Tag: featured

Baganizi Eliphaz

Baganizi Eliphaz yari umuhanga cyane mu guhindura ijwi, ku buryo ubwo yari afite imyaka iri munsi ya 30 y’amavuko Indamutsa zakundaga kumukoresha mu ikinamico ari umusaza, abumvaga radiyo bakibwira ko ari umusaza rukukuri.

Usibye gukina mu itorero Indamutsa, Baganizi yari asanzwe akora muri ORINFOR ashinzwe kugenzura niba amakuru yose agomba guca kuri radiyo yabonetse kandi ameze neza (operateur select).

Imwe mu makinamico yumvikanamo ari umusaza, ni iyitwa “Mazi ya teke” aho aba ari se w’umukobwa ushimutwa n’umusore witwa Haruna (umwanya wakinwe na nyakwigendera Sebanani André).

Baganizi Eliphaz yavutse mu 1963 yitaba Imana hashize igihe gito Jenoside yakorewe Abatutsi irangiye azize uburwayi.

Baganizi Olivier, umuhungu wa Baganizi Eliphaz

Baganizi Olivier w’imyaka 34, ni umuhungu wa nyakwigendera ndetse akaba yarakurikiye umwuga wa se.

Yakoze mu bitangazamakuru bitandukanye birimo Lemigo TV, Royal TV, ubu amaze imyaka itanu akorera Isango TV, afite n’itorero ry’ikinamico ryitwa ‘Ishya Culture Troop’.

Mu kiganiro Nyiringanzo kuri KT Radio, Baganizi Olivier yashimishijwe cyane no kubona atumirwa bwa mbere n’itangazamakuru ngo avuge amateka arambuye yaranze se, Baganizi Eliphaz.

Bikurikire muri iki kiganiro:

Umuyobozi w’Umujyi wa Kigali, Pudence Rubingisa aganira n’abashyitsi

Iryo huriro ryitwa ASToN ryiyemeje gusangira ubunararibonye ku iterambere ridaheza rishingiye ku ikoranabuhanga, rikaba ryarashinzwe mu mwaka wa 2019.

Abahagarariye imijyi igize ASToN baje mu Rwanda kureba aho Kigali igeze mu rwego rw’ikoranabuhanga, bagaragarijwe uburyo abaturage b’uyu mujyi barikoresha mu buzima bwa buri munsi.

Guhera ku makarita y’ingendo abagenzi batega bisi bakoresha bakoza ku cyuma cya Tap&Go, ikoreshwa rya Yego Moto na Yego Cabs no kuba Mobile/Airtel Money bikoreshwa mu guhererekanya amafaranga no kwishyura serivisi zitandukanye zirimo iza Leta zisabirwa ku Irembo.

Abagize Ihuriro ASToN basuye ibice bitandukanye bigize Kigali

Hari ibyapa biyobora abagenzi muri za karitsiye zigize uyu mujyi, camera zituma habaho kugabanya umuvuduko w’ibinyabiziga no kwirinda ibyaha bitandukanye, hakaba n’ikoranabuhanga ryo kumenyesha no kwishyura imisoro, Umujyi wa Kigali ubishingiraho uvuga ko bigenda bihindura ubuzima n’imikorere by’abawutuye.

Umuyobozi w’Umujyi wa Kigali, Pudence Rubingisa avuga ko bamaze kugera kuri serivisi zirenga 100 ziruhura abaturage kugenda bikoreye amafaranga no gutakaza umwanya bajya gusaba serivisi ku biro bya Leta.

Rubingisa yagize ati “Natanga urugero kuri serivisi zo mu irangamimerere aho ushobora kwicara mu rugo ugasaba icyemezo cy’amavuko, icy’uko washatse, cyangwa ukaba wakwiyandikisha ukabona ibyangombwa bitandukanye nk’uruhushya rwo gutwara ibinyabiziga, Indangamuntu, ibijyanye n’ubutaka aho wamenya icyo bwagenewe bigatuma usaba icyangombwa cyo kubaka cyangwa gusana”.

Khadijetu uturutse I Nouakchot muri Mauritania ashimira Umujyi wa Kigali kuba urimo isuku

Rubingisa avuga ko indi gahunda ikomeye irimo kugeragezwa, ari ugukoresha ikoranabuhanga mu gukusanya no kuvangura ibishingwe bikabyazwa undi musaruro.

Yongeraho ko imiyoboro y’Ikoranabuganga (fibre optique) yari yarashyizwe mu butaka mbere y’umwaduko w’icyorezo Covid-19 yafashije abakozi b’inzego za Leta n’izigenga gutangira serivisi mu rugo, bituma hatabaho gusubira inyuma mu iterambere.

Uwitwa Hamadou Yalcouye ushinzwe iterambere ry’inyubako mu Mujyi wa Bamako w’igihugu cya Mali, ashima Kigali ko ari umujyi utoshye urimo ibimera bitandukanye (birwanya imyuka isohoka mu bwinshi bw’abantu n’ibinyabiziga).

Indi shusho nzinza Yalcouye ashimira Kigali ngo ni ukuba nta myanda inyanyagiye hirya no hino nk’uko abona ahandi haba handagaye impapuro, ibipfunyika n’amasashe.

