Tag: featured

Abitabiriye umuhango wo kwibuka bunamiye inzirakarengane zazize Jenoside

Ibyo babitangarije mu muhango wabereye mu Karere ka Musanze ku wa kane tariki 18 Kamena 2021, wo kwibuka abagore n’abana bazize Jenoside yakorewe Abatutsi, wateguwe n’abagize Urugaga rw’Abagore rushamikiye ku muryango RPF Inkotanyi bo mu Murenge wa Muhoza.

Mukamulisa Aurelie, ukuriye urwo rugaga mu Murenge wa Muhoza yagize ati “Tubabazwa cyane n’uko hari abagore batwambitse icyasha bijandika mu bikorwa byo kwica Abatutsi mu gihe cya Jenoside yabakorewe. Burya umugore yifitemo imiterere karemano yo kuba agira uruhare mu gutanga ubuzima.Tugaya abatandukiriye bagakoresha imbaraga mu kwambura ubuzima abo babuhaye”.

Ati “Bumve ko ibyo bakoze bikidutera ikimwaro kandi ntituzahwema kubyamagana bitubabaza kuko barengereye cyane”.

Mu kwibuka abagore n’abana bazize Jenoside, abagore bagize Urugaga rushamikiye ku muryango RPF Inkotanyi mu Murenge wa Muhoza, bahamagariye umuryango nyarwanda guharanira ko Jenoside yakorewe Abatutsi itazongera kubaho ukundi.

Mukamulisa ati “Iki gikorwa kuri twe gifite uburemere bukomeye cyane mu mitima yacu. Kwibuka bitubera umwanya wo gusubiza amaso inyuma, tugatekereza uko inzirakarengane z’abagore zishwe zitageze ku ntego yo kwirerera abana bari barabyaye ngo bakure, bitewe n’uko ayo mahirwe bayavukijwe. Kwibuka ayo mateka yose tuba dushaka kubwira abato ububi bwa Jenoside, kugira ngo na bo bazakurane umutima w’uko itazongera kubaho ukundi”.

Abitabiriye uwo muhango batarenga 20 kubera amabwiriza yo kwirinda Covid-19, bakoze urugendo ruturuka ku biro by’Umurenge wa Muhoza, berekeza ku rwibutso rwa Muhoza, rushyinguwemo abasaga 800 biciwe mu cyahoze ari Cour d’Appel Ruhengeri.

Mukamulisa Aurelie ukuriye Urugaga rw’Abagore rushamikiye ku Muryango RPF Inkotanyi

Bashyize indabo ku mva bunamira izo nzirakarengane, nk’ikimenyetso cyo kubibuka no kubasubiza agaciro bambuwe.

Umuyobozi wa Ibuka mu Murenge wa Muhoza, Hamza Iddi, yabwiye abitabiriye uwo muhango ko bafite uruhare rukomeye mu gusigasira amateka no gukumira abayagoreka.

Yagize ati “Amateka y’igihugu cyacu arebana n’uko Jenoside yateguwe ikanashyirwa mu bikorwa, ni ngombwa ko twirinda ko hagira uyagoreka cyangwa ngo ayasibanganye. Iyo twibuka Jenoside yakorewe Abatutsi, tugasura hamwe mu habitse ayo mateka, ni uburyo bukomeye tuba dukwiye kubakiraho tuyasigasira ariko kandi twirinda kuyihererana ahubwo tukayasakaza mu bagize imiryango yacu, kugira ngo n’abayamenya mu buryo busobanutse bazakomeze kuba uruhererekane”.

Abo bagore bashimangiye ko nyuma y’imyaka 27 ishize Jenoside yakorewe Abatutsi ihagaritswe, hari ibikorwa byinshi bizamura imibereho n’ubukungu byakozwe, mu kubaka igihugu cyari cyarashegeshwe n’amateka mabi. Bityo ngo ntibazigera bemerera uwo ariwe wese wakongera kugisubiza inyuma.

Hari imiryango itishoboye abo bagore bashyikirije ubufasha

Mukandayisenga Justine, ni umubyeyi w’abana babiri worojwe inka, akaba ayitezeho kubona amata n’ifumbire.

Yagize ati “Nishimiye inka aba babyeyi b’abanyamuryango ba RPF Inkotanyi bangabiye. Twanywaga amata ari uko tuyasabye cyangwa tuyaguze, ariko kuva uyu munsi nishimiye ko bihindutse, kuko twabonye inka izajya idukamirwa. Ubu sinatinya no kwatisha umurima, ngahinga kuko n’ifumbire izajya iboneka ari nyinshi. Urumva ko ubukene bugiye kuba amateka. Ndashimira Umukuru w’Igihugu cyacu Kagame, wimakaje uyu muco wo koroza abatishoboye”.

