Tag: featured

Kuri uyu wa Mbere tariki 01/01/2021, ikipe ya AS Kigali yakoreye imyitozo kuri Stade Amahoro, aho ikomeje kwitegura umukino uzayihuza na CS Sfaxien, aho umukino ubanza uzabera muri Tunisia tariki 14/02/2021.

Muri iyi myitozo, ikipe ya AS Kigali ikaba yasuwe n’Umunyamabanga uhoraho muri Minisiteri ya Siporo Shema Maboko Didier, ndetse n’abayobozi b’ikipe ya AS Kigali

Ikipe ya AS Kigali na CS Sfaxien bazakina umukino ubanza tariki 14/02 muri Tunisia, mu gihe umukino wo kwishyura uteganyijwe kuri Stade ya Kigali i Nyamirambo tariki 21/02, ikipe izasezerera indi ikazahita ibona itike yo mu matsinda ya CAF Confederation Cup.

Andi mafoto yaranze imyitozo ya AS Kigali

Insanganyamatsiko y’uyu mwaka mu kwizihiza intwari z’igihugu iragira iti “Ubutwari mu Banyarwanda, agaciro kacu.”

Abahanzi muri iki gitaramo bagaragaje impano zitandukanye barimo Itorero ry’Igihugu Urukerereza, Peace Jolis, Alyn Sano, King James na Army Jazz Band.

Urukerereza rwakinnye umukino ushima Intwari mu mbyino z’imuco mu ngeri zose guhera ku bami, Imanzi, Imena n’Ingenzi.

Bakurikiranye na Peace Jolis wasubiyemo indirimbo ze ndetse n’iyo yakoranye na DJ Miller witabye Imana yitwa “Belle” amwibuka.

Nyuma ye haje Alyn Sano waririmbye indirimbo yahimbiye uyu munsi w’Intwari yise “Ubutwari” ari kumwe n’itsinda rya Symphony band.

King James yaje gusubiramo indirimbo ze za kera ziganjemo iz’urukundo. Inyinshi yakoze mu gihe cyashize zifite injyana ituje n’izo aherutse gukora ubu.

Abaje gusoza igitaramo ni itsinda rya gisirikare Army Jazz Band mu myenda ya gisirikare, bavuga ubutwari bw’abasirikare, Fred Gisa Rwigema, Kayitare n’abandi baguye ku rugamba rwo kubohora igihugu.

Minisitiri w’urubyiruko n’umuco, Rosemary Mbabazi, kuri uyu munsi yashishikarije Abanyarwanda gukomeza kuzirikana no gusingiza Intwari z’u Rwanda, aho bari mu rugo, barushaho gutoza abato indangagaciro z’ubutwari

Amafoto: EAP

Imbwa zizerera zigateza umutekano muke zigiye kujya zifatwa izidafite ba nyirazo zikicwa

Ibyo bitangajwe mu gihe abatuye umujyi wa Muhanga bakomeje kugaragaza ko imbwa zigendagenda nijoro zibangamiye umutekano wabo kuko zibirukankana abandi zikabarya, ndetse zikica n’amatungo.

Mu ijoro ryo ku wa Gatandatu tariki 30 Mutarama 2021, imbwa y’umuturage yariye ihene ebyiri z’umuturanyi we zizisanze ku gasozi aho zari ziziritse mu kagari ka Kivumu mu murenge wa Shyogwe, biteza ubwumvikane buke hagati yabo.

Nyir’ihene avuga ko imbwa zamwangirije akaba akwiye kwishyurwa ihene ze, mu gihe ubuyobozi bw’umudugudu wa Kivumu byabereyemo buvuga ko nyir’imbwa na nyir’ihene bakwiye kumvikana kuko buri wese yakoze amakosa yo kurekura imbwa zikazerera, undi agakora ikosa ryo kuragira ku gasozi.

Iyi hene yariwe n’imbwa ariko ntiyahita ipfa gusa imeze nabi

Iyo ijoro riguye kandi mu mujyi wa Muhanga hagaragara imbwa zizerera zikirukankana abantu zishaka kubarya cyangwa zikarya amatungo y’abaturage, nyamara amabwiriza yo gutunga imbwa ateganya ko isohoka hanze iri kumwe na nyirayo gusa, kandi ishumitse ku buryo itakwirukankana umuntu.

