Tag: featured

Akarere ka Gisagara kaje ku mwanya wa mbere kuko kamaze kwitabira gutanga mituweli ku kigero cya 94.5%. Aka Gakenke kari ku mwanya wa kabiri na 92.7% mu gihe ubwitabire mu Karere ka Nyaruguru bugeze kuri 91.8%.

Akarere ka Nyamagabe kari ku mwanya wa Kane n’ubwitabire bwa 91% mu gihe aka Ruhango kari ku mwanya wa Gatanu ku kigero cya 90.9%

Ku rwego rw’intara, iy’Amajyepfo iri ku mwanya wa mbere ku kigero cya 88.9%, ikurikirwa n’Amajyaruguru afite ubwitabire bwa 87%, mu gihe Uburengerazuba buri ku kigero cya 83.2%, naho iy’Uburasirazuba iri ku kigero cya 82.7% mu gihe Umujyi wa Kigali uri ku mwanya wa gatanu n’ubwitabire bwa 78.1%.

Uturere dutatu tw’Umujyi wa Kigali turi muri dutanu twa nyuma mu bwitabire bwo gutanga ubwisungane mu kwivuza mu 2021.

Nka Nyarugenge ni iya 26 aho ubwitabire bugeze kuri 79.5%, Gasabo ni iya 27 inganya ubwitabire na Nyarugenge, Nyagatare ni iya 28 aho ubwitabire bugeze kuri 79%, Rutsiro ifite 76.1% ni iya 29, naho Kicukiro iri ku mwanya wa 30 n’ubwitabire bwa 74.1%.

Mu gihugu hose, ubwitabire mu gutanga mituweli ya 2020/2021 bugeze ku kigero cya 85.3%.

24.03. 2021: Uturere 5 twa nyuma mu kwishyura #Mituweli 2020/2021
30. Kicukiro 74.1%
29. Rutsiro 76.1%
28. Nyagatare 79.0%
27. Gasabo 79.5%
26. Nyarugenge 79.5%#IshyuraMituweli2020_2021 pic.twitter.com/Vh21vx51yA

— Rwanda Social Security Board (@RSSB_Rwanda) March 26, 2021

24.03.2021: Uko Intara n’Umujyi wa #Kigali bikurikirana mu kwishyura #Mituweli 2020/2021
1. Amajyepfo 88.9%
2. Amajyaruguru 87.0%
3. Uburengerazuba 83.2%
4. Uburasirazuba 82.7%
5. Umujyi wa Kigali 78.1%#IshyuraMituweli2020_2021 pic.twitter.com/3LPfTGvE0X

— Rwanda Social Security Board (@RSSB_Rwanda) March 26, 2021

Inkuru y’uko hari umunyeshuri wakorewe ihohoterwa rishingiye ku gitsina na Dr Kayumba yatangiye gucicikana ku mbuga nkoranyambaga ku wa 17 Werurwe 2021, itangajwe n’uwitwa Kamaraba Salva, wanditse kuri Twitter abara uko byagendekeye uwo mukobwa atari yatangaje amazina.

Mu ijoro ryo kuri uyu wa Gatanu rishyira ku wa Gatandatu, Fiona Muthoni Ntarindwa, ukorera Televiziyo ya CNBC, yifashishije urukuta rwe rwa Twitter maze yandika ati “Umwarimu wanjye yankoreye ihohoterwa rishingiye ku gitsina”.

Mu nyandiko ye itari ndende, yanditse ko ubwo Kamaraba yahishuraga ko Kayumba yakoreye ihohoterwa rishingiye ku gitsina umunyeshuri we muri Mutarama 2017, abantu benshi batangiye kumubaza impamvu atabivuze agategereza imyaka irenga itatu.

Ati “Ariko se hari igihe cya nyacyo ku wakorewe ihohoterwa rishingiye ku gitsina cyo kuvuga?”

Ntarindwa yakomeje avuga ko ubwo yahohoterwaga, yahise abimenyesha ubuyobozi bwa Kaminuza y’u Rwanda; ati “Ariko ntabwo byigeze byitabwaho. Nahatiwe kwicara mu ishuri hamwe n’uwampohoteye, ibintu umuntu uwo ariwe wese adakwiriye kunyuramo.”

Yongeyeho ati “Ukuri ni uko, hari abandi bakobwa banyuze mu bintu nk’ibi yaba ari Kayumba wabahohoteye cyangwa se undi muntu witwaza icyo aricyo. Umuco wo guceceka ntukwiye kwimakazwa.”

Uyu mukobwa wigeze guhatanira ikamba rya Nyampinga w’u Rwanda mu 2015 ndetse wanabaye igisonga cya mbere cya Miss Africa mu 2017, yavuze ko kuvuga ku ihohoterwa rishingiye ku gitsina ari ibintu bigoye kuko “wumva uri wenyine, nta muntu n’umwe uzagutega amatwi cyangwa ngo yizere ibyo uvuga”.

Nyuma y’ubu butumwa bwe, mu rukerera rwo kuri uyu wa Gatandatu, Kayumba ushinjwa nawe yagiye kuri Twitter yandika ko ibyatangajwe na Fiona Muthoni Ntarindwa ari ikinyoma no gushaka kumuharabika.

Mu butumwa bwe yamenyesheje Urwego rw’Igihugu rw’Ubugenzacyaha, RIB, buri gukora iperereza kuri iyi dosiye ko nubwo Ntarindwa avuga ko yari agiye gufatwa ku ngufu mu 2017, “yakomeje kuntumira mu biganiro bye kuri televiziyo mu 2018 na 2019”.

