Tag: featured

Iyo mpanuka yabereye mu muhanda wa Bremen muri Leta ya Indiana mu Mujyi wa South Bend mu mpera z’icyumweru gishize.

Umupolisi wo muri ako gace, William Redman, yatangaje hari umuntu wafashije abari bakoze impanuka kugira ngo bave mu modoka, gusa ngo uwo muntu ntiyigeze aguma aho impanuka yabereye ngo avugane na Polisi ayihe amakuru y’uko byagenze ngo kuko nyuma yo gufasha yahise agenda.

Muhirwa Olivier wahoze ari umunyamakuru mu Rwanda, ni we wakoze icyo gikorwa kigereranywa n’inkuru yo muri Bibiliya y’Umusamariya mwiza, wafashije umuntu wari waguye mu gico cy’amabandi, akamuvura.

Yabwiye IGIHE ko icyo gihe hari saa 8:48 ku wa Gatandatu w’icyumweru gishize, i Kigali hari mu gicuku nka munani z’urukerera.

Ati “ Njye n’inshuti zanjye ebyiri Rukundo Oreste na Christelle Brune Imfurayacu twari tugiye mu isabukuru y’amavuko y’umwe mu nshuti zacu Clarisse Murebwayire.”

“Tukimara kwinjira mu nzira y’igihogere twabonye umuntu w’uruhu rwera azamura amaboko ahagarika umuhisi n’umugenzi ariko ntitwamenye ibyo ari byo.”

Uwo muntu ngo yahagarikaga abantu bose ariko imodoka zikamucaho zikomereza habe no kumutega amatwi. We na bagenzi be barahageze, barahagarara.

Ati “Nabwiye uwari utwaye ngo ahagarare kuko benshi bihitiraga nk’ibisanzwe. Ahagaze ubwo ni bwo twahise tubona imodoka yarenze umuhanda irimo kwaka, twabanje gushidikanya akanya gato nk’ako guhumbya ariko mpita mbona umwana muto w’imyaka nk’ibiri wari uhagaze iruhande rw’imodoka yari yamaze gufatwa n’inkongi y’umuriro nta gutekereza nahise nirukankira gusanganira uwo muziranenge wari utegereje ibiri bukurikireho.”

Muhirwa yavuze ko ubwo yari amaze kuhagera atereye uwo mwana ku bitugu, bagenzi be nabo bahise bamanuka biruka kugira ngo bamufashe gutabara.

Ati “Nyina na we yari ari hasi yakomeretse urimo ataka, bagenzi banjye navuze nabo baciye ku rundi ruhande barwana no gukuramo akandi kaziranenge gafite nk’amezi atandatu. Kari ku ntebe y’inyuma katangiye kugerwaho n’umwotsi ubona ntacyo kitayeho ndetse no gukurura umugabo wari utwaye wari wafashwe n’imifuka y’imyuka (airbags) .”

Muhirwa yatwaye uwo mwana, amugejeje haruguru asubira inyuma atwara na nyina nubwo byari bigoye kubera isayo ryari rihari.

Ati “Kumurenza umukoki wari wuzuyemo isayo ntibyari byoroshye nubwo byabaye mu kanya nk’ako guhumbya, abandi nabo barwanaga n’ibishashi by’umuriro ari nako barwana no gukura uwari usigaye mu modoka.”

Abajijwe niba mbere yo kujya gutabara aba bantu, we na bagenzi be barabanje kubijyaho inama, yavuze ko nta kintu na kimwe bavuganye usibye kumva ko bakwiriye gukiza amagara.

Ati “ Ibi byose byabaga nta wagishije undi inama kuko icyari gikenewe muri ako kanya cyagaragaraga. Ni Ugukiza ubuzima bw’abantu.”

Nyuma yaho hari abandi bantu babonye ibyo bikorwa by’ubutwari, babiyungaho babafasha gukuramo abantu bose bagihumeka nubwo umwe yari yangiritse amaguru ku buryo bukomeye.

Ati “Nyuma y’iminota nka 20 niyegamije uwo mubyeyi wari wanegekaye abandi nabo barimo kwita ku bandi, Polisi yaje kuza izimya iyo modoka yari yamaze gukongoka maze abandi nabo bajyanwa kwa muganga natwe dukomeza urugendo tugeze aho twari tugiye twihanagura amaraso n’ibindi byari byari byaduhindanyije dukomeza ibirori kandi bigenda neza.”

Muhirwa yavuze ko umuntu wese akwiriye kugira umutima wo gufasha umuntu uri mu kaga atitaye ku kuba baziranye cyangwa bataziranye.

Ati “Burya amagara aryana azirana n’uburyamirane, wirenza ingohe ukwitabaje waba umuzi cyangwa utamuzi.”

Mu 2019 nabwo Muhirwa yigeze gukiza uwari ugiye kwiyahurira ku kiraro ubwo yari yanzwe n’umukunzi we. Ibi byabereye mu Mujyi wa Columbia City muri Leta ya Indiana.

Uwari ugiye kwiyahura yari mu bushorishori ashaka gusimbuka ngo yirohe mu nzira y’igihogere (highway) aho imodoka ziba zigenda ku muvuduko mwinshi, Polisi yahageze yamaze kumumanura.

Muhirwa Olivier yakoreye ibitangazamakuru bitandukanye mu Rwanda birimo IGIHE na Radio Izuba

Uyu muhanda niwo wabereyemo iyo mpanuka

Izi serivisi zongewe mu mavuriro y’ibanze harimo iz’ubuvuzi bw’amaso, amenyo, kubyaza no gukeba zikaba zashyizwe mu mavuriro ya Karambo mu Murenge wa Kiyombe, Ndego mu Murenge wa Karama, Gihengeri mu Murenge wa Mukama ndetse n’irya Nyamirama riherereye mu Murenge wa Karangazi.

Umuyobozi w’Akarere ka Nyagatare wungirije ushinzwe imibereho myiza y’abaturage, Murekatete Juliet, yabwiye IGIHE ko amavuriro y’ibanze yongerewe ubushobozi mu rwego rwo gufasha abaturiye imipaka kubona serivisi nziza batarindiriye kujya kure.

Ati “Hari itsinda ryaturutse ku rwego rw’igihugu ryaje kureba ibibazo abaturiye imipaka baba bafite, basanga harimo n’ikibazo cy’abajya kwivuza hanze twababuza kwambuka bakavuga ko bafite ikibazo cy’amavuriro atabegereye.”

Murekatete yakomeje avuga ko babifashijwemo na Minisiteri y’Ubuzima hubatswe amavuriro y’ibanze yegerejwe abaturage hafi yabo hanongerwamo serivisi zisanzwe zitangirwa ku bigo nderabuzma n’ibitaro.

Ati “Ubu zahise zitangira gukora kuri buri vuriro hariyo umuganga w’amenyo, uw’amaso, umubyaza ku buryo abaturage batangiye kubona izo serivisi ako kanya bitabasabye kujya kure, abaganga barabitaho nibabagane, abajyaga babyarira mu rugo babireke.”

Mu rwego rwo kwegereza abaturage serivisi z’ubuzima, mu Karere ka Nyagatare hamaze kubakwa amavuriro y’ibanze 85 harimo ane yongerewemo serivisi zisanzwe zitangirwa ku bigo nderabuzima n’ibitaro, hagamijwe korohereza abaturage ingendo bakoraga bajya kuzishakira kure y’aho batuye.

Amavuriro y’ibanze yashyizwemo serivisi abaturage bajyaga bajya gushakira ahandi

Abatanga serivisi zitajyaga ziboneka muri aya mavuriro bahise batangira akazi

Umuyobozi w’Akarere ka Nyagatare wungirije ushinzwe imibereho myiza y’abaturage, Murekatete Juliet, yerekwa ibikoresho byashyizwe mu mavuriro y’ibanze

Ibikoresho byajyaga biboneka mu bigo nderabuzima n’ibitaro byashyizwe mu mavuriro y’ibanze

Uwo muyoboro wubatswe mu Kagali ka Kivu ukaba ugeza amazi meza ku baturage basaga 3000 batuye mu ngo zigera ku 187.

Ubwo abo baturage bashyikirizwaga uwo muyoboro w’amazi meza n’amavomo awushamikiyeho, bavuze ko baruhutse kuvoma amazi mabi kandi bagiye guca ukubiri n’umwanda.

Kantarama Vélène ati “Mbere y’uko tubona aya mazi twari tugowe cyane kuko twavomaga amazi y’uruzi rumanuka rw’Akanyaru, nta handi hantu twagiraga amazi no mu bishanga wasangaga ari ukunywa ya mazi agenda yireka hagati mu migende. Mu by’ukuri muri uyu mudugudu wa Kivu twari tubayeho nabi nta mazi meza twagiraga.”