Umuyobozi w’Umujyi wa Kigali, Pudence Rubingisa yakiriye abahagarariye imijyi 11 yo muri Afurika

Kuba igishushanyombonera cy’Umujyi wa Kigali na cyo kigaragara kuri murandasi aho buri wese ucyifuza abasha kukibona, na byo ngo ni ibyo kwishimira.

Yalcouye na bagenzi be baturutse mu mijyi itandukanye yo muri Afurika bavuga ko ikindi gishya bakuye i Kigali ari ikoreshwa ry’ibinyabiziga bitwarwa n’amashanyarazi, hamwe no kuba urubyiruko ari rwo rwihangira ikoranabuhanga rya telefone na mudasobwa rifasha abaturage mu mirimo ya buri munsi.

Ihuriro ASToN ry’imijyi 11 yo muri Afurika rigizwe n’Imijyi ya Kigali mu Rwanda, Kampala muri Uganda, Matola muri Mozambike, Lagos muri Nigeria, Niamey muri Niger, SEME Podji muri Benin, Kumasi muri Ghana, Bamako muri Mali, Nouakchott muri Mauritanie, Benguerir muri Maroc hamwe na Bizerte muri Tuniziya.

Ibiribwa byashyikirijwe imiryango yakuwe mu byayo n’ibiza

Ibiribwa bipima toni eshatu, bigizwe n’ibirayi ndetse n’ibishyimbo, nibyo iyo miryango yashyikirijwe na bamwe mu bikorera bo mu Murenge wa Kinigi, kugira ngo bibunganire muri ibi bihe batorohewe n’imibereho.

Serushago Jean ukuriye Urugaga rw’Abikorera mu Murenge wa Kinigi, yagize ati “Tukimara kumva ko abaturage bagenzi bacu bo mu Murenge wa Muko bakuwe mu byabo n’ibiza, bagasigara amaramasa. Twasanze atari ibintu twareberera, turavuga tuti, reka twisuganye buri wese uko yifite tubashakire ibyo kurya baba bifashisha muri iyi minsi, kuko nibura iyo umuntu yariye ashobora no kugira ibindi yatekereza cyangwa yakora ubuzima bugakomeza”.

Yungamo ati “Twe twumva ari inshingano yacu gufasha bagenzi bacu bababaye, tugendeye ku isomo ry’uko ibyago byagera k’uwo ari we wese kandi bimutunguye. Ibi bikaba bituma dukangurira na bagenzi bacu ko iyo urya ukaryama, ukwiye kuzirikana ko hari undi ushobora kuba yaburaye. Wakwambara ukaberwa ukumva urasusurutse, uba ukwiye kuzirikana ko hari abambaye ubusa bakeneye ubwunganizi bwawe. Ku bw’ibyo rero, tukumva umutima uduhata ko dukwiye no gukora ibirenze ibingibi”.

Imvura yaguye mu byumweru bitatu bishize, yangije imyaka y’abaturage mu Kagari ka Cogo, Umurenge wa Muko, inasenya amazu andi arangirika bikomeye, ku buryo abaturage bagicumbikiwe kugeza ubu.

Icyimanizanye Anastasie, umwe mu basizwe iheruheru n’ibyo biza, yagize ati “Ubwo ibyo biza byabaga nari nagiye gupagasa, ntashye nsanga inzu yose yarengewe n’amazi, ibintu byose byaba ibiribwa n’ibikoresho byo mu nzu amazi yabitembanye, nsigara nta na kimwe mfite. Iyi nkunga y’ibiribwa mpawe nyakiriye neza cyane, kuko ije kunkiza inzara nari maze iminsi manganye na yo”.

Bahawe ibiribwa bigizwe n’ibirayi n’ibishyimbo

Undi muturage yagize ati “Ibyumweru hafi bitatu byari byihiritse tubayeho mu buzima bwo gucumbikirwa; aho no kubona icyo kurya byatugoraga. Ibiza byadusize ahabi, kuko ibyo twahinze byose byatwawe n’amazi, n’abari baragize ibyo bahunika byose amazi arabikukumba; ubu tukaba twabagaho bitugoye none ibi biribwa mpawe bigizwe n’ibirayi n’ibishyimbo, ndajya nkuraho ducye ducye two nteka, ku buryo nzamara nk’ukwezi ntafite ikibazo cy’ibyo turya”.

Umunyamabanga shingwabikorwa w’Umurenge wa Muko, Murekatete Triphose, avuga ko ubwo ibiza byibasiraga aka gace, byasenye amazu andi arangirika ku buryo bidashoboka ko beneyo bayasubiramo.

Yagize ati “Tukimara kubona ukuntu ibi biza bifite ubukana bukabije, twihutiye gutabaza abaturanyi bacu n’ubuyobozi, kuko twibazaga uko abagezweho n’ingaruka zabyo bari bubeho muri iyi minsi byatuyobeye. Ubwo rero, Umurenge wa Kinigi, ku ikubitiro niwo uhise ufata iyambere mu kudufata mu mugongo, udushyikiriza ibi biribwa. Nk’uko tubizi, intore si nanjye binyobere, ahubwo ni nkore neza bandebereho. Mu by’ukuri, biradushimishije cyane kuba bahise badutabara”.

