Tag: featured

Ni inama by’umwihariko igamije kwiga ku buryo ibihugu bya Afurika byakwigobotora ingaruka z’icyorezo ya Covid-19, ikazaba tariki 18 Gicurasi.

Jeune Afrique yatangaje ko by’umwihariko iyo nama iziga ku buryo ibihugu bya Afurika byafashwa guhabwa umwihariko ku bufasha butangwa n’Ikigega Mpuzamahanga cy’Imari (FMI), uburyo byakurirwaho amadeni, gushyiraho umurongo mushya ugamije guteza imbere ubukungu bwa Afurika n’ibindi.

Abenshi mu bakuru b’ibihugu bazitabira iyo nama biganjemo abasinye ku nyandiko ihamagarira ibihugu n’imiryango itandukanye ku Isi, gufasha Afurika guhangana n’icyorezo cya Coronavirus n’ingaruka zacyo, mu rwego rwo kuzahura ubukungu n’imibereho myiza byanegekanye guhera mu 2020. Iyo nyandiko yanyujijwe mu binyamakuru birimo Jeune Afrique na Financial Times tariki 15 Mata 2020.

Abakuru b’ibihugu Jeune Afrique yatangaje ko bazaba bari i Paris harimo Félix Tshisekedi, Alassane Ouattara, Macky Sall, Muhammadu Buhari, Paul Kagame, Roch Marc Christian Kaboré, Bah N’Daw, Nana Akufo-Addo, Cyril Ramaphosa, João Lourenço, Faure Essozimna Gnassingbé, Filipe Nyusi, Sahle-Work Zewde, Abdallah Hamdok, Kaïs Saïed na Mohamed Ould Ghazouani.

Abo bakuru b’ibihugu bazagirana umusangiro na Perezida Macron tariki 17 Gicurasi, habura umunsi umwe ngo inama ibe. Ntabwo haratangazwa uzaba ahagarariye Tchad muri iyi nama nyuma y’urupfu rutunguranye rwa Idriss Deby wasimbuwe n’umuhungu we uyoboye inzibacyuho, icyakora Jeune Afrique yatangaje ko atari Mahamat Idriss Déby uzitabira.

Mu bandi bazitabira inama y’i Paris harimo abahagarariye imiryango itandukanye ku mugabane wa Afurika nka Moussa Faki Mahamat uyoboye Komisiyo y’Umuryango wa Afurika Yunze Ubumwe na Perezida wa Banki Nyafurika itsura Amajyambere (BAD), Akinwumi Adesina.

Ku mugabane w’u Burayi, abayobozi bazaba bitabiriye harimo ba Minisitiri b’Intebe nka Pedro Sánchez wa Espagne, Mario Draghi (u Butaliyani) na António Costa (Portugal) ndetse na Perezida w’Akanama ka Komisiyo y’Ubumwe bw’u Burayi Charles Michel hamwe na Perezida wa Komisiyo y’Ubumwe bw’u Burayi Ursula Von der Leyen.

Hari abandi bayobozi bazakurikirana iyo nama hifashishijwe ikoranabuhanga nka Chancelière w’u Budage, Angela Merkel; Perezida wa Kenya Uhuru Kenyatta, abahagarariye Leta Zunze Ubumwe za Amerika n’u Buyapani.

Mu gitondo cyo kuwa 18 Gicurasi, Perezida Macron azagirana ibiganiro n’abakuru b’ibihugu bya Afurika bamaze igihe badahura nka João Lourenço wa Angola, Filipe Nyusi wa Mozambique na Cyril Ramaphosa wa Afurika y’Epfo.

Mu kiganiro na Ramaphosa byitezwe ko bazanaganira ku ruzinduko ateganya muri cyo gihugu mu mpera za Gicurasi, azakomereza mu Rwanda.

Mu kiganiro azagirana na Nyusi, byitezwe ko bazaganira ku bibazo by’umutekano muke umaze iminsi uterwa n’imitwe yitwaje intwaro mu Majyaruguru ya Mozambique.

Byitezwe ko kandi muri iyo nama tariki 17 Gicurasi, hazaba inama yiga ku bibazo bya Sudani ahazaba hari na Minisitiri w’Intebe Abdallah Hamdok ku buryo igihugu cyasohoka mu nzibacyuho cyinjiyemo nyuma y’ihirikwa rya Omar al-Bashir.

Perezida Kagame arateganya kugirira uruzinduko mu Bufaransa aho azahura na Perezida Emmanuel Macron

Mu bigo byinshi bafatwa nk’inkorabusa, abakoresha bakabagenera umushahara w’intica ntikize ariko bakabasaba buri munsi guhora basa neza, bamwenyura nubwo inzara yaba ibatema amara.

Izi ngorane bahura nazo nizo zatumye mu 1991 hashyirwaho umunsi mpuzamahanga wabahariwe uba buri wa Gatatu w’icyumweru cya kabiri cya Gicurasi buri mwaka.

Watangijwe na Jennifer Alexander agamije guha agaciro abakora uyu murimo no kuwutandukanya n’abawitiranya n’abanyamabanga b’ibigo basanzwe .

Umurimo nk’uyu ntiwahozeho kera, ahubwo wadutse nyuma y’intambara ya kabiri y’Isi yose. Icyo gihe wasangaga abagore aribo benshi bawukora, kuko bafatwaga nk’abanyantege nke, abakwiriye kwirirwa bitaba telefone, bandika amabaruwa, bandika za emails, buzuza amadosiye adasaba gutekereza cyane n’indi mirimo nk’iyo ifatwa nk’idakanganye.

