Tag: featured

Aba banyeshuri batangiye guhugurwa binyuze mu bukangurambaga bwateguwe na Kaminuza y’u Rwanda ku bufatanye n’Umuryango w’Abanyeshuri biga ubuganga, Medsar, Ikigo cy’Igihugu cy’Ubuzima (RBC) n’Ikigo giharanira uburenganzira no guteza imbere ubuzima (HDI).

Ni ubukangurambaga bwatangiye tariki 22 Gicurasi 2021 buhera mu Ishami rya Kaminuza y’u Rwanda rya Nyagatare. Ku wa 29 Gicurasi 2021 ubu bukangurambaga bwakomereje mu Ishami rya Rukara.

Umuyobozi w’Ishami rishinzwe ubuzima bw’imyororokere muri Medsar, Irakiza Gervais yavuze ko bahisemo gutangiza ubu bukangurambaga nyuma yo kubona ko amakuru y’ubuzima bw’imyororokere mu rubyiruko rurimo n’urwiga kaminuza akiri make.

Ati “Dukurikije imibare biragaragara ko amakuru ku buzima bw’imyororokere akiri make yaba mu banyeshuri ba kaminuza ndetse n’ahandi hatandukanye, niyo mpamvu nk’urubyiruko dukwiye gutanga uruhare rwacu mu kugeza ku bandi amakuru ajyanye n’ubuzima bw’imyororokere tugashyira hamwe n’inzego zibishinzwe tukarwanya ingaruka ziterwa no kutagira makuru ahagije, zirimo inda zitateguwe, indwara zandurira mu mibonano mpuzabitsina ndetse nibindi.”

Kayitesi Ange uri mu banyeshuri ba Kaminuza y’u Rwanda, Ishami rya Rukara bahuguwe ku buzima bw’imyororokere, yavuze ko ubumenyi bahawe buzabafasha mu kwirinda ibibazo bashobora guterwa no kutagira amakuru ahagije ku buzima bwabo.

Ati “Twishimiye cyane iyi gahunda kuko batwigishije uburyo tugomba kwirinda tukarinda ubuzima bwacu ndetse banatugejejeho bimwe mu bikoresho twakwifashisha mu kwirinda yaba inda zitateguwe ndetse n’indwara zitandukanye zandurira mu mibonano mpuzabitsina, akarusho banatwibukije ko izo serivisi dushobora kuzibona ku bitaro no ku bigo nderabuzima bitwegereye.”

HDI yavuze ko aya mahugurwa yageneye abanyeshuri bashya nyuma yo kubona ko iyo batangiye umwaka wa mbere wa Kaminuza bisanga mu buzima bufite ukwigenga kwinshi kurusha uko bari basanzwe bakiri mu mashuri yisumbuye, bikaba byababera intandaro yo guhura n’ingaruka zitandukanye ziterwa no kutagira amakuru ku buzima bw’imyororokere.

Umuyobozi ushinzwe poragamu muri HDI, Rukundo Athanase yavuze ko ari inshingano za buri wese kugira ngo urubyiruko rubone amakuru ahagije ku bijyanye n’ubuzima bw’imyororokere.

Ati “Abanyeshuri iyo badafite amakuru nyayo ku buzima bw’imyororokere ngo babone serivisi bakeneye bashobora kwisanga ubuzima bwabo bwangiritse. Ni ingenzi y’uko dukora ibishobobyose ngo tubagezeho aya makuru ndetse tubarangire n’aho babona izi serivisi.”

Biteganyijwe ko ubu bukangurambaga buzagera mu mashami yose ya Kaminuza y’u Rwanda, akazajya atangwa mu minsi ibiri isoza icyumweru. Kugeza ubu amaze gutangwa mu mashami ya Rukara na Nyagatare mu munani agize Kaminuza y’u Rwanda.

Abanyeshuri bashya mu mashami atandukanye ya Kaminuza y’u Rwanda bishimiye aya mahugurwa

Umuyobozi w’Ishami rishinzwe ubuzima bw’imyororokere muri Medsar, Irakiza Gervais yavuze ko bahisemo gutangiza ubu bukangurambaga nyuma yo kubona ko amakuru y’ubuzima bw’imyororokere mu rubyiruko rurimo n’urwiga kaminuza akiri make

Umuyobozi ushinzwe poragamu muri HDI, Rukundo Athanase yavuze ko ari inshingano za buri wese kugira ngo urubyiruko rubone amakuru ahagije ku bijyanye n’ubuzima bw’imyororokere

Birumvikana ko ubwiyongere bw’abaturage bujyana n’ubw’ibyo bakenera kugira ngo bagire ubuzima bwiza. Ibi ahanini bigendana n’ibikorwa remezo nk’imihanda, inyubako, amavuriro n’ibindi, kandi ibyo bigatangira kwitegurwa hakiri kare.

Ubwiyongere bw’abantu kandi n’iterambere ryabo ntibisigana n’ubw’ibinyabiziga, byiyongera ku kigero cya 12% ku mwaka. Iyo imodoka zabaye nyinshi bizamura itumizwa ry’ibikomoka kuri peteroli birimo lisansi na mazutu, bisanzwe bigize 12% by’ibyo u Rwanda rukura hanze yarwo buri mwaka, ndetse bikaza mu bihenda Abanyarwanda cyane.

Ibi kandi bizongera ingano y’umwuka uhumanye (CO2) u Rwanda rwohereza mu kirere, ushobora kuzagera kuri toni miliyoni 12.1 mu 2030, uvuye kuri toni miliyoni 5.3 mu 2015.

Nyuma yo gusuzuma ibi byose, byatumye Umujyi wa Kigali ukora inyigo yagaragaje kuko mu rwego rwo kugabanya ubwo bwiyongere bw’umwuka uhumanye woherezwa mu kirere ndetse n’ubwa lisansi na mazutu bihenze, hakenewe gutangira kwigira hamwe uburyo bwo guhindura urwego rw’ubwikorezi, rugashingira ku ikoranabuhanga rigezweho rikoresha amashanyarazi, aho kuba imodoka zikoresha lisansi na mazutu.

Intego ni uko mu 2030, nibura 30% bya moto ziri muri Kigali zizaba zikoresha amashanyarazi, mu gihe imodoka zigomba kuba ari 8%, izitwara abantu mu buryo bwa rusange zikaba ari 20% ndetse na 25% bw’izindi modoka zisanzwe.

