaragiye gushakira ubuzima hanze y’u Rwanda.

Kecapu yashimiye Bamenya

Al Hilal SC yemeye korohereza Rayon Sports kwimura amasaha y’umukino wayo na Aigle Noir nyuma y’uko aya makipe yisanze agomba gukinira ku kibuga kimwe, umunsi umwe n’amasaha amwe.

Ku wa Gatandatu tariki ya 12 Nzeri 2026 nibwo Al Hilal SC izakira Aigle Noir yo mu Burundi ni mu gihe na Rayon Sports izakina na Panthere Sportive yo muri Cameroun.

Iyi mikino yose yo kwishyura y’imikino Nyafurika ikaba iteganyijwe kubera kuri Stade Amahoro aho yari no ku isaha imwe.

Haje kubaho ikibazo aho muri CAF Al Hilal SC yatanze ko izakinira muri Stade Amahoro ni mu gihe Rayon Sports yo yari yaratanze ko izakinira Kigali Pele Stadium, nyuma iza guhindura itwara umukino muri Stade Amahoro.

Yaje gusaba Al Hilal SC ko yakwimura amasaha igakina saa 15h ariko mu nama yahuje aya makipe ejo hashize, yabiteye utwatsi ibabwira ko bidashoboka ni mu gihe na Rayon Sports nayo itabikozwa guhindura isaha.

Ibiganiro bikaba byaje gukomeza aho kugeza ubu Al Hilal SC yemeye kuzana umukibi saa 15h00′ maze Rayon Sports ikaba izakina nyuma saa 18h00′.

Al Hilal SC yorohereje Rayon Sports

Rutahizamu w’umunyarwanda ukinira Rayon Sports, Muhoza Daniel arifuzwa bikomeye n’ikipe ya Rijeka ikina icyiciro cya mbere muri Croatia.

Uyu mukinnyi ukina asatira anyuze ku mpande, ari ku mwaka we wa mbere muri Rayon Sports aho yayigezemo avuye muri Etoile del’Est.

Muhoza Daniel ntabwo byamutwaye igihe kwigarurira imitima y’abakunzi b’iyi kipe kuko kugeza ubu ni umwe mu bakinnyi bakunzwe cyane muri iyi kipe yambara ubururu n’umweru.

Amakuru ISIMBI yamenye ni uko Muhoza Daniel yamaze kubona ikipe yamubengutse ya Rijeka aho ikina mu cyiciro cya mbere muri Croatia.

Yifuza ko yajya gukorayo igeragezwa yaritsinda maze bagahita bamugura amafaranga menshi, gusa kugeza ubu Rayon Sports ntabwo irabyumva, ivuga ko nta mukinnyi wayo ukora igeragezwa.

Muhoza Daniel ni umwe mu bakinnyi babengutswe na Rayon Sports nyuma yo kugira umwaka mwiza w’imikino ushize na Etoile del’Est mu cyiciro cya kabiri aho yanayifashije kuzamuka mu cyiciro cya mbere.

Igihe gito amaze muri Rayon Sports, ni umukinnyi wemeje umutoza Haringingo Francis Christian aho abamwegereye bavuga ko yanatangiye gutekereza ukuntu Daniel yagenda amwinjiza muri 11 babanza mu kibuga cyane ko abona ko umusaruro atanga abikwiye.

Muhoza Daniel arifuzwa na Rijeka

Umuhanzi w’Umurundi, Kidum Kibido yatabarije Abanyarwanda n’Abarundi barimo guhohoterwa muri Kenya.

Muri Kenya hamaze iminsi ibikorwa byafashwe nk’urugomo aho ibikorwa byinshi b’abanyamahanga muri iki gihugu bisenywa.

Mu butumwa yanyujije ku mbuga nkoranyambaga yavuze ko Abarundi n’Abanyarwanda batamerewe neza muri Kenya.

