Tag: featured

Ibi Perezida Kagame yabigarutseho kuri iki Cyumweru tariki ya 31 Ukwakira 2021 ubwo yagezaga ijambo ku bitabiriye Inama y’Ibihugu 20 bikize ku Isi, G20 iri kubera mu Butaliyani.

Ni ijambo Perezida Kagame yavuze ubwo habaga ikiganiro ku ‘mihindagurikire y’ibihe n’ibidukikije’.

Perezida Kagame yagaragaje ko intego ibihugu bikize byihaye yo kujya bigenera ibikiri mu nzira y’amajyambere miliyari 100$ ku mwaka mu guhangana n’ingaruka ziterwa n’ihindagurika ry’ikirere, isa nk’iyananiranye.

Imyaka isaga itandatu irashize, i Paris mu Bufaransa Umuryango w’Abibumbye wemeje ko hari amafaranga azajya ava mu bihugu bikize agahabwa ibihugu biri mu nzira y’amajyambere mu guhangana n’ingaruka ziterwa n’ihindagurika ry’ikirere.

Ayo mafaranga yemejwe ko nibura buri gihugu kizajya gihabwa miliyari 100 z’amadorali ya Amerika agamije guhangana n’ingaruka zatewe n’ibiza, nk’inkangu, umwuzure, amapfa adasanzwe n’ibindi biterwa n’ihindagurika ry’ikirere.

Ni ingingo imaze igihe yigwaho ariko itarahabwa umurongo uhamye, aho ibihugu bikize bikwiye gutanga amafaranga y’impozamarira ku bihugu bikennye cyane ko ari byo bigira uruhare mu guhumanya ikirere.

Agaruka kuri iki kibazo, Perezida Kagame yagaragaje ko iyi nama ya G20 ikwiye kuba umwanya mwiza wo kwisuzuma kugira ngo iyi ntego ishyirwe mu bikorwa.

Ati “Intego yo gukusanya miliyari 100$ ku mwaka mu guhangana n’ingaruka z’imihindagurikire y’ibihe mu bihugu bikiri mu nzira y’amajyambere ntirashyirwa mu bikorwa mu buryo bwuzuye, ndetse nta n’igikorwa gifatika kiganisha muri iki cyerekezo. Inama ya G20 y’uyu mwaka ni amahirwe yo kongera kuvugurura iyo ntego, dukeneye gahunda y’ishyirwa mu bikorwa ryayo.”

Perezida Kagame yakomeje agaragaza ko Afurika yiteguye gufatanya n’Isi yose mu gushakira hamwe igisubizo ku kibazo cy’imyuka ihumanya ikirere nubwo atari yo yoherezayo myinshi.

Ati “Ibihugu bikomeye ku Isi nibyo byohereza 80% by’imyuka ihumanya ikirere, Afurika siyo ntandaro y’imihindagurikire y’ikirere ariko dushobora kandi dukwiye kuba bamwe mu bashaka igisubizo kandi twiteguye kubikora.”

Perezida Kagame yavuze ko u Rwanda rwashyizeho uburyo butandukanye bugamije kugabanya imyuka ihumanya ikirere igatuma ubushyuhe ku Isi bwiyongera. Yavuze ko ibi rubikora mu rwego rwo kubahiriza amasezerano ya Kigali yo kurinda iyangirika ry’akayunguruzo k’izuba, hagabanywa umwuka woherezwa mu kirere wa hydro fluorocarbons.

Aya masezerano yasinyiwe i Kigali n’ibihugu 197 mu Ukwakira 2016, avugurura ayasinyiwe i Montreal muri Canada mu 1989, agamije kugenzura ikoreshwa n’iyoherezwa mu kirere ry’uyu mwuka wa hydrofluorocarbons ugira uruhare rukomeye mu kwangiza akayunguruzo k’izuba kazwi nka ‘Ozone’ karinda abatuye Isi kugerwaho n’ubukana bw’imirasire yaryo.

Perezida Kagame yavuze ko kugira ngo hirindwe imihindagurikire y’ibihe, ibihugu byose bikwiye guhagurukira kubahiriza aya masezerano.

Yasabye ko ubwihwituzi ku kugira icyo ibihugu bikora mu kurwanya imihindagurikira y’ibihe bukwiye kugarukwaho cyane mu nama yiga ku hazaza h’Isi mu bijyanye no guhangana n’ihindagurika ry’ikirere izwi nka COP-26.

Perezida Kagame yibukije ibihugu bikize kurekura inkunga byemereye ibikennye mu guhangana n’imihindagurikire y’ibihe

Ku wa Gatandatu tariki ya 30 Ukwakira 2021 ku cyicaro gikuru cy’Urwego rw’ubugenzacyaha mu Karere ka Gasabo, Umurenge wa Kimihurura hahuguwe abagenzacyaha 30, aba bakaba ari ikiciro cya kabiri gihuguwe.

Umuyobozi w’ishami rya Polisi rishinzwe ubutabazi no kurwanya inkongi z’umuriro, ACP Paul Gatambira, yavuze ko aba bagenzacyaha babanza guhugurwa ku bigize inkongi, ibiyitera n’uko yirindwa.

Yagize ati “Tubanza kubagaragariza ibijyanye n’ubutabire (Chemistry) biba mu muriro, uko wakwitwara habaye inkongi, amoko y’inkongi n’ibiyizimya. Tunabagaragariza ibituma habaho inkongi ndetse n’ingamba zo kwirinda ko gazi itekeshwa yatera inkongi.”

ACP Gatambira yakomeje avuga ko nyuma yo kugaragariza abagenzacyaha imiterere y’inkongi z’umuriro n’ibiyitera, banahugurwa uko bakora iperereza ahabaye inkongi y’umuriro, basobanurirwa ko gukora iperereza ahabaye inkongi bitandukanye n’ahabaye ibindi byaha.

Yagize ati “Abagenzacyaha tubagaragariza uburyo bwo kumenya icyateye inkongi. Nk’umugenzacyaha agomba gusonukirwa inkongi icyo ari cyo, mbese akagira ubumenyi rusange ku nkongi.”

