Tag: Imikino

Nyuma y’icyumweru kirenga umuyobozi wa Gasogi United, Kakooza Nkuriza Charles [KNC] yikomanga ku gatuza ko azatsinda Rayon Sports, iyi kipe yamucecekesheje imutsinda 2-1.

Hari mu mukino w’umunsi wa 20 wa shampiyona 2022-23 wo Gasogi United yari yakiriyemo Rayon Sports kuri Stade ya Bugesera FC.

Ibitego 2 bya Onana Léandre Willy Essomba byafashije Rayon Sports kwihimura kuri iyi kipe yayitsinze mu mukino ubanza wa shampiyona ndetse ubu ikaba iraye iyoboye urutonde rwa shampiyona.

Gasogi United ni yo yafunguye amazamu ku munota wa 17 ku gitego cyatsinzwe na Bugingo Hakim ku mupira yari ahawe na Djoumekou.

Ku mupira muremure yahawe na Luvumbu, ku munota wa nyuma n’igice cya mbere Onana yishyuriye Rayon Sports amakipe ajya kuruhuka ari 1-1.

Mu gice cya kabiri buri kipe yagerageje gushaka uko yabona igitego cy’intsinzi ariko bibanza kugorana kuko batabyazaga umusaruro amahirwe babonye.

Ku munota wa 85, Ngendahimana Eric yacometse umupira muremure widunze rimwe maze Onana aterera ishoti rikomeye inyuma y’urubuga rw’amahina adahagaritse umupira uyoboka mu rushundura. Umukino warangiye ari 2-1.

Undi mukino wabaye Kiyovu Sports yatsindiye Marines i Muhanga 3-2.

Mu gihe ejo APR FC izakina na Etincelles, Rayon Sports ibaye ari yo iyoboye urutonde n’amanota 39, Kiyovu Sports 38, AS Kigali na APR FC zifite 37, Gasogi United na Etincelles zikagira 36.

Gahunda y’umunsi wa 20

Ku wa Kane tariki ya 16 Gashyantare 2023

AS Kigali 2-2 Sunrise FC

Ku wa Gatanu tariki ya 17 Gashyantare 2023

Bugesera FC 3-0 Rutsiro FC

Ku wa Gatandatu tariki ya 18 Gashyantare 2023

Gorilla FC 2-0 Espoir FC
Gasogi United 1-2 Rayon Sports
Kiyovu Sports 3-1 Marines FC
Mukura VS 0-1 Rwamagana City

Ku Cyumweru tariki ya 19 Gashyantare 2023

Police FC vs Musanze FC
APR FC vs Etincelles

Esenu agerageza umupira wo ku mutwe

Luvumbu yatanze umupira wavuyemo igitego cya mbere

Umunyezamu Cuzuzo Gael ntabwo yari mu bihe bye

Onana yicaje Rayon Sports ku mwanya wa mbere

Rayon Sports yacecekesheje KNC

Ku mugoroba wo kuri uyu wa Gatanu tariki 17 Gashyantare 2023, nibwo Minisitiri Munyangaju Aurore Mimosa yakiriye abakinnyi bagiye guhagararira u Rwanda mu isiganwa rikomeye rya Tour du Rwanda, aho bazahangana n’amakipe 18 avuye ku migabane itandukanye.

Minisitiri Mimosa yagiranye ibiganiro n’abakinnyi ndetse n’abatoza b’ikipe y’igihugu, abanza gushima ko bitwaye neza muri Shampiyona Nyafurika iherutse kubera muri Ghana, aho bakuye imidari 8 irimo 2 ya Zahabu.Hari hateraniye abakinnyi 5 bazaserukira ikipe y’igihugu muri Tour du Rwanda, Abandi 3 bazaba bari mu ikipe ya May Stars ibarirwa mu Rwanda, Abatoza b’amakipe yombi ndetse n’abayobozi b’ishyirahamwe ry’umukino w’amagare mu Rwanda ‘FERWACY’.

Abagiye guserukira igihugu muri Tour du Rwanda bahawe ibendera, basabwa ubufatanye no kwitanga kugira ngo bazabashe gucyura intsinzi muri iri rushanwa rizatangira ku ya 19 rigasozwa ku ya 26 Gashyantare 2023.

