Tag: featured

Perezida wa Komisiyo y’u Rwanda ishinzwe kuvugurura amategeko, Mukantaganzwa Domitille, yavuze ko iyi nkoranyamagambo izafasha abanyamategeko kurushaho kumenya amagambo yose akoreshwa mu mwuga w’ubucamanza ndetse no kubafasha kurushaho kuyegeranya.

Yagaragaje ko itandukanye cyane n’iyari isanzwe ikoreshwa kuko yo yari yaranditswe mu ndimi ebyiri gusa ari zo Igifaransa n’Ikinyarwanda ariko iyi nshya yanditswe mu ndimi eshatu.

Yagize ati “Umwuga w’amategeko kimwe n’indi urangwa no gukoresha amagambo yihariye. Umuntu wese usoma, ukoresha amuga(amagambo yihariye mu mwuga runaka) aba agomba kwitondera ayo akoresha. Iyi nkoranya yateguwe hagamijwe gushyikiriza abanyamategeko b’umwuga igikoresho kizabafasha gusobanukirwa neza no kwegeranya amuga y’amategeko.”

Inkoranyamahambo yakoreshwaga yashyizweho mu 2000 na Minisiteri y’Ubutabera. Ngo ntiyari yuzuye kuko amategeko y’u Rwanda yandikwa mu ndimi eshatu kandi buri rurimi rwose ruba rufite agaciro kangana. Ikindi ni uko hagiye habaho amavururura menshi mu mategeko.

Yakomeje agira ati “Komisiyo y’u Rwanda ishinzwe kuvugurura amategeko yabonye ko hari hakenewe inkoranya y’amuga y’amategeko inogeye abayikoresha kandi ihuje n’imiterere y’ubu y’amategeko y’u Rwanda, niko gutegura iyi yanditse mu ndimi eshatu.”

Yasabye abanyamategeko kuzarushaho kuyikoresha neza bikagabanya amagambo mvamahanga yakoreshwaga mu nkiko ndetse agaragaza ko mu gihe hari icyakenerwa kongerwamo cyangwa kuvugururwa biteguye kubikora.

Umukozi muri iyi Komisiyo, Nikuze Emmanuel, yasobanuyue ko amagambo arimo akiri makeya ugereranyije n’ingeri z’amategeko ariko ko bibaha umukoro wo gukomeza gukora ubushakashatsi.

Inkoranya y’amuga y’amategeko yamuritswe ni iy’ibanze kuko hazagenda hakorwa ibindi byiciro bitandukanye bigamije kongera amuga akoreshwa mu ngeri zinyuranye z’amategeko.

Igizwe n’impapuro 532, ikaba ikubiyemo amuga 2698 akunze gukoreshwa mu mategeko kandi asobanuye mu buryo bukwiriye mu ndimi eshatu, Ikinyarwanda, icyongereza n’Igifaransa.

By’umwihariko izajya ikoreshwa n’abandika amategeko mu nzego za leta, abavoka, abahesha b’inkiko, abacamanza, abagenzacyaha, abashinjacyaha, abashakashatsi, abarimu n’abanyeshuri bo mu mashuri yigisha amategeko.

---

Hari mu kiganiro cy’imyidagaduro MC Tino asigaye akora kuri KT Radio guhera saa cyenda kugeza saa kumi n’ebyiri n’igice z’umugoroba.

Kurikira ikiganiro kirambuye bagiranye:

Muri iri shuri yakiriwe n’Umuyobozi mukuru wa PTS-Gishari, CP Robert Niyonshuti, amwereka iryo shuri ndetse anamugaragariza gahunda y’amasomo ahatangirwa.

CP Niyonshuti yagize ati “PTS-Gishari ni rimwe mu mashuri ya Polisi y’u Rwanda atanga amahugurwa atandukanye ajyanye n’umwuga wa Polisi, twavuga amahugurwa ahabwa abitegura kuba abapolisi bato ndetse n’abitegura kuba ba Ofisiye bato. Hanahugurirwa abitegura kujya mu butumwa bw’Umuryango w’Abibumbye bwo kubungabunga amahoro ndetse tunahugura abunganira urwego rw’uturere mu kwicungira umutekano (DASSO).”