Abagenzacyaha bagaragarizwa ko gukora iperereza ku cyateye inkongi bisaba ubushishozi bwimbitse, bakagera ahabereye inkongi bakamenya icyateye inkongi niba ari impanuka isanzwe cyangwa hari uwagize uruhare mu guteza iyo nkongi ku bushake.

Ibyo umugenzacyaha ashobora kubigeraho abajije abatangahabuhamya yasanze ahabereye inkongi ndetse na we agakusanya ibimenyetso by’ibyo yiboneye n’amaso ye.

Kugeza ubu ishami rya Polisi rishinzwe ubutabazi no kurwanya inkongi (RFB) bamaze guhugura abagenzacyaha barenga 60, abahuguwe kuri uyu wa Gatandatu tariki ya 30 Ukwakira 2021, bari ikiciro cya Kabiri. Biteganijwe ko buri wa Gatandatu w’icyumweru hazajya hahugurwa abagenzacyaha.

Iryo shami rya Polisi kandi rimaze igihe ritangiye ibikorwa by’amahugurwa mu bigo bitandukanye ku kwirinda no kurwanya inkongi z’umuriro, aho bakorera ndetse n’aho batuye. Byose biri mu mugambi wo kugira ngo buri muturarwanda agire ubumenyi rusange ku kwirinda inkongi no kwitabara igihe yabaye.

Uwitwa Joël Monzée, umuhanga mu by’imikorere y’imitsi ndetse no mu by’imitekerereze wo muri Canada yagize “Mu gihe cyose ubuzima bw’umuntu bumara, ubwonko bwiyubaka kandi buhinduka hagendewe ku byo bugaburirwa”.

Ibyo ngo bivuze ko umwana uhora yerekwa ibiganiro n’amashusho kuri televiziyo, imikino kuri za ‘tablettes’, kuri za mudasobwa cyangwa se kuri za telefoni ngo yumva ibimukikije agendeye kuri ayo amashusho abona, aho kugendera ku byo umubiri we ubamo cyangwa se ibyo aganira n’abandi.

Dr Monzée ati “Icyo abantu bashobora kubona, ni uko abana bamara umwanya munini imbere y’ibyo bikoresho by’ikoranabuhanga bareba amashusho n’ibiganiro bitandukanye, usanga bibagora cyane kuba bakwishushanya igihe babisabwe, n’ubwo baba bafite imyaka hagati y’irindwi n’umunani (7-8). Ahubwo umwana akaba yashushanya ibijumba binini, cyangwa se ibibiriti, kuko bimugora, kuba yashushanya umubiri we. Kuko ni umwana utarigeze yiruka, ngo ashinge gatebe gatoki, ashushanye, akatagure ibipapuro n’ibindi, ahubwo wirirwa areba amashusho yo kuri ibyo bikoresho by’ikoranabuhanga. Uwo rero anahura n’ingorane zo kwiga ngo afate, kandi bigatangirira no mu mashuri y’incuke”.

Ati “Intego si ugushyira ibyo bikoresho by’ikoranabuhanga mu kimpoteri ngo bijugunywe nk’imyanda, kuko bifite akamaro mu buzima bwacu, bishobora no kwifashishwa mu kwiga. Ahubwo biba ikibazo iyo ibyo bikoresho bikoreshejwe nk’aho ari bwo buryo bukomeye buhari bwo gushimisha umwana. Icyo gihe biba bibi”.

Dr Monzée asobanura ko imiryango yahisemo kugabanya umwanya ibikoresho by’ikoranabuhanga byaka mu ngo zabo abana babireba, yagiye ibona abana bongera gukunda no kwishimira ubuzima n’ibihe byiza bagirana n’imiryango yabo ndetse na bagenzi babo bo mu ishuri mu gihe baganira.

Uwo muhanga avuga ko bitoroshye kwambura umwana ibyo bikoresho by’ikoranabuhanga, kuko ababikoresha bahinduka imbata zabyo vuba cyane.

Ati “Intego si ugutuma ababyeyi bagira inkomanga ku mutima, cyangwa se abarezi bifashisha ibyo bikoresho mu gihe bagiye kuruhuka. Ariko ni ngombwa kugenzura kugira ngo ikoreshwa ry’ibyo bikoresho ritarenza urugero”.

Monzée yasobanuye ko ubushakashatsi butandukanye bwagaragaje ko guha abana ibyo bikoresho bya za televiziyo, telefoni n’ibindi bigira uruhare mu gutuma abakiri bato bagira ibibazo bijyanye n’imyitwarire.

Dr Monzée yasobanuye ko umwana akenera umwanya kugira ngo ashobore kwiga no kumenya. Mu 2014, Ikinyamakuru ‘New York Times’ ngo cyagaragaje ko Steve Jobs, washinze sosiyete ya ‘Apple’ ikora ibyo bikoresho by’ikoranabuhanga, atemereraga abana be kuba bafata ibyo bikoresho ngo babimarane umwanya.

Ikindi kandi ngo ibinyamakuru bitandukanye byagaragaje ukuntu abayobozi bakuru bakora mu kitwa ‘Silicon Valley’ muri California bishyurira abana babo amashuri yigenga atemera za ‘tablettes’ na za mudasobwa nka ‘Waldorf School’ y’ahitwa Peninsula, bagamije kugira ngo abana bafate umwanya wo gutekereza, bazamure ubushobozi bwabo bwo gutekereza ndetse no kuba bavumbura ibintu bitandukanye.

Dr Monzée avuga ko guhoza umwana imbere y’ibikoresho by’ikoranabuhanga, byagira ingaruka mu gutuma atamenya ibyo akunda cyangwa icyo yifuza kuzakora mu buzima bwe, umwana ngo akaba yarangiza amashuri yisumbuye ataramenya icyo yifuza kuzakora mu buzima bwe.

Ati “Nta na rimwe abana bahora imbere y’ibyo bikoresho by’ikoranabuhanga bafata umwanya ngo batekereze icyababera cyiza, cyangwa se icyo bakunda gukora”.