Mukandayisenga Justine worojwe inka ngo imufashe kuzamura ubukungu

Uyu muryango wagabiwe inka wiyongeraho indi miryango ibiri harimo uwashyikirijwe ibikoresho byo mu nzu, bigizwe n’intebe, ibitanda n’ibiryamirwa undi ushyikirizwa ibiribwa n’ibikoresho by’ibanze by’isuku.

Urugaga rw’Abagore rushamikiye ku muryango RPF Inkotanyi rwabibashyikirije mu rwego rwo gushyigikira imigambi ya RPF Inkotanyi y’uko buri Munyarwanda agira imibereho myiza.

Bamaze kwiyubakira imihanda ya kaburimbo ya Km 5.3

Iyo mihanda yatashywe ku mugaragaro ku Cyumweru tariki 20 Kamena 2021, abaturage bashimirwa ubufatanye bubaranga mu kwishakamo ibisubizo badategereje ko Leta ari yo ibakorera byose.

Umuturage wo mu Mudugudu wa Mpinga ya Nyanza, Akagari ka Rukatsa, Aimable Ruzima, avuga ko igitekerezo cyaturutse mu baturage ubwabo, kuko muri ako gace hari imihanda y’igitaka yatumaga hagaragara nabi kandi hamaze gutera imbere.

Agira ati “Hano hari iterambere ry’imiturire, ariko hakaba ikibazo cy’imihanda itari ikoze neza, rimwe na rimwe imodoka z’abaturage zananirwaga kwinjira mu bipangu kubera icyondo, zikanyerera”.

Nyuma yo kwicara bagatekereza icyo bakora kuri icyo kibazo, Ruzima avuga ko abaturage batanze imisanzu yabo y’amafaranga, ariko ko ayo gukorera iyo mihanda icyarimwe atahise aboneka yose.
Ati “Burya ibintu byose ni ubufatanye, kandi Leta ni abaturage. Iyo abayobozi bafatanyije n’abaturage, bagera kuri byinshi, kuko Leta iba ifite ibikorwa byinshi iba igomba gukora”.

Abo baturage bavuga ko ibyo bagezeho ari ibyo kwishimira, kandi bagasaba n’abandi b’ahandi kuza kubyigiraho.

Umunyamabanga Nshingwabikorwa w’Umurenge wa Kagarama, Chantal Uwamwiza, avuga ko ubukangurambaga bugitangira hari bamwe mu baturage batabyumvaga neza, ariko ko hari ababyumvise vuba bafasha n’abatarabyumvaga na bo bibona muri icyo gikorwa.

Ati “Icya mbere ni ukubereka agaciro k’ibikorwa baba bagiye kwikorera. N’iyo haba harimo abatabyumva neza, iyo hari abatanze amafaranga mu minsi mike bakabona ibikorwa akoze, n’abandi bahita babona agaciro kabyo”.

Umuyobozi Nshingwabikorwa w’Akarere ka Kicukiro, Solange Umutesi, yashimiye abaturage b’Umurenge wa Kagarama muri rusange, anashimira by’umwihariko ababashije kwikorera igikorwa nk’icyo cy’indashyikirwa.

Asaba abaturage ba Kicukiro gukomeza kurangwa n’ubufatanye hagati yabo ubwabo no hagati yabo n’ubuyobozi, mu rwego rwo kurushaho kugera ku iteramebere bifuza badategereje Leta.

Ubwo batahaga iyo mihanda

Mu murenge wa Kagarama muri rusange bateganyije kwikorera imihanda ya kaburimo kuri kilometero 14.5, ariko ubu hamaze gukorwa kilometero 5.3. Yose izuzura itwaye miliyoni 924 z’Amafaranga y’u Rwanda.

Mu gutaha iyo mihanda kandi hanatangijwe gahunda y’Ubumwe n’ubwiyunge, bahemba umuryango w’abarokotse Jenoside wabyaye ariko abawugize bombi bakaba nta babyeyi bagira bo kubahemba, bawutegesha urugori, ariko baranawuremera.

Hanaremewe undi muturage usanzwe akora akazi ko gutunganya imisatsi, wahawe amafaranga ibihumbi 300 ngo yo kumufasha kuzamura ibikorwa bye, kandi byose byagizwemo uruhare n’abaturage bo muri uwo Murenge wa Kagarama.

Hamuritswe n’ibindi bikorwa byakozwe mu mihigo y’umwaka wa 2020-2021.

Ange Kagame

Ubumenyi yateganyije gusangiza ababyeyi yabunyujije ku rubuga rwe rwa You Tube, aho yatangiye avuga ko ubwonko bw’umwana bukura vuba mu myaka ye ya mbere.

