Tag: featured

Abaganiriye na IGIHE bavuga ko kuri ubu ibikorwa byabo bitari byageza no kuri kimwe cya kabiri cy’uko bakoraga mbere ya Covid-19, ariko biri gutanga icyizere kuko hari igihe byageze no ku gipimo cyo hasi ya 10% y’ibyo binjizaga.

Nzabonimpa Théodore ufite Ikigo gikora Ubukerarugendo bushingiye ku Muco cyitwa Beyond Gorillas Experience kiyobora ba mukerarugendo bakunze gusura Pariki y’Igihugu y’Ibirunga yasobanuye uko COVID-19 yashegeshe iri shoramari.

Yagize ati “Natangiye mu 2010, ngenda niyubaka ku buryo mu 2019 twari tumaze kwiyubaka dufite abakozi barenga 30. Muri Covid-19 ubukerarugendo bwarahazahariye ku buryo twasubiye inyuma tubura n’ubushobozi bwo guhemba abakozi nabo barihangana barategereza ku buryo n’ubu tutarageza no ku gipimo ya 50% y’aho twari mbere ya Covid-19.”

“Abakerarugendo twakiraga abenshi ni abasuraga Pariki ariko bakanasura uduce two hanze yayo. Umusaruro twabonaga waragabanutse cyane kuko uwashoboraga kwinjiza ibihumbi nka 300 Frw ubu ntiyarenza 200 Frw. Mu byo twifuza ni uko abaturage bakomeza kwirinda bagakurikiza amabwiriza yo kwirinda kugira ngo ba mukerarugendo bagire icyizere ndetse natwe twirinde kwanduzanya ngo tutazasubira inyuma.”

Hafashimana Gervais, nyiri My Hill Eco Lodge iherereye mu Kiyaga cya Ruhondo avuga ko mbere gato ya 2019 ibintu byari bitangiye kugenda neza abakiliya babagana ari benshi bigatanga icyizere ko nko mu myaka ibiri byari kuba bimeze neza kurushaho.

Yagize ati “Umwaduko wa Covid-19 wasubije inyuma ibikorwa bitandukanye cyane ibijyanye n’ubukerugendo. My Hill nayo yagezweho n’ibyo bibazo ndetse abakozi bamwe barahagarikwa kubera kubura akazi. Aho Covid-19 igabanyirije umuvuduko kubera gukaza ingamba mu kuyihashya abakiliya bongeye gusura My Hill Eco Lodge ku buryo umubare w’abakozi wariyongereye uva ku bakozi batandatu ugera kuri 10 byumvikane ko nibikomeza kugenda neza hari icyizere cy’ejo hazaza.”

Akomeza avuga ko kuri ubu bifuza ko hakomeza gukazwa ingamba zo kwirinda Covid-19 no gukingira abaturage ku bwinshi kugira ngo serivisi nyinshi zifungurwe.

Ati “Ibyifuzo mfite ni uko hakomeza gukazwa ingamba mu kwirinda Covid-19, umubare w’abakingirwa Covid-19 ukiyongera hanyuma abantu na serivisi zitandukanye zigakomererwa ubuzima bukagaruka ku Isi hose.”

Usibye abakora ishoramari ku giti cyabo, abibumbiye muri koperative na bo bagizweho ingaruka n’ingamba zafashwe mu guhashya Covid-19 ariko na bo batangiye kwigobotora ingaruka zayo.

Umuyobozi wa Koperative COOPAV ikora Ubukorikori, Uwamahoro Agnes, avuga ko bahawe ubuzima gatozi mu 2007. Icyo gihe ngo bakoraga neza banohereza ibicuruzwa byabo mu mahanga, ndetse ngo bari bageze ku rwego rwo kwaka ibyangombwa by’ubuziranenge bitangwa na RSB gusa baza gukomwa mu nkokora n’icyorezo cya Covid-19.

Yagize ati “Twahawe ubuzima gatozi nka Koperative mu 2007, twagiraga abakiliya benshi biganjemo abazungu babaga baje gusura ingagi, bakagura ibihangano byacu ku bwinshi, ku buryo ku kwezi umuntu yashoboraga kwinjiza ibihumbi 100 Frw binarenga bitewe n’amahirwe. Hari ubwo abazungu bazaga bagatwara ibyo wakoze byose, ariko ubu aho Covid-19 yaziye umuntu yamara n’ukwezi ntacyo yinjije.”

Akomeza ati “Urumva ubucuruzi bwagendaga neza, twaratangiye kohereza mu mahanga ibyo dukora, twarinjiye no muri gahunda yo gushaka ibyangombwa by’ubuziranenge bitangwa na RSB. Covid-19 yaje tutarabibona, twarahombye birumvikana ariko ntitwacitse intege turacyakora ibihangano byacu tukabibika, kugeza igihe ibihe bizongera kumera neza amasoko akaboneka, n’ibyo byangombwa tukabishaka.’’

Ubusanzwe Koperative COOPAV Mararo ikora ubugeni burimo kuboha uduseke, gukora imitako itandukanye, gukora imipira, kubaza mu biti inyamaswa zikunze kuboneka muri Pariki y’Igihugu y’Ibirunga nk’ingagi n’izindi ifite abanyamuryango 70 ariko kuri ubu hari n’abamaze igihe bataboneka kubera ko nta nyungu bakiyibonamo kubera ibihe bya Covid-19.

Umwe mu bacuruza ibikoresho by’ubukorikori mu Karere ka Musanze, kazwi cyane mu bukerarugendo

Mu bushabitsi bukorerwa hafi y’amazi harimo n’amacumbi yakira ba mukerarugendo

Ni igikorwa cyakozwe n’urubyiruko rwiga muri Kaminuza y’Ikoranabuhanga n’Ubumenyingiro, UTAB, cyabaye nyuma y’uko bigeze kujya gusura uyu mukecuru bagiye kumusanira inzu yabagamo, babonye ishaje cyane bafata icyemezo cyo kwishakamo imbaraga n’ubushobozi bakamwubakira inshya.

