Tag: featured

Ibyo birori byabereye kuri Intare Conference Arena, iri rikaba ari ijambo rikubiyemo impanuro Madamu Jeannette Kagame yagejeje ku banyamuryango ba AERG na GAERG.

Ba Nyakubahwa Bayobozi mu nzego nkuru z’igihugu cyacu,
Bayobozi muhagarariye inzego z’umutekano,
Batumirwa bahire,
Banyacyubahiro, Babyeyi turi kumwe uyu munsi,
Banyamuryango ba AERG na GAERG,
Muraho Neza!
Isabukuru Nziza!

Nejejwe no kwifatanya namwe kuri uyu munsi w’ibyishimo ubwo
twizihiza isabukuru y’imyaka 25 ya AERG, n’imyaka 18 ya
GAERG.

Abenshi muri hano muri abanyamuryango ba AERG na GAERG,
ariko n’abandi twese twatumiwe ntituri abashyitsi, niyo mpamvu
mubitwemereye twifuzaga kuganira nk’ababyeyi.

Mu izina ry’ababyeyi bose, nagira ngo mbabwire ko turi kumwe,
tubumva, kandi duhagaze mu mwanya w’abacu batagihari.
Nifuje kandi kubagezaho ubu butumwa, nk’ubwira umwana we
wujuje imyaka makumyabiri n’itanu (25)! Cyane cyane ko nanjye
mfite abenda kuyigezaho, urungano rwanyu, abisumbuyeho gato,
n’abamaze kugera mu cyiciro cyo kurera.

Bana bacu,
Mu mibereho y’Abanyarwanda kimwe n’abandi Banyafurika,
umwana ni uw’umuryango!
Mu gihe AERG yavukaga, u Rwanda rwari amatongo, abana
badafite kirengera.
Mwumvise umurindi w’ingabo nziza zarokoye uru Rwanda,
nyamara zitashoboraga kwishima kubera igihugu twese twasanze.

Ababyeyi twese dushimishwa n’uko mutagarukiye aho gusa, kuko
mwatangije AERG na GAERG, ngo izakomeze kubera n’abandi
barokotse Jenoside, ‘umuryango’ ubahoza kandi ukabaha uburere
n’ikinyabupfura.

Uyu munsi rero, kubabona mwizihiza imyaka 25, ni ishema kuri
twese.

Ni icyizere ku baharaniye ko mubaho, kandi ni icyemezo ko u
Rwanda rwiyemeje kubaho, ubutazongera kuzima.

Banyamuryango ba AERG na GAERG,
Abakoze Jenoside bifuzaga ko ntawe uzayirokoka! Ubwo
umuryango wa RPF wabohoraga u Rwanda muri 1994, benshi mu
batureberaga kure, batekerezaga ko u Rwanda rwazimye.
Hari n’abatugiriye inama ko u Rwanda rwaramba, ari uko
rugabanyijemo ibihugu bibiri (Hutu land and Tutsi land).

Uretse abatureberaga kure rero, natwe ubwacu nk’Abanyarwanda,
ntawiyumvishaga ko:

 Igihugu cyabuze abantu barenga milioni,
 Inzego zacyo zose zarasenyutse,
 Nta mutekano n’icyizere cyo kubaho,
Ko icyo gihugu cyakongera kugira ubuzima.

Nta wakorewe Jenoside umenya uko izakorwa. Ni nayo mpamvu
guhangana n’ingaruka zayo, byasabye ko abantu bashakisha
umuti uwo ari wo wose, n’ibisubizo byadufasha guhangana
n’ihungabana.

Guharanira kubaho kandi neza, kurerana muri za ‘familles’
mwashinze, byabaye umuti urambye w’ibibazo byinshi mwari
mufite.

Iyo urebye umusaruro wavuye mu bisubizo twavomye mu
mwihariko w’umuco n’imibereho yacu, usanga ari umurage
(patrimoine) ukwiye kwandikwa mu mateka.

Bikandikwa cyane cyane namwe mwabigizemo uruhare, kugira
ngo uwo murage utazahererekanywa mu mvugo gusa, ukagera
ubwo utakara kandi wararamiye benshi.

Duhora tuzirikana ubutwari bw’ Imfura za AERG uko ari 12,
bashinze uyu muryango ukarera benshi.
Mumfashe tubashimire!

Rubyiruko, Bana bacu,
Iyo Umuntu agejeje imyaka 25 ntabwo aba akiri umwana, ahubwo
aba ajya inama kandi zubaka.

Ku myaka makumyabiri n’itanu, umuntu aba yaramaze gukora
amahitamo, hari ibyo adakwiriye gukora cyangwa gukinisha.
Nagira ngo rero dufatanye dutekereze ku ngingo zikurikira ndetse
zihura n’intego mwihaye, mushinga imiryango yombi ya AERG na
GAERG:

● Kuba mwarahisemo “Kwibuka” amateka ya Jenoside,
nk’intego yanyu ya mbere bifite ishingiro. Tugomba
kubikomeraho cyane, cyane ko n’itegeko-nshinga ryacu
ribishimangira.

Dukomeze guhesha abacu agaciro no kubibuka iteka, niho
tuvoma imbaraga zo kubaho.

● Gahunda yo kwibuka imiryango yazimye, mugira muti
“Ntukazime nararokotse”, ntawe idakora ku mutima!
Kuko imiryango yazimye ni ikimenyetso kidasanzwe,
kigaragaza ubukana Jenoside yakorewe Abatutsi
yakoranywe.
Kwibuka ni inshingano zidafite igihe ntarengwa kandi
zizahoraho.

● Kurwanya ingengabitekerezo ya Jenoside, bikomeze bijyane
no gufasha urungano rwanyu, kumva neza amateka yacu.
Mufashe ababyiruka gusobanukirwa neza Jenoside yakorewe
Abatutsi, kuyirwanya no kwimakaza Ubunyarwanda, kuko
ariyo sano duhuriyeho twese. Mujye mwirinda buri wese
ubatoza urwango.

● Kwirenga, kwiyakira no kubana n’ababiciye imiryango,
byabaye umuti usharira, ariko wavuyemo imbuto zubatse
igihugu gikomeye.

● Izo mbuto zishimangira kandi Ubunyarwanda dushyira
imbere y’ikindi icyo ari cyo cyose.

