Tag: featured

Aba bagabo batawe muri yombi muri Gashyantare 2020 nyuma yo gufatanwa n’umuhanzi Kizito Mihigo bagerageza kwambuka igihugu binyuranyije n’amategeko bagejejwe imbere y’Inteko Iburanisha mu Rukiko Rwisumbuye rwa Nyarugenge kuri uyu wa 29 Mata 2021.

Uko ari batatu bakurikiranyweho icyaha cyo kuba ‘icyitso ku cyaha cyo kwambuka no kwambutsa aca ahantu hatemewe n’amategeko’, gusa Ngayabahiga na Nkundimana bo bakagira umwihariko wo kuba bakurikiranyweho ikindi cyaha cyo gutanga ruswa.

Kuri uyu wa Kane ubwo bagezwaga imbere y’ubutabera Umucamanza yabajije kuri ibi byaha baregwa, Joel Ngayabiha na Jean Bosco Nkundimana bavuga ko bemera kuba icyitso ku cyaha cyo kwambuka no kwambutsa aca ahantu hatemewe n’amategeko, ariko Innocent Harerimana we avuga ko atacyemera.

Bigeze ku cyaha cyo gutanga ruswa Joel Ngayabiha na Jean Bosco Nkundimana bivugwa ko yari umukozi wo mu rugo wa Kizito Mihigo bavuze ko batacyemera.

Muri uru rubanza rwabaye hifashijwe ikoranabuhanga aho ababurana bari muri Gereza ya Nyarugenge aho bafungiye, Jean Bosco Nkundimana yavuze ko yiteguye kwiburanira kuko ntawe afite umwunganira mu mategeko.

Nyuma yo kugira icyo bavuga ku byo bakurikiranyweho, umunyamategeko wa Kubwimana na Ngayabiha yasabye ko urubanza rwasubikwa ngo ‘kuko atarabonana n’abo yunganira n’umwanya uhagije wo kwiga kuri dosiye ibashinja’.

Imaze kumva abaregwa, Inteko Iburanisha yafashe umwanzuro wo gusubika iburanisha ryimurirwa ku wa 13 Nyaka 2021.

Aba bagabo uko ari batatu bakurikiranyweho ibyaha bifitanye isano no kugerageza kwambuka umupaka binyuranyije n’amategeko k’Umuhanzi Kizito Mihigo, wafashwe na Polisi ku wa 13 Gashyantare 2020 hafi y’aho u Rwanda rugabanira n’u Burundi mu Karere ka Nyaruguru.

Inyandiko zisobanura imiterere y’urubanza rw’aba bagabo batatu zisobanura ko Kizito Mihigo waje ’Kwiyahura agapfa’ yatangiye gucura umugambi wo gutoroka muri Mutarama 2020. Icyo gihe ngo yasabye umukozi we witwaga Ndikumana Jean Bosco nk’umuntu uvuka mu Karere ka Nyaruguru kumushakira umuntu wamwambutsa akagera i Burundi.

Uwo mukozi ngo yaje kujya iwabo mu Murenge wa Nyabimata atashye ubukwe, ahahurira n’umuvandimwe we witwa Ngayabahiga Joel (bombi ba nyina baravukana) aba ari we umwemerera ko azabafasha. Harerimana we yaje kwinjira muri iyi dosiye kuko ari we wari ubatwaye ubwo bari mu mugambi wo kwambuka umupaka.

Babiri bafatanywe na Kizito bemeye kuba icyitso ku cyaha cyo kwambuka no kwambutsa binyuranyije n’amategeko

Ibi yabigarutseho mu “Ikiganiro [ku burangare] bw’ Umuryango w’Abibumbye muri Jenoside yakorewe Abatutsi mu Rwanda mu 1994”, cyahuje abayobozi mu nzego z’u Rwanda n’Umuryango w’Abibumbye, abashakashatsi kuri Jenoside yakorewe Abatutsi, abanditsi b’ibitabo n’abandi bantu b’inararibonye bagerageje kuburira umuryango mpuzamahanga kuri Jenoside yarimo kubera mu Rwanda mu 1994.

Minisitiri w’Ububanyi n’Amahanga w’u Rwanda, Vincent Biruta, yavuze ko ibiganiro nk’ibi ari “Umwanya wo kwibuka ibyemezo bikomeye byafashwe n’Umuryango w’Abibumbye, kandi bikagira uruhare mu byabereye mu Rwanda mu gihe cya Jenoside yakorewe Abatutsi mu 1994”.

Umuryango w’Abibumbye wateye umugongo u Rwanda uzi ikigiye kubaho

Ubwo Jenoside yakorewe Abatutsi mu 1994 yari gutegurwa mu buryo bugaragarira amaso, ndetse n’urugamba rwa FPR rwo kubohora igihugu rurimbanyije, mu gihe Leta ya Perezida Juvénal Habyarimana yari yananiwe kubahiriza amasezerano ya Arusha, Loni yafashe icyemezo cyo kohereza umutwe w’ingabo mu Rwanda, UNAMIR, zahageze habura amezi atandatu kugira ngo Jenoside yakorewe Abatutsi itangire gushyirwa mu bikorwa, ziza ari ingabo 2 548.

Izi ngabo ariko zari agatonyanga mu nyanja ugereranyije n’uburemere bw’ikibazo zari zije guhangana nacyo, kuko uretse kuba zaraje zitinze, zari na nke cyane kuko zikigera mu Rwanda, Gen Roméo Dallaire wari uziyoboye, yabonye amakuru yizewe aturutse muri bamwe mu bari bagize Leta ya Habyarimana, bamuhamirije rwose ko mu minsi micye iri mbere bazatangira gusohoza umugambi wo gutsemba Abatutsi burundu, ndetse ko ibikorwa byo kuwutegura biri kugana ku musozo.

Aya makuru ateye ubwoba yatumye Gen Dallaire ahinda umushyitsi, kuko yabonye neza ko ingabo yari yitwaje ntacyo zari bumare mu bibazo uruhuri byari mu gihugu. Ibi byatumye atangira gushaka icyakorwa mu maguru mashya, abanza gutanga ayo makuru ku Biro Bikuru by’Umuryango w’Abibumbye biri i New York, ndetse anasaba ko ingabo za UNAMIR zakongerwa nibura zikagera ku 5 000.

Icyo gihe, Umunyamabanga Mukuru wa UN yari Umunyamisiri Boutros Boutros-Ghali, wari uherutse kohereza Umunya-Cameroon Jacques-Roger Booh-Booh mu Rwanda nk’Intumwa ye Yihariye, yagombaga kumugezaho amakuru na za raporo z’ibiri kubera mu Rwanda, ndese na Gen Dallaire niwe yanyuzagaho ubutumwa bumugenewe.