Igihe umwana yemerewe kumara imbere y’ibikoresho by’ikoranabuhanga hakurikijwe ikigero cye nk’uko ubushakashatsi bubyerekana

Umwana ufite kuva kuri 0 kugeza ku myaka 2 ntiyemerewe kubireba

Umwana ufite kuva ku myaka 2 kugeza kuri 4 ntagomba kurenza isaha imwe ku munsi

Umwana ufite imyaka 5 kugeza kuri 11 yagombye kutarenza amasaha abiri ku munsi.

Dr Monzée asanga ababyeyi n’abandi barezi bakwiye kwiga guhakanira abana no kubangira rwose igihe bahora basaba kureba za televiziyo cyangwa za telefoni kugira ngo batazagera aho baba imbata z’ibyo bikoresho (dépendance).

Yagize ati “Niba umwana wanjye ansabye ananyinginga ngo nzajye muha ikirahuri kimwe cy’inzoga buri munsi kugira ngo yishime, nzamuhakanira. Uko ni ko byagombye kugenda no kuri ibyo bikoresho by’ikoranabuhanga ku bana. Ni ngombwa gushyiraho imirongo ntarengwa”.

Yabitangaje kuri uyu wa 31 Ukwakira 2021, mu nama ihuza ibihugu 20 bikize ku isi (G20) aho baganiraga ku mihindagurikire y’ikirere no kubungabunga ibidukikije.

Perezida Kagame yavuze ko bitewe n’ibyavuye mu nama ya COP-26 bisa n’aho nta mwanzuro wari waboneka, na none raporo ya IPCC yerekana ko igihe ari kinini cyangwa gito kugira icyo bakora.

Yavuze ko nta gikorwa gifatika cyari cyakorwa ku cyemezo cyo gukusanya miliyari 100 z’Amadorali buri mwaka agamije kubungabunga ibidukikije ku bihugu biri mu nzira y’amajyambere nk’uko byari biteganyijwe.

Yongeyeho ko iyo nama ya G20 y’uyu mwaka, hakwiye kwibukwa iyo mihigo ndetse ko hanakenewe gahunda yo kuyishyira mu bikorwa.

Perezida Kagame yavuze ko ibihugu bikize byihariye 80% by’ibyuka ihumanya mu kirere, ko Afurika atariyo igira uruhare runini mu mihindagurikire y’ikirere, ariko initeguye gufatanya n’indi migabane mu gukemura impamvu zose zitera iyo mihindagurikire y’ikirere.

Yakomeje avuga ko muri Nyakanga 2021, umuryango w’Ubumwe bwa Afurika washyizeho gahunda nshya y’imyaka itanu igamije gukora ku buryo uyu mugabane uhora utoshye (African Union Green Recovery Action Plan), ufite ingufu zisubira, urusobe rw’ibinyabuzima no gushyiraho umutungo w’amafaranga agamije kubungabunga ibyo bikorwa.

Yanashimangiye ko hakenewe kuvugurura imisanzu yagenwe na buri gihugu kugira ngo bihuzwe n’icyo cyifuzo.

Mu Rwanda, ngo hashyizweho ingamba z’igihugu zijyanye no gukonjesha, kugira ngo uburyo busanzwe bwo gukongesha (Hydrofluorocarbones) bugira uruhare runini mu gutera ubushyuhe isi buhagarikwe.

Yavuze ko icyo gikorwa kijyanye n’amasezerano ya Montreal yavugururiwe i Kigali.

Perezida Kagame yongeyeho ko gushyira mu bikorwa ayo masezerano byuzuye, ari kimwe mu bishobora gutuma ingamba zafashwe mu kugabanya umuvuduko w’imihindagurikire y’ikirere uriho.

Yunzemo ko yizeye ko ibyihutirwa ku mihindagurikire y’ikirere aribyo bizaherwaho mu nama ya COP-26, izatangira ku munsi w’ejo.

Inzu zahoze zituwemo n’aba évolués ziri mu marembera, iyi ni imwe muri eshatu zari zisigaye

Mu birangamateka bibahangayikishije harimo inzu zaturwagamo n’aba ‘évolués’ mu gihe cya gikoroni, ni ukuvuga abantu bari barize mu ishuri ry’abasisita (assistants) ari ryo GSOB (Groupe Scolaire Officiel de Butare).

Izo nzu zari nyinshi ahitwa i Ngoma, muri zo hakabamo n’iyigeze guturwamo na Kigeli Ndahindurwa.

Zagiye zisenywa n’abaziguze na Leta bakahubaka izindi zijyanye n’igihe tugezemo, ku buryo hasigaye ebyiri zonyine. Na zo imwe ubu iri ku isoko, indi na yo abayituyemo bafite gahunda yo kuyisenya bakubaka indi ijyanye n’igihe.

Hirya y’aba évolués hari karitsiye yitwaga Ibereshi (Quartier belge), urebye yari ituwemo n’abari abakozi bo mu ngo b’abakoroni, hanyuma hagakurikiraho aho bitaga mu Giswayire hari hatuwe n’abayisiramu.

Aho mu Giswayire na ho mu byaharangaga bigihari harimo umusigiti wa mbere wahubatswe, bigaragara ko ushaje, n’inzu ebyiri harimo imwe y’umuntu wari ukomeye muri aka gace, ishakaje ibice by’ingunguru.

Ugarutse mu mujyi rwagati, hari Hotels ebyiri z’ingenzi ari zo Ibis na Faucon. Kuri ubu Ibis yamaze kuvurururwa ntikimeze nka mbere yanahinduriwe izina, icyakora Hotel Faucon yo yemerewe kuzagumana isura yahoranye.

Hakurya ya Hotel Faucon hari inzu itagikorerwamo iri kugenda isaza, mu bihe byashize yari ‘Librerie Universitaire’. Abakurikirana amateka bavuga ko yigeze kuba ibiro bya Burugumesitiri wa Mukura.

Inzu z’ubucuruzi z’ahitwa mu Cyarabu na zo urebye zarasenywe, kugira ngo hubakwe inshyashya za etaje, icyakora hari nkeya cyane zihasigaye.