Mufite rero umuhamagaro n’inshingano (mission) yo kurinda
Ubunyarwanda.

Dukomeze gufatanya twese kugira ngo dushyireho uburyo
bunoze bwo kubwira abana badukomokaho, Jenoside
yakorewe Abatutsi no kubaka ubumwe bwacu.
Ntimuzahweme kubikora !

● Iyo umuntu abakurikiye kenshi yumva mugira muti “Imbere
heza! Imbere heza haraharanirwa! Mu buzima nta
kujenjeka!

Izi ni slogans zabaranze muri AERG na GAERG zabahaye
imbaraga zo gufata icyemezo cyo kubaho no kubaho neza.
Si ukubivuga gusa, ni no gukomeza kubikomeraho.

Nimuzishyire rero no mu buzima bwanyu bwa buri munsi,
kandi zifashe n’abagifite intege nke gutera indi intambwe.
Iyi miryango yanyu yavutse mu bihe bigoye kandi
byihutirwaga (urgence). Ubu tugeze mu bihe byo kubaka
iterambere rirambye, no gushimangira agaciro kacu.

Abashinze umuryango Ibuka mwese mwibumbiyemo, bagize
uruhare, rukomeye mu guharanira imibereho y’abarokotse,
kwibuka no kongera gusana umuryango nyarwanda.
Mukwiye rero gukomeza kuvoma kuri iyo sooko, kandi
namwe mukagira uruhare mu gukomeza izo nshingano.

● Mukomeze gufasha urubyiruko bagenzi banyu kumva neza
amateka yacu.

● Abanyarwanda bakunze kuvuga ngo “Hari ibitabonwa
n’amaso atararize!”. Hari byinshi mubona n’ibyo mutabona,
bigamije gusenya ibyagezweho no guharanira ko twasubira
inyuma.

Amaso yanyu rero akwiriye kubibona vuba, kumenya guhitamo
no guhangana nabyo!

Mujya mwumva kandi bavuga ngo “Umwambi ushuka
umuheto kandi bitari bujyane”.
Ntimuzatatire igihango!

Banyamuryango, Bana Bacu,
N’ubwo mwabashije kwirenga, ariko ntawe uyobewe ko ibikomere
bidashira burundu.

Byasaga n’aho kubasaba kubaho ari ishyano, nyuma y’ibyo
mwaciyemo.

Nyamara nk’uko Nyakubahwa Perezida w’igihugu ahora abibutsa
“Ni uko ari mwe mwari mufite icyo mutanga”. Kandi
mwarabishoboye koko!

Uyu munsi abanyamuryango ba AERG na GAERG barimo
abikorera, abakozi mu nzego zitandukanye z’igihugu, abarezi,
n’ababyeyi. Hari ibisubizo mutanga dukwiye gukomeza gufatanya,
nk’ umusanzu wo kubaka u Rwanda twifuza.

Mwatangiye kandi gufatanya n’inzego zitandukanye mu guteza
imbere no kwita ku buzima bwo mu mutwe.
Tuzakomeza gushakisha umuti w’ihungabana kugira ngo
tunarinde na generations zizadukurikira.

Rubyiruko, Bana bacu!
U Rwanda, igihugu cyacu twongeye kubona, no kubanamo
nk’Abanyarwanda, ni ishema ryacu.

Mukomere k’Ubumwe bwacu, nibwo shingiro ryo kubaho,
tukubaka u Rwanda, abato bavukiramo, bakuriramo, kandi
bibonamo.

Nsoje mbifuriza kugira Isabukuru nziza.
Tubahaye umugisha wa kibyeyi
Murakoze!

Uyu muhango wayobowe na Minisitiri w’Ubutegetsi bw’Igihugu, Gatabazi Jean Marie Vianney. Ingabire kandi yarahiriye inshingano nshya kuri uyu wa 5 Ugushyingo, hamwe n’abandi bayobozi babiri bashya imbere ya Perezida Kagame mu muhango waberere mu Nteko Ishinga Amategeko.

Nyirarukundo Ignatienne yakuwe muri Minaloc nyuma y’imyaka ibiri yari amaze mu nshingano ze yimurirwa mu biro bya Minisitiri w’Intebe aho yagizwe Umujyanama Mukuru ushinzwe gahunda z’imibereho myiza y’abaturage.

We na Ingabire yasimbuye bashimiye Perezida Kagame wabagiriye icyizere bagahabwa inshingano nshya.

Ingabire yavuze ko ari amahirwe kuba hari byinshi igihugu kimaze kugeraho, akaba ari umusingi mwiza agiye kubakiraho umusanzu we mu kuzamura imibereho y’abaturage.

Ingabire yari asanzwe ari Umunyamabanga Uhoraho muri Minisiteri y’Uburinganire n’Iterambere ry’Umuryango, umwanya yagiyeho mu Ukwakira 2019 avuye ku mwanya nk’uwo muri Minisiteri y’Ubutegetsi bw’Igihugu. Mbere y’aho, Ingabire yakoze muri Minaloc ari Umuyobozi Mukuru ushinzwe Ubugenzuzi.

Minisitiri Gatabazi yavuze ko inshingano bahawe zikomeye kuko zikora mu mibereho y’abaturage.

Ati “Dushimiye Nyakubahwa Perezida wa Repubulika uba watugiriye icyizere. Ni icyizere cyakugaruye mu muryango wahozemo; inshingano mwahawe zirakomeye kuko ni izo gutuma umunyarwada amera neza, akagira ubuzima bwiza.”

Umunyamabanga Uhoraho muri MINALOC, Dusengiyumva Samuel, Ingabire Assoumpta, Minisitiri w’Ubutegetsi bw’Igihugu, Gatabazi Jean Marie Vianney na Nyirarukundo Ignatienne wagizwe Umujyanama Mukuru ushinzwe gahunda z’imibereho y’abaturage mu Biro bya Minisitiri w’Intebe

Abayobozi batandukanye bakurikiranye umuhango w’ihererekanyabubasha hagati ya Nyirarukundo Ignatienne na Ingabire Assoumpta

Abayobozi bombi bashyira umukono ku nyandiko z’ihererekanyabubasha

Ingabire na Nyirarukundo mu ihererekanyabubasha

Muri iyi raporo Equity Bank yaje ku mwanya wa 39 ku rwego rw’Isi mu bijyanye n’inyungu yinjiza ku mutungo wayo, ku mwanya wa 71 mu bijyanye n’inyungu ku mari shingiro ndetse no ku mwanya wa 149 ku bijyanye n’uko abakiliya bayiyumvamo mu zigera ku 1000 ku isi.