CP Niyonshuti yeretse umushyitsi ibisabwa buri muntu wese kugira ngo yitabire amasomo atangirwa muri PTS-Gishari, agaragaza ko byose bitangazwa mbere y’uko umuntu aza muri iri shuri ku buryo aza abizi ndetse Polisi na yo ikagenzura neza ko buri muntu yaje yujuje ibisabwa.

Umuyobozi wa PTS-Gishari yashimiye Umuyobozi mukuru wa Gendarmerie ya Repubulika ya Santrafurika kuba yasuye irryo shuri, anamugaragariza ko Polisi y’u Rwanda yiteguye gusangira ubunararibonye mu bintu bitandukanye harimo n’amahugurwa.

Aherekejwe na CP Niyonshuti, Gen Urlich yagejejwe ahantu hatandukanye muri iryo shuri yirebera bimwe mu bikorwa remezo bihari ndetse n’amasomo arimo kuhatangirwa.

Uwo muyobozi yishimiye Polisi y’u Rwanda ndetse n’inzego z’umutekano z’u Rwanda muri rusange, avuga ko ari ikitegererezo mu bijyanye n’umutekano, ko uruzinduko yagiriye mu Rwanda hari icyo azarwungukiramo.

Yagize ati “Uruhare rw’inzego z’umutekano z’u Rwanda ni ntagereranywa mu kugarura amahoro mu gihugu cyacu cya Repubulika ya Central Africa. Nanejejwe n’amahugurwa atangirwa muri iri shuri, yo ubwayo arasobanura ibikorwa tubonana Polisi y’u Rwanda haba hano mu Rwanda n’aho iba yagiye mu bikorwa byo kubungabunga amahoro mu mahanga.”

Yakomeje avuga ko ibikorwaremezo yabonye muri PTS-Gishari bihura neza n’amasomo ahatangirwa, ashimangira ko na bo bagiye kohereza abashinzwe umutekano bakaza guhugurirwa muri PTS-Gishari.

Gen Landry Urlich Depot n’intumwa ayoboye bari mu Rwanda mu ruzinduko rw’akazi rw’iminsi itandatu.

Bigishijwe uko bakwifashisha kizimyamoto mu kuzimya inkongi

Aba baturage bavuga ibi, nyuma y’aho Polisi y’u Rwanda ikorera mu Karere ka Musanze, ishami rishinzwe kuzimya inkongi n’ubutabazi bwihuse; ku wa Kane tariki 4 Ugushyingo 2021, yabigishije uko bakwikorera ubutabazi bw’ibanze, mu gihe habaye inkongi y’umuriro, mu gukumira ingaruka zayo.

Mu byo bigishijwe harimo uko bakwifasha bimwe mu bikoresho birimo n’ibyo mu ngo, bakabasha kwitabara, bazimya inkongi y’umuriro igihe ibayeho.

Umwe mu batuye muri uwo mudugudu witwa Karigirwa Lucie yagize ati: “Nanejejwe no gusobanukirwa uko hari ibikoresho byo mu rugo nari ntunze, nanabikoresha mu mirimo isanzwe yo mu rugo ya buri munsi, ariko ntazi ko nshobora kuba nabyifashisha mu kwikorera ubutabazi bwihuse nkazimya inkongi y’umuriro, wenda itewe na Gaz cyangwa indi nkongi yoroheje. Nasobanukiwe ko atari inkongi y’umuriro iyo ari yo yose izimishwa amazi nk’uko twabyibwiraga. Nkatwe abadamu bo muri uyu Mudugudu, dukunze gukoresha Gaz cyane mu guteka amafunguro, ariko ntitwari dusobanukiwe uko twabyifatamo mu gihe habayeho nk’inkongi iturutse ku ikoreshwa rya gaz”.

Ati “Hari nk’ubwo umuntu yaba ayitetseho wenda nk’umugozi wayo wafungutse, ishyiga ryayo ryagize ikibazo, cyangwa se n’icupa ryayo, umuntu yarangara gatoya, wenda atanabimenye, ikaba yateza iyo nkongi. Twigishijwe uburyo bworoshye bwo kuyizimya umuntu akoresheje ikiringiti cyangwa isume itose, akayirambika ahari umuriro, ikawuzimya byihuse kandi mu buryo bworoshye”.

Kuba abatuye mu Mudugudu w’icyitegererezo wa Kinigi bakoresha Gaz, ni ngombwa ko basobanukirwa n’uko ubutabazi bw’ibanze bukorwa mu gihe haramuka habayeho inkongi

Mu byo aba baturage basobanuriwe ni uko inkongi y’umuriro ibaho bitewe n’uburangare, ubujiji cyangwa igaterwa n’impanuka.