Ibyo bivuze ko imbwa zose zizerera nta ba nyirazo zifite, bikaba biterwa n’uko abazoroye bazifata nabi bakazirekura ngo zijye guhiga, cyangwa ubwazo zikivana mu ngo kubera kubura ibyo kurya bihagije.

Umukozi w’akarere ka Muhanga ushinzwe ubworozi Kayiranga Kaliope, avuga ko ibarura riheruka ryagaragaje ko abatunze imbwa babarirwa muri 450 mu karere kose, mu gihe ikingira ry’umwaka ushize hakingiwe izisaga 300.

Kayiranga avuga ko umuti usanzwe wifashishwa mu kwica imbwa zizerera uri kuvanwa ku isoko ku buryo Akarere kamaze gutumiza uburyo bushya bw’imitego izifata zikiri nzima kugira ngo zisubizwe ba nyirazo cyangwa zicwe.

Agira ati, “Tugiye kujya mu Kigo cy’igihugu cyita ku buhinzi n’ubworozi (RAB), kuzana iyo mitego imbwa zizajya zijyamo zikagumamo noneho mu gitondo tukajya kuzireba, izifite ba nyirazo bakaza kuzifata, izitabafite nta kundi tukazica”.

Yongeraho ati “Ikindi burya imbwa zitwa ibihomora ziba zaraturutse mu ngo ahubwo ba nyirazo barananiwe kuzitaho ibyo bigatuma zizerera, zikabwagurira mu gasozi zigakura ntawe uzitaho ari yo mpamvu zirya abaturage n’amatungo”.

Imbwa zariye ihene ebyiri z’umuturage vuba aha

Ku kijyanye n’imbwa zirya amatungo y’abaturage, ibyo bigaragaza ko abazorora baba batazitayeho uko bikwiye, ariko ko n’aborozi bakwiye kumenya amatungo yabo ntibahure ku gasozi, naho abatunze imbwa bose bakaba bagiye kubarurwa kugira ngo bakangurirwe kuzitaho uko bikwiye.

Iyi miryango yavuze ko yatije ubutaka uru ruganda kugira ngo rubuhingeho icyayi mu gihe cy’imyaka 10, ariko rukazajya rubungukira. Uru ruganda ngo kugeza ubu rwanze kubasubiza ubutaka bwabo rutangira kubwiyitirira mu gihe bo bavuga ko nta bugure bwabayeho.

Aba baturage babwiye RBA ko bijya gutangira uwari Umuyobozi w’Umurenge wa Muhanda ari we waje ababwira ko bababoneye abantu bashobora guhinga icyayi ku butaka bwabo akabubasubiza nyuma y’imyaka itatu.

Ati “Umuyobozi w’Umurenge wa Muhanda, twagiye kubona tubona araje, aratubwira ati ubu butaka bwanyu tubaboneye abantu babasha kuhahinga icyayi, bakagisarura, imyaka itatu yarangira bakabaha imirima n’icyayi cyanyu, ubwo namwe mugatera imbere nk’abandi, turabaza tuti ko tutazi kugisarura tuzabaho dute, baratubwira bati mu gihe dutegereje ko iyo myaka itatu irangira turaba tubahaye udufaranga duke mube murya.”

Yakomeje ati “Baratubwiye bati ayo mafaranga kugira ngo tuyabahe birasaba ko buri wese azana aho tumusinyira ko ayahawe n’icyangombwa cyerekana ko afite umurima hariya, ibyangombwa twarabijyanye no ku ruganda, tugasinya bakaduha ayo mafaranga ibihumbi 100Frw […] nta muntu n’umwe wigeze avuga ati umurima wanjye ufite agaciro kangana gatya.”

Aba baturage bavuze ko kuva iki gihe uruganda ruvuga ko ubu butaka ari ubwarwo kandi mu by’ukuri nta masezerano y’ubugure yabayeho kuko bumvaga ari ukubutiza.

Mu byifuzo by’aba baturage harimo ko ibyo bumvikanye n’uruganda byakubahirizwa cyangwa se bagasubizwa ubutaka bwabo cyane ko n’amafaranga uru ruganda ngo rwabahaye bavuga ko ari intica ntikize.