Yavuze ko Ntarindwa yamusabaga ko bahura bari bonyine ariko undi arabyanga.

Ati “Oya ntabwo nigeze nguhohotera. Mu myaka myinshi, buri gihe ubwo nabaga nsohotse mu ishuri, wanyingingiraga kugushyira mu itsinda ryanjye ry’abashakashatsi cyangwa se ko waba umwe mu bagize ikinyamakuru cyacu. Narabyanze kuko nari narumvise ko ukoresha umubiri wawe kugira ngo ubone ubufasha ukeneye.”

Ku wa 23 Werurwe, RIB yatangaje ko yahamagaje Kayumba kugira ngo atangire kwisobanura ku kirego cyatanzwe n’uwari umunyeshuri we wamushinjaga gushaka kumufata ku ngufu. Ni ikirego cyakiriwe mu ntangiriro za Werurwe uyu mwaka.

Uwari Umuyobozi w’Ishami ry’Itangazamakuru n’Itumanaho muri Kaminuza y’u Rwanda, Njuguna Joseph, aherutse kubwira IGIHE ko yakiriye iki kirego cy’umukobwa wamubwiye ko Kayumba yamuhohoteye.

Ati “Yego yaje mu biro byanjye ambwira ko hari umwarimu wagerageje kumuhohotera, namusezeranyije ko nzavugana n’uwo muntu (Kayumba) ariko igihe kinini ntiyazaga ku ishuri.”

Dr Kayumba ni umwe mu bahanga igihugu gifite yaba mu myigishirize y’itangazamakuru no mu gukora ubushakashatsi busanzwe. Gusa inshuro nyinshi yakunze kumvikana mu bikorwa by’imyitwarire mibi birimo kurwana n’ubusinzi, byanatumye amara umwaka muri Gereza nyuma yo guhamwa n’ibyaha bikorerwa ku kibuga cy’indege no gukoresha imbaraga cyangwa gukangisha gukoresha imbaraga ku kibuga cy’indege.

Kuva muri Gicurasi 2018, Fiona Muthoni Ntarindwa akorera Televiziyo ya CNBC ifite studio mu Mujyi wa Kigali. Yatangiye amasomo ye ya Kaminuza mu Itangazamakuru n’Itumanaho mu 2014 ayasoza mu 2018.

My professor sexually assaulted me!

When @kamarabasalva revealed that Dr @CKayumba had sexually assaulted me in Jan 2017, some asked why I had come out now.

But is there ever a right time for a victim of sexual assault to speak out? https://t.co/8WzbFjVDYP

— Fiona M. Ntarindwa (@FeeMuthoni) March 26, 2021

I immediately reported the assault to @Uni_Rwanda which never gave it any attention.

I was forced to sit through class with my abuser- something NO ONE should ever have to go through.

— Fiona M. Ntarindwa (@FeeMuthoni) March 26, 2021

@kamarabasalva has given me the courage to speak up for myself.

I know it’s hard to speak up against sexual abuse. You feel like you are alone &no one will listen or believe you. When you are ready to share, you will have my listening ear. DMs are open

— Fiona M. Ntarindwa (@FeeMuthoni) March 26, 2021

Dear @RIB_Rw, this Fiona is a serial liar who, despite claiming attempted rape in 2017, she continued to invite me to her TV shows in 2018 &2019 & even wanted to meet privately& to latter I refused.She even insisted on meeting our editor who refused b’se he had heard her tricks https://t.co/PrIvMyu6A8

— Christopher Kayumba (@Ckayumba) March 27, 2021

Fiona Muthoni Ntarindwa yavuze ibihe bikomeye yanyuzemo byo kwicara mu ishuri areba imbere ye uwamuhohoteye

Fiona Muthoni Ntarindwa yasabye abandi bakobwa bagenzi be baba barakorewe ihohotera rishingiye ku gitsina ko mu gihe bumva babohotse, bajya bavuga ibyababayeho

Fiona Muthoni Ntarindwa amaze imyaka ibiri akorera CNBC

Mbere yo gukorera CNBC, yakoreye TV10 mu ishami ry’amakuru y’icyongereza

Inkuru bifitanye isano:

 Dr Kayumba yashinjwe n’umukobwa gushaka kumufata ku ngufu; UR yemeza ko ikibazo yakimenye

 Dr Kayumba yatangiye guhatwa ibibazo ku kirego cy’umukobwa umushinja gushaka kumufata ku ngufu

Amafoto: Instragram – Fiona Muthoni

Kuri uyu wa 26 Werurwe 2021, ni bwo hasohotse raporo y’abashakashatsi mu mateka yagaragaje ko u Bufaransa bwagize “uruhare rukomeye” muri Jenoside yakorewe Abatutsi.

Iyi raporo ya paji 1222 yamuritswe nyuma y’imyaka ibiri itsinda ry’abanyamateka 13 ryashyizweho na Perezida Emmanuel Macron ngo ricukumbure ibikubiye mu nyandiko zitashyizwe ahagaragara, zigaragaza amateka y’u Rwanda n’u Bufaransa hagati ya 1990 na 1994.

Ni raporo yitiriwe Komisiyo “Duclert” kuko uwari uyikuriye ari Prof Vincent Duclert. Mu mwanzuro wayo, isobanura ko u Bufaransa bwari buyobowe na François Mitterrand bwananiwe kugira icyo bukora mu guhagarika Jenoside yakorewe Abatutsi mu 1994, yahitanye Abatutsi b’inzirakarengane basaga miliyoni.