Inzu zaturwagamo n’ab évolués mu gihe cy’abakoroni. Iyo hagati yatuwemo na Kigeli Ndahindurwa, kandi hamwe n’iyo hino ubu zasimbujwe izijyanye n’igihe, iyo hepfo na yo yamaze gusamburwa

Abatishimiye kuba ibi birangamateka bigenda bikendera usanga bifuza ko ibisigaye byabungabungwa, kugira ngo umunsi ubukerarugendo bushingiye ku muco bwateye imbere i Huye, ntihazabure burundu ibirangamateka byerekanwa.

Uwitwa Nowa Niyonizeye agira ati “Nk’amazu asigaye i Ngoma hakarebwe uko abungabungwa akaba ikimenyetso kigaragara ba mukerarugendo bazajya berekwa, ku buryo wababwira uti aha hahoze hatuye umuntu runaka, atari ukumwereka etaje n’igishushanyo cy’uko hari hameze. Kuko icyo gihe ntaho byaba bitandukaniye no gusoma ibitabo.”

Cécile Kamaliza na we ati “Byoroha cyane iyo urimo gusobanurira mukerarugendo arimo areba ikintu, kuruta kukimusobanurira mu magambo, nyamara byarashobokaga ko n’icyo kimenyetso ugisigasira, ukamusobanurira icyo areba.”

Jérôme Kajuga uyobora ishami ry’umuco n’ubumenyi bw’imibereho n’imibanire y’abantu muri Komisiyo y’igihugu ikorana na UNESCO, avuga ko bumwe mu buryo bwo kubungabunga inzu nk’iz’i Ngoma zatuyemo aba évolués ubu ziri mu marembera, ari uko abakizifite bazirikana agaciro kazo mu bukerarugendo, ubwabo bakazibungabunga.

Agira ati “Kongera kuzigurira Leta ngo izisubirane ntibishoboka, kuko icyemezo cyarafashwe. Ariko byibura uwayiguze yumve agaciro kayo. Kuko kuyisenya akubaka indi wenda iriho amabati, ntibiyiha agaciro karusha kuba abitse uwo murage. Ushobora gusanga anayigize ikodeshwa yahenda kurusha hoteli.”

Yungamo ati “Ntabwo turatangira kumva agaciro k’umurage, ariko njyewe uyimpaye sinayigurana inzu y’ibirahure.”

Ku bijyanye n’icyo amategeko ateganya mu kurinda ikendera ry’ibirangamateka, Jérôme Karangwa, Umuyobozi w’ingoro y’umurage w’umuco n’imibereho by’Abanyarwanda y’i Huye, avuga ko itegeko ririnda ibimenyetso ndangamurage bifatika ryasohotse muri 2016.

Umusigiti wa mbere w’Abayisilamu uri ahitwa mu Giswayire i Ngoma

Ngo risaba uturere kuvuga ahari ibyo bimenyetso kugira ngo bibungabungwe, birindwe, bibe ibimenyetso by’igihugu, rikanasaba ko habaho amateka abiri ya Minisitiri: iryerekana urutonde rw’ibyo bimenyetso ndangamurage n’irigena uko bikorerwaho ibikorwa by’ubucuruzi binabungabungwa.

Icyakora, kugeza ubu ayo mateka yombi ntarasohoka.

Byabaye kuri uyu wa Gatandatu mu Mudugudu wa Kabarungu, mu Kagari ka Rubimba mu Murenge wa Kabare.

Umunyamabanga Nshingwabikorwa w’Umurenge wa Kabare, Karuranga Léon yabwiye IGIHE ko aba basore bateranye ibyuma nyuma yo gushyamirana bapfa 1000 Frw.

Yagize ati “Ni abasore babiri umwe yari sebuja w’undi, bari biriwe bakorana umwe afasha mugenzi we kumusunikira ku igare kuko acuruza ibitoki. Nabagezeho amaze kumutera icyuma bambwira ko yari yamusigayemo amafaranga 1000 amubwira ko azayamuhe ejo.”

“Bamaze kunywa inzonga undi yumva ko agomba kuyamwishyura, agenda amugenda inyuma, bageze hafi y’aho bataha umwe ajya mu rugo azana icyuma akimutera mu mutwe kuburyo yakomeretse bikomeye.”

Gitifu yakomeje avuga ko abaturage bahise batabara bafata wa musore wateye icyuma mugenzi we, umwe bamujyana kwa muganga undi bamushyikiriza Polisi sitasiyo ya Ndego.

Yakomeje avuga kuri ubu umusore watewe icyuma mu mutwe yagejejwe ku kigo nderabuzima cya Cyarubare akitabwaho.

Yavuze ko bagiye kurushaho kwegera urubyiruko kuko urugomo n’amakimbirane ariho biri kugaragara cyane.

Ati “Aho bisigaye cyane ni mu rubyiruko rukunze gukoresha ibiyobyabwenge , mu bantu bakuru ho biri gucika bisigaye mu rubyiruko narwo turateganya kurwegera tukarukoramo ubukangurambaga bakirinda ibyaha.”

Mu ntangiriro z’iki cyumweru nabwo mu Karere ka Kayonza mu Murenge wa Nyamirama mu Kagari ka Gikaya hari hagaragaye abaturage babiri bateranye ibyuma bapfa 200 Frw.

Uru rugomo rwabereye mu murenge wa Kabare mu karere ka Kayonza

Na mbere y’uko bitangazwa ko hari Umuhinde ukorera rimwe mu mashami ya Loni winjiranye COVID-19 mu gihugu avuye mu Mujyi wa Mumbai, hari ingamba zari zatangiye gushyirwa mu bikorwa.

Abaturarwanda basabwaga kwitwararika ku kubahiriza amabwiriza yo kwirinda arimo gukaraba neza intoki n’amazi meza n’isabune cyangwa umuti wabugenewe ‘hand sanitizer’ no guhana intera.

Icyo gihe ab’inkwakuzi batangiye gukora ‘hand sanitizers’ mu gufasha abaturarwanda kwirinda kwanduzanya, cyane ko iki cyorezo nta makuru menshi yari agifitweho.

