Tag: featured

Bimwe mu bihangano bye

Munyankindi Memento Clement ni umusore w’imyaka 23 uvuka mu Karere ka Nyamasheke mu Murenge wa Kagano mu Mudugudu wa Makoko.

Munyankindi arangije amashuri yisumbuye mu birebana n’amashanyarazi ariko iwabo mu rugo akora akazi k’ubugeni nk’uwakavukiyemo.

Munyankindi aho avuka, abaturage baramutangarira kuko icyo abonye agishushanya ku mpapuro, cyangwa akagikora mu ibumba no mu biti.

Ni impano avuga ko yavukanye kuko ibyo akora nta nshuri yabyizemo uretse kubyiyumvamo no kubikunda.

Aganira na Kigali Today, Munyankindi avuga ko yifuza ubufasha bwa Leta mu kumufasha guteza imbere impano imurimo.

Agira ati: “Ibyo nkora sinabyize gusa ndabikunda kandi n’aho ndi ni byo nkora, nifuza gufashwa ngateza imbere impano indimo bikazaba umwuga untunga, nkakomeza gushushanya nkoresheje ikaramu, kubumba no gusiga amarangi, nkakora inkuru ishushanyije ya ‘cartoon’ zamamaye, n’indi mitako yakoreshwa mu mahoteli n’ahandi mu birori bitandukanye.”

Impano ya Munyankindi avuga ko yayitangiye akiri muto, ndetse agereranyije ubwo yari afite imyaka 8 bimwe mu bikorwa bye ngo byari bitangiye kwivugira.

Ati “Nakundaga kubumba no gushushanya birenze ikigero narimo, nibuka iyo najyaga mu misa nkareba amashusho ari mu Kiliziya, natahaga nyigana, ndetse umunsi umwe nabumbye ishusho imeze nka padiri kandi na we ayibonye ambwira ko mfite impano ngomba kubyaza umusaruro. Aho ni ho nahise numva ko ibyo nkora ari byiza.”

Yashushanyije Magufuli wahoze ayobora Tanzania

Munyankindi avuga ko n’ubwo yakoze ibyo gushushanya yishimisha, mu myaka ibiri ishize ngo nibwo yatangiye kubona akamaro k’ibyo akora.

Ati “Ubu nibwo ndangije amashuri yisumbuye, ariko mu myaka ibiri nibwo natangiye kwita ku bugeni kandi ntangira gukuramo ubufasha, kuko abantu bansabaga kubakorera amashusho nkayakora kandi bakayashima.”

N’ubwo yatangiye gukorera amafaranga, yumva atagarukira ku rwego ariho, ahubwo asaba Leta kumuba hafi ikamufasha guteza imbere impano yiyumvamo.

Ati “Numva nakwiga ubugeni nkongera ubumenyi mfite nkagera ku rundi rwego, numva mfite inyota yo kugera kure mu gukora ubugeni no kubwigisha, hari abana bafite impano nkanjye kandi bakeneye kumenyekana no gutezwa imbere, numva mfashijwe nanjye nazafasha abafite impano kuyiteza imbere.”

Avuga ko nubwo akora byinshi mu bugeni, ahawe amahirwe yo kwiga ngo yakwibanda ku kubumba ibishushanyo no gukora ibishusho mu mbaho.
Iyo avuga imbogamizi ahura na zo, agaragaza ko muri zo harimo kubura ibikoresho bimufasha kunoza neza ibihangano akora nko gusena, gukubita ibumba hamwe n’igishoro. Icyakora ashyira imbere gushaka ubumenyi bwisumbuye ku bwo afite no kubona ibikoresho by’umwimerere.

Umuyobozi w’Urwego rw’Igihugu Rushinzwe Imyuga n’Ubumenyingiro Eng. Paul Mukunzi avuga ko barimo gukora urutonde rw’urubyiruko rufite impano y’ubugeni kugira ngo bafashwe mu ngeri zitandukanye aho abashaka kwiga babafasha ndetse abandi bagafashwa gukora imishinga ibateza imbere.

Agira ati: “Uyu twamujynaa mu ishuri ryacu rya Nyundo akongera ubumenyi, gusa twatangiye no gushaka n’abandi babishaka bafite ibitekerezo byavamo imishinga yagutse tukabahuza tukumva icyo twabafasha, hari n’amahugurwa y’igihe gito yabagirira akamaro. Ubu twandikiye ibigo byacu mu gihugu hose gukora urutonde rw’abakora ubugeni kugira ngo harebwe icyo bafashwa mu guteza imbere impano yabo.”

Yakoze ikibumbano cy’uyu mwana n’inkoko yari afite

Ikigo cya RTB gifite inshingano zo gutegura no gutanga integanyanyigisho, imfashanyigisho, inyoborabarezi, imbonezamasomo no kugena uburyo bwo
kwigisha imyuga n’ubumenyingiro.