Buri muryango mu yigera kuri 41, washyikirijwe ibiro 50 by’ibirayi n’ibiro 5 by’ibishyimbo. Abikorera bo mu Murenge wa Kinigi bateganya ko iki gikorwa cyo kuremera abaturage bazarushaho kucyagura, ku buryo mu gihe kiri imbere, bazajya baremera umubare munini w’abaturage bari mu kaga.

Gitifu w’Umurenge wa Kinigi (hagati) ndetse n’Umuyobozi w’Urugaga rw’Abikorerera (wambaye kositimu) bashyikiriza Gitifu wa Muko inkunga bageneye abaturage

Imiryango yashyikirijwe ibiribwa, ubu yabaye itujwe by’agateganyo, ni mu mazu ikodesherezwa n’umurenge. Mu byangijwe byiganjemo ibigori, inyanya, ibijumba n’indi myaka yari ihinze mu mirima, ku buso bwa Ha zikabakaba eshanu.

Muri iki gihe imvura igikomeje kugwa, iyi miryango yagiriwe inama yo kwirinda gusubira mu mazu yabo, mu rwego rwo kwirinda ko yakongera guhurirayo n’akaga.

Iyi nama ije mu gihe isi yugarijwe bikomeye n’ibibazo bifitanye isano n’ihindagurika ry’ikirere. Turasiganwa n’igihe ngo tugabanye izamuka ry’ubushyuhe bukomeje kwiyongera umusubirizo, turwanye ihindagurika ry’ikirere ndetse n’ibiza. U Rwanda, nk’igihugu cyugarijwe n’ingaruka z’imihindagurikire y’ibihe, kiri ku isonga mu ntambara yo guhangana n’ubwiyongere bw’ubushyuhe bw’isi.

N’ubwo ibihugu biri mu nzira y’amajyambere birimo n’u Rwanda bifite uruhare ruto mu nkomoko y’iki kibazo (munsi ya 0.01% gusa by’ibyuka bihumanya ikirere ku isi byoherezwa n’u Rwanda), ibi bihugu biri mu byugarijwe cyane n’ingaruka z’ihindagurika ry’ikirere. Ubwiyongere bukabije bw’imvura bukomeje kwangiriza bikomeye Abanyarwanda.

Ingaruka z’ibi zirigaragaza mu gihugu cyacu. Aha twavuga nk’izuba ryinshi mu Burasirazuba no mu Majyepfo y’Iburasirazuba bw’Igihugu, imyuzure mu Majyaruguru n’Amajyepfo, isuri, ndetse n’inkangu mu Burengerazuba nk’iziherutse kwibasira Akarere ka Nyamasheke mu ntangiriro z’uyu mwaka. Niba nta mpinduka zigaragara zikozwe mu maguru mashya, izi ngaruka z’imihindagurikire y’ikirere zizakomeza kongera ubukana.

By’amahire, nta rirarenga ngo hakorwe impinduka zishobora kurokora ubuzima bw’abatuye isi ndetse zigakumira iyangirika rikomeye ry’umubumbe dutuye.

COP (‘Conference of the Parties’) ni inama ngarukamwaka ihuza ibihugu bitandukanye ngo biganire ku bibazo byerekeye imihindagurikire y’ibihe. Iyi nama yatangiye kuba mu 1995, ubu ikaba iteranye ku nshuro ya 26 (COP26). Iyi nama itanga amahirwe yo kongera guhuriza imbaraga hamwe ngo duhangane n’ibibazo rusange. Ingingo eshatu z’ingenzi ziri kuganirwaho uyu mwaka ni: kugabanya ihumanywa ry’ikirere, kwiga kubana n’imihindagurikire y’ibihe ndetse no gushaka imari yo gushora mu mishanga yo kubungabunga ikirere.

Nubwo imyuka ihumanya ikirere yoherezwa n’u Rwanda ari mike, twiyemeje nk’ikindi gihugu icyo ari cyo cyose guhuza imbaraga n’abafatanyabikorwa batandukanye ku isi kandi tugafata ingamba zo guhuza politiki zo kubungabunga ibidukikije na gahunda za Leta.

Umwaka ushize, twiyemeje kugabanya imyuka ihumanye twohereza mu kirere ku kigero cya 38% mu myaka icumi iri imbere, no kugera kuri ‘Net Zero’ (ikigero cy’aho imyuka ihumanye yoherezwa mu kirere ihwanye n’ikurwamo) mu 2050. Turi muri COP26 twizera ko ibihugu biza ku isonga mu kohereza imyuka ihumanya ikirere na byo bizakora bene iyi mihigo ndetse bikayishyira mu bikorwa.

Ku Rwanda, gukora ibikorwa hagendewe ku mihindagurikire y’ibihe ni ingenzi cyane urebye urwego twugarijwemo. Ni yo mpamvu twashyizeho amabwiriza akomatanyije yo gushora imari mu baturage, ibidukikije ndetse n’ubuhinzi n’ubworozi butangiza ibidukikije.