Mu byo yagejeje ku babyeyi umuntu yafata nk’amasomo, Ange Kagame yavuze ko imyaka ya mbere y’ubuzima bw’umwana ari ingenzi, cyane ko ari yo igaragaza imikurire ya buri mwana.

Agira ati “Imyaka ya mbere y’ubuzima bw’umwana ni ingirakamaro ku mikurire y’ubwonko bwe, kubera ko ibyo ahura na byo n’imibanire n’abandi bantu b’ingenzi kuri we, ari bimwe mu bigena imikurire y’ubwonko bwe”.

Arongera ati “Uyu musingi wo mu myaka ya mbere kandi ugira ingaruka ku buzima bwose bw’umuntu ari mu myigire, mu migenzereze, imiterere ndetse n’ubuzima bwo mu mutwe”.

Dr. Kitambala Marcelin

Yabitangaje ku gicamunsi cyo ku wa Gatanu tariki ya 18 Kamena 2021, mu muhango wo kwibuka ku nshuro ya 27 Jenoside yakorewe Abatutsi muri Mata 1994.

Ijambo ry’umuyobozi wa Kaminuza ya East Africa, ryibanze ku buhamya bwe ku mateka ya Jenoside yakorewe Abatutsi nk’umuntu wabanye nabo cyane.

Dr. Kitambala, ukomoka muri Congo avuga ko yakuriye mu Rwanda aho se yakoreraga ndetse anashaka umugore wa kabiri w’umunyarwanda w’Umututsi.

Avuga ko bitagarukiye aho kuko ngo na mukuru we nawe yashatse Umututsi.

Avuga ko Jenoside yabaye barasubiye iwabo muri Congo ndetse ngo n’impunzi zigera mu gace k’iwabo i Bukavu, icyo gihe ari umunyeshuri muri kaminuza ngo ntiyamenye ko ibibera mu Rwanda ari Jenoside.

Avuga ko umusore w’imyaka 17 icyo gihe ngo yamusabye icumbi nawe aramufasha amutwara iwabo ndetse atabanje no kubimenyesha ababyeyi be ariko ntiyamenya ko yiteye ikibazo ubwe no ku muryango we.

Ati “Yansabye kumucumbikira, mutwara mu rugo we n’abavandimwe be na nyina, mwibuke mu kadata na muramu wanjye ni Abatutsi, twari dutuye mu gace kamwe, uwo muhungu yakundaga kumpamagara ambaza ngo kuki mwemera kubana n’inzoka, aba nibo batwirukanye mu Rwanda, nibo batwishe, twe ntabwo twari twakamenye ko ari jenoside yabaye mu Rwanda.”

Dr. Kitambala avuga ko yakomeje kujya amubwira ayo magambo mugihe cy’umwaka yamaze iwabo undi akamwihorera bigera aho arambirwa ndetse afata inzira n’umuryango we bajya mu nkambi.

Avuga ko mu mwaka wa 1996 muri Congo hadutse intambara, ihereye Uvira, Abahutu bari batuye i Bukavu batangira guhiga Abatutsi bakabica ku mugaragaro.

Avuga ko baje n’iwabo guhiga mukase na muramu we kugira ngo nabo babice ariko basanga babahishe.

Agira ati “Tumaze kumenya ko bagiye kuza iwacu kubica, twashatse ahantu batabasha kubabona turabahisha n’abana babo, mukadata yari afitanye na data abakobwa bane ndetse na muramu wanjye yari afitanye na mukuru wanjye umwana umwe w’umuhungu.”

Dr. Kitambala avuga ko abari mu Rwanda batazi ibibera muri Congo ariko ngo hariyo Interahamwe nyinshi zituye mu baturage basanzwe b’abakongomani.

Avuga ko kuhaba kwabo byatumye abaturage b’abenegihugu bahunga mu masambu yabo kubera kwibwa n’izo nterahamwe.

Agira ati “Barahari n’intwaro zabo mu mazu yabo, benshi kugira ngo babeho neza mu mashyamba, baraza bakiba inka, ihene n’ibindi bakakwica niba uri umugabo, bagafata ku ngufu umugore wawe n’abana b’abakobwa barangiza bakagenda.”

Avuga ko ibi byatangiye mu mwaka wa 1996 kugera mu mwaka wa 2005, ibi ngo bikaba aribyo byabaye intandaro y’uko abaturage bahisemo guhunga amasambu yabo bakajya gutura mu mijyi ya Bukavu na Goma aho bizeye umutekano wabo.

Dr. Kitambala avuga ko interahamwe zimaze kubura amatungo ziba kuko abaturage bose bimukiye mu mijyi ngo zahisemo kujya mu birombe by’amabuye y’agaciro aho bakura amafaranga yifashishwa mu guhungabanya umutekano w’u Rwanda.