Gifite n’inshingano zo guteza imbere ikoreshwa ry’ikoranabuhanga mu itumanaho mu mashuri y’imyuga n’ubumenyingiro, guhuza no kwihutisha porogaramu n’ibikorwa by’imyuga n’ubumenyingiro hamwe no kugira inama Guverinoma ku bikorwa byose bishobora kwihutisha iterambere ry’imyuga n’ubumenyingiro mu Rwanda.

Abanyabugeni bagira ubuhanga mu gushushanya ukaba wagira ngo ni ifoto

Abafite uburwayi bwo mu mutwe bakeneye kwerekwa urukundo

Ushinzwe serivisi y’ivugururamibereho mu bitaro bya Caraes Ndera, Nyirabakungu Pacifique, avuga ko mu myaka 25 amaze akora uwo murimo muri ibyo bitaro bakira abarwayi ingeri zose bazanywe n’imiryango yabo, abavuye hanze y’i gihugu, abazanywe na Polisi, inzego z’ibanze, abagiraneza ndetse n’abazanywe n’imiryango itari iya Leta.

Mu gihe gito uyu muryango wahamaze uganirirwa ku mibereho y’abarwariye i Ndera, hagarutswe ku mbogamizi abakira aba barwayi bakunze guhura nazo.

Nyirabakungu ati “Inshuro nyinshi duhura n’imbogamizi z’akato gahabwa abarwayi bo mu mutwe, imyumvire y’Abanyarwanda bamwe batarumva ko umurwayi wo mu mutwe yavurwa akoroherwa ndetse agasubira mu buzima busanzwe”.

Avuga ko sosiyete Nyarwanda ikwiye guhindura imyumvire mbere na mbere igafasha uwabashije koroherwa kuko ibinini cyangwa inshinge ntibihagije, ahubwo hakenewe no kumwereka urukundo bityo akisanga mu bandi ntiyiyumvemo gutereranwa kuko bituma adakira burundu.

Basuye abarwaye

Yongeraho ko hari n’ikibazo cy’ubushobozi buke bw’abazanywe kwa muganga “birashoboka cyane ko umurwayi azanwa kwa muganga afite ubwishingizi ariko ugasanga amikoro ye atamwemerera kwishyura 10%. Kuba afite umwenda umwe kandi akeneye guhindura undi mwenda, kubura itike imucyura igihe yorohewe, kutagira umusura, kutabasha kwivuza ubundi burwayi runaka”.

Avuga ko abarwariye i Ndera baturutse hanze y’i gihugu akenshi bibagora kuko bahamara igihe kirekire batagira ababacyura i wabo kandi nyamara hakenewe ibitanda byo kwakiriraho abandi barwayi bashya barembye.

Ati “Abarwayi baturutse hanze akenshi baza barembye bavuga indimi zitumvikana, nta mwirondoro, nta muryango, abo baratugora cyane. Abo barwayi nta bwishingizi baba bafite kandi nta nyunganizi bagira yo guha ibitaro”.

Nyirabakungu avuga ko abazanwa na Polisi cyangwa n’indi miryango runaka iyo bagerageje kubasubiza muri iyo miryango yabo bamaze koroherwa, imiryango ntijya ibakira ahubwo ibasubizayo vuba iti mujyane umuntu wanyu.

Babageneye impano zitandukanye

Avuga ko iyo mvugo idakwiye kuko umurwayi wo mu mutwe ari umuntu nk’abandi kandi ari uwa bose.

avuga ko basuye abarwayi b’i Ndera nka bagenzi babo kuko bo babashije koroherwa kandi bazi agaciro ko kwerekwa urukundo, ariyo mpamvu bataje imbokoboko n’ubwo bidahagije, ariko ari igikorwa ngarukamwaka kugeza ubwo buri Munyarwanda wese azajya yumva ko uwarwaye uburwayi bwo mu mutwe ari umuntu nk’abandi.

Ati “Twazanye ibitenge makumyabiri (20) birimo bitatu bazabadoderamo imyambaro ibakwira, amasabune, amavuta yo kwisiga, Cotex n’ibindi”.

Intego z’umuryango nyamukuru NOUSPR-Ubumuntu ni ugukora ubuvugizi no guharanira uburenganzira bw’abarwayi bo mu mutwe batabasha kwivugira.

Umutesi yongeraho ko hakwiye ubuvugizi bwimbitse ku bijyanye n’imiti ihabwa abarwayi bo mu mutwe, ndetse no guhabwa agaciro aho bari hose. Asaba Leta ko muri Politike yayo ikwiye no gutekereza ku barwayi bo mu mutwe.

Umuyobozi wa NOUSPR-Ubumuntu, Umutesi Rose

Nyirabakungu Pacifique, asaba ko abarwayi bo mu mutwe borohewe bakwegerezwa ubuvuzi bahabwa bwaba ubw’imiti cyangwa se ibiganiro kugira ngo hatagira ucikiriza gahunda n’imwe ya muganga kuko utayikurikije yongera kuremba.