Byagaragajwe nyuma y’isesengura ryakorewe amabanki mu nzego zigera munani zirimo iterambere ryazo, inyungu zinjiza, imikorere myiza, amafaranga afatika zifite, uko abakiliya baziyumvamo n’ibindi.

Muri rusange Equity yaje ku mwanya wa 22 muri Afurika n’uwa 761 ku rwego rw’Isi hashingiwe ku mari shingiro yayo (Tier 1 capital) ingana na miliyoni 1096 z’amadolari

Uko kuba intangarugero kwa Equity Bank, kuje nyuma y’icyorezo cya Covid-19 cyahungabanyije ubukungu mu ngeri zose. Iyi banki yakoze ishoramari rigamije kurinda sosiyete n’abafatanyabikirwa bayo.

Muri ibi bihe by’icyorezo cya Covid-19 Equity Bank yakomeje guharanira ishoramari rigira inyungu kuri sosiyete.

Ku bufatanye n’urwego rushinzwe kurwanya Covid-19 muri Kenya, Equity yatanze ibikoresho bifasha abakora mu buvuzi kwikingira mu turere tugera kuri 56 no mu bitaro byo ku rwego rw’igihugu.

Hari kandi gutanga radiyo zikoresha imirasire y’izuba yatanze ku banyeshuri mu rwego rwo kubafasha gukomeza gukurikirana amasomo ubwo amashuri yafungwaga.

Equity Bank yahizemo kuvugurura inguzanyo zigera kuri miliyari 1,2 z’amashilingi no kwigiza inyuma ubwishyu bw’inguzanyo zingana na 31% n’inyungu mu gihe cy’imyaka itatu mu rwego rwo korohereza ubucuruzi.

Umuyobozi Mukuru wa Equity Group, James Mwangi, yavuze ko gushyirwa kuri uru rutonde bishimangira imbaraga zikomeje gukoreshwa mu guhangana no kuzahura ubukungu bwazahajwe n’icyorezo cya Covid-19.

Yagize ati “Gushyirwa muri uru rutonde, bishimangira ugukomera mu buryo bw’imari n’ubunyamwuga bwa banki bigendanye n’ingamba zafashwe nk’igisubizo cyo guhangana na Covid-19. Twazamuye ishoramari ryacu hamagijwe kongera inyungu, korohereza abaturage mu nguzanyo z’igihe kirekire; twafashije abaturage n’abakiliya hagamijwe gukumira ingaruka z’icyorezo binyuze mu gukuraho amande ndetse no kuvugurura inguzanyo zabo kugira ngo zizabashe kwishyurwa.”

Kugeza ubu Equity Bank Group ikorera mu bihugu bitandatu bitandukanye, gusa yahuye n’ihungabana ry’ubukungu ryatewe n’icyorezo cya Covid-19.

Equity Bank kuri ubu ni banki ikomeye mu Karere kuko imaze kugira umutungo wa miliyari zisaga 1000 z’amashilingi zivuye kuri miliyari 746.6 yari ifite umwaka ushize.

Uretse ibi ariko mu Ukwakira 2021, Equity Bank yahawe igihembo cya banki ya mbere muri Afurika yorohereza ibigo bito n’ibiciriiritse “Africa’s Best Bank for SMEs 2021 gitangwa n’ikigo cya Euromony kizobereye mu bikorwa byo guhemba banki zitwaye neza muri serivisi zinyuranye ziha abazigana.

Iyi banki ikomoka muri muri Kenya, ifite amashami mu bihugu bitandatu birimo u Rwanda, Uganda, Tanzania, Repubulika Iharanira Demokarasi ya Congo, Sudani y’Epfo na Kenya, ndetse ikagira n’ibiro biyihagarariye muri Ethiopie. Iyi banki kandi yanditse ku masoko y’imari n’imigabane mu Rwanda, Kenya na Uganda.

Equity bank ni ishami rigize Equity Group Holdings Plc, ikigo gifite ishoramari mu bindi bikorwa birimo ubwishingizi, itumanaho, ikoranabuhanga mu bikorwa by’imari n’ibindi bitandukanye.

Iyi banki nini mu Karere ka Afurika y’Iburasirazuba, ifite umutungo ungana na miliyari 11,2$, amashami 337 ndetse n’abakiliya barenga miliyoni 15.

Equity Bank ni banki ya 22 ikomeye muri Afurika

Amahugurwa ku ihohoterwa rishingiye ku gitsina ngo ni ngombwa kugira ngo abatanga serivisi zo gufasha abahohotewe basobanukirwe neza uko bakwitwara mu gihe bagiye gufasha uwahohotewe

Aba bagore n’abagabo 170 bitabiriye amahugurwa bavuga ko mu kazi kabo ka buri munsi bakunda guhura n’imbogamizi zirimo kuba ababagana bakunda kubageraho batinze kuko amasaha 72 yagenwe aba yarenze, ku buryo usanga ibimenyetso bimwe na bimwe byamaze kwangirika, ndetse na bumwe mu bufasha burimo kuba barinda umwana w’umukobwa kuba yasama inda zititeguwe butagishoboka.

Jeanne d’Arc Uwanyirigira ushinzwe guhuza ibikorwa byo muri Isange ku bitaro bya Muhima, avuga ko bahura n’imbogamizi zitandukanye, gusa ngo amahugurwa bahawe hari byinshi azabafasha gukemura.

Ati “Muri aya mahugurwa dukuyemo kunoza uburyo bwo kwakira uje atugana wahuye n’ikibazo cy’ihohoterwa, icyo twabasha kumufasha ndetse n’uburyo twagirana imikoranire myiza na bagenzi bacu, n’uburyo twakubahiriza umurongo ngenderwaho wo mu kazi, kugira ngo akazi kacu ka buri munsi dushinzwe karusheho kunoga”.

Dr. Adrien Mushinzimana, umuganga mu bitaro bya Nemba mu Karere ka Gakenke, avuga ko hari byinshi bungutse kuko batangira amahugurwa hari ubumenyi bwinshi batari bafite ku ihohoterwa rishingiye ku gitsina ndetse n’ihohoterwa rikorerwa abana.