Tariki ya 16 Werurwe 2020, Uwineza Nelly Aline, ni bwo yatangiye gukora ‘hand sanitizers’ abinyujije mu Kigo yashinze Tropical Brewery and Winery.

Uyu mukobwa yakoze umuti usukura intoki w’umwimerere ‘Tropical hand sanitizer’ ndetse yawugejeje ku isoko ry’u Rwanda kuva icyo gihe.

Yabwiye IGIHE ko nyuma yo kubona ko Isi yugarijwe na COVID-19, yatekereje icyo yakora mu guhangana nayo cyane ko hand sanitizers zaburaga ku masoko y’imbere mu gihugu, ahasigaye ziva ari mu mahanga.

Yagize ati “Mbona hari icyo gukora hand sanitizers byafashije. Hari abasanzwe bakora ibikoresho bifashishije ibinyabutabire bitandukanye ariko natwe dukoresha ibimera n’ibihingwa bitandukanye twafatanyije muri urwo rugendo.’’

Uwineza yavuze ko we na bagenzi be binjiye mu gukora ibikoresho byifashishijwe mu guhangana na COVID-19, batanze umusanzu wabo binyuze muri Made in Rwanda.

Ati “Byarafashije cyane kuko iyo tutabigiramo uruhare ngo tugire icyo dukora byari kugorana kujya kubikura hanze ngo haboneke ibihagije u Rwanda rwose.’’

‘Tropical hand sanitizer’ kuri ubu ifite ubushobozi bwo gukora litiro 1000 za hand sanitizers ku munsi bigendanye n’ubusabe yakiriye. Nibura muri iyi sosiyete hakorerwa hand sanitizers ingana na 30% y’iyinjira mu gihugu.

Uwineza avuga ko batanga sanitizers mu bigo by’amashuri n’ibindi bifite abakozi benshi ndetse hari n’izoherezwa mu bihugu byo hanze.

Ati “Hari icyizere ko tuzakomeza gukora hand sanitizers kuko gukaraba byabaye umuco; umuti ni antivirus, hari izindi ndwara ziterwa na virus zitandukanye. Nturinda COVID-19 gusa ahubwo hari izindi virusi zituruka ku myanda y’intoki urinda.’’

Uwineza Nelly Aline yagejeje ku isoko ‘hand sanitizer’ yakoze mu guhangana na COVID-19 yibasiye Isi

  Udupfukamunwa natwo twaje guhabwa intebe

Muri Mata 2020 ni bwo Minisitiri w’Ubuzima, Dr Ngamije Daniel, yatangaje ko Abanyarwanda bose bagomba gutangira kwambara udupfukamunwa, nk’uburyo bubafasha kurushaho kwirinda ikwirakwira rya COVID-19.

Byatangajwe mu gihe mbere, abakozi bo kwa muganga bita ku wanduye n’abafite ibimenyetso bya COVID-19 aribo bategekwaga kwambara udupfukamunwa gusa.

Ku ikubitiro, ibigo n’inganda 21 byahawe isoko ryo gukora udupfukamunwa tugenewe Abanyarwanda bose dushobora kumeswa inshuro zirenze imwe.

Mu byumweru bibiri bya mbere inganda 21 [zaje kwiyongera zikagera kuri 76] zitangiye kudukora hari hakozwe miliyoni 3,5 ariko zifite intego yo kugeza kuri miliyoni 12 mu kwezi.

Usibye abakora udupfukamunwa two mu myenda, iri soko ryinjiweho n’abakora utwo kwa muganga ndetse muri Kamena 2020 Uruganda rwa Pharmalab rwinjira muri uwo murongo wo gushaka ibisubizo rubihangiye mu Rwanda.

Umuyobozi wa Pharmalab, Rugwizangoga Cyriaque, yabwiye IGIHE ko nyuma y’umwaka urenga bagikora kandi bahagaze neza.

Yagize ati “Dukora ku kigero cya 70%, nibura ku kwezi dushobora gukora udupfukamunwa miliyoni eshatu. Kugeza ubu isoko rya Leta n’ibitaro nitwe turifite.’’

Yavuze ko bakibangamirwa n’ibiciro by’udupfukamunwa tuva hanze muri Kenya n’u Bushinwa kuko ibiciro byatwo biba biri hasi.

Yagize ati “Kugeza uyu munsi haracyari ubusabe ariko hari izikiza z’Abashinwa, udupfukamunwa tuza ntabwo tutubuza gukora.’’

Yavuze ko bifuza ko “ubuziranenge bw’udupfukamunwa twinjira mu gihugu bwapimwa, RFDA yasanga tutujuje ubuziranenge igafata ingamba. Bikozwe twacuruza neza.’’

Uruganda rwa Pharmalab rukorera muri Kigali Special Economic Zone mu Murenge wa Ndera wo mu Karere ka Gasabo, rukora udupfukamunwa miliyoni 2,2 cyangwa na 2,3 ku kwezi mu gihe utangira rwakoraga udupfukamunwa ibihumbi 140 ku munsi.

Umuyobozi muri Minisiteri y’Ubucuruzi n’Inganda, ushinzwe Gahunda ya Made in Rwanda, Muhire Louis Antoine, yabwiye IGIHE ko ibikorerwa imbere mu gihugu byafashije mu guhangana n’ingaruka za COVID-19.

Yagize ati “Urebye ntihari inganda nyinshi zabikoraga, inyinshi hand sanitizers twazivanaga hanze kandi ari produits zishobora kuva mu byo dufite. Hari inganda zahise zitangira kuzikora.’’

“Ruriya ruganda rukora udupfukamunwa two kwa muganga, batangiye no kutwohereza mu Karere. Mu byo bakora ni ibindi bongeyeho. Mu bakora amasabune ni ko byagenze, abakoraga isabune z’ubwoko bumwe batangiye gukora n’ubundi.’’

Yasobanuye ko nubwo hari intambwe inganda zateye, hatabaho kwirengagiza ko hari izafunzwe, izindi zikagabanya umubare w’abakozi.