“Byatugiragaho ingaruka zirimo kurwara inzoka, impiswi ugasanga nta n’ubwo dukaraba cyangwa ngo tumese uko bikwiriye ariko ubu ndemeza ko tugiye kugira impinduka ikomeye kubera amazi meza.”

Habiyambere Jean Damascène we yavuze ko kuva yabaho ari bwo abonye amazi meza aho atuye.

Ati “Imyaka nabayeho n’abambanjirije twavomaga umugezi w’Akanyaru, ntabwo twari tuzi ko twabona amazi meza niyo mpamvu nshimira ubuyobozi. Icyo tugiye gukora cya mbere ni ukuyabungabunga no kuyitaho kandi tuyakoresha nk’uko bikwiye kuko tuyabonye tuyakeneye.”

Umuyobozi wungirije ushinzwe imibereho myiza y’abaturage mu Karere ka Nyaruguru, Kayitesi Collette, yavuze ko abo baturage bari bakeneye amazi meza, abasaba kuyafata neza kugira ngo azabagirire akamaro.

Ati “Icyo tubasaba ni ugufata neza ibikorwa remezo biba bibasanze, hari robine, ibigega n’imiyoboro icamo amazi, aho hose tubasaba ko babifata neza bakahagirira isuku.”

Yabasabye kandi kugira isuku muri byose kugira ngo bagire ubuzima bwiza buzira indwara.

Imibare igaragaza ko kugeza ubu mu Karere ka Nyaruguru abaturage bagerwaho n’amazi meza basaga 83%. Muri bo abangana ma 55% bayavoma batarenze metero 500, mu gihe 26.6% bayavoma berenze metero 200.

Mu mihigo y’umwaka wa 2020/2021, Akarere ka Nyaruguru kari kihaye umuhigo wo kugeza amazi meza ku ngo 231, kugeza ubu bamaze kuyageza ku ngo 235.

Bishimira amazi meza bahawe kuko bari bayakeneye

Umuyoboro w’amazi bahawe wubatse mu Kagali ka Kivu ukaba ugeza amazi meza ku baturage basaga 3000 batuye mu ngo zigera ku 187

Umuyobozi wungirije ushinzwe imibereho myiza y’abaturage mu Karere ka Nyaruguru, Kayitesi Collette, yavuze ko abo batutage bari bakeneye amazi meza hafi yabo

[email protected]

Iyi nzu yiswe ‘Rotary House for Cancer Patients’ yatanzweho miliyoni 51 Frw, ifite ubushobozi bwo gucumbikira abarwayi 25, ikaba yashyikirijwe Akarere ka Gasabo kuri uyu wa 28 Gicurasi 2021.

Umuyobozi wa Rotary Club Kigali-Virunga, Jwala Vijay Kumar, yavuze ko batekereje kubaka iyi nzu kuko hari abarwayi ba kanseri bajyaga kwivuriza i Kanombe, bakabura ubushobozi bwo kubona aho bacumbika.

Yagize ati “Ubuvuzi bwa radiotherapy bufata hagati y’ibyumweru bitatu na bitandatu. Hari abazaga badafite aho baguma muri Kigali, badafite ubushobozi bwo kwishyura hotel cyangwa ‘apartment’ ugasanga bari ahantu hadafite isuku bakarwara izindi ndwara.”

“Rero twatekereje ko twabashakira ahantu heza ho kuba kandi hatekanye mu gihe bari gufata ubuvuzi bwa Radiotherapy [gushiririza igice cya kanseri kirwaye].”

Umuyobozi Nshingwabikorwa w’Akarere ka Gasabo, Umwali Pauline, yavuze ko bishimiye cyane iyi nzu bahawe kuko iyari isanzwe ihari yari ishaje ndetse yarangiritse cyane ku buryo nta kintu cyakorerwamo.

Inzu yashyikirijwe Akarere ka Gasabo yavuguruwe ku nkunga ya Rotary Club Kigali-Virunga mu rwego rwo gufasha abarwayi kubona aho bazajya baba mu gihe bari kwivuza kanseri i Kanombe.

Yakomeje ati “Iyi nzu yasaga nabi ishaje, nk’akarere twari tutarabona ubushobozi bwo kuyitunganya ngo ibyazwe umusaruro […] kuba Rotary Club Kigali-Virunga yaratekereje kongera kuyisana kugira ngo izafashe abarwayi ba kanseri ni igikorwa cy’ingenzi cyane, cyadushimishije.”

Umwali yavuze ko Akarere kazakomeza gukorana n’abafatanyabikorwa batandukanye kugira ngo abarwayi bazajya bacumbikirwa muri iyi nzu bitabweho neza, yaba mu buryo bw’ubuvuzi, isuku ndetse no gufashwa kubona ibiribwa.

Abarwayi bazacumbikirwa muri iyi nzu bazajya bajyanwa i Kanombe bongere bagarurwe, bahabwe aho kuba heza banitabweho byose ku buntu.

Iyi nzu ya ‘Rotary House for Cancer Patients’ yari ishaje ku buryo kuyisana byari nko kuyubaka bushya, kuko yatwaye imyaka irenga ibiri kugira ngo ibashe kwakira abarwayi.

Rotary Club Kigali-Virunga yubatse iyi nzu ku bufatanye n’abaterankunga batandukanye barimo Ibitaro bya Kibagabaga, ibya Gisirikare bya Kanombe, imiryango idaharanira inyungu yo mu Budage na Leta Zunze Ubumwe za Amerika, Ambasade ya Amerika mu Rwanda n’abandi.

Rotary Club ni umuryango udaharanira inyungu ukora ibikorwa by’ubugiraneza birimo gufasha abatishoboye, gutanga amazi meza ku baturage, kurwanya indwara z’ibyorezo zirimo nk’imbasa no gutanga umusanzu mu bikorwa byose bigamije guteza imbere sosiyete.

Mu Rwanda, Rotary igizwe na clubs esheshatu zirimo Rotary Club Kigali Doyen, Mont Jali, Musanze, Butare, Gasabo na Kigali-Virunga ibarizwamo abanyamuryango 35.

Umuyobozi wa Rotary Club Kigali-Virunga, Jwala Vijay Kumar, yavuze ko batekereje kubaka iyi nzu kuko hari abarwayi ba kanseri bajyaga kwivuriza i Kanombe, bakabura ubushobozi bwo kubona aho bacumbika.

Umuyobozi Nshingwabikorwa w’Akarere ka Gasabo, Umwali Pauline, yavuze ko bishimiye cyane iyi nzu bahawe kuko iyari isanzwe ihari yari ishaje

Ambasaderi wa Leta Zunze Ubumwe za Amerika mu Rwanda, Peter Vrooman ni umwe mu banyamuryango ba Rotary Club

Umuyobozi wa Rotary Club y’u Rwanda, Rugera Jeannette, ageza ubutumwa ku bitabiriye iki gikorwa

Iki ni kimwe mu bitanda bizajya byifashishwa n’abarwayi babuze uburyo bwo gucumbika

Inzu yatanzwe irimo ibyangombwa byose

Iyi nzu yubatswe bigizwemo uruhare n’abaterankunga batandukanye

Iyi nzu yuzuye itwaye miliyoni 51 Frw

Akarere ka Gasabo gashyikirizwa inzu

Amafoto: Mucyo Jean Regis

Ni nyuma y’uko kuva ku wa Kana tariki 27 Gicurasi 2021, abaturage barenga ibihumbi 14 bari bahungiye mu Rwanda ndetse n’abandi basaga 600 bakaba bari bamaze kugera mu Rwanda mu gitondo cyo kuri uyu wa Gatanu.

Nyuma y’uko amakuru aturuka muri Kivu y’Amajyaruguru agaragaje ko Ikirunga cya Nyiragongo cyamaze gutuza ndetse gishobora kutongera kuruka, abaturage baho batangiye gusubira muri iki gihugu.

Minisitiri Ushinzwe Ibikorwa by’Ubutabazi, Kayisire Marie Solange yavuze ko impamvu bifuza gutaha ari uko guhera kuri uyu wa Kane, imitingito yari yabaye nk’aho ihagarara mu gihugu cyabo bityo bakaba bari bifuje kujya iwabo kureba uko bimeze.

Yagize ati “Impamvu bifuza gutaha twese twayibwira, ni uko guhera ejo imitingito isa n’aho yagabanyutse, impuruza yari yabavanye mu ngo zabo yavugaga ko ikirunga gishobora kongera kuruka ariko ukirikije uko bimeze ubu urabona ko nta kintu cyabaye.”

Yakomeje agira ati “Ubwo rero iteka iyo umuntu yahunze urugo rwe akabona amahoro yagarutse ahita yifuza kurusubiramo.”