Ikipe y’ u Rwanda itozwa na Sempoma Felix igizwe na Niyonkuru Samuel, Mugisha Moise, Manizabayo Eric, Nsengimana Bosco na Masengesho Vianquer, mu gihe May Stars yo ifite abanyarwanda batatu; Bigirimana Jean Nepo, Hakizimana Felicien na Nsengiyumva Shemu.

Minisitiri Munyangaju yashimiye ikipe y’u Rwanda uko yitwaye

Minisitiri Munyangaju na Perezida wa FERWACY, Murenzi Abdallah

Ibyishimo byari byose ku bakinnyi bagiye guserukira u Rwanda

Uwari uhagariye inyungu z’umukinnyi ukomoka muri Ghana, Christian Atsu bidasubirwaho yemeje ko yitabye Imana.

Christian Atsu akaba yahitanywe n’umutingito wibasiye Turikiya aho yakiniraga ikipe ya Hatayspor, wabaye mu gitondo cy’itariki ya 6 Gashyantare 2023.

Uyu mukinnyi uwo munsi yarashakishijwe ntiyaboneka ariko tariki ya 7 Gashyantare, Mustafa Özat uyobora Hatayspor yakinagamo Christian Atsu, yatangaje ko uyu mukinnyi yarokowe akiri muzima nyuma yo kugwirwa n’ibikuta byaguye kubera umutingito washegeshe Turikiya na Syria.

Aya makuru yaje kunyomozwa n’ushinzwe gushakira uyu mukinnyi ikipe, Nana Sechere wavuze ko ataraboneka agishakishwa.

Murat Uzunmehmet, wari ushinzwe kureberera inyungu za Atsu yatangaje ko uyu mugabo yabonywe ariko atakiri muzima.

Ati 'Christian Atsu yagaragaye, ariko birumvikana ko yamaze gutakaza ubuzima.'

Atsu yitabye Imana akiri mu byishimo byo guhesha ikipe ye amanota 3 kuko umunsi wa nyuma we (tariki ya 5 Gashyantare) ni wo munsi yakinnye umukino wa nyuma (kuko yahise yitaba Imana) Hatayspor itsinda Kasimpaşa igitego kimwe ku busa cya Christian Atsu cyo ku munota wa nyuma w’umukino, yari yinjiye mu kibuga asimbura Aabid ku munota wa 82.

Christian Atsu yari afite imyaka 31 yakiniye amakipe arimo Newcastle, Eveton, Bournemouth na Chelsea zo mu Bwongereza, Malaga muri Espagne FC Porto muri Portugal n’izindi. Yakiniye kandi ikipe y’igihugu ya Ghana imikino 65 atsindamo ibitego 9.

Christian Atsu yabonywe ariko yamaze kwitaba Imana

APR BBC yaraye itsinze REG BBC muri shampiyona mu mukino umuhungu wa Perezida Kagame, 2nd Lt. Kigenza Ian Kagame usanzwe ukinira APR BBC yakinnye.

Muri shampiyona y’uyu mwaka ni bwo ikipe ya APR BBC yagaragaje ko 2nd Lt. Ian Kagame ari umukinnyi wa yo cyane ko yagiye imugaragaza ku rutonde rw’abakinnyi iba iri bwifashishe nubwo yari ataragirirwa amahirwe yo gukina.

Mu ijoro ryakeye ubwo APR BBC yatsindaga REG BBC mu mukino wabereye muri LDK, 2nd Lt. Kigenza Ian Kagame yakinnye umukino we wa mbere muri iyi kipe y’ingabo z’igihugu.

Iminota mike yahawe, yitwaye neza ubwo ikipe ye yatsindaga REG BBC amanota 77 kuri 75.

APR BBC yayoboye uduce tubiri tubanza aho aka mbere yagatsinze ku manota 19-17, aka kabiri igatsinda ku manota 19 kuri 18 ya REG BBC. Bagiye kuruhuka ari 37 ya APR BBC kuri 34 ya REG BBC.

REG BBC yaje mu gace ka gatatu n’imbaraga nyinshi biyifasha kugatsinda ku manota 21 kuri 16, aha yari yanamaze kujya imbere ya APR iyirusha amanota 2, byari 55-53.