Ibigo byinshi mu kurushaho gutanga serivisi nziza bishyiraho aba bakozi kugira ngo ababagana bahabwe serivisi bakeneye.

Turayisenga Jean Baptiste, amaze imyaka itandatu yakira abagana Cogebanque. Mu gihe mu bigo byinshi usanga abakora aka kazi ari abakobwa, we ni umugabo kandi abikora abikunze.

Ati “Kuba umu– réceptionnistes ugomba kubikunda, kwakira neza abantu ari ibintu bikuri mu maraso kuko ntaho ugiye kubyiga mu ishuri. Icyo ukwiye gukora ni ukwakira neza abakugana ndetse ukiyungura ubumenyi ku kigo ukorera, ku buryo uje akugana ubona ibisobanuro umuha. Iyo ubuze icyo umubwira nibwo bavuga ko abakora aka kazi ari abaswa.”

Abakora aka kazi, ijoro n’amanywa bahora bashaka icyatuma ibigo bakorera bigira isura nziza mu maso y’ababigana. Ni yo mpamvu baba bagomba guhora basa neza kandi bamwenyura.

Turayisenga yavuze ko aba– réceptionnistes bakora akazi kenshi ariko hamwe na hamwe usanga agaciro kabo karenzwa ingohe.

Ati “Umuntu wakira abantu niwe uba uri mu muryango, abantu bose binjira mu kigo ni wowe bacaho uraho kugira ngo hatagira uza ngo akubure, ukagerageza kwiyitaho ndetse no kugira urugwiro kugira ngo serivisi yawe ibe nziza.”

“Ariko igitangaje usanga ba bantu aribo bahawe umushahara muke mu bigo bakorera, ntawe ujya wita kukubaha amahugurwa nk’abandi bakozi ugasanga barafatwa nk’abantu bo hasi mu kigo kandi nyamara aribo batanga ikaze.”

Yakomeje avuga ko haba abakoresha ndetse na leta muri rusange bakwiye gufatanyiriza hamwe mu kongerera agaciro abakora akazi ko kwakira abantu.

Ati “Bigendanye na gahunda ya leta njye nifuza ko hajyaho nk’ihuriro riza guhuza bariya bantu bakora kariya kazi kugira ngo babashe kugira ubuvugizi bakorerwa bajye babasha guhabwa ibikwiye kugira ngo bakore akazi kabo neza.”

“Icya mbere ni uguhabwa amahugurwa, icya kabiri nubwo abikora nk’akazi ariko ntiyakabaye wa muntu uri ku rwego rwo hasi, ku buryo abasha kubona ibikoresho byo kwiyitaho.”

Hari n’abarangwa n’imyitwarire mibi

Twagarutse ku mirimo myiza abakora akazi ko kwakira abantu bakora ariko burya si bose bafite ubunyamwuga, nta munsi mubi urenze kuba uwakaguhaye serivisi ariwe uyikwimye.

Hari ubwo ujya kwaka serivisi ku kigo runaka wahagera ukibaza uwo uhasanze niba hari ikibazo musanzwe mufitanye bikakuyobera.

Imico mibi yijujutirwa na benshi harimo guhugira kuri telefoni bakima amaso uje abagana, ndetse n’abarangwa n’umunabi no kuvuga amagambo mabi ku buryo uwahageze atifuza kuzahagaruka.

Turayisenga yakebuye abarangwa n’imyitwarire nk’iyo abibutsa ko agaciro bashaka kazava mu bikorwa bakora.

Ati “Nasabaga bagenzi banjye kurangwa n’ubunyamwuga bagakunda akazi bakora, bakakira ababagana neza ha handi wita ku masezerano wahaye umukiliya ukazayubahiriza.”

“Iki kandi bya bibazo uhura nabyo bigaragaze kugira ngo abayobozi bawe babashe kubikemura. Kandi igikuru gikwiriye mwihanganire abakiliya bafite imico itandukanye, narakara wowe witware neza.”

Nk’umugabo ukora aka kazi yavuze ko abantu bakwiriye kwikuramo imitekerereze y’uko abakobwa b’uburanga aribo bakwiye gukora aka kazi.

Ati “ Umuntu uje akugana ntaje kureba isura yawe cyangwa igitsina cyawe, ikimugenza ni serivisi nziza, yimuhe azagenda yanyuzwe.”

Serivisi zitanoze ni kimwe mu bihombya ibigo byinshi ku buryo bishiduka abantu babicitseho. Hari inyigo yakorewe muri Leta Zunze Ubumwe za Amerika yagaragaje ko Sosiyete zo muri iki gihugu zihomba miliyari 41$ buri mwaka kubera serivisi zitanoze. Ni mu gihe muri iki gihugu, nibura 70,1% by’abasaba serivisi mu bigo bitandukanye, bagaragaza ko batazihabwa neza.

Abakora akazi ko kwakira abantu, nibo baba bafite urufunguzo rugaragaza uko ikigo cyakirwa mu maso ya rubanda

Yabitangaje mu biganiro yagiranye n’Umunyamabanga Mukuru wa FPR Inkotanyi, François Ngarambe, byibanze ku mubano hagati y’ibihugu byombi; n’ubufatanye bwa FPR n’ishyaka rya ZANU-PF riri ku butegetsi muri Zimbabwe.