Ati “Mu bumenyi twagiye duhabwa, twasobanuriwe neza icyo ihohoterwa rishingiye ku gitsina ari cyo, dusobanurirwa bimwe mu biritera, birumvikana kugira ngo ubashe guhangana n’ikibazo ubasha kureba umuzi wacyo, ikigitera, na byo twarabisobanuriwe, tubwirwa ko ihohoterwa rishingiye ku gitsina rikorerwa cyane abagore ndetse n’abana, banatubwira ko abarikora cyane bari hagati y’imyaka 18 na 24, banatubwira n’impamvu zibitera”.

Ikindi bahuguwemo ni uburyo bagomba kujya bakira umurwayi kuva ageze mu bitaro, kumusuzuma, kumuvura, kumuha imiti, ndetse no kuzamukurikirana nyuma yo kumusezerera.

Umunyamabanga Mukuru wa RIB, Colonel Jeannot Ruhunga, avuga ko nubwo buri wese mu bahuguwe aba afite inshingano ze, ariko kubahuriza hamwe bagakorera hamwe amahugurwa bigira akamaro kanini cyane mu mikoranire.

Ati “Iyo bose bumva neza ingaruka z’iki cyaha cy’ihohoterwa rishingiye ku gitsina, bituma buri muntu yuzuza inshingano ze, bazuzuza buzuzanya. Niba Leta yarafashe ingamba yo kugira ngo iki cyaha gihurirweho n’inzego zose kireba, ntabwo ari uko buri byaha byose bifite Isange one Stop center, ni ukubera ubukana bw’ingaruka uwakorewe iki cyaha agira, guhuriza hamwe izo nzego rero, ni na ngombwa ko bagira ayo mahugurwa bakumva kimwe ingaruka uwahohotewe aba yagize kugira ngo barusheho kumuha serivisi aba akeneye”.

Umunyamabanga uhoraho w’agateganyo muri Minisiteri y’Uburinganire n’Iterambere ry’Umuryango, Mireille Batamuriza, avuga ko icyaha cy’ihohoterwa cyakorerwa uwo ari we wese yaba umuhungu cyangwa umukobwa.

Ati “Umuntu uwo ari we wese yahohoterwa, umwana w’umuhungu n’umwana w’umukobwa, ni byiza kubigarukaho muri aya mahugurwa bose bakumva ko yaba umugabo, yaba umugore, yaba umwana w’umukobwa, yaba umuhungu, bose bakwiye ubutabera bungana kuko n’amategeko ntabwo arobanura, avuga ko icyaha cyakorewe umuntu, gikorerwa umugore, umugabo, umwana w’umuhungu n’umukobwa”.

RIB ivuga ko izakomeza gukoresha amahugurwa nk’aya kugira ngo abakora muri serivisi za Isange One Stop Center barusheho kunoza inshingano zabo kandi babikorera hamwe”.

Yabitangaje ku wa Gatanu tariki 05 Ugushyingo 2021 mu muhango w’ihererekanyabubasha wabereye kuri MINALOC hagati ya Ignatienne Nyirarukundo wari umunyamabanga wa Leta ushinzwe imibereho myiza y’abaturage na Assumpta Ingabire wamusimbuye kuri uwo mwanya.

Mu ijambo riha ikaze Ingabire, Minisitiri Gatabazi yashimiye Umukuru w’igihugu wabagiriye icyizere, akagarura Assumpta Ingabire mu muryango yahozemo kuko n’ubundi yigeze gukora muri iyi minisiteri, anamubwira ko inshingano yahawe zikomeye kuko ari izo gutuma umunyarwanda arushaho kumera neza, akagira ubuzima bwiza.

Assumpta Ingabire

Assumpta Ingabire warahiriye kuba umunyamabaga wa Leta ushinzwe imibereho myiza y’abaturage muri MINALOC ku wa Gatanu tariki 05 Ugushyingo 2021, yashimiye Perezida wa Repubulika ku cyizere yamugiriye akamuha inshingano nshya, avuga ko ari amahirwe kuba hari byinshi igihugu kimaze kugeraho kuko ari umusingi mwiza agiye kubakiraho umusanzu we mu kuzamura imibereho y’abaturage.

Ignatienne Nyirarukundo wasimbuwe ku mwanya w’umunyamabanga wa Leta ushinzwe imibereho myiza y’abaturage muri MINALOC yagizwe Umujyanama Mukuru ushinzwe gahunda z’imibereho myiza y’abaturage mu biro bya Minisitiri w’Intebe, mu gihe Assumpta Ingabire wamusimbuye kuri uyu mwanya yari asanzwe ari Umunyamabanga uhoraho muri Minisiteri y’Uburinganire n’iterambere ry’Umuryango (MIGEPROF).

Ni mu muhango wabereye muri Kaminuza y’u Rwanda ishami rya Huye kuri uyu wa Gatanu ku itariki ya 5 Ugushyingo 2021.

Abazihawe baturuka mu mashami atandatu ya Kaminuza y’u Rwanda, aho 133 muri bo bahawe impamyabumenyi y’icyiciro cya Kabiri cya Kaminuza, mu gihe abandi 200 harimo abahawe impamyabumenyi y’icyiciro cya Gatatu cya Kaminuza (Masters), impamyabushobozi y’ikirenga (Phd) impamyabumenyi ya A1 n’impamyabushobozi ku bize porogaramu zitandukanye.

Abanyeshuri 117 mu bahawe impamyabumenyi ni abarangije muri Koleji y’Ubugeni n’Ubumenyi Rusange (CASS), 83 bakaba abo muri Koleji y’Ubucuruzi n’Ubukungu (CBE) naho 70 bakaba ari abarangije muri Koleji y’Ubumenyi n’Ikoranabuhanga (CST).

Abandi bagera kuri 33 barangije mu Ishami ry’Ubuzima n’Ubuvuzi bw’Amatungo riri i Busogo (CAVEM), 19 barangije muri Koleji y’Uburezi (CE) mu gihe abandi 11 barangije muri Koleji y’Ubuvuzi (CMHS).