Birumvikana ko ibi byose bizagerwaho binyuze mu guhindura urwego rw’ubwikorezi bw’abantu n’ibintu muri rusange, ari nayo mpamvu Leta imaze iminsi mu biganiro n’abafatanyabikorwa bari gukora inyigo yatuma isura y’ubwikorezi muri Kigali ihinduka burundu.

Utumodoka tugendera mu kirere duhanzwe amaso

Kimwe mu bisubizo bimaze kuboneka mu rugendo rwo kunoza ubwikorezi, ni ikoreshwa ry’utumodoka twifashisha amashanyarazi, tuzaba twagejejwe muri Kigali bitarenze umwaka wa 2024.

Ubu buryo buzwi nka Personal Rapid Transit (PRT), buzaba bugizwe n’utumodoka dukoreshwa n’amashanyarazi ashobora no gukomoka ku mirasire y’izuba, tukagenda ku muvuduko ushobora kugera ku bilometero 100 ku isaha kandi kamwe kagatwara abantu bashobora kugera ku munani, ntikagire umuntu ugatwara kandi kakagenda kadasakuza.

Uyu mushinga uzashyirwa mu bikorwa n’Ikigo ‘Vuba Corp’ cyo muri Leta ya Colorado muri Amerika ku bufatanye na Leta y’u Rwanda, aho kugeza ubu impande zombi zikiri mu biganiro bya nyuma bizanoza bikanemeza imiterere y’umushinga, mbere y’uko imirimo yo kubaka itangira.

Amasezerano y’ubu bufatanye yashyizweho umukono ku wa 30 Gicurasi 2021 hagati ya VUBA Corp na Minisiteri y’Ibikorwa Remezo.

Munyabagisha Valens Uhagarariye Vuba ku Mugabane wa Afurika yabwiye IGIHE ko uyu mushinga ari igisubizo ku bikorwa by’ingendo mu Mujyi wa Kigali.

Yagize ati “Ubu buryo buzaba ari igisubizo mu rwego rw’ingendo mu Mujyi wa Kigali, buzagabanya umubyigano w’imodoka, bugabanye umwuka wangiza ikirere kandi bwongere umutekano kuko utu dumodoka tuzaba dufashwe na ‘magnet’ ku buryo tudapfa gukora impanuka.”

Yavuze ko aba bashoramari bashatse kugira u Rwanda ahantu h’ibanze bazashyira ibikorwa byabo bizagukira no mu yindi mijyi iri hagati ya 20 na 30 ku Mugabane wa Afurika mu myaka iri imbere.

Yakomeje ati “Bakuruwe n’imikorere ya Leta y’u Rwanda, urabizi ko u Rwanda ruri mu bihugu byorohereza abashoramari. Ikindi u Rwanda rufite ibikorwa remezo by’ibanze nka internet bizatuma uyu mushinga ushoboka. Ni abantu b’inshuti z’u Rwanda kandi bifuza ko uyu mushinga uba umwihariko ku Rwanda.”

Muri Mata 2019, Paul Klahn, Umuyobozi Mukuru wa Vuba, akaba n’umwubatsi (engineer) uzwi cyane mu bikorwa by’utu tumodoka ku rwego rw’Isi, yabonanye na Perezida Paul Kagame, wamwijeje ubushake bwa Leta y’u Rwanda mu gushyira mu bikorwa uyu mushinga.

Byitezwe ko mu Rwanda hazubakwa uruganda ruzajya rukora utu tumodoka, ndetse mu gihe ‘Vuba’ izagukira mu bindi bice bya Afurika, nk’uko gahunda yabo ibiteganya, utumodoka twakorewe mu Rwanda nitwo tuzajya twoherezwa mu mahanga.

Imiterere y’umushinga igaragaza ko ‘Vuba’ izubaka inkingi, twagereranya nk’imihanda izanyuramo utu tumodoka, ku ntera y’ibirometero 144 mu Mujyi wa Kigali wose.

Muri izo nzira zose, hazashyirwa sitasiyo (aho abagenzi bategerereza imodoka) 98 zizajya zitegerwaho n’abagenzi, kandi kuva kuri sitasiyo imwe ujya ku yindi bikazajya bitwara iminota itarenze 30.

Muri za nkingi zizengurutse umujyi, hazashyirwamo utumodoka 2500, aho umuntu ashobora kuzajya agahamagara akoresheje porogaramu izashyirwa muri telefoni ye, kakamugeraho “mu gihe kiri munsi y’umunota umwe”.

N’ubwo bikiri mu nyigo, amakuru IGIHE yamenye agaragaza ko umuntu ashobora kuzajya yishyura akoresheje Tap & Go zisanzwe zimenyerewe mu kwishyura ingendo mu modoka rusange mu Mujyi wa Kigali.

Utu tumodoka tushobora kuzagenda duhagarara kuri sitasiyo tugafata abagenzi nk’uko bigenda ku modoka rusange, ariko hari n’uburyo tuzajya tuva mu gace kamwe tukagera mu kandi nta handi duhagaze.

Munyabagisha yavuze ko Leta izajya inama n’Ikigo cya Vuba mu rwego rwo gushyiraho imihanda y’ingenzi izakoreshwa n’utu tumodoka.

Yagize ati “Ni ibintu bigenewe Abanyarwanda, ni bo rero bazerekana ibyo bakeneye muri uyu mushinga.”

Ubukungu bw’u Rwanda buzungukira muri uyu mushinga

Uyu mushinga uzakenera nibura miliyari 1.3$, azava mu bikorera, ariko Leta nayo ikazatanga umusanzu wayo cyane cyane mu bikorwa by’inyigo yawo.

Aya ni amafaranga menshi ariko utekereje ikiguzi cyo gukoresha ubundi buryo busanzwe butari PRT, usanga ari agatonyanga mu nyanja.

Nk’ubu kugira ngo Umujyi uzabashe guhaza abantu miliyoni 4,8 bazaba bawutuye mu 2040, byasaba kubaka indi mihanda no kwagura isanzwe, bigatwara ubutaka bwinshi, kwiyongera kw’imodoka ndetse n’ikiguzi cy’ibitumizwa mu mahanga.

Ikindi gisubizo gishoboka ni gari ya moshi ariko na yo irahenze cyane kuko kuyubaka mu gihugu cy’imisozi nk’u Rwanda bisaba kuyisatura, ibituma igiciro gitumbagira cyane.