Yasabye urubyiruko kwirinda icyabatandukanya ahubwo bakabana mu mahoro, mu rukundo no mu bwubahane.

Ati “Mwebwe hano muvuga ururimi rumwe gusa, twebwe iwacu tuvuga izirenga 200 n’amoko ni uko, ivangura ntacyo rizabagezaho, ntirizatuma igihugu gitera imbere, muharanire kubana mu mahoro nibwo muzatera imbere n’igihugu gitere imbere.”

Abo bana bigishijwe n’umuryango utari uwa Leta wita ku mibereho myiza y’abana (CVT), bavuga ko ababyeyi bakomeje kumvira inama z’abakiri bato byarushaho kurandura burundu ikibazo cy’imirire mibi mu bana bari munsi y’imyaka itanu.

Abaturage bo mu Murenge wa Mbuye, hamwe mu hagaragaraga ikibazo cy’abana bafite ikibazo cy’imirire mibi, aho nko muri 2019 hari abana 80 bari mu ibara ry’umuhondo rigaragaza abafite imirire mibi idakabije, bitaye ku bukangurambaga ku buryo ubu hasigaye gusa abana umunani abandi 80 bamaze gukira.

Irakoze Ngamije Valentin w’imyaka 16 ni umwe mu bana bakorana na CVT wo mu itsinda Akarusho ryo mu Murenge wa Kinazi, uvuga ko yishimira aho bageze bafasha ababyeyi babo guhindura imyumvire bakita ku mikurire y’abana babo binyuze mu biganiro.

Yagize ati “Mu gufasha ababyeyi bacu dutegura ibiganiro, ariko na none tugakora n’ibikorwa bigamije kubereka uko bahangana n’imirire mibi mu bana. Nk’ubu tumaze kubaka uturima tw’igikoni 60, twinaje ingemwe z’amacunga, imyembe n’amapapayi tubiha imiryango itandukanye ngo ibashe kwita ku mirire y’abana”.

Mutuyemariya Josephine wo mu itsinda ryitwa Urumuri riri mu Murenge wa Mwendo, avuga ko hejuru y’ibikorwa bakora bigamije guhangana n’ikibazo cy’imirire mibi mu bana, ubu banafite gahunda yo kwegera ababyeyi babo bakabereka uko bategura indyo yuzuye bahereye ku byo bafite.

Yagize ati “Dufite gahunda yo gushishikariza ababyeyi kwita ku bana babo babagaburira indyo yuzuye kuko ari byo bituma bakura mu bwenge no mu gihagararo, nta kindi bisaba kuko usanga imboga bazeza, imbuto zirahari, amagi arahari, igisigaye ni ubumenyi”.

Umuyobozi w’Akarere ka Ruhango, Habarurema Valens, nawe akaba yatangaje ko kuba Zone ya Kizibere igenda isezerera ikibazo cy’igwingira mu bana bigaragaza akazi keza kakozwe n’abaturage ubwabo, ubuyobozi ndetse n’abafatanyabikorwa cyane cyane CVT yazanye gahunda nziza yo guha umwanya abana bakagira uruhare mu kwikemurira ibibazo baba bafite.

Yagaragaje ko kuba mu mwaka wa 2019 muri aka gace hagaragaragamo abana 88 bafite imirire mibi, ubu bakaba bageze ku 8, ari intambwe ikomeye yo kwishimirwa, bityo asaba abaturage gukemura n’iki kibazo cy’aba bana umunani basigaye kandi bakirinda gusubira inyuma.

Abaturage biyemerera ko bari bafite ubujiji mu kwita ku mikurire y’abana

Ntirandekura Schadrack utuye mu Isibo yitwa Inkomezamihigo, umudugudu wa Ruhuha, Akagari ka Kizibere, Umurenge wa Mbuye, avuga ko mbere y’umwaka wa 2020, bari bafite ikibazo gikomeye cya bamwe mu babyeyi bahugiraga mu mirimo bakibagirwa kwita ku bana, bityo bigatuma imibare y’abagwingira yiyongera.

Agira ati “Hari ababyeyi bafite ubujiji bwo kutamenya uko bategurira abana babo indyo yuzuye, ariko kandi hari n’abandi birirwaga mu mirimo yiganjemo iyo gutonora imyumbati, ntibibuke gufata umwanya ngo bite kubo babyaye bigatuma bibasirwa n’iyo mirire mibi.”

Ikibazo cy’abakobwa babyariraga iwabo nyuma bagasigira abo bana ba nyirakuru nabo batishoboye, nacyo ngo cyatumye abana barwara indwara zikomoka ku mirire mibi.