Musengimana Alphonsine urangije icyiciro cya Masters mu bijyanye n’imiyoborere y’inzego z’ibanze yavuze ko ubumenyi yungutse agiye kubukoresha mu gukomeza kubaka igihugu cyane cyane mu kuzamura imibereho myiza y’abaturage.
Ati “Ubumenyi nungukiye hano nzabukoresha mu gukorera Abanyarwanda mbaha serivisi nziza kandi mparanira kuzamura imibereho myiza yabo.”

Karinganire Célestin warangije icyiciro cya Gatatu cya Kaminuza (Masters) mu miyoborere yavuze ko agiye kurushaho kunoza akazi akora mu Karere ka Bugesera.

Ati “Ubumenyi nungutse bugiye kumfasha kunoza ibyo nakoraga kuko n’ubundi ibyo twize bijyanye n’ibyo twakoraga, urumva ko ubumenyi nungutse ari njyewe ku giti cyanjye bumfitiye akamaro ndetse n’akarere kamfashije kugira ngo niyungure ubumenyi nako bigafitiye akamaro.”

Umuyobozi Mukuru wa Kaminuza y’u Rwanda, Prof Lyambabaje Alexandre, yabasabye gukoresha ubumenyi bahawe mu guteza imbere igihugu no kuzamura imibereho myiza y’abaturage.

Ati “Buri gihe iyo habaye umuhango nk’uyu wo gutanga impamyabumenyi ni igihe cyo kongera kwibaza uruhare bagiye kugira mu guhindura imibereho y’igihugu n’abaturage bigomwe byinshi kugira ngo bagere aho bageze.”

Yabibukije ko u Rwanda rufite icyerekezo cy’uko ubukungu bwarwo bugomba gushingira ku bumenyi n’ikoranabuhanga, bityo umusanzu wabo ukenewe.

Ati “Ubu rero iyo tubonye abantu barenga 300 bafite ubwo bumenyi n’ubushobozi, aba ari umunsi w’ibyishimo, twizera y’uko tuzakomeza gukorana, tukabashyigikira na bo bagashyiraho umwete kugira ngo bagire uruhare rugaragara mu iterambere ry’igihugu cyacu.”

Minisitiri w’Uburezi, Dr Uwamariya Valentine, yabasabye kuvumbura ibitekerezo bishya no gukomeza gushyira imbaraga mu bisanzweho bafasha kaminuza y’u Rwanda kugera ku ishusho yayo ku rwego rw’igihugu, mu karere no ku rwego mpuzamahanga.

Ati “Muri uru rugendo rwerekeza ku mpinduka z’igihe kirambye, turahamagarira umuryango mugari wa kaminuza wose kugumana natwe no gukomeza kugaragara mu buryo bugamije kuvumbura ibitekerezo bishya, gukomeza gushyira imbaraga mu bisanzweho, bizafasha kaminuza kugera ku ntego yayo, ku rwego rw’igihugu, mu karere no ku rwego mpuzamahanga.”

Dr Uwamariya yavuze kandi ko Guverinoma y’u Rwanda izakomeza guha ubushobozi Kaminuza y’u Rwanda mu buryo bwose bukenewe kugira ngo igere ku ntego zayo.

Aba banyeshuri 333 bahawe impamyabumenyi bahise biyongera ku bandi 8.908 bazihawe muri Kanama 2021, bari barimo batanu bahawe impamyabumenyi za ‘PhD,’ 385 bahabwa iza ‘Masters’, mu gihe 7.796 bahawe ‘Bachelor.’

Aba banyeshuri 333 bahawe impamyabumenyi bahise biyongera ku bandi 8.908 bazihawe muri Kanama 2021

Abanyeshuri ba UR bari baracikanwe ni bo bahawe impamyabumenyi zabo

Abazihawe baturuka mu mashami atandatu yose ya Kaminuza y’u Rwanda

Barangije mu mashami atandukanye n’ibyiciro bitandukanye

Bibukijwe ko u Rwanda rufite icyerekezo cy’uko ubukungu bwarwo bugomba gushingira ku bumenyi n’ikoranabuhanga, bityo umusanzu wabo ukenewe

Guteza imbere igihugu no kuzamura imibereho myiza y’abaturage ni byo bashyize imbere

Kaminuza y’u Rwanda yatanze impamyabumenyi ku banyeshuri 333 bacikanwe ubwo yazitangaga muri Kanama 2021

Ni mu muhango wabereye muri Kaminuza y’u Rwanda ishami rya Huye kuri uyu wa Gatanu ku itariki ya 5 Ugushyingo 2021

Umuyobozi Mukuru wa Kaminuza y’u Rwanda, Prof Lyambabaje Alexandre, yabasabye gukoresha ubumenyi bahawe mu guteza imbere igihugu no kuzamura imibereho myiza y’abaturage

Wari umunsi w’ibyishimo muri Kaminuza y’u Rwanda ishami rya Huye

Abahawe impamyabumenyi bashimiye Kaminuza y’u Rwanda ku bumenyi yabahaye

Bavuze ko agaciro Kaminuza y’u Rwanda yabahaye bagiye kukabyaza umusaruro bakora ibikorwa byiza byubaka igihugu kandi nabo bibateza imbere

Wari umunsi w’ibyishimo kubera intambwe ijya mbere bateye

[email protected]

Mvura Nkuvure, ni uburyo bukoreshwa n’umuryango Prison Fellowship, ukora ibikorwa by’isanamitima mu Banyarwanda, bumaze gufasha imiryango isaga 3000 kwiyunga.

Kuri uyu wa Kane tariki ya 4 Ugushyingo 2021, abaturage bo mu Karere ka Bugesera, mu Murenge wa Mareba, Akagari ka Gakomeye basoje gahunda y’amahugurwa bahawe n’uyu muryango mu byumweru 15 bishize, agamije kubafasha kunga ubumwe no komora ibikomere by’umutima.

Abahugurwa n’uyu muryango ni abarokotse Jenoside yakorewe Abatutsi ndetse n’abayigizemo uruhare.

Binyuze muri gahunda ya Mvura Nkuvure, ababana mu rwikekwe rurashira kuko intego yayo ari ukunga abanyarwanda, gukuraho urwikekwe no kwishishanya bagaharanira gufashanya mu rugamba rw’iterambere nk’uko Niyibizi Agnes abigarukaho.

Niyibizi w’imyaka 65 yasobanuye urugendo rwamugejeje ku kwiyunga n’uwamwiciye basaza be, yagaragaje ko byari byaranamuciye mu rusengero kugira ngo batazahura ariko Mvura Nkuvure yakemuye ibyo byose.