Ku rundi ruhande kandi n’imitingito yari ikomeje kuyogoza Umujyi wa Goma ndetse n’Akarere ka Rubavu yatuje ku buryo nko mu ijoro ryacyeye nta mitingito ikomeye yigeze iba.

Amakuru aheruka gukusanywa n’inzobere z’ikigo Volcano Observatory (OVG) ku bufatanye n’Impuguke esheshatu z’Abayapani n’Umwongereza umwe nyuma y’isesengura no kugenzura, yerekana ko ikirunga cya Nyiragongo kirimo ubusa, bivuze ko kitazongera kuruka vuba.

Izi mpuguke zagaragaje ko ibijyanye no kugenda kw’ibikoma by’amahindure nta bikiri kugaragaramo. Ibi bikaba biganisha ku mwanzuro w’uko bishoboka cyane ko ikirunga cya Nyiragongo cyatuje.

Abanye-Congo barenga ibihumbi 14 bari bahungiye mu Rwanda

Imodoka za RDF nizo ziri gufasha aba baturage gusubira iwabo

Aha bari bari kwinjira mu modoka basubiye mu gihugu cyabo

Imodoka z’ingabo z’u Rwanda nizo zifashishijwe mu kugeza ku mupaka abanye-Congo batashye iwabo

Ku ikubitiro hatashye abanye-Congo 262 bari bari muri Stade Umuganda

Abaraye muri Stade bahawe ibiribwa

Mbere yo gutaha babanje kuganirizwa n’ubuyobozi

Minisitiri Kayisire Marie Solange yavuze ko abashaka gutaha bose bemerewe

Aha bashakaga kurira imodoka ya RDF ibageza ku mupaka w’u Rwanda na Congo

Ibi Ambasaderi Dr Ron Adam yabigarutseho kuri uyu wa 28 Gicurasi 2021 ubwo Mount Kenya University yibukaga ku nshuro ya 27 Jenoside yakorewe Abatutsi.

Ni umuhango wari wahurijwe hamwe no kugaragaza umushinga wiswe “Renewed Memory” ugamije kurwanya ikibi gikorerwa ikiremwamuntu biciye mu gukora amashusho y’ubuhamya bw’ibyabaye muri Jenoside yakorewe Abatutsi mu 1994 na Jenoside yakorewe Abayahudi.

Ambasaderi Adam yavuze ko urubyiruko rukwiye kuba umusingi mu kurwanya abagipfobya Jenoside, ashima abagize iki gitekerezo cyo gushyiraho umushinga ugamije kubika ubuhamya bw’ibyabaye.

Yagize ati “Ivangura, iteshagaciro no gushaka gutsemba ubwoko runaka, ni inkuru ijya kuba imwe. Ibyabaye mu Rwanda no muri Israel, ni iby’agaciro kuvuga ibyabaye, kubisangiza abandi biciye mu buhamya buhari bw’ibyabaye, ndashima iki gitekerezo cyatangijwe cyo kubika ubu buhamya mu rwego rwo kubusangiza abandi, kubika aya makuru bizafasha mu kuyabona kubayakeneye, aya makuru azafasha mu kwigisha abandi bagipfobya.”

“Dufite gutangira kwandika inkuru zacu, ni ingenzi kuko bizafasha kubika ya makuru, tuzarwanya abahakana n’abapfobya mu kugaragaza ibyabaye, tugaragaza ubuhamya bw’abarokotse”.

Mu bandi bari bitabiriye uyu muhango harimo Karasira Venuste warokotse Jenoside yakorewe Abatutsi, wavuze ko biteye agahinda kuba hari abavuga ko imbarutso ya Jenoside yabaye ihanurwa ry’indege ya Perezida Habyarimana.

Karasira yasangije abari bitabiriye uyu muhango ubuhamya bw’uburyo Ingabo z’Umuryango w’Abibumbye zabataye muri ETO -Kicukiro mu gihe bari bizeye ko zizabarinda.

Ati “Tariki ya 7 Mata 1994 indege imaze guhanurwa twahungiye muri ETO Kicukiro twizeye ubutabazi kuko hari ingabo z’Umuryango w’Abibumbye, ariko ibyo twari twiteze sibyo twabonye kuko nyuma y’iminsi itatu baradusize barigendera, twari twahahungiye turi benshi, tariki ya 11 Mata twarahavuye ingabo z’Umuryango w’Abibumbye zimaze kudusiga. Mbifata nko gutsindwa kw’amahanga.”

Bimenyimana Valens wari uhagarariye Komisiyo y’Igihugu Ishinzwe kurwanya Jenoside, CNLG, yasobanuye uburyo Jenoside itegurwa kugeza ishyizwe mu bikorwa. Yavuze ko bica mu gutesha agaciro ubwoko bumwe, nk’aho Abatutsi bitwaga inyenzi, inzoka n’ibindi.

Ibi ngo iyo bivuyeho hajyaho kuyitegura no kuyumvisha abantu, bigakurikirwa no kuyishyira mu bikorwa hagaheruka kuyipfobya no kuyihakana.

Ati “Abapfobya bavuga ko habaye Jenoside ebyiri, ibi si ukuri kuko Perezida w’u Bufaransa ejo yavuze ikintu cyiza, aho yavuze ko Jenoside ari ikintu ndengakamere nta kintu na kimwe gikwiye kugereranywa nayo, hari abavuga ko habaye Jenoside yakorewe Abahutu mu Rwanda no muri Congo, ibyo sibyo.”

Yasabye ko abanyeshuri basoza kaminuza bazajya bafashwa bakandika ku mateka ya Jenoside yaranze u Rwanda.

Ati “Kaminuza ni urumuri rwa rubanda, dukwiye rero gufasha abanyeshuri ba Kaminuza mu gihe basoza amasomo yabo bakajya bandika amateka y’ukuri mu rwego rwo guhangana n’abagipfobya Jenoside yakorewe Abatutsi.”

Muri uyu muhango kandi hanamuritswe umushinga uhuriza hamwe abanyeshuri 25 biga itumanaho, aho bazakora video zizafasha mu kubika amateka n’ubuhamya bw’abarokotse Jenoside yakorewe Abatutsi. Ni umushinga uterwa inkunga na Ambasade ya Israel ku bufatanye na Kaminuza ya Mount Kenya.

Ambasaderi wa Israel Dr. Ron Adam yanashyikirije impamyabushobozi “certificate” abanyeshuri bari muri uyu mushinga uzashyira video ya mbere hanze mu minsi mike iri imbere.

Ambasaderi wa Israel mu Rwanda, Ron Adam asanga kurwanya abapfobya Jenoside bikwiye guca mu kwandika

Uyu muhango wo kwibuka Jenoside yakorewe Abatutsi muri Mount Kenya University Rwanda witabiriwe n’abantu bake kubera COVID-19

Ushobora kuba wenda usomye iyi nkuru wari usanzwe ukoresha umuhanda Kigali-Rubavu mu modoka rusange cyangwa mu yawe ujya muri gahunda zitandukanye; tekereza kuba muri uyu muhanda nibura mu modoka eshanu zikunyuraho harimo ebyiri zambaye ‘Plaque’ zo muri Repubulika Iharanira Demokarasi ya Congo.

Uru rujya n’uruza rw’abantu rwakurikiye iruka rya Nyiragongo ryo ku wa 22 Gicurasi 2021. Ni umunsi wabaye uw’icuraburindi ku baturage bo mu Mujyi wa Goma n’utundi tuyituriye.

Ibyabaye kuri uwo munsi byaciye igikuba abakuze bibuka iby’ejo bundi mu 2002, ubwo Ikirunga cya Nyiragongo cyarukaga kigahitana ubuzima bw’abantu 245, abandi ibihumbi 120 kibasiga badafite aho gukinga umusaya.

Ni byo koko iyagukanze ntijya iba inturo! Ku mugoroba wo ku wa Gatandatu ushize, Ikirunga cya Nyiragongo cyongeye kuruka, icyihutirwaga ku baturage bo muri Kivu y’Amajyaruguru by’umwihariko Umujyi wa Goma cyari ugukiza amagara yabo, benshi bahungira ku muturanyi wabo bise mwiza [u Rwanda], na we abakirana ubwuzu n’urugwiro nk’uko abisanganywe mu muco we.

Amakamyo ya gisirikare yifashishijwe mu kugeza impunzi aho zagombaga kugezwa

Nibura kuri uyu wa Kane tariki 27 Gicurasi 2021, Abanye-Congo basaga 8.735 ni bo binjiriye ku Mupaka Munini uhuza u Rwanda na RDC [Grande Barrière] binjira mu Rwanda mu gihe abandi 5.100 binjirira kuri Petite Barrière naho 60 binjirira ku mupaka wa Busasamana.

Iyi mibare IGIHE yahawe n’Ubuyobozi bw’Intara y’Uburengerazuba, ikomeza igaragaza kandi ko mu Karere ka Rubavu hari hasanzwe hacumbikiwe Abanye-Congo bagera kuri 600. Aba ni abahageze kuva ku wa 22 Gicurasi 2021.