Basaba sosiyete nyarwanda kudaha akato umurwayi wo mu mutwe worohewe, ntibamubone mu ishusho y’igihe yari arembye.

Bamwe mu borohewe bagize umuryango uwo muryango, basaba ko bashyirirwaho imiryango myinshi iharanira uburenganzira bwabo, ndetse Leta ikaborohereza kubona imirimo bisangamo kuko bafite ubumenyi butandukanye.

Uyu ati “Nk’uko Leta ifasha abaturage batishoboye kujya mu byiciro biborohereza imibereho ndetse na gahunda zibafasha kubona amafaranga nka VUP, natwe nidufashe kuko akenshi twebwe twarize, imirimo twahawe ntitubashe kuyikora kuko duhabwa akato ngo turi abasazi”.

Nyirabakungu Pacifique

Caraes Ndera kuri ubu bafite abarwayi 319, abamaze igihe kirekire harimo abaje mbere ya 1994 ni 52, abanyamahanga barimo bakaba 10.

Kuri iki Cyumweru ikipe ya Rayon Sports yari yateguye ibirori ngarukamwaka bitari byabaye umwaka ushize kubera icyorezo cya COVID-19, ni ibirori bizwi nka rayon Sports Day aho ubusanzwe iyi kipe yerekaniramo abakinnyi izifashisha mu mwaka w’imikino ndetse bagahabwa na numero bazambara.

Ni ibirori kandi byari byitabiriwe n’abafana, akaba ari bwo bwa mbere abafana b’umupira w’amaguru bari bongeye kugaruka ku kibuga nyuma y’imyaka hafi ibiri.

Ni ibirori byatangijwe no gususurutsa abafana byari byitabiriwe n’abacuranzi b’itsinda rizwi nka Symphony Band, ndetse n’abahanzi nka Khalfan Govinda ndetse na Senderi International Hit ufite indirimbo ebyiri yahimbiye ikipe ya Rayon Sports.

Nyuma yahoo hakurikiyeho umuhango wo kwerekana abakinnyi 28 Rayon Sports izifashisha mu mwaka w’imikino wa 2021/2022, ndetse iza no kwerekana kapiteni mushya wa Rayon Sports ari we Muhire Kevin.

Haje gukurikiraho umukino wagombaga guhuza abakeba Rayon Sports na Kiyovu Sports, umukino utaje guhira ikipe ya Rayon Sports kuko yatsinzwe ibitego 2-1, aho ibya Kiyovu Sports byatsinzwe na Bigirimana Abedi na Mugenzi Bienvenu, mu gihe icya Rayon Sports cyatsinzwe na Essomba William Leandre Onana.

Mu mafoto ni uku ibirori byagenze

Abafana bari bagarutse ku kibuga

Hakurikiyeho kwerekana abakinnyi

Hakurikiyeho umukino wa Rayon Sports na Kiyovu Sports

Muri gahunda y’umunsi ngarukamwaka wo kumurika ibyo abanyeshuri biga muri iri shuri bakora, uzwi nka “Career day”, wabaye tariki 22 Ukwakira 2021, abo banyeshuri bashimangiye ko igihe kigeze ngo abantu bashishikazwe no kwagura ibitekerezo bituma ibyo bakora bigirira abandi akamaro.

Umunyeshuri witwa Ngabo Alain wiga ibijyanye n’ubwubatsi(Civil Engineering) mu ishuri rikuru ry’ubumenyingiro rya INES-Ruhengeri, yagize igitekerezo afatanyije na mugenzi we witwa Iraguha Robert, cy’uburyo bashobora kujya bakusanya amacupa ya plastique aba anyanyagiye hirya no hino, bakayabyaza ibindi bintu.

Ngabo Alain yerekana uko bashongesha amacupa ya plastique bikabyara peteroli

Nibwo baje gukora ubushakashatsi, bwatumye bavumbura ko ibyo bikoresho bya plastique, biba byihishemo peteroli iri ku kigero cya 60%; maze batangira umushinga wo gutwika ayo macupa mu ifuru bikoreye yabugenewe, bakaba bayashongesha ku bushyuhe buri hagati ya degree Celsius 300-900, akabyara peteroli.

Ngabo yagize ati: “Hanze aha usanga hari ibintu bya plastique biba binyanyagiye hirya no hino, bikangiza ubutaka n’ibidukikije. Rero twagize igitekerezo cyo gushaka uburyo twabibyazamo umusaruro, tukabikoramo peteroli ishobora kwifashishwa mu mirimo, yaba irebana no gutwara abantu n’ibintu, gukoreshwa nk’urumuri n’ahandi yakwifashishwa. Ni umushinga tukigerageza ariko twifuza ko uzakura ukagera ku rwego rwo kuba twajya tugemura peteroli ku masoko atandukanye, kugira ngo abayikeneye bayibone bitabagoye”.

