Blog

Mu nama nyunguranabitekerezo yabaye kuri uyu wa 18 Werurwe 2026 ku rwego rw'Intara y'Amajyepfo, aho yahuje inzego zitandukanye barebera hamwe uko bashyira imbaraga mu kurwanya Imirire mibi n'igwingira mu bana bato, Minisitiri w'Uburinganire n'Iterambere ry'Umuryango, Uwimana Consolée yashimye Akarere ka Nyaruguru na Ruhango ku kugabanya imirire mibi n'igwingira, agaya Kamonyi ku kudohoka, avuga ko bibwiye ko bageze iyo bajyaga.

Minisitiri Uwimana Consolée, avuga ko imirire mibi n'igwingira atari ikibazo cy'ubuzima gusa, ko ahubwo ari ikibazo kigira ingaruka ku mibereho myiza y'abaturage ndetse no ku iterambere ryacyo muri rusange. Ati' Uru ni urugamba rutwereka inshingano zikomeye dufite zo kurengera abana, ubu n'ejo hazaza habo, rukaba rusaba ubufatanye n'imbaraga za buri wese'.

Avuga ko umwana ugwingiye agira imbogamizi nyinshi zirimo; kudashobora kwiga ngo atsinde neza mu ishuri, Kudakura neza mu gihagararo no mu marangamutima, kutagira amahirwe yo kwinjira ku isoko ry'umurimo nk'abandi, ari nabyo bituma adashobora kwiteza imbere nkawe, Umuryango we ndetse n'Igihugu muri rusange.

Nk'uko imibare y'ubushakashatsi bwakozwe ku mibereho n'Ubuzima ibigaragaza, Minisitiri Uwimana Consolée avuga ko ku rwego rw'Igihugu kugabanya Imirire mibi n'Igwingira mu bana bato bigeze kuri 27%, bivuye kuri 33% mu mwaka wa 2020.

Avuga ko ikibazo cy'Imirire mibi n'Igwingira mu Ntara y'Amajyepfo bikiri ikibazo gikomeye, aho zimwe mu mpamvu zibitera ngo zishingiye ku; Imyumvire n'Ubumenyi buke ku birebana n'indryo abana bahabwa, Ibibazo by'amazi ataragera ahantu hose, Isuku n'isukura bidahagije, Ibibazo by'Ubukungu bigira ingaruka ku mibereho y'abantu ariko no kugira ibiribwa bitunga abantu.

Minisitiri Uwimana, yashimye Akarere ka Ruhango ndetse na Nyaruguru bagabanije ku kigero gishimishije ku mibare y'Imirire mibi n'Igwingira mu bana bato. Ruhango yagabanije 16,5%, mu gihe Nyaruguru yagabanije 15,2%. Yakomeje avuga ko kuba utu turere twarabikoze bigakunda, byerekana ko n'ahandi bishoka.

Yasabye kandi buri Karere kwicara kagakora isesengura ry'ibibazo gafite kuko nta kabihuje n'akandi, ari nako hafatwa ingamba zigendanye n'ibibazo bihari. Yasabye ko ababikoze babera abanda ishuri. Ati' Ni ngombwa kandi kwigiranaho, hari abafite ibyo bakoze dushobora kwigiraho mu turere hirya no hino'.

Yanenze Akarere ka Kamonyi ku kuba karasubiye inyuma mu guhangana n'Imirire mibi n'Igwingira. Ati' Akarere ka Kamonyi twari tuzi neza ko gahagaze neza mu Gihugu muri 2020, kari gafite 22,5%, kagomba kuba karatekereje ko kageze iyo kajyaga karatuza mu myaka itanu ishize, kagabanijejo 1,4%'.