N’ubwo mu maso ya Dallaire ibibazo byari mu Rwanda byari uruhuri, kuri Booh-Booh nta gikuba cyari bwacike, kuko uyu mugabo atigeze ashishikazwa no kumenyesha Boutros-Ghali uko ibintu byari bimeze mu Rwanda binyuze muri za raporo yagombaga kumuha, ahubwo yakoreshaga umwanya we mu gusangira agahiye na Perezida Habyarimana, nk’uko byagenze kuri Pasika yo muri Mata 1994.

Uku kutabona raporo z’ibyaberaga mu Rwanda, n’ubwo byari mu makuru hirya no hino ku Isi, byatangaje cyane abarimo Karel Kovanda, wari uhagarariye Repubulika ya Tchèque muri Loni , akaba yari n’umutumirwa muri iki kiganiro, wavuze ko yatunguwe cyane n’uburyo ibyaberaga mu Rwanda bitagaragaraga muri raporo Booh-Booh yakabaye yaroherereje Boutros-Ghali.

Yagize ati “Icyankoze ku mutima cyane, ni uruhare rw’Ubunyamabanga Bukuru bwa Loni mu byaberaga mu Rwanda, ntabwo byahawe agaciro byari bikwiye”.

Yongeyeho ko iyo “Booh-Booh aba yarakoze akazi ke neza, akandika raporo zigaragariza Umunyamabanga Mukuru wa Loni uko ibintu byari bimeze mu Rwanda, byarashobokaga ko hari icyari bukorwe. Njyewe ntabwo izo raporo nazibonye, byari kuba byiza iyo Boutros-Ghali aza kugira amakuru aruta ayo yari azi k’u Rwanda”.

Ingabo zari mu butumwa bwa UNAMIR zatereranye Abanyarwanda mu 1994

Loni yacitsemo ibice kubera u Rwanda

Bimaze kugaragara ko ibiri kubera mu Rwanda ari Jenoside yarimo gukorerwa Abatutsi, ibihugu byacitsemo ibice, bimwe bishyigikiye umwanzuro wo kohereza mu Rwanda ingabo zunganira izari zisanzwe muri UNAMIR, ibindi, byiganjemo ibikomeye, bigahakana uwo mwanzuro.

Ubwo indege ya Perezida Habyarimana yari imaze kuraswa, muri iryo joro ryo kuwa 6 Mata 1994, Gen Dallaire yandikiye Ibiro Bikuru bya Loni asaba kongererwa ingabo, nk’uko byagaragaye muri raporo yo 1999 y’Umuryango Mpuzamahanga Ushinzwe Kurengera Uburenganzira bwa Muntu, Human Right Watch.

Kugira ngo ibi bigerweho, byasabaga ko ibihugu byitanga bikohereza ingabo mu Rwanda, ndetse ibihugu 68 byatoreye uwo mwanzuro, icyakora bine byonyine byo muri Afurika, nibyo byemeye kohereza ingabo mu Rwanda.

Uretse ingabo zabuze, ikibazo cy’ibikoresho nacyo cyabaye ingorabahizi, kuko ibihugu byari bifite ubushobozi bwo gutanga uwo musanzu, nka Amerika, u Bufaransa, u Bwongereza n’u Bubiligi, bitari bishyigikiye uwo mwanzuro. Ibihugu bya Afurika byari byiyemeje gutanga ingabo zongera umubare w’iziri muri UNAMIR, ntibyari bifite ibikoresho n’intwaro zihagije.

Ibi byatumye icyifuzo cya Gen Dallaire giterwa utwatsi, maze hatorwa umwanzuro wa 902 wagabanyije umubare w’ingabo zari mu butumwa bwa UNAMIR, zikagera kuri 270 zivuye kuri 2 548.

Kovanda wakurikiranaga iby’iyo kinamico yose yavuze ko rimwe Medeleine Albright wari uhagarariye Amerika muri Loni mu 1994, yigeze kurakara bikomeye bitewe n’uko abandi ba ambasaderi bamusabaga kugira inama igihugu cye yo gutanga ubufasha mu gucyemura ibibazo byari mu Rwanda, maze akadukira bagenzi ashaka kubafata mu mashingu, agatabarwa na Kofi Annan wari hafi aho, wahise akumira icyashoboraga kuba imirwano y’akataraboneka hagati y’abambasaderi muri Loni.

Karel Kovanda wari uhagarariye Repubulika ya Tchèque mu Muryango w’Abibumbye yagerageje kuvuganira u Rwanda

Amerika yifuzaga ibidashoboka mu Rwanda

Muri uko kutumvikana kose, uruhande rwa Amerika rwavugaga ko kohereza izindi ngabo mu Rwanda bidakenewe, ahubwo ko byaba byiza “Hashyizweho agace karinzwe cyane kandi kataberamo imirwano, ku buryo kahungiramo abari mu kaga”.

Iki cyifuzo ariko cyamaganywe na General Dallaire, wavugaga ko “Abatutsi bahigwaga batabona uko bagera muri ako gace kuko bari kwicirwa mu nzira baganayo”, bityo ko hakwiye gufatwa umwanzuro wo gucyemura ikibazo cy’umutekano mucye mu gihugu hose, aho kwibanda ku gice kimwe.

Ku rundi ruhande, Perezida Bill Clinton wari uyoboye Amerika muri icyo gihe, yari amaze kuvana ingabo z’icyo gihugu muri Somalia nyuma yo guseberayo bikomeye, ubwo imirambo y’abasirikare 18 ba Amerika yazengurutswaga n’inyeshyamba mu mujyi rwagati nyuma yo kwicwa yanashinyaguriwe.

Ibi byatumye uyu muyobozi yirengagiza ibyaberaga mu Rwanda n’ubwo yari abizi neza, yirinda kohereza ingabo ze zitari zakamenya neza iby’intambara zo muri Afurika, yirinda ko zakongera guseba nk’uko byari byagenze muri Somalia. Aya makuru Gen Dallaire yayahawe na bamwe mu bahoze muri Leta ya Clinton, ubwo yababazaga impamvu Amerika yatereranye u Rwanda mu bihe bikomeye bya Jenoside yakorewe Abatutsi.

Kovanda yavuze ko uyu mwanzuro wo kugabanya ingabo za UNAMIR mu Rwanda “Ari ryo kosa rikomeye ryakozwe n’Akanama Gashinzwe Umutekano mu Muryango w’Abibumbye”.