Minisitiri w’Intebe w’u Rwanda, Dr. Edouard Ngirente, aha yagezaga ijambo ku bitabiriye iyi nama

Kubungabunga ahantu kamere nka pariki ya Giswati-Mukura byafashije mu gusigasira urusobe rw’ibinyabuzima ndetse bizamura urwego rw’ubukerarugendo. Ikindi ni uko kubaka imihanda ikomeye bizafasha mu kuzamura ubucuruzi ndetse no guteza imbere imibereho myiza y’abaturage.

Hagati aho, kugera ku byo twiyemeje ndetse no kwagura ibikorwa byiza twatangije biradusaba imari. Nubwo ibihugu byo muri Afurika ndetse n’ibindi biri mu nzira y’amajyambere byiyemeje gushora imari muri politiki zo kubungabunga ibidukikije, ntibishobora kwikorera uyu mutwaro usaba amafaranga byonyine. Ahubwo, ibihugu bihumanya ikirere kurusha ibindi ku isi n’ibihugu bikungahaye ku nganda ari byo ntandaro y’ikibazo cy’imihindagurikire y’ibihe kitwugarije uyu munsi ni byo bifite inshingano yo gushora amafaranga mu bikorwa byo kubungabunga ahazaza h’isi dutuye.

Muri COP15 yabereye i Copenhagen mu 2009, isi yiyemeje intego yo gushora miliyari 100 z’Amadolari ya Amerika mu bihugu bikiri mu nzira y’amajyambere ngo bihangane n’ihindagurika ry’ikirere. Iyo ntego ntabwo iragerwaho. Mu rwego rwo kuzagera ku ntego twihaye mu mpera z’iki kinyecumi, u Rwanda rwiyemeje gukusanya miliyari 11 z’Amadorali y’Amerika, aho miliyari 6 na miliyoni 89 zizava hanze y’igihugu. Kwesa uyu muhigo ni ingenzi.

Muri COP26 i Glasgow, itsinda ry’u Rwanda rishinzwe ibiganiro ku mihandagurikire y’ibihe riri gusaba ko hakorwa ibikorwa bigaragara byo kubungabunga ikirere, ndetse riri gusangiza amahanga uburyo igihugu cyakoresheje mu guhangana n’ihindagurika ry’ikirere. Iri tsinda kandi riri kwerekana amahirwe u Rwanda rutanga ku bifuza gushora imari mu bikorwa byo kubungabunga ibidukikije.

U Rwanda rutegerezanyije amatsiko isozwa ry’igitabo cy’amategeko agenga amasezerano yashyiriweho umukono i Paris, kandi rwiteguye gushyira mu bikorwa gahunda ziteza imbere imibereho myiza y’abaturage ndetse zikabubakira ubudahangarwa ku mihindagurikire y’ibihe.

Tuzaba kandi dukorana n’abafatanyabikorwa batandukanye kugira ngo dushyire imbaraga mu kugabanya byihuse ingano y’ibyuka bihumanya byoherezwa mu kirere, kongera ishoramari mu bikorwa byo kubungabunga ibidukikije ndetse twimakaze ihame ryo kwita ku bidukikije mu gihe duhangana n’imihindagurikire y’ibihe.

Ejo hazaza h’isi yacu hari mu biganza by’abayituye kandi nta mwanya wo gutakaza uhari.

Hon. Dr. Mujawamariya Jeanne d’Arc

Iyi ni inyandiko dukesha Minisitiri w’Ibidukikije mu Rwanda, Dr. Mujawamariya Jeanne d’Arc.

Hashyizwe ibuye ry’ifatizo ahazubakwa sitasiyo ya Lisansi

Ibuye ry’ifatizo ryashyizwe ahazubakwa iyo sitasiyo ku wa Gatatu tariki ya 03 Ugushyingo 2021, ikazubakwa mu gihe cy’amezi ane.

Umuyobozi wa CODERVAM, Ntamukunzi Celestin, avuga ko ibibazo by’imicungire mibi ya koperative byatangiye mu mwaka wa 1996 birakomeza kugera mu mwaka wa 2015, aho bishyuzwaga Amafaranga y’u Rwanda miliyoni zirenga 390.

Nyuma yo kuva muri ibyo bibazo birimo kuba koperative yatangiye mu mwaka wa 1988 yari itakibasha kwishyura abakozi, yatangiye kwiyubaka uyu munsi ikaba ifite ikigega cy’ingoboka cya miliyoni zisaga 89, umugabane wa miliyoni 27, ikigega cy’ingoboka cya miliyoni 82, ubu ikaba igeze ku musaruro wa toni 3,924 ndetse ikanatubura imbuto.

Iryo deni ryose ryari rikubiyemo imisoro y’Ikigo cy’Igihugu cy’Imisoro n’Amahoro (RRA), abantu ku giti cyabo ndetse na Kompanyi zitandukanye.

Nyuma y’ibibazo by’urusobe ubu koperative itunze imodoka

Ntamukunzi avuga ko nyuma yo kubona ko mu gace kabo hari ibinyabiziga byinshi harimo n’ibya koperative ariko kubona lisansi ari ukujya mu mujyi wa Nyagatare, bahisemo gukora umushinga kugira ngo koperative irusheho gutera imbere.