Abahuguwe bo muri uyu Mudugudu w’icyitegererezo wa Kinigi, ngo kuba batuye aho begeranye mu mudugudu; ngo byari ngombwa gusobanukirwa n’uburyo bwo kuyihosha, kugira ngo bibongerere amahirwe yo kutagerwaho n’ingaruka zikomeye igihe habayeho inkongi.

Benimana Jean Pierre utuye muri uyu mudugudu, yunga mu rya mugenzi we, agira ati: “Icyo twungutse ni uko twakoresha kizimyamoto, kuko n’ubundi aya mazu batwubakiye na zo ziriho, tukabasha kwirwanaho, tukaburizamo inkongi y’umuriro cyangwa igahosha mu gihe dutegereje ubundi butabazi bwa Polisi. Muri make ubu bumenyi twari tubukeneye cyane, kuko ukurikije ukuntu dutuye mu Mudugudu, mu mazu yegeranye, bishoboka ko inkongi yabaho ikaba yateza akaga mu gihe abantu badasobanukiwe n’uburyo bwo kuyihosha”.

Umuyobozi wa Polisi mu Karere ka Musanze, SSP Jean Pierre Kanobayire, yasobanuye ko kumenya uburyo bw’ibanze bwo kwitabara mu gihe habayeho inkongi y’umuriro ari ingenzi mu gukumira ingaruka ziyiturukaho zikunze kubaho.
Akangurira abahuguwe, ko ubwo bumenyi bajya babushingiraho baramira ubuzima bwabo n’ubw’abandi.

Abaturage bavuze ko ubu bumenyi bwo kuzimya inkongi y’umuriro bari babukeneye

Yagize ati: “Twaberetse ibintu bikunze kuba intandaro y’inkongi, ariko kandi tubahugura n’uburyo bwose bakoresha bakitabara byihuse igihe icyo ari cyo cyose umuriro ubayeho. Bariya twahuguye, basanzwe batuye mu Mudugudu w’icyitegererezo, ufite ibikoresho bihagije bashobora kwifashisha mu kuzimya inkongi y’umuriro mu gihe cyose wabatera mu buryo butunguranye. Kuba bose banakoresha gaz, ni ngombwa ko basobanukirwa icyo bakora mu gihe yaba iteje inkongi y’umuriro; mu rwego rwo kwirinda ko yabateza amakuba”.

Ati: “Hejuru y’ibi, tunabashishikariza ko igihe babonye ko inkongi ifite ubukana, bajya bihutira kwifashisha telefoni, bagatabaza Polisi ishami rishinzwe kuzimya inkongi y’umuriro, rikorera mu Ntara y’Amajyaruguru, kugira ngo ibagoboke umuriro utarabateza akaga gakomeye”.

SSP Jean Pierre Kanobayire ukuriye Polisi mu Karere ka Musanze, asaba abaturage kwirinda inkongi no kujya bihutira gutabaza Polisi mu gihe babonye inkongi ifite ubukana

Niyomukiza avuga ko kuboha imipira byamukuye mu bukene

Niyomukiza uyu hamwe n’umugabo we batuye mu Mudugudu wa Karumbi, Akagari ka Ruhunga, Umurenge wa Kibilizi mu Karere ka Nyamagabe.

Mu myaka itanu ishize bari batuye mu nzu yubakishije ibiti, ihomesheje ibyondo, mbese inzu yari imeze nk’iz’abakene bandi batuye mu cyaro cy’Akarere ka Nyamagabe babarizwamo. Ariko ubungubu batuye mu ijyanye n’igihe, iteye umucanga n’irangi, ifite n’amadirishya ndetse n’inzugi z’ibirahure.

Igishimisha Niyomukiza kurusha ni uko iyo arebye abona urugo rwe n’abe bakeye, akavuga ko ubu na bo ari abasirimu, kuko ubukene babusize inyuma.

Niyomukiza aboha n’amashale, bakamugurira agatera imbere

Ibi kandi ngo babikesha icyemezo cyo kwiga umwuga w’ubudozi yafashe, nyuma yo kwegera abandi bagore bakamugira inama yo gushaka umwuga akora, kuko ngo na bo basanze ubuhinzi bwonyine butabazamura, cyane ko n’imirima yo guhinga bafite ari mitoya.