Ati “Nahoranaga ubwoba kuko sinifuzaga no kurebana na we mu maso. Ntangiye guhabwa ubujyanama muri Mvura Nkuvure, nagiye mbona ko nari mfite ibibazo bikomeye.”

“Ubu nsigaye mufata nk’umuvandimwe kuko ndamureba nkamubonamo umuryango wanjye nabuze. Ndashima cyane iyi gahunda ariko nzi ko hari n’abandi babayeho nk’uko nari meze bityo nifuza ko ibikorwa by’isanamitima byakomeza kubaho bikagera kuri bose.”

Umwe mu bagize uruhare muri Jenoside yakorewe Abatutsi, nyuma yo gufungurwa na we avuga ko yahoranaga ubwoba, akibaza uko azabana n’abasigaye mu muryango yahemukiye ariko kugeza ubu bamaze kwiyunga ndetse babanye neza.

Umuyobozi Wungirije wa Prison Fellowship Rwanda, Ntwali Jean Paul, yavuze ko kugeza ubu ibikorwa by’isanamitima bigenda bitanga umusaruro wo kongera guhuza Abanyarwanda ndetse no gusenyera umugozi umwe mu guharanira iterambere.

Ati “Ni uburyo bufasha abantu gukira ibikomere byo mu mutwe, bigafasha abantu mu mibanire, gufatanya mu bikorwa by’iterambere no kubaka icyizere cyabo. Gahunda zacu zafashije mu gutanga amakuru atari yaratanzwe ndetse tubasha guhuza abakoze ibyaha ndetse n’ababikorewe kugira ngo basabane imbabazi.”

Mu Karere ka Bugesera habarurwa amatsinda 32 yahuguwe na Prison Fellowship Rwanda muri gahunda ya Mvura Nkuvure, biteganyijwe ko buri tsinda rigiye guhabwa miliyoni 10 Frw agamije gushorwa mu mishanga inyuranye y’iterambere.

Abaturage bo mu Karere ka Bugesera bagaragaje ko gahunda ya Mvura Nkuvure yabomoye ibikomere

Ubuyobozi bwa Prison Fellowship Rwanda bugaragaza ko gahunda ya Mvura Nkuvure itanga umusaruro

Nyuma y’igihe cy’ibyumweru 15 bigishwa, abaturage bo mu murenge wa Mareba bavuga ko basigaye bahuje urugwiro

Ibi yabivuze kuri uyu wa 5 Ugushyingo 2021, ubwo Ikigo cy’Imisoro n’Amahoro (RRA) cyashimiraga abasora bo mu Ntara y’Iburengerazuba bitwaye neza kurusha abandi mu 2020.

Guverineri Habitegeko yavuze ko gutanga umusoro neza ari uguharanira kwigira kw’igihugu, kuko ibikorwa byose igihugu gikora, birimo kubaka ibikorwaremezo no kurinda umutekano w’igihugu byose byishyurwa n’amafaranga ava mu misoro.

Intara y’Iburengerazuba ifite uturere twinshi dukora ku Kiyaga cya Kivu ahakunze kwambukirizwa ibicuruzwa bya magendu biva muri Repubulika Iharanira Demokarasi ya Congo.

Guverineri Habitegeko yavuze ko Leta itazihanganira abambutsa magendu, kuko baba basubiza inyuma ubukungu bw’igihugu.

Yagize ati “Umuntu uzana ibicuruzwa abicishije mu nzira za magendu icya mbere yica ubucuruzi kuko iyo ucuruzanya n’uwasoze wowe utasoze urumva uko ibiciro biba bimeze, icya kabiri ariko ni n’abantu bameze nk’abatema ishami ry’igiti bicayeho, kuko umuntu uvuga ngo reka imisoro ayikubire mu mufuka we, uwamubwira ngo yizanire polisi ige imurinda, yishyirireho abasirikare barinda inkiko ze, yishyirireho amashuri y’abana be, yishyirireho ivuriro ahembe abaganga, yishyirireho ibintu byose Leta idukorera ngira ngo ntiyabishobora”.

Komiseri Mukuru Wungirije muri RRA, Kaliningondo Jean Louis yavuze ko mu mwaka ushize w’imisoro Intara y’Iburengerazuba yitwaye neza yinjiza imisoro ku kigero cya 110% ugereranyije n’intego yari yahawe.

Kaliningondo yavuze ko umuntu usora neza aba agaragaza urukundo akunda igihugu, bityo ko RRA izakomeza gutanga ubufasha bwose bushoboka.

Ikigo cy’Imisoro n’Amahoro cyavuze ko cyashyizeho uburyo butandukanye bwo guhangana na magendu kuko imunga ubukundu bw’igihugu.

Yagize ati “Muri RRA dusanzwe dufite ishami rishinzwe gukurikirana ibintu bijyanye na magendu, dufatanyije n’inzego z’umutekano, Polisi y’ u Rwanda ndetse n’igisirikare, dufite n’abasora ubwabo baduha amakuru n’abaturage basanzwe baduha amakuru. Nk’uko mubizi magendu ni nka ruswa byombi bimunga ubukungu bw’igihugu”.

RRA ivuga ko mu Kivu yashyizemo ubwato bushinzwe gucunga no gufata abinjiza ibicuruzwa batabisoreye ndetse ngo mu kirere cyaho banashyizemo drones zigenzura ko nta winjiza ibicuruzwa bitasoze.

Mu babaye indashyikirwa mu gutanga umusoro harimo umukiriya watse fagiture za EBM

Ikigo cy’Imisoro n’Amahoro ku nshuro ya mbere cyahembye umukiliya warushije abandi kwaka fagitire ya EBM mu Ntara y’Iburengerazuba.

Nzabandora Pierre, enjenyeri wo mu Murenge wa Gihundwe, ni we watse fagitire za EBM cyane. Uyu mukiliya avuga ko ikintu cyose aguze yakaga fagitire kuko aba ashaka kumenya ko 18% y’amafaranga yishyuye icyo kintu yinjiye mu isanduku ya Leta.

Nzabandora icyatumye bimenyekana ko iyo aguze ikintu yaka fagitire ya EBM ni uko iyo bagiye kumuha fagitire asaba ko bashyiraho nimero ye ya telefone.