Umuyobozi w’uruganda rw’icyayi rwa Rubaya, Mutabazi Jean yavuze ko ubu butaka ari ubw’uru ruganda kuko rwabuguze n’abo baturage kandi rubifitiye gihamya.

Ati “Ibimenyetso bwagiye bugurirwaho birahari, byaba bitangaje kuba nyuma y’imyaka irenga 10 ari bwo baje kubaza bavuga ko ubutaka baba barabwambuwe.”

Umujyanama wa komite Nyobozi y’Akarere ka Ngororero, Mutwarangabo Innocent, wanashyizwe mu majwi n’abaturage ko ari we wabatangiye ubutaka ubwo yari Umunyabanga Nshingwabikorwa w’Umurenge, yemeza ko iki kibazo akizi akanashimangira ko yagiriye aba baturage inama yo kutagurisha ubutaka bwabo.

“Njyewe narababwiye ngo, twebwe ntabwo dushaka ko mwagurisha nk’ubuyobozi, niba mushaka no kugurisha ariko, nibyo hari igihe abantu babitekereza. Mushobora kuhaha uruganda, rugatera icyayi rukahashora imbaraga mudafite, icyayi kikaba icyanyu aho kuba icy’uruganda, noneho muri ya myaka yo kubona umusaruro hakarebwa uburyo mwatekereza ko mwajya mufata igice cy’umusaruro ikindi kikishyurwa uruganda.”

“Igihe runaka amafaranga yose bashoyemo yamara kurangira umusaruro wose mukawegukana. Uwari ufite umurima wese agahabwa n’akazi ku buryo muri cya gihe umusaruro utari waboneka aba acungiye ku mafaranga ava ku mushahara.”

Umuyobozi w’Akarere ka Ngororero Ndayambaje Godefroid yavuze ko bitarenze ibyumweru bibiri iki kibazo kizaba cyamaze kubonerwa umuti, cyane ko bamaze gusaba uruganda kuba rwerekanye amasezerano y’ubugure mu gihe gito gishoboka.

Ntabwo byoroshye kumenya uvuga ukuri cyangwa uwigiza nkana hagati y’aba baturage n’uruganda rw’icyayi rwa Rubaya cyane ko buri ruhande rwibogamiyeho.

Uruganda rw’icyayi rwa Rubaya rurashijwa guhuguza ubutaka abaturage

Ni igikorwa cyabaye kuri uyu wa 1 Gashyantare kitabirwa na Minisitiri w’Ubutegetsi bw’Igihugu Prof Shyaka Anastase n’Umuyobozi w’Umujyi wa Kigali Pudence Rubingisa.

Minisitiri Shyaka yavuze ko kujyana ibi biryo hafi y’abaturage biri mu rwego rwo kwihutisha ibikorwa byo kurengera uwaba adafite icyo kurya muri ibi bihe Umujyi wa Kigali uri muri Guma mu rugo.

Ati “Turifuza twese ko tujyana n’inzego z’ibanze kuko nizo zifite abaturage mu nshingano nta Mutwarasibo wakabaye asinzira isibo ye itameze neza. Niba hari n’igisubizo atabonye ahamagare abayobozi, bafite nimero zitishyurwa bazikoreshe baterefone izo nzego zose, nibiba ngombwa bazihoze ku nkeke. Twebwe icyo twifuza ni uko umuturage abonerwa igisubizo.”

Yavuze ko hifuzwa ko uturere tugize Umujyi wa Kigali twahorana ibiribwa mu gihe hagira ukenera kurengerwa akabasha gufashwa.

Ati “Twari twifuje ko mu Mujyi wa Kigali, n’uturere tuwugize nk’abari gushyira mu bikorwa iki gikorwa bagira ubushobozi bwo guhorana ibiribwa bitari gusa mu bubiko bw’igihugu ku buryo n’aho mu Karere uwahamagara avuga ati nshaka ibiro 5 cyangwa 10…”

Minisitiri Shyaka yasabye abatuye Umujyi wa Kigali kwirinda ababashuka bagamije amacakubiri no guca igikuba muri gahunda yo gutanga ibiribwa.

Ati “Icyo twasaba ni uko nanone hatagira ababyuriraho bakazano amakabyankuru, bakazanamo no kujora, bakazanamo ibitari byo, kandi nabyo birahari. Hari igihe amakabyankuru usanga yonona cyangwa agatera igikuba kandi nta gikuba cyacitse. Ariko niba hari ikibazo natwe tuba dukeneye kukimenya n’itangazamakuru ryagakwiye kuba rifasha muri ubwo buryo ariko mu makuru nyayo.”