Kuri Gen Dallaire wari wabuze amajyo n’amazi nyuma yo kugabanyirizwa ingabo, yavuze ko “Impamvu ibihugu bitatabaye u Rwanda mu bihe rwari rubikeneye atari uko byari bibuze ibikoresho n’uburyo bwo gufasha mu guhangana n’ibi bibazo, ahubwo icyabuze ni ubushake bwa politiki”.

Yongeyeho ko kubura ubu bushake bwa politiki byasobanurwa n’uko mu 1992 kugera mu 1993, Loni yari ufite ingabo mu butumwa bw’amahoro muri Cambodia, UNTAC, ndetse ikanagira izindi mu cyahoze ari Yugoslavia, UNPROFOR, yewe no kuwa 11 Werurwe 1994, Umunyamabanga Mukuru wa Loni , yari aherutse gusaba ko ingabo ziri mu butumwa bwa UNPROFOR zongererwa amazi 12 ku gihe zagombaga kumara, ndetse n’umubare wazo ukongerwaho izindi 8 500, mu rwego “Kongerera UNPROFOR amahirwe yo kugera ku nshingano zayo”.

Ambasaderi w’u Rwanda mu Muryango w’Abibumbye, ari nawe wari wateguye ibi biganiro, Velentine Rugwabiza, yavuze ko “Ibi byerekana uburyo Umuryango w’Abibumbye wafashe ubuzima bw’Abanyarwanda nk’ubudafite agaciro ugereranyije n’ubw’abandi”.

Gen Roméo Antonius Dallaire yagerageje gutabariza u Rwanda asaba ko ubutumwa bwa UNAMIR bwongererwa ingabo ariko ntibyakorwa

Ntacyo amahanga yigiye k’u Rwanda

Jenoside yakorewe Abatutsi mu Rwanda mu 1994 yabaye hashize imyaka 45 Umuryango w’Abibumbye utoye umwanzuro wa 260 wateganyaga ko nta yindi Jenoside ikwiye kongera kubaho, ndetse ko ikwiye gufatwa nk’icyaha ndengakamere, n’abayigizemo uruhare bose bakabiryozwa mu buryo bw’intangarugero.

Kuba nyuma y’imyaka 45 Jenoside yarabaye kandi amahanga akanga gutabara u Rwanda “Ntabwo ari uko atari afite amakuru y’ibyarimo kubera mu Rwanda, ahubwo byatewe n’ubushake bucye bwa politiki”, nk’uko byemejwe na Minisitiri w’Ubutabera mu Rwanda, Johnson Busingye. Ibi kandi “Byari ugutsindwa gukomeye k’Umuryango w’Abibumbye mu nshingano ufite zo kubahisha ikiremwa muntu”, nk’uko byavuzwe na Linda Melvern, umwanditsi akaba n’umushakashatsi kuri Jenoside yakorewe Abatutsi mu Rwanda.

Ku bwa Gen Henry Kwame Anyidoho wari Umuyobozi Wungirije wa UNAMIR mu gihe cya Jenoside yakorewe Abatutsi mu Rwanda, igiteye impungenge kurushaho ni uko nta kigaragaza ko hagize ahandi hantu haba Jenoside ku rwego rw’Isi, cyane cyane muri Afurika, Umuryango w’Abibumbye utiteguye kuba watabara ukayikumira.

Yagize ati “Nkurikije uko mbona ibintu, nshingiye no ku bunararibonye bwanjye, biragaragara Umuryango w’Abibumbye utiteguye gutabara mu gihe hari indi Jenoside yakongera kubaho ahandi ku Isi”.

Ibi abishingira ku musaruro utangwa n’ubutumwa bwo kugarura amahoro mu bihugu nka Repubulika Iharanira Demokarasi ya Congo, MONUSCO, bumaze igihe kinini cyane ariko n’ubundi ntibukumire intambara zirimo n’izihuza amoko, zikunzwe kwibasira icyo gihugu.

Yananenze uburyo Umuryango wa Afurika Yunze Ubumwem AU, udafata iya mbere mu gukemura ibibazo bijyanye n’umutekano mucye mu bihugu nka Libya, Somalia, Sudan n’ibindi bitandukanye muri Afurika.

Gusa Umujyanama Wihariye mu Ishami ry’Umuryango w’Abibumbye Rishinzwe Kurwanya Jenoside, UNSG, Alice Wairimu Nderitu, yavuze ko ibi bigoye kuko Ishami akoramo rishinzwe gukumira ko icyaha cya Jenoside cyakongera kubaho, ati “Jenoside yongeye kubaho ku Isi byaba ari igisebo gikomeye ku kiremwa muntu muri rusange”.

Gen Henry Kwame Anyidoho wari Umuyobozi Wungirije wa UNAMIR mu gihe cya Jenoside yakorewe Abatutsi mu Rwanda

Loni ikwiye guhagurukira abahakana Jenoside yakorewe Abatutsi mu Rwanda

Kuwa 29 Mata mu 1994, mu cyumba kiberamo inama z’Umuryango w’Abibumbye, habereye inama rukokoma yari igamije kurebera hamwe izina rikwiye guhabwa ibikorwa byarimo kubera mu Rwanda, bishingiye ku makuru yari ahari icyo gihe.

Muri iyo nama, ni bwo bwa mbere hagaragaye abantu bahakana Jenoside yakorewe Abatutsi, ndetse nyuma y’imyaka 27, hari ibihugu byanze kwemera inyito ya Jenoside yakorewe Abatutsi, kandi iryo hakana ari bumwe mu buryo bwo kuyitiza umurindi, kuko “Uko duha rugari abayigizemo uruhare ari nako barushaho gukwirakwiza ihakana ryayo”, nk’uko byatangajwe n’umushakashatsi Linda Melvern.

Ibi ni byo Minisitiri Busingye yahereyeho asaba Umuryango w’Abibumbye, wamaze kwemera inyito ya Jenoside yakorewe Abatutsi, gufatira ingamba zikomeye abayihakana batangiye kuba benshi, nk’uko byakozwe ku bahakana Jenoside yakorewe Abayahudi.

Kuri iyi ngingo, Umushinjacyaha Mukuru w’Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha (IRMCT), Dr Serge Brammertz, kuri ubu uri mu Rwanda mu mirimo ya nyuma yo gutegura raporo azageza ku Kanama k’Umutekano k’Umuryango w’Abibumbye, yavuze ko ingingo yo guhakana Jenoside yakorewe Abatutsi ari kimwe mu byo azagaragaza k’inzitizi ikomeye mu gushakira ubutabera abayirokotse ndetse no gukumira ko itazongera kubaho ku Isi.