U Rwanda n’u Bufaransa bimaze imyaka bidafitanye umubano mwiza ahanini bishingiye ku ruhare iki gihugu cyo ku Mugabane w’u Burayi cyagize mu gushyigikira no gutegura Jenoside ndetse no gufasha abayikoze gutorokera mu mashyamba ya Repubulika Iharanira Demokarasi ya Congo, yahoze yitwa Zaïre.

Umujyanama wa Perezida w’u Bufaransa Emmanuel Macron ku bijyanye na Afurika, Franck Paris, yabwiye abanyamakuru ko itangazwa ry’iyi raporo ryitezweho kuvanaho igihu ku mubano w’u Rwanda n’u Bufaransa.

Yagize ati “Bizatuma haganirwaho kuri buri gice cy’ibyagaragaye mu nyandiko z’ibyakorwaga muri iriya myaka (1990-1994).’’

Franck Paris yavuze ko hari impamvu eshatu zigaragaza ko itangazwa rya raporo rizagira ingaruka nziza.

Yakomeje ati “Hashize imyaka ibiri Perezida Macron yakiriye itsinda ry’Abacitse ku icumu rya Jenoside yakorewe Abatutsi bari mu Muryango IBUKA-France ababwira ko Jenoside yakorewe Abatutsi itigeze igira umwanya wihariye muri sosiyete y’abatuye u Bufaransa. Haracyariho inzitizi z’amagambo ndetse akoreshwa atariyo mu nyito nyayo y’iyo Jenoside.’’

Perezida Macron yavuze ko hagomba kuvugwa Jenoside yakorewe Abatutsi kandi hagashyirwaho n’umunsi wa tariki ya 7 Mata nk’uwo kwibuka Jenoside yakorewe Abatutsi mu Bufaransa buri mwaka.

Ati “Ibyo byemezo byiyongereye ku bindi nko gushyiraho gahunda y’inyigisho mu mashuri higishwa amateka yagejeje kuri Jenoside yakorewe Abatutsi, hakabaho no gutera ingabo mu bitugu imiryango ivugira abacitse ku icumu rya Jenoside yakorewe Abatutsi nka IBUKA-France.’’

Franck Paris yavuze ko umubano ushingiye kuri dipolomasi hagati y’u Rwanda n’u Bufaransa wagiye ukomwa mu nkokora n’agatotsi kari muri ayo mateka.

Ati “Ibyo byose ntabwo byigeze bigira umusaruro utanga ibisubizo byifuzwa, kuko hariho icyo cyasha cy’amateka y’uruhare rw’u Bufaransa mu Rwanda. Iyi nzira rero turibwira ko yazafasha gukemura iki kibazo cy’imibanire y’ibihugu byacu byombi mu buryo budasubirwaho.’’

Yasobanuye ko kuba u Bufaransa bwaragize uruhare muri Jenoside yakorewe Abatutsi bikwiye no gutangirwa ibisobanuro n’urubyiruko rwa Afurika rugasobanukirwa impamvu y’imyitwarire y’u Bufaransa kuri uwo mugabane.

Yakomeje ati “Bikaba rero bikora ku mibanire yacu n’ibihugu bindi byose bya Afurika. Muri iki gihe turimo twifuza ko imibanire yarushaho kuba myiza n’ibindi bihugu bya Afurika biracyenewe ko tugira icyo dukora kuri izi nyandiko mu gutanga ibisubizo ku byibazwa.’’

Abashakashatsi bakoze raporo ntibashoboye kwinjira mu nyandiko zose zireba u Rwanda n’u Bufaransa hagati ya 1990 – 1994.

Basobanura ko hari zimwe bakeka ko zimuriwe mu bubiko rusange n’izindi batabonye kuko bishoboka ko zitashyizwe mu bubiko.

Usibye kwemera ko nta ruhare u Bufaransa bwagize mu guhagarika Jenoside, raporo yakozwe yakomeje gushimangira ko iki gihugu nta ruhare cyagize mu guhagarikira ubwicanyi muri Opération Turquoise no gucikisha abajenosideri.

Nyuma y’iyi raporo, u Rwanda narwo rwiteguye gushyira hanze raporo yakozwe ku busabe bwa Guverinoma mu 2017.

Ikiganiro na Etienne Nsanzimana, uyobora Ibuka France kuri raporo ya “Commission Duclert”

Raporo yagaragaje ko ubutegetsi bwa Mitterrand bwafashije cyane ubwa Habyarimana butitaye ku migambi mibisha yategurirwaga Abatutsi imbere mu gihugu

[email protected]

Iyi raporo yamuritswe kuri uyu wa Gatanu nyuma y’imyaka ibiri itsinda ry’abanyamateka 13 riri gucukumbura ibikubiye mu nyandiko zitari zigeze zishyirwa ahagaragara zigaragaza amateka y’u Rwanda n’u Bufaransa hagati ya 1990 na 1994. Yamurikiwe Perezida Emmanuel Macron kuri uyu wa Gatanu, dore ko ari na we washyizeho komisiyo yayikoze.

Ni raporo ya paji 1222 yitiriwe Komisiyo “Duclert” kuko uwari uyikuriye ari Prof Vincent Duclert. Mu mwanzuro wayo, isobanura ko u Bufaransa bwari buyobowe na François Mitterrand bwananiwe kugira icyo bukora mu guhagarika Jenoside yakorewe Abatutsi.