Nyuma yo kugenzura ibyo byose, hatoranyijwe PRT nk’uburyo buhendutse, bwihuta kandi butangiza ibidukikije. Byitezwe ko mu 2026, nibura ingendo 39% by’izibera muri Kigali zizaba zikoresha uburyo bwa PRT bw’Ikigo cya ‘Vuba’, bukazasimbura ubwari busanzwe nka moto, buzaba bukoreshwa ku kigero cya 8% buvuye kuri 17% bukoreshwaho uyu munsi.

Ku isaha imwe, uburyo bwa PRT buzaba bufite ubushobozi bwo gutanga serivisi ku bagenzi barenga ibihumbi 21, mu gihe ubu buryo buzagabanya 20% by’ingendo zikorerwa mu mihanda ya Kigali mu myaka 50 iri imbere.

Ku rundi ruhande, ubu buryo bushobora kuzongera miliyari 8$ mu bukungu bw’u Rwanda, usibye ko aya makuru azemezwa neza mu nyigo iri gukorwa. Ibiciro by’urugendo bizaba bijya kungana nk’ibisanzwe bikoreshwa mu Mujyi wa Kigali.

Munyabagisha yavuze ko mu mezi 18 ari imbere, inzego zose bireba zirimo Minisiteri y’Ikoranabuhanga na Inovasiyo, iy’Ibikorwa Remezo, iy’Ibidukikije, Umujyi wa Kigali n’izindi nzego zose, bagiye gukora “Inyigo ya nyuma izerekana uko umushinga uzaba umeze.”

Iyi nyigo izarangira ibikorwa byo kubaka bitangira, kandi bikazihuta kuko “U Rwanda rufite ubutaka bwiza bukomeye”, ku buryo mu 2024, ibyo gutegereza imodoka isaha no gutinda mu nzira bizasigara mu mateka.

Imiterere y’ubwikorezi bwa PRT muri Kigali

Uburyo igenzurwa rizajya rikorwa

VIDEO & PHOTOS: This shows how Personal Rapid Transit/Automated Transit Network will work in @CityofKigali . Vehicles move off from the guideway before slowing at a station. Other vehicles are able to bypass the station and continue along at normal speed. https://t.co/f9xGvHvuZm pic.twitter.com/TRKvAVApMg

— Ministry of Infrastructure | Rwanda (@RwandaInfra) May 29, 2021

Utu tumodoka tuzaca mu Mujyi wa Kigali rwagati

Imbere ya Kigali Convention Centre hari mu hazanyura utu tumodoka

Utumodoka 2500 ni two tuzakwirakwizwa mu Mujyi wa Kigali

Kuri Kigali Heights hazaba hari sitasiyo y’utu tumodoka tugendera mu kirere

Umuntu utumije utu tumodoka azajya atubona mu gihe kiri munsi y’umunota umwe

Kuva Rusesabagina ukurikiranyweho ibyaha bitandukanye birimo n’iby’iterabwoba yatabwa muri yombi muri Kanama 2020, abo mu muryango we bagerageje kweza no gusibanganya ibyaha akurikiranyweho.

Muri Nzeri 2020, ubwo Rusesabagina yagezwaga imbere y’ubutabera bwa mbere, umuryango we wavuze ko utemera abanyamategeko batoranyijwe n’uyu mugabo w’imyaka 66, kuko ngo babogamiye ku ruhande rw’u Rwanda, ugena abandi barindwi barimo Umunyarwanda umwe nk’abagomba kumwunganira.

Ibyatangajwe n’uyu muryango byaje kunyomozwa na Rusesabagina, aho yavuze ko ari we wihitiyemo abamwunganira kandi ko anezerewe kuba akorana nabo. Ati “Ni njye watoranyije abanyunganira kandi nishimiye kuba mbafite. Gusa umuryango wanjye ntabwo wabimenyeshejwe.”

Na nyuma y’ibi umuryango wa Rusesabagina ahanini bigizwemo uruhare n’umukobwa we Carine Kanimba wakomeje kwiruka mu bihugu by’u Burayi na Amerika bashaka uburyo ifungwa ndetse no kugezwa imbere y’ubutabera kwa Rusesabagina byaburizwamo, ndetse ngo byaba ngombwa na Leta y’u Rwanda ikaba yashyirwaho igitutu.

Carine Kanimba, yageze n’aho anenga imyitwarire y’igihugu y’u Bubiligi nk’igihugu cya kabiri cya se, aho yibazaga icyo kuba se afite ubwenegihugu bw’iki gihugu bimumariye mu gihe kidashobora kumukurikirana ngo arekurwe.

Uku guhihibikana no gupfunda imitwe kw’abagize umuryango wa Rusesabagina kwatumye umwaka ushize Umudepite wo muri Leta Zunze Ubumwe za Amerika, Carolyn B. Maloney yandikira Perezida Kagame amusaba kurekura Rusesabagina.

Ibi byose byakorwaga n’umuryango wa Rusesabagina ushaka ko Leta y’u Rwanda ishyirwaho igitutu n’amahanga ikamurekura, gusa ntibyabahiriye kuko u Rwanda rutasibye kugaragaza ko ikibazo cye kiri mu rukiko, hakwiye gutegereza umwanzuro ruzagifataho.

Badukanye ikinyoma cy’uko yakorewe iyicarubozo

Amakuru dukesha The Great Lakes Eye avuga ko mu minsi ishize abo mu muryango wa Paul Rusesabagina bagiranye ikiganiro bifashishije ikoranabuhanga. Bumvikanyenye mu nkuru nshya y’uko ngo uyu mugabo uherutse kwikura mu rubanza yakorewe iyicarubozo.

Iki kiganiro kitabiriwe n’abana ba Rusesabagina barimo Carine Kanimba, Anaïse Kanimba na Trésor Rusesabagina. Cyanitabiriwe kandi n’Umuvugizi w’Umuryango washinzwe na Rusesabagina, Kitty Kurth, Umujyanama wa Rusesabagina, Brian Endless na Peter Robinson uri mu banyamategeko barindwi bari bashyizweho n’umuryango wa Rusesabagina ngo bamwunganire.

Muri iki kiganiro Brian Endless yumvikanye avuga ko mu minsi ya mbere Rusesabagina afatwa yafungiwe aho yise ’mu ibagiro’ aho ngo yumvaga amajwi y’izindi mfugwa zirimo n’abagore ziboroga.

Hejuru y’iki kinyoma Brian Endless yakomeje avuga ko Rusesabagina yari afunzwe aziritse amaboko, amaguru n’umunwa ndetse ngo ku buryo hari n’umusirikare wamukandagiye ku ijosi. Bavuze ko Rusesabagina ateremererwa gusura ndetse akaba yarabujijwe uburenganzira bwo kwihitiramo abamwunganira mu mategeko.