Sosiyete Sofathebe Ltd, niyo yahize ibindi bigo by’ubucuruzi gutanga fagitire nyinshi za EBM.

Ntawangwanabose Théogène, uhagarariye iyi sosiyete icuruza ibinyobwa bya Bralirwa yavuze ko yabwiye abakozi be bose ko igihe cyose bakiriye umukiliya bagomba kumuha fagitire ya EBM, umukiliya yaba atayikeneye igasigara aho ariko yasohotse muri mashini.

Ntawangwanabose avuga ko bumwe mu buryo bukoreshwa n’abacuruzi iyo badashaka gutanga fagitire za EBM ari uguhanika ibiciro ku mukiriya ushaka bene iyi fagire.

Ati “Ushobora kugura ikintu cya 5000 Frw wakwaka fagitire, bakakubwira ngo ubwo watse fagitire urongeraho 1000 Frw cyangwa 2000 Frw. Ibyo bigaragara ko ari uburyo bwo kwiba, ntabwo bikwiriye. Njyewe muri sosiyete yanjye nzi neza ko iyo waranguye ibintu ugomba no kugaragaza aho babinyujije ubicuruza”.

Sosiyete Wood Services yahize izindi mu kwishyura neza umusoro mu Karere ka Karongi

Kivu Arabica Coffee Company Ltd yahawe igihembo cy’usora wahize abandi mu Karere ka Rusizi

Nzabandora Pierre, umuguzi w’indashyikirwa mu kwaka fagitire ya EBM

Koperative Kopakama yabaye umusoreshwa wahize abandi mu Karere ka Rutsiro mu mwaka wa 2020

Ngororero Mining Company Ltd yaje ku isonga mu gutanga imisoro mu Karere ka Ngororero

Nyungwe Top View Hill Hotel yegukanye igihembo cy’usora witwaye neza mu Karere ka Nyamasheke

SEA DREAMS, yitwaye neza mu Karere ka Rubavu

SOFATHEBE LTD yaranzwe no gukoresha neza EBM itanga fagitire ku bakiliya bose

Abitabiriye umuhango wo guhemba abasora bitwaye neza mu Ntara y’Iburengerazuba basabwe kudatema ishami bicariye

RRA yashimiye abasora bitwaye neza mu Ntara y’Iburengerazuba

Umuyobozi uhagarariye Abikorera mu Ntara y’Iburasirazuba, Hitayezu yavuze ko Covid-19 yagize ingaruka ku bacuruzi asaba ko abo ibikorwa byabo bimaze igihe bidakora ko basonerwa umusoro

Guverineri w’Intara y’Iburengerazuba, Habitegeko François, asanga kunyereza imisoro ari nko gutema ishami wicayeho

Ishuri Rwanda Coding Academy, riherereye mu Karere ka Nyabihu, rifite umwihariko mu kwigisha abana b’abanyeshuri, ibijyanye no gukora porogaramu za mudasobwa (softwares).

Mudasobwa 30 hamwe n’ibikoresho bigendana na zo ni byo byashyikirijwe ishuri Rwanda Coding Academy

Iryo shuri ryahawe ibyo bikoresho by’ikoranabuhanga muri gahunda y’ubufatanye bwatangijwe ku wa Gatanu tariki 5 Ugushyingo 2021, hagati y’uruganda Samsung rwo mu gihugu cy’u Buyapani na Guverinoma y’u Rwanda, binyuze muri Minisiteri y’Ikoranabuhanga na Minisiteri y’Uburezi.

Umuyobozi ushinzwe ibikorwa by’ubucuruzi no guhanga udushya mu kigo Samsung, ku rwego rwa Afurika y’Iburasirazuba, yagize ati: “Twishimiye ubufatanye bwatangiye hagati ya Samsung n’Ishuri Rwanda Coding Academy, kuko buri ku rwego rufasha abanyeshuri, binyuze muri uyu mushinga wo guteza imbere ikoranabuhanga rishingiye ku guhanga udushya. Iyi ni intangiriro, dutezeho gufasha aba bana kurushaho kuba abanyamwuga mu by’ikoranabuhanga, bashishikajwe no guhanga udushya”.

Yongera ati: “Ni ibikoresho bigizwe n’icyumba cy’ikoranabuhanga kirimo mudasobwa 30 zo ku rwego ruhanitse n’ibindi bikoresho by’ikoranabuhanga bijyana na zo, abana b’abanyeshuri bazajya bigiraho, bikaba binakoranywe ikoranabuhanga rya interineti; twitezeho korohereza abana kuzamura ireme ry’imyigire n’ubumenyi bushingiye ku guhanga udushya, muri za porogaramu nshya, yaba izo batangiye n’izo bagikoraho ubushakashatsi”.

Abanyeshuri biga muri iri shuri, barimo uwitwa Ishimwe Gervais, wishimiye ibikoresho by’ikoranabuhanga bungutse, akaba abyitezeho kumufasha mu myigire ye.

Abana biga muri iri shuri bavuga ko mudasobwa bashyikirijwe zizabunganira mu masomo ajyanye no guhanga porogaramu

Yagize ati: “Twakoreshaga imashini zisanzwe za laptop, ariko zifite ingufu nkeya, zimwe zigapfa buri kanya, izindi zikagenda gahoro kubera ibintu byinshi zabaga zidafitiye ubushobozi buhagije bwo kubika. Izi mudasobwa zindi z’inyongera, hamwe n’ibindi bikoresho by’ikoranabuhanga duhawe, bizatworohereza gukoresha igihe cyacu neza, tunoze imyigire yacu, bitume n’urwego rw’imishinga turi gukoraho ubushakashatsi kuri za porogaramu nshya rwiyongera ku kigero gishimishije”.

Kobusinge Sharon na we wiga mu mwaka wa wa gatandatu muri Rwanda Coding Academy, ahamya ko urwego we na bagenzi be b’abanyeshuri bariho rw’imyigire ibaganisha ku kuzarangiza amasomo bahanga udushya, ruzarushaho kwaguka, babikesha ibikoresho by’ikoranabuhanga bijyanye n’igihe, bibunganira mu myigire yabo; ku buryo badashidikanya ko bazabyubakiraho bakabasha gusohoza inzozi bafite zo kuzaba abavumbuzi b’udushya.