Ati “Niba uyu munsi dufite amafaranga yacu arenga miliyoni 300, nitwuzuza iyi sitasiyo koperative izarushaho gutera imbere n’abanyamuryango bibe uko kuko imigabane yabo iziyongera.”

Mbonigaba Jean, umwe mu banyamuryango avuga ko bizeye gutera imbere kurushaho kuko koperative igenda yaguka bitandukanye na mbere bahingaga bakabura ifumbire kubera imicungire mibi.

Agira ati “Kiriya ni igikorwa remezo cya buri Munyarwanda, by’umwihariko umunyamuryango wa koperaive kuko ubu mfite umugabane wa 150 ariko uko sitasiyo ikora ni ko umugabane wanjye uzakomeza kwiyongera.”

Umunyamabanga Nshingwabikorwa w’Akarere ka Nyagatare, Fred Hategikimana, avuga ko kuba CODERVAM igiye kubaka Sitasiyo ya lisansi ari imbaraga z’ubufatanye kuko atari igikorwa cyakwishobozwa n’umuntu umwe.

Avuga ko kuba habonetse iyo sitasiyo bizorohereza abafite ibinyabiziga ariko by’umwihariko binafashe mu kwirinda ingaruka zashoboraga gukomoka ku kuyibika mu nzu.

Ati “Aho yavaga ni kure ku buryo hari uwavugaga ati reka mbe nyifite hano ariko kuba haje sitasiyo izakemura ibyo bibazo byose byashoboraga gushyira ubuzima bwabo mu kaga.”

Umushinga wo kubaka sitasiyo ya essence wose ufite agaciro ka miliyoni 228 z’Amafaranga y’u Rwanda, ikazubakwa mu gihe cy’amezi ane ariko ukaba waranatangiye ugeze kuri 50%.

Hanabaye ihererekanyabubasha hagati y’umuyobozi ucyuye igihe, Ntamukunzi na Nyirandikubwimana Gaudence mushya

Ni sitasiyo irimo kubakwa ku muhanda wa kaburimbo mushya Nyagatare-Rukomo mu birometero umunani uvuye mu mujyi wa Nyagatare.

Koperative CODERVAM ifite abanyamuryango 1,350 ikaba ihinga umuceri ku buso bwa hegitari 400.

Impande zombi zabyemeranyije ku wa Gatatu, tariki ya 3 Ugushyingo 2021 ubwo Ambasaderi w’u Bufaransa mu Rwanda, Anfré Antoine, yasuraga Akarere ka Huye.

Yasuye ibikorwa bitandukanye muri Kaminuza y’u Rwanda, Ishami rya Huye, Urwunge w’Amashuri rwa Rukira n’inzu ikoreramo Ikigo cy’Ikoranabuhanga, Huye Innovation Hub hamwe n’ikigo gifasha abashaka akazi no kubahuza n’abagatanga.

Ambasaderi Anfré Antoine yavuze ko mu biganiro yagiranye n’ubuyobozi bw’Akarere ka Huye bemeranyije kongera imbaraga mu mubano na Komini Castres, hasubukurwa bimwe mu bikorwa byari byaradindiye kubera ko ibihugu byombi bitari bibanye neza.

Yavuze ko kandi u Bufaransa buzakomeza gufatanya n’u Rwanda mu guteza imbere inzego zirimo uburezi n’ubukungu.

Ati “By’umwihariko u Rwanda dusanzwe turi abafatanyabikorwa beza mu kubungabunga ibidukikije n’amazi ndetse no mu burezi kuko nk’ubu hari abarimu bacu biteguye kuza gufatanga ubufasha mu kwigisha Igifaransa. U Rwanda kandi dufatanya mu guteza imbere ikoranabuhanga ndetse dufatanya no muri siporo.”

Jenoside yakorewe Abatutsi mu Rwanda mu 1994 yatumye umubano warwo n’u Bufaransa uzamo agatotsi, bituma n’ibikorwa by’ubufatanye hagati y’Akarere ka Huye na Komini Castres bidindira.

Ntakirutimana Augustin wo mu Murenge wa Huye avuga ko yahoze akora nk’umuvumvu mu mishinga yari ihuriweho hagati y’iyahoze ari Komini Huye muri Perefegitura ya Butare na Komini Castres yo mu Bufaransa.

Yavuze ko icyo gihe bakuraga amafaranga menshi mu bikorwa bihuriweho n’impande zombi, bityo ubufatanye bwongeye gusubukurwa babibonamo inyungu.

Ati “Ndahamya ko baramutse bagarutse hari byinshi bageza ku Banyarwanda mu mishinga itandukanye nko mu bworozi bw’inzuki, amakoperative yo kudoda no kuboha n’ibindi.”

Umwarimu wigisha ku Rwunge rw’Amashuri rwa Rukira, Gakwaya Callixte, na we yavuze ko nk’ishuri bazungukiramo byinshi birimo ubumenyi, guhabwa ibitabo, mudasobwa no kwagura isomero.