Agira ati “Ngishakana n’umugabo wanjye, nta kazi twagiraga. Twageze mu rugo tubaho nk’abantu b’abakene, tugahingira amafaranga, tukajya inama tukayoberwa icyo gukora. Nareba ababyeyi bo mu yindi midugudu no mu yindi mirenge nkabona barasa neza. Ndabegera turaganira, umwe arambwira ati reba ikintu cyo gukora ku buryo wajya uhorana amafaranga ku mufuka.”

Icyo gihe ngo yegereye umugabo we, amubwira ko ibyo guhinga byonyine bidahagije, ko yumva ashaka kwiga umwuga, na we amubwira guhitamo uwo ashaka akamufasha kuwiga. Yahisemo kwiga kuboha imipira.

Imashini bifashisha mu kuboha imipira zishobora gukora imideri inyuranye

Amaze kubimenya ngo baricaye na none, basanga hakenewe imashini nyamara nta mafaranga bafite, maze begera Sacco ibaguriza amafaranga ibihumbi 350, barayigura.

Niyomukiza ati “Imashini ndaza ndayikoresha, hashize nk’amezi abiri mba nguze iyindi.”

Abaturanyi ngo batangajwe n’ukuntu babona ari gutera intambwe igana iterambere, batangira kujya bamwegera na bo akabigisha, ariko uwo yigishije akamwishyura ibihumbi 100, na we akamwerekera imideri yose ishoboka imashini ishobora gukora.

Yongeraho ko n’ubwo abantu bakunze kubona imipira ikoze mu muderi umwe, cyane cyane iy’abanyeshuri bo mu mashuri abanza n’ayisumbuye, imashini bifashisha ubundi zigira imideri myinshi.

Biyujurije inzu nziza babikesha kuboha imipira

Ati “Niba ushaka kuboha umuderi w’amapfundo, uba ufite uko ubigenza ya mapfundo akaba ari yo asohokamo. Niba se ushaka umuderi w’ubudodo buvangavanze, na bwo uba ufite uko ubigenza, bikagenda uko ubishaka. Iriya mashini iboha ibintu byinshi bitandukanye, ni uruganda rwa made in Rwanda.”

Umupira uboshye mu buryo busanzwe awubohera amafaranga ibihumbi bine, na ho uw’umuderi udasanzwe akawubohera ibihumbi bitanu, kandi ku munsi ngo ashobora kuzuza imipira 10.

Ati “Ku kwezi nshobora kwinjiza amafaranga ibihumbi 80, na ho mu gihe cy’abanyeshuri nshobora gukorera n’ibihumbi 150 cyangwa 180 bitewe n’uko umukozi nashyizeho kumfasha na we yabashije gukora vuba.”

Umugabo we kugeza ubu ngo yita ku nka boroye, kandi ngo azifata neza ku buryo hari nk’izo bashobora kubishyura ibihumbi 600, kandi urugo rwabo ngo ruhoramo amata.

Inzu bari batuyemo mbere yari iya gikene

Icyakora, Niyomukiza ubu ari kumushishikariza kuzajya amufasha mu kuboha imipira, kandi ngo abona amaherezo azamwemerera bakabigira umwuga ubatunze, kuko na we yabyize akaba yaranabimenye.

Uwo mugore asaba n’abandi bagenzi be gushakisha umwuga bakora, banashaka bagakora ububoshyi bw’imipira, kuko ngo yasanze byabatunga.

Impungenge ziba ari zose bitewe n’amazi yuzura mu ngo z’abaturage

Abagaragaza icyo kibazo ni abaturage bo mu Kagari ka Cyogo batuye munsi y’umusozi, ahakunze kwibasirwa n’ibiza bituruka ku mazi y’imvura igwa ari nyinshi, ikamanukana amabuye manini, imicanga n’ibitsitsi by’ibiti bituruka mu musozi ukikije umubande batuyemo, bikiroha mu ngo zabo.

Ndagijimana Fidèle wo mu Mudugudu wa Karuyege, yagize ati “Dutuye munsi y’umusozi, aho imvura igwa ikaduteza ibiza by’amazi amanukana ibibuye binini abikuye mu mpinga, biri kumwe n’imisenyi hamwe n’ibishyitsi by’ibiti bikiroha mu mazu yacu. Abatuye muri kano gace twese tubayeho tudatekanye”.