Mugenzi we witwa Gad Nishimwe yavumbuye igikoresho kigenewe kujugunywamo imyanda kizwi nka (Dustbin cyangwa poubelle) ikoranwe ikoranabuhanga rituma umuntu mu gihe ayegereye, agiye kuyijugunyamo imyanda, ihita yifungura bitamusabye kuyikoraho. Ikindi ni uko idakenera abagenzura ko imyanda yuzuye, kuko yo ubwayo ikoranywe ubushobozi bwo kubimenyekanisha, nyirayo akabimenyera mu butumwa yakira kuri telefoni ye ngendanwa.

Ibi ni bimwe mu bikoresho byifashishwa mu kumenamo imyanda byavumbuwe n’umunyeshuri witwa Gad Nishimwe

Kuri uwo munsi wo kumurika ibyo abanyeshuri bakora, wabereye muri INES-Ruhengeri, abantu mu ngeri zitandukanye harimo abayobozi, abikorera n’abafatanyabikorwa b’iri shuri bawitabiriye, beretswe kandi banasobanurirwa imishinga itandukanye yubakiye ku guhanga udushya abanyeshuri bakora.

Padiri Dr Fabien Hagenimana, Umuyobozi wa INES-Ruhengeri, asobanura ko nyuma yo guha abanyeshuri ubumenyi bubashoboza kuvumbura udushya, habaho n’uburyo bwo kubahuza n’abashoramari, hagamijwe ko ibyo bakora bigera kure.

Yagize ati: “Twasanze kububakira ubushobozi bitagomba kugarukira gusa ku bumenyi bakura ku ntebe y’ishuri, tukaba twongeraho no kubahuza n’abashoramari mu bigo bitandukanye n’inganda, ku buryo umunyeshuri ashobora gushora imari ku giti cye nk’umushinga we yivumburiye, cyangwa se abo bashoramari bakagira ikigero runaka cy’imari yabo bawushoramo, noneho bakagira uko basaranganya inyungu, bityo wa munyeshuri akabyungukiramo”.

Padiri Dr Fabien Hagenimana avuga ko kubakira abanyeshuri ubushobozi bitagarukira mu kubaha ubumenyi gusa ahubwo banabahuza n’abashoramari kugira ngo imishinga yabo igere kure

Guverineri w’Intara y’Amajyaruguru Dancille Nyirarugero witabiriye iki gikorwa, yijeje abanyeshuri ko ubuyobozi bwiteguye gufatanya n’ubuyobozi bw’ishuri, mu kubaba hafi no gukurikirana ko imishinga batekereje ishyirwa mu bikorwa, mu rwego rwo kwirinda ko yababera impfabusa.

Ibi binashimangirwa n’Umushumba wa Diyosezi Gatolika ya Ruhengeri, akaba n’Umuyobozi w’ikirenga wa INES-Ruhengeri Musenyeri Vincent Harolimana, waboneyeho no gushimira Leta y’u Rwanda idahwema gukora ibishoboka ngo ireme ry’uburezi ryitabweho.

Yagize ati: “Kuba abanyeshuri ba INES-Ruhengeri bakora imishinga y’ubushakashatsi kandi ikaba yiyongera, ari na ko bisubiza bimwe mu bibazo byugarije abaturage, tubikesha Leta idahwema kutuba hafi n’inzego zayo zose zishinzwe kwita ku burezi. Turifuza ko ubwo bufatanye burushaho kurenga imbibi, bugashinga imizi mu zindi kaminuza, ibigo bikora ubushakashatsi, abanyamyuga, abikorera ndetse n’ibigo bishamikiye kuri Leta, kimwe n’abanyamyuga muri rusange, kugira ngo ibyo dukora birusheho kubyara umusaruro mu buryo bufatika”.

Ku munsi wa Career Day abanyeshuri bamurika ibyo bakora

Muri iki gihe icyorezo kicyugarije isi, Musenyeri Harolimana, yanibukije abanyeshuri n’abarimu ko nibatahiriza umugozi umwe bubahiriza ibisabwa byose mu kwirinda Covid-19, bizafasha kugitsinda burundu.

Umunsi wa “Career day” wanahuriranye no gutangiza ku mugaragaro umwaka w’amashuri 2021-2022, ndetse hanizihizwa umunsi wa Mutagatifu Yohani Pawulo wa II, umurinzi wa INES-Ruhengeri.

Nk’uko bivugwa n’umuhuzabikorwa wa AMI, Jean Baptiste Bizimana, ngo bateganyaga kwinjira muri gereza bakaganiriza abagororwa, babategurira kuzasubira mu miryango yabo amahoro, abashaka gusaba imbabazi bakabategura, hanyuma bakazabahuza n’abo bahemukiye kugira ngo bemere icyaha ku mugaragaro basabe imbabazi.

Bateganyaga no kuganira n’imiryango abagororwa bazatahamo kugira ngo bazabashe kubabanira batashye, ariko byose byabakundiye igihe gitoya, hanyuma Coronavirus yadutse, bahindura ingamba.