Perezida wa Komite y’ubufatanye bw’Akarere ka Huye na Komini Castres, Kagabo Joseph, yavuze ko bemeranyije guteza imbere siyansi, gushakira ingengo y’imari imishinga yatangiye, imigenderanire n’imikoranire, ingendoshuri n’ibindi.

Ati “Mu ivugururwa ry’imishinga twaganiraga nka internet iri ku Bitaro bya Kabutare ni bo bagiye badufasha, natwe kandi dufite ibyo tugomba guteza imbere tukabishorayo nk’ibikorwa by’imyuga n’ubukorikori. Tuvuganye rero ko imirimo yatangijwe mbere tuyiha ingufu kandi ikagirira akamaro abaturage b’impande zombi.”

Yakomeje avuga ko mu mishinga bazavugurura harimo uw’ubuvumvu mu Bisi bya Huye, kuvugurura ishuri ry’ububaji mu Kagari ka Rukira, guteza imbere isomero ry’abana, kwigisha Igifaransa no kohereza abarimu baturutse mu Bufaransa kwigisha mu Rwanda.

Ubufatanye bw’Akarere ka Huye na Komini Castres bumaze imyaka 35 ndetse hashize imyaka ibiri bifatanya kwizihiza Umunsi Mpuzamahanga w’Ubumenyi.

Akarere ka Huye na Komini Castres yo mu Bufaransa byemeranyije kongera ikibatsi mu bufatanye bufitiye inyungu abaturage

Ambasaderi Antoine aganira n’Umuyobozi w’Umusigire w’Akarere ka Huye, Nshimiyimana Vedaste

Ambasaderi w’u Bufaransa mu Rwanda, Anfré Antoine, yasuye Akarere ka Huye mu rugendo rugamije kunoza imikoranire hagati y’aka karere na Komini Castres

Ambasaderi Anfré Antoine yavuze ko u Bufaransa buzakomeza gufatanya n’u Rwanda mu guteza imbere inzego zirimo uburezi n’ubukungu

Abanyeshuri bo ku Rwunge rw’Amashuri rwa Rukira bakurikiye ijambo bagejejweho na Ambasaderi w’u Bufaransa mu Rwanda, Anfré Antoine

Abanyeshuri bo muri GS Rukira bagaragaje bimwe mu byo biga

Ambasaderi Anfré Antoine yavuze ko mu biganiro yagiranye n’ubuyobozi bw’Akarere ka Huye bemeranyije kongera imbaraga mu mubano na Komini Castres hasubukurwa bimwe mu bikorwa byari byaradindiye

GS Rukira ni rimwe mu mashuri agirana ubufatanye na Komini Castres

Ambasaderi w’u Bufaransa mu Rwanda, Anfré Antoine, yasuye Akarere ka Huye ku wa Gatatu, tariki ya 3 Ugushingo 2021. Yari aherekejwe n’abayobozi batandukanye

Yasuye inzu ikoreramo ikigo cy’ikoranabuhanga Huye Innovation Hub hamwe n’ikigo gifasha abashaka akazi kubahuza n’abagatanga

[email protected]

Mu gitondo cyo kuri uyu wa Kane taliki 04/11/2021, umutoza w’ikipe y’Igihugu ‘’Amavubi Stars” Mashami Vincent yatangaje urutonde rw’abakinnyi 31 bagiye gutangira umwiherero w’Amavubi.

Ni umwiherero uri mu rwego rwo kwitegura imikino y’umunsi wa gatanu n’uwa gatandatu yo mu itsinda E u Rwanda ruherereyemo mu marushanwa yo gushaka itike yo kujya mu gikombe cy’isi kizabera muri Qatar 2022.

Biteganyijwe ko ikipe y’igihugu izakora umwiherero guhera kuri uyu wa Gatanu tariki ya 5 Ugushyingo 2021 mu gihe imyitozo izajya ibera kuri Stade ya Kigali. Amavubi azakira Mali ku itariki ya 11 Ugushyingo 2021, saa kumi n’ebyiri z’umugoroba I Kigali mbere gato yo kujya gusura Kenya mu mukino wo kwishyura ari nawo wa nyuma u Rwanda ruzaba rukinnye muri aya marushanwa uteganyijwe ku itariki ya 15 Ugushyingo 2021.

Mu mazina yahamagawe, harimo rutahiza Sugira Ernest wa AS Kigali wari umaze iminsi adahamagarwa, hakaza myugariro wa Gasogi United Nkubana Marc wigeze guhamagarwa mu ikipe y’igihugu y’abatarengeje imyaka 20.

Irindi zina rishya ryagaragaye kuri uru rutonde ni uwitwa RUTABAYIRU Jean Philippe ukina mu mu cyiciro cyo hasi muri Espagne mu ikipe yitwa S.D. LENENSE PROINASTUR.

Mu bakinnyi batagaragaye kuri uru rutonde harimo myugariro Ombolenga Fitina wa APR FC umaze iminsi afite imvune, na ba rutahizamu Tuyisenge Jacques na Kagere Meddie bari bamaze iminsi bari mu busatirizi bw’Amavubi.