Ni ibiganiro byabereye ku cyicaro gikuru cya FPR i Rusororo kuri kuri uyu wa 12 Gicurasi 2021, aho abo bombi bavuze ku mibanire y’amashyaka ari ku butegetsi mu bihugu byombi ndetse bagashima ibyiza amaze kugeraho birimo no gushyira hamwe hashyigikirwa ubumwe bwa Afurika.

Ambasaderi Munyeruke yafashe umwanya wo gushimira Perezida Paul Kagame ari na we Chairman wa FPR -Inkotanyi, wagize uruhare mu kuvuganira Zimbabwe ngo yoroherezwe ibihano yari yarafatiwe n’amahanga.

Yagize ati “Nasabwe kugeza amashimwe y’abayobozi b’ishyaka ryanjye ku Muyobozi wa FPR, Perezida Kagame ku bw’ubuvugizi yakomeje gukora ngo ibihano Zimbabwe yafatiwe n’amahanga byoroshywe”.

Nyuma y’uko Perezida Emmerson Mnangagwa agiriye ku butegetsi muri Zimbabwe, Perezida Kagame ni umwe mu bavuganiye icyo gihugu ngo gikurirweho ibihano bitandukanye cyari cyaragiye gifatirwa ku buyobozi bwa Robert Mugabe washinjwaga kuyoboza igitugu no guhonyora amahame ya demokarasi.

Yavuze ko imibanire y’ibihugu byombi imaze kugera ku rwego rwiza, agira ati “nzakora iyo bwabaga mu gihe cyose ndi ahangaha” mu kurushaho kongera ubufatanye.

Yakomeje ati “Kuba amashyaka yacu abiri ashyigikiwe n’urubyiruko uhereye mu mizi biduha imbaraga zo gukomeza gukorera ibyiza abaturage bacu.”

Ambasaderi Munyeruke yihanganishije Abanyarwanda ndetse avuga ko yifatanyije nabo muri ibi bihe byo kwibuka Jenoside yakorewe Abatutsi; aboneraho gushima aho Igihugu kigeze cyiyubaka nyuma y’imyaka 27 ishize.

François Ngarambe yagaragaje ko amashyaka ya FPR na ZANU-PF afite byinshi ahuriyeho cyane ko yombi yaharaniye ukwibohora ndetse akaba atsimbarara ku gushyigikira iterambere rya Afurika.

Yakomeje avuga ko hagiye gutezwa imbere imikoranire mu by’ubucuruzi hagati y’ibihugu byombi n’ubufatanye hagati y’ayo mashyaka.

Ati “Binyuze mu mibanire mikoranire y’amashyaka, hari byinshi twakora tukarushaho kunoza umubano w’ibihugu byombi mu nyungu z’abaturage. Turashaka kubona ubucuruzi duhuriyeho bwiyongera ndetse n’izindi nzego z’imikoranire.”

Ngarambe yasezeranyije Ambasaderi Munyeruke ko u Rwanda ruzamushyigikira mu mikorere ye mu gushyira mu bikorwa ibikubiye mu masezerano y’ubufatanye.

Ambasaderi wa Zimbabwe mu Rwanda,Prof Charity Munyeruke (iburyo) n’Umunyamabanga Mukuru wa FPR Inkotanyi,François Ngarambe (ibumoso) bagiranye ibiganiro kuri uyu wa 12 Gicurasi 2021

Iyi nzu yubatswe ku kigo nderabuzima cya Gitoki yujujwe mu mpera z’umwaka ushize itwaye asaga miliyoni 54 Frw ku bufatanye bw’Akarere ka Gatsibo n’umufatanyabikorwa, World vision.

Ababyeyi bo mu Murenge wa Gitoki baganiriye na IGIHE, bavuze ko bari baracitse ku kubyarira kwa muganga bitewe na serivisi mbi bahaboneraga iyo bajyaga kubyara.

Bahuriza ku kuba barabyarizwaga ahantu hato hatari ibikoresho bihagije ndetse ngo ntihanatangaga kwisanzura guhagije ku mubyeyi wabyaye bitewe n’uko buri gitanda baryamishwagaho ari babiri abandi bakaryamishwa hasi.

Mukansengiyumva Béata uturuka mu Kagari ka Cyamusheshe mu Mudugudu wa Kigabiro, avuga ko inshuro eshatu yabyariye kuri iki kigo nderabuzima iyo yamaraga kubyara yaryamishwaga ku gitanda kimwe n’undi mubyeyi bigatuma atisanzura ariko ngo ubu aryamaho ari umwe.

Ati “ Mbere ntabwo umuntu yabonaga ubwisanzure none ubu kuryama ntabwo umuntu abyigana n’undi mu gihe mbere badushyiraga ku gitanda turi babiri, warahageraga ugasanga hari umubyigano wamara no kubyara mugasangira igitanda ariko ubu ni mu bwisanzure.”

Mukandayisenga Judith uturuka mu Kagari ka Nyamirama we yavuze ko afite akanyamuneza ku kuntu yakiriwe aje kubyara bitandukanye na mbere.

Ati “ Nakiriwe neza bitandukanye na mbere uko nakiriwe, mbyaye umwana wa kabiri, ubwa mbere hari akavuyo abaganga ntibakwiteho neza ndetse rimwe na rimwe wamara kubyara ukaba wanaryamishwa hasi ariko ubu hari ibitanda byinshi, umutekano ni wose, amazi ari hafi, urukarabiro ruri hafi n’ibindi nkenerwa byose.”