Safari Emmanuel, Umunyamabanga Nshingwabikorwa w'Impuzamiryango iharanira uburenganzira bwa muntu (CLADHO), avuga ko kwita ku mwana, ari ukwita ku mirire ye cyane cyane ahabwa indyo yuzuye, agakurikiranwa mu buryo bwiza kubera ko hari ibyo ategerejweho ku rwego rw'Uburezi, Ubuvuzi n'ibindi byose kuko bigaragara y'uko iyo umwana yitaweho ntagwingire bigira ingaruka nziza mu ngeri zitandukanye. Ati' Tugira abantu b'incabwenge, tukagira abantu bazima batekereza neza'.

Avuga ko kurandura Imirire mibi n'igwingira mu bana bato bitagerwaho hatabayeho kuzuzanya kw'inzego, buri wese agakora ibiri mu nshingano ze kandi neza. Ati' Mu by'ukuri twebwe nka CLADHO, tuba dushaka y'uko buri wese agenda agahagarara mu nshingano ze, akazikora neza noneho tukajya duhura duhana amakuru, dusangira ibyagezweho( success), ariko ntabwo ariko bikorwa!, kenshi hari igihe bisigara mu nama gusa. Izi nzego zose icyo dusaba ni ukugira ngo zuzuzanye'. Akomeza abwira buri wese kwita ku nshingano ze, bityo umwana akarindwa Imirire mibi n'Igwingira.

Dr Sylvere Nahayo, Umuyobozi w'Akarere ka Kamonyi kagawe, ka kabwirwa ko kaketse ko kageze iyo kajyaga mu kugabanya Imirire mibi n'Igwingira mu bana bato, yemera ko habayeho kudohoka, ariko kandi akavuga ko hari ikigiye gukorwa.

Ati' Mu by'ukuri twagabanijeho 1'5%, bigaragaza ko aho twari turi ntabwo twabashije kugabanya bihagije nk'uko twabyifuzaga. Hakoreshejwe ingamba nyinshi zitandukanye, tunakomeza gushyiramo imbaraga ariko bikazanarushaho kuko bitewe nuko iyo wagabanyije ukabona urukiramende wihaye ntushoboye kurusimbuka nkuko wabyifuzaga, bisaba ko za ngamba wakoresheje uzongeramo imbaraga, ariko ugashaka n'izindi ngamba nshya zishobora gutuma usimbuka rwa rukiramende'.

Avuga ku ngamba Kamonyi ifite mu kuzamura igipimo cyo kugabanya Imirire mibi n'igwingira mu bana bato, agira ati' Harimo gukomeza kongera imbaraga mu bijyanye n'Igikoni cy'Umudugudu, Gukomeza gukora ubukangurambaga dufatanije n'Abafatanyabikorwa batandukanye, Kugira ingo zifasha izindi ngo zifite ibibazo'.

Agira kandi ati' Ndizera ko 2029 tuzaba twagabanyijeho ku kigereranyo twese twifuza ku buryo tugomba kuza munsi ya 15%. Twarabiganiriye bihagije, abafatanyabikorwa barabyumva, Imiryango, Abaturage muri rusange mu bukangurambaga dukora barabyumva, niyo mpamvu tubishingiraho tuvuga ko dufite icyizere y'uko 2029 tuzaba twaje munsi ya 15%'.

Muri iyi nama nyunguranabitekerezo ku rwego rw'Intara y'Amajyepfo, si inzego z'ubuyobozi ndetse n'Abafatanyabikorwa batandukanye bayitumiwemo gusa. Yanatumiwemo Abana bahagarariye abandi, aho bahawe ijambo basobanura bimwe mu bibazo abana bahura nabyo ariko kandi banagaragaza ko hari Ubukangurambaga batangije mu bigo by'amashuri ndetse n'aho batuye mu rwego rwo kurwanya Imirire mibi n'Igwingira mu bana bato.

Théogène Munyaneza

The post Minisitiri Uwimana Consolée, ati' Akarere ka Kamonyi gashobora kuba karatekereje ko kageze iyo kajyaga' first appeared on Intyoza.

The post Minisitiri Uwimana Consolée, ati' Akarere ka Kamonyi gashobora kuba karatekereje ko kageze iyo kajyaga' appeared first on Intyoza.