Mu gukemura iki kibazo, Ntirandekura Schadrack yavuze ko abaturage bafatanyije n’inzego zitandukanye bicaye bafata ingamba zo gufata abana bose bafite ikibazo cy’imirire mibi babajyana ku bigo nderabuzima ngo babapime barebe ikigero cy’imirire bafite, abo basanze bafite ikibazo bitabwaho by’umwihariko.

Abo baturage bavuga ko baje kunganirwa na CVT mu mushinga yatangije mu 2017 mu Karere ka Ruhango wo guteza imbere uburenganzira bw’umwana no kugira uruhare mu bimukorerwa.

Umukozi w’uyu muryango mu Karere ka Ruhango, Habiyonizera Noel, avuga ko umushinga wabo waje ugamije by’umwihariko gufasha abana kumenya uburenganzira bwabo kandi na bo ubwabo bakagira uruhare mu gushaka ibisubizo by’ibibazo bahura nabyo.

Kugira ngo bigerweho CVT yatangije amatsinda 8 y’abana mu Mirenge 5 igize Akarere ka Ruhango ari yo Kinazi, Ruhango, Byimana, Mwendo, n’uwa Kabagari.
Abo bana bakaba bahabwa ubumenyi mu bintu bitandukanye birimo kwita ku mirire yabo n’iya barumuna babo bategura indyo yuzuye, gukora uturima tw’igikoni bagahingamo imboga, guhumbika no guhinga ibiti byera imbuto n’ibindi.

Ni imibare yatangiye kuzamuka cyane kuva ku itariki 08 Kanama 2021 aho umubare w’abandura watangiye kujya hejuru ya 100, aho kuri iyo tariki ya 08 habonetse abarwayi 127, mu gihe ku munsi wabanjirije iyo tariki bari 62.

Icyagaragaye muri iyi minsi 10 ishize ni uko Umujyi wa Kigali, Akarere ka Rubavu na tumwe mu turere dufite imirenge yihariye yashizwe mu kato aritwo Burera, Gicumbi na Nyagatare ari two dukomeje kuzamura umubare w’abandura.

Muri utwo turere hariyongeraho Akarere ka Musanze na ko gakomeje kugaragaza umuvuduko w’ubwiyongere bw’abandura Covid-19, aho ndetse Umuvugizi wa Polisi aherutse kunenga abafite amahoteli na Restora mu mujyi wa Musanze, abashinja kudasaba abacumbika mu mahoteri icyemezo cy’uko bipimishije Covid-19, ndetse n’abafite amaresitora bashinjwa kudashyira intera hagati y’intebe n’ameza bigatera umubyigano kubo bakira.

Mu gihe ubwandu bwa Covid-19 bukomeje gukwirakwira, inzego zishinzwe ubuzima zikomeje kongera ibigo byakira abarwayi aho ikigo cya Kanyinya cyari kimaze amezi hafi atandatu gifunze, ubu cyongeye gufungurwa kubera ubwiyongere bukabije bw’abanduye icyo cyorezo, nyuma y’uko ibitaro bya Nyarugenge bimaze iminsi byakira abo barwayi byamaze kuzura, bitewe n’umubare munini w’abarwayi urimo kugaragara mu mujyi wa Kigali.

Ibindi bitaro byatangiye kwakira abarwayi ba Covid-19 harimo ibya Kibungo byakira ab’Iburasirazuba, ibitaro bya Kaminuza bya Butare (CHUB) na byo byatangiye kwakira abarwayi bo mu majyepfo, mu gihe n’ibitaro bya Kibuye na byo birimo kongererwa ubushobozi kugira ngo byitabazwe mu kwakira abarwayi ba Covid-19 b’Iburengerazuba.

Mu kiganiro Perezida wa Repubulika Paul Kagame, yagiranye n’abavuga rikumvikana bo mu Ntara y’Iburengerazuba n’abo mu Ntara y’Amajyaruguru ku itariki ya 11 Kamena 2021, mu ijambo yabagejejeho yaciye amarenga ku kongera gufunga ibikorwa bimwe na bimwe, hagamijwe guhagarika umuvuduko wa Covid-19 irimo kugenda yiyongera mu bihugu bimwe na bimwe byegereye u Rwanda.

Ibyo Perezida Paul Kagame, yabivuze mu gihe imibare y’abandura icyo icyorezo mu Rwanda ikomeje kwiyongera mu buryo buteye impungenge.

Perezida Kagame avuga ko mu gufata ingamba zo kugabanya ubwandu, bishobora gutuma habaho gufunga ibikorwa n’ubwo bisubiza Abanyarwanda inyuma mu bukungu.