Umuyobozi w’Ikigo Nderabuzima cya Gitoki, Uwimbabazi Febronie avuga ko mbere nta nyubako zihagije bari bafite zikurikiranirwamo umugore n’umwana ku buryo nta bwisanzure bari bafite.

Ati “ Nyuma rero ubuyobozi bw’Akarere ku bufatanye na World Vision badufashije kutwubakira iyi nyubako nziza cyane, hari aho umubyeyi tumwakirira, hari aho ahererwa ikiganiro, hari aho ategerereza kubyara, hari aho abyarira heza ndetse nyuma yo kubyara hari n’aho aruhukira heza.”

Yavuze ko iyo umubyeyi amaze kubyara hari ahantu ashobora no kubonereza urubyaro atarinze kujya gusigasira na nyuma yo kubyara iyo agarutse hari ahantu bakurikiranirwa umunsi ku munsi kugeza umwana akuze.

Ati “ Ubundi twakiraga ababyeyi bake abenshi bakabyarira mu rugo, mu mezi atatu y’umwaka ushize twari dufite abantu 14 babyariye mu rugo ariko ubu baragabanutse cyane ubu abahabyarira biba byaturutse ku mpamvu nke nabwo ugasanga babyaye baza kwa muganga.”

Uwimbabazi yavuze ko kuva babona iyi nzu ibyarizwamo hari n’abandi babyeyi baturuka mu yindi Mirenge bakaza kubyarira ku kigo nderabuzima cya Gitoki nyamara mbere abenshi barahahungaga.

Yavuze ko iyo umwana avutse ananiwe umuganga abona ahantu amuhera serivisi nziza yisanzuye kuburyo umubyeyi wese uhabyariye nabo babizi neza ko bahabwa serivisi nziza.

Kuri ubu ikigo nderabuzima cya Gitoki cyakira abaturage basaga ibihumbi 27 batuye mu Murenge wa Gitoki ndetse no mu bindi bice biwegereye, nibura buri kwezi baba biteze kwakira ababyeyi 66 barimo ababyara n’abapimisha abana.

Inzu ibyarizwamo ababyeyi ku kigo nderabuzima cya Gitoki yuzuye itwaye asaga miliyoni 54 Frw

Kuri ubu hari ibitanda byinshi biryamishwaho abagiye kubyara n’abamaze kubyara

Umushinga wo kubaka ibyumba by’amashuri bishya watangiye muri Kamena 2020, aho byari biteganyijwe ko hazubakwa ibisaga 22.505 n’ubwiherero 31.932 mu Gihugu hose.

Mu kubyubaka, hagiye humvikana aho ibikorwa byadindiye mu duce tumwe na tumwe biturutse ku kutuzuza neza inshingano kwa bamwe mu bayobozi, ahandi bigaterwa na ruswa zaranzwe mu mitangire y’amasoko, mu gihe hari n’aho bimwe mu bikoresho byagiye birigiswa. Ibyo byose byatezaga Leta igihombo.

RIB yatangaje ko ku wa 10 na 11 Gicurasi 2021 yataye muri yombi abagera ku 10 bagize uruhare mu inyerezwa ry’umutungo wa Leta, bakaba bafungiye kuri Sitasiyo zitandukanye mu turere twa Burera, Gicumbi na Musanze.

Muri Burera hafashwe Umunyamabanga Nshingwabikorwa w’Umurenge wa Cyeru, Kagaba Jean Baptiste, ndetse n’umuyobozi ushizwe Uburezi muri uwo murenge Zirimwabagabo Dieudonné.

Muri Gicumbi hafunzwe umuyobozi w’Urwunge rw’Amashuri rwa Gaseke, Harerimana Theogene n’umuyobozi ushizwe uburezi mu murenge wa Mutete, Butera Emmanuel.

I Musanze hafunzwe Umunyamabanga Nshingwabikorwa w’umurenge wa Nkotsi, Hanyurwabake Theoneste, umuyobozi ushinzwe uburezi muri uwo murenge, Nduwayezu Eleuthere Joyeux, umuyobozi w’ishuri ribanza rya Rugarika Munyakabaya Majugu Xavier, na rwiyemezamirimo witwa Nzabonimpaye François Xavier.

Muri ako karere hanafunzwe Umuyobozi w’ Ishuri Ribanza rya Gataraga, Habyarimana Innocent, na rwiyemezamirimo wahubakishaga witwa Karamaga Thomas.

Abo bose bakurikiranyweho ibyaha birimimo kwaka no kwakira ruswa, gukoresha ububasha bahabwa n’itegeko mu nyungu bwite, ndetse no kunyereza umutungo aho bishyuraga abakozi ba baringa bakananyereza ibikoresho byari byagenewe kubaka ibyumba by’amashuri.

Umuvugizi wa RIB, Dr Murangira B Thierry, yavuze ko urwo rwego rutazihanganira na rimwe abashinzwe gucunga umutungo wa Leta bashaka kuwikenuza no kuwukoresha mu nyungu bwite.

Yakomeje ati “Ntabwo amafaranga Leta ishyira mu bikorwa by’inyungu rusange agomba kwiharirwa n’abantu bamwe, cyangwa abashaka kuyakoresha mu nyungu zabo bwite uko babyumva. Ibikorwa nk’ibyo bigayitse bigomba guhashywa bigacika.”