Dr Papias Niyigena, uyobora Ishuri Rwanda Coding Academy, ahamya ko iri shuri ryari rikeneye kubakirwa ubushobozi mu bikoresho nk’ibi, kugira ngo biryunganire kugera ikirenge mu byo ibindi bigo mpuzamahanga byabashije kugeraho, bibikesha gukoresha ikoranabuhanga.

Abiga muri iri shuri bavuga ko ibikoresho bahawe bazabyubakiraho bakabasha guhanga udushya

Yagize ati: “Turi mu isi y’iterambere, ryibanda ku kureba ibisubizo by’ahazaza, atari ukwibanda gusa ku hahise cyangwa ibiriho ubungubu gusa. Natanga nk’ingero z’imishinga imwe n’imwe ikomeye aba bana batangiye gukoraho ubushakashatsi ndetse no gukorera igerageza. Harimo nk’irebana n’ikoranabuhanga rikoreshwa mu mitangire y’akazi ku barimu, kubashyira mu myanya n’ibindi birebana n’imicungire yabo”.

“Hari n’undi mushinga aba bana b’abanyeshuri bari gukoraho, w’igare rigenewe abafite ubumuga, rikozwe mu buryo bw’ikoranabuhanga rituma nyirayo aritegeka kumujyana mu cyerekezo runaka yifuza kujyamo, haba imbere, inyuma cyangwa ku ruhande, bitamusabye kurikoraho cyangwa kurisunika nk’uko bisanzwe bigenda ku yandi magare asanzwe bakoresha.

Ati: “Niba aba banyeshuri bageze ku rwego nk’uru rwo kuba bavumbura imishinga isubiza ibibazo runaka; bakeneye n’ibikoresho by’ikoranabuhanga bigezweho bakwifashisha mu kuyinonosora, cyangwa no kuvumbura n’indi mishinga, iri ku rwego ruri hejuru y’urwo bariho ubu; kugira ngo binadufashe muri ya ntego yo guhanga udushya twinshi, dushingiye kuri porogaramu bakora”.

Umuyobozi mukuru w’Ikigo gishinzwe amasomo y’Ubumenyingiro, Rwanda TVET Board, Paul Umukunzi, ashimangira ko mu byo aba bana b’abanyeshuri bazungukira muri ubu bufatanye hagati ya Samsung na Guverinoma y’u Rwanda, harimo no guhanahana amakuru mashya yerekeye ikoranabuhanga ku ruhando mpuzamahanga mu buryo bwimbitse, ku buryo abazajya barangiza amasomo, bazajya baba bafite ubushobozi buhagije, bwo kwitwara neza mu byo isoko ry’umurimo rikeneye, haba mu Rwanda no hanze yarwo.

Umuyobozi mukuru w’Ikigo gishinzwe amasomo y’Ubumenyingiro, Rwanda TVET Board, Paul Umukunzi, ashimangira ko hari byinshi aba banyeshuri bazungukira muri ubu bufatanye

Yagize ati: “Kuba aba banyeshuri bahawe bino bikoresho, biri ku rwego rw’ikoranabuhanga ryo hejuru(High tech), ni intambwe nziza bateye, izabarinda kirogoya mu myigire n’ubushakashatsi bakora. Mu mikoranire izakomeza kubaho hagati ya Samsung na Leta ibinyujije muri Rwanda Coding Academy, ni ukurushaho kungurana ibitekerezo, duhanahana amakuru y’uko barushaho kubikoresha neza, bakabibyaza umusaruro uhagije, hagamijwe kuzamurira aba bana ubumenyi, kugeza no ku ruhando mpuzamahanga”.

Yongeyeho ko iyi gahunda ari ingenzi mu gushyigikira ingamba Leta yihaye, zo kurushaho guteza imbere uburezi mu cyerekezo 2024, cyitezweho kwimakaza ikoranabuhanga mu myigire n’imyigishirize y’amasomo y’ubumenyingiro, mu rwego rwo kongerera ireme ry’ubumenyi ku bayarangiza, bakajya ku isoko ry’umurimo biteguye kurigirira akamaro.

Kuri uyu wa Gatanu ikipe y’abagore ya KVC ndetse n’uruganda rwa Azam basinye amasezerano y’imikoranire azamara imyaka itatu, mu muhango wabereye kuri Stade Amahoro.

Ifoto y’urwibutso nyuma yo gusinyana amasezerano y’imyaka itatu

Aya masezerano Azam yasinyanye n’iyi kipe ya Kigali Volleyball Club y’abakobwa, azamara imyaka itatu aho AZAM izaha KVC Miliyoni 20 Frws muri iyi myaka, KVC nayo ikazajya yambara imyenda iriho Azam.

Umuyobozi wa KVC Ruterana Fernand Sauveur, yatangaje ko bishimiye kuba basinye aya masezerano y’imikoranire na KVC, aho bayafata nk’intangiriro mu gufungurira amarembo abandi baterankunga n’abafatanyabikorwa.

Yagize ati “Uyu munsi twasinye amasezerano y’ubufatanye, twakwita ko ari mu rwego rwo kumenyereza, kugira ngo nibigenda neza, ni imiryango ifungutse no ku bandi kandi turizera ko mu minsi iri imbere bizagenda neza”

Ndagano Faradjallah uhagarariye Azam mu Rwanda, na Ruterana Fernand Sauveur uyobora KVC

Ndagano Faradjallah uhagarariye Azam mu Rwanda, we yavuze ko gukorana n’ikipe y’abagore byari mu ntego zabo, ni nyuma y’uko basanzwe ari abafatanyabikorwa mu mikino itandukanye

“Biradushimishije kuba dusinyanye amasezerano n’ikipe ya Volleyball, twashakaga ahantu heza ariko uruhare rwacu ntirube mu bagabo gusa, tukaba dutangiranye na KVC y’abagore.”

“Ibyo twiteze ni uko babaho neza kandi bagatsinda, turifuza ko bazarenga indibi bakaba ikipe ikomeye ku rwego mpuzamahanga bakanazamura impano z’abana b’abakobwa.”

Usibye iyi kipe ya KVC y’abakobwa, mu minsi ishize ni bwo ikipe ya KVC y’abagabo yongeye kubyuka nyuma y’imyaka ine yari imaze yarasenyutse, ikaba nayo yitezweho kongera kugaruka mu makipe ahatanira ibikombe hano mu Rwanda.