Inshuti nyayo igaragarira mu makuba

Kuva ku munsi Nyiragongo yarutse, [hari ku wa 22 Gicurasi 2021] Abanye-Congo benshi bahise bihutira gukiza amagara yabo bamwe bahungira mu bindi bice by’igihugu cyabo ariko abenshi bahungira mu Rwanda.

Ubuvugizi bwa Guverinoma ya Congo bwahise butanga amatangazo hifashishijwe Radio n’ibindi binyamakuru bumenyesha abaturage bayo inzira bashobora kunyuramo bahungira mu Rwanda.

Bamwe bagiye banyura ahitwa Bujovu-Kabutembo- Rwanda, urugendo rw’ibilometero umunani; Kahembe – Petite Barrière – Gisenyi ho hareshya n’ibilometero bine. Hari kandi Majengo – Sep Congo – Kabutembo- Rwanda n’izindi nzira.

Mu masaha y’ijoro ubwo aba Banye-Congo binjiraga mu gihugu, bakwiriye Umujyi wa Rubavu. Mu buryo bwo kubacungira umutekano muri ayo masaha, ubuyobozi bw’Akarere ka Rubavu bwihutiye gushaka imodoka zabatwara bose bagahurizwa ahantu hamwe kugira ngo babashe kwitabwaho.

Abantu bakiriwe ku butaka bw’u Rwanda ari benshi

Bwakodesheje Coasters zari muri Gare ya Rubavu muri iryo joro, zitambagira Umujyi wose zitwara aba Banye-Congo zikabageza kuri Stade Umuganda aho bitabwagaho. Bahabwaga amazi yo kunywa, ibyo kurya nk’amandazi ndetse n’ibiringiti byo kwifubika.

Mu gitondo ubwo ikirunga cyari cyamaze kurekera kuruka, izi modoka zifashishijwe mu gucyura aba Banye-Congo by’umwihariko abafite ubumuga, abagore batwite n’abarwayi.

Abana batari bari kumwe n’ababyeyi babo bo u Rwanda rwashyizeho imodoka zo kubacyura, ziri kuzenguruka Umujyi wose zibashakisha. Abanyarwanda bashimiye urugwiro berekanye ubwo Abanye-Congo bahungaga binjira mu Rwanda.

Nyuma y’iruka ry’Ikirunga cya Nyiragongo ariko, hakurikiyeho imitingito yari ikomeye ku ruhande rwa Congo ndetse no mu Rwanda yarahageze ishegesha Akarere ka Rubavu nubwo yageze mu gihugu hose.

Mu gitondo cyo kuri uyu Kane, tariki ya 27 Gicurasi 2021, impunzi nyinshi ziturutse mu Mujyi wa Goma zinjiye mu Rwanda nyuma y’itangazo rya Guverineri wa Gisirikare w’Intara ya Kivu y’Amajyaruguru, Lieutenant General Constantin Ndima, risaba abaturage kwimukira mu gace ka Sake mu kwirinda ingaruka zaterwa n’irindi ruka rya Nyiragongo rishobora kubaho.

Yagize ati “Uturere dushobora kugerwaho n’ingaruka ziterwa n’amahindure dushobora kurimbuka kubera umuriro, utwo duce ni Majengo, Mabanga Nord, Mabanga Sud, Virunga, Mujovu, Murara, Kahembe, Miteno na Quartier Les Volcans. Utu duce bigaragara ko ariho hanyura amahindure ikirunga yagera kiramutse kirutse.”

Yakomeje ati “Turasaba rero ko abaturage bakomeza kuba maso kandi bakumva amakuru yatanzwe n’inzego zibishinzwe kuko ibintu bishobora guhinduka vuba. Ibintu birakurikiranwa ku gihe kandi bivugururwa ku gihe.”

Ibi byatumye abaturage bo mu Mujyi wa Goma batangira kuzinga utwangushye bahungira mu bice basabwe na Leta yabo kujyamo, ariko abandi benshi binjira mu Rwanda.

Imbamutima z’Abanye-Congo bakiranywe yombi!

Mu masaha y’igitondo cyo ku wa Kane, Umujyi wa Rubavu wari wuzuye urujya n’uruza rw’abaturage baturutse I Goma no mu bindi bice bya RDC, aho binjiraga mu Rwanda banyuze ku mipaka itatu irimo ibiri isanzwe izwi ya Grande Barrière na Petite Barrière.

Guhunga ntabwo ari ikintu gisanzwe kuko byabasabye gupakira mu bikapu bimwe mu byo bari batunze, bashyira za matela ku mutwe, ibyo gutekamo n’ibindi bikoresho bishoboka.

Abari kuba bategereje imodoka zibajyana mu Nkambi ni hano bari kuba bicaye

Abageraga ku mupaka bakimara kwinjira mu Rwanda, basangaga inzego z’umutekano ku ruhande rw’u Rwanda zibategereje zikabaherekeza ndetse imodoka ifite indangururamajwi yagendaga izenguruka mu Mujyi wa Rubavu imenyesha impunzi aho zerekeza.

Ku mupaka bashyirwaga mu modoka zateguwe n’Ubuyobozi bw’Intara y’Iburengerazuba, imodoka nini z’Ingabo z’u Rwanda, RDF ndetse n’iza Polisi y’u Rwanda, bakajyanwa kuri Collège de Gisenyi Inyemeramihigo ari naho bahererwaga ubufasha bw’ibanze burimo amazi yo kunywa, ibyo kurya, babapimwa Covid-19 n’ibindi.

Itsinda ry’abanyamakuru ba IGIHE bari muri iyi Ntara y’Uburengerazuba baganirije bamwe muri aba baturage bagaragaza imbamutima zabo nyuma yo kwakiranwa urugwiro n’Abanyarwanda bari kumwe n’ubuyobozi bw’u Rwanda.

Uzamukunda Belyse yagize ati “Hari ubutumwa twahawe na Guverineri butubwira ko abatuye Umujyi wa Goma no mu nkengero zawo bagomba kuba bawuvuyemo, ni yo mpamvu nashatse inzira insubiza i Kinshasa.”

Uwitwa Uwamahoro Queen wavukiye mu Rwanda ariko nyuma ajya gutura mu Byahi muri Repubulika Iharanira Demukarasi ya Congo yagize ati “Batwakiriye neza badupima Covid-19, tumeze neza ariko njye mfite abavandimwe hano mu Rwanda nifuza ko baduha uburenganzira tukabasanga bakaba baducumbikiye.”

Mawazo Devotha yagize ati “Mu Rwanda batwakiriye neza rwose twarabyishimiye kandi bakomeje kudufasha kuva aho twagereye hano. Ni byiza cyane turashimira ubuyobozi bw’u Rwanda.”

Mbamba Maliro Christophe yagize ati “Twageze hano baduha bisi ziratujyana. Nta wigeze agira ikibazo cy’umutekano hano mu Rwanda. Batwakiriye neza, ubu tumeze neza turishimye rwose.”

Umuyobozi w’Umudugudu [Chef de Village] wa Kayanza muri Territoire ya Rutshuru, Ngizwenimana Karyugahawe yagize ati “Twageze hano baratwakira, abavandimwe batuzanira ibiryo ku mashuri aho twari turimo badufata neza tubona n’umuyobozi adufasha gushishikariza abaturage ba hano batuzanira ibyo kurya mbese turara neza.”

Aba baturage bari kugera mu Rwanda kandi bagapimwa icyorezo cya Covid-19, ku buntu abasanzwe bagifite bakoherezwa mu bigo bigenewe kwakira abarwayi b’iki cyorezo bakitabwaho na Guverinoma y’u Rwanda.

Uretse abarwayi b’iki cyorezo kandi, abafite izindi ndwara zisanzwe bari kwitabwaho mu buryo bwihariye bakaba bashyirwa mu bitaro cyangwa andi mavuriro ya Leta bagahabwa ubuvuzi bw’ibanze. Ni ibintu byose biri gukorwa na Guverinoma y’u Rwanda, bivuze ko nta kiguzi abari kuvurwa bari gucibwa.

Umuhanda Rubavu-Kigali, imodoka nyinshi ni izo muri Congo

Mu basaga ibihumbi 14 bahungiye mu Rwanda harimo abafite ubushobozi aho bageraga mu Karere ka Rubavu bafite imodoka zabo bwite zirimo imiryango yabo n’abandi bashoboraga kubona uko bafasha. Aba bageraga mu Rwanda bakoherezwa ahahoze Inkambi ya Nkamira mu Murenge wa Kanzenze, Akarere ka Rubavu, bagapimwa Covid-19, hifashishijwe uburyo bwa Rapid Test.