Yatanze umuburo ko abantu bose bakwirinda ruswa no kunyereza umutungo, cyangwa kwica amategeko nkana yo gutanga amasoko ya Leta kuko bazabiryozwa uko byagenda kose.

Gukoresha ububasha uhabwa n’itegeko mu nyungu bwite bihanwa n’ingingo ya 15 y’Itegeko n°54/2018 ryo ku wa 13 Kanama 2018, ryerekeye kurwanya ruswa.

Ubihamijwe ahanishwa igifungo kitari munsi y’imyaka irindwi ariko kitarengeje imyaka 10,n’amafaranga atari munsi ya 5.000.000 Frw ariko atarenze 10.000.000 frw.

Iyo icyaha cyakozwe hagamijwe inyungu ibarwa mu mafaranga, igihano kiba igifungo kitari munsi y’imyakairindwi ariko kitarenze imyaka 10, n’amafaranga yikubye inshuro kuva kuri eshatu kugeza kuri eshanu z’agaciro k’indonke yatse.

Abafashwe bakoreye ibyaha ku mashuri arimo Ishuri Ribanza rya Kirambo riherereye mu murenge wa Cyeru ho mu karere ka Burera, Urwunge rw’Amashuri rwa Nyakinama ya Mbere ruherereye mu murenge wa Nkotsi no ku Ishuri ribanza rya Gataraga mu murenge wa Busogo muri Musanze.

Magingo aya abamaze bafungiye kuri sitasiyo za RIB zirimo iya Rusarabuye,iya Muhoza,iya Busogo, n’iya Byumba mu gihe dosiye zabo zigikorwa ngo bashyikirizwe ubushinjacyaha zo mu turere rtwavuzwe haruguru.

Amakuru agera kuri IGIHE ni uko hari n’abandi bijanditse mu bikorwa byo kunyereza umungo wa Leta batarafatwa, ariko RIB ikaba ikibakurikirana.

Abafashwe bagiye banyereza ibikoresho n’amafaranga byabaga bigenewe kubaka amashuri

Ni ivuriro rito ryubatse hafi n’umupaka ww’ibihugu byombi ku ruhande rw’u Rwanda, rikazajya rikoreshwa n’abaturage bahatuye bavuga ko bari babangamiwe no kubona serivisi z’Ubuzima.

Niyigena Claude avuga ko basubijwe kuko abaturage batuye muri ako gace bakunze gukoresha imiti baguraga muri Congo kuko akenshi usanga ariho banakorera akazi kabo ka buri munsi.

Ati “Abaturage ba hano bakunze gukorera i Goma, bigatuma babura umwanya wo kwirirwa mu Rwanda ngo bajye kwa muganga. Iyo umuntu yarwaraga kandi ubona kujya kwa muganga bikugora wasabaga uri i Goma kukuzanira imiti, rimwe ikamuvura ubundi ikamuzahaza, ariko ubwo twegerejwe ivuriro, ntituzongera kugorwa no gushaka imiti ivuye muri Congo, ahubwo tuzajya tuza kuri iri vuriro tuvurwe haba ku manywa cyangwa n’ijoro.”

Kweregeza ivuriro abaturage mu mudugudu wa Nyarubande, Ubuyobozi bw’Akarere ka Rubavu buvuga ko biri mu mihigo biyemeje.

Habyarimana Gilbert, Umuyobozi w’Akarere ka Rubavu yavuze ko yizeye ko nta muturage uzongera gutinda kujya kwa muganga cyangwa ngo ajye kugura imiti muri Congo.

Ati “Turizera ko abaturage batazongera kujya mu gihugu cy’abaturanyi kubera ko babuze serivisi y’ubuzima, kandi abakozi bazakora hano nabo turabasaba gutanga serivisi nziza, no kugaragaza ikitagenda bagafashwa, Umuturage agahabwa serivisi nziza.”

Yakomeje avuga ko bimwe mu bizabafasha kugumana izi serivisi bahabwa ari ugufata ibikorwa remezo n’inyubako neza, ariko bikajyana no kwishyura ubwisungane mu kwivuza kugira ngo bajye borohererwa no kwivuza.

Mu karere ka Rubavu mu mwaka w’ingengo y’imari ya 2020/2021 biyemeje kubaka amavuriro mato (postes de sante ) ane n’inzu z’ababyeyi ebyiri bizatwara miliyoni 240 Frw.

Umuyobozi w’akarere ka Rubavu, Habyarimana Gilbert afungura ku mugaragaro iri vuriro

Ivuriro riri ku rubibi ruhuza u Rwanda na RD Congo

Iyi nama ya munani izwi nka (National Security Symposium) iri kwiga ku ngingo ivuga iti “Contemporary Security Challenges: The African Perspective (Ibibazo byugarije Afurika muri iki gihe)”.

Inama iri kubera mu Karere ka Musanze, ikaba iteraniyemo abasirikare bakuru biga mu Ishuri Rikuru rya Gisirikare rya Nyakinama, abarimu bigisha muri Kaminuza n’Impuguke zitandukanye aho bari kwigira hamwe ibibazo bibangamiye umutekano wa Afurika muri ibi bihe harimo n’ibyorezo nka Covid-19.

Atangiza ku mugaragaro iyi nama, Minisitiri w’Ingabo, Maj Gen Murasira yifashishije urugero bw’ibihe isi irimo bya Covid-19, asaba abayitabiriye kurushaho kurangwa n’ubufatanye no guhora biteguye.