Abakinnyi bahamagawe:

ABANYEZAMU

1. MVUYEKURE Emery (Tusker FC)
2. BUHAKE TWIZERE Clément (Strømmen IF)
3. NDAYISHIMIYE Eric (Police FC)
4. NTWALI Fiacre (AS Kigali)

AB’INYUMA

5. RUKUNDO Denis (As Kigali)
6. NKUBANA Marc (Gasogi United)
7. IMANISHIMWE Emmanuel (FAR Rabat)
8. RUTANGA Eric (Police FC)
9. NIRISARIKE Salomon (Urartu FC, Armenia)
10. MANZI Thierry (FC Dila Gori, Georgia)
11. NIYIGENA Clément (Rayon Sports FC)
12. SERUMOGO Ali (SC Kiyovu)

ABO HAGATI

13. BIZIMANA Djihad (KMSK Deinze)
14. MUHIRE Kevin (Rayon Sports FC)
15. RAFAEL York (AFC Eskilstuna, Sweden)
16. NIYONZIMA Olivier (As Kigali)
17. MANISHIMWE Djabel (APR FC)
18. NISHIMWE Blaise (Rayon Sports FC)
19. RUBONEKA Jean Bosco (APR FC)
20. NGWABIJE Bryan Clovis (SC Lyon, France)
21. RUTABAYIRU Jean Philippe (S.D. LENENSE PROINASTUR)
22. NSANZIMFURA Keddy (APR FC)
23. NIYONZIMA Haruna (As Kigali)

AB’IMBERE

24. NDAYISHIMIYE Antoine Dominique (Police FC)
25. SUGIRA Ernest (As Kigali FC)
26. MUGENZI Bienvenue (SC Kiyovu)
27. KWITONDA ALLAIN (APR FC)
28. USENGIMANA Danny (Police FC)
29. HAKIZIMANA Muhadjiri (Police FC)
30. NSHUTI Dominique Savio (Police FC)
31. NSHUTI Innocent (APR FC)

Mali niyo iyoboye itsinda E n’amanota icumi, Uganda ni iya kabiri n’amanota umunani, Kenya ni iya gatatu n’amanota abiri mu gihe u Rwanda ari rwo ruyaheruka n’inota rimwe rukumbi.

Aba banyeshuri baturuka mu mashami atandatu yose ya Kaminuza y’u Rwanda, aho 133 muri bo bazahabwa impamyabumenyi y’icyiciro cya Kabiri cya Kaminuza, mu gihe abandi 200 harimo abazahabwa impamyabumenyi y’icyiciro cya Gatatu cya Kaminuza (Masters), impamyabushobozi y’ikirenga (Phd) impamyabumenyi ya A1 n’impamyabushobozi ku bize porogaramu zitandukanye.

Umuhango wo gutanga izi mpamyabumenyi uzabera muri Kaminuza y’u Rwanda, Ishami rya Huye, ukazatangira saa munani z’umugoroba.

Abanyeshuri 117 mu bazahabwa impamyabumenyi ni abarangije muri Koleji y’Ubugeni n’Ubumenyi rusange (CASS), 83 bakaba abo muri Koleji y’Ubucuruzi n’Ubukungu (CBE) naho 70 bakaba ari abarangije muri Koleji y’Ubumenyi n’Ikoranabuhanga (CST).

Abandi banyeshuri bagera kuri 33 barangije mu Ishami ry’Ubuzima n’Ubuvuzi bw’Amatungo riri i Busogo (CAVEM), 19 barangije muri Koleji y’Uburezi (CE) mu gihe abandi 11 barangije muri Koleji y’Ubuvuzi (CMHS).

Uyu muhango udasanzwe umenyerewe muri Kaminuza y’u Rwanda, byatangajwe ko yawuteguye mu rwego rwo kuzirikana imbaraga aba banyeshuri bakoresheje biga, kuko kuba barakererejwe n’impamvu zitandukanye zirimo n’ibibazo birebana n’amafaranga, bitatuma badakorerwa umuhango wo kubaha impamyabumenyi bakoreye.

Aba banyeshuri bazahita biyongera ku bandi 8.908 baherutse guhabwa impamyabumenyi zabo muri Kanama, bari barimo batanu bahawe impamyabumenyi za PhD, 385 bahabwa iza Masters, mu gihe 7.796 bahawe iza Bachelor.

Abanyeshuri ba UR bacikanwe bagiye guhabwa impamyabushobozi zabo

Ni igitaramo cyiswe ‘M*Ovember Festival,’ aho ari iserukiramuco rizaba ribereye mu Rwanda bwa mbere, ari naho rizajya ribera. Uyu muhanzi w’icyamamare azafatanya n’abahanzi bo mu Rwanda barimo Kenny Sol na Gabiro Guitar.

Mu kiganiro gito yagiranye na IGIHE akigera ku Kibuga cy’Indege, Adekunle wari ufite akanyamuneza mu maso, yavuze ko nta byinshi yavuga ku Rwanda kuko ari igihugu agezemo bwa mbere azabanza akagitembera. Gusa avuga ko icyo asanzwe azi ari uko ari igihugu cyiza. Ati “Birazwi u Rwanda ni igihugu cyiza cyane.”