Ntabwo inyandiko zose zireba u Rwanda n’u Bufaransa hagati ya 1990 – 1994 aba bashakashatsi babashije kuzinyuzamo amaso kuko muri raporo yabo basobanura ko hari zimwe babuze, bishoboka ko zaba zarimuriwe mu bubiko rusange, cyo kimwe n’uko hari izindi batabashije kubona kuko bishoboka ko zitashyizwe mu bubiko.

Iyi raporo isobanura ko umubano mu bya gisirikare n’imishinga y’iterambere u Bufaransa bwagiranye n’u Rwanda, watangiye gushinga imizi mu myaka ya 1970, ukagenda urushaho gufata indi ntera cyane guhera mu Ukwakira 1990 ubwo FPR yatangiraga urugamba rwo kubohora igihugu.

Kuva icyo gihe, ngo u Bufaransa bwatangiye gushyiraho politiki zitandukanye zireba u Rwanda zimwe “zivuguruzanya”.

Ikomeza igaragaza ko nyuma y’ihanurwa ry’indege ya Habyarimana, u Bufaransa bwihutiye gucyura abaturage babwo “bunita ku guhungisha umuryango w’umugore wa Habyarimana”.

U Bufaransa bwishe ijisho ku byabaga mu Rwanda

Ku ruhare rw’u Bufaransa muri Jenoside yakorewe Abatutsi, iyi raporo hari aho igira iti “U Bufaransa bwaba bwaragize uruhare muri Jenoside yakorewe Abatutsi? Aha turashaka kuvuga ubushake bwo kwiyunga ku bikorwa bya Jenoside, nta kintu na kimwe mu nyandiko twasuzumye zari mu bubiko kibigaragaza”.

Abashakashatsi kandi bagaragaza ko uruhare rw’u Bufaransa muri Jenoside, rushingiye ku myitwarire ya politiki yabwo idahwitse yo gukomeza “kwica ijisho” mu gushyigikira ubutegetsi buronda ubwoko, bwamunzwe na ruswa kandi bwimakaje ubugizi bwa nabi”.

Iti “Abayobozi bumvaga ko Perezida Habyarimana ashobora kugeza igihugu kuri demokarasi n’amahoro.”

Nyuma kandi yo kubona ko amacakubiri ari gukaza umurego mu Rwanda, raporo igaragaza ko nta “politiki n’imwe u Bufaransa bwigeze bushyiraho igamije gufasha mu kurwanya ubuhezanguni bw’Abahutu no kurwanya irondamoko igihugu cyari cyarimakaje”.

Raporo inenga abayobozi b’u Bufaransa bari barangajwe imbere na Perezida Mitterrand ku bwo kwimakaza politiki yagaragazaga Habyarimana “nk’umuhutu” uhanganye n’ “umwanzi” w’ingabo ziturutse muri Uganda.

Bashingiye kuri iyi ngingo, aba bashakashatsi muri raporo yabo bagize bati “Ubushakashatsi bwagaragaje uruhare rukomeye kandi ndengakamere”.

Raporo yabererekeye Opération Turquoise

Abasirikare b’u Bufaransa bakunze gushinjwa ko bagize uruhare muri Jenoside yakorewe Abatutsi binyuze mu kuba ikiraro cyambukije benshi mu ngabo za leta zayikoraga cyo kimwe n’izindi Nterahamwe zikabasha guhungira muri Zaire.

Komisiyo y’Igihugu yo kurwanya Jenoside, CNLG, mu 2016 yakoze urutonde rw’abasirikare b’Abafaransa baba abari mu Rwanda mu 1994 n’abari i Paris igaragaza uruhare buri umwe yagize muri Jenoside yakorewe Abatutsi.

Iyi raporo mu myanzuro yayo, yagumye ku murongo n’ubundi usanzwe u Bufaransa bwafashe bw’uko nta mabi yakozwe muri Opération Turquoise ahubwo ko yari igamije kurokora Abatutsi bicwaga.

Igaragaza ko ingabo zagiye muri iyi operation, zoherejwe imburagihe ndetse ko ku ikubitiro hari urujijo ku nshingano zahabwaga bituma misiyo yazo itabasha kurokora ibihumbi by’Abatutsi.

Igira iti “Amahano yabaye mu Rwanda yasize ashegeshe igihugu n’intsinzwi k’u Bufaransa.”

Ibyabaga mu Rwanda, raporo ivuga ko byakirwaga mu buryo butandukanye n’Abaminisitiri, abagize Inteko Ishinga Amategeko, abayobozi mu nzego nkuru z’igihugu ndetse n’abahanga; ku buryo bamwe byabaga bitabashishikaje cyangwa batabyitaho.

U Rwanda rugiye gutanga raporo yarwo

Itangazo ryashyizwe ahagaragara na Guverinoma y’u Rwanda nyuma y’uko iyi raporo ishyizwe hanze, rivuga ko yakiriwe neza ndetse igaragaza intambwe ikomeye mu kumva mu buryo bumwe uruhare rw’u Bufaransa muri Jenoside yakorewe Abatutsi.

Riti “Raporo y’iperereza yakozwe ku busabe bwa Guverinoma y’u Rwanda mu 2017 nayo izashyirwa hanze mu byumweru biri imbere. Byitezwe ko ibizayivamo bizuzuzanya n’ibya Komisiyo ya Duclert.”