Yagize ati “Urebye inama y’ubushize muri 2019, Isi y’icyo gihe itandukanye n’iy’ubu, ibibazo byariyongeye , Covid-19 yerekana ko haba ubuzima, ubukungu, politiki n’ibipimo by’umutekano byagizweho ingaruka. Ibi byerekanye imbaraga zikwiye kuba zishyirwa muri izi ngeri z’ibyiciro, aha birasaba ubufatanye no gushyira hamwe ndetse no guhora twiteguye guhangana n’ibibazo nk’ibi no mu bihe bizaza.”

“Aha twavuga ko ibi bibazo bitwibutsa ko isi by’umwihariko Afurika itahangana nabyo n’ingaruka zabyo hatabayeho ubufatanye bugamije gusenyera umugozi umwe n’intego imwe”.

Minisitiri w’Ubuzima Dr Daniel Ngamije yavuze ko u Rwanda rwiteguye guhangana n’ibindi byorezo bishobora kwibasira Umugabane wa Afurika ariko bidasobanuye ko rwabirandura burundu bityo ko ubufatanye mu gusangira amakuru n’ubumenyi ariyo ntwaro.

Yagize ati “Turiteguye kuko dufite inzego zubatse n’ubwo tutavuga ko ari 100%, ariko navuga ko tudahagaze nabi, gusa birasaba ubufatanye kuko utamenya uko bizaba bisa, hari aho usanga akenshi bisaba gukumira, mwarabibonye ubwo Ebola yibasiraga aka Karere, icyo dukora cy’ibanze ni ugukumira ikwirakwira ryabyo ariko bisaba gufatanya mu mpande zose n’abaturage ndetse no gusangira amakuru n’ubumenyi”.

Maj Nkurunziza uri gukurikirana amasomo mu Ishuri Rikuru rya Gisirikari rya Nyakinama, yavuze ko amasomo abafasha kwitegura guhangana n’ibibazo Afurika ihura nabyo muri ibi bihe ari ingirakamaro kuko nabo bashishikajwe n’iterambere rya Afurika.

Ati ” Amasomo nk’aya turayishimira cyane kuko umutekano ni ikintu kinini kigomba no gushingirwaho mu iterambere, tuyakira neza kandi azadufasha mu gutanga umusanzu wacu nk’abashinzwe umutekano”.

Abasirikari bari guhabwa aya masomo ni 47 bakuru kuva ku ipeti rya Majoro kugeza kuri Coronel. Hitabiriye abo mu Rwanda kuko abanyamahanga uyu mwaka batitabiriye kubera icyorezo cya Covid-19 cyibasiye isi.

Iyi nama yiga ku bibazo bya Afurika muri ibi bihe, izamara iminsi itatu. Izigirwamo uko hakubakwa inzego z’ubuzima busubiza ibibazo by’ibyorezo bishobora kuzibasira Afurika, kuba Afurika iberanye n’ubucuruzi mpuzamahanga nyuma ya Covid-19, kubaka Afurika ishoboye kwivugira, kureba ibibazo biri mu ikoranabuhanga rya Afurika n’uko byakemuka, kwifashisha imbaraga z’urubyiruko mu iterambere rirambye rya Afurika n’Imikoranire y’ibigo bya Afurika mu guharanira amahoro arambye.

Minisitiri Maj Gen Murasira yavuze ko ubufatanye ariwo musingi wo guhangana n’ibibazo by’umutekano muri Afurika

Iyi nama yitabiriwe n’abantu batandukanye bafite aho bahurira n’umutekano muri Afurika

Aba baturage bemeza ko bataramenya ibyiza by’ubwo bwishingizi baremberaga mu ngo, ibyashoboraga no kubakururira impfu mu gihe badafite amafaranga ahagije yo kwivuza.

Umubyeyi w’abana batanu wo mu Kagari ka Kabeza mu Murenge wa Cyuve, Murekatete Angelique, yabwiye IGIHE ko yasobanukiwe byimbitse umumaro wo gutanga umusanzu w’ubwisungane mu kwivuza.

Yagize ati “Kuva mu 2012 sinshobora gukererwa gutanga umusanzu wa Mituweli kuko ndabyibuka ubwo nari ngiye kubyara umwana wa bucura, ni bwo banjyanye ku kigo nderabuzima barananirwa banyohereza ku Bitaro mu Ruhengeri. Nagezeyo barambaga ndetse banyongerera n’amaraso, icyo gihe nahavuye ntanze ibihumbi birenga 300 Frw.’’

Yavuze ko byamugoye ndetse hari ibyo yirengagije kugura kuko yabuze amafaranga kugeza agurishije umurima we n’inka yahakaga.

Ati “Nibaza ukuntu ntanze amafaranga ashobora kuntangira umusanzu w’imyaka 20 numva amakosa ari ayanjye ku buryo n’ubu sinshobora gukererwa na gato.’’

Munyanshoza Jean Pierre wo mu Murenge wa Nyange, yavuze ko usibye serivisi bahabwa biboroheye, umuryango afite adashobora kuwuvuza adakoresheje ubwishingizi.

Yagize ati “Mfite abana 12 urumva ku mwaka simburamo nka bane barwara ubwo se urumva ayo mafaranga ntafite Mituweli nayabona? Ubu iyo hari urwaye anyarukira kuri poste de Santé bakamuvura, akaza atarembeye mu rugo kuko aba avuwe hakiri kare.’’