Source : https://intyoza.com/2026/03/19/minisitiri-uwimana-consolee-ati-akarere-ka-kamonyi-gashobora-kuba-karatekereje-ko-kageze-iyo-kajyaga/

Abahanzi batandukanye ubwo bari bageze i Huye ku munsi wa mbere wa Siga Arts Festival, bishimiwe bidasanzwe.

Iri Serukiramuco ryatangiye ejo hashize ku wa Kane tariki ya 19 Werurwe 2026 rikazasozwa ejo tariki ya 21, abaryitabiriye bahagurutse i Kigali bagenda banyura ahantu hanyuranye hari ubwiza Nyaburanga bw’u Rwanda.

Hamwe mu ho basuye hari nka Kamonyi ku Mana ya Nkusi, Muhanga i Kabgayi, Butatsinda bwa Kigoma na Muyange, i Nyanza mu Rukari.

Ubwo bari bageze i Huye basanze abaturage ba Huye barangajwe imbere na Meya Ange Sebutege babiteguye, hari n’abanyeshuri.

Muri aba bahanzi basabwe gufata umunota umwe gusa bagasuhuza abari aho ariko mu buryo bwa gihanzi.

Jules Sentore, Muneza Christopher, Juno Kizigenza, Element Eleeeh, Kevin Kade na Diez Dola buri umwe yagiye aririmba agace gato k’indirimbo ze bishimirwa bidasanzwe.

Meya w’Akarere ka Huye, Ange Sebutege yishimiye bikomeye iri tsinda rigari ryari riyobowe na Rumaga kuba barahisemo gukorera iri serukiramuco i Huye kandi abizeza ubufatanye.

Ikindi yagarutseho ni ugusaba abantu gukomera ku muco aho yanakomoje kuri aba bahanzi baririmbye mu kinyarwanda.

Ati “Kimwe mu bituranga harimo ururimi, ururimi rwacu ni Ikinyarwanda rero dushimire abahanzi bacu mwumvise ko bose baririmbye mu kinyarwanda. Ururimi rwacu ruraduhuza. Twirinde ikintu cyose cyarugoreke, turukoreshe kandi turwishimire.”

Siga Arts Festival ni Iserukiramuco ry’ubuhanzi ryateguwe na Rumaga rikaba ririmo kuba ku nshuro ya mbere aho biteganyijwe ko rizajya riba ngaruka mwaka.

Ange Sebutege (hagati ya Christopher na Rumaga) yashimiye aba bahanzi

Aba bahanzi bishimiwe bikomeye i Huye

Source : http://isimbi.rw/element-christopher-juno-bishimiwe-bikomeye-i-huye.html

Source : https://kasukumedia.com/abarwanyi-20-bitandukanyije-nimitwe-irwanya-ubutegetsi-biyishyikiriza-fardc-i-fizi/

Umukinnyi wa filime ,Mutoni Assia yatangaje ko urugendo rwo kwibarukira muri Leta Zunze Ubumwe za Amerika byamuhinduyeho byinshi mu miterere y’amarangamutima ye kugeza hafi ku kugira agahinda gakabije.

Uyu mubyeyi wamamaye muri sinema nyarwanda nka Gatarina yahishuye ko ubwo yibarukaga umwana we wa mbere yabanje kugorwa no kwikorera ibikorwa by’ibanze byo kwita ku mwana nk’umubyeyi.

Mu kiganiro na ISIMBI, Assia yavuze ko atajya yibagirwa ibihe bikomeye yanyuzemo ubwo yatondwaga n’uburyo bwiza bwo konsa umwana kugera aho ibere rye ryagiye rikabyimbiramo amashereka akamara igihe kirekire arwaye ikimeze nk’agahinda gakabije.