Prof Vincent Duclert yashyikirije Perezida Emmanuel Macron iyi raporo ku manywa yo kuri uyu wa Gatanu

Iyi komisiyo yakozwe n’abanyamateka 13 bashyizweho na Macron mu myaka ibiri ishize

Raporo yagaragaje ko politiki ya François Mitterrand wari inshuti ikomeye ya Habyarimana, ntacyo yigeze ifasha mu guhagarika Jenoside yakorewe Abatutsi

Imibare itangwa n’ubuyobozi bw’Akarere ka Huye igaragaza ko mu 2020 habaruwe abangavu 337 batewe inda imburagihe naho nyuma yaho mu 2021 abazitewe ni 69.

Bamwe muri abo bangavu babwiye IGIHE ko nyuma yo kumenya ko batwite bananiwe kwiyakira bagashaka kwiyahura.

Umwe wo mu Murenge wa Huye ati “Nigaga mu wa gatandatu w’amashuri abanza; inda nayitewe n’umusore w’umumotari, yarambwiye ngo njye kumusura ngezeyo aramfata antera inda.”

Undi mwangavu wo mu Murenge wa Mbazi we yavuze ko yasambanyijwe ubugira kabiri n’umusore wacumbikaga mu gipangu yakoragamo akazi ko mu rugo, amutera ubwoba ko nabivuga azamwica.

Ati “Namaze kumenya ko yanteye inda mbimubwiye arambwira ngo nindamuka mvuze ko ari we wayinteye azanyica. Nahise ntoroka mva muri urwo rugo ntasezeye ntaha iwacu mfite umugambi wo kwiyahura ariko ngeze mu rugo ababyeyi barampumuriza siniyahura.”

Bamwe muri abo bangavu batewe inda imburagihe bahurijwe hamwe na Association Modeste et Innocent, AMI, ibaha ibiganiro bibahumuriza, ibafasha no kwiga imyuga ndetse ibaha n’ibikoresho bazifashisha mu kuyishyira mu bikorwa.

Umuhuzabikorwa wungirije wa AMI, Ndayisaba Eric, yavuze ko batangiye gukurikirana abangavu batewe inda mu 2018 kuko babonaga hari abananiwe kwakira ibyababayeho.

Ati “Twatangiye kubakurikirana guhera mu 2018 kugira ngo tubafashe kongera kwigirira icyizere mu buzima kuko baba barakomerekejwe n’amateka yabo, rimwe na rimwe n’imiryango ikabajugunya ibita ibirara cyangwa se indaya. Ni ukongera kubasubiza icyizere cy’ubuzima no gukomeza kwita ku bana babyaye ndetse no kugira uruhare mu iterambere ry’umuryango.”

Kuri iyi nshuro abangavu 16 bahawe imashini zidoda imyenda n’ibitambaro kugira ngo batangire gushyira mu bikorwa umwuga w’ubudozi bigishijwe.

Abaganiriye na IGIHE bose bemeje ko bamaze kugarura icyizere cy’ubuzima kandi imashini bahawe bazazikoresha neza kugira ngo zibahindurire imibereho.

Hari uwagize ati “Iyi mashini bayimpaye nyikeneye kuko nzi kuyikoresha, nzayikoresha neza ku buryo nzabona amafaranga yo kwita ku mwana wanjye. Ngiye kuruhuka kujya guca inshuro kandi ndishimiye cyane.”

Ubuyobozi bwa AMI buvuga ko abangavu nk’abo bigishwa n’ubuzima bw’imyororokokere, gukora imishinga iciriritse ndetse no kwizigama.

Umuyobozi wungirije ushinzwe imibereho myiza y’abaturage mu Karere ka Huye, Kankesha Annonciata, yasabye abo bangavu gukoresha neza inkunga baterwa kugira ngo ubuzima bwabo buhinduke.

Yavuze ko mu bangavu 337 batewe inda imburagihe, abagera ku 180 bamaze guhabwa ubufasha butandukanye kugira ngo bagarure icyizere cy’ubuzima kandi bizakomeza.

Yasabye abangavu muri rusange kwirinda ababashuka bagamje kubasambanya kandi n’uwabigerageza bagahita babimenyesha ubuyobozi kugira ngo abiryozwe.

Abahawe imashini bavuze ko bazazikoresha neza kugira ngo zibahindurire imibereho

Abangavu bo mu Karere ka Huye batewe inda imburagihe bari gufashwa kwakira ibyababayeho

Bamwe mu bangavu batewe inda imburugihe bari baherekejwe n’ababyeyi babo

Bemeza ko nyuma yo guhabwa inyigisho n ubufasha bagaruye icyizere cy ubuzima

Kuri iyi nshuro abangavu 16 bahawe imashini zidoda imyenda

Umuyobozi wungirije ushinzwe imibereho myiza y’abaturage mu Karere ka Huye, Kankesha Annonciata, yasabye abo bangavu gukoresha neza inkunga baterwa kugira ngo ubuzima bwabo buhinduke

[email protected]

Ibi Minisitiri Gatabazi yabigarutseho ku wa Kane tariki ya 25 Werurwe, mu muhango wo ku kwimika Musenyeri mushya wa Diyoseze ya Cyangugu nyuma y’uko yari imaze imyaka itatu ikurikiranwa na Musenyeri Célestin Hakizimana, Umushumba wa Diyoseze ya Gikongoro.

Nyuma ya Jenoside yakorewe Abatutsi ni bwo Padiri Ubald Rugirangoga yatangije ibikorwa by’isanamitima kuri Paruwasi ya Mushaka iherereye mu Karere ka Rusizi. Intego ye yari iyo kunga Abanyarwanda bakongera bakabana batishishanya.