Yavuze ko “Biteye impungenge kuba hari ba ruharwa batandatu (bagize uruhare rufatika mu itegurwa n’ishyirwa mu bikorwa bya Jenoside yakorewe Abatutsi) bataraboneka kandi bari mu bihugu bitandukanye”.

Ubushinjabyaha bw’u Rwanda nabwo bumaze gutanga impapuro zo guta muri yombi abantu 1 146 bagize uruhare muri Jenoside yakorewe Abatutsi bari mu bihugu 33 ku Isi, kandi “Bamwe bari mu bihugu bizwi, ndetse n’aho bari harazwi neza, ariko ubushake bwo kubafata ntabuhari”.

Minisitiri Busingye yavuze ko “Ibihugu barimo bikwiye kubafata bikabohereza mu Rwanda, cyangwa se bikababuranisha byifashishije ubutabera bwabyo”.

U Rwanda rurasaba LONI guhagurukira abahakana Jenoside yakorewe Abatutsi mu 1994

Perezida Kagame yarahiriye kutazareberera mu gihe jenoside iri kuba ahandi ku Isi

Kuwa 18 Nyakanga mu 1994, Perezida Paul Kagame wari Visi Perezida akaba na Minisitiri w’Ingabo icyo gihe, nyuma yo kwitegereza ingaruka zikomeye Jenoside yagize k’u Rwanda, yarahiriye ‘kuzakora ibishoboka byose mu bushobozi bwe’ agakumira ko hari ahandi hantu ku Isi hashobora kuzabaho indi jenoside.

Gen Dallaire wamenye iby’iyo ndahiro, yemeza ko Perezida Kagame ari gukora ibyo yiyemeje muri icyo gihe, kuko u Rwanda ari urwa gatatu ku Isi n’ingabo 6 322, mu bihugu bifite ingabo nyinshi ziri mu butumwa bwa Loni bwo kugarura amahoro ku Isi, aho rukurikira Bangladesh na Ethiopia.

Uyu mugabo yavuze ko “Ibi byerekana ubushake bw’u Rwanda bwo gukumira ibyaha no kugarura amahoro ku Isi, kandi aho ingabo z’u Rwanda ziri hose zitanga umusaruro uri ku rwego rwo hejuru ugereranyije n’ibindi bihugu”.

Ambasaderi Rugwabiza yavuze ko n’ubwo ibyabaye mu Rwanda biteye agahinda, ariko ibyo igihugu kimaze kugeraho byerekana ubushobozi bwa muntu bwo kwiyubaka na nyuma yo gusenyuka mu buryo bukomeye.

Perezida Kagame yiyemeje kuzakora uko ashoboye akarwanya ko hari ahandi ku Isi habaho jenoside

Ibi Minisitiri Gatabazi yabisabye ubuyobozi bw’Umujyi wa Kigali kuwa 28 Mata 2021, mu rugendo yagiriye mu bice bitandukanye by’umujyi wa Kigali harimo n’Umurenge wa Nduba mu Karere ka Gasabo urimo iki kimoteri.

Uru rugendo rwakurikiwe n’ibiganiro yagiranye n’inzego z’ibanze harebwa uko imitangire ya serivisi ihagaze mu turere, imikoranire hagati y’inzego z’ibanze n’abaturage na gahunda yo kurwanya ruswa n’akarengane mu baturage .

Ubusanzwe iki kimoteri cyahoze mu Karere ka Kicukiro ariko kiza kwimurirwa i Nduba hatabayeho inyigo .

Minisitiri Gatabazi yavuze ko Umujyi wa Kigali mu gihe cy’ukwezi wakora inyigo ku buryo imyanda iri muri icyo kimoteri yatunganywa ikaba yabyazwamo ifumbire.

Yavuze ko Umujyi wa Kigali wasabwe gukangurira abaturage no kubasobanurira ko bakwiye kuzana imyanda mu buryo bushobora kurengera ibidukikije.

Ati “Icya mbere batubwiye ko hari ubushakashatsi bwakozwe, bakoze n’inyigo. Twabahaye igihe cy’ukwezi kugira ngo iyo nyigo babe bayizanye bayiganireho. Hanyuma tunabasaba kwiga uburyo iyo myanda yavamo ifumbire igakoreshwa mu baturage . Twabahaye igihe cy’ukwezi kugira ngo batugaragarize ibyo bagiye guhindura.”

Minisitiri Gatabazi yavuze ko mu gukomeza kurengera ibidukikije, abaturage basabwe kujya bajyanayo imyanda bavanguye.

Ati “Twasanze mu buryo bakusanya imyanda bayizana itavanguye ahubwo bakayitaba gusa, yaba amashashi, amacupa. Ni ukuvuga ngo bari kuzana imyanda bakayimena bakayirunda hariya , mu gihe kiri imbere bishobora gutera ingorane. Twasabye ko bakora ubukangurambaga mu baturage no kubasobanurira ko bakwiye kuzana imyanda ivanguye, n’abayivana mu baturage ikaza ivanguye.”

Ikimoteri cya Nduba kimenwamo imyanda irenga toni 500 buri munsi. Kiri ku buso bwa hegitare 24,42 mu gihe biteganyijwe ko kizagurwa kikangana na hegitare 54, kikabyazwa umusaruro imyanda imenwa igakorwamo ifumbire.

Hatanzwe ukwezi ngo hagaragazwe inyigo y’uburyo imyanda yo mu kimoteri cya Nduba yatunganywa ikabyazwa umusaruro

Abarangije amasomo Iwawa biyemeje kuba umusemburo w’impinduka nziza mu iterambere ariko basaba ko bahabwa ibikoresho byabafasha guhangana ku isoko ry’umurimo bashyira mu bikorwa imyuga bize irimo ubwubatsi, ububaji, ubuhinzi, ubworozi n’ubudozi.

Rukundo Janvier umwe mu bagaruwe kugororera kuri iki kirwa cya Iwawa ku nshuro ya kabiri, avuga ko atazasubira mu buzererezi kubera umwuga yigishijwe.

Ati “Navuye hano muri 2019 ariko mu gutaha ntabwo nagiye ngo ndeke ibiyobyabwenge burundu kuko nasanze abo twasangiraga twakomeje kugendana no kuganira birangira n’ubundi nongeye kubisubiramo ariko ubu nkurikije ubumenyi nkuye hano nzagenda negere bagenzi banjye bavuye hano bari mu makoperative mpite ntangira gukora ibyo nize ’’.

Umunyamabanga wa leta muri Ministeri y’ubutegetsi bw’igihugu ushinzwe imibereho myiza y’abaturage, Nyirarukundo Ignatienne yasabye uru urubyiruko kwishyira hamwe mu makoperative, kugira ngo baterwe inkunga.