Mu gusoza yavuze ko agiye gukora igitaramo cy’amateka mu Rwanda, ati “Abantu bitege umuriro. Nabararikira kuza mu gitaramo.”

Kwinjira muri iki gitaramo bizaba ari ibihumbi 10 Frw, ibihumbi 20 Frw n’ibihumbi 30 Frw ku bazagura amatike mbere y’umunsi w’igitaramo, mu gihe abazayagurira ku muryango bazishyura ibihumbi 15 Frw, ibihumbi 25 Frw n’ibihumbi 40 Frw.

Adekunle Gold ubusanzwe yitwa Adekunle Kasoko. Yavutse tariki 28 Mutarama 1987. Ni ikinege iwabo. Yavukiye i Lagos muri Nigeria. Ni umuririmbyi, umwanditsi w’indirimbo ndetse na ‘graphic designer’. Afite impamyabumenyi mu bijyanye n’ubugeni (Arts and Design) yakuye muri Lagos State Polytechnic.

Yatangiye kumenyekana mu 2015 nyuma yo gushyira hanze indirimbo yise ‘Sade’ yakomoye ku yindi ndirimbo y’’itsinda rya One Direction yitwa ‘Story of my life’ ikamumenyekanisha nk’umunyempano wihariye.

Muri uwo mwaka yahise asinya amasezerano na YBNL nation y’umuhanzi Olamide Anahita ashyira hanze album ya mbere yise ‘Gold’ yakunzwe. Uyu mugabo yakoze izindi ndirimbo muri icyo gihe zirimo iyitwa ‘Orente’ na ‘Pick up’ zakomeje gutuma yigarurira imitima ya benshi.

Ubuto bwa Adekunle

Adekunle yakuze akunda umuziki w’abarimo Ebenezer Obey na King Sunny Ade bubatse amateka mu muziki wa Nigeria. Yakuriye mu baririmbyi baririmbaga muri korali y’abana aho yasengeraga ndetse ku myaka 15 yandika indirimbo ye ya mbere.

Mu 2014 yatangiye kuririmba ku giti cye ubwo yavaga mu itsinda yari yarashinze we n’inshuti ye biganaga mu mashuri yisumbuye. Agitangira umuziki, kimwe mu byo yamenyekanyeho ni igihe yashushanyaga yifashishije mudasobwa [photoshop] ifoto ari guhoberana na Tiwa Savage.

Icyo gihe yiswe umwami wa photoshop ndetse iyi foto isakara ku mbuga nkoranyambaga, ibi byagize uruhare mu gukundwa kwe kuko ubwo yari atangiye gukora indirimbo nyinshi, abantu bari basanzwe bamuzi bitewe n’iyi foto.

Mu 2015 ubwo yatangiraga gukora umuziki yashyizwe mu bahatanira igihembo cy’umuhanzi utanga icyizere mu bihembo bya City People Entertainment. Yaje kuva muri YBNL Nation ubwo amasezerano yari ahafite yari arangiye atangira kwikorana umuziki.

Mu 2020, uyu muhanzi aherutse gushyira hanze album ye yanatumye yigarurira igikundiro mu bihugu byinshi bya Afurika yise ’Afro Pop Vol. 1’. Iyi album iriho indirimbo zitandukanye zirimo nka ‘Sabina’, ‘It is what it is’, ‘Okay’ n’izindi. Iyi yaje ikurikira iyo yise ‘About 30.’

Mu myaka ishize yari yaragiye avugwa mu rukundo n’umuhanzi Simi ariko hagati yabo ntihagire uwerura ngo abyemerere itangazamakuru. Muri Mutarama 2019 bakoze ubukwe mu ibanga rikomeye.

Muri Mata 2020 Simi yakoreye indirimbo yise ‘Duduke’ umwana wabo w’umukobwa bise Adejare Kosoko Deja bibarutse muri Gicurasi uwo mwaka.

Ubwo Adekunle yari ageze i Kigali

Adekunle yasesekaye i Kigali afite akanyamuneza

Uyu muhanzi yavuze ko igitaramo azakorera i Kigali kizaba ari icy’amateka ndetse kikazaba ari umuriro

Imodoka zo mu bwoko bwa V8 nizo zavanye Adekunle ku Kibuga cy’Indege cya Kigali kiri i Kanombe

Uyu muhanzi yahawe ikaze n’abantu bacye kuko yageze i Kigali mu masaha y’umugoroba

Zimwe mu ndirimbo zakunzwe cyane za Adekunle

Adekunle Gold ni umwe mu bahanzi bagezweho muri iki gihe

Kuri uyu wa Gatanu, uyu muhanzi arasusutsa Abaturarwanda

Adekunle amaze kugira album eshatu

Adekunle mu butumwa aheruka gushyira kuri Twitter yateguje abanyarwanda igitaramo cy amateka

Adekunle ni umwe mu bahanzi b’abahanga, agashimirwa cyane ubushobozi bwe mu kwandika indirimbo

Adekunle yatangiye umuziki akiri muto

Iki gitaramo kirabura iminsi micye ngo kibe