Mukaruhamanya Beatrice, avuga ko akiba muri iyo nzu yendaga kumugwaho, yabagaho mu buzima bwo kwiheba, ahora atekereza ko nta bantu bagira urukundo, ariko ngo aho aboneye inzu yumvise icyizere cy’ubuzima kigarutse, ashimishwa cyane n’uko byakozwe n’urubyiruko kandi rwibwirije.

Yagize ati “Nabaga mu nzu iva cyane yenda no kungwaho, nabagaho mu buzima bwo kwiheba, numva urupfu rwaratinze kuntwara, ariko aho aba bana bampereye iyi nzu icyizere cyagarutse, mbonye ko hakiri urukundo n’abakiri bato babyigireho, bumve neza impanuro zo kwigira no kwiteza imbere Perezida wacu ahora abakangurira.”

Umuyobozi w’Ihuriro ry’Abanyeshuri biga muri UTAB, Iradukunda Kevin, avuga ko igitekerezo cyo kubakira uyu mukecuru ari bo ubwabo cyavuyemo, bakiyemeza gushaka ubushobozi bwo kubaka iyo nzu nubwo ari abanyeshuri bafite ubushobozi bucye.

Yagize ati “Twaje mu gikorwa cyo kumusanira, dusanga ntibyashoboka kuko inzu yabagamo yari ishaje cyane, twiyemeje guhuza imbaraga mu miganda, mu mikoro make dufite maze dukusanya amafaranga twubaka duhereye hasi, inzu, igikoni n’ubwiherero bwiza ndetse twamufashije gutangira ubuzima bushya abona ibiribwa n’ibikoresho byo mu nzu byose bifite agaciro ka miliyoni 4 Frw, yavuye mu banyeshuri n’abaterankunga twiyambaje.”

Umuyobozi Ushinzwe Amasomo n’Ubushakashatsi muri UTAB, Dr Niyonzima Eliezel, yashimiye uru rubyiruko rwitanze, abibutsa ko ibikorwa nk’ibi bidasaba ubushobozi bw’umurengera, ahubwo ari ubwitange n’umutima ukunze.

Umunyamabanga Nshingwabikorwa w’agateganyo w’Umurenge wa Byumba, Nshimiyimana Valens, ashimangira ko kubakira inzu umuturage utishoboye ari igikorwa cy’indashyikirwa bagezeho, kizabera urugero rwiza barumuna babo ndetse n’abagikoze bagaterwa ishema na cyo.

Yagize ati “Iki ni igikorwa cy’indashyikirwa urubyiruko nk’uru rwakoze, gikwiye kubera urugero rwiza barumuna babo, ikindi ni kimwe mu bidufasha kwesa imihigo ku bijyanye n’imibereho myiza y’abaturage. Tubijeje ko natwe aho bazadukenera hose nk’ubuyobozi tuzaba turi kumwe.”

Usibye kuba uru rubyiruko rwahaye uyu mukecuru inzu rwamwubakiye, rwamuhaye n’ibikoresho birimo intebe, ibitanda na matela n’ibyo kwiyorosa, ibiribwa n’ibikoresho by’isuku, ndetse banasannye izindi nzu z’abandi bakecuru, bashyiraho isakaro banabagenera ibiribwa.

Abanyeshuri ba UTAB bubakiye umukecuru inzu yo kubamo nyuma y’uko iyo yari asanganywe yari igiye gusenyuka

Uwo mugabo ukurikiranywe n’inkiko z’u Bufaransa yitwa Pierre Kayondo. Ku wa 28 Ukwakira 2021 nibwo dosiye ye yatangiye gusuzumwa n’Ubushinjacyaha bufite inshingano zo gukurikirana ibyaha by’iterabwoba.

Ikirego cye cyatanzwe n’Umuryango utegamiye kuri Leta wiyemeje gukurikirana abakekwaho Jenoside yakorewe Abatutsi, Collectif des parties civiles du Rwanda (CPCR).

Umuyobozi wawo, Alain Gauthier, yatangaje ko Pierre Kayondo yari umunyamigabane muri Radio Télévision des Mille Collines, RTLM, ndetse yafatwaga nk’umuntu w’imena mu ishyaka rya MRND ryari rifite urubyiruko rw’Interahamwe rwakoze Jenoside.

Ku rutonde rw’abantu 1136 bari abanyamigabane muri RTLM, Kayondo ni umwe muri bo. Ari ku mwanya wa 365 ndetse inyandiko IGIHE ifitiye kopi zigaragaza ko yatanze amafaranga 10.000 Frw ayanyujije kuri konti yari muri BCR.

CPCR isobanura ko hari ubuhamya bugaragaza uko Kayondo yagize uruhare muri Jenoside, mu bwicanyi bwakorewe i Gitarama ku matariki ya 20 Mata.

Kayondo yabaye Perefe wa Kibuye n’Umudepite. Bivugwa ko yagize uruhare rukomeye mu bwicanyi bwakorewe mu Ruhango n’i Tambwe muri Gitarama. We yafashije mu ishingwa ry’amatsinda y’Interahamwe ndetse anayaha intwaro byiyongera ku kuba yaritabiraga inama zayo.

Gauthier yatangaje ko Kayondo yari umuntu wa hafi wa Colonel Aloys Simba na Ephrem Nkezabera, bombi bahamwe n’ibyaha bya Jenoside yakorewe Abatutsi.

Umunyamategeko wa CPC, Me Domitille Philippart, yatangaje ko ari inkuru nziza kuba uyu mugabo ari gukurikiranwa.