Ati 'Ubwa mbere byarangoye kuko ibere ryanze kuvamo amashereka, rirabyimba cyane kugeza aho buri munsi najyaga mpamagara mama. Njyewe n’ubu iyo mbyibutse mpita mpinduka undeba kubera ukuntu namaze iminsi ndwaye agahinda gakabije ndetse nanga no konsa umwana wanjye kubera ububare budasanzwe numvaga.'

Uyu mubyeyi w’abana babiri yanagaragaje ko ibihe byagiye bituma hari ibintu byinshi atari azi gusa yagiye asunikirwa kwiga no kwikorera kubera ko igihe kinini yisangaga nta muntu afite wo kubibaza cyangwa ngo abimukorere nk’uko byari bimeze mu buzima yari abayeho mu Rwanda.

Ati 'Ntabwo nari nzi no kwambika umwana urupapuro rw’isuku 'Diaper’, ariko ibyo byose naje kubimenya kuko nisangaga ari njyewe mukozi wo mu rugo usabwa kumesera umwana imyenda, kumutekera, kumugaburira no kwita ku rugo kandi nta muntu uba usiganya kuko n’umugabo wanjye yabaga yagiye ku kazi.'

Ku tariki ya 18 Werurwe 2026, nibwo Assia yagarutse mu Rwanda nyuma y’imyaka isaga ine yimukiye muri Leta Zunze Ubumwe za Amerika asanze umugabo we Uwizeye Mohammed.

Mutoni Assia yavuze ko kubyarira muri Amerika byamugoye

Source : http://isimbi.rw/kubyarira-muri-amerika-byankuyemo-imiteto-mutoni-assia.html

Umunyezamu wa Rayon Sports, Kwizera Olivier yavuze ko kudahamagarwa mu Ikipe y’igihugu Amavubi ari amahitamo y’abatoza we azakomeza gukora kugeza babonye ko abakwiye.

Havutse impaka nyinshi nyuma y’uko hahamagawe ikipe y’igihugu izakina FIFA Series ariko Kwizera Olivier ntiyisange ku rutonde.

Byageze aho na Perezida wa FERWAFA, Shema Fabrice avuga ko yahabwa amahirwe umutoza akamureba ariko Stephen Constantine avuga ko nta mukinnyi bazongeramo.

Uyu munyezamu abajijwe uko yakire kudahamagarwa, Kwizera Olivier yavuze ko ari amahitamo y’abatoza.

Ati “Icyo navuga uhitamo ni amahitamo ye, njyewe nzakomeza nkore igihe nikigera buriya nzahamagarwa, ndi umunyarwanda, nkunda igihugu nkunda no gukinira ikipe y’igihugu, ntabwo naba ndi gukinira Rayon ngo nange gukinira ikipe y’igihugu.”

Agaruka ku mukino bari bamaze gusezereramo Police FC bayitsinze penaliti 4-2 nyuma yo kunganya ubusa ku busa mu mikino yombi, Kwizera Olivier wateye penaliti ya kabiri ngo byatewe n’uko hari habuze uyitera.

Ati “Twarimo dutora penaliti, habura ufata penaliti ya kabiri ndavuva ngo kuki ntayifata kandi numvaga ndibuyitsinde, igikomeye ni uko nagombaga gufasha ikipe yanjye.”

Yavuze ko kandi intego bafite ari ugufasha ikipe ya Rayon Sports kuba yazasohoka igakina imikino Nyafurika umwaka utaha, ibyo bakaba bazabigeraho ari uko batwaye Igikombe kimwe mu byo bakinira mu gihugu.

Kwizera Olivier avuga ko kudahamagarwa mu Mavubi ari amahitamo y’abatoza

Source : http://isimbi.rw/kutampamagara-mu-mavubi-ni-amahitamo-yabo-kwizera-olivier-wanahishuye-impamvu.html

Mu ihererekanya bubasha, hagati ya komite ya PSF ishoje inshingano na komite nshya, Umuyobozi w'Akarere ka Kamonyi, Dr Sylvere Nahayo yasabye Ubuyobozi bushya bwa PSF kumenya no kuzirikana ko bagikora ihererekanya ari nabwo akazi gatangiye. Yabahaye umukoro wo gushaka abashoramari, abasaba kuzakora cyane kurusha abo basimbuye ariko kandi byose mu nyungu y'Abikorera n'Abesamihigo muri rusange.

