Blog

Mu Karere ka Huye hategerejwe iserukiramuco ry’ubuhanzi ryiswe Siga Arts Festival riteganyijwe kumara iminsi itatu kuva ku wa 19 kugeza ku wa 21 Werurwe 2026, rikazahuriza hamwe abahanzi batandukanye n’abakunzi b’imyidagaduro.

Iri serukiramuco rigiye kuba ku nshuro ya mbere ryateguwe na sosiyete Siga Rwanda yashinzwe n’umusizi Rumaga Junior.

Mu kiganiro yagiranye na ISIMBI, uyu musizi yavuze ko iki gikorwa kigamije guteza imbere ubuhanzi mu Rwanda no kubuha urubuga rugera ku baturage benshi.

Rumaga yavuze ko bahisemo gutangiriza iri serukiramuco i Huye kubera amateka akomeye aka karere gafite mu muco n’amateka by’u Rwanda.

Yagize ati 'Ni iserukiramuco rizajya rizenguruka igihugu, ariko Huye ni ho rizajya ritangirira. Turashaka ko ubuhanzi butagarukira mu nzu z’imyidagaduro gusa, ahubwo bukagera mu baturage bose.'

Mu bahanzi bategerejwe gususurutsa abazaryitabira harimo Massamba Intore, Riderman, Element Eleeeh, Juno Kizigenza, Alyn Sano, Mani Martin, Christopher Muneza, Kevin Kade, Bwiza, Rusine Patrick na Jules Sentore n’abandi benshi.

Ku munsi wa mbere w’iri serukiramuco hazabaho urugendo ruzahagurukira i Kigali rugana i Huye, aho abazaryitabira bazajya bahagarara ahantu hatandukanye biga amateka n’umuco by’u Rwanda ari na ko basusurutswa n’abahanzi.

Ku wa 20 Werurwe hateganyijwe igikorwa cyiswe 'Intambwe ya Nyirarumaga', kigamije kuzirikana no gushimira uruhare rw’abagore mu buhanzi, mu muco no mu iterambere ry’igihugu, cyane ko ukwezi kwa Werurwe kwahariwe kuzirikana abagore.

Abazitabira iri serukiramuco bazanasura Umusozi wa Kiruri Hill uherutse guhabwa Rumaga Junior kugira ngo awubyaze umusaruro mu bikorwa by’ubuhanzi n’ubukerarugendo.

Umunsi wa nyuma, ku wa 21 Werurwe 2026, hazaba igitaramo gikomeye kizasoza iri serukiramuco kikazabera kuri Sitade ya Kaminuza y’u Rwanda Ishami rya Huye.

Huye hagiye guhurira iserukiramuco rizahuza ibyamamare

Rutahizamu wa Burnley mu Bwongereza wifuzwa n’ikipe y’igihugu Amavubi, Ndayishimiye Mike Trésor ategerejwe i Kigali aho azaba aje gusura u Rwanda.

Uyu rutahizamu umaze igihe wifuzwa n’u Rwanda ariko akaba yarakiniye ikipe y’igihugu y’u Bubiligi, gusa yahamagawe rimwe ntibongeye kumuhamagara hakaba hari amahirwe ko yazakinira u Rwanda.

U Rwanda rukaba ruri mu biganiro n’uyu mukinnyi ngo abe yaza kurukinira ariko ibiganiro bikaba bitararangira ahubwo murumuna we Ndayishimiye Matteo ukinira KVC Wilrijk yo mu Bubiligi we yarahamagawe.

Perezida wa FERWAFA, Shema Fabrice yavuze ko Mike Trésor azaza mu Rwanda kureba murumuna we mu mikino ya FIFA Series izabera mu Rwanda guhera tariki ya 26 Werurwe 2026.

Mike Trésor akaba atazaza mu Rwanda wenyine ahubwo azazana na nyina aho bazaba baje gutembera no kureba u Rwanda, ibi bishobora kuzagira ingaruka ku biganiro u Rwanda rurimo kugirana n’uyu mukinnyi.

Ati 'Hari murumuna wa Trésor, umuntu w’icyitegererezo kuri we ni mukuru we Mike Trésor, yaradusabye aratubwira ngo we na mama we byibuze baza bakanareba n’u Rwanda? Bakareba n’ukuntu FIFA Series iteguwe, bakanareba n’Amavubi?'