Minisitiri Shyaka yabwiye abaturage ko ibiribwa bihari, asaba abayobozi b’ibanze gushyiramo imbaraga bikagera ku bo bigenewe.

Gahunda yo gutanga ibiryo ku miryango yaryaga ari uko yakoze, kuri ubu ifite umwihariko kuko ifite abana bato izajya ihabwa amata mu rwego rwo gukomeza kwimakaza imirire myiza.

Ibi biryo biri gutangwa bigizwemo uruhare n’Abayobozi b’imidugudu, ba mutwarasibo ndetse n’urubyiruko rw’abakorerabushake aho babishyikiriza umuntu mu rugo rwe kugira ngo hakomeze kwirinda ingamba zo kwirinda icyorezo cya COVID-19.

Kugeza ubu Mujyi wa Kigali habarurwa imiryango irenga ibuhumbi 130 igomba gufashwa muri iyi gahunda yo kubaha ibyo kurya. Umuturage ufite ikibazo cyo kubona ibyo kurya yegera umuyobozi w’Isibo cyangwa agahamagara 3260.

Ibiryo byari mu bubiko bw’igihugu byimuriwe mu turere kugira ngo birusheho kwegerezwa ababikeneye

Ibi biryo byagiye bishyirwa ahantu hatandukanye mu turere tugize Umujyi wa Kigali

Amwe mu mashuri yubatswe mu kugabanya ubucucike

Inyigo z’ibizakorwa mu ngengo y’imari y’umwaka wa 2020 – 2021 zigaragaza ko Intara y’Iburengerazuba izibanda mu kwita ku bidukikije, umushinga uzakora mu mirenge 12 mu turere twa Nyabihu, Rubavu, Rutsiro na Ngororero, ukibanda ku gukemura ibizagaragazwa n’abaturage bigira uruhare mu kwangiza icyogogo cya Sebeya.

Ni umushinga watewe inkunga n’igihugu cy’Abaholandi uzamara imyaka ine kandi ufite agaciro ka miliyari 22 z’Amafaranga y’u Rwanda, ukazafasha abaturage gusubiranya icyogogo cya Sebeya ndetse ukabasigira inyungu kuko imirimo bazakora bazayihemberwa.

Icyogogo cya Sebeya gifite ubuso bwa kilometero kare 336 km, kakaba agace gatuwe cyane aho abaturage 400 batuye kuri Km².

Akarere ka Ngororero kagaragaza ko ibikorwa byo gusubiranya icyogogo cya Sebeya bizatwara 484,521,410 z’Amafaranga y’u Rwanda, hakaba hamaze gukoreshwa amafaranga na 249,192,143 akoreshwa mu bikorwa byo guhanga amaterasi, gutera ibiti, gushyikiriza abaturage inka n’amatungo magufi.

Naho mu gusubiranya icyogogo cya Nyabarongo, Akarere ka Ngororero kateye imigano kuri hegitare 106, hakorwa amaterase kuri hegitari 484.5.

Mu bikorwa by’amajyambere mu Karere ka Rubavu hatangiye ibikorwa birimo kubaka uruganda ‘Shema Power Lake Kivu’ rucukura gaz methane mu kiyaga cya Kivu ingana na 56MW, ukaba uzatwara akayabo k’Amadolari ya Amerika asaga miliyoni 170.

Ni umwe mu mishinga igomba gufasha Igihugu kugera ku ntego yo guha abaturage bose amashanyarazi kugera muri 2024, aho gisabwa kuzaba gifite amashanyarazi angana na MW 556 mu gihe kugeza ubu hari MW 224,5.

Inganda z’amazi zirimo kubakwa mu Ntara y’Uburengerazizongera abo ageraho

Hari kandi umushinga wo gukwirakwiza amazi meza mu Mujyi wa Gisenyi no mu mirenge y’icyaro, amazi azaturuka mu ruganda rwa ‘Gihira water treatment Plant ikazatuma’, abatuye Umujyi wa Rubavu bakazahita baca ukubiri n’ibibazo by’amazi adahagije,

Umuyobozi w’akarere ka Rubavu, Habyarimana Gilbert yemeza ko kuboneka kw’amazi bizajyana no kongera imiyoboro y’amazi mu Mujyi wa Rubavu ku bilometero bisaga 100, bigatanga ikizere ko nyuma yo kurangira kw’iyo mirimo nta muturage wo mu Mujyi wa Rubavu uzongera gutaka amazi make.