Nyuma y'imyaka umunani, Munyankumburwa Jean Marie ayoboye urwego rw'abikorera/PSF mu karere ka Kamonyi, kuri uyu wa 19 Werurwe 2026 yashyikirije ububasha(Handover), Ntiyamira Felix ( aka Yadema) umukoreye mu ngata.

Mu ijambo rye, Munyankumburwa Jean Marie yashimiye Ntiyamira Felix wagiriwe icyizere n'abanyamuryango cyo gufata inshingano zo kuyobora PSF mu karere ka Kamonyi. Yamwijeje ko nka komite ishoje ikivi aho bazakenerwa bazitaba bwangu.

Ntiyamira Felix, Perezida wa PSF Kamonyi mu gukora iri hererekanyabubasha, yavuze ko yiteguye gukora, ko imbaraga zihari ndetse n'ubushake, yaba kuri we bwite ndetse na Komite yose bafatanije.

Yabwiye Komite ishoje ikivi ati' Mwarakoze!. Inshingano mwazihagazemo neza kugeza kuri uyu munota wa none ubwo muzeguriye twebwe tuje gukomereza aho mwari mugeze. Tuzakomereza ku byagezweho tubisigasire, dukomeze ibyari mu nzira bikorwa tubinoze, dushyire imbaraga mu byateganywaga gukorwa ari nako dushyiramo cyangwa twongeramo ibindi bishya kandi byiza. Turabizeza ko nta nakimwe kizasubira inyuma, ahubwo tuzaharanira kubyongerera agaciro'.

Yagize kandi ati' Tuzakoresha imbaraga n'ubushobozi kandi turabifite. Ntabwo tuje kurebera, dufite byinshi dutekereza byiza kandi by'iterambere ryacu nk'abanyamuryango ba PSF, Akarere kacu n'Igihugu muri rusange. Iterambere niryo rituraje inshinga, tuzakora duharanira ko imibereho y'Abanyakamonyi irushaho kuba myiza'.

Dr Sylvere Nahayo, Umuyobozi w'Akarere ka Kamonyi mu ijambo rye yashimiye Komite ishoje ikivi ku mikoranire myiza yabaranze hagati yabo ariko kandi n'imikoranire n'ubuyobozi bw'Akarere.

Yijeje Komite nshya ko nk'ubuyobozi bw'Akarere biteguye gukorana kandi neza, baharanira kugera kuri byinshi byiza kandi biruta ibyo abo basimbuye bagezeho cyane ko umusingi uhari.

Yagize kandi ati' Icyerekezo turimo ni icya kora ndebe, ntabwo ari vuga numve. Ni kora ndebe, ibikorwa bikivugira n'abantu batiriwe bavuga byinshi. Kuba mwaratowe, mwari musanzwe n'ubundi dukorana, bivuze neza ko tuzagera kuri byinshi, tuzakorana neza. Twifuza ko dukorera hamwe tugatahiriza umugozi umwe, tukagenda muri uwo murongo wo gukomeza kubaka Akarere kacu n'Igihugu muri rusange'.

Yabahaye umukoro, ati' Imikoranire ni ukuvugana kenshi, Guhana ibitekerezo kenshi, kugirana inama kenshi. Twifuza ko nta kintu na kimwe muri kano Karere cyagira imbogamizi, cyapfa kandi muhari nka PSF. Yaba ari ibisaba ibitekerezo, Ibisaba ubushobozi, ibisaba ubujyanama mu buryo bumwe cyangwa ubundi, imiryango irafunguye kugira ngo tuganire. Tuzi umusanzu wa PSF mu kubaka Akarere'.