Ubutabera bw’u Bufaransa bwatangiye iperereza kuri Pierre Kayondo ukekwaho ibyaha bya Jenoside

Byoroherejwe n’uburyo BioNTech iyobowe na Uğur Şahin n’umugore we Özlem Türeci yihaye intego yo guteza imbere urwego rw’ubuvuzi n’ubushakashatsi ku miti.

Ibiganiro byahise bitangira biza no kurangira muri Kanama uyu mwaka byemejwe ko mu Rwanda no muri Sénégal hagomba kubakwa inganda zikora inkingo za Covid-19.

Byemerejwe mu Budage mu biganiro byari byateguwe na kENUP Foundation, akadomo gashyirirwa i Kigali ku wa 26 Ukwakira 2021 ubwo amasezerano yasinywaga.

Inkingo za mRNA zigiye gukorerwa mu Rwanda, ni ubwa mbere zizaba zikorewe kuri uyu mugabane wa Afurika.

Amasezerano agena ko BioNTech izubaka uruganda kandi igashora imari mushinga w’ikorwa ry’izo nkingo. Ibikoresho byose bisabwa kugira ngo inkingo zikorwe, ni yo izabishaka ikanabigeza mu Rwanda.

Inshingano zo gupfunyika inkingo zizaba zifitwe n’umufatanyabikorwa wayo ariwe u Rwanda. Indi mirimo ijyanye n’ikorwa ry’inkingo izishingirwa n’igihugu hanyuma BioNTech abe ariyo itanga akazi ku bantu bagomba kuyikora nubwo ikiguzi cyayo kizishyurwa n’ibihugu.

Uruganda ruzubakwa mu Rwanda, ruzaba rufite ubushobozi bwo gukora dose miliyoni 50 z’inkingo ku mwaka. Mu gihe izo nkingo byagaragara ko zidahagije, gahunda ihari ni uko ubwo bushobozi buzongerwa.

Uko ibyo bikorwa, mu nganda haba harimo icyo umuntu yagereranya n’umurongo cyangwa inzira ikintu kinyuramo kugeza kirangije gukorwa. Niba ari inzoga, haba hari umurongo uhera ku gukora umusemburo, kwenga, ugakomeza kugeza inzoga ishyizwe mu icupa n’ibirango ku mufuniko. Uwo ubwawo witwa umurongo umwe.

Mu gukora ziriya nkingo, mu gihe bizaba bigaragara ko dose miliyoni 50 zidahagije ku mwaka, hazongerwa umurongo mu ruganda ku buryo ingano y’inkingo zikenewe zikorwa.

Uru ruganda ruzubakwa mu cyanya cyahariwe inganda i Masoro mu Mujyi wa Kigali. Ubutaka ruzubakwaho bwamaze gutegurwa ku buryo mu mwaka utaha imirimo izahita itangira.

Urebye imiterere y’amasezerano ajyanye n’izi nganda, birasa n’aho mu minsi ya mbere umuntu yabyita ko zizaba ari iza BioNTech ariko zikorera mu bihugu by’u Rwanda na Sénégal.

Gusa gahunda ihari ni uko BioNTech iteganya kuzazegurira ibyo bihugu byombi. Sénégal izubaka uruganda binyuze muri Institut Pasteur iyoborwa na Dr Amadou Alpha Sall.

Institut Pasteur de Dakar imaze igihe ikora inkingo zirimo Yellow Fever, iza Covid-19 zizakorwa ariho binyuze.

Ku ikubitiro izi nganda zizaba zigenzurwa na BioNTech . Impamvu ni uko ifite ubunararibonye, yujuje ibisabwa ku rwego mpuzamahanga kandi izobereye inzira zose binyuramo ngo urukingo rukorwe.

BioNTech ifatanyije n’igihugu, izaha ubumenyi abakozi aho mu masezerano havugwa mo ko “nyuma y’imyaka mike”, inganda zizashyirwa mu maboko y’igihugu zikaba arizo zizicunga.

Nyuma y’icyo gihe, igihugu gishobora gutanga akazi ku bantu bashobora no kuba abahanganye na BioNTech ku ruhando mpuzamahanga.

Amafaranga BioNTech izakoresha mu ishyirwaho ry’izi nganda yaba mu Rwanda na Senegal, ni ayayo ku giti cyayo, ntabwo ari ayo yagiye kuguza cyangwa se inkunga y’abagiraneza.

Ntabwo havugwa umubare wayo gusa bivugwa ko bishoboka ko ari hejuru ya miliyoni 100$.

BioNTech ni yo yagize uruhare mu ikorwa ry’urukingo rwa mbere rwa Covid-19 ifatanyije na Pfizer, Ikigo cy’Abanyamerika nacyo kizobereye mu bijyanye n’ikorwa ry’imiti; amahirwe ni menshi ko izo nkingo zatangira gukorerwa mu gihugu.

Perezida Kagame ari kumwe n’Umuyobozi wa kENUP Foundation, Holm Keller, mu Budage muri Kanama uyu mwaka

Uğur Şahin niwe washinze BioNTech

Uhereye ibumoso: Umuyobozi wa kENUP Foundation, Holm Keller; Umuyobozi wa BioNTech, Uğur Şahin; Umuyobozi wa Komisiyo ya EU, Ursula von der Leyen; Perezida Kagame na Macky Sall uyobora Sénégal

Minisitiri Gatabazi yabasabye kubakira ku muco w’ubukorerabushake budashyize imbere inyungu

Ibi Minisitiri Gatabazi yabitangaje ku wa Gatanu tariki 29 Ukwakira 2021, mu muhango wo gutangiza ku mugaragaro amahugurwa y’iminsi itanu abera mu Ishuri rikuru rya Polisi y’u Rwanda, riherereye mu Karere ka Musanze, yitabiriwe n’Abahuzabikorwa b’Urubyiruko rw’abakorerabushake, baturutse mu turere two mu gihugu hose, hiyongereyeho abagize Komite Nyobozi zabo ku rwego rw’igihugu.