Uruganda rwa Gihira II nirumara kuzura ruzatanga amazi angana na Metero kibe 15 000 aho ruzunganirwa n’urwari rusanzwe nyuma yo kurusana, narwo rukazava kuri Metero kibe 8 000 rukagera ku 10 000, zose zigatanga metero kibe 25,000.

Mu karere ka Rusizi harakorwa imirimo yo kugeza amazi meza ku baturage batuye Mururu na Gitambi, umuyoboro ufite ibilometero 66.495 ukazatwara akayabo ka 901,647, 764Frw, gukwiza amazi mu Mujyi wa Rusizi nk’umujyi wunganira uwa Kigali bikazatwara miliyari 11.

Imihanda ihuza umujyi wa Gisenyi n’utundi duce yarubatswe

Uturere twunganira Umujyi wa Kigali turi mu bikorwa byo guteza imbere imijyi tuyikwizamo amazi n’imihanda nka Rusizi na Rubavu, harimo kubakwa umihanda uzafasha ubuhahirane mu mirenge ya Gihundwe, Nkanka na Shangi ukazaba ufite ibilometero 3.5 uhuza Rwahi na Busekanka.

Hari kandi imihanda ihuza Umujyi wa Kamembe n’utundi duce, uwa km 32 uhuza Pindura-Bweyeye, hazasanwa umuhanda unyura mu ishyamba rya Nyungwe ugahuza Butare na Bweyeye ufite ibirometero 44.172Km no gusana umuhanda wa Nyakarenzo-Mibirizi-Mashesha uzaba ufite ibirometero 22.4Km.

Mu karere ka Rubavu hazakorwa imihanda ya kaburimbo mu Mujyi wa Gisenyi hagamijwe guteza imbere ubuhahirane ndetse no gukomeza kwegereza abaturage ibikorwa remezo. Hamaze kubakwa imihanda ifite ibirometero 58 naho imihanda y’igitaka ifasha by’umwihariko abahinzi ndetse n’aborozi kugeza umusaruro wabo ku isoko hamaze gukorwa ifite ibirometero 103.

Harimo gukorwa kandi umuhanda ya kaburimbo uhuza Serena-Marine-Brasserie, Braserie-Burushya na Braserie-Busoro ifite uburebure bwa 14,6km ndetse n’uwa Petite Barrière-Karundo-Stade Umuganda wa 5,859Km.

Amatara yongerewe ku mihanda mu mujyi wa Gisenyi

Hashyizwe amatara ku mihanda itandukanye aho mu Mujyi wa Gisenyi hakozwe km 35, 2 ku mihanda ya kaburimbo: Nyabihu- Rubavu, hiyongeraho km 10.7 z’amatara yo ku mihanda mu Mujyi wa Rubavu.

Byatumye imihanda yo muri karitiye ingana na km zirindwi icanirwa ku nkunga ya ENABEL, hanavugururwa imiyoboro y’amashanyarazi yo mu Mujyi wa Rubavu iva kuri KV 6.6 ijya kuri KV 30.

Ibindi birimo gukorwa mu Karere ka Rubavu harimo kwagura umudugudu wa Muhira uzagirwa n’inzu zigerekeranye, uzatuzwamo n’imiryango 120 izakurwa mu manegeka.

Abakuwe mu manegeka barimo gutuzwa mu nzu zigeretse

Hari kandi kubaka gare ya Gisenyi, kurangiza inyubako ry’isoko rya Gisenyi no kubaka ibyumba by’amashuri 1045, mu gihe mu karere ka Rusizi hubatswe ibyumba by’amashuri 754.

Barimo kubakwa n’ibyambu byoroshya ingendo zo mu mazi mu kiyaga cya Kivu mu turere twa Rusizi na Rubavu, ndetse n’isoko ryambukiranya imipaka Bugarama-Kamanyora, rikazateza imbere ubuhahirane.