Muri iyi Paruwasi ya Mushaka yahuje abishe n’abiciwe muri Jenoside bagera muri 446 bibumbiye mu matsinda icumi. Ibi bikorwa byaragutse bigera hirya no hino mu gihugu.

Muri uyu muhango wo kwimika Musenyeri Sinayobye, Minisitiri Gatabazi yasabye ko ibikorwa bya Padiri Ubald bibungabungwa.

Ati “Muzakomeze gushingira no kubakira ku bumwe n’ubwiyunge bw’Abanyarwanda bumaze kugera ku ntambwe ishimishije. Ngira ngo muri iyi Diyoseze ya Cyangugu harimo umwihariko w’ibikorwa bikomeye tutazibagirwa bya Padiri Ubald Rugirangoga witabye Imana mu minsi yashize. Twizera ko ibikorwa by’amahoro yari yaratangije muzabikomerezaho ndetse no ku Ibanga ry’Amahoro hagakomeza hakagendwa, abakirisitu bagakomeza kuhavoma ingabire zibafasha gukomeza kwiyubaka.”

Padiri Rugirangoga Ubald yabonye izuba muri Gashyantare 1955, avukiye mu yahoze ari Segiteri Rwabidege, Komini ya Karengera, Perefegitura ya Cyangugu. Kuri ubu ni mu Murenge wa Ruharambuga mu Karere ka Nyamasheke. Yatabarutse tariki ya 8 Mutarama 2021 aguye muri Leta Zunze Ubumwe z’Amerika azize uburwayi bw’ibihaha yasigiwe na Covid-19.

Minisitiri Gatabazi yasabye Musenyeri Sinayobye gukomeza ibikorwa bya Padiri Ubald

Musenyeri Sinayobye yavuze ko azasigasira ibikorwa yasanze muri Diyoseze ya Cyangugu

Kuva tariki 7 Mata, buri mwaka Abanyarwanda n’abatuye Isi bibuka abazize Jenoside yakorewe Abatutsi mu Rwanda igahitana ubuzima bw’abasaga miliyoni b’inzirakarengane bishwe bazira uko baremwe.

Mu bihe byo kwitegura kwibuka ndetse n’ibyo kwibuka nyirizina usanga by’umwihariko abarokotse Jenoside bahura n’ihungabana baterwa n’ibikomere batewe n’ibihe bikomeye banyuzemo muri Jenoside.

Umuryango w’Abarokotse Jenoside yakorewe Abatutsi barangije Amashuri makuru na Kaminuza, GAERG (Groupe des Anciens Etudiants Rescapés du Génocide), utangaza ko by’umwihariko muri ibi bihe bya Covid-19, abarokotse bakeneye kwitabwaho birushijeho.

Mu kiganiro yagiranye na The New Times, Umulisa Aimée-Josiane, ushinzwe Ibikorwa by’Isanamitima, yavuze ko bitewe n’uko bigaragara ko kwibuka abantu bahurira hamwe bitazakunda mu mwaka wa kabiri kubera Covid-19, bikomeje kugira ingaruka ku barokotse.

Ati “Amabwiriza yashyizweho mu kurinda abanyarwanda kwandura Coronavirus, yashyize bamwe mu barokotse baba bonyine, mu bwigunge ndetse no mu bihe by’ubwoba. Ntabwo bashobora kwibuka ababo kandi bigira ingaruka ku buzima bwabo bwo mu mutwe.”

Umulisa avuga ko kugeza ubu batangiye kuvugana n’abarokotse babasobanurira impamvu ibikorwa byo kwibuka bizaba abantu badahurira hamwe ari benshi aho bagirwa inama yo kubikorera iwabo mu ngo kugira ngo bumve ko ababo bakundaga batigabiranye.

Avuga ko kugeza ubu ibikorwa byo kwita ku bashobora guhura n’ihungabana bizakomeza gukorerwa kuri telefoni hifashishijwe abajyanama bafasha abahuye n’ihungabana bagera kuri 200 ndetse n’abahanga mu by’Imitekerereze ya Muntu (Psychologists) 20 bari hirya no hino mu gihugu.

Umunyamabanga Nshingwabikorwa wa GAERG, Nsengiyaremye Fidèle, yabwiye IGIHE ko binyuze mu cyumweru cyahariwe ibikorwa bya AERG/GAERG, abantu bagera kuri 2500 bagabanyijwe mu matsinda 168 yo mu turere 25 tw’igihugu aribo bari gufashwa muri ibi bihe.

Yavuze ko ababarizwa muri ayo matsinda ari abafite imyaka iri hejuru ya 55 cyane ko aribo biganjemo abakunze kugira ibibazo by’ihungabana n’agahinda gakabije bikunze kuza mu bihe byo kwibuka ababo bazize Jenoside.

Imibare igaragaza ko nibura 75%, muri abo 2500 bahura n’ibyo bibazo by’ihungabana n’agahinda gakabije.

Ku rundi ruhande kandi ku bufatanye n’Ikigega cyita ku barokotse Jenoside yakorewe Abatutsi, SURF hashyizweho umurongo wa telefoni utishyurwa wifashishwa n’abantu bahuye n’ibibazo by’ihungabana bagahabwa ubufasha.

Umuryango uharanira Inyungu z’abarokotse Jenoside yakorewe Abatutsi, IBUKA, ugaragaza ko mu 2019, wari ufite abantu 3656 bahuye n’ibibazo by’ihungabana n’agahinda gakabije mu bihe byo kwibuka.