Ibyavugiwe muri iki kiganiro byafatwa nk’ibinyoma kuko Rusesabagina ubwo yafatwaga yasuwe n’ibinyamakuru birimo The New York Times na The East African aho afungiye kandi yavuze ko afashwe neza.

Yagize ati “Bamfashe neza. Nijoro nariye amakaroni, uyu munsi bampaye igikoma. Nanyoye imiti kubera ko ngendana imiti y’umuvuduko w’amaraso n’uburwayi bujyanye n’umutima.”

Uretse kubivuga iby’uko afashwe neza kandi byagaragazwaga n’amashusho yafatiwe mu cyumba yari afungiyemo, aho yari yahawe igitanda, matola n’inzitiramibu n’ubwiherero bwujuje byose. Mu rukiko ntiyigeze avuga ko yigeze afungwa aziritse cyangwa afungiwe mu gisa n’ibagiro kandi nta n’ikimenyetso na kimwe cyabigaragazaga.

Ikijyanye n’uko Rusesabagina yabujijwe kwihitiramo abamwunganira nacyo umuntu yacyita ikinyoma kuko iki gihe yavuze ko yahawe ubu burenganzira.

Yagize ati “Nahawe amahitamo yo kwishakira abanyunganira. Iperereza riracyakomeje, ntabwo nshaka kuvuga ku bijyanye n’urubanza mbere yo kugera imbere y’urukiko.”

Abakurikiranira hafi imyitwarire y’abo kwa Rusesabagina bavuga ko badukanye iki kinyoma cy’uko uyu mugabo yakorewe iyicarubozo kugira ngo bongere kubyutsa ikibazo cye mu itangazamakuru cyasaga nk’ikimaze guceceka kuva aho yikuriye mu rubanza.

Ibi binyoma kandi ni ubundi buryo bwo kuyobya abantu ngo batita ku buhamya bw’abandi bantu 20 bareganwa barimo na Nsabimana Callixte Sankara bukomeje kuza bumushinja kugira uruhare mu bitero by’iterabwoba byibasiye u Rwanda, binyuze mu mutwe wa MRCD-FLN yashinze.

Rusesabagina uri imbere y’ubutabera bw’u Rwanda aregwa ibyaha icyenda birimo kurema umutwe w’ingabo utemewe, Kuba mu mutwe w’iterabwoba, Gutera inkunga iterabwoba, Ubwicanyi nk’igikorwa cy’iterabwoba, Itwarwa ry’umuntu ritemewe n’amategeko nk’igikorwa cy’iterabwoba no Kwiba hakoreshejwe intwaro nk’igikorwa cy’iterabwoba.

Umuryango wa Paul Rusesabagina watangiye guhimba ibirego by’uko yakorewe iyicarubozo

Ibyavugiwe muri iki kiganiro cy’abo kwa Rusesabagina benshi bemeza ko byari bigamije kuyobya uburari no kubyutsa ikibazo cye mu itangazamakuru

Abenshi muri bo bavuze ko inzu zabo zasenyutse abandi bakaba bagifite ubwoba bw’uko ikirunga gishobora kuruka.

Abasigaye bashyizwe mu Nkambi ya Busasamana yagenwe kuzajya yakira impunzi mu gihe cy’ibiza cyangwa intambara.

Semasaka Zirimo uturuka muri Teritwari ya Nyiragongo, mu gace ka Buhunga yavuze ko inzu zabo zasenyutse bakaba nta hantu bafite ho kujya.

Ati “Twebwe dutuye munsi y’ikirunga cya Nyiragongo na n’ubu turacyafite ubwoba ko cyakongera kikarukira ahandi. Iwacu amazu yacu yarasenyutse nta hantu dufite ho kujya kandi hano mu Rwanda twakiriwe neza. Turashima Abanyarwanda. Nk’ubu Croix Rouge yaduhaye uburingiti, amasahani, ibikombe n’imikeka yo kuraraho ariko banadufashe tujye dusohoka kuko dukeneye no kwiyogoshesha’’.

Axel Ngoyi Mujimbi waturutse mu mujyi wa Goma yavuze ko kubura aho ajya kuko inzu yakodeshaga yahiye n’ibintu bigahiramo aribyo byatumye aguma mu Rwanda kuko nta hantu afite yajya.

Ati “Twishimiye ukuntu mu Rwanda batwakiriye kuburyo twumva ari iwacu. Nkanjye ubu nta hantu mfite ho kujya, ndi umupangayi kandi inzu nakodeshaga yarahiye n’ibintu byose bihiramo sinabasha gusubira muri Congo ngo nirirwe nzerera, nahisemo kwigumira mu Rwanda kuko ndi kubona imfashanyo.”

Karangwa Eugene ushinzwe gahunda yo kurinda, gukumira no kurwanya ibiza muri Croix Rouge y’u Rwanda avuga ko abahageze bahawe ibikoresho by’ingenzi.

Ati “Kuva baza twabagejejeho ibikorwa by’ubutabazi harimo kubakira n’ubukangurambaga bwo kwirinda Covid-19,isuku n’isukura. Banahawe ibikoresho by’ibanze. Turimo kubaba hafi kubyo bakeneye tukamenyesha leta cyangwa HCR kuko hari abafite ubumuga, abagore batwite by’umwihariko hari abana barenga 60 bamaze guhuzwa n’imiryango yabo’’.

Umuyobozi w’akarere ka Rubavu, Habyarimana Gilbert yavuze ko umubare munini watashye abasigaye ubuyobozi bukomeje gukurikirana imibereho yabo. Yavuze ko uzashaka gutaha azafashwa.

Ati “Abenshi basubiye iwabo naho abiyemeje kuguma mu Rwanda bari bari mu murenge wa Rugerero bajyanywe mu nkambi ya Busasamana kandi hari abandi bari hirya no hino mu miryango yabo bose dukomeje kubitaho kuburyo ukeneye gutaha ku bushake yafashwa agataha mu gihugu cye. Twakoze uko dushoboye twakira abantu nk’uko umuco nyarwanda ubisaba kandi tuzakomeza mu kurengera ubuzima bw’abantu’’.

Imitingito yakurikiye iruka rya Nyiragongo mu karere ka Rubavu yasenye inzu zirenga 300 naho 1267 zirangirika bikomeye. Kuri ubu imitingito ikomeje kugabanya ubukana.