'Nabo turacyari mu biganiro bigeze kure nubwo muri iyi FIFA Series bitabashije gukunda ariko turibaza naza akareba n’u Rwanda ukuntu babafata neza, akareba murumuna we akina, na we azavuga ngo reka nanjye nzagusange ubutaha, twizera kuzagira Mike Trésor mu mikino iri imbere, gusa kuri iyi nshuro azaza aherekeje murumuna we.'

Amakuru ISIMBI yamenye ni uko Mike Trésor na we yifuzaga kuza gusura u Rwanda akareba igihugu cyimwifuza ko yagikinira ndetse akaba anatekereza ko nubwo atakinira u Rwanda ariko akaba yahagira n’ibikorwa byafasha mu kuzamura impano z’abakiri bato.

Mike Tresor agiye kuza mu Rwanda

Ubu impaka ni zose, bamwe baribaza impamvu umunyezamu Kwizera Olivier atahamagawe mu bakinnyi b’Ikipe y’Igihugu izakina imikino ya gicuti ya 'FIAFA Series’ kandi ari umwe mu banyezamu bakina kandi bahagaze neza.

Ejo hashize ni bwo hahamagawe urutonde rw’abakinnyi 31 bazifashishwa muri iyi mikino ntabwo hagaragayemo umunyezamu Kwizera Olivier wa Rayon Sports umwe mu bahagaze neza uyu munsi.

Eric Nshimiyimana, umutoza wungirije akaba yabwiye itangazamakuru ko impamvu yasizwe ari uko adahagaze neza kuko nubwo afatira Rayon Sports ariko inshuro nyinshi iyo agonganye n’umukinnyi gato ahita agwa bakajya kumuvura kandi bikaba inshuro nyinshi.

Ibi ntabwo itangazamakuru ryabyemeye rikomeza kugaragaza ko yagakwiye guhamagarwa, perezida wa FERWAFA, Shema Fabrice yahise avuga ko bagiye kumuha umwanya maze umutoza akazamureba na we.

Umutoza mukuru Stephen Constantine yahise abyamaganira kure avuga ko 'Sinjye wahamagaye ni Eric wahamagaye, rero abo yahamagaye ni abo. Buri wese hano afite umukinnyi yakongeramo rero, urumva buri umwe amuvuze ntabwo twava hano.'

Kwizera Olivier arazira iki?

Nta muntu ushidikanya ku mpano ya Kwizera Olivier, gusa amakuru ISIMBI yagerageje gushakisha ni uko uyu mukinnyi bimwe mu byo azira harimo n’ibyo hanze y’ikibuga.

Kimwe mu bintu ISIMBI yamenye ni uko ubwo aheruka mu ikipe y’igihugu Amavubi mu Gushyingo 2025 yagaragaweho n’imyitwarire itari myiza ari nayo mpamvu atigeze akinishwa umukino n’umwe wa gishuti.

Ikindi amakuru avuga ko abatoza bagerageje gushakisha amakuru basanga ari umukinnyi wibera mu Isi ye, nta kintu na kimwe yitaho ku buryo no muri Rayon Sports bashyizeho umuntu ugomba kumumenyesha gahunda zose.

Bivugwa ko hari umuntu bahorana umunsi ku munsi w’inshuti ye umubwira igihe cy’imyitozo, imyenda bari bukoreshe, aho umwiherero ubera, igihe cy’umukino n’ibindi ibi abatoza bakaba barasanze bishobora kugorana kubona umuntu umukurikirana muri ubwo buryo.

Mu busesenguzi bakoze kandi ni uko basanze uko guhora aryama mu mukino biterwa n’imiterere y’umubiri we aho ananutse cyane bituma buri uko aguye ahita ababara kubera ko umubiri we udafite inyama nyinshi ku buryo buri kantu kabaye biba bimeze nk’aho ari amagufa gusa, ikirenze kuri ibyo ngo ntabwo akunda kurya yarabyanze.

Hejuru y’ibyo abatoza banagize impungenge ku mikinire ye, ni umunyezamu ukunda gukinisha amaguru cyane, agacenga bituma akora amakosa cyane ku buryo hari n’imipira bajya bamwambura bishobora no gutuma yatsindisha ikipe.