Abayitabiriye bongererwa ubushobozi n’ubunyamwuga, buzatuma barushaho gukora neza imirimo yabo ya buri munsi, mu gihe bazaba bayasoje bakazahugura bagenzi babo ku rwego rw’Imirenge n’Utugari, hagamijwe kurema iminduka nziza mu iterambere.

Mu muhango wo kuyatangiza ku mugaragaro, Minisitiri Gatabazi, agaruka ku mpamvu y’aya mahugurwa, yasobanuye ko bayateguriwe kugira ngo bongererwe ubushobozi bwo gukorera hamwe no kwimakaza umuco w’ubukorerabushake mu banyarwanda.

Yagize ati “Icyo tugamije ni ugutoza uru rubyiruko kugira ngo barusheho kumva ko igihe bazaba bimakaje umuco w’ubukorerabushake, uzarushaho gushinga imizi ku buryo no mu myaka iri imbere tuzaba dufite abantu baba abakuru n’abato, biteguye gutabara aho rukomeye kandi baharanira kutagamburuzwa”.

Urubyiruko rwitabiriye amahugurwa y’iminsi itanu ni uruhagarariye abandi mu gihugu hose

Akomeza ati “Kugira ngo ibi bizakunde, ni uko uwabaye umukorerabushake ari urubyiruko, akwiye gukomereza muri uwo murongo no mu myaka iri imbere, ku buryo tuzaba dufite abantu bashobora guhindukira bakagira ibikorwa by’ubukorerabushake byo kwitangira abaturage bagiramo uruhare, yaba ari nk’umuganga akavura abandi ku buntu, yaba ari nk’umwarimu muri kaminuza akagira abo yigisha, bityo tukabona imibereho ya benshi ihinduka bitewe n’uko umuco w’ubukorerabushake wimakajwe muri benshi”.

Minisitiri Gatabazi yabahaye impanuro zibakangurira kuba intangarugero mu byo bakora, kutagamburuzwa n’ibibazo bahura nabyo, no gukora cyane baharanira ko igihugu gikomeza kugira umutekano.

Yagize ati “Ibikorwa byose mubamo mu buzima bwa buri munsi, byaba ibyo mutekereza, mukora cyangwa muhuriramo, mukwiye kubitwara mu murongo wo kumenya niba bifitanye isano n’umutekano mu buryo bwagutse. Icyo nshatse kuvuga ni uko, muri cya gihe umuturage azaba afite aho ataha, afite ibyo kurya, yarwara akivuza; noneho na bya bindi bimukikije bikaba ari ibidahungabanya umudendezo we; ibyo bizamufasha kubaho atekanye, abashe gukora ibiri mu nshingano ze neza kandi atange umusaruro ku gihu. Mwe rubyiruko rero, tubatezeho umusanzu ufatika mu gutuma ibyo bishoboka”.

Akomoza ku mukorerabushake nyawe, Minisitiri Gatabazi yabwiye uru rubyiruko ko ari umuntu urangwa n’imitekerereze n’imyumvire myiza, ituma akora ibikorwa bitagamije inyungu ze bwite, agaharanira gukora ibiri mu nyungu z’abandi, kandi akabikora ataganya ari nako asuzuma kenshi ko urwego ariho mu kubishyira mu bikorwa, rubera abandi urugero.

Urubyiruko rwagaragaje ko ayo mahugurwa bari bayakeneye ngo basobanukirwe uko barushaho kunoza akazi

Aya mahugurwa, yateguwe na Minisiteri y’Ubutegetsi bw’Igihugu, ifatanyije na Polisi y’u Rwanda, agamije kongerera uru rubyiruko rw’Abakorerabushake ubushobozi n’ubunyamwuga, buzatuma barushaho gukora neza imirimo yabo ya buri munsi.

Urubyiruko rwayitabiriye ruzahabwa ibiganiro n’inararibonye zitandukanye, mu borebana n’umutekano, imibereho myiza, iterambere ndetse n’amateka y’igihugu. Abaganiriye na Kigali Today, bayibwiye ko aya mahugurwa bari bayakeneye ngo barusheho gusobanukirwa inshingano zabo. Aho biteze kuzayasoza bari ku rwego rwo guhugura bagenzi babo mu Mirenge, bityo bazarushaho gusobanukirwa no kurangwa n’imikorere iri mu murongo igihugu kibifuzaho.

Kuri bamwe ngo basa n’abakangukiye kwibanda ku bikorwa bidasanzwe. Byiringiro Robert, Umuhuzabikorwa w’Urubyiruko rw’Abakorerabushake, yagize ati: “Aya mahugurwa aje yari akenewe, kuko hari byinshi twasobanuriwe, bigasa n’ibidukanguriye kumva neza ko hari ibyo tutakoraga mu buryo bunoze. Hari nk’aho wasangaga twubakira nk’umuturage cyangwa abo tworoza amatungo, ariko ntiduhindukire ngo turebe icyo ibyo bikorwa byamariye abaturage. Ibyo byose biri mu byo tugiye kongeramo ingufu, bityo tugaragaze uruhare rwacu rufatika mu byubaka igihugu”.

Mugenzi we witwa Uwonkunda Anny Benilde, Umuhuzabikorwa w’Urubyiruko rw’Abakorerabushake mu Karere ka Rulindo, we asanga kumenya hakiri kare ibyo umuturage akeneye, aribwo buryo bwiza butuma ikibazo afite kibonerwa igisubizo kirambye.