Bizimana agira ati “Ibiganiro twagombaga gutanga imbonankubone byabaye ngombwa ko twifashisha ikoranabuhanga, tukohereza ama CD ariho amajwi n’amashusho, na bo bakabaza banyuze inzira ijya kumera ityo. Ntabwo byagenze uko twabyifuzaga, n’ubwo hari umusaruro byatanze.”

Igikorwa cyo guhuza abagororwa n’abo bahemukiye ngo babasabe imbabazi na cyo ngo bagisimbuje icyo gufasha abahemutse kwandikira amabaruwa asaba imbabazi abo bahemukiye.

Bizimana ati “Nk’ubu aho kugira ngo tubahuze n’abo bahemukiye imbonankubone, twifashishije amabaruwa, ariko ugasanga usabwa imbabazi avuga ngo iyo mubona hari icyo nagombaga kumubaza.”

Kugira ngo batazibura bageze iwabo, babateguriye inyandiko ikubiyemo uko ubuzima bwifashe, nyuma y’imyaka myinshi bari muri gereza, aho bababwiraga bati nugera mu muryango uzitwara gutya, ibi uzabireka, ibi ntuzabikore n’ibindi.

Hari ibyo babashije kubona mu kazi bakoraga batari baratekereje mbere, harimo kuba mu rubyiruko baganiriye, barasanze 16% barahungabanye bityo bakaba bateganya kuzashyira imbaraga mu kurwigisha mu bihe bizaza.

Basanze kandi hari abagororwa bagera hanze nyuma y’imyaka myinshi bibura, ari yo mpamvu biyemeje kuzakomeza umurimo wo kwigisha abari muri gereza, cyane ko basanze abo bagiye bigisha hanyuma bagataha bagerageza kubana neza n’abo basanze neza, ntibananiranwe nk’abagiye barekurwa batigishijwe.

Ikindi cyabateye ishyaka ryo kumva bakwiye gukomeza, ni uko mu bagororwa bigishije harimo ba ruharwa 60 bari barinangiye ubu batangiye guhinduka.

Bizimana ati “Hari itsinda ry’abagera kuri 60 byabaye ngombwa ko dukorana amezi atandatu, duhura na bo gatatu mu cyumweru. Banyeretse ko tudakwiriye guhamba umuntu akibona, ko igihe cyose umuntu agihumeka ashobora kuva i buzimu akagaruka ibintu.

Bagiye bahinduka buke buke, kugeza ubwo bamwe baduhaye amabaruwa asaba imbabazi, atanga n’amakuru amwe n’amwe bari barahishe mbere.”

Muri ba ruharwa abo harimo abacengezaga amatwara y‘amacakubiri mu bandi bagororwa ubu biyemeje kubireka.

Dore bimwe mu byiza byo gukora imyitozo ngororamubiri ku bana bato:

• Gukura neza: Imyitozo ngororamubiri ifasha abana gukura neza haba mu gihagararo no mu mitekerereze.

Imwongerera kandi imbaraga z’umubiri, ndetse no kutananirwa kw’ingingo z’umubiri.

Imyitozo ngororamubiri ituma umwana yongererwa ubushobozi bw’imikorere myiza y’umutima, n’imyanya y’ubuhumekero, ari na byo bituma abasha kugira ibiro bikwiriye, isukari iri ku rugero nyarwo ndetse n’urw’ibinure mu maraso.

Ibi kandi bifasha umwana kuzabasha guhangana n’indwara z’umutima, diyabete, umubyibuho ukabije hamwe n’ubwoko bumwe na bumwe bwa Kanseri (cancer) mu gihe ageze mu myaka y’ubukure.

• Gukomera amagufa: Imyitozo ngororamubiri ifasha umwana kutiremerera nk’igihe yurira ahantu cyangwa asimbuka ari byo binamufasha kongera uburemere bw’amagufa ye no gukomera kwayo.

• Kwigirira icyizere: Abana bakora imyitozo ngororamubiri bibongerera ubushobozi bwo kwigirira icyizere ndetse no kubika ishusho nziza y’umubiri wabo.

Bibafasha kandi kugabanya umuhangayiko (stress), n’ibimenyetso by’agahinda gakabije n’iby’ubwoba (anxieté).

• Kubana neza n’abandi: Imyitozo ngororamubiri ifasha abana kongera ubushobozi bwo kubana neza n’abandi. Kunyeganyega bituma ataguma atigunga bikamufasha kwisanga mu bandi.

• Gutsinda mu ishuri: Gukora imyitozo ngororamubiri bifasha umwana gufata mu mutwe mu buryo bworoshye ndetse no gufata ibyemezo byihuse.

Abana bakunda gukina kandi bibafasha kugira imyitwarire myiza no kwiyumvamo ishuri bigaho, ibyo byose bigatuma babasha gukora neza.