Nyuma y’iminota 20 babaga bamaze kubona ibisubizo, bityo bagahita bahabwa uburenganzira bwo gukomeza bakarenga Akarere ka Rubavu bajya mu bindi bice by’igihugu birimo Umujyi wa Kigali.

Mu masaha y’umugoroba wo ku wa Kane, habarurwaga nibura abarenga 1182 banyuze kuri iki kigo cya Nkamira, aho bose bapimwe Covid-19, ibipimo bikagaragaza ko harimo batandatu bafite ubwandu bw’iki cyorezo.

Guverineri w’Intara y’Iburengerazuba, Habitegeko François, yavuze ko u Rwanda rufite ubushobozi bwo kwakira n’abandi bashobora kuza kuko hateguwe ahandi bashyirwa

Umuyobozi w’Ishami Rishinzwe kurwanya Indwara z’Ibyorezo mu Kigo cy’Igihugu cy’Ubuzima, RBC, Dr. Rwagasore Edison yabwiye IGIHE ko abari kuza mu Rwanda bose bari gupimwa abasanganywe Covid-19 bakoherezwa mu bigo bya Kanyinya, Nyarugenge n’ahandi hagenewe kwakira abarwayi b’iki cyorezo.

Yagize ati “Nubwo baje mu Rwanda mu bihe bya Covid-19 ntabwo twari kunanirwa kubakira, aho icyakozwe ni ugukomeza kugerageza ko ingamba z’ubwirinzi zubahirizwa kuko kugeza ubu turimo kubapima Covid-19, abo dusanze bayifite nubwo ari bake bakoherezwa mu bigo bisanzwe byakira abarwayi b’iki cyorezo mu Rwanda.”

Abenshi muri aba baturage bageze mu Rwanda bafite imodoka zabo bashaka kujya mu bindi bice by’igihugu [Ni abataracumbikiwe ku Nkambi ya College Inyemeramihigo] bari benshi cyane ku buryo nibura mu muhanda werekeza I Kigali byari bigoye kuri uyu wa Kane kuba wabona imodoka eshanu hatarimo eshatu zifite Plaque yo muri Repubulika Iharanira Demukarasi ya Congo.

Guverineri w’Intara y’Uburengerazuba, Habitegeko François yabwiye IGIHE ko izi mpunzi zirenga ibihumbi 14 zamaze kugera mu Rwanda ku mugoroba wo kuri uyu wa 27 Gicurasi 2021, ariko hari n’abandi bakomeje mu bindi bice by’igihugu.

Yakomeje avuga ko u Rwanda rufite ubushobozi bwo kubakira hiyongereyo n’abandi bashibora kuza kuko hateguwe ahandi bashyirwa asaba abaturage bo mu Mujyi wa Gisenyi guhagarika kuwuvamo bawuhunga, kuko haramutse habaye ikibazo babimenyeshwa.

Ati “Ibihugu byombi binyuze mu murongo watanzwe n’abakuru babyo, Perezida Kagame na mugenzi we, Félix Tshisekedi batanze umurongo w’imikoranire myiza hagati y’ibihugu byacu, natwe rero iyo ntero yabo niyo twikiriza. Rero dufatanya muri byinshi birimo ubucuruzi bwambukiranya imipaka.”

Yakomeje agira ati “Ariko by’umwihariko muri ibi bihe by’amakuba bahuye na yo y’iruka ry’ikirunga cya Nyiragongo hari abaturage baduhungiyeho turabakira, ubu tumaze kwakira abarenga ibihumbi 14 ariko hari n’abandi bakomeje kuza twiteguye na bo kubakira neza tubaha ubufasha bw’ibanze.”

Mu bikorwa remezo byashyiriweho impunzi ziri mu Nkambi ya Collège Inyemeramihigo birimo ubwiherero burindwi, amavomero ane, amatara y’umuriro w’amashanyarazi, Poste de Santé n’abaganga 15.

Ibiribwa bahawe kuri uyu wa 27 Gicurasi birimo umuceri, ifu y’igikoma, amandazi n’ibindi bitandukanye.

Abakora ubutabazi bw’ibanze bariteguye

Abahunze bitwazaga ibikoresho by’ibanze bakeneye

Hifashishwaga indangururamajwi mu kumenyesha uduce impunzi zigomba kuganamo

Abageze mu Rwanda bafatwa imyirondoro bacyinjira mu gihugu

Abatunze imodoka nizo bifashisha, bagapakiraho ibikoresho byabo byose nkenerwa

Abana bari kumwe n’ababyeyi babo bagiye babanza gupimwa COVID-19

Abantu benshi cyane bahungiye mu Rwanda bavuye i Goma

Abantu ni benshi mu Nkambi ya College Inyemeramihigo

Aha ni kuri Grande Barrière. Kuri uyu wa Kane hari abantu benshi bari guturuka muri RDC

Aha niho bubakiwe shitingi yo kuba barimo mu Nkambi ya College Inyemeramihigo

Uyu yari afite inyota abanza kwirenza igikombe cy’amazi mu gitondo

Abahunze ingaruka z’iruka rya Nyiragongo barimo ibyiciro bitandukanye

Hateguwe uburyo bwo gutwara impunzi zivanwa ku mupaka zijyanwa mu Nkambi

Ibyo kuraraho Leta y’u Rwanda yarabiteguye

Imodoka nyinshi cyane z’Abanye-Congo zagaragaye mu muhanda Rubavu-Kigali

Imodoka za Polisi y’Igihugu nazo zafatanyije n’iza RDF mu gutwara izi mpunzi

Imodoka za RDF nizo ziri kwifashishwa mu gutwara impunzi

Ingabo z’u Rwanda zagize uruhare mu kugeza impunzi aho zagombaga gufashirizwa

Abayobozi batandukanye mu nzego za Leta bari i Rubavu bakurikirana uko izi mpunzi zitabwaho

Aho izi mpunzi ziri haterwa imiti yica udukoko ku buryo zitakwandura indwara iyo ariyo yose

Kuri Nkamira niho hari gupimirwa Covid-19, uhageze uhasanga imodoka nyinshi z’Abanye-Congo

Kugeza ku mugoroba wo kuri uyu wa Kane, ku Kibuga cya College Inyemeramihigo hari impunzi zigera mu bihumbi bitanu

Mu nkambi ya College Inyemeramihigo hashyizwe amavomero

Abageze mu Rwanda babanzaga gupimwa Covid-19

Polisi y’u Rwanda iba iri maso igenzura niba umutekano wo mu muhanda wubahirizwa uko bikwiye

Mu bagizweho ingaruka n’iruka rya Nyiragongo harimo n’abihayimana, bahungiye mu Rwanda

Uyu twahuriye ku Mupaka akimara kwambuka ageze mu Rwanda, yavuze ko yakiriwe neza

Mu bahunze iruka ry’ikirunga harimo n’abahunganye n’amatungo

Amafoto: Igirubuntu Darcy

U Rwanda, by’umwihariko Umujyi wa Kigali, ni agace kagizwe n’imisozi myinshi, ku buryo n’ubwo kubakamo imihanda ya kaburimbo bishoboka, bitoroha iyo bigeze mu kubaka imihanda ya gari ya moshi kuko byasaba gusatura imisozi, mu gihe kwagura imihanda isanzwe nabyo bitoroshye kuko imyinshi yubakiweho ku mpande zayo.

N’ubwo bimeze gutya ariko, uko abatuye Umujyi wa Kigali biyongera, ndetse n’umutungo wabo ukazamuka bityo bagakenera gutunga imodoka, birumvikana ko ikibazo cy’umubyigano wazo kizarushaho kuba ingorabahizi mu myaka iri imbere, ibishobora kugira ingaruka mbi ku buzima rusange bw’uyu murwa n’abawutuyemo.

Mu rwego rwo guhangana n’iki kibazo, Umujyi wa Kigali, ku bufatanye n’izindi nzego zirimo Minisiteri y’Ibikorwaremezo, Urwego Ngenzuramikorere, RURA, n’abandi bafatanyabikorwa, batangiye gushaka uburyo bwo koroshya ingendo muri uyu Mujyi binyuze gushyiraho utumodoka tugendera ku migozi, dushobora kuvana abantu mu gice kimwe tukaberekeza mu kindi.

Mu ruzinduko rw’iminsi ibiri Perezida Emmanuel Macron w’u Bufaransa yagiriye mu Rwanda, yari aherekejwe n’itsinda ry’abayobozi bahagarariye ibigo 15 by’ubucuruzi bifite inkomoko mu Bufaransa, birimo n’ikigo cya Poma, kiri mu bya mbere ku Isi mu gukora utumodoka dutwarwa n’imigozi ndetse no kuzirika imigozi ku misozi ku buryo iyo nzira yo mu kirere ishoboka.