Akarere ka Karongi kubatse amasoko mu mirenge ya Gishyita na Twumba, hubatswe ibigo nderabuzima mu mirenge ya Bwishyura, Mubuga na Murundi, hubakwa ibyumba by’amashuri 734 ndetse hanatangwa inka 640 ku miryango ikennye.

Isoko rya kijyambere rya Gisenyi ririmo kubakwa

Gare ya Rubavu irimo kubakwa

Abaturage begerejwe amavuriro

Muri Kamena 2020 nibwo TV1 yatangaje inkuru y’uyu mugabo Murwanashyaka ubarizwa mu cyiciro cya mbere ubwo yayoboraga Umudugudu wa Karehe, avuga ko inzu ye yaguye igwishijwe n’imvura asaba kubakirwa kuko nta nta mikoro yari afite.

Yagize ati “ Nta mikoro mfite, icyo nabasaba n’uko bafasha noneho bakamfasha bakanshakira aho mba kuko n’ubundi nzi ko leta y’u Rwanda isanzwe inabishobora.”

Murwanashayaka ahamya ko nyuma yo kuvugana n’itangazamakuru abayobozi be baramurakariye cyane kuburyo byaje no kumuviramo kwirukanwa ku mwanya w’umukuru w’umudugudu no gukurwa muri gahunda ya VUP.

Ati “Nari nsanzwe ndi umuyobozi w’umudugudu wa Karehe n’ubwo ntakiriho kubera impamvu ntazi kuko naje kumva ngo umuyobozi wa Karehe bamuhagaritse, nagerageje kubaza icyaha cyanjye ntabwo nakibonye. Nkeka byaratewe n’uko nakunze kugira ikibazo n’itangazamakuru cy’uko nkwiye kubakirwa nkagira icumbi mbamo.”

Yakomeje avuga ko buri gihe iyo yagaragazaga ko akeneye inzu yo kubamo ubuyobozi bwe bwamurebaga nabi ndetse rimwe na rimwe bukanabimubwira ntabyiteho.

Ati “Ntekereza ko ariyo mpamvu buririyeho bakankuraho kugira ngo ntakomeza mvuga ibyo. Kenshi iyo twavuganaga bampamagaraga bambwira ko nakoze ikosa ariko nkababwira ko numva ntaryo bagaceceka bakanyereka ko batishimye.”

Umunyamabanga Nshingwabikorwa w’Umurenge wa Ruhango, Nemeyimana Jean Bosco, yavuze ko guhagarikwa muri ibi bikorwa byombi no kuvugana n’itangazamakuru atari byo byatumye yirukanwa.

Ati “ Muri VUP n’ibintu bikorerwa mu buryo runaka wenda abantu bajye banasobanurira uko bikowa, ntabwo umuntu wese uri mu cyiciro cya mbere ari gukora muri VUP. Ku bijyanye no kuba umuyobozi w’umudugudu sinkeka ko kuvugira mu itangazamakuru ari byo byamubuza kuba yaba umuyobozi, hari inshingano atujuje zituma bamuvanaho icyizere.”

Nemeyimana yavuze ko gufasha abaturage bijyana n’ubushobozi buhari ndetse anashimangira ko niba ari ku rutonde rw’abasenyewe bazafashwa azabikorerwa nk’abandi.

Murwanashyaka John yavuze ko akeka ko yirukanywe ku buyobozi azira gusaba ubufasha mu itangazamakuru

Abafashwe umwe afite imyaka 22 undi akagira 41. Bombi bafatiwe mu Murenge wa Mukarange, Akarere ka Kayonza, kuwa 30 Mutarama 2020.

Polisi yatangaje ko basanganywe ibiro 14 by’urumogi bari bagiye gukwirakwiza mu baturage.

Umuvugizi wa Polisi mu Ntara y’Iburasirazuba, CIP Hamdun Twizeyimana yavuze ko kugira ngo bafatwe byaturutse ku makuru yatanzwe n’abaturage.

Yagize ati “Ubusanzwe umwe muri aba ni umumotari mu Murenge wa Ndego, niwe wazaniye ruriya rumogi mugenzi we. Abaturage baduhaye amakuru tujyayo dusanga yagiye kurubitsa ahandi hantu, turacyashakisha uwari uhatuye.”