Ati’’Ku bijyanye n’ibikoresho byo twifuje ko bajya mu mirimo noneho ibikoresho bikaza nyuma. Kwinjira mu basanzwe kugira ngo yigire mu murimo,yigire aho abandi bakora ariko n’uzashaka gukora ku giti cye nawe azabifashwamo’.

Umunyamabanga wa Leta muri Minisiteri y’urubyiruko n’umuco, Bamporiki Edouard yavuze ko umuco nyarwanda utemera ubuzererezi, asaba urubyiruko kumenya kugira amahitamo meza.

Ati “Ubundi kugira ngo aba bana bakomeze ubuzima badasubiye inyuma ndetse n’abandi basigaye aho baturutse ntibakomeze inzira yo kuyoba, ni umurimo rukomatanyo ntabwo ari umurimo w’abana. Ni inshingano ikomeye cyane ya twebwe abarezi, ababyeyi.”

“Ntabwo twakagize abana b’inzererezi kuko urebye mu mateka y’u Rwanda kubagira ni igitutsi, hazereraga umunyamahanga ariko uw’u Rwanda yarerwaga na buri mukuru uhari’’.

Biteganyijwe ko kuri uyu wa kane aribwo uru rubyiruko rutangira gusubira mu miryango yabo, bakazava kuri iki kirwa cy’Iwawa babisikana n’abandi basaga 1,600 bazakirwa kugira ngo batangire kugororwa.

Uru rubyiruko rusaga 1600 rwasoje amasomo y’igororamuco ni icyiciro cya 21, mu gihe abarenga ibihumbi 25 aribo bamaze kugororwa kuva ikigo cya Iwawa cyatangira.

Urubyiruko 1636 barangije amasomo mu myuga itandukanye

Bahize kubyaza umusaruro ibyo bize

Umunyamabanga wa Leta muri Minisiteri y’urubyiruko n’umuco, Bamporiki Edouard yavuze ko umuco nyarwanda utemera ubuzererezi, asaba urubyiruko kumenya kugira amahitamo meza.

Umunyamabanga wa leta muri Ministeri y’ubutegetsi bw’igihugu ushinzwe imibereho myiza y’abaturage, Nyirarukundo Ignatienne yasabye uru urubyiruko kwishyira hamwe mu makoperative, kugira ngo baterwe inkunga

Akanyamuneza kari kose ku barangije amasomo

Umunyamabanga wa leta muri Ministeri y’ubutegetsi bw’igihugu ushinzwe imibereho myiza y’abaturage, Nyirarukundo Ignatienne

Byabaye ahagana saa saba n’igice z’amanywa kuri uyu wa Kane mu mudugudu wa Bisizi, akagari ka Rukoko umurenge wa Rubavu ubwo nyakwigendera yajyanaga n’umugore we gucukura itaka mu kirombe, yageramo kikamugwaho.

Nyiranzoga Chantal mushiki wa nyakwigendera yagize ati “Yaje aje gucukura umucanga noneho ikirombe kimuridukiraho umugore we ahamagara abashumba bagerageza kumukurura biranga kuko hahise hamanuka itaka ryinshi. Hano hakunze gupfira abantu ariko bakaboneka sinzi impamvu we akomeje kubura kuko bagerageje cyane ariko itaka ryabaye ryinshi’’.

Nyuma y’uko abaturage bagerageje kumushakisha akabura, umunyamabanga Nshingwabikorwa w’umurenge wa Rubavu,Tuyisenge Anninciata yavuze ko kuri uyu wa Gatanu barakomeza gushakisha uwo mugabo.

Ati ‘ Turihanganisha umuryango we ariko munadufasha kuko biriya mushaka ntabwo biruta ubuzima bwanyu. Mubanze mwikunde kuko ibyo mushaka ntabwo bibaruta. Umugisha twagize ni uko umugore n’abana ntacyo babaye ariko mujye munaduha amakuru mbere tubikumire’’.

Iki kirombe Barihenda yaguyemo kimaze kugwamo abaturage benshi bo mu mirenge ya Cyanzarwe na Rubavu kubera gushakisha itaka rizwi nk’ibicangarayi riteye nka kaburimbo rikunzwe cyane muri aka gace mu bwubatsi.

Abaturage bagerageje gushakisha umurambo wa nyakwigendera ariko bakomeza kuwubura

Iki kirombo gisanzwe gicukurwamo itaka rizwi nk’ibicangarayi rikoreshwa mu bwubatsi

Abaturage basabwe kugaruka kuri uyu wa Gatanu bagakomeza gushakisha umurambo

Umukuru w’Igihugu yakiriye Minisitiri Tariq Ahmad mu Biro bye muri Village Urugwiro kuri uyu wa Kane, tariki ya 29 Mata 2021.

Ibiro bya Perezida Kagame bibinyujije ku rukuta rwa Twitter byanditse ko Umukuru w’Igihugu yakiriye Minisitiri Tariq Ahmad ariko ntihasobanuwe birambuye ibikubiye mu biganiro bagiranye.

Earlier today, President Kagame received Lord Ahmad of Wimbledon @tariqahmadbt , UK Minister for the Commonwealth who is in Rwanda to discuss CHOGM2021 ongoing preparations. pic.twitter.com/YxVIx5z6HM

— Presidency | Rwanda (@UrugwiroVillage) April 29, 2021

Minisitiri Tariq Ahmad ari mu ruzinduko rw’iminsi ibiri mu Rwanda hagamijwe kureba aho imyiteguro yo kwakira CHOGM [The Commonwealth Heads of Government Meeting] ihuza Abakuru b’Ibihugu bikoresha Ururimi rw’Icyongereza igeze.

Minisitiri Tariq Ahmad yabwiye itangazamakuru ko u Bwongereza bwishimira aho u Rwanda rugeze rutegura inama ya CHOGM.

CHOGM nirangira, u Bwongereza buzaha ubuyobozi u Rwanda, umwanya ruzamaraho imyaka ibiri bitewe n’uko iyi nama iba buri myaka ibiri kandi ubuyobozi bugasigarana igihugu cyayakiriye.

U Bwongereza bwo bwamaze imyaka itatu kuri uyu mwanya kubera icyorezo cya Covid-19 cyatumye inama yari kuba mu 2020 yimurirwa mu 2021.

U Bwongereza bwafashije u Rwanda mu bikorwa bitandukanye kuva mu 2005, ndetse kubera umubano mwiza ibihugu byombi bifitanye, Minisitiri Ahmad yavuze ko igihugu cye cyiteguye gukomeza gufasha u Rwanda mu bikorwa bigana ku iterambere, cyane cyane mu kubaka ubukungu buhamye nyuma y’uko rushegeshwe na Jenoside yakorewe Abatutsi mu 1994.