APR BBC ibifashijwemo n’abarimo Nshobozwabyosenumukiza Jean Jacques Wilson wakoze itandukaniro mu gace ka nyuma, APR yaje kugatsinda REG amanota 24-20 umukino warangiye APR BBC yegukanye intsinzi y’amanota 77 kuri 75 ya REG BBC.

2nd Lt. Kigenza Ian Kagame yakinnye umukino we wa mbere muri APR BBC

Iminota yahawe yitwaye neza

APR BBC yarushije inatsinda REG BBC

Nshobozwabyosenumukiza Jean Jacques Wilson yagoye REG BBC yahozemo

Wari umukino utoroshye

Ikipe y’igihugu y’umukino wa Basketball mu bagore iri muri Uganda mu mikino y’Akarere ka 5 yatsinzwe umukino wa 3 na Misiri.

Nyuma yo gutsindwa na Sudani y’Epfo ndetse na Kenya, uyu munsi bandagajwe na Misiri ibatsinda amanota 102 kuri 56.

U Rwanda ntabwo rworohewe n’uyu mukino wo mu itsinda A wabereye kuri MTN Lugogo Arena kuko Misiri yayoboye uduce twose tw’umukino.

Agace ka mbere Misiri yagatsinze ku manota 26-14, agace ka kabiri igatsinda ku manota 24-14, agace ka gatatu igatsinda ku manota 27-13 ni mu gihe aka nyuma yagatsinze 25-15.

Ni imikino u Rwanda rurimo gukoresha nk’imyitozo yo kwitegura igikombe cy’Afurika mu bagore “FIBA Afrobasket 2023” aho rusanzwe rufite itike nk’igihugu kizakira irushanwa aho rizabera mu Rwanda kuva tariki ya 28 Nyakanga kugeza 6 Kanama 2023.

U Rwanda rwatsinzwe na Misiri

Umuterankunga wa Rayon Sports, Skol yamaze gushyiriraho iyi kipe yaba mu cyiciro cy’abagore n’abagabo uduhimbazamusyi twihariye mu gihe zakwegukana ibikombe bya shampiyona n’icy’Amahoro.

Ibi uru ruganda rwabikoze mu rwego rwo gutera akanyabugabo iyi kipe kugira ngo yitware neza cyane ko atari ubwa mbere ibikoze isanzwe ibikora.

Umunyamabanga wa Rayon Sports, Patrick Namenye yemereye ISIMBI ko umuterankunga wa bo mukuru yashyiriyeho abakinnyi agahimbazamusyi kihariye bitewe n’uko bazitwara mu gikombe cy’Amahoro na Shampiyona.

Ikipe y’abagore ikina mu cyiciro cya kabiri, mu gihe yakwegukana igikombe cya shampiyona ndetse n’icy’Amahoro yashyiriweho agahimbazamusyi ka miliyoni 10 z’amafaranga y’u Rwanda.

Mu gihe bagera ku mukino wa nyuma w’igikombe cy’Amahoro ntibacyegukane bahabwa miliyoni 3 nk’agahimbazamusyi mu gihe bakwegukana igikombe cy’Amahoro ni miliyoni 5. Rayon Sports y’abagore niyegukanye shampiyona ikabura igikombe cy’Amahoro ntinagere ku mukino wa nyuma wa cyo yazahabwa miliyoni 5.

Mu bagabo, Rayon Sports itwaye shampiyona n’icy’Amahoro izahabwa agahimbazamusyi ka miliyoni 32.

Kugera ku mukino wa nyuma w’igikombe cy’Amahoro ntibacyegukane bazahabwa miliyoni 5 z’amafarana y’u Rwanda mu gihe bacyegukana bazahabwa miliyoni 12.

Rayon Sports iri ku mwanya wa 4 n’amanota 36 inganya Gasogi United banafitanye umukino ejo, ikarushwa inota 1 na AS Kigali na APR FC ziyoboye urutonde mu gihe yakwegukana igikombe cya shampiyona ya 2022-23 izahabwa miliyoni 20 y’agahimbazamusyi.

Rayon Sports yashyiriweho uduhimbazamusyi twihariye