Perezida Kagame avuga ko u Rwanda rwari mu nzira nziza mu gukumira icyorezo cya Covid-19 ndetse rwatangiye n’ibikorwa byo gukingira, ariko ko hari inkundura y’icyorezo irimo kuza, ari naho ahera asaba abaturage kwirinda kwirara.

Yagize ati “Twari turi mu nzira nziza nk’u Rwanda, twamenyereye guhangana n’iki cyorezo dukurikiza ibyangombwa siyansi itubwira, twagize amahirwe tubona inkingo zidahagije, ariko tugira aho duhera dukingira Abanyarwanda bacu.

Turacyakomeza gushaka izindi kugira ngo bigere ku Banyarwanda benshi, ariko mukomeze kwitegura ntitukirare, cyangwa dushake koroshya ibintu kandi bikomeye”.

Iyi sitasiyo yubatse mu Kagari ka Murambi, Umurenge wa Rubavu mu Karere ka Rubavu, ni yo ya mbere yujujwe muri aka karere ndetse ubu yatangiye kwifashishwa mu kugeza amashanyarazi ku bagatuye ndetse n’abo mu Turere tukegereye turimo Nyabihu, Rutsiro na Ngororero hamwe n’Umujyi wa Goma muri Repubulika iharanira Demokarasi ya Congo.

Usibye iyi sitasiyo kandi, REG yanavuguruye imiyoboro ikwirakwiza amashanyarazi mu Mujyi wa Rubavu, hubakwa imishya, ishaje irasimbuzwa ndetse hubakwa kabine (Electrical Cabins) 11 mu rwego rwo kunoza serivisi z’amashanyarazi abatuye Rubavu bahabwa.

Butera Laurent, uyobora ishami rya REG riherereye mu Karere ka Rubavu, avuga ko avuga ko ibi byagabanije ibihombo ikigo cyagiraga cyaterwaga n’uko umuriro watakaraga ari mwinshi utakoreshejwe.

Yagize ati “Imyinshi mu miyoboro twari dufite mbere yari ishaje itakijyanye n’igihe, indi yari yaramaze kuremererwa n’umubare munini w’abayifatiyeho ndetse n’ibikoresho bikenera amashanyarazi bakoresha, bigatuma umuriro uba muke ubundi ugacikagurika.”

“Ubu ibi byarakemutse, umuriro ntugicikagurika bya buri munsi, kandi n’iyo habaye akabazo gato uhita ugaruka udatinze. Ubu muri uku kwezi gushize n’ubwo twagizemo ibihe by’ibiza, abakiriya banini dufite barimo inganda n’amahoteli manini, ubona ko bacanye umuriro amasaha menshi ugereranije n’uko byari bimeze mbere”.

François Bavugayubusa, ushinzwe amashanyarazi mu bitaro bya Gisenyi, avuga ko bishimiye impinduka nziza ku mashanyarazi babona.

Ati “Hari impinduka zigaragara. Mbere umuriro wagendaga hato na hato, ubundi ukaba muke cyangwa mwinshi bigatuma ntacyo tubasha kuwukoresha. Ubu rero hari impinduka ku buryo tuwukoresha nta kibazo kibayeho. Mbere twashoboraga kumara ijoro ryose ducanye “generator”. Ubu rero n’iyo umuriro ugiye, ntabwo umara iminota irenze 10 utaragaruka”.

Kanyarwanda Jean Claude, ushinzwe amashanyarazi muri Serena Hotel ishami rya Gisenyi, yavuze ko ashimira REG yavuguruye imiyoboro kuko mbere bahuraga n’ibibazo by’umuriro uvaho buri kanya.

Ati “Mbere y’uko bavugurura iyi miyoboro, twari dufite ikibazo cy’umuriro ubura buri kanya, tugakoresha “generator” inshuro nyinshi ugasanga nko ku kwezi dukoresheje nka litiro 2000 cyangwa 1500 za mazutu. Ubu rero urebye iyo twakoreshaga mbere n’iyo dukoresha ubu, dufite icyizere ko amashanyarazi duhabwa ameze neza.”

Israel Vumiria ushinzwe ikoranabuhanga rya Radio kuri Radiyo y’abaturage ya Rubavu, avuga ko mbere ibura ry’umuriro mbere ryababangamiraga mu kazi.

Ati “Mbere wasangaga tubura umuriro buri kanya cyangwa ukaza nabi ku buryo tutawukoresha, tukifashisha “generator”. Wasangaga imashini zacu zigira ibibazo kubera kuzima buri kanya. Ubu rero umuriro ntugipfa kubura ndetse navuga ko twabashije kuzigama amafaranga twaguraga mazutu nyinshi twakoreshaga.”