Muri Congo, abantu basaga 30 nibo bahitanywe n’iruka rya Nyiragongo mu gihe inzu zisaga 500 zasenyutse.

Abagera ku bihumbi 12 bamaze gusubira iwabo

Hashize iminsi ikirunga cya Nyiragongo gicogoye kuruka bikaba byaratumye bamwe bahitamo gusubira mu byabo

Imodoka za RDF nizo ziri gufasha aba baturage gusubira iwabo zikabageza ku mupaka

Inkambi ya Busasamana ikomeje kubakwamo inzu zishobora kwifashishwa mu gihe cy’ibiza cyangwa ikindi cyatuma haboneka impunzi

Abasigaye mu Rwanda bashyizwe mu nkambi ya Nkamira

Abari mu nkambi ya Busasamana bashyiriweho uburyo bwo kwidagadura

Abasigaye mu nkambi bitaweho. Amazi meza ari mu by’ibanze bagejejweho

Ibi babisabwe kuri uyu wa Gatanu tariki ya 28 Gicurasi 2021 n’umuyobozi w’Ikigo cy’Igihugu gishinzwe Igororamuco (NRS), Mufulukye Fred mu bukangurambaga bwo kurwanya ibiyobyabwenge bwari bwateguye n’umuryango Purpose Rwanda.

Mufulukye yavuze ko mu rwego rwo kugira ngo hubakwe u Rwanda ruzira ibiyobyabwenge abayobozi b’inzego z’ibanze uhereye mu midugudu n’amasibo bakwiye kujya bamenya ababikoresha.

Ati “Biradusaba ko buri muryango ukwiye kumva ko kurwanya ibiyobyabwenge biwureba ikindi birasaba inzego z’ibanze kuko kuko usanga binyobwa mu midugudu no mu masibo, rero birasaba guhaguruka abayobozi ku rwego rw’imidugudu no ku isibo bakabyanga bagashyiraho inzego zo kubirwanya bakamenya n’ababinywa.”

Yongeyeho ko urugamba rwo kurwanya ibiyobyabwenge buri Munyarwanda yari akwiriye kurugira urwe cyane ngo ko mu bantu bagera 3000 bari mu bigo ngororamuco benshi muri bo aribyo bazize.

Umuyobozi w’Umuryango, Purpose Rwanda, Bruno Agaba we yavuze ko bahisemo ubukangurambaga bwo gushishikariza urubyiruko kurwanya ibiyobyabwenge kuko bidindiza iterambere ry’igihugu.

Ati “ Twasanze impamvu ituma urubyiruko rutagera ku iterambere rirambye atari ukubura amafaranga cyangwa umuryango ahubwo ni ibiyobyabwenge, turavuga ngo Purpose Rwanda tugomba kubaka u Rwanda ruzira ibiyobyabwenge mu buryo bubiri burimo kubikumira no kubirwanya aho biri.”

Yongeyeho ko gushishikariza urubyiruko kwirinda ibiyobyabwenge bazajya babikora babinyujije mu nyigisho zitangwa n’amatsinda ya bamwe mu bakoreshaga ibiyobyabwenge.

Nyirasangwa Angelique wahoze akoresha ibiyobyabwenge, yavuze ko ubuyobozi bwagakwiye kujya bubafasha bukabashakira igishoro kugira ngo biteze imbere kuko ari kimwe mu bituma babivamo

Ati “ Njye mbona bagiye badushakira ibishobora tugacuruza cyangwa se abize imyuga bakayibyaza, umusaruro byadufasha kuko ahanini usanga hari n’ubwo umuntu ava muri ibyo bigo ngororamuco akabura ibintu akora bigatuma asubira muri za ngeso mbi.”

Ibiyobyabwenge bikunze kugaragazwa nk’imwe mu mpamvu idindiza urubyiruko ndetse Leta ikaba yaragiye ishyiraho ingamba zitandukanye zigamije kubirwanya.

Umuyobozi w’Ikigo cy’Igihugu gishinzwe igororamuco, Mufulukye Fred yasabye inzego z’ibanze kumenya abakoresha ibiyobyabwenge

Iyi nama yafatiwemo ingamba zo kureba icyakorwa kugira ngo ikoreshwa ry’ibiyobyabwenge rigabanuke

Aya marushanwa yateguwe na Minisiteri y’Uburezi ifatanyije n’Umuryango w’Ibihugu bikoresha ururimi rw’Igifaransa, OIF hagamijwe gutoza abakiri bato by’umwihariko abari mu mashuri yisumbuye kuvuga no kwandika neza Igifaransa.

Aya marushanwa yari afite insanganyamatsiko igira iti ‘Igifaransa cyongeye kugaragara mu Rwanda’, yabaye kuva ku rwego rw’ishuri, nyuma abahiganwa baza kugera ku rwego rw’Akarere n’Intara.

Kuri uyu wa Gatandatu tariki 29 Gicurasi 2021, muri Green Hills Academy mu Mujyi wa Kigali, nibwo habereye icyiciro cya nyuma cy’aya marushanwa ndetse hatorwa uwatsinze ku rwego rw’Igihugu.

Uyu muhango wari witabiriwe n’Umunyamabanga Mukuru wa OIF, Mushikiwabo Louise ndetse n’Umunyamabanga wa Leta muri Minisiteri y’Uburezi ushinzwe Amashuri y’Incuke, Abanza n’Ayisumbuye, Twagirayezu Gaspard.

Abanyeshuri bageze ku rwego rw’Igihugu ni abo mu mashuri ya Ecole Secondaire de Kayonza, TTC Zaza, TTC Rubengera, TTC Mwezi, TTC Save, Ecole Des Sciences Byimana ndetse na Ecole Des Sciences de Musanze.

Tonna Christa wiga muri Ecole des Sciences Byimana niwe wahize abandi ku rwego rw’igihugu mu kuvuga no gusoma neza ururimi rw’Igifaransa.

Mu kiganiro yagiranye na IGIHE nyuma yo gushyikiriza igikombe no guhabwa ishimwe ririmo ibikoresho by’ishuri nka mudasobwa n’ibindi, yavuze ko kuri ubu Isi yabaye umudugudu bityo kuba azi indimi bikaba bizamufasha mu buzima bwo hanze ari nabyo ashishikariza abandi.