Iki kigo kizajya gikusanyirizwamo amakuru yose y’inzego z’ibanze ndetse kibe n’urubuga rwo gusangira ubunararibonye hagati y’abayobozi, bategurirwe ingendoshuri haba mu gihugu imbere no hanze yacyo.

Ibi byatangarijwe mu Nteko Rusange ya 26 ya Ralga yabaye kuri iki Cyumweru, ku wa 24 Ukwakira 2021, ubwo harebwaga ibyagezweho mu miyoborere y’inzego z’ibanze muri manda y’imyaka hafi itandatu yari imaze ndetse n’ibibazo byagaragayemo ngo bizakosorwe.

Umunyamabanga Mukuru wa Ralga, Ngendahimana Ladislas, yavuze ko iki kigo kizabafasha kumenya ahari ibyuho mu buyobozi, ubumenyi abayobozi bakeneye n’ahagomba kongerwa imbaraga kuko byagaragaye ko hari abanengwa kutagira ubumenyi buhagije.

Ati “Twifuza gushyiraho iki kigo nk’icy’icyitegererezo, ariko si ikigo kigiye guhangana n’ibindi biriho ku rwego rw’igihugu, ahubwo kizaba ari ishami ryo muri Ralga imbere ariko rigamije kubaka ubwo budahangarwa n’ubutagamburuzwa bw’inzego z’ibanze.”

Yavuze ko ishyirwa mu bikorwa rya zimwe mu ntego z’iki kigo rizatangira mu mwaka wa 2022, naho kucyubaka no kucyagura hashingwa amashami yacyo hirya no hino bizakorwa mu myaka ibiri cyangwa itatu iri imbere uhereye mu 2021.

Yakomeje ati “Ibikoresho by’ingenzi bizakoreshwa muri izo gahunda turi guteganya, bimwe twatangiye kubitegura mwabonye ko harimo gahunda yo kwandika, gukora ubushakashatsi ku mateka y’imitegekere y’u Rwanda kuva igihe cy’ubukoloni cyatangira, kwandika amateka ya Ralga, n’ubuhamya bw’abayobozi kugira ngo bitazibagirana.”

  Iki kigo kizajya gihuza abantu bose bigeze kuba abayobozi

Minisitiri w’Ubutegetsi bw’Igihugu, Gatabazi Jean Marie Vianney, yavuze ko iki kigo kizaba ari urubuga rwiza ruzatuma ababaye abayobozi batibagirana ngo bagende bahere kuko nyuma ya manda yabo bazajya bakigumamo bakomeze kugira inama no gushyikirana n’abasimbuye.

Ati “Ukaza hano mu nama warabaye meya hashize imyaka 20 ukahahurira na meya w’umwuzukuru wawe. Ibyo ni ibintu abantu bakwiye gutekereza kugira ngo abantu badatakarira aho ngaho hanze. Burya iyo umuntu atakiri mu nshingano hari igihe atabona umwanya wo gutanga igitekerezo, rero aba akeneye umwanya wo kongera guhura na bagenzi be.”

Minisitiri Gatabazi yasabye Ralga gukomeza kuba hafi y’abayobozi b’inzego z’ibanze, ikabubakira ubushobozi kugira ngo bakore akazi kabo neza ndetse bafashwe gukora abadakorera ku gihunga, kugira ngo inzego z’ibanze zo mu Rwanda zibe zihamye zidahuzagurika.

Umunyamabanga Mukuru wa Ralga yavuze ko guhugura abayobozi byo bigiye gutangira ariko kubaka iki kigo byo bizakorwa mu byiciro hakurikijwe uko ubushobozi buzajya bugenda buboneka.

Gusa yagaragaje ko mu ngengo y’imari ya 2021-2022 hateguwe arenga miliyari y’amafaranga y’u Rwanda azakoreshwa mu ishyirwa mu bikorwa ry’iki kigo cy’icyitegererezo.

Iki kigo kigiye gusimbura icy’amahugurwa cya Ralga (Local Government Institute, LGI) cyari giteganyijwe kubakwa mu Karere ka Rwamagana gitwaye arenga miliyari enye; zimwe mu nshingano zayo zo guhugura abayobozi zizahabwa Local Government Centre of Excellence, izindi zo gucunga abakozi b’inzego z’ibanze zihabwe Ikigo cy’Igihugu cy’Amahugurwa mu by’Imicungire y’Abakozi n’Umutungo (RMI).