Kwizera Olivier ntabwo yahamagawe biteza impaka nyinshi

Muchoma yahishuye ko iminsi aherutse kumara muri gereza yamuhaye umwanya wo gutekereza cyane ku buzima bwe bwite, by’umwihariko ku bijyanye no kubaka umuryango.

Umuhanzi Nizeyimana Didier uzwi ku izina rya Muchoma yavuze ko igihe yari afunze cyatumye asubiza amaso inyuma agatekereza ku mubano afitanye n’umukunzi we, ndetse atangira gutekereza ku gufata icyemezo cyo kurushinga.

Uyu muhanzi yavuze ko mbere atatekerezaga vuba ku gushaka, kuko yabonaga ari icyemezo kigomba gufatwa umuntu amaze imyaka myinshi yishimira ubuzima.

Yagize ati 'Hari ukuntu najyaga mbwira abavandimwe banjye ko umusore atagomba gushaka atarageza nk’imyaka 35, amaze kwishimira ubuzima ndetse yarabonye abakobwa benshi. Ariko ubu imyumvire yarahindutse, kuko ntituzi ibizaba ejo.'

Muchoma yavuze ko ubuzima yanyuzemo mu minsi ishize bwamwigishije ko gutinza icyemezo cyo kubaka urugo bishobora kugira ingaruka ku mubano w’abakundana.

Yasobanuye ko iyo umusore akomeza gusubika icyemezo cyo kurushinga, bishobora gutuma umukobwa bakundana atakimushyigikira uko bikwiye mu bihe bikomeye.

Ati 'Iyo umusore akomeza gutinza gufata icyemezo cyo kurushinga, we aba yumva nta kibazo. Ariko iyo ugeze mu bihe bikomeye nk’ibyo nanyuzemo, ubona ko n’uwari umukunzi wawe ashobora kugushyigikira mu buryo budahagije kuko ari byo wamuteyemo.'

Uyu muhanzi aherutse gushyira hanze indirimbo nshya yise 'Seuvre', avuga ko ari imwe mu mishinga mishya ari gukora mu muziki nyuma y’ibihe bikomeye aherutse kunyuramo.

Mu cyumweru gishize, Urukiko Rwisumbuye rwa Nyarugenge rwategetse ko Muchoma hamwe na bagenzi be barimo Mazimpaka Patrick, Nkeramihigo Japhet na Tumukunde Djuma barekurwa bagakurikiranwa badafunze.

Aba bose bareganwa na Barafinda Sekikubo Fred ku byaha bifitanye isano no gukwirakwiza amakuru y’ibihuha banyujije ku mbuga nkoranyambaga, cyane cyane kuri YouTube.

Muchoma yavuze ko iminsi yamaze afunzwe byatumye atekereza ku kuba yashinga urugo

Rayon Sports yanganyije na Al Merrikh SC mu mukino w’umunsi wa 24 wa Shampiyona y’icyiciro cya mbere mu Rwanda ya 2025-2026.

Ni umukino wabaye mu ijoro ryo kuri uyu wa Mbere tariki ya 16 Werurwe 2026 kuri Kigali Pelé Stadium.

Ni umukino amakipe yombi yari yafashe nk’ukomeye kuko buri bikipe hari icyo byagombaga guhindura uko ahagaza ku rutonde rwa Shampiyona aho Rayon Sports yari kwisubiza umwanya wa gatatu, Al Merrikh SC igafata umwanya wa kabiri.

Ni umukino waranzwe no guhangana ku mpande zombi, aho Al Merrikh SC yabonye amahirwe atandukanye ariko umunyezamu Kwizera Olivier ababera ibamba.

Ni nako Rayon Sports yananiwe kubyaza umusaruro amahirwe yabonye maze umukino urangira ari ubusa ku busa.

Nyuma yo kunganya uyu mukino Al Merrikh SC yagumye ku mwanya wa 3 n’amanota 45 inganya na Al Hilal SC ya kabiri ku rutonde ruyobowe na APR FC ifite 46, Rayon Sports ni iya 5 n’amanota 39, Police FC ya kane ifite 40.