Gahunda y’ubwisungane mu kwivuza ifatiye runini abatari bake bitewe no kuba igabanya ikiguzi cy’ubuvuzi.

Umuyobozi muri RSSB Ushinzwe Ubukangurambaga no kwandika Abanyamuryango mu Ishami rya Mituweli, Ntigurirwa Deogratias, yabwiye IGIHE ko bifashishije Tour du Rwanda 2021 bashaka gutanga ubutumwa buhamagarira Abanyarwanda kwishyura Mituweli no gutanga umusanzu muri Ejo Heza.

Ati “Nta kigo wabona gihuza Abanyarwanda bose nkuko RSSB ibikora. Usanga Mituweli na Ejo Heza bikenerwa n’Abanyarwanda muri rusange. Aho duca ubona ko abaturage niba babonye RSSB bibuka ko bagomba kwishyura Mituweli no gutanga umusanzu muri Ejo Heza.’’

Imibare igaragaza ko 85.5% bamaze gutanga Mituweli mu gihe habura amezi atagera kuri abiri ngo umwaka urangire.

Ntigurirwa yakomeje ati “Ntabwo turagera aho twifuza kugera, kuko tugomba kuba turi ku 100%.”

Yahamagariye abaturarwanda kurushaho kwitabira gutanga Mituweli, anabasaba gutangira kwishyura iy’umwaka utaha.

Ati “Indwara itera idateguje, ubu abantu bashobora gutangira kwishyura umusanzu w’umwaka wa 2020/2021 ukanda *909# ugakurikiza amabwiriza, kwegera Sacco cyangwa abakozi ba Irembo na MobiCash ku buryo tariki ya 1 Nyakanga zizagera baramaze kwishyura.

 Ejo Heza nayo imaze gushinga imizi

Uretse Mituweli ariko hari n’Ubwizigame bw’igihe kirekire bwa EjoHeza, bwashyiriweho gufasha abaturage guteganyiriza ahazaza.

Munyanshoza Jean Pierre watangiye gukorana na Ejo Heza mu 2019 yagaragaje ko yatangiye kubona umusaruro.

Yagize ati “Ku ruhande rwa Leta bampaye amafaranga ibihumbi 11.250 Frw, ubu maze kugira ubwizigame bw’amafaranga 45.250 Frw, buri uko nizigamiye mbona ubutumwa bugufi kuti telefoni iyo nujuje uruhare rwanjye na Leta ihita ishyiraho urwayo bakampa ubundi butumwa bw’umusanzu wose mba ngejejemo.’’

Uyu muturage w’i Musanze yavuze kwizigamira byahoze ari iby’abakozi ba Leta ariko “ubu nashyizemo umwana wanjye kubera ko nabikunze numvise bifite inyungu, nteganya no gushyiramo n’abandi.”

Itangishaka Theonille na we yagize ati “Ejo heza icyo maze kuyungukiramo; Leta yampaye uruhare rwayo rw’amafaranga 11.500, ndashimira Leta yacu kuko idutekerereza ibyo tutabashije kwitekerereza. Niteguye kuzagobokwa ngeze mu zabukuru kandi ngize n’ibyago natabarwa umuryango wanjye utavunitse kandi ntanga umusanzu wanjye bitangoye, ubu maze imyaka ibiri nizigamira.”

Mujawamariya Spéciose utuye mu Murenge wa Niboye mu Karere ka Kicukiro amaze imyaka itatu yinjiye muri Gahunda ya Ejo Heza kandi yayibonyemo umusaruro.

Ati “Inyungu maze gukuramo ni uko mfite aho niteganyirije, nzi neza ko mu masaziro yanjye ntazasaza nabi, nzasaza neza kuko niteganyirije. Tukimara gukangurirwa EjoHeza, numvise ari ibintu byiza cyane mpita ntangirana nayo, nshyiramo n’umwana wanjye w’imfura.’’

Mujawamariya Spéciose utuye mu Murenge wa Niboye mu Karere ka Kicukiro amaze imyaka itatu yinjiye muri Gahunda ya Ejo Heza

Yavuze ko kuba ari muri Ejo Heza bimuha icyizere ko mu gihe yanakwitaba Imana, abazungura be bahabwa impozamarira.

Ati “Buri wese afite ikigega yisangamo bitagendeye ku kuba akorera Leta kuko n’abayikorera bitabiriye ubwo bwizigame nk’abandi baturage bose.’’

Mujawamariya wasobanukiwe neza akamaro ko kwizigamira anashishikariza abandi kwinjira muri EjoHeza ahereye mu matsinda y’ibimina ayobora.

Umukangurambaga wa Ejo Heza mu Mujyi wa Kigali, Ngoga Emmanuel, yasabye ko buri Munyarwanda yarushaho kwitabira no kwizigamira ibizabafasha mu gihe bageze mu mage.

Ati “Ni amahirwe yashyiriweho Abanyarwanda ngo bizigame bazagire amasaziro meza bageze mu zabukuru. Abanyarwanda bakwiye kugerageza kwizigama kuko ayo mafaranga azaba anunguka. Uwizigamye neza ntaba umutwaro ku muntu wese cyangwa ku gihugu.’’

Kuri ubu abarenga 1.364.057 biyandikishije muri Ejo Heza, abagera ku 1.042.190 barizigama mu gihe amafaranga amaze kuzigamwa asaga miliyari 14 Frw.