Ati “Imvura itonyanga gato tukarara duhagaze kuko tuba tuvuga tuti isaha iyo ariyo yose yaba nyinshi, twasohoka tugakizwa n’amaguru twirinda ko idutembana. Tukaba twifuza ko Leta itwimura aha hantu burundu, idushakire ahandi idutuza heza hadashyira ubuzima bwacu mu kaga, kuko turambiwe kubaho turi ku nkeke”.

Ibiza byangiza amazu n’ibiyarimo abaturage bakaramura mbarwa

Imiryango myinshi mu yibarizwa muri Kagari ka Cyogo, imaze iminsi yarakuwe mu byayo n’ibiza, byaturutse ku mvura yaguye ari nyinshi mu byumweru bitatu bishize, isiga abaturage iheruheru, ubu bakaba barimuriwe mu mazu bakodesherezwa n’Umurenge.

Imyaka yabo igizwe n’ibigori, urutoki, inyanya n’ibindi bari barahinze yangijwe n’ibyo biza, bisenya amazu andi yangirika bikabije.

Aba baturage bahamya ko ibi bibaye mu gihe bari barakomeje kwihambira, ngo bakomeze bahature, aho batekerezaga ko bazagera igihe bakabona agahenge, ariko ngo uko iminsi ihita ibyo biza bikomeza kubakururira ibihombo; ku buryo hatabayeho kubashakira igisubizo kirambye, bazisanga barahindutse abatindi nyakujya.

Uwitwa Nyirabagenzi Pascasie yagize ati “Turahinga imyaka yacu ntidusarure ibyo tuba twiteze kubera ko ibiza biba byayitembanye. Nk’ubu iyo twari twarahinze yose ibyo biza byarayikukumbye ku buryo ubu twibaza uko mu mezi ari imbere tuzaba tubayeho tudafite ibyo kurya. Ku bwacu twifuza ko Leta yadufasha, ikadushakira ubundi butaka dutuzwaho, igisubizo kirambye cy’ahangaha hatuzengereje ikazaba icyigaho nyuma twaramaze kuhava”.

Bimwe mu byo aba baturage bagarukaho bitiza umurindi ibi biza, ngo ni imigezi ibarizwa muri kano gace, harimo uwitwa Nyamukwana, Nyabeshaza, umugezi wa Mararo n’undi witwa Mbizi, mu gihe cy’imvura ikunze kurengerwa n’amazi, akisuka mu ngo z’abaturage no mu mirima yabo.

Umunyamabanga Nshingwabikorwa w’Umurenge wa Muko, Murekatete Triphose, avuga ko mu miryango babaruye, igera kuri 24 ariyo basanze ikomerewe ku buryo igomba kwimurwa burundu, igashakirwa ahandi ituzwa.

Kubona aho banyura ngo biba ari ihurizo rikomeye

Yagize ati “Bigaragara ko amazu ituyemo ari mu manegeka akabije, kuko ari munsi y’umusozi. Imvura iyo iguye, ibateza ibibazo binashobora kubakururira urupfu. Icyo twakoze ku ikubitiro ni ukubanza gushaka aho tuba tubacumbikiye mu gihe tukibakorera ubuvugizi mu nzego zidukuriye, kugira ngo byibuze n’aho babaye bacumbikiwe, bazahakurwe bashakirwe ahandi hantu batuzwa mu buryo burambye; kuko n’ubundi muri iki gihe imvura igihari, n’iyo migezi ikaba idasiba kuzura. Twizeza abaturage ko ubwo buvugizi bwo kubashakira ahandi batuzwa tubukomeje, kandi hari icyizere ko igisubizo kitazadinda kuboneka”.

Ubushinjacyaha dukesha iyi nkuru buvuga ko icyo cyaha cyabaye tariki 03 Kamena 2019 mu Mudugudu wa Musekera, Akagari ka Zivu, Umurenge wa Save mu Karere ka Gisagara. Uwo musaza ngo yabwiye abantu yasanze aho bari biriwe mu gikorwa cyo gushaka imibiri y’abantu bazize Jenoside yakorewe Abatutsi ngo “ariko aho mwaba muri kuhacukura zahabu?”

Mu iburanisha, Ubushinjacyaha bwasabye ko urubanza rusubikwa kugira ngo ukekwa ashakirwe umwunganira kubera ko yagaragaje intege nke, kutabasha kumva no kuvuga ibyo yabazwaga n’Urukiko.