Minisitiri w’Ubutegetsi bw’Igihugu, Gatabazi Jean Marie Vianney, yashimiye abayobozi barangije inshingano zabo asaba Ralga gukomeza kubaba hafi no kubaka ubushobozi bw’abashya mu nshingano

Umunyamabanga Mukuru wa Ralga, Ngendahimana Ladislas, yavuze ko iki kigo kizahindura imikorere y’abakozi b’inzego z’ibanze

Umunyamabanga wa Leta muri MINALOC, Nyirarukundo Ignatienne, ni we watangije Inteko Rusange ya Ralga ya 26 ku mugaragaro

Ni inama yatanzwemo ubuhamya butandukanye bw’abayobozi aho ikigo cy’icyitegererezo kizajya gikusanya ubu buhamya kikabubika

Inteko Rusange ya Ralga yahuje abayobozi batandukanye kuva ku rwego rw’intara kugera ku rw’umudugudu

Mu nama yahuje abashinzwe ubuhinzi n’abafite inganda zitunganya umusaruro wa kawa muri aka karere, byavuzwe ko hari ibilo 120 by’ifumbire byafatiwe mu Kivu bigiye kugurishwa muri Repubulika Iharanira Demokarasi ya Congo bakurikirana bagasanga ari iyari yahawe abahinzi ba kawa. Hari kandi indi fumbire yafatiwe mu Murenge wa Gitesi nayo igiye kugurishwa kandi yari yahawe abahinzi ngo bayishyire mu ikawa.

Umuyobozi w’Uruganda Kopaki rutuganya umusaruro wa kawa mu karere ka Karongi, Bahati Thierry, avuga ko kuba bamwe mu bahinzi bahabwa ifumbire yo gushyira mu ikawa bakayigurisha bigira igaruka zirimo no gutuma inganda zitabona umusaruro uhagije wo gutunganya.

Yagize ati “Ni byo hari abahinzi ba kawa bagurisha ifumbire tuba twabahaye. Hari ababeshya ko bafite ibiti byinshi bya kawa kandi bafite bike bahabwa iyi fumbire bagahita bayigurisha. Ibi bigira ingaruka nyinshi kuko hari uyibura kandi yakagombye kuyibona, indi ngaruka ni uko umusaruro wakabaye uboneka iyo ifumbire itagiyemo ntuboneka. Kandi umusaruro iyo utabonetse n’ubwiza bwawo buba bwagabanutse. Yaba umuhinzi arahomba ndetse n’igihugu cyose muri rusange kigahomba umusaruro.”

Uruganda rwa Kopaki rufite ubushobozi bwo gutunganya toni 1000 ariko ntirwazibona kuko umusaruro wa kawa ukiri muke.

Bahati avuga ko toni nyinshi babonye ari 950 mu 2018 mu gihe mu 2020 umusaruro wa kawa wagabanutse ugera kuri toni 400 gusa.

Umuhinzi wa Kawa, Habimana Emmanuel, akaba n’Umuyobozi w’Uruganda rwa Twumba, avuga ko kuba bamwe mu bahinzi ba kawa bagurisha ifumbire yagenewe kuyifumbira bituma inganda zihanganira umusaruro muke wabonetse.

Ati “Umusaruro tubona mu nganda ntabwo uhagije kuko uramutse uhagije, ntabwo inganda zajya zirenga zone zahawe gukoreramo ngo zijye gushakisha umusaruro hirya no hino.”

Umuyobozi wungirije w’Akarere ka Karongi ushinzwe Iterambere ry’Ubukungu, Niragire Théophile, yabwiye IGIHE ko bafashe ingamba zo guhangana n’ikibazo cy’abahabwa ifumbire yo gushyira mu ikawa bakayigurisha.

Yagize ati “Ntibigikunze kubaho kuko twafashe ingamba zo gufatanya na ba nyir’inganda, amakoperative y’abahinzi ndetse n’inkeragutabara kugira ngo tujye dukurikirana ko ifumbire yose umuhinzi yahawe yakoreshejwe icyo yagenewe.”

Mu rwego rwo gufasha abahinzi ba kawa kongera umusaruro, umuhinzi ahabwa ifumbire n’imiti ku buntu, akazakatwa amafaranga yabyo ku musaruro yagurishije.

Akarere ka Karongi gashishikariza abahinzi gukunda kawa no kuyitaho uko bikwiye kuko ari kimwe mu bihingwa byinjiriza igihugu amadevize.

Mu mwaka w’ingengo y’imari 2019/2020, bitewe n’icyorezo cya COVID−19, ikawa u Rwanda rwohereza mu mahanga yagabanutseho 6%, amadevize u Rwanda rukura mu ikawa agabanukaho 11%.

Ikigo cy’Igihugu gishinzwe guteza Imbere Ibyoherezwa mu Mahanga bikomoka ku Buhinzi n’Ubworoi, NAEB, kivuga ko muri uyu mwaka u Rwanda rwohereje mu mahanga toni 19,723 rwinjiza miliyoni 60.4$.

Abahinzi b’ikawa mu Karere ka Karongi batunzwe agatoki mu mugambi wo kugurisha ifumbire

Ni ibibazo byashyizwe hanze nyuma y’ifungwa ry’Umuyobozi w’Inama y’Ubuyobozi ya SOSERGI, Bizimana Edouard, watawe muri yombi ku wa 20 Ukwakira 2021. Icyo gihe yari kumwe n’umuntu wica inzugi n’umuhesha w’inkiko bari gufungura ibiro byari byarafunzwe na Kalisa Kirenga washyizweho nk’Umuyobozi w’Agateganyo w’iyi sosiyete.