CHOGM iba nyuma ya buri myaka ibiri, yagombaga kubera mu Rwanda ku wa 22–27 Kamena 2020 ariko iza gusubikwa ku mpamvu z’icyorezo cya COVID-19, cyahagaritse inama n’ibindi bikorwa bikomeye.

Nyuma yo gusuzuma imiterere ya COVID-19, Ubunyamabanga Bukuru bwa Commonwealth, bwanzuye ko iyi nama izaba mu Cyumweru cya tariki 21 Kamena 2021.

Perezida Kagame yakiriye Minisitiri w’u Bwongereza ushinzwe Commonwealth, Tariq Ahmad, uri mu Rwanda mu rugendo rugamije kureba aho imyiteguro y’Inama ya CHOGM igeze

Amafoto: Village Urugwiro

Iyi nzu yayihawe kuri uyu wa Kane tariki ya 29 Mata 2021, yubatswe mu Mudugudu wa Gakunyu mu Kagari ka Ndatemwa mu Murenge Kiziguro.

Uyu musaza yahawe inzu irimo ibikoresho byose birimo intebe, ibitanda, matela n’ibindi. Yahawe kandi inka yenda kubyara ndetse n’ubutaka bungana n’igice cya hegitari cyo guhingaho ubwatsi, kigega cy’amazi n’umushumba mu rwego rwo kumufasha gusaza neza.

Iyi nzu n’ibindi bikorwa byose bikaba byaratwaye arenga miliyoni 16 z’amafaranga y’u Rwanda bikorwa n’Akarere ka Gatsibo ku bufatanye n’Ingabo z’u Rwanda zari zihagarariwe n’Umuyobozi ushinzwe guhuza ibikorwa bya Gisirikare n’abaturage, Lt Col Vincent Mugisha.

Nyagashotsi mu ijambo rye, yavuze ko yishimiye gukurwa mu buzima bubi yabagamo, ashimira Umukuru w’Igihugu wumvise ubusabe bwe akamugabira inka, akanamuha n’inzu.

Ati “Aragahorana amahirwe n’amahoro, aragahorana intsinzi. Mumubwire ko nishimye cyane kandi ko yongeye kunyoroza nkuko nahoranye inka kera. Ubu ngiye kunywa amata nkomeze kubaho neza.”

Umuyobozi w’Akarere ka Gatsibo, Gasana Richard, yavuze ko ubundi kubakira abatishoboye biri mu nshingano z’ubuyobozi bw’inzego z’ibanze.

Yavuze ko uyu musaza ari we wisabiye Umukuru w’Igihugu kumwubakira inzu, nyuma ngo babisabwe barayimwubakira, banamugabira inka yenda kubyara kugira ngo akomeze kunywa amata.

Ati “Ibikorwa nk’ibi biduha isomo ryo gukomeza umugambi mwiza wo gufasha abatishoboye nk’abayobozi kugira ngo tujye tubikora abaturage batagombye kubisaba. Uyu ni umukoro dusigaranye aho tugomba kujya tubikora nta wugombye kutubwiriza.”

Meya Gasana yavuze ko inzu yonyine yatwaye asaga miliyoni icyenda ubaze kugura ikibanza no kuyubaka, hajyaho ibigega, ikiraro cy’inka, inka, ubutaka, ibikoresho byo mu nzu, umurasire n’ibindi bigera kuri miliyoni 16 Frw.

Nyagashotsi Epimaque ni umusaza warwanye Intambara ya Kabiri y’Isi, aho yakuwe mu Rwanda ari kumwe n’abandi basore bakajyanwa muri Kenya kujya kurwanya ingabo za Hitler. Nyuma yo kuvayo yagarutse mu Rwanda afite umudali ndetse n’amafaranga yahembwe n’Abongereza yarwaniraga.

Yagarutse mu Rwanda akora mu bucukuzi bw’amabuye y’agaciro abureka ahunga mu 1960 ubwo Abatutsi batangiraga kwicwa mu Rwanda. Icyo gihe yahungiye muri Uganda aho ari mu bagize uruhare mu itangizwa ry’Umutwe w’Inyenzi wagiye ugaba udutero shuma tugamije guhangana n’abari babirukanye mu Rwanda.

Uyu musaza yagarutse mu Rwanda mu 1994 afite akanyamuneza ko kongera kugaruka mu gihugu cye yari amaze imyaka 34 atageramo.

Nyagashotsi avuga ko ubu yishimiye kuba mu gihugu kitarangwamo amoko.

Mu byatumye aramba harimo kunywa amata, akunda kurya ibishyimbo, ibijumba, imyumbati ndetse n’umutsima w’amasaka.

Umuyobozi w’Akarere ka Gatsibo, Gasana Richard, aganira na Nyagashotsi nyuma yo kumushyikiriza inzu ye

Nyagashotsi Epimaque warwanye Intambara ya Kabiri y’Isi yashyikirijwe inzu yahawe na Perezida Kagame

Nyagashotsi Epimaque w’imyaka 101 yarwanye Intambara ya Kabiri y’Isi

Inzu yubakiwe uyu musaza

Nyagashotsi Epimaque yanagabiwe inka n’Umukuru w’Igihugu

Abantu benshi babasha kubona inyoni n’ibisiga by’amabara atandukanye biguruka hirya no hino bakifuza kubimenyaho byinshi cyangwa ntibabyiteho ariko burya inyoni n’ibisiga tubona hirya no hino hari ibintu byinshi biba bitandukaniyeho harimo: ibibiranga, ibibitunga, uburyo byororoka, ibibibangamira n’ibindi.

Bumwe mu bwoko bw’inyoni bushobora kugutangaza cyane ni African Jacana. Iyi nyoni yitiriwe Yesu kubera uburyo ibasha kugenda hejuru y’amazi kandi ntirigite nk’uko Yesu yabigenje. Ni imwe mu nyoni ziboneka ahantu henshi mu Rwanda ahari amazi gusa nko mu bishanga, mu bizenga, ku biyaga n’ahandi.

  Ibiranga African Jacana

African Jacana ni inyoni iba mu mazi ikaba ifite ijosi ryereruka, umunwa wayo ujya gusa n’ubururu, inyuma ku ijosi harirabura. Amababa yayo ajya gusa n’ikigina naho ku nda hajya gusa n’umukara.

Iyi nyoni igira amaguru maremare kandi ikagira n’amajanja maremare cyane ayifasha kugenda hejuru y’amazi. Ingabo n’ingore zose zirasa uretse ko ingore ikunda kuba nini kuruta ingabo.