Aba bashoramari kuri uyu wa Kane bagiranye ibiganiro na Minisitiri w’Ibikorwaremezo, Claver Gatete, byagarutse ku gusuzuma uburyo bagira uruhare mu ishyirwa mu bikorwa ry’uyu mushinga, byitezwe ko uzaba warangiye bitarenze umwaka wa 2025.

Itangazo rya Minisiteri y’Ibikorwaremezo, ryavuze ko “Minisitiri Claver Gatete yakiriye itsinda ry’abashoramari b’Abafaransa bagaragaje inyota yo gushora mu mushinga w’utumodoka tugendera ku migozi mu rwego rwo koroshya ingendo [mu Mujyi wa Kigali].”

Iri tangazo ryavuze ko ibiganiro ku mpande zombi byagarutse ku “Ikorwa, isanwa ndetse n’igenzurwa ry’ibikorwaremezo by’utumodoka tugendera ku migozi.”

Utu tumodoka tugize umugambi mugari w’Umujyi wa Kigali uzwi nka ‘Generation II’, uzahindura isura y’ingendo mu Mujyi wa Kigali cyane cyane ingendo rusange, binyuze mu kwinjiza ikoranabuhanga mu rwego rw’ubwikorezi bw’abantu n’ibintu, ku buryo nk’umugenzi uri ku cyapa ategereje imodoka, ashobora kumenya igihe imugereraho, imyanya iza ifite, amasaha iri bumare mu rugendo n’ibindi nk’ibyo.

Utumodoka dutwara abantu ku migozi ni umushinga uri kwaguka ku rwego rw’Isi, kuko uru rwego rwari rufite agaciro ka miliyari zirenga 4$ mu mwaka wa 2020, ariko rukazaba rufite agaciro ka miliyari zirenga 7$ mu mwaka wa 2026.

Uretse gufasha abanyamujyi koroherwa no gukora ingendo, byitezwe ko utu tumodoka tuzafasha mu kuzamura urwego rw’ubukerarugendo, kuko tuzarema ubundi bwoko bw’ubukerarugendo butari bumenyerewe mu Rwanda, buzajya bwereka abantu ubwiza bw’imisozi n’ibibaya by’u Rwanda bari mu kirere. Ubu bwoko bw’ubukerarugendo buteye imbere cyane mu bihugu nk’u Busuwisi na Singapore.

Iyi nama yahuje abashoramari bo mu Bufaransa ndetse na Minisitiri w’Ibikorwaremezo mu Rwanda, Claver Gatete

Iri tsinda ry’abashoramari ryari riturutse mu Bufaransa

Umushinga w’utumodoka tugendera ku migozi waganiriweho

Byitezwe ko utumodoka tugendera ku migozi tuzaba twatangiye kugenda muri Kigali muri 2025

Ushobora kuba wenda usomye iyi nkuru wari usanzwe ukoresha umuhanda Kigali-Rubavu mu modoka rusange cyangwa mu yawe ujya muri gahunda zitandukanye; tekereza kuba muri uyu muhanda nibura mu modoka eshanu zikunyuraho harimo ebyiri zambaye ‘Plaque’ zo muri Repubulika Iharanira Demokarasi ya Congo.

Uru rujya n’uruza rw’abantu rwakurikiye iruka rya Nyiragongo ryo ku wa 22 Gicurasi 2021. Ni umunsi wabaye uw’icuraburindi ku baturage bo mu Mujyi wa Goma n’utundi tuyituriye.

Ibyabaye kuri uwo munsi byaciye igikuba abakuze bibuka iby’ejo bundi mu 2002, ubwo Ikirunga cya Nyiragongo cyarukaga kigahitana ubuzima bw’abantu 245, abandi ibihumbi 120 kibasiga badafite aho gukinga umusaya.

Ni byo koko iyagukanze ntijya iba inturo! Ku mugoroba wo ku wa Gatandatu ushize, Ikirunga cya Nyiragongo cyongeye kuruka, icyihutirwaga ku baturage bo muri Kivu y’Amajyaruguru by’umwihariko Umujyi wa Goma cyari ugukiza amagara yabo, benshi bahungira ku muturanyi wabo bise mwiza [u Rwanda], na we abakirana ubwuzu n’urugwiro nk’uko abisanganywe mu muco we.

Amakamyo ya gisirikare yifashishijwe mu kugeza impunzi aho zagombaga kugezwa

Nibura kuri uyu wa Kane tariki 27 Gicurasi 2021, Abanye-Congo basaga 8.735 ni bo binjiriye ku Mupaka Munini uhuza u Rwanda na RDC [Grande Barrière] binjira mu Rwanda mu gihe abandi 5.100 binjirira kuri Petite Barrière naho 60 binjirira ku mupaka wa Busasamana.

Iyi mibare IGIHE yahawe n’Ubuyobozi bw’Intara y’Uburengerazuba, ikomeza igaragaza kandi ko mu Karere ka Rubavu hari hasanzwe hacumbikiwe Abanye-Congo bagera kuri 600. Aba ni abahageze kuva ku wa 22 Gicurasi 2021.

Inshuti nyayo igaragarira mu makuba

Kuva ku munsi Nyiragongo yarutse, [hari ku wa 22 Gicurasi 2021] Abanye-Congo benshi bahise bihutira gukiza amagara yabo bamwe bahungira mu bindi bice by’igihugu cyabo ariko abenshi bahungira mu Rwanda.

Ubuvugizi bwa Guverinoma ya Congo bwahise butanga amatangazo hifashishijwe Radio n’ibindi binyamakuru bumenyesha abaturage bayo inzira bashobora kunyuramo bahungira mu Rwanda.

Bamwe bagiye banyura ahitwa Bujovu-Kabutembo- Rwanda, urugendo rw’ibilometero umunani; Kahembe – Petite Barrière – Gisenyi ho hareshya n’ibilometero bine. Hari kandi Majengo – Sep Congo – Kabutembo- Rwanda n’izindi nzira.

Mu masaha y’ijoro ubwo aba Banye-Congo binjiraga mu gihugu, bakwiriye Umujyi wa Rubavu. Mu buryo bwo kubacungira umutekano muri ayo masaha, ubuyobozi bw’Akarere ka Rubavu bwihutiye gushaka imodoka zabatwara bose bagahurizwa ahantu hamwe kugira ngo babashe kwitabwaho.

Abantu bakiriwe ku butaka bw’u Rwanda ari benshi

Bwakodesheje Coasters zari muri Gare ya Rubavu muri iryo joro, zitambagira Umujyi wose zitwara aba Banye-Congo zikabageza kuri Stade Umuganda aho bitabwagaho. Bahabwaga amazi yo kunywa, ibyo kurya nk’amandazi ndetse n’ibiringiti byo kwifubika.

Mu gitondo ubwo ikirunga cyari cyamaze kurekera kuruka, izi modoka zifashishijwe mu gucyura aba Banye-Congo by’umwihariko abafite ubumuga, abagore batwite n’abarwayi.

Abana batari bari kumwe n’ababyeyi babo bo u Rwanda rwashyizeho imodoka zo kubacyura, ziri kuzenguruka Umujyi wose zibashakisha. Abanyarwanda bashimiye urugwiro berekanye ubwo Abanye-Congo bahungaga binjira mu Rwanda.

Nyuma y’iruka ry’Ikirunga cya Nyiragongo ariko, hakurikiyeho imitingito yari ikomeye ku ruhande rwa Congo ndetse no mu Rwanda yarahageze ishegesha Akarere ka Rubavu nubwo yageze mu gihugu hose.

Mu gitondo cyo kuri uyu Kane, tariki ya 27 Gicurasi 2021, impunzi nyinshi ziturutse mu Mujyi wa Goma zinjiye mu Rwanda nyuma y’itangazo rya Guverineri wa Gisirikare w’Intara ya Kivu y’Amajyaruguru, Lieutenant General Constantin Ndima, risaba abaturage kwimukira mu gace ka Sake mu kwirinda ingaruka zaterwa n’irindi ruka rya Nyiragongo rishobora kubaho.

Yagize ati “Uturere dushobora kugerwaho n’ingaruka ziterwa n’amahindure dushobora kurimbuka kubera umuriro, utwo duce ni Majengo, Mabanga Nord, Mabanga Sud, Virunga, Mujovu, Murara, Kahembe, Miteno na Quartier Les Volcans. Utu duce bigaragara ko ariho hanyura amahindure ikirunga yagera kiramutse kirutse.”

Yakomeje ati “Turasaba rero ko abaturage bakomeza kuba maso kandi bakumva amakuru yatanzwe n’inzego zibishinzwe kuko ibintu bishobora guhinduka vuba. Ibintu birakurikiranwa ku gihe kandi bivugururwa ku gihe.”