Ati “Twebwe, urubyiruko Isi ni iyacu, tugomba gukoresha impano dufite, kwiga dushyizeho umwete kuko ntabwo uba uzi ikizakubeshyaho, ushobora kwiga Biology, Chimie n’ibindi ariko utazi indimi kuko niba uri umuganga ntabwo uzavura abarwayi b’Abanyarwanda gusa, ni ngombwa rero kwiga indimi zitandukanye.”

Umunyamabanga Mukuru wa OIF, Louise Mushikiwabo yabwiye abitabiriye aya marushanwa ko bakwiye gukomeza gushyira umuhate mu kwiga Igifaransa banabishishikariza abandi kuko muri iki gihe Isi yabaye umudugudu.

Ati “Niba Igifaransa kivugwa mu bihugu 88, urumva ko ari amahirwe kuri wowe ushobora kuba ukizi, aho ushobora kujya muri ibyo bihugu byose ntugirireyo ikibazo. Ku bakiri bato uyu ni umwanya mwiza wo kwiga Igifaransa ariko munabishishikariza bagenzi banyu.”

Mushikiwabo yavuze ko muri gahunda ya OIF abereye umuyobozi harimo gukora ubukangurambaga bugamije gushishikariza abantu gukoresha Igifaransa by’umwihariko mu bihugu binyamuryango.

Muri iri rushanwa, abanyeshuri bandikaga inyandiko nto, bakanazisoma neza cyangwa abagize akanama nkemurampaka bakabasomera amagambo mu rurimi rw’Igifaransa noneho abanyeshuri bakayumva bagenda bayandika. Muri ibyo byose hakarebwa uwahize abandi.

Aya marushanwa abaye ku nshuro ya mbere ariko OIF na Minisiteri y’Uburezi batangaza ko azakomeza gukorwa mu rwego rwo gukomeza gushishikariza abakiri bato kwiga Igifaransa.

Mu minsi ishize kandi Ikigega Mpuzamahanga cy’Abafaransa gishinzwe Iterambere (Agence Française de Developpément, AFD), Umuryango w’Ibihugu bikoresha Igifaransa, ndetse na Minisiteri y’Uburezi basinyanye amasezerano y’ubufatanye anateganya uburyo buhamye bwo kwigisha Igifaransa mu mashuri.

Ni amasezerano ateganya kandi uburyo bwa gahunda yaguye yo kwigisha Igifaransa no kugiteza imbere mu mashuri ahagiye kurebwa uko cyakongererwa amasaha, kuba cyazajya kibazwa mu bizamini bya Leta n’ibindi.

Abanyeshuri baturutse mu mashuri yo hirya no hino mu Gihugu bitabiriye aya marushanwa

Aba bana bato bashimishije abitabiriye uyu muhango bitewe n’ubuhanga bafite bwo kuririmba mu Gifaransa

Minisitiri Twagirayezu yambika umudari umwe mu batsinze muri aya marushanwa

Umunyamabanga Mukuru wa OIF, Louise Mushikiwabo na Minisitiri Twagirayezu bashyikiriza igikombe uwabaye uwa mbere mu gihugu hose

Tona Christa yahawe igikombe cy’uwahize abandi mu gihugu hose mu kuvuga no kwandika neza Igifaransa

Tona Christa wiga muri Ecole des Sciences Byimana niwe wahize abandi mu kuvuga no kwandika neza Igifaransa mu gihugu hose

Umunyamabanga Mukuru wa OIF, Louise Mushikiwabo yavuze ko gahunda y’amarushanwa agamije gukundisha abakiri bato Igifaransa izakomeza

Mushikiwabo yahawe impano

Amafoto: Uwumukiza Nanie

Abafunzwe ni ushinzwe gukusanya imibare (Data Manager) n’ushinzwe gufata ibipimo bya Covid-19.

Bivugwa ko bagiye bafata ibipimo bya Covid-19 bagasuzuma abantu barangiza bakabaha ibisubizo ariko bakishyuza amafaranga ibihumbi umunani kuri buri muntu mu gihe iyo serivisi itangirwa ubuntu ku bakekwaho kuba barahuye n’abanduye Covid19.

Bafashwe ubwo bari barimo gutanga ibisubizo ku banye-Congo bari bahungiye mu Rwanda bihuta bashaka kujya ku kibuga cy’indege i Kanombe ngo bafate indege ibageze i Kinshasa.

Ngo abo bakoze babujije abo banye-Congo kwishyura kuri banki ayo mafaranga, babasaba kuyabaha mu ntoki.

Umuvugizi w’Umusigire w’urwego rw’igihugu rushinzwe ubugenzacyaha RIB, Dr Murangira B. Thierry yemeje aya makuru, avuga ko iperereza rikomeje kugira ngo dosiye ikorwe ishyikirizwe ubushinjacyaha.

Ati “Nibyo koko aba bagabo bafatiwe mu murenge wa Gisenyi bakaba bakurikiranyweho icyaha cyo gukoresha ububasha bahabwa n’itegeko mu nyungu zabo bwite ubu bakaba bafungiye kuri Station ya RIB ya Gisenyi mu gihe iperereza rikomeje kugira ngo hakorwe dosiye ishyikirizwe ubushinjacyaha’’.

Ingingo ya 15 y’itegeko N°54/2018 ryo ku wa 13/08/2018 ryerekeye kurwanya ruswa ivuga ko umukozi wese wa Leta cyangwa undi muntu wese uri mu rwego rwa Leta wifashisha umwanya w’umurimo we cyangwa ububasha afite kubera uwo mwanya agakora ikibujijwe n’itegeko cyangwa ntakore igitegetswe n’itegeko agamije kwihesha cyangwa guhesha undi muntu inyungu itemewe n’amategeko aba akoze icyaha.

Iyo abihamijwe n’urukiko ahanishwa igifungo kitari munsi y’imyaka irindwi (7) ariko kitarenze imyaka icumi (10) n’ihazabu y’amafaranga y’u Rwanda atari munsi ya miliyoni eshanu (5.000.000 FRW) ariko atarenze miliyoni icumi (10. 000.000 FRW). Iyo icyaha gikozwe hagamijwe inyungu ibarwa mu mafaranga, igihano kiba igifungo kitari munsi y’imyaka irindwi (7) ariko kitarenze imyaka icumi (10) n’ihazabu y’amafaranga y’u Rwanda yikubye inshuro kuva kuri eshatu (3) kugeza kuri eshanu (5) z’agaciro k’indonke yatse.