CIP Twizeyimana yakomeje avuga ko umwe muri aba bagabo amaze gufatwa yajyanye abapolisi aho yabikije biriya biro 14 by’urumogi ndetse ajya no kuberaka aho mugenzi we akorera umurimo wo gutwara abagenzi kuri moto mu Murenge wa Ndego nawo wo mu Karere ka Kayonza. Aba bombi ntibasobanura neza aho bakura ruriya rumogi.

Umuvugizi wa Polisi mu Ntara y’Iburasirazuba yashimiye abaturage batangiye amakuru ku gihe yatumye bariya bombi bafatwa. Yabasabye gukomeza ubwo bufatanye kuko biri mu rwego rwo kwicungira umutekano no kurinda ubuzima bwabo.

Ati “Abaturage bamaze gusobanukirwa neza ko urumogi ruri mu bihungabanya umutekano kuko abarunyoye bakora ibyaha bitandukanye.”

“Bamwe mu rubyiruko bamaze kwangirika ubuzima kubera urumogi abandi bagafatwa bagafungwa. Turakangurira abantu kureka ibikorwa byose bijyanye n’urumogi kuko ni icyaha gihanwa n’amategeko.”

Aba bagabo bombi bahise bashyikirizwa Urwego rushinzwe Ubugenzacyaha (RIB) rukorera muri sitasiyo ya Polisi ya Mukarange kugira ngo hakorwe iperereza. Ni mu gihe hagishakishwa uwo bari barabikije ruriya rumogi.

Iteka rya Minisitiri nº 001/moh/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo rishyira ikiyobyabwenge cya cy’urumogi mu biyobyabwenge bihambaye.

Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko Umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha.

Iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni 20Frw ariko atarenze miliyoni 30Frw.

Aba bagabo bafatanywe ibiro 14 by’urumogi

I Huye babangamiwe n’inkende zibonera

Nk’abahinga mu gishanga cya Mukoni mu Murenge wa Tumba, bavuga ko zibonera imyaka yose, byaba ibigori, ibishyimbo, ibijumba, inyanya n’ibindi.

Vérène Nibakure, ni umwe mu bahafite umurima, avuga ko kugira ngo babashe kweza imyaka bahinze muri icyo gishanga, bisaba ko bayirinda.

Agira ati “Ibigori iyo ukibitera ntubirinde, zijya mu ntabire zikabikuramo zikabirya. Ibitangiye kuzamuka biva mu butaka, zirabirandura zikarya kuko biba bicyoroshye. Ibyamaze guheka na byo zirabigonyoza zikabirya”.

Yungamo ati “Nari nahinze inyanya, zitangiye guhisha zirazirya zirazimara. Ubu natahiye aho!”

Inkende kandi ngo aho zisanze imbuto ntizizisiga, harimo amapera, amapapayi, imyembe n’ibindi. N’aho zigeze zigasanga ibiryo bihiye ntibaziteshe, zirabirya.

Abacururiza ku Mukoni nabo ngo barangara gato zikabangiriza, baba abacuruza ibisuguti, amabombo, imigati, n’ibindi.

Uwitwa Emmanuel Ukobizaba bakunze kwita Kibonge ati “Iyo hari nk’umukiriya nshyiriye mituyu zihari, ngarutse nsanga zatwaye amabiswi n’amabombo. Na za shikerete zirazirya nk’uko abantu na bo bazirya.”

Inkende kandi ngo zisuzugura ab’igitsinagore, ku buryo abacuruza imineke bayitwaye idapfundikiye ziyibatesha zikayirya.

Ibigori bigomba kurindwa kuva bigiterwa kuko na bwo zibirya

Mu murima na ho harindwa n’abagabo ndetse n’abasore, kuko abagore bo batazirukana ngo zigende.

Alice Masengesho uhinga mu gishanga cya Mukoni ati “Nari nahinze ibigori, ariko umurima zarawurangije, zancyuje umunyu. Nagerageje kuzirukana zirananira ngeze aho ndazihorera. Nibwiraga ko nzarya ibigori ngashesha n’igikoma, none narihanaguye. Uzirukana uri umugore zikaguhema!”

Abatuye mu duce inkende zikunze kugeramo, aho ni ahitwa i Tumba, ku Itaba no ku Karubanda, bose bifuza ko hagira igikorwa kugira ngo zigabanuke, batekereza ko zibonera kuko zororotse zikaba zarabaye nyinshi.