Yakomeje ati “Izo nganda zatumye tugira icyizere kirushijeho kuko mbere Made in Rwanda yari izwi nk’ibitenge cyangwa imyenda isanzwe ariko ubu abantu bazi ko dushobora gukora alcool n’ibindi bintu. Byatumye u Rwanda rumenyekana nk’igihugu gisigaye gifite inganda zikomeye.’’

Nubwo nta mibare ifatika ihari yerekana ingano y’amafaranga u Rwanda rwashoboraga gutanga rutumiza udupfukamunwa na hand sanitizers hanze, nta wakwirengagiza ko ibyakorewe mu gihugu hari icyo byafashije.

Made in Rwanda yatangiye ari ubukangurambaga bwo gushishikariza abantu gukunda no gukoresha iby’iwabo. Politiki yayo yemejwe mu 2018 hagamijwe guteza igihugu imbere.

Uwineza yatekereje gukora hand sanitizer ashaka gutanga umusanzu we mu gushaka ibisubizo bya rusange mu kurwanya COVID-19

Tropical hand sanitizer yatangiye ifite ubushobozi bwo gukora nibura imiti ingana na litiro 200 ku munsi

Uruganda Nyarwanda rwa Pharmalab rwatangiye gukora udupfukamunwa two kwa muganga dushobora no gukoreshwa n’abantu ku giti cyabo muri Kamena 2020. Hari mu rwego rwo kwishakamo ibisubizo

Umuyobozi wa Pharmalab, Rugwizangoga Cyriaque, yavuze ko ubu bafasha ibigo bya Leta n’ibitaro bitandukanye kubona udupfukamunwa

Pharmalab yatangiye mu 2004. Nyuma y’imyaka 10 itumiza hanze ibikoresho byo kwa muganga, mu 2015 yatangiye gukora ibirimo amatibe atandukanye (Tube à prélèvement de sang sous vide) n’udukombe dufatirwamo ibizamini byo kwa muganga nk’umusarane n’inkari (Flacons de selles et flacon d’urines)

Abafite inganda zikora udupfukamunwa tw’imyenda bahawe ibyangombwa by’ubuziranenge bibemerera kudukora mu kurwanya icyorezo cya COVID-19 mu Rwanda

U Rwanda narwo ruzitabira iyi nama mpuzamahanga izamara iminsi 12, aho itsinda ryarwo rizaba riyobowe na Minisitiri w’Intebe, Dr. Edouard Ngirente, mu gihe Minisitiri w’Ibidukikije, Dr. Mujawamariya Jeanne d’Arc, uri mu bagize ibiganiro bigamije gutuma ibihugu byose byemeranya ku gihe cya nyacyo bigomba kuba byageze ku ntego byihaye mu bijyanye no kugabanya umwuka wangiza ikirere, na we azitabira iyi nama.

Muri iyi nama, ingingo eshatu nizo zizibandwaho cyane, zirimo gushyiraho igihe gihuriweho ibihugu byose bizaba byageze ku ntego byiyemeje yo kugabanya umwuka wangiza ikirere.

Ubusanzwe, ibihugu nibyo byiha intego y’umwuka wangiza ikirere bizagabanya ndetse n’igihe bizakorerwa. U Rwanda rwiyemeje kugera ku ntego mu 2050, naho u Bushinwa bikaba mu 2060, mu gihe ibindi bihugu ari mu 2040 cyangwa se mbere na nyuma yaho.

Icyo cyo kwemeranya igihe nikirangira, iyi nama izanagaruka ku kibazo kimaze iminsi kigarukwaho, aho usanga ibihugu bidatangaza amakuru y’ukuri ku ngano y’umwuka wangiza ikirere byagabanyije, rimwe bikavuga ko uwo byagabanyije ari mwinshi nyamara ari muke. Indi ngingo y’ingenzi ni ugushaka amafaranga azashorwa mu bikorwa birimo ishoramari rizatuma ibikorwa byo kugabanya umwuka wangiza ikirere rishoboka.

Nk’urugero, u Rwanda rufite intego yo kuzagabanya umwuka wangiza ikirere ku kigero cya 38% kugera mu 2030, bivuze ko ruzakumira toni miliyoni 4,6 z’umwuka wa CO2 woherezwa mu kirere. Kugira ngo ibyo bigerweho, u Rwanda rugomba gukora ibikorwa birimo kugabanya imodoka zikoresha mazutu na lisansi, hakibandwa ku zikoresha amashanyarazi n’izindi ngufu zitangiza ikirere, ibyo bikajyana no gutera ibiti, gufasha abaturage kureka gukoresha inkwi mu guteka n’izindi ngamba zitandukanye. Ibyo byose bikeneye amafaranga.

U Rwanda rusabwa iki?

Kugira ngo ibyo byose bigerweho, u Rwanda rukeneye miliyari 11$ kugera mu 2030, amafaranga aruta gato umusaruro mbumbe w’ubukungu bwarwo. Kimwe n’ibindi bihugu biri mu nzira y’amajyambere, u Rwanda rwifuza ko ibihugu bikize, ari nabyo bigira uruhare rukomeye mu bikorwa byangiza ikirere cyane, bifata iya mbere mu gutanga umusanzu uzatuma ibihugu bishyiraho ingamba zo guhangana n’iyangirika ry’ikirere, ndetse no kwirinda gukomeza kucyangiza.

Izi ngamba ziri mu byiciro bibiri; hari uguhangana n’ingaruka zamaze kubaho kubera ingaruka z’iyangirika ry’ikirere, nko guhangana n’imyuzure ndetse n’ubushyuhe bukabije bushobora kwangiza imyaka mu mirima n’ibindi birimo indwara, byitezwe ko zizagera ku bantu, amatungo n’ibihingwa.

Nko mu rwego rw’ubuhinzi, ingamba zo muri iki cyiciro cya mbere zirimo gukora ubushakashatsi ku bundi bwoko bw’imbuto z’ibihingwa zishobora kwihanganira izuba rikabije, kuko izisanzwe zitagifite ubushobozi bwo kwera neza kubera ihindagurika ry’ikirere. Muri iki cyiciro, u Rwanda rukeneye miliyari 5,3$.