Abafashwe bafungiwe kuri station ya RIB ya Gisenyi mu gihe hagikorwa dosiye ngo ishyikirizwe ubushinjacyaha

Ni umuhango wabereye ku rwibutso rwa Kigali ruri ku Gisozi, witabirwa na Depite Kamanzi uhagarariye urubyiruko mu Nteko Ishinga Amategeko Umutwe w’Abadepite; Meya w’Umujyi wa Kigali, Pudence Rubingisa;u Umwanditsi akaba n’umushakashatsi, Rwagasani Braddock, ndetse na Nyampimga w’u Rwanda 2019, Miss Nimwiza Meghan.

Kuri uyu wa 29 Gicurasi 2021, urwo rubyiruko rwasuye Urwibutso mu rwego rwo kwiga amateka ya Jenoside yakorewe Abatutsi, bashyira indabo ku mva, bunamira inzirakarengane zihashyinguye, bababwa n’ibiganiro byagarutse ku ruhare rwabo mu kurwanya ingengabitekerezo ya Jenoside.

Insanganyamatsiko yagiraga iti “Urubyiruko rw’Uumujyi wa Kigali mu rugamba rwo kurwanya ingengabitekerezo ya Jenoside.”

Depite Kamanzi Ernest yabwiye urwo rubyiruko ko rukwiye gukoresha amahirwe rwahawe n’Igihugu mu kurwanya ingengabitekerezo ya Jenoside, kuko “ni byo u Rwanda rwifuza”.

Mu kiganiro Miss Nimwiza Meghan yagarutse ku gisobanuro cy’ingengabitekerezo, avuga ko “dukwiriye kwima amatwi abatubwira amakuru y’ibihuha kandi tugakoresha imbuga nkoranyambaga tuvuga amateka y’ukuri ku Gihugu cyacu”.

Rwagasani Bladdock yabwiye urubyiruko ko “rukwiye gusoma no kwandika amateka y’Igihugu” bityo bikarufasha guhangana n’abahakana bakanapfobya Jenoside yakorewe Abatutsi.

Umuyobozi wungirije w’Urugaga rw’Urubyiruko rushamikiye ku Muryango RPF Inkotanyi mu Mujyi wa Kigali, Mugesera Sam yavuze ko mu rugamba rwo guhangana n’abapfobya n’abahakana Jenoside ari ngombwa kujya mu mizi y’ikibibatera.

Yakomeje ati “Nk’urubyiruko tukirinda ingengabitekerezo yo ku ishyiga ahubwo tugafata umwanya uhagije wo kwiga amateka y’Igihugu cyacu, tugamije gukuramo amasomo azadufasha guharanira ko ibyabaye bitazongera ukundi.”

Uwo muhango usojwe habaye ibiganiro mu matsinda bigaruka ku bibazo bibangamiye ubumwe bw’Abanyarwanda n’iterambere ry’Igihugu. Ibyagaragajwe birimo ingengabitekerezo yo ku ishyiga, kudashishoza k’urubyiruko, kwigira ba ntibindeba no gukwirakwiza amakuru y’ibihuha.

Nyuma yo kurebera hamwe ibyo bibazo, biyemeje gufata iya mbere mu kubaka Igihugu kibereye bose, bimakaza ubumwe n’ubwiyunge kandi bafatanya kurwanya abahakana n’akanapfobya Jenoside yakorewe Abatutsi.

Miss Nimwiza Meghan ari mu bitabiriye uwo muhango

Muri uwo muhango hanashyizwe indabo ku mva zishyinguyemo imibiri y’abazize Jenoside yakorewe abatutsi

Depite Kamanzi Ernest yabwiye urwo rubyiruko ko rukwiye gukoresha amahirwe rwahawe n’Igihugu mu kurwanya ingengabitekerezo ya Jenoside

Mu kiganiro Miss Nimwiza Meghan yasabye urubyiruko gukoresha imbuga nkoranyambaga ruvuga ukuri ku mateka y’igihugu

Mugesera Sam yavuze ko mu rugamba rwo guhangana n’abapfobya n’abahakana Jenoside ari ngombwa kujya mu mizi y’ikibibatera

Urubyiruko rwasabwe guhashya cyane abagikwirakwiza ingengabitekerezo ya Jenoside babinyujije ku ishyiga

Gutanga urukingo rwa Covid-19 ku bahawe dose ya mbere byatangiye mu gihugu hose. Urukingo rwatanzwe ni urwa AstraZeneca kuko abahawe urwa Pfizer bo bahawe urwa kabiri, ni ukuvuga ko bakingiwe mu buryo bwemewe.

Usibye gukingira, hagaragaye abantu 14 banduye iki cyorezo biganjemo abo mu Mujyi wa Kigali. Ibipimo byafashwe ni 3.694 mu gihe abakize bagasezererwa ari 60.

Kuva iki cyorezo cyagaragara mu Rwanda, abamaze kwandura ni 26.892 mu gihe abapfuye ari 352.

29.05.2021 Amakuru Mashya | Update

Uyu munsi, Abantu 69,591 bahawe doze ya kabiri y’urukingo rwa #COVID19. Iki gikorwa kizakomeza ku munsi w’ejo / Today, 69,591 people received second dose of #COVID19 vaccine. The activity continues tomorrow pic.twitter.com/FApRd1fK3I

— Ministry of Health | Rwanda (@RwandaHealth) May 29, 2021

Aba barimu bazahabwa u Rwanda mu mwaka utaha w’amashuri, baziyongera ku bandi 24 b’abakorerabushake bari mu mashuri nderabarezi azwi nka TTC n’amashuri yigisha siyansi ndetse n’ishuri ryigenga rimwe. Aba barimu bashyizwe mu mashuri 22 aho buri shuri ryahawe umwe.

Aba bakorerabushake bafasha mu kwigisha Igifaransa abanyeshuri bo mu mashuri abanza n’ayisumbuye, bagahugura n’abarimu aho baba bari kwigisha ndetse bakanafasha abigisha Igifaransa bakabahugura.

Umunyamabanga Mukuru wa OIF, Mushikiwabo Louise, yavuze ko muri gahunda bafite yo kongera umubare w’abakoresha ururimi rw’Igifaransa hari imishinga itandukanye bazafatanyamo n’ibihugu bitandukanye birimo n’u Rwanda mu kongera ubumenyi bw’ururimi rw’Igifaransa.

Ati “Turi muri gahunda ikomeye yo kongera ubumenyi mu bihugu byinshi bitandukanye, ubu tumaze kugira Abanyamuryango 88 [ibihugu], ibihugu rero bigiye bitandukanye ku rugero abantu bavugaho ururimi rw’Igifaransa.”