Yongeyeho ati' PSF ni inkingi ikomeye, ni Inkingi ya mwamba mu mibereho y'Akarere ka Kamonyi. Kuba muri ku ruhembe rwa PSF, bivuzeko tuzafatanya tukagera kuri byinshi. Tubitezeho byinshi biruta ibyo abo musimbuye kuko mukoze nk'ibyo bakoze mutarushijeho ntabwo twaba turimo dutera imbere kuko iterambere ni ukuva ku rwego rumwe ujya ku rundi. Ni mutangire kuko twe mu nzego z'ibanze nta kwezi kwa buki kuhaba, ubu mwinjiye nta kuvuga ngo si ndamenya uko bigenda, ngo batangira bate'.

Meya Dr Sylvere Nahayo, yabahaye kandi umukoro wo kuzana Abashoramari. Ati' Ikintu gikomeye twumva mwadufasha, ni mutuzanire Abashoramari muri Kamonyi. Ni mudufashe mu byinjiremo n'imbaraga zishoboka zose haze Abashoramari, mubatubwire tuborohereze ibyo dushoboye mu bushobozi bwacu byubahirije amategeko, baze bashore imari mu byiciro bitandukanye. Iki ni mukidufasha mukagishyiramo imbaraga muzaba mutanze umusanzu ukomeye muri Kamonyi'.

Iyi Komite nyobozi nshya y'Urugaga rw'Abikorera/PSF mu Karere ka kamonyi, yatowe ku wa 09 Werurwe 2026. Igizwe na; Ntiyamira Felix (perezida), Niyonsenga Michel (Visi Perezida wa 1), Mukarusine Appolinarie(Visi Perezida wa 2). Irimo kandi abantu 7 batorewe kujya mu kanama nkemurampaka kayobowe na Diane Mukakalisa.

Théogène Munyaneza

The post Kamonyi: Meya Dr Sylvere Nahayo, ahaye komite nshya ya PSF umukoro first appeared on Intyoza.

The post Kamonyi: Meya Dr Sylvere Nahayo, ahaye komite nshya ya PSF umukoro appeared first on Intyoza.

Source : https://intyoza.com/2026/03/19/kamonyi-meya-dr-sylvere-nahayo-ahaye-komite-nshya-ya-psf-umukoro/

Ikipe ya Rayon Sports yakatishije itike ya 1/2 cy’Igikombe cy’Amahoro cya 2026 nyuma yo gutsinda Police FC kuri penaliti 4-2, mu mukino wo kwishyura wa 1/4 warangiye amakipe yombi anganyije ubusa ku busa, nk’uko byari byagenze no mu mukino ubanza.

Uyu mukino wabereye kuri Kigali Pelé Stadium wari urimo guhangana gukomeye hagati y’impande zombi, aho buri kipe yagerageje gushaka igitego cy’intsinzi ariko bikarangira iminota 90 isanzwe irangiye nta na kimwe kibonetse.

Rayon Sports yatangiye isatira cyane mu minota ya mbere, ishaka igitego cyayihesha amahirwe, ariko ubwugarizi bwa Police FC burabyitwaramo neza.

Ku rundi ruhande, Police FC na yo yagerageje gusatira binyuze kuri Ani Elijah na bagenzi be, ariko umunyezamu Kwizera Olivier akomeza kwitwara neza.

Mu gice cya kabiri, umukino wakomeje kugenda ungana ku mpande zombi. Amahirwe akomeye yagiye aboneka, cyane cyane ku ruhande rwa Rayon Sports, ariko ba rutahizamu bayo bananirwa kuyabyaza umusaruro. Police FC yaje no guhabwa ikarita itukura ku munota wa 51, ibintu byayigizeho ingaruka mu mikinire yayo, nubwo yakomeje kwihagararaho.

Mu minota ya nyuma, Rayon Sports yashyize igitutu kuri Police FC yashyize abakinnyi benshi inyuma, irinda izamu ryayo. Icyakora, iminota y’inyongera yarangiye nta gihindutse, biba ngombwa ko hitabazwa penaliti.

