Ubwami bw’Igihugu cya Arabia Saoudite bwatangaje ko abayoboke b’idini ya Isilamu bajyaga mu mutambagiro muri iki gihugu nta numwe uzemererwa kuwujyamo aturutse hanze kubwo kwirinda Covid-19. Abemerewe ni abanyagihugu n’abanyamahanga bari ku butaka bw’iki gihugu muri ibi bihe gusa.
Umubare muto w’abantu baba muri iki gihugu nibo uzemererwa kuwujyamo nk’uko byatangajwe mu itangazo ry’ubwami bw’iki gihugu. Abantu bagera kuri miliyoni ebyiri byari byitezwe ko bashobora kujya i Macca n’i Medina mu mpeshyi y’uyu mwaka mu mutambagiro mutagatifu uhuza abasilamu. Hari hamaze iminsi hari ubwoba ko uyu mutambagiro uzahagarikwa.
Mu bihe bisanzwe, uyu mutambagiro ni kimwe mu bintu bikomeye ku kirangaminsi cy’umwaka cy’abayisilamu. Gusa ubu abantu bacye bo mu bindi bihugu baba muri Arabia Saoudite nibo bazemerewa kuwukora.
Abategetsi bavuga ko ubu aribwo buryo bwonyine bazashobora kubahiriza amabwiriza abuza abantu kwegerana kugira ngo babarinde kwandura coronavirus.
Arabia Saoudite nkuko BBC dukesha iyi nkuru ibitangza, imaze kugira abantu 161,005 banduye coronavirus na 1,307 yishe. Muri weekend ishize nibwo bahagaritse amategeko agumisha abantu mu ngo zabo (lockdowon).
Munyaneza Theogene / intyoza.com
Novak Djokovic umukinnyi uza ku mwanya wa mbere mu bakina Tennis ku isi yabaye undi mukinnyi w’uyu mukino basanzemo icyorezo cya coronavirus. Ni nyuma y’uko abandi bakinnyi Grigor Dimitrov, Borna Coric na Viktor Troicki nabo bakina Tennis bemeje ko babasanzemo iki cyorezo.
Djokovic w’imyaka 33 y’amavuko, aheruka gukina na mugenzi we Viktor Troicki nawe ukomoka muri Serbia, mu mikino yabereye i Belgrade. Ku rubuga rwa Novak Djokovic hashyizwe itangazo rivuga ko “nta bimenyetso by’iyi ndwara afite“.
Bikekwa ko Djokovic yanduriye mu mikino ya Tennis na Basketball yari imaze iminsi ibera i Belgrade. Amashusho yo kuri iyi mikino yo kuwa gatanu ushize yerekana abakinnyi barimo na Djokovic bakina kandi na Basketball.
Bamwe muri aba bakinnyi nkuko BBC dukesha iyi nkuru ibitangaza, ivuga ko ubu batangaje ko bagiye kujya mu kato iminsi 14, nubwo harimo abo bapimye bagasanga badafite Covid-19.
Amarushanwa ya Tennis ku rwego rw’isi biteganyijwe ko atangira tariki 14 z’ukwezi kwa munani 2020.
Irushanwa rya US Open rizatangira tariki 31 z’ukwezi kwa cyenda 2020 ariko nta bafana bari ku bibuga, gusa hari abakinnyi bagaragaje impungenge zo kujya i New York.
Munyaneza Theogene / intyoza.com
source http://www.intyoza.com/umukinnyi-wa-mbere-ku-isi-muri-tennis-novak-djokovic-bamusanganye-covid-19/
Kapiteni w’ikipe y’igihugu y’u Rwanda ukinira Yanga muri Tanzania avuga ko ubu intego bafite ari ugusoza ku mwanya wa 2 muri shampiyona n’ubwo bisa n’ibikomeye ariko ngo bagomba kubikora kuko umwanya wa 3 atari wo bakeneye.
Kuba aba mbere bakegukana igikombe cya shampiyona byo bisa n’ibidashoboka kuko Simba SC ya mbere ibarusha amanota 19, ni mu gihe hasigaye imikino 8 ngo shampiyona isozwe.
Iyi kipe iri ku mwanya wa 3 aho irushwa na Azam FC ya 2 amanota 2, ikaba ivuga ko iri ku rugamba rwo gushaka uburyo yakuramo iyi kipe bagasoreza ku mwanya wa 2.
Aganira n’ibinyamakuru byo muri Tanzania yagize ati“dufite imikino ikomeye, amakipe menshi arimo kurwana cyane, ari hamwe umwana arira nyina ntiyumve, natwe gahunda zacu ntabwo tugomba gutsindwa mu mikino tuzakina. Ikintu cy’ingenzi ni ukubona amanota 3, bizadufasha kuza ku mwanya mwiza, ntidushaka gusoreza ku mwanya wa 3, turashaka uwa 2 n’ubwo bisa n’ibikomeye ariko tuzabikora.”
Mu gihe shampiyona ya Tanzania ibura imikino 8 ngo irangire, Simba SC iri ku mwanya wa 1 n’amanota 75, Azam FC ifte 58 mu ihe Yanga ifite 56.
Ku munsi w’ejo kuri Uwanja wa Taifa, Yanga izakira Namungo iri ku mwanya wa 4 n’amanota 54.
source http://isimbi.rw/siporo/article/bisa-n-ibikomeye-ariko-tugomba-kubikora-haruna-niyonzima