Akarere ka Rubavu kari mu dufite ingo nyinshi zifite amashanyarazi mu Rwanda kuko izigera kuri 81% ubu ziyafite muri izo ngo harimo izigera kuri 72% zifite amashanyarazi afatiye ku muyoboro rusange na 9% bafite amashanyarazi akomoka ku mirasire y’izuba.

Umuyobozi w’ishami rya REG i Rubavu avuga ko uretse gucanira neza abatuye Rubavu, imiyoboro yubatswe muri Rubavu yatumye REG igoboka abatuye Goma ubwo ikirunga cya Nyiragongo cyarukaga kikangiza ibikorwaremezo byaho.

Ati “Ikirunga cyasenye imiyoboro myinshi ijyana amashanyarazi mu gice kinini cy’umujyi wa Goma. Badusabye ubutabazi bwihuse bwo kugira ngo tube tubacaniye mu gihe bagitegereje gusana imiyoboro yangiritse. Twahise tubacanira byihuse twifashishije umuyoboro wacu ugera ku mupaka wa “petite barrière”. Byarabafashije cyane kuko ibikorwa bitandukanye nk’amahoteli by’i Goma birimo ibitaro, iminara, n’ibindi byinshi byari byamaze guhagarara kubera kubura amashanyarazi.”

Imwe muri kabine 11 nshya zubatswe muri Rubavu

Sitasiyo ya Rubavu yubatse mu Kagari ka Murambi mu Murenge wa Rubavu

Transformateur zigera kuri 19 nizo zongerewe mu miyoboro

SItasiyo ya Rubavu ni yo sitasiyo ya mbere yujujwe muri aka karere ndetse ubu yatangiye kwifashishwa mu kugeza amashanyarazi ku bagatuye ndetse n’abo mu Turere tukegereye

Iyi acide ishobora gutuma urumuri rw’izuba rutagera ku Isi neza [mu gace kegereye aho ikurunga cyarukiye], cyangwa se igatuma ahantu hakonja bitandukanye n’uko byari bimeze.

Iyo imvura iguye ishobora kuyimanura ikangiza ubuzima bw’abantu yaguyeho, ikangiza ibihingwa cyangwa ubw’ibindi bintu bikoze mu cyuma yaguyeho, nk’imodoka, amabati n’ibindi.

Mu 1991 ubwo ikirunga cya Pinatubo cyo muri Philippines cyarukaga, cyohereje toni zirenga miliyoni 20 z’ikinyabutabire cya dioxyde de soufre [SO2] n’utuvungu tw’ivu mu kirere muri kilometero 20 uvuye ku Isi. Ibi byateje ihindagurika ry’ikirere, ku Isi haba ubukonje bukabije kuko izi gaz zatumaga imirasire y’izuba itagera ku Isi.

Ibi kandi byanabaye mu 1815 muri Indonesia, ubwo ikirunga cya Tambora cyarukaga. Cyateje ibibazo bikomeye mu mateka y’Isi, kuko aricyo cya mbere kugeza ubu cyahitanye abantu benshi kuko kikiruka abantu 100.000 bahise bapfa.

Imyuka cyohereje mu kirere yatumye ubushyuhe bw’Isi bugabanukaho dogere celsius 3 ndetse na nyuma y’umwaka iki kirunga kirutse nta mpeshyi yigeze iba mu bihugu by’i Burayi na Amerika y’Amajyaruguru.

Uretse ubu bukonje bushobora guterwa n’iruka ry’ikirunga, hashobora kugwa imvura irimo acide sulfurique kubera imyuka irimo gaz ya dioxyde de soufre iba yaragiye mu kirere nyuma y’ikirunga, ikangiza ibintu bitandukanye.

Mu 2018 nyuma y’iruka ry’ikirunga cya Kilauea cyo muri Hawaii haguye imvura nyinshi irimo iyi acide, yangiza ibintu bitandukanye gusa abaturage bari baburiwe mbere y’igihe ko iyi mvura ishobora kugwa bituma itangiza byinshi.

I Rubavu haguye imvura irimo acide

Ibi byabaye muri ibi bice bitandukanye by’Isi bishobora no kuba ku banya-Rabavu kubera iruka ry’ikirunga cya Nyiragongo cyarutse tariki 22 Gicurasi ariko ingaruka zacyo zikagera no ku batuye aka Karere kuko kari muri kilometero 50 uvuye kuri iki kirunga. [Ni nko kuva Nyabugogo ukarenga gato i Nyamata.]

Nyuma y’ibiza byinshi byakurikiye iruka ryacyo, tariki 14 Kamena 2021 muri aka Karere haguye imvura ya mbere kuva ikirunga cyaruka, igwa atari imvura isanzwe ku buryo abazi iby’ubumenyi bw’ikirere bavuze ko irimo acide Sulfurique.