Yagize ati “Twasanze kugira igenemigambi tugenderaho, riri mu byajya bidufasha kubanza gutekereza byimbitse no gusuzuma icy’ingenzi umuturage akeneye. Kuko kuri ubungubu, twatekerezaga igikorwa runaka urugero nko kubakira abaturage uturima tw’igikoni kandi wenda ataribyo by’ingenzi bari bakeneye. Ubu rero icyo tugiye gushyira imbere, ni ugukorana bya hafi n’abaturage, tukamenya iby’ingenzi bakeneye kuruta ibyo twe twabakorera, kugira ngo binababyarire umuraruro kuko bazaba babigizemo uruhare”.

Barimo guhugurirwa mu Ishuri rikuru rya Polisi y’u Rwanda bakazayasoza bajya guhugura abandi

Urwego rw’Urubyiruko rw’Abakorerabushake, rwatangiye muri 2003, rutangirana abanyamuryango 50 bagiye biyongera kugeza ubwo ubu bamaze kugera ku bihumbi bisaga ibihumbi 400.

Abagera kuri 11% ni abo mu Mujyi wa Kigali, Intara y’Iburengerazuba igizwe na 32%, Intara y’Iburasirazuba yihariye 19%, Intara y’Amajyepfo ifite 24% n’Intara y’Amajyaruguru ibarizwamo 14% by’abayamuryango b’Urubyiruko rw’Abakorerabushake.

Mu butumwa bugaragara ku rubuga rwa Twitter rwa Polisi y’u Rwanda buvuga ko impamvu itumye uwo muhanda ufungwa mu gihe kigera ku minsi ibiri ari imirimo yo kwambutsa imiyoboro y’amazi igiye kuhakorerwa, ariho ihera isaba abasanzwe cyangwa n’abifuzaga gukoresha uwo muhanda kwihangana mu gihe iyo mirimo itaratangira.

Si uyu muhanda wonyine ufunzwe mu gihe cy’iminsi ibiri, kuko umuhanda Kimironko-Zindiro nawo uheruka gufungwa abawukoresha bagategereza ko imirimo irimo kuhakorerwa irangira.

Uretse iyo mihanda, kubera isiganwa ry’amagare ryo gukunda igihugu ritangira kuri uyu wa Gatandatu tariki 30 Ukwakira 2021, rikaza kuzenguruka Rugando (Kimihurura), Polisi iramenya abantu bose ko imihanda ikurikira iza kuba ifunze kuva saa yine za mu gito kugera saa saba z’amanywa.

KG 604, KG 630, KG 628 KG 601 KG 495 KG 604

Polisi ivuga ko abapolisi baza kuba bari mu mihanda kugira ngo bafashe abantu kubayobora.

Iyi nsanganyamatsiko yashyizweho nyuma y’umwaka n’igice Isi ihanganye n’icyorezo cya COVID-19, igihe Umugabane wa Afurika wagaragarijemo ubushobozi n’ubushake bwo guhangana n’iki cyorezo biciye mu kwirinda, kuvura abarwaye no gutangira gukingira abaturage.

Urubyiruko rwa Afurika rwitezweho kugira uruhare rugaragara mu kubaka sosiyete igendana n’iterambere n’ibindi bigezweho ku rwego rw’Isi.

Impamvu ya mbere ni uko ugereranyije n’ahandi ku Isi, muri Afurika ariho hagaragara ukwiyongera kw’abaturage biganjemo urubyiruko. Iya kabiri ni uko ruri ku mugabane ufite umutungo kamere mwinshi, uzakomeza gukenerwa bijyanye nuko abaturage n’inganda zifite ubushobozi bwo gutunganya uwo mutungo kamere byiyongera.

Impamvu ya gatatu ni uko Abanyafurika ari bwo bagitangira kumenyekanisha ubuhanzi, ubugeni n’ubundi bumenyi bifitemo ku rwego rw’Isi. Niba ejo hazaza hari mu biganza bya Afurika, ni ngombwa ko urubyiruko rwa Afurika rushyira hamwe imbaraga n’ibitekerezo mu kubaka ejo heza habereye ariko hazanabagirira umumaro, imiryango yabo, igihugu n’umugabane muri rusange.

  Iterambere rya Afurika rizagerwaho ari uko hari imikoranire hagati y’ibihugu

Ihuriro Nyafurika ry’Urubyiruko rizwi nka YouthConnekt ni gahunda igamije kubaka ubushobozi bw’urubyiruko, bihereye mu gusesengura ibibazo birwugarije, hagashakwa ibisubizo bya buri kibazo hashingiwe ku mwihariko wa Afurika, ari nabyo bizageza umugabane ku iterambere rirambye.

Ihuriro rya YouthConnekt ryatangiriye mu Rwanda mu 2012, bivuye mu gitekerezo cya Perezida wa Repubulika y’u Rwanda Paul Kagame aho yagaragaje ko byihutirwaga ko urubyiruko rwa Afurika rwishyira hamwe ngo rubyaze umusaruro ubukungu bw’umugabane rukomokaho.

Ubu butumwa bwakomeje kuba igetekerezo ngenderwaho ndetse n’icyerekezo ku bihugu 24 bigize iri huriro.

Ageza ijambo rye ku rubyiruko 8.000 rwitabiriye YouthConnekt yo mu 2019, Perezida Kagame yagize ati “Murasabwa kugira uruhare rugaragara mukoresha neza amahirwe mufite uyu munsi ngo mubashe kwiteza imbere. Amahirwe ntazigera abasanga aho muri, umuntu ni we uhaguruka agasanga amahirwe aho ari hose.’’