Mu gutera penaliti, amakipe yombi yatangiye atitwaye neza, aho penaliti za mbere ku mpande zombi zahushijwe. Gusa Rayon Sports yaje kwisuganya, itsinda enye muri eshanu, mu gihe Police FC yo yatsinzemo ebyiri gusa, harimo n’iyatewe na Issah Yakubu yakubise umutambiko.

Penaliti ya nyuma yinjijwe na Fall Ngagne ni yo yashimangiye intsinzi ya Rayon Sports, iyihesha gukomeza muri 1/2.

Muri iki cyiciro gikurikira, Rayon Sports izahura na Gorilla FC yasezereye AS Kigali, mu gihe undi mukino uzahuza APR FC na Etincelles FC

Source : http://isimbi.rw/rayon-sports-yageze-muri-1-2-cy-igikombe-cy-amahoro.html

Ibyamamare bitandukanye mu Rwanda, byamaze guhaguruka i byerekeza i Huye mu Iserukiramuco ry’ubuhanzi ryiswe ‘Siga Arts Festival’, aho bagenda basobanurirwa amwe mu mateka y’u Rwanda.

Aba bagiye Huye bakaba bahagurikiye i Kigali ku Nteko y’Umuco ku Ngoro ya Richard Kandt.

Ni Iserukiramuco ryateguwe n’umusizi Rumaga Jr aho ryatangiye uyu munsi rikazasozwa tariki ya 21 Werurwe 2026.

Kuva Kigali kugera Huye biteganyijwe bari bugende bahagarara hamwe mu hantu hazitse amateka y’u Rwanda basobanurirwa hamwe mu mateka ahagjze.

Hamwe mu hantu ibi byamamare n’abanaherekeje bari busure harimo mu Mujyi wa Kigali ahazwi nko ku Giti Cyinyoni ku Iriba rya Rwezangoro.

Hari mu Karere ka Kamonyi Buhoro bwa Reramacu no ku Mana ya Nkusi.

Muhanga barahagarara Kabyayi basobanurirwe amateka ya Kabgayi, muri Ruhango barasobanurirwa amateka ya Ruhango rwa Mutakara no mu Butantsinda bwa Kigomba na Muyange ndetse no ku Mukingo ukingiye u Rwanda.

Nyanza ni mu Rukari i Bwami mu gihe Huye ari i Giseke na Nyagisenyi.

Bamwe mu byamamare bifatanyije na Rumaga harimo Meneza Christopher, Kevin Kade, Juno Kizigenza, Diez Dola, Element Eleeeh, Riderman (yasigaye i Kigali ariko arasanga abandi i Huye), Fally Merci, Titi Brown, Burikantu na Buringuni n’abandi.

Biteganyijwe ko buri joro hazajya haba igicaniro cy’ubusabane n’imyidagaduro i Huye.

Ku wa 20 Werurwe 2026 hitezwe igikorwa cyiswe 'Intambwe ya Nyirarumaga’ urugendo rugamije kwibuka umurage w’abagore no gushimira uruhare rwabo mu buhanzi, umuco n’iterambere ry’igihugu, dore ko Werurwe ari ukwezi kwahariwe abagore.

Umunsi wa gatatu w’iri serukiramuco hateganyijwe igitaramo kizarisoza, kikazabera kuri Sitade ya Kaminuza y’u Rwanda Ishami rya Huye ku wa 21 Werurwe 2026.

Rumaga watangije iri serukiramuco

Christopher, Element Eleeeh na Diez Dola

Riderman mu itsinda rigari ry’abahanzi bitezwe muri iri serukiramuco

Burikantu na Buringuni mu baje gushyigikira Rumaga Junior

Fally Merci na we yari ahari

Source : http://isimbi.rw/riderman-christopher-kevin-kade-rumaga-element-eleeeh-bahagurutse-i-kigali-mu.html

Umukinnyi wa filime Ishimwe Sandra wamamaye nka 'Nadia’ muri filime y’uruhererekane 'City Maid’, yasabye ababyeyi kujya baganiriza abana babo byimbitse ku bijyanye n’ubuzima bw’imyororokere aho kubakangisha igitsure gusa.