Ku rundi ruhande, hari ugushyiraho ingamba zo mu cyiciro cya kabiri, zigamije gukomeza gukumira ubwiyongere bw’ubushyuhe ku Isi, binyuze mu kugabanya umwuka wangiza ikirere uturutse mu bikorwa bya muntu. Ibishobora gukorwa muri iki cyiciro harimo gutera amashyamba, gukoresha ingufu zishingiye ku mashanyarazi n’ibindi bitandukanye. Muri iki cyiciro, u Rwanda rukeneye nibura miliyari 5,7$ kugera muri 2030.

U Rwanda rukomeje ibikorwa byo guhangana n’ihindagurika ry’ikirere, aho rufite umugambi wo gukoresha utumodoka dukoresha amashanyarazi mu ngendo rusange

Birumvikana ko aya mafaranga ari akayabo, ndetse bigoye ko Leta y’u Rwanda yayishakamo yose, ari nayo mpamvu ibihugu bikize biri gushishikarizwa gushyigikira imigambi nk’iyi izatuma ibihugu biri mu nzira y’amajyambere bidakomeza kwikorezwa urusyo nyamara nta ruhare runini bifite mu guteza ibi byago by’iyangirika ry’ikirere.

Nk’urugero, Afurika igira uruhare rwa 4% mu mwuka wangiza ikirere woherezwa uvuye ku Isi, mu gihe u Bushinwa bwa mbere bwoherezayo 28%, bugakurikirwa na Amerika yohereza 15% by’umwuka wose uba waturutse ku Isi. Ikbazo ni uko ibihugu byo muri Afurika ari byo bigirwaho ingaruka zikomeye n’iyangirika ry’ikirere, kuko ubukungu bwabyo bushingiye ku buhinzi n’ibindi bikorwa nk’uburobyi n’ubworozi, kandi byose bikaba bigirwaho ingaruka zikomeye n’iyangirika ry’ikirere.

Minisitiri Mujawamariya yavuze ko ikibazo cy’ihindagurika ry’ikirere giteye inkeke, bityo ko iyi nama ari amahirwe akomeye ku bihugu byose yo gushyiraho uburyo bwo guhangana nacyo.

Yagize ati “Dushobora guhangana n’ibibazo bikomeye igihe dufatanyije dufite intego imwe. Niyo mpamvu u Rwanda rufite icyizere ko COP26 izagera ku bwumvikane bwuzuye ku bibazo bikomeye [bizaganirwaho], birimo ishyirwaho ry’igihe cyo kubahiriza amasezerano y’i Paris [aho buri gihugu cyiyemeje ingano y’umwuka wangiza ikirere kizagabanya], gushyiraho amabwiriza azagenga iyubahirizwa ry’igabanywa ry’umwuka wangiza ikirere ndetse [no gushaka] amafaranga akenewe duhanganye n’ingaruka z’ihindagurika ry’ikirere ndetse no kubana n’ingaruka zamaze kutugeraho.”

Muri iyi nama, ibihugu birimo u Bushinwa na Amerika byari byitezweho kuzagaragaza aho bigeze intego zo kugabanya umwuka wangiza ikirere, uretse ko Umunyamabanga Mukuru w’Umuryango w’Abibumbye, Antonio Guterres, yatangaje ko hagaragaye ubwumvikane buke mu mishyikirano itegura iyi nama, asaba ko Isi ikwiye kugirirana icyizere kugira ngo igere ku ntego yihaye.

Biteganyijwe ko bitarenze mu 2100, ubushyuhe bw’Isi bugomba kuguma kuri dogere Celcius ziri munsi ya 1,5C, kuri ubu, buracyari munsi ya 1,1C. Izi dogere ziramutse zizamutse zikagera nko kuri 2C, byagira ingaruka zikomeye ku buzima abantu babamo uyu munsi kuko imyuzure yakwiyongera mu bice byose by’Isi, ibihingwa byinshi bigatakaza ubushobozi bwo kwera, ubutaka bugakamuka cyane, indwara nyinshi zigatera, amazi akaba ingume mu bice bimwe na bimwe by’Isi, ku buryo ikiguzi cyo guhangana n’ibyo bibazo byose, kiri munsi cyane y’icyo byatwara mu kwirinda ko Isi yinjira muri ako kaga.

Minisitiri Mujawamariya yavuze ko “Kugira ngo Isi igere ku ntego yihaye mu guhangana n’ihindagurika ry’ikirere, ibihugu bisabwa ubushake bwo gushora imari mu bikorwa birambye byo kurengera ibidukikije. COP26 ni amahirwe Isi ibonye yo gusezera ku ikoreshwa ry’ibikomoka kuri peteroli, urusobe rw’ibinyabuzima rukongera rukisuganya, mu gihe turinda ibisigaye.”

Muri Gicurasi umwaka ushize, u Rwanda nicyo gihugu cya mbere ku Mugabane wa Afurika cyagaragaje umugambi muremure wo kugabanya umwuka wangiza ikirere rwoherezayo, aho uwo mugambi ugena ko ibi bizagerwaho mu 2050, ariko mu 2030, 38% by’uwo mwuka bikazaba byaragabanyijwe.

Mu bindi bikorwa u Rwanda rwakoze muri iki cyiciro, harimo gutera amashyamba ku buso bungana na 30,4% bw’igihugu, korohereza abaturage gutekesha gaz, aho kuba amakara n’inkwi.

Byitezwe ko mu 2030, nibura 30% bya moto ziri muri Kigali zizaba zikoresha amashanyarazi, mu gihe imodoka zigomba kuba ari 8%, izitwara abantu mu buryo bwa rusange zikaba ari 20% ndetse na 25% bw’izindi modoka zisanzwe. Moto zirenga 7000 ziri muri gahunda yo gutangira gukoresha amashanyarazi vuba, zivuye ku gukoresha ibikomoka kuri peteroli.