Yakomeje agira ati “Urugero nk’u Rwanda harimo indimi nyinshi cyane kandi zose zemewe zikoreshwa n’Abenegihugu, twebwe rero muri gahunda zacu zo kongera ubumenyi mu rurimi rw’Igifaransa, dufite gahunda nyinshi zirimo kongera umubare w’abarimu bigisha Igifaransa.”

Mu minsi ishize kandi Ikigega Mpuzamahanga cy’Abafaransa gishinzwe Iterambere (Agence Française de Développement, AFD), Umuryango w’Ibihugu bikoresha Igifaransa ndetse na Minisiteri y’Uburezi basinyanye amasezerano y’ubufatanye anateganya uburyo buhamye bwo kwigisha Igifaransa mu mashuri.

Ni amasezerano ateganya kandi gahunda yaguye yo kwigisha Igifaransa no kugiteza imbere mu mashuri ahagiye kurebwa uko cyakongererwa amasaha, kuba cyazajya kibazwa mu bizamini bya Leta n’ibindi.

Umunyamabanga wa Leta muri Minisiteri y’Uburezi ushinzwe Amashuri y’Incuke, Abanza n’Ayisumbuye, Twagirayezu Gaspard, yavuze ko binyuze muri ayo masezerano hari gahunda ihamye yo kongera imbaraga mu kwigisha Igifaransa mu mashuri abanza n’ayisumbuye.

Ati “Muri iyi gahunda harimo ibintu byinshi bitandukanye ari ugutegura uburyo Igifaransa cyatezwa imbere hakazaho n’iriya gahunda basanzwe badufasha navuga ko ari igice cya tekinike cyo kuduha abarimu.”

Yakomeje agira ati “Natwe ntabwo tuzatinda, iyo gahunda inonosoye tuzahita dutangira kuyikoraho ku buryo mu gihe kitarambiranye izatangira gukurikizwa.”

Bamwe mu banyeshuri bavuga ko kwiga Igifaransa ari ingirakamaro kuko Isi yabaye umudugudu bityo bikaba bizabasaba kumenya indimi kugira ngo babashe kuyibamo neza.

Uwitwa Tona Christa wiga muri Ecole des Sciences Byimana ati “Twebwe, urubyiruko Isi ni iyacu, tugomba gukoresha impano dufite, kwiga dushyizeho umwete kuko ntabwo uba uzi ikizakubeshaho, ushobora kwiga ibinyabuzima, ibinyabutabire n’ibindi ariko utazi indimi kuko niba uri umuganga ntabwo uzavura abarwayi b’abanyarwanda gusa, ni ngombwa rero kwiga indimi zitandukanye.”

Hari kurebwa uko Igifaransa cyakongererwa amasaha mu mashuri

Kuva mu 2009, Igifaransa ntabwo kikiri ururimi rwigishwamo ahubwo ni isomo abanyeshuri mu mashuri abanza n’ayisumbuye biga mu buryo busanzwe aho mu Cyumweru kiba gifite amasaha abiri.

Hari bamwe mu banyeshuri bagaragaza ko amasaha abiri bigamo Igifaransa adahagije ku buryo bituma batagira ubumenyi buhagije ndetse bikaba ingorabahizi ku biga mu mashuri y’Uburezi bw’Imyaka 12 y’Ibanze.

Ikuzo Rita Xavière wiga mu mwaka wa Gatanu muri Ecole des Science de Musanze yagize ati “Twebwe kubera ko turi mu kigo cya Siyansi usanga ururimi baruha igihe gito, twasaba abayobozi bacu gushyira imbaraga mu kwigisha igifaransa cyane cyane mu mashuri y’uburezi bw’ibanze kuko nabo bakeneye kumenya igifaransa.”

Minisitiri Twagirayezu yavuze ko binyuze muri iyi gahunda y’ubufatanye ya Guverinoma y’u Rwanda, OIF na AFD, hazashyirwa imbaraga mu gushaka ibikoresho byifashishwa mu kwigisha Igifaransa, kongera amasaha no gutegura amarushanwa mu mashuri afasha abanyeshuri gushyira imbaraga mu kwiga Igifaransa.

Mushikiwabo yavuze ko muri gahunda yagutse ya OIF harimo no kwigisha Igifaransa Ingabo ziri mu Butumwa bw’Amahoro bwa Loni ndetse n’Abadiplomate b’ibihugu biri muri uyu muryango.

Ati “Dufitite ibihugu byinshi cyane bidusaba kubashyigikira mu kwigisha ururimii rw’Igifaransa, ariko dufite ibindi bidusaba kubunganira mu kubigisha Igifaransa mu buryo bw’ubukerarugendo ndizera ko n’u Rwanda natwe byadufasha.”

“Hari ibihugu bifite ubukerarugendo bwateye imbere cyane ariko badafite abantu bahagije bakora mu rurimi rw’Igifaransa bagenda basobanurira ba Mukerarugendo.”

Yakomeje agira ati “Twigisha Igifaransa ku Ngabo z’Umuryango w’Abibumbye ziri mu butumwa bwo kugarura no kubungabunga amahoro hirya no hino ku Isi n’u Rwanda ruri muri ibyo bihugu, ibihugu byadusabye ko twabafasha kongera ubumenyi bw’ururimi rw’Igifaransa kuri izo ngabo.”

Ibarura rya OIF mu 2018, ryagaragazaga ko nibura Abanyarwanda bavuga ururimi rw’Igifaransa neza ari 6%. Intego y’uyu muryango ikaba ari ukongera umubare w’abavuga n’abandika neza Igifaransa.

Mushikiwabo yavuze ko OIF ikomeje gushyira imbaraga mu kongera umubare w’abavuga Igifaransa hirya no hino ku Isi

Umunyamabanga wa Leta muri Minisiteri y’Uburezi ushinzwe Amashuri y’Incuke, Abanza n’Ayisumbuye, Twagirayezu Gaspard, yavuze ko hari amasezerano Guverinoma y’u Rwanda iherutse kugirana na OIF ndetse na AFD yo guteza imbere Igifaransa

Uwitwa Tona Christa wiga muri Ecole des Sciences Byimana asanga Isi yarabaye umudugudu bityo kumenya Igifaransa byafasha mu kuyibamo

Ikuzo Rita Xavière wiga mu mwaka wa Gatanu muri Ecole des Sciences de Musanze asanga hakenewe amasaha menshi yo kwiga Igifaransa

Amafoto: Uwumukiza Nanie