Muri rusange ingabo ishobora gupima garama 137 naho ingore igapima garama 260. Uburebure bw’iyi nyoni buri hagati ya santimetero 23 na 31.

Inyoni ya African Jacana izwi nka “Jesus Bird”, itungwa no kurya udusimba duto, iminyorogoto, ibinyamunjonjorerwa, ibitagangurirwa kandi rimwe na rimwe ibasha kurya imbuto.

  African Jacana, inyoni zororoka bidasanzwe

Uburyo bwo kororoka bw’iyi nyoni butandukanye n’ubw’izindi kuko ubusanzwe tuzi ko haba ku bantu no ku bindi biremwa igitsina-gore ni cyo gifata iya mbere mu kwita ku bana cyangwa ku mishwi ariko kuri yo ho biratandukanye cyane kuko usanga akazi kenshi gakorwa n’ingabo.

Ingabo yarika icyari kuri mabunga (igice cy’urufunzo kiba cyaracitse ku bindi kikajya kirirwa gitembera mu mazi bitewe n’aho umuyaga ucyerekeje), gusa ariko ntabwo buri gihe ingore itera mu cyari. Iyo kubaka icyari birangiye ingore itangira gutera amagi.

Aho gutera amagi iyo hamaze kuboneka ingore itera amagi ane ariko iyo bigeze ku rya gatatu ingabo itangira kurarira. Amagi ararirwa hagati y’iminsi 20-26 akabona guturagwa.

Iyo mu kirere hari ubushyuhe usanga ingabo itwikira amagi aho kuyararira. Icyo gihe kandi iba ishobora kwimura amagi ikayajyana mu kindi cyari binyuze mu kuyatwara mu mababa.

Africana Jacana iyo ingore imaze gutera amagi irigendera kandi ibikurikiraho ntibiyireba; ahubwo iragenda igasanga indi ngabo nayo ikayiterera amagi yarangiza ikongera ikagenda gutyo gutyo.

Iyi nyoni y’ingabo yo iyo imaze guturaga imishwi ikomeza kubana na se hagati y’iminsi 40- 70. Muri icyo gihe ntabwo ingabo iba igaburira iyo mishwi ahubwo irayiherekeza yo ubwayo ikishakira ibiyitunga.

Muri iki gihe kandi iyo ingabo igize icyo ibona, yumva cyangwa yikanga iburira iyo mishwi bityo ikabasha kwihisha niba bishoboka kandi byaba bidashoboka igacubira mu mazi kugeza ubwo ibintu byongera kugenda neza.

Muri iki gihe nabwo kandi ingabo ishobora gutwara udushwi mu mababa yayo nk’uko itwara amagi iyo bibaye ngombwa.

  Ibibangamira African Jacana

Ingabo ya African Jacana nubwo ikora uko ishoboye kose kugira ngo ahantu hari amagi yayo cyangwa imishwi habe harinzwe bikomeye ariko inzoka ziba mu mazi, ibisiga n’izindi nyoni bizobereye mu guhiga bibasha kurya amagi yayo.

Iyi nyandiko ngufi igaruka ku miterere y’inyoni yitiriwe “Yesu” yanditswe na Nzabonimpa Jean Baptiste.

Nzabonimpa ni umukozi ufite ubunararibonye kandi wahawe amahugurwa y’ubukerarugendo ku rwego rw’igihugu ndetse no ku rwego mpuzamahanga. Amashuri yisumbuye yayarangirije muri G. S. St Joseph-Kabgayi (2009) mu Ishami ry’Indimi n’Ubuvanganzo, nyuma akomereza muri Kaminuza y’u Rwanda, Ishami ry’Uburezi (2011-2014) mu Ishami ry’Indimi n’Uburezi.

Kuva 2016 ni bwo yinjiye mu bukerarugendo nyuma yo guhabwa amahugurwa atandukanye.

Inyoni yitiriwe “Yesu” ifite imiterere idasanzwe iri mu ziboneka no mu Rwanda

Ibi Umukuru w’Igihugu yabigarutseho kuri uyu wa 29 Mata 2021 mu ijambo yagejeje ku bitabiriye ikiganiro ku kuvugurura uko ubuhinzi bukorwa muri Afurika n’uko uyu mugabane wakwihaza mu biribwa.

Cyateguwe na Banki Nyafurika Itsura Amajyambere ku bufatanye n’Ikigega Mpuzamahanga cyita ku Buhinzi (IFAD) ndetse n’Ihuriro ry’Ubushakashatsi mu by’ubuhinzi muri Afurika, FARA.

Uretse Perezida Kagame iki kiganiro cyanitabiriwe n’abandi Bakuru b’Ibihugu batandukanye barimo Edgar Lungu wa Zambia Sahle-Work Zewde wa Ethiopia, Bah Ndaw uyoboye Mali mu nzibacyuho na Nana Akufo-Addo wa Ghana.

Cyitabiriwe n’Umuyobozi wa Banki Nyafurika Itsura Amajyambere, Akinwumi Adesina na Tony Blair wabaye Minisitiri w’Intebe w’u Bwongereza.

Iki kiganiro kibaye mu gihe hirya no hino ku Mugabane wa Afurika hakigaragara ikibazo mu bijyanye no kwihaza mu biribwa ahanini biturutse ku buryo butanoze umurimo w’ubuhinzi ukorwamo kuri uyu mugabane.

Imibare ya Banki Nyafurika Itsura Amajyambere igaragaza ko 70% by’abaturage ba Afurika batabasha kubona indyo iboneye nyamara wihariye 60% by’ubutaka bushobora guhingwa mu Isi yose.

Perezida Kagame yagaragaje ko intandaro y’uko kutabasha kwihaza mu biribwa kw’abatuye Afurika biterwa n’impamvu zitandukanye zirimo umusaruro muke mu buhinzi, inzitizi zikiri mu buhahirane n’imihindagurikire y’ikirere n’ibindi.

Ati “Urwego rw’bijyanye n’ibyo kurya muri Afurika rurajegajega bitewe n’umusaruro muke n’inzitizi mu buhahirane ndetse ihindagurika ry’ibihe riri gutuma ikibazo kirushaho gukomera, uko kugwa kwimvura bigenda guhindagurika n’ikibazo cy’ubutayu kikarushaho kuba kibi ndetse birumvikana ko icyorezo cya COVID-19 ari umutwaro waje wiyongeraho, tugihanganye nawo.”

Yakomeje avuga ko igisubizo kuri iki kibazo ari ukuvugurura uburyo ubuhinzi bukorwa muri Afurika.