Muri abo abagera ku 3087 bahawe ubufasha bwihuse basanzwe aho ibi bibazo by’ihungabana bahuriye nabyo mu gihe abandi bagera kuri 569 bari bafite ibibazo bikomeye ku buryo bajyanywe mu bitaro kwitabwaho n’abaganga.

Mu 2020, nyuma y’umwaduko w’icyorezo cya Covid-19, hagaragaye abagera kuri 1200 bahuye n’ibibazo by’ihungabana n’agahinda gakabije aho abagera kuri 401 muri bo bajyanywe mu bitaro kwitabwaho n’abaganga.

Abarokotse Jenoside basabiwe kwitabwaho by’umwihariko mu bihe byo kwibuka kubera ihungabana bashobora guhura naryo

Abarangije muri iki cyiciro, ni abakuze bigishijwe gusoma, kwandika no kubara mu mwaka wa 2020-2021 bemeza ko n’ubwo bakomwe mu nkokora n’icyorezo cya COVID-19, bitabaciye intege kuko bari bazi neza ingaruka n’ingorane bahuraga na zo kubera kutamenya gusoma no kwandika.

Abaganiriye na IGIHE bahuriza ku ipfunwe bahoranaga mu bandi ndetse n’ihohoterwa bakorerwaga, aho bamwe bibwagwa n’imitungo yabo.

Nyandagazi Laurence w’imyaka 45 ni umwe muri bo wo mu Karere ka Burera, uvuga uburyo yaterwaga ipfunwe no kwitwa inkandagirabitabo.

Yagize ati “Najya mu nama bampa urupapuro nkegera uwo twegeranye nkamusaba ko yanyandikira ngo ndumva ntameze neza. Hari ubwo nagiye i Kigali gusura inshuti zacu, ngezeyo nkajya mbaza kandi ndeba icyapa imbere yanjye ariko kubera kutamenya gusoma barandindagije nirirwa mu nzira, ubu nzi gusoma, kwandika no kubara niteguye no kuziyamamaza mu matora yegereje kuko imbogamizi nari mfite zararangiye.’’

Umutoni Zainab wo mu Karere ka Musanze we yagize ati “Kera umuntu utarajyaga ku ishuri ntacyo bamutwaraga, nabayeho nk’intama, nahoranaga ipfunwe kuko ntazi gusoma. Ubu nzi gusoma, kwandika no kubara, iyo nkeneye inguzanyo mu itsinda ndiyandikira kandi nkanayikoresha neza kuko maze kujijuka, abana banjye mbafasha gusubiramo amasomo ugasanga birashimishije mu rugo”

Umuhuzabikorwa w’Inama y’Igihugu y’Abagore mu Karere ka Musanze, Nyiramahirwe Blandine, yemeza ko kuba umubare munini w’abigishijwe ari abagore bizakuraho imbogamizi nyinshi zabazitiraga mu iterambere.

Ati “Nk’abagore, twari dufite imbogamizi z’abagore batazi gusoma, kwandika no kubara ariko ubu iterambere ry’umugore rigiye kwiyongera kuko bagiye gukora ibyo bazi. Bajyaga banahohoterwa kubera kutamenya gusoma aho basomeshaga ubutumwa rimwe na rimwe bakabubabwira nabi hari n’abibwaga ibyangombwa by’ubutaka cyangwa amafaranga biturutse ku kuba batazi gusoma, kwandika no kubara ariko bigiye gukemuka biteze imbere.”

Harushyabana Bernard, Umukozi wa Duhamic Adri yafashije abigishijwe bakuze kwiga ibinyujije mu Mushinga Literacy Project ku nkunga ya Care Rwanda, avuga ko babategerejeho kwiteza imbere kuko kwigisha umugore ari guteza imbere umuryango.

Yagize ati “Abarangije turashaka ko bahindura ubuzima bwabo bakazamuka mu bukungu, mu mibereho myiza, bakaringaniza urubyaro, bagatanga mituweli, bagakoresha neza ubumenyi bahawe bahera ku mahirwe abegereye. Turasaba n’ubuyobozi kuzakomeza kubaba hafi kuko bo bagaragaje ko bashoboye.”

Umuyobozi w’Akarere ka Burera wungirije ushinzwe Imibereho myiza y’Abaturage, Manirafasha Jean de la Croix, avuga ko bazakomeza kwigisha abantu bakuze batari barabonye ayo mahirwe bitewe n’amateka igihugu cyanyuzemo.

Yagize ati “Ni igikorwa twishimira kuko giha amahirwe n’abakuze yo kumenya gusoma, kwandika no kubara. Ubundi kubera ibihe twanyuzemo by’amateka yaranze igihugu cyacu, byagiye biteza ingaruka no mu myigire mu Karere ka Burera mu myaka itatu ishize twari dufite abagera hafi ku bihumbi 40, batazi gusoma no kwandika ariko ubu dusigaranye abari munsi y’ibihumbi 10. Intego ni uko buri mwaka tuzajya twigisha abarenga ibihumbi bitanu, ari nako dushyiraho n’amasomero hirya no hino, bizadufasha muri gahunda yo guhindura umuryango bityo tugire umuryango uteye imbere.”

Abarangije amasomo muri uyu mwaka biganjemo abagore ku kigero kirenga 80%, ni abatangiye kwiga muri Werurwe 2020 baza gusubika amasomo batarangije kubera icyorezo cya Covid-19, baza kuyakomeza kugeza muri uyu mwaka, abenshi bari hejuru y’imyaka 30 kuko harimo n’ufite 55 y’amavuko.