Ibi byatumye abaturage bo mu Mujyi wa Goma batangira kuzinga utwangushye bahungira mu bice basabwe na Leta yabo kujyamo, ariko abandi benshi binjira mu Rwanda.

Imbamutima z’Abanye-Congo bakiranywe yombi!

Mu masaha y’igitondo cyo ku wa Kane, Umujyi wa Rubavu wari wuzuye urujya n’uruza rw’abaturage baturutse I Goma no mu bindi bice bya RDC, aho binjiraga mu Rwanda banyuze ku mipaka itatu irimo ibiri isanzwe izwi ya Grande Barrière na Petite Barrière.

Guhunga ntabwo ari ikintu gisanzwe kuko byabasabye gupakira mu bikapu bimwe mu byo bari batunze, bashyira za matela ku mutwe, ibyo gutekamo n’ibindi bikoresho bishoboka.

Abari kuba bategereje imodoka zibajyana mu Nkambi ni hano bari kuba bicaye

Abageraga ku mupaka bakimara kwinjira mu Rwanda, basangaga inzego z’umutekano ku ruhande rw’u Rwanda zibategereje zikabaherekeza ndetse imodoka ifite indangururamajwi yagendaga izenguruka mu Mujyi wa Rubavu imenyesha impunzi aho zerekeza.

Ku mupaka bashyirwaga mu modoka zateguwe n’Ubuyobozi bw’Intara y’Iburengerazuba, imodoka nini z’Ingabo z’u Rwanda, RDF ndetse n’iza Polisi y’u Rwanda, bakajyanwa kuri Collège de Gisenyi Inyemeramihigo ari naho bahererwaga ubufasha bw’ibanze burimo amazi yo kunywa, ibyo kurya, babapimwa Covid-19 n’ibindi.

Itsinda ry’abanyamakuru ba IGIHE bari muri iyi Ntara y’Uburengerazuba baganirije bamwe muri aba baturage bagaragaza imbamutima zabo nyuma yo kwakiranwa urugwiro n’Abanyarwanda bari kumwe n’ubuyobozi bw’u Rwanda.

Uzamukunda Belyse yagize ati “Hari ubutumwa twahawe na Guverineri butubwira ko abatuye Umujyi wa Goma no mu nkengero zawo bagomba kuba bawuvuyemo, ni yo mpamvu nashatse inzira insubiza i Kinshasa.”

Uwitwa Uwamahoro Queen wavukiye mu Rwanda ariko nyuma ajya gutura mu Byahi muri Repubulika Iharanira Demukarasi ya Congo yagize ati “Batwakiriye neza badupima Covid-19, tumeze neza ariko njye mfite abavandimwe hano mu Rwanda nifuza ko baduha uburenganzira tukabasanga bakaba baducumbikiye.”

Mawazo Devotha yagize ati “Mu Rwanda batwakiriye neza rwose twarabyishimiye kandi bakomeje kudufasha kuva aho twagereye hano. Ni byiza cyane turashimira ubuyobozi bw’u Rwanda.”

Mbamba Maliro Christophe yagize ati “Twageze hano baduha bisi ziratujyana. Nta wigeze agira ikibazo cy’umutekano hano mu Rwanda. Batwakiriye neza, ubu tumeze neza turishimye rwose.”

Umuyobozi w’Umudugudu [Chef de Village] wa Kayanza muri Territoire ya Rutshuru, Ngizwenimana Karyugahawe yagize ati “Twageze hano baratwakira, abavandimwe batuzanira ibiryo ku mashuri aho twari turimo badufata neza tubona n’umuyobozi adufasha gushishikariza abaturage ba hano batuzanira ibyo kurya mbese turara neza.”

Aba baturage bari kugera mu Rwanda kandi bagapimwa icyorezo cya Covid-19, ku buntu abasanzwe bagifite bakoherezwa mu bigo bigenewe kwakira abarwayi b’iki cyorezo bakitabwaho na Guverinoma y’u Rwanda.

Uretse abarwayi b’iki cyorezo kandi, abafite izindi ndwara zisanzwe bari kwitabwaho mu buryo bwihariye bakaba bashyirwa mu bitaro cyangwa andi mavuriro ya Leta bagahabwa ubuvuzi bw’ibanze. Ni ibintu byose biri gukorwa na Guverinoma y’u Rwanda, bivuze ko nta kiguzi abari kuvurwa bari gucibwa.

Umuhanda Rubavu-Kigali, imodoka nyinshi ni izo muri Congo

Mu basaga ibihumbi 14 bahungiye mu Rwanda harimo abafite ubushobozi aho bageraga mu Karere ka Rubavu bafite imodoka zabo bwite zirimo imiryango yabo n’abandi bashoboraga kubona uko bafasha. Aba bageraga mu Rwanda bakoherezwa ahahoze Inkambi ya Nkamira mu Murenge wa Kanzenze, Akarere ka Rubavu, bagapimwa Covid-19, hifashishijwe uburyo bwa Rapid Test.

Nyuma y’iminota 20 babaga bamaze kubona ibisubizo, bityo bagahita bahabwa uburenganzira bwo gukomeza bakarenga Akarere ka Rubavu bajya mu bindi bice by’igihugu birimo Umujyi wa Kigali.

Mu masaha y’umugoroba wo ku wa Kane, habarurwaga nibura abarenga 1182 banyuze kuri iki kigo cya Nkamira, aho bose bapimwe Covid-19, ibipimo bikagaragaza ko harimo batandatu bafite ubwandu bw’iki cyorezo.

Guverineri w’Intara y’Iburengerazuba, Habitegeko François, yavuze ko u Rwanda rufite ubushobozi bwo kwakira n’abandi bashobora kuza kuko hateguwe ahandi bashyirwa

Umuyobozi w’Ishami Rishinzwe kurwanya Indwara z’Ibyorezo mu Kigo cy’Igihugu cy’Ubuzima, RBC, Dr. Rwagasore Edison yabwiye IGIHE ko abari kuza mu Rwanda bose bari gupimwa abasanganywe Covid-19 bakoherezwa mu bigo bya Kanyinya, Nyarugenge n’ahandi hagenewe kwakira abarwayi b’iki cyorezo.

Yagize ati “Nubwo baje mu Rwanda mu bihe bya Covid-19 ntabwo twari kunanirwa kubakira, aho icyakozwe ni ugukomeza kugerageza ko ingamba z’ubwirinzi zubahirizwa kuko kugeza ubu turimo kubapima Covid-19, abo dusanze bayifite nubwo ari bake bakoherezwa mu bigo bisanzwe byakira abarwayi b’iki cyorezo mu Rwanda.”

Abenshi muri aba baturage bageze mu Rwanda bafite imodoka zabo bashaka kujya mu bindi bice by’igihugu [Ni abataracumbikiwe ku Nkambi ya College Inyemeramihigo] bari benshi cyane ku buryo nibura mu muhanda werekeza I Kigali byari bigoye kuri uyu wa Kane kuba wabona imodoka eshanu hatarimo eshatu zifite Plaque yo muri Repubulika Iharanira Demukarasi ya Congo.

Guverineri w’Intara y’Uburengerazuba, Habitegeko François yabwiye IGIHE ko izi mpunzi zirenga ibihumbi 14 zamaze kugera mu Rwanda ku mugoroba wo kuri uyu wa 27 Gicurasi 2021, ariko hari n’abandi bakomeje mu bindi bice by’igihugu.

Yakomeje avuga ko u Rwanda rufite ubushobozi bwo kubakira hiyongereyo n’abandi bashibora kuza kuko hateguwe ahandi bashyirwa asaba abaturage bo mu Mujyi wa Gisenyi guhagarika kuwuvamo bawuhunga, kuko haramutse habaye ikibazo babimenyeshwa.

Ati “Ibihugu byombi binyuze mu murongo watanzwe n’abakuru babyo, Perezida Kagame na mugenzi we, Félix Tshisekedi batanze umurongo w’imikoranire myiza hagati y’ibihugu byacu, natwe rero iyo ntero yabo niyo twikiriza. Rero dufatanya muri byinshi birimo ubucuruzi bwambukiranya imipaka.”

Yakomeje agira ati “Ariko by’umwihariko muri ibi bihe by’amakuba bahuye na yo y’iruka ry’ikirunga cya Nyiragongo hari abaturage baduhungiyeho turabakira, ubu tumaze kwakira abarenga ibihumbi 14 ariko hari n’abandi bakomeje kuza twiteguye na bo kubakira neza tubaha ubufasha bw’ibanze.”

Mu bikorwa remezo byashyiriweho impunzi ziri mu Nkambi ya Collège Inyemeramihigo birimo ubwiherero burindwi, amavomero ane, amatara y’umuriro w’amashanyarazi, Poste de Santé n’abaganga 15.

Ibiribwa bahawe kuri uyu wa 27 Gicurasi birimo umuceri, ifu y’igikoma, amandazi n’ibindi bitandukanye.