Icyaha cyo gupfobya Jenoside akurikiranyweho, kiramutse kimuhamye yahanishwa igifungo kigera ku myaka 7 n’ihazabu ya miliyoni 5 hashingiwe ku ngingo ya 6 y’itegeko no 59/2018 ryo ku wa 22/08/2018 ryerekeranye n’icyaha cy’ingengabitekerezo ya Jenoside n’ibindi byaha bifitanye isano na yo.

Urubanza rwimuriwe ku itariki ya 15 Ukuboza 2021 saa tatu za mu gitondo i Save.

Minisitiri Twagirayezu aganiriza abanyeshuri ku kamaro ko kwiga

Yabitangaje ku wa kane tariki ya 04 Ugushyingo 2021, ubwo yasuraga amwe mu mashuri mu Karere ka Nyagatare hagamijwe kureba uko itangira ry’amashuri rihagaze, uko abanyeshuri bagarutse n’uko imyigishirize yifashe ndetse n’imikoranire y’ababyeyi n’ubuyobozi bw’ishuri.

Amashuri yasuwe ni iry’ikitegererezo rya GS Tabagwe mu Murenge wa Tabagwe, ndetse n’ishuri ry’abakobwa rya Mary Hill mu Murenge wa Nyagatare.

GS Tabagwe ryahawe ibikorwa remezo bigezweho ariko kubikoresha bikaba bikiri imbogamizi kubera ko ibibigendaho bihenze bijyanye n’ubushobozi bw’ishuri.

Umuyobozi wa GS Tabagwe, Mupende Johnson, avuga ko umuriro w’amashanyarazi, amazi ndetse na gaze yo gutekesha ibiryo by’abanyeshuri, bihenze cyane ugereranyije n’ubushobozi bw’ishuri.

Ati “Umwana wiga mu mashuri abanza ntiyishyura, abiga mu mashuri yisumbuye biga bataha babazwa amafaranga y’ifunguro gusa. Abiga bararamo ni 300 urumva ntihavamo amafaranga ya biriya bikorwa remezo birahenze cyane.”

Minisitiri Twagirayezu akurikiranye isomo

Ku ishuri rya Mary Hill ricungwa na Kiliziya Gatolika Diyosezi ya Byumba, hagaragajwe imbogamizi z’icyumba cy’ikoranabuhanga kitararangira kubakwa mu gihe mudasobwa zihari.

Iri shuri kandi n’ubwo ryigenga ubu rifata abana b’abakobwa batsinze neza ibizimani bya Leta, kandi bakakwa ikiguzi gito ugereranyije n’abaza mu buryo bwigenga.

Minisitiri Twagirayezu avuga ko amashuri yasuye yabahaye ishusho nziza ko ubwitabire bw’abana ari bwiza kandi no kwigisha bigenda neza.

Ariko na none yavuze ko abarimu bataragera ku bigo by’amashuri baza kuhagera vuba kuko ibizamini byarangiye gukorwa, n’ababitsinze bahari hasigaye kubashyira mu myanya gusa bagatangira akazi.

Gaze ikoreshwa mu gutekera abanyeshuri kimwe mu bikorwa remezo gihenze

Ku bijyanye n’ibigo by’amashuri byahawe ibikorwa remezo ariko ubushobozi bw’ibigo bukaba butabasha kubikoresha uko bikwiye bijyanye n’ubushobozi bwabyo, yavuze ko Leta igiye gushyiraho uburyo ibyo bigo byafashwa mu gukemura ibyo bibazo.

Yagize ati “Turabizi ndetse nka Minisiteri n’abandi bafatanyabikorwa bacu, turakora ku buryo tuzakomeza guha ayo mashuri ubushobozi kugira ngo abe yashobora gutanga serivisi tuba twifuza ko atanga.”

Akomeza agira ati “Muri gahunda yo kubaka amashuri, agenda yiyongera mu bwinshi ndetse no mu bwiza, ubwo rero bivuze ko bigomba kujyana n’ubushobozi ahabwa kugira ngo ashobore kuba amashuri twifuza.”

Amasomo yaratangiye

Mu Karere ka Nyagatare, abarimu 1,011 ni bo bategerejwe mu mashuri, muri bo 146 bakaba ari abazakora mu bijyanye n’ubuyobozi bw’amashuri.