Abantu bo mu Turere twa Burera na Musanze bakuze bahawe impamyabumenyi nyuma yo gusoza amasomo yabo bahawe mu gihe cy’umwaka

Abigishijwe gusoma, kwandika no kubara bavuga ko imbere ari heza

N’ubwo byinshi kuri uyu mushinga bitaramenyekana, Umuyobozi Mukuru w’Urwego rw’Igihugu rw’Iterambere, RDB, Clare Akamanzi, yavuze ko hari gahunda yo gushaka umushoramari washinga uruganda rukora ibirahuri, dore ko iby’ibanze bikenerwa mu gukora ibyo bikoresho biboneka mu Rwanda.

Ibirahuri bikorwa hifashishijwe ibintu bitandukanye, ariko umucanga ukaza mu by’ibanze.

Akamanzi yatangaje ko baherutse kuzenguruka mu Rwanda hose bashaka ahantu haboneka umucanga mwiza kandi mwinshi ku buryo wakwifashishwa mu gukora ibirahuri mu ruganda.

Umucanga ukenerwa muri ibyo bikorwa witwa Silaca, kuko uba uwifitemo ikinyabutabire cya Silicon Dioxide (SiO2) ari na cyo cy’ingenzi mu ikorwa ry’ibirahuri.

Mu Rwanda, uwo mucanga uboneka ku bwinshi mu Karere ka Kirehe mu Ntara y’Uburasirazuba bw’u Rwanda.

Akamanzi yabwiye Inteko Ishinga Amategeko Imitwe yombi, kuri uyu wa Kane ko ibikorwa byo gushaka umushoramari uzashinga urwo ruganda bigeze kure.

Yagize ati “Dufite ubwoko bwiza cyane bushobora gukora ibirahuri mu gihugu. Igikurikira ni uko tugiye kugeza raporo ku bashoramari kugira ngo dushobore gukora ibirahuri, byaba ibirahuri by’amacupa cyangwa ibyo kubaka amadirishya n’ahandi hose dukeneye mu gihugu, kuko ubu ngubu byose tubitumiza hanze.”

Ibirahuri ni ingenzi cyane mu kurengera ibidukikije

Imwe mu mpamvu ikomeye ituma Leta iri gushora cyane mu ikoreshwa ry’ibirahuri, ni uko bitangiza ibidukikije nk’ibikoresho bikozwe muri pulasitiki kandi bikaba bishobora kuvugururwa bikongera gukoreshwa mu buryo bworoshye.

Kuva mu mwaka wa 2008, Leta y’u Rwanda yatangiye guca ikoreshwa ry’ibikoresho bya pulasitiki birimo amashashi akoreshwa cyane mu gupfunyikamo ibicuruzwa n’ibindi bintu bitandukanye.

Ikibazo gikomeye cyabayeho ni uko kuva icyo gihe kugeza ubu, kubona ibintu byo gupfunyikamo biramba, bihendutse kandi bishobora gukoreshwa kenshi bikigoranye, ndetse ku bicuruzwa bimwe na bimwe ntibinashoboke burundu, n’ubwo Leta yashize imbaraga nyinshi mu gufasha abashoramari benshi kuzana inganda zikora ibindi bikoresho birimo ibikoze mu mpapuro bishobora gukoreshwa mu gupfunyika ibicuruzwa.

Kugeza ubu, mu Rwanda habarurwa inganda 15 zikora ibikoresho byo gupfunyikamo, ariko zose ziracyakora ibikoresho byoroheje kandi rimwe na rimwe bikaba bihenze kurusha ibikoresho bikoze muri pulasitiki.

Ubuke bw’ibikoresho byo gupfunyikwamo, bwiyongeraho ko ibikoresho bikoze muri pulasitiki bikiboneka ku bwinshi ku masoko yo mu Rwanda, cyane cyane nk’ibikoresho bibika ibinyobwa nk’amazi n’amata, byumvikanisha uburyo ibikoresho bikoze mu birahuri bikenewe, kuko ari bimwe mu bifite ubushobozi bwo kubika ibintu byari bisanzwe bibikwa mu bikoresho bya pulasitiki.

Indi mpamvu kandi ni uko ibikoresho bikozwe mu birahuri bishobora gukoreshwa inshuro nyinshi kuko bivugururwa mu buryo bworoshye kurusha ibikoresho bikoze muri pulasitiki.

Indi mpamvu ituma ishoramari ry’uruganda rukora ibirahuri rikenerwa cyane, ni uko ibi bikoresho binakoreshwa cyane mu bwubatsi, kandi u Rwanda rukaba ari igihugu gifite imishinga y’igihe kirekire y’ubwubatsi, irimo kuvugurura inyubako zo guturamo, ivugururwa ry’Umujyi wa Kigali n’imijyi iwunganira n’indi mishinga myinshi, ku buryo habonetse uruganda rukora ibirahuri bishobora kugabanya ikiguzi cyo kubaka, nk’uko byagenze kuri sima, amarangi n’amakaro nyuma y’uko inganda zibitunganya zongereye umusaruro wabyo ku isoko ry’u Rwanda.

Ku Mugabane wa Afurika, ibihugu birimo Afurika y’Epfo, Kenya na Nigeria ni bimwe mu bizwiho gukora ibirahuri byinshi, mu gihe ibirimo u Buyapani ari bimwe mu biyoboye ibindi ku rwego rw’Isi.

Uruganda rukora ibirahuri rushobora gutangira gukorera mu Rwanda mu minsi mike iri imbere