Safari Augustin uri mu bagize Inama y’ubuyobozi ya SOSERGI avuga ko bimwe mu bibazo byateje umwiryane harimo n’inyerezwa ry’amafaranga.

Yakomeje ati “Nk’inama y’ubuyobozi twasanze umukozi wo muri Cantine igaburira abakozi yarakoze uburiganya, umunzani akoresha utwiba ibilo bibiri. Twafashe icyemezo cyo kumuhindura ariko umuyobozi ntiyabyemera. Twagiye mu butumwa bwo kugura imodoka i Kigali tuyigura n’umuntu utari muri kampani tuyigura miliyoni 37 Frw ariko perezida agiye gukora ihererekanya asanga ari miliyoni 25 Frw zanditseho arabyanga yishyura 25 Frw zanditse ni nayo mvano y’amakimbirane kuko yanze ko miliyoni 12 zinyerezwa.’’

Yashyize mu majwi uwari ubakuriye kuko yagiranye amasezerano y’amahimbano n’uwo baguze iyo modoka ariko ashaka kunyereza miliyoni 12 Frw kuko amasezerano y’umwimerere agaragaza ko yaguzwe miliyoni 25 Frw aho kuba miliyoni 37 Frw.

Ndimubanzi Jean Bosco usanzwe ari umunyamigabane muri SOSERGI yavuze ko ipfundo ry’ibibazo ari umuyobozi wongeje imishahara abakozi akiheraho ariko nta burenganzira yahawe n’Inama y’Ubuyobozi.

Yagize ati “Dufite ikibazo cy’imishahara aho umuyobozi wa Sosergi Kirenga Kalisa yongeje imishahara yihereyeho kandi nta baruwa yahawe ibimwemerera. Hashize amezi atanu yariyongeje aho yikuye ku bihumbi 380 Frw yiha ibihumbi 900 Frw, anongeza umucungamutungo n’ushinzwe abakozi. Iyo bitavumburwa byari kuzateza igihombo gikabije.’’

Nsengiyumva Marcel na we uri mu banyamigabane ba SOSERGI yasabye inzego zibishinzwe gukurikirana ikibazo ku buryo abanyereje umutungo bahanwa.

Ati “Nk’abanyamigabane twumva amakuru y’uko harimo ibibazo bijyanye no kunyereza umutungo bikarangira ahubwo byiswe amakimbirane. Ndasaba inzego za Leta cyane RIB ko yakwinjira mu kibazo ikagisesengura neza, ikareba neza n’ikibazo cy’abanyereza umutungo. Nk’abanyamigabane turababaye, iki kibazo kimaze iminsi; leta idufashe gikemuke kuko ubu harimo ibice bibiri.’’

Umuyobozi w’agateganyo wa SOSERGI, Kirenga Kalisa, yasobanuye imvano y’ibibazo avuga ko ntaho bihuriye no gushaka kwiyongeza umushahara.

Yagize ati “Ibyo kwiyongeza umushahara si byo kuko mpembwa umushahara w’umuyobozi w’agateganyo kandi umuyobozi w’inama y’ubuyobozi ni we usinya bwa nyuma imishahara. Icyo napfuye n’umuyobozi ni ukumubangamira mu kunyereza umutungo kuko yashatse ko musinyira amafaranga y’ubutumwa y’umurengera ndabyanga. Yavuze ko hari amafaranga y’ibikoresho by’imodoka yaguze ku mufuka we ndabyanga, yanazanaga n’inyemezabwishyu mpimbano nkazanga.’’

Umuvugizi w’Urwego rw’Igihugu rushinzwe Ubugenzacyaha, RIB, Dr Murangira B. Thierry, yabwiye IGIHE ko basaba abanyamigabane ba SOSERGI gutanga amakuru kugira ngo n’abandi bakurikiranwe.

Yakomeje ati “Nibagende batange amakuru kuri ibyo byose bizakurikiranwa; icyo tubasaba ni ugutanga amakuru kuko niba uwafashwe ariwe mukuru n’abandi bazafatwa mu iperereza. Nibegere RIB bayigaragarize abo bantu bandi.’’

SOSERGI ni sosiyete yashinzwe n’abakozi ba Bralirwa mu 2005, ifite ibikorwa birimo gukora isuku mu ruganda, gukora akazi k’amaboko karimo gupakira no gupakurura, gutwara abakozi ba Bralirwa, kubatekera, gucuruza ibisaguka mu gukora inzoga n’ibikoresho byifashishwa muri Bralirwa.

Muri Sosiyete y’Ubucuruzi ya SOSERGI igizwe n’abahoze ari abakozi ba Bralirwa haravugwamo umwuka mubi ushingiye ku inyerezwa ry’umutungo