Bitewe n’inzitizi zituruka ku bwiyongere bw’abaturage, amateka y’ubukoloni, ubukungu bujegajega, imipaka yashyizweho n’abanyamahanga; Umugabane wa Afurika wakomeje kugira imbogamizi mu kubyaza umusaruro umutungo kamere wawo cyane ko n’abaturage ubwabo badatanga umusaruro uhwanye n’uko bangana.

Usanga izo mbogamizi ahanini zishingiye kuri politiki. Zikomoka kandi mu mategeko yakozwe n’amasezerano yasinywe n’ibihugu by’amahanga, imyaka myinshi mbere y’uko urubyiruko dufite uyu munsi ruvuka. N’ubwo bimeze bityo, uru rubyiruko tuvuga ni narwo rufite inshingano zo kugeza Umugabane wa Afurika ku iterambere riwubereye.

Iki ni cyo gisobanuro cya YouthConnekt yatekerejwe n’ubuyobozi bushyize imbere iterambere rya Afurika nk’igisubizo: Iyi gahunda yatangiye iyobowe n’u Rwanda, iha umwanya urubyiruko ruturutse mu bihugu bitandukanye bya Afurika wo gusangira ubunararibonye bw’ibihugu byabo mu bikorwa bigamije iterambere ry’umuturage.

  Igihe cyari iki!

Ku nshuro ya mbere, Ihuriro rya YouthConnekt ryateraniye mu gihugu kindi kitari u Rwanda nyuma y’uko byumvikanyweho na Komite Nshingwabikorwa ya Afurika Yunze Ubumwe hagamijwe kugera ku bantu benshi kurushaho. Ni ngombwa rero ko tugaruka ku butumwa bwatanzwe mu biganiro bitandukanye byaranze iri huriro cyane ibyatanzwe n’abari bahagarariye u Rwanda.

Mu Ihuriro YouthConnekt, u Rwanda rwari ruhagarariwe na Minisitiri w’Urubyiruko n’Umuco, Mbabazi Rosemary, aherekejwe n’abakozi ba Imbuto Foundation n’itsinda rigari rya ba rwiyemezamirimo bahagarariye urundi rubyiruko.

Madamu Jeannette Kagame abinyujije mu muryango yashinze mu myaka 20 ishize yashyizeho gahunda zitandukanye zifasha Abanyarwanda kugira ubuzima bufite agaciro.

Ibyatangiye ari umushinga (PACFA) ugamije guhangana n’ubukana n’ingaruka bya virusi itera SIDA yari imaze gukwira hose mu muryango ugikomerekejwe na Jenoside yakorewe Abatutsi mu 1994, PACFA yaje kwaguka ihinduka Imbuto Foundation yibanda ku bikorwa bigamije kubaka umuryango twifuza.

Kimwe muri ibyo bikorwa ni umwanya n’urubuga byashyizweho na Madamu Jeannette Kagame ngo abantu baganire ku bibazo by’ingutu byugarije umuryango Nyarwanda.

Ihuriro rya YouthConnekt ni urubuga rwiza rwo kuganiriramo. Ibi biganiro byabimburiwe n’ikiganiro ku nkomoko n’ukubaho kwa buri muntu, hakurikiraho ikiganiro ku mpamvu ari ngombwa kubaka Afurika ifite ingamba z’iterambere igenderaho ibi tukabihuza n’icyerekezo 2050 ndetse na gahunda ya ‘‘Africa Twifuza’’ mu 2063 (Agenda 2063), nyuma hibandwa ku kamaro ko kwita ku buzima bwo mu mutwe mu mwihariko wa Afurika; ibi byose bijyanye n’icyerekezo cya Imbuto Foundation.

Umwihariko w’ibikorwa by’uyu muryango uyobowe na Madamu Jeannette Kagame ni uguhanga udushya mu burezi, ubuzima n’ibindi bikibereye ingorabahizi ibihugu biri mu nzira y’amajyambere.

Dufashe urugero rwa gahunda ya iAccelerator, umukozi ushinzwe uyu mushinga Agasaro Orietta avuga ko ukorana na ba rwiyemezamirimo bifuza kuzana impinduka mu miryango. Uyu mushinga wibanda kuri gahunda z’ingenzi eshatu: ubuzima bw’imyororokere, kudaheza abafite ubumuga ndetse no gusigasira ubuzima bwo mu mutwe.

Binyuze muri uyu mushinga ba rwiyemezamirimo bahize abandi mu gushaka ibisubizo by’ibibazo bibangamiye umuryango, bahabwa ishimwe, igishoro n’amahugurwa bizabafasha gushyira mu bikorwa imishinga yabo.

Uyu mushinga wa iAccelerator ntabwo ari wo wonyine ushyigikira urubyiruko mu guhanga udushya.

Bill Nyirimihigo, umukozi ushinzwe ArtRwanda – Ubuhanzi, umushinga ushyigikira abahanzi binyuze mu marushanwa y’urubyiruko mu turere twose uko ari 30 no mu byiciro bitandukanye, na we yagarutse ku kamaro ko kwita ku buhanzi n’uruhare bufite mu iterambere.

Yibukije ko nk’uko bigenda mu zindi nganda, uruganda ndangamuco ruzatezwa imbere n’ubwitabire mu gukoresha no kugura ibikorewe mu bihugu byacu no ku Mugabane wa Afurika muri rusange.

  Umwihariko ku buzima bwo mu mutwe

Muri ibi bihe, urubyiruko rukomeje guharanira ko haba ubukangurambaga ku kamaro ko kwita ku buzima bwo mu mutwe, bihereye ku miryango igaragaramo akato cyangwa ihungabana muri rusange.

Umuyobozi Mukuru wungirije wa Imbuto Foundation, Umutesi Géraldine, yashishikarije urubyiruko rwitabiriye ibiganiro by’Ihuriro YouthConnekt kwita cyane ku buzima bwabo bwo mu mutwe kuko ari bo Museke Mushya wa Afurika.