Umuyobozi muri RSSB Ushinzwe Ubukangurambaga no kwandika Abanyamuryango mu Ishami rya Mituweli, Ntigurirwa Deogratias, yavuze ko bifashishije Tour du Rwanda 2021 bashaka gutanga ubutumwa buhamagarira Abanyarwanda kwishyura Mituweli

Umukangurambaga wa Ejo Heza mu Mujyi wa Kigali, Ngoga Emmanuel, yavuze ko kwizigamira muri Ejo Heza ari ingenzi kuko bigoboka umuntu mu gihe cy’ibyago

Abayobozi muri RSSB bakurikiranye Tour du Rwanda, banashishikariza abaturarwanda kurushaho kwiteganyiriza bishyura mituweli, banizigamira by’igihe kirekire

Aha ni mu Karere ka Huye, ahasorejwe etape ya kabiri ya Tour du Rwanda 2021. Abayobozi mu nzego zitandukanye muri RSSB basobanuriye abo mu Majyepfo akamaro ka Mituweli n’uburyo bwo kwizigama bw’igihe kirekire bwa Ejo Heza

Yabigarutseho mu kiganiro n’abanyamakuru cyo kuri uyu wa Gatatu tariki 12 Gicurasi 2021, cyasobanuriwemo ibikubiye muri raporo ku mikoreshereze y’umutungo wa leta mu 2019/2020, iherutse kumurikirwa Inteko Ishinga Amategeko, imitwe yombi.

Umugenzuzi Mukuru w’Imari ya Leta yagaragaje ko hari amafaranga angana na miliyari 5,7Frw yasohowe n’inzego cyangwa ibigo bya leta yakoreshejwe ibitari ngombwa, nabi cyangwa agasesagurwa bikaba byanabaho ko anyerezwa.

Aya mafaranga yatikiriye mu ikoreshwa nabi ryayo bikozwe n’ibigo cyangwa inzego akenshi usanga zigaruka muri iyi raporo buri mwaka. N’ubwo bigenda gutya ariko umugenzuzi mukuru w’imari ya leta aba yatanze inama kuri ibi bigo.

Muri raporo igaragaza uko umutungo wakoreshejwe kugeza muri Kamena 2020, byagaragaje ko inama zitangwa n’umugenzuzi w’imari ya leta zitubahirijwe ku kigero cya 47%.

Biraro yavuze ko imbaraga bashyira mu kugaragaza aba ba bihemu batazazigabanya cyangwa ngo bacike intege kuko ibyo bakora ari umwuga wabo babikora nk’abanyamwuga.

Ati “Ntabwo ducika intege, tubikora nk’abanyamwuga, ntabwo tubikora ngo dushimwe cyangwa runaka atubone ahubwo tubikora nk’umwuga cyane ko mubona ko hari ibintu bigenda bihinduka bifata intera nziza.”

Yakomeje agira ati “Icya mbere urwego rw’umugenzuzi mukuru w’imari ya leta ni urwego rw’abanyamwuga kandi turi ku rwego mpuzamahanga, nta cyaduca intege kuko dukora ibyo tugomba gukora. Ni nk’uko ushobora kuvuga ngo urambiwe kubaho, ukeneye kubaho neza imyaka n’imyaka. Ntabwo rero wacika intege, uru ni urwego rw’abanyamwuga kandi tuzahora tubikora neza. Ntabwe uzaduca intege!”

Biraro avuga ko kubahiriza inama ziba zatanzwe n’urwego ayobora abantu bakwiye kuba babifata nk’inshingano kuko ari n’ibintu biteganywa n’itegeko.

Muri rusanga iyi raporo igaragaza ibyavuye mu bugenzuzi bwerekeye imikoreshereze y’umutungo (Financial Audit), ubugenzuzi bw’amahame (Compliance Audit); ubugenzuzi bwimbitse (Performance Audits), ubugenzuzi bwihariye (Special Audits), n’ubugenzuzi ku ikoranabuhanga (IT Audits) bwakozwe kuva mu kwezi kwa Gicurasi 2020 kugeza muri Mata 2021 n’inama zatanzwe.

Umugenzuzi Mukuru w’Imari ya Leta, Obadiah Biraro, yagaragaje ko amafaranga yakoreshejwe nta nyandiko ziyasobanura; ayasohotse inyandiko zidahagije; ayasesaguwe; ayasohotse nta burenganzira n’ayanyerejwe cyangwa yasohotse mu buriganya yagabanutse ku kigero cya 65% ugereranije n’umwaka wa 2019.

Yose hamwe yabaye miliyari 5,7 Frw avuye kuri miliyari miliyari 8,6 Frw mu 2019.

Ku rundi ruhande kandi hari n’amafaranga asaga miliyari 2,4 Frw yagiye anyerezwa cyangwa agasohoka mu buryo bw’uburiganya ndetse aya ngo yagakwiye kuba yaragarujwe ariko byageze muri Kamena 2020, ataragaruzwa.

Biraro yabwiye itangazamakuru ko inzego zihabwa ingengo y’imari ya leta mu buryo bumwe cyangwa ubundi, zigenda zigerageza kuwukoresha neza ugereranyije n’imyaka ishize.

Umugenzuzi Mukuru w’Imari ya Leta, Obadiah Biraro, yatangaje ko urwego ayobora rutazigera rucika intege mu kugenzura imikoreshereze y’umutungo wa leta