Abakora ubutabazi bw’ibanze bariteguye

Abahunze bitwazaga ibikoresho by’ibanze bakeneye

Hifashishwaga indangururamajwi mu kumenyesha uduce impunzi zigomba kuganamo

Abageze mu Rwanda bafatwa imyirondoro bacyinjira mu gihugu

Abatunze imodoka nizo bifashisha, bagapakiraho ibikoresho byabo byose nkenerwa

Abana bari kumwe n’ababyeyi babo bagiye babanza gupimwa COVID-19

Abantu benshi cyane bahungiye mu Rwanda bavuye i Goma

Abantu ni benshi mu Nkambi ya College Inyemeramihigo

Aha ni kuri Grande Barrière. Kuri uyu wa Kane hari abantu benshi bari guturuka muri RDC

Aha niho bubakiwe shitingi yo kuba barimo mu Nkambi ya College Inyemeramihigo

Uyu yari afite inyota abanza kwirenza igikombe cy’amazi mu gitondo

Abahunze ingaruka z’iruka rya Nyiragongo barimo ibyiciro bitandukanye

Hateguwe uburyo bwo gutwara impunzi zivanwa ku mupaka zijyanwa mu Nkambi

Ibyo kuraraho Leta y’u Rwanda yarabiteguye

Imodoka nyinshi cyane z’Abanye-Congo zagaragaye mu muhanda Rubavu-Kigali

Imodoka za Polisi y’Igihugu nazo zafatanyije n’iza RDF mu gutwara izi mpunzi

Imodoka za RDF nizo ziri kwifashishwa mu gutwara impunzi

Ingabo z’u Rwanda zagize uruhare mu kugeza impunzi aho zagombaga gufashirizwa

Abayobozi batandukanye mu nzego za Leta bari i Rubavu bakurikirana uko izi mpunzi zitabwaho

Aho izi mpunzi ziri haterwa imiti yica udukoko ku buryo zitakwandura indwara iyo ariyo yose

Kuri Nkamira niho hari gupimirwa Covid-19, uhageze uhasanga imodoka nyinshi z’Abanye-Congo

Kugeza ku mugoroba wo kuri uyu wa Kane, ku Kibuga cya College Inyemeramihigo hari impunzi zigera mu bihumbi bitanu

Mu nkambi ya College Inyemeramihigo hashyizwe amavomero

Abageze mu Rwanda babanzaga gupimwa Covid-19

Polisi y’u Rwanda iba iri maso igenzura niba umutekano wo mu muhanda wubahirizwa uko bikwiye

Mu bagizweho ingaruka n’iruka rya Nyiragongo harimo n’abihayimana, bahungiye mu Rwanda

Uyu twahuriye ku Mupaka akimara kwambuka ageze mu Rwanda, yavuze ko yakiriwe neza

Mu bahunze iruka ry’ikirunga harimo n’abahunganye n’amatungo

Amafoto: Igirubuntu Darcy

Iyahoze ari Komini Kinigi ubu habaye mu Murenge wa Kinigi, niho habereye igeragezwa rya Jenoside yakorewe Abatutsi muri Mutarama 1991, bashinjwa kwitwa ibyitso by’Inkotanyi. Umututsi wa mbere yishwe ku itariki 26 yicishijwe amabuye yatewe n’abagore kugeza apfuye biturutse ku itegeko rya Burugumesitiri Gasana wayiyoboraga.

Ubwo hibukwaga abazize Jenoside yakorewe Abatutsi ku nshuro ya 27 , bamwe mu bayirokotse batuye mu Kinigi, mu buhamya bwabo bavuga ko ako gace kahoze ari Komini Kinigi bagafata nk’ahantu habitse amateka y’igeragezwa rya Jenoside yakorewe Abatutsi mu 1994, kuko ari ho yatangiriye ubwo Abatutsi bari bahatuye bicwaga urw’agashinyaguro.

Bavuze ko kuri ubu bishimira intambwe yatewe yo kuba Urwibutso rwaho rwarasakawe ababo baharuhukiye batakinyagirwa nk’uko byari bimeze mbere n’ubwo hagikenewe ko rwubakwa neza.

Nzamukosha Olive ni umwe muri bo wagize ati” Abacu twibuka baruhukiye hano ni abishwe mu 1991 kandi bishwe bashinyaguriwe. Amateka ya hano arihariye kuko ubuyobozi bw’icyo gihe bwarareberaga ndetse akaba aribwo butanga itegeko ko bicwa, kuri iyi nshuro rero turishimye kuko byibuze aharuhukiye abacu harasakawe ntabwo imibiri ikinyagirirwamo n’ubwo hakwiye kuba hakorwa neza tukagira Urwibutso rubitse abacu n’amateka ya Jenoside dushobora no gusobanurira abanyamahanga badusura nabo bakayasobanukirwa bakadufasha kurwanya abayapfobya bihishe iwabo”

Umuyobozi wa IBUKA mu Murenge wa Kinigi, Munyarutete Joseph avuga ko kwicwa kw’Abatutsi bari batuye muri Kinigi byakoranywe ubugome bukabije ndetse ubona ko byari byarateguwe n’ubwo ho yakozwe kare.

Yagize ati “Umututsi wa mbere wishwe yitwaga Bagayindiro Ndagijimana Samuel, yishwe kuri 26 Mutarama 1991 biturutse ku itegeko rya Burugumesitiri Gasana, yishwe urw’agashinyaguro kuko ari abagore bamwicishije amabuye mu gihe uwishwe nyuma ari Umubyeyi wanjye witwaga Akumwami wishwe ku itariki 23 Gashyantare 1991. Muri 1994 bari barabamaze abari barasigaye batishwe mu 1991, Inkotanyi zarababohoye zibajyana mu gice zari zarafashe muri Butaro bararusimbuka”.

Abarokotse Jenoside yakorewe Abatutsi bo mu Kinigi, basaba ababa bazi cyangwa bafite amakuru y’ahaba harajugunywe imibiri kuyatanga kuko ariyo nzira nziza iganisha ku bumwe n’ubwiyunge.

Mukashyaka Esperance yagize ati ” Kuri ubu n’ubwo Abarokotse ubuzima bugenda butera imbere, turacyafite intimba y’uko hari abazi neza ahantu imibiri y’abacu ijugunywe ariko bakaba bataduha amakuru ngo bashakwe bashyingurwe mu cyubahiro, gushyingura uwawe birakuruhura ndetse ugira n’aho umwibukira, turasaba ababa bafite amakuru kuri iyo mibiri kuyatanga kuko niyo nzira nziza izatugeza ku bumwe n’ubwiyunge”

Umuyobozi w’Umurenge wa Kinigi, Twagirimana Innocent yavuze ko bazakomeza gukora ubuvugizi kugira ngo aharuhukiye imibiri y’Abazize Jenoside yakorewe Abatutsi rwo mu Kinigi rwubakwe neza kuko bizabafasha kumenyekanisha umwihariko w’amateka yayo cyane cyane nk’aha hakorewe igerageza.

Guverineri w’Intara y’Amajyaruguru, Nyirarugero Dancille, yasabye abaturage bo muri iyi Ntara gushyigikira gahunda ya Ndi Umunyarwanda, birinda ingengabitekerezo ya Jenoside.

Yagize ati “Ubutumwa dutanga muri iki gihe ni ugukomeza Abarokotse Jenoside yakorewe Abatutsi tunabihanganisha. Abaturage turabasaba kwirinda ingengabitekerezo ya Jenoside ahubwo bagashyigikira gahunda ya Ndi Umunyarwanda bakibonamo ubunyarwanda kurusha kwibona mu moko”.

Mu gikorwa cyo kwibuka kuri iyi nshuro, haremewe abantu babiri barokotse Jenoside yakorewe Abatutsi batishoboye bahabwa inka ebyiri bigizwemo uruhare n’abafatanyabikorwa bw’Akarere ka Musanze mu by’amahoteli.

Mu Rwibutso rw’abazize Jenoside yakorewe Abatutsi rwa Kinigi, haruhukiyemo imibiri 136 y’abishwe mu gihe k’igeragezwa rya Jenoside. Kuri ubu rumaze gusakarwa ngo iyo mibiri idakomeza kwangirika bikaba biteganyijwe ko muri 2023 ruzaba rwarubatswe neza imibiri igashyirwa ahantu idashobora kwangirika.

Habanje gukorwa urugendo rwo kwibuka Abatutsi bo mu Kinigi bishwe mu 1991 mu igeragezwa rya Jenoside

Haremewe abantu babiri barokotse Jenoside yakorewe Abatutsi batishoboye bahabwa inka ebyiri

Abitabiriye bunamiye Abatutsi bishwe mu igeragezwa rya Jenoside mu Kinigi