Yibukije urubyiruko ko kugira ngo impinduka twifuza kubona ku Mugabane wa Afurika zigerweho, bisaba ko abantu bagira ibitekerezo bizima, imitima ikeye n’ubuzima bwiza.

Ibiganiro by’uyu mwaka by’Ihuriro YouthConnekt byahaye umukoro Imbuto Foundation wo gukomeza kubaka ubushobozi no gushora mu muryango ku buryo babasha gukoresha no gusangiza abandi ubumenyi bungutse.

Ibiganiro byagarutse kandi ku kamaro ko kwigira no kwishakamo ibisubizo ari nayo mpamvu gahunda ya Imbuto Foundation ari ukubaka ubushobozi mu Banyarwanda burenze gutanga serivisi n’amahugurwa.

Iyi gahunda igamije kubaka ubushobozi bw’umuryango, duhereye ku Banyarwanda batishoboye, hibandwa ku buzima bwiza, uburezi kuri bose n’ejo heza muri rusange ku buryo nabo bazabiraga abazabakomokaho.

Ihuriro rya YouthConnekt 2021 wari umwanya mwiza kuri Imbuto Foundation wo kumurikiramo intego n’icyerekezo by’igihe kizaza. Nk’umuryango uri mu kigero kimwe cy’imyaka na benshi mu rubyiruko rwitabiriye iri huriro twese twifuza kuramba kandi tukabaho neza, uyu wabaye umwanya mwiza wo kugaragaza ibyo umuryango Imbuto Foundation wifuza kugeraho mu myaka 20 iri imbere.

Urugendo rwa Imbuto rwaranzwe no kwigirira icyizere; kubasha gusangiza urubyiruko rwitabiriye iri huriro urwo ruhurirane rw’inzozi rujyana no guhiga n’icyizere, byari umunezero udasanzwe.

Afurika twifuza yuzuye amahirwe kandi irangwa no kwigira n’iterambere nk’uko duhora tubivuga, ntabwo kuyigeraho byoroshye. Ariko niba muri twe harimo abafite ubushobozi bwo kubitugezaho, ni mwe rubyiruko – murabishoboye!

Ihuriro ngarukamwaka rihuza Urubyiruko rwo ku Mugabane wa Afurika ryabereye mu Mujyi wa Accra muri Ghana hagati ya tariki ya 20 kugera 22 Ukwakira 2021

Minisitiri w’Uburinganire n’Iterambere ry’Umuryango, Prof Bayisenge Jeannette, aherutse kubwira IGIHE, ko umuryango ari imwe mu nkingi zahungabanyijwe n’icyorezo cyane.

Yagize ati “Hari ibibazo byinshi twari dufite mu muryango, bivuze ko na COVID-19 yaje ikabitiza umurindi. Aha twavuga nk’ubukungu muri rusange. N’ubundi twari dufite imiryango ibayeho munsi y’umurongo w’ubukene. Kuba Coronavirus yaraje igatuma abantu badakora nk’uko bakoraga, byanze bikunze hari ukuntu ubukene bwarushijeho kubazahaza.”

Yavuze ko ihungabana ry’uburenganzira bwa muntu “cyane cyane irishingiye ku gitsina” ryakomeje kugaragara.

Raporo ikubiyemo ibyo Ubushinjacyaha Bukuru bw’u Rwanda bwakoze mu mwaka w’ingengo y’imari wa 2020-2021, igaragaza ko ibyaha by’ihohotera rishingiye ku gitsina byiyongereye cyane kuko byihariye 14% by’amadosiye 67.512 bwakiriye.

Mu madosiye 9.414 y’ibyo byaha yageze mu Bushinjacyaha, agera ku 5.292 yari akubiyemo icyaha cyo gusambanya abana. Abagikurikiranyweho bari 5.306 barimo abagabo 5.116 n’abagore 190.

Icyo guhoza ku nkeke uwo mwashakanye cyatanzweho amadosiye 3.016 yakurikiranywemo abagabo 2.837 n’abagore 179. Ni mu gihe icyo gukoresha imibonano mpuzabitsina ku gahato cyo cyatanzweho amadosiye 1.106 yakurikiranywemo abagera ku 1.169, barimo abagabo 1.143 n’abagore 26.

Iyo raporo kandi igaragaza ko mu myaka itanu ishize, uwa 2020-2021 ari wo ibyo byaha byiyongereye cyane kuko amadosiye yabyo yavuye ku 7.004 yariho mu 2019-2020 akagera ku 9.414. Ni ukuvuga ko hiyongereyeho agera ku 2.410.

Mu 2018-2019 amadosiye yabyo yari 5.563, mu 2017-2018 aba 4.592, naho mu 2016-2017 yari 3.130.

• Abagabo barushijeho kuvuga ihohoterwa bakorerwa, umubare w’abangavu baterwa inda uriyongera

Nubwo ahanini imibare igaragaza ko abagabo ari bo bakurikiranwaho ibyaha by’ihohotera rishingiye ku gitsina mu bihe bitandukanye byagaragaye ko bo iyo barikorewe badakunze gutinyuka kurivuga ngo barenganurwe.

Ntuyenabo Léonidas ni umwe mu bakangurambaga bo muri Gatsibo mu Murenge wa Nyagihanga bihurije mu cyo bise “Inshuti z’umuryango” barwanya ihohoterwa n’amakimbirane bibera mu ngo bifashishije ubujyanama.

Begera imiryango bakayiganiriza ku buryo abayigize biyunga, byaba ngombwa hakiyambazwa inzego zibishinzwe igihe bisaba kujya mu mategeko.