Ati “Ndi umurindi, kuri ubu ndi mu bitaramo bizenguruka Canada. Kenya ni mu rugo guhera mu 1995 kandi nahisemo kuba Umunya-Kenya n’umutima wanjye wose, umugore wanjye ni Umunya-Kenya kandi twasezeranye byemewe n’amategeko dufite abana ubu bari ku ishuri muri Kenya.”

Yakomeje avuga ko amafoto arimo kwakira avuye Nairobi ata meze atazi icyo Abarundi n’Abanyarwanda bakoze.

Ati “Amafoto ndimo nakira avuye Nairobi ntabwo ari ari meza. Ni iki Abarundi n’Abanyarwanda bakoze kugira ngo bafatwe uku? Amandazi, icyayi n’ikawa ni icyaha? Ambasade ikwiye guhagarara ku bantu bacu byibuza bakagera mu rugo amahoro n’icyubahiro?”

Yakomeje avuga ko afite imodoka ijyamo abantu 11 yayitanga ikajya igeza abantu mu ngo zabo.

Kidum kandi yasabye Imana gufasha Abarundi niba koko izi ko hari ikintu yigeze afasha abantu ku mushahara muke ahembwa.

Yakomeje avuga ko abizi neza bishobora kumutwara ubuzima ariko ngo bibe.

Ati “Ndabizi ko bishobora kuntwara ubuzima ariko ntacyo bibe. Abarundi mu Burundi ntimugire Umunya-Kenya mukoraho mu Burundi. Ntimwibeshye kuko abandi barimo kugukorera ibintu bibi. Abantu babiri bayobye ntibyahinduka ukuri.”

Yasoje avuga ko ibintu biri Politike byakemurwa mu buryo bwa Politike bitavanzwemo abasivile.

Kidum yatabarije Abanyarwanda n’Abarundi baba muri Kenya

Ni ubwa mbere Perezida w'u Rwanda agiriye uruzinduko rwemewe muri Oman, rugamije kurushaho gushimangira umubano hagati y'ibihugu byombi no kwagura inzego z'ubufatanye.
Uruzinduko rwatangijwe n'umuhango wo kwakira Perezida Kagame.

Kagame na Sultan Haitham bin Tariq bagiranye ibiganiro, binakurikirwa n'ibiganiro bihuza intumwa z'ibihugu byombi. Ibyo biganiro birimo kwibanda ku gushimangira umubano usanzwe hagati y'u Rwanda na Oman no kurebera hamwe izindi nzego ibihugu byombi byakwaguriramo ubufatanye.

Ku munsi wa kabiri w'uruzinduko, Perezida Kagame ateganyijwe gusura Museum of the Frankincense Land, iherereye muri Al Baleed Archaeological Park, ahantu hashyizwe ku rutonde rw'Umurage w'Isi rwa UNESCO.

Iyo nzu ndangamurage igizwe n'ibice bibiri by'ingenzi. Heritage Hall yibanda ku mateka y'ibisigaratongo, umurage w'akarere ndetse n'uruhare ubucuruzi bwa frankincense bwagize ku mibereho n'ubukungu bw'akarere ka Dhofar. Maritime Hall yo igaragaza amateka ya Oman mu bijyanye n'ingendo n'ubucuruzi bwo mu nyanja.

Perezida Kagame azanasura Razat Royal Farm, umurima wa cyami ufite ubuso burenga hegitari 404.686. Ni kimwe mu bigo by'ingenzi by'ubuhinzi muri Dhofar Governorate, kandi unifashishwa mu bukerarugendo bushingiye ku buhinzi no mu bikorwa by'uburezi.

Sultan Haitham bin Tariq azakira Perezida Kagame n'intumwa ze mu musangiro.

U Rwanda na Oman bisanzwe bifitanye umubano ushingiye ku mateka. Muri uru ruzinduko kandi hateganyijwe gusinywa amasezerano n'inyandiko z'ubwumvikane mu nzego zitandukanye, mu rwego rwo kurushaho kwagura ubufatanye hagati y'ibihugu byombi.