Mu kiganiro yagiranye na ISIMBI, Sandra yavuze uburyo ababyeyi benshi bakoresha bwo kubuza abana gukora imibonano mpuzabitsina bubamo igitsure cyinshi, ariko ntibasobanurire abana ingaruka n’impamvu nyayo zo kwirinda.

Yagize ati 'Twebwe twakuze tubwirwa ko imibonano mpuzabitsina ari ibishitani, ko izagutera inda cyangwa ukazapfa. Ariko iyo uyikoze rimwe ugasanga nta kibaye, bituma ushaka kongera kubigerageza.'

Uyu mukinnyi wa filime yagaragaje ko kudasobanurirwa bihagije ari imwe mu mpamvu zituma abakobwa benshi bashidukira kugerageza imibonano mpuzabitsina batabanje kumenya ingaruka zayo.

Yashimangiye ko igihe kigeze ngo ababyeyi bahindure imyumvire, bakicaza abana babo bakabaganiriza mu buryo bubafasha gusobanukirwa neza ibyiza n’ingaruka ziri mu rukundo no mu mibonano mpuzabitsina.

Ati 'Abana b’abakobwa by’umwihariko bakeneye kwigishwa kurusha uko byakorwaga kera. Ni ngombwa ko ababyeyi babaganiriza mu buryo bwimbitse bakabereka uko babyitwaramo, kuko kubabuza gusa bidahagije.'

Sandra yanavuze ko muri iki gihe aho amakuru menshi aboneka ku mbuga zitandukanye, kutaganiriza abana bishobora kubashyira mu byago byo kwigira ku byo babonye aho badafite ubuyobozi.

Mu rwego rwo guteza imbere ibi biganiro, Ishimwe Sandra yatangije shene ya YouTube yise 'The Mind Shift’, igamije gutanga ibiganiro byubaka ku kurengera abana, inshingano z’ababyeyi n’uruhare rw’umuryango mu kurinda abana ihohoterwa.

Nadia yasabye ababyeyi guhindura uburyo baganiriza abana ku mibonano mpuzabitsina

Source : http://isimbi.rw/twabwirwaga-ko-imibonano-mpuzabitsina-ari-ibishitani-tuzapfa-nadia-wasabye.html

Bamwe mu bahatuye bavuga ko batangiye kubona ibimenyetso by'uko izo nzu zitameze neza, birimo inkuta zitangiye gusaduka, ibisenge byinjiza amazi n'imiryango itagifunga neza. Ibi byose bavuga ko byatangiye kugaragara mu gihe gito cyane nyuma yo kuzituzwamo, ibintu bibatera kwibaza ku bwiza n'uburyo izo nzu zubatswemo.

Umwe mu baturage yagize ati: 'Twari twishimye cyane dutaha, ariko ubu turi mu bwoba bukomeye. Iyo imvura iguye nijoro, turara twikanga ko inzu yadusenyukiraho.'

Aba baturage basaba inzego zibishinzwe kubatabara hakiri kare, bagasuzuma neza uko izo nzu zubatswe ndetse hakanakorwa ibikenewe byose kugira ngo zongere gukomera no kuramba. Bavuga ko bifuza ko ubuzima bwabo n'ubw'imiryango yabo bwahabwa agaciro, aho kuba mu nzu zibateza impungenge aho kubaha umutekano.

Ku ruhande rw'ubuyobozi, haracyategerejwe ibisobanuro birambuye ku kibazo cy'izo nzu, ndetse n'ingamba zizafatwa mu gukemura iki kibazo cyugarije aba baturage.

Source : https://kasukumedia.com/abaturage-ba-ruganda-bakomeje-guhungabanywa-ninzu-baherutse-gutuzwamo-zatangiye-gusenyuka/