Ishoramari rizagira uruhare rinini muri ibi bikorwa

Muri za miliyari 11$ akenewe kugira ngo u Rwanda rugere ku ntego zarwo, amwe muri yo azaturuka mu bikorwa by’abashoramari, aho u Rwanda ruri gukora ibishoboka byose kugira ngo rube icyicaro cy’ishoramari mu bijyanye no kurengera ibidukikije muri Afurika (green investment).

Ni muri urwo rwego Leta yashyizeho Ikigega cya Fonerwa kimaze kwakira ishoramari rya miliyoni 217$ kuva cyashingwa, ari kugenda ashorwa mu bikorwa byo guhangana n’ingaruka z’iyangirika ry’ikirere.

Irindi shoramari rizakururwa binyuze mu bikorwa birimo kugabanya imosoro cyane cyane ku modoka zikoresha amashanyarazi, sitasiyo zazo ndetse n’ibindi byuma zikoresha, ibi byose bikaba byitezweho kongera umubare w’abashoramari bifuza kuzizana mu Rwanda.

Ibi byose kandi byitezweho kuzagabanya ikiguzi u Rwanda rukoresha rutumiza ibikomoka kuri peteroli, bigize 16% by’ibyo u Rwanda rutumiza hanze, bingana na miliyoni 411$. Ibi bisobanuye ko kugabanya ingano ya peteroli ikenerwa mu Rwanda, bizahita bigira ingaruka nziza ku kugabanya ibyo u Rwanda rutumiza mu mahanga, bityo ubukungu bw’igihugu burusheho guhagarara neza.

Imodoka zikoresha amashanyarazi zizahabwa umwanya munini mu Rwanda mu rwego rwo kugabanya umwuka wangiza ikirere

Moto zikoresha amashanyarazi zatangiye gukoreshwa mu Rwanda

Kugira ngo intego rwihaye zigerweho, u Rwanda rwatangiye gushishikariza abantu gutunga imodoka zikoresha amashanyarazi aho kunamba ku zikoresha ibikomoka kuri peteroli

Mu kwirinda imyotsi ituruka mu icanwa ry’ibiti no kwangiza amashyamba, Leta y’u Rwanda imaze igihe ishishikariza abaturage gukoresha gaz

Umushinga Green Gicumbi, ni umwe mu yo u Rwanda rwatangije igamije gutera amashyamba mu duce yari atangiye gucikamo

Valley dam y’Akayange yubatswe mu mwaka wa 2017 none batangiye kuyikandagizamo inka

Yabitangaje ku wa Gatandatu tariki ya 30 Ukwakira 2021, ubwo hasurwaga Dam y’Akayange n’iya Rwabiharamba igiye gusiba kubera gukandagizwamo inka.

Mu kiganiro yagiranye n’aborozi nyuma yo gusura izo valley dams, yababwiye ko aje kubamenyesha itegeko kugira ngo uzarirengaho atazitwaza ko atari arizi.

Ingingo ya 182 mu gitabo cy’amategeko ahana ibyaha iteganya ko umuntu wese usenya cyangwa wonona ku bw’inabi, ku buryo ubwo ari bwo bwose, inyubako yose cyangwa igice cyayo, inzu, iteme, urugomero, uruhombo rw’amazi n’inzira yarwo, inzira ya gari ya moshi cyangwa ibikoresho ibyo ari byo byose by’itumanaho cyangwa by’ingufu z’amashanyarazi, amariba cyangwa izindi nyubako zose bitari ibye, aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka itatu (3) ariko kitarenze imyaka itanu (5) n’ihazabu y’Amafaranga y’u Rwanda atari munsi ya miliyoni eshatu (3,000,000 Frs) ariko atarenze miliyoni eshanu (5,000,000 Frs).

Iyo gusenya cyangwa konona inyubako zivugwa mu gika cya mbere cy’iyi ngongo byakozwe ku bushake, hakoreshejwe urutambi, ibisasu, intwaro cyangwa ikindi kintu giturika, igihano kiba igifungo kitari munsi y’imyaka irindwi (7) ariko kitarenze imyaka icumi (10) n’ihazabu y’Amafaranga y’u Rwanda atari munsi ya miliyoni eshanu (5,000,000 Frs) ariko atarenze miliyoni zirindwi (7,000,000 Frs).

Ashingiye kuri ibi bihano biteganywa n’amategeko, yasabye aborozi kwirinda kongera gukandagiza Valley dams kuko igihe inka zizafatirwamo hatazarebwa umushumba gusa ahubwo bizagera kuri nyirazo.

Yasabye buri wese kumva ko kubungabunga ibikorwa remezo bimureba, bityo akagira uruhare mu kurwanya abashaka kubyangiza.

Ati “Kumenya icyaha, kugihishira no kugikora mwese muba musa, ni nk’uko wamenya ko umuntu yishe umuturanyi wawe ukamuhishira ngo bitanturukaho, tukaza gusanga ayo makuru wari uyafite n’ubwo atari wowe wamwishe, muba munganya icyaha kuko nawe uba wahishiriye.”

Valley dam ya Rwabiharamba yatangiye gusiba kubera gukandagizwamo inka

Rutaro yaburiye abaturage ba Karangazi ko mu gihe bazakomeza kwangiza valley dams nta yindi nteguza bazirengera ibihano bazahabwa n’inkiko.

Guverineri w’Intara y’Iburasirazuba, Emmanuel K. Gasana, yavuze ko bigayitse kubona abantu bahabwa amazi bakarengaho bakayonona mu gihe ahandi bayabuze.

Yabasabye kubungabunga ibikorwa remezo Leta ibegereza kuko ari ibyabo kandi bigamije imibereho myiza n’iterambere byabo.

Perezida Kagame ari kumwe na Emmanuel Macron w’u Bufaransa

Perezida Kagame ari kumwe na HM Queen Máxima wa Netherlands

Perezida Kagame ari kumwe na Charles Michel, Perezida wa EU

Perezida Kagame ari kumwe na Mario Draghi, Minisitiri w’Intebe w’u Butaliyani

Perezida Kagame hamwe na Dr Ngozi Okonjo-Iweala, Umuyobozi mukuru wa WTO