Ati “Ku rundi ruhande, ibisubizo kuri ibi bibazo birazwi kandi biri mu bushobozi bwacu. Kuvugurura uburyo ubuhinzi bukorwa muri Afurika birihutirwa. Nta n’umwe ushobora kwihaza binyuze mu buhinzi gakondo. Ubuhinzi bugamije ubucuruzi bushobora kuba inzira yo kugera ku burumbuke ku miryango y’Abanyafurika.”

“Mbere na mbere, dukeneye kuzamura ubushobozi bwacu mu bijyanye n’ubushakashatsi. Birashaboka ko ubuhinzi ari wo murimo wa muntu mu by’ubukungu ukuze, ariko uburyo bwo kubona ibiribwa bugezweho bushingira kuri siyansi n’ikoranabuhanga, kimwe na telefone zigezweho twese dukoresha.”

Perezida Kagame yavuze ko hakenewe kongerwa imbaraga mu bufatanye kugira ngo Afurika ibashe kugera ku dushya tuyifasha kubona umusaruro w’ibiribwa wisumbuyeho, ku giciro gito kandi hatangijwe ibidukikije. Yavuze ko u Rwanda ruri muri uru rugendo rufatanyije n’ibigo bitandukanye byo mu karere, abafatanyabikorwa mu iterambere n’abikorera.

Urubyiruko rukwiye kumvishwa ko ubuhinzi ari akazi keza

Muri iki kiganiro, Perezida Kagame yagaragaje ko ubuhahirane buri mu bizafasha Afurika kwihaza mu biribwa, ashimangira ko Isoko Rusange rya Afurika (AfCFTA) ari intambwe ishimishije iganisha kuri uru rugendo yatewe.

Ati “Icya kabiri, dukeneye kurushaho guhahirana hagati yacu. Isoko Rusange rya Afurika (AfCFTA) ryagura amahirwe y’ibigo by’ubucuruzi bushingiye ku buhinzi byo muri Afurika kugera kuri byinshi bishoboka. Mu gihe kinini, umugabane wacu wagiye ukura hanze ibyo kurya dufitiye ubushobozi bwo kwibonera , kubera inzitizi ziri mu buhahirane bw’imbere n’ibindi.”

“Icya gatatu, dukeneye kumvisha urubyiruko rwacu ko ubucuruzi bushingiye ku buhinzi ari umwuga mwiza. Mu Rwanda n’ahandi hose muri Afurika, twatewe akanyabugabo no kubona umubare w’urubyiruko rurangiza amashuri rukiyegurira ubuhinzi wiyongera kandi rukabikuramo amafaranga menshi. Kugira ngo ibi bikomeze birasaba uruhare rw’abayobozi mu nzego zitandukanye ndetse no koroherezwa kugera kuri serivisi z’imari n’ubwishingizi.”

Perezida Kagame yavuze ko guharanira ko habaho ubufatanye bwa Afurika binyuze mu biganiro nk’ibi no gushora imari mu rwego rw’ubuhinzi biri mu bizatuma ubukungu bushingiye ku buhinzi buba umusingi w’iterambere ry’uyu mugabane.

Perezida w’u Rwanda, Paul Kagame, yagaragaje umusaruro muke, inzitizi mu buhahirane, ihindagurika ry’ibihe n’icyorezo cya COVID-19 nk’itandaro y’ikibazo cyo kutihaza mu biribwa ku batuye Umugabane wa Afurika

Iteka rya Minisitiri w’Intebe ryerekeye inkunga y’ubwisungane mu kwivuza riteganya ko ibigo by’itumanaho mu Rwanda bizajya bitanga 2,5% by’amafaranga byinjiza buri mwaka mu gihe cy’imyaka ibiri naho ku mwaka wa gatatu bigatanga 3%.

Muri iyo gahunda, MTN Rwanda yashyikirije RSSB inkunga yayo mu mwaka wa Mutuelle de Santé wa 2020 ingana na 3.790.595.500 Frw agamije kongerera ingufu iyi gahunda.

Visi Perezida ushinzwe Afurika y’Iburasirazuba n’Amajyepfo muri MTN, Yoland Cuba, yavuze ko bishimiye gutera inkunga abanyarwanda kandi ko ari igikorwa kigamije kubungabunga ubuzima bw’abenegihugu.

Ati “Turifuza ko abanyarwanda bose bagira icyo bungukira ku kuba MTN ikorera hano mu Rwanda. Kuri twe kandi iki ni ikintu kiduha agaciro cyane ndetse twifuza gukorana byinshi na RSSB, cyane ko buri wese akwiye kungukira ku bikorwa by’umuyoboro nka MTN.”

Yakomeje agira ati “Guverinoma y’u Rwanda yasabye ko twajya dutanga ku byo twinjiza rero ni ikintu dushyigikiye twivuye inyuma kandi turasaba uwo ari we wese ufite ibikorwa by’iterambere kugira uruhare muri iki gikorwa.”

Umuyobozi Mukuru wa RSSB, Regis Rugemanshuro, yavuze ko ayo mafaranga agiye gutanga umusanzu mu bikorwa by’ubuvuzi kandi bishimangira uruhare rukomeye MTN igira muri gahunda za Leta.

Ati “Bigaragaza umurava mu kugira uruhare mu iterambere no guteza imbere imibereho myiza. Uyu munsi rero twashyikirijwe amafaranga arenga miliyari 3,7 Frw agiye kudufasha mu bikorwa by’ubuvuzi by’umwihariko mu bwisungane mu kwivuza. Turashimira MTN ko idushyikirije ayo mafaranga agiye gutanga umusanzu muri serivisi z’ubuvuzi, dusanzwe dukorana na MTN kandi twishimira iteka umurava wabo.”

Uretse ibigo by’itumanaho mu Rwanda birebwa n’itegeko rigena ahakomoka amafaranga yunganira gahunda y’ubwisungane mu kwivuza, 10% by’amafaranga Polisi yinjiza nk’amande ku makosa yo mu muhanda na 50% by’ayinjira ku gikorwa cyo gusuzuma ubuziranenge bw’ibinyabiziga bizwi nka Controle technique.

Inkunga ya MTN igamije guteza imbere ibikorwa bya Mutuelle de Santé

Visi Perezida ushinzwe Afurika y’Iburasirazuba n’Amajyepfo muri MTN, Yoland Cuba, ashyikiriza ubuyobozi bwa RSSB sheki y’inkunga

Umuyobozi mukuru wa RSSB, Regis Rugemanshuro, yavuze ko aya mafaranga agiye kongera imbaraga muri serivisi z’ubuzima

MTN yashimiwe umusanzu wayo mu guteza imbere imibereho myiza y’abanyarwanda