Mu kiganiro na IGIHE, Ntuyenabo yasobanuye ko muri ibi bihe bya COVID-19 ari bwo babonye abagabo benshi batinyuka kuvuga ihohoterwa bakorewe.

Ati “Twabonye ingo zigera muri enye zemeye kutubwira ibyazo, abagabo baratinyuka batubwira ko nabo bahohoterwa.”

“Abagabo ntabwo batinyukaga kubivuga. […] Ubundi barabyimenyeraga kuko babyukaga batari mu rugo bagataha basa n’abaje kuryama gusa. Ariko kuguma mu rugo byatumye noneho bibarenga babishyira ahagaragara.”

Yanavuze ko kuba abana baramaze igihe mu ngo batari ku ishuri, byongereye amakimbirane hagati yabo n’ababyeyi babo ku buryo byatumye ubwo amashuri yafunguraga bamwe batinda gutangira.

Ibyo byiyongeraho kuba umubare w’abangavu baterwa inda waratumbagiye kurusha ibindi bihe.

Ati “[Abangavu baterwa inda] twari dusanzwe tubafite ariko icyo gihe barushijeho [kwiyongera] ku buryo n’ubu hari abo tugifite batwite.”

“Ariko twagiye tubegera kenshi kugira ngo bagaragaze ababateye inda. Nubwo bakunda kubihishira, twarabibonye kandi twarabikurikiranye cyane.”

Yavuze ko bakoze ibishoboka ngo abatera abo bana inda bamenyekane bagezwe imbere y’amategeko.

Ati “Tunegera abo bana tukabaganiriza kugira ngo batumva ko bataye agaciro bakitera icyizere. Hari igihe umukobwa aterwa inda akumva ko yataye ubumuntu agatangira kwitwara uko bidakwiriye.”

Nubwo nta mibare ihamye yashyizwe ahagaragara, mu bice bitandukanye by’igihugu hagiye hagaragazwa ko abana baterwa inda bataruzuza imyaka 18 biyongereye.

Nko mu Mujyi wa Kigali hagaragajwe ko hagati ya Nzeri 2020 na Nzeri 2021, abakobwa 1.336 bari muri icyo kigero batewe inda.

Kugeza ubu ingaruka za COVID-19 mu muryango ntizirarangira ariko zigenda zigabanuka. Mu 2020 ni bwo byari bikaze cyane bitewe n’ingamba zikakakaye zagiye zishyirwaho zirimo na Guma mu Rugo y’Igihugu cyose.

Raporo y’Urwego rw’Igihugu rw’Ubugenzacyaha (RIB) igaragaza ko ibyaha bishingiye ku ihohotera n’amakimbirane byo mu ngo byiyongereye ku kigero cya 19,62% muri uwo mwaka.

Byagiye bituruka ku gushyamirana mu miryango harimo gukubita no gukomeretsa, kwica, gukoresha imibonano mpuzabitsina ku gahato ndetse no gufata abana ku ngufu byavuye ku 9.064 mu 2019 bikagera ku 10.842 mu 2020.

Icyuho mu ishyirwa mu bikorwa ry’ingamba zo gukumira ibyo byaha

Minisitiri Prof Bayisenge yavuze ko inyinshi mu ngamba zo gukumira ihohoterwa n’amakimbirane bibera mu miryango byakorerwaga mu mugoroba w’imiryango mu nteko z’abaturage.

Ati “Izo mbuga zahuzaga abantu ari benshi muri rusange ntibyashobotse ko zikomeza kubaho, bivuze ko haje n’icyuho mu gushyira mu bikorwa ingamba twabaga dufite zigamije gukemura ibyo bibazo.”

Icyakora yashimangiye ko nubwo nta bundi buryo bwihariye bwo guhangana n’ibyo bibazo bwashyizweho mu bihe bya COVID-19, hongerewemo ingufu mu busanzwe ndetse ubufatanye n’inzego zirimo Polisi na RIB burushaho gukazwa.

Migeprof yanatangije ubukangurambaga bw’umwaka umwe buzibanda ku kumenya aho abana bahohotewe bari n’ibibazo byihariye bafite, hagashyirwa imbaraga mu gushyira ku mugaragaro ababakoreye ibyaha.

Harateganywa n’ubushakashatsi ku gituma habaho gusambanya abana kuko hari n’ababyeyi basambanya abo bibyariye. Buzakorwa bwita ku mwihariko wa buri karere.

Inteko z’abaturage ni rimwe mu mahuriro agira uruhare mu gukemura amakimbirane yo mu ngo

Minisitiri w’Uburinganire n’Iterambere ry’Umuryango, Prof Bayisenge Jeannette, yavuze ko bongereye ubufatanye n’izindi nzego kugira ngo amakimbirane yo mu miryango adakomeza kwiyongera mu bihe bya Covid-19

Perezida Kagame ubwo yari mu nama ya G20 yari yabereye muri Saudi Arabia muri 2020

Abitabiriye iyo nama baraganira ku ngingo zitandukanye harimo izerekeranye n’ubuzima, kuzahura ubukungu bwazahajwe ahanini n’icyorezo cya COVID-19, imihindagurikire y’ibihe ndetse n’ibijyanye no kongera ingufu z’amashanyarazi nka kimwe mu by’ibanze byihutisha iterambere.

President Kagame has arrived in Italy where he will be participating in the two day #G20RomeSummit of Heads of State and Government, convening world leaders for discussions focused on health, economic recovery, climate and energy.

— Presidency | Rwanda (@UrugwiroVillage) October 29, 2021

This evening in Italy, President Kagame met with Director General of @WTO, Dr. @NOIweala ahead of the #G20RomeSummit. pic.twitter.com/mnqOogcpGV

— Presidency | Rwanda (@UrugwiroVillage) October 29, 2021