Ibyo kandi babivuga babihereye ku kuba mbere zikiri nkeya zarabaga mu ishyamba rikikije Kaminuza rizwi ku izina rya Arboretum, ku buryo no kuzibona byari nka tombola.

Aho zabereye nyinshi, byabaye ngombwa ko zijya gushakishiriza ibyo kurya mu nkengero z’iryo shyamba.

Abahinga munsi y’ishyamba rya Arboretum ntibakweza batarinze imyaka yabo

Telesphore Ngoga ushinzwe ibikorwa byo kubungabunga Pariki z’igihugu mu Rwego rushinzwe iterambere (RDB), avuga ko ikibazo cy’inkende zonera abaturage kivugwa no mu turere twa Nyamasheke, Rusizi, Karongi na Rulindo, kandi ko bafatanyije n’uturere bari kwiga uko cyakemuka.

Ati “Turi kurebera hamwe n’ubuyobozi bw’Akarere uburyo zacungwa zitangije cyane. Turi no kureba niba nazo zitashyirwa ku rutonde rw’inyamaswa ikigega gitanga indishyi cyishyurira ibyo zangije.”

Anavuga ko hazagira igikorwa kuri iki kibazo muri uyu mwaka wa 2021, kuko hari ibyadindijwe n’ibihe by’indwara ya Coronavirus.

Perezida Kagame yunamira Intwari z’igihugu umwaka ushize

Ubusanzwe ibi birori byo kwizihiza Intwari z’u Rwanda, byabimbutirwaga n’Umuhango wo kunamira izo Ntwari ubera ku gicumbi cyazo, uwo muhango ukaba ukorwa na Perezida wa Repubulika, Paul Kagame.

Muri uyu mwaka uyu muhango ntiwakunze, kubera ingamba zo kwirinda ikwirakwizwa ry’icyorezo cya Covid19, ndetse na Guma mu Rugo u Rwanda rurimo muri iyi minsi.

Intwari z’u Rwanda zibukwa buri gihe kuri iyi tariki, ziri mu byiciro bitatu birimo , Imanzi, Imena, Ingenzi.

Mu Ntwari z’Imanzi harimo Maj Gen Fred Gisa Rwigema, ndetse n’Umusirikare utazwi uhagarariye abandi baguye ku rugamba rwo kubohora Igihugu.

Umuryango wa Maj Gen Fred Gisa Rwigema Ushyira Indabo ku gituro cye umwaka ushize

Igituro cy’Umusirikare utazwi gihabwa icyubahiro

Mu Ntwari z’Imena harimo Umwami Mutara wa III Rudahigwa, Rwagasana Michel, Uwiringiyimana Agathe, Niyitegeka Felicite ndetse n’Abanyeshuri bigaga Inyange banze kwivangura bikaviramo bamwe kwicwa abandi ubu bakaba barahamugariye.

Aba babyeyi ni abo mu Muryango wa Mutara III Rudahigwa bashyira Indabo ku gituro cye Umwaka ushize

Abo mu muryango wa Uwiringiyimana Agathe bashyira Indabo ku gituro cye Umwaka ushize

Abo mu muryango wa Rwagasana Michel Bashyira Indabo ku gituro cye umwaka ushize

Abahagarariye Intwari z’Inyange bashyira Indabo ku gituro cya bagenzi babo umwaka ushize

Abari mu cyiciro cy’Ingezi ntibaramenyekana kuko hakirimo gukorwa ubushakashatsi ngo hamenyekane abazashyirwamo.

Dore mu mafoto uko Perezida Kagame yunamiye Intwari z‘u Rwanda, umwaka ushize

Perezida Kagame buri mwaka yunamira Intwari zitangiye u Rwanda

Uyu muhango ubimburirwa n’umunota wo Kwibuka Intwari z’u Rwanda

Ukuriye abahagarariye ibihugu byabo mu Rwanda yari yitabiriye uwo muhango umwaka ushize

Minisitiri w’Umuco n’Urubyiruko ni we wakiriye Perezida Kagame muri uyu muhango

Ingabo z’u Rwanda itsinda ricuranga imiziki y’ibirori ryari muri uyu muhango

Dore uko Intwari z’u Rwanda zunamiwe umwaka ushize muri video

Photo: Archives Kigali Today