Umushakashatsi akaba n’Umwarimu muri Kaminuza y’u Rwanda, Dr Kalisa Egide, yavuze ko iyi mvura yaguye mu Karere ka Rubavu irimo acide ishobora kwangiza ibihingwa cyangwa igateza indwara umuntu yaguyeho cyangwa se amatungo kuko imanukana n’imyotsi ikirunga cyohereje mu kirere.

Yagize ati “Iyo ikirunga cyohereje gaz mu kirere, hari izitinda cyane mu kirere hari n’izihita zishiraho. Rero akenshi iyo ikirunga cyohereje imyuka mu kirere hari igihe bigenda bigakora igicu bikaguma hejuru, imvura yagwa ya mazi akaza arimo ya myotsi.”

“Imvura iguye muri Rubavu twafashe amazi ya mbere yari aguye dusanga yabaye umukara dukeka ko arimo acide yatewe n’imyuka y’ikirunga.”

NOW: First rains after #NyiragongoEruption on 22 May 21. We collected this rainwater in #rubavu city. This could be #acidrain with high conc of SO2 produced from volcanic smog. ppl should avoid drinking or use the rainwater @REMA_Rwanda @RwandaHealth @EnvironmentRw pic.twitter.com/mHYJvOYAZb

— Egide KALISA, PhD (@EgideKALISA) June 14, 2021

Dr. Kalisa yavuze ko nubwo haguye imvura irimo acide, umwuka abantu bahumeka ari muzima kuko mu bipimo byafashwe byerekanye ko umwuka ari ntamakemwa kubera ko ikirunga cyarukaga kijyana muri Congo aho kuza mu Rwanda.

Umuyobozi w’ibitaro bya Gisenyi, CSP Dr. Tuganeyezu Oreste, yavuze ko baburiye abaturage kudakoresha amazi baretse y’iyo mvura.

Yongeyeho ati “Kugeza ubu nta muntu turabona wagize ikibazo kubera ayo mazi ariko haracyari kare ngo tumenye niba hari uwo iyi mvura yagizeho ingaruka.”

Iruka rya Nyiragongo ryahitanye abantu 31, harimo barindwi bishwe n’amahindure n’abandi barindwi bishwe na gaz.

Amazi ya mbere yaguye i Rubavu nyuma y’iruka ry’ikirunga yasaba n’umukara bivugwa ko yari arimo acide

Ghana ni kimwe mu bihugu bya mbere ku Isi bihinga cacao [imbuto zikorwamo chocolat], kuko izirenga 50% zikoreshwa ku Isi yose zituruka muri Ghana na Côte d’Ivoire.

Uruganda iki gihugu kizatangiza mu Rwanda ruzajya ruzana cacao itunganyije neza, yaba ifu, umushongi wayo cyangwa se imbuto zayo kugira ngo zikorweho Chocolat mu Rwanda n’ibindi.

U Rwanda na rwo ruzajya gushora imari muri Ghana, aho ruzatangiza uruganda rukora umuti wica udukoko ukozwe mu bireti, uzajya wifashishwa mu bworozi, ubuhinzi n’ibindi.

Ghana News yatangaje ko iri shoramari hagati y’ibihugu byombi rizafasha kugabanya amafaranga yatangwaga ku bwikorezi bw’ibicuruzwa byamaze gutunganywa, ahubwo bitunganyirizwe hafi y’abaturage.

Ubwo itsinda ry’abanyarwanda 32 barimo Umuyobozi Mukuru w’Ishami ry’Ubukerarugendo no kubungabunga za Pariki muri RDB, Kageruka Ariella, ryasuraga Ghana kuva tariki 13 kugeza 20 Kamena, impande zombi zaganiriye ku mahirwe ahari mu bihugu byombi ajyanye n’ishoramari ndetse n’ubukerarugendo.

Kageruka yavuze ko ibihugu byombi byemeranyije ko bigiye gukora ubushakashatsi kuri izi nganda bigiye gutangiza ari urutunganya ibireti muri Ghana ndetse n’urutunganya cacao mu Rwanda.

Yagize ati “Kugira ngo tworoshye isoko hagati y’u Rwanda na Ghana, turasaba ko aya masezerano y’ubufatanye bwo gutunganya ibi bicuruzwa ku mpande zombi yasinywa mu buryo bwihuse.”

Ubwo itsinda ry’abayobozi ba Ghana ryagiriraga uruzinduko mu Rwanda kuva tariki 14 kugeza 20 Werurwe 2021, ibihugu byombi byemeranyije ubufatanye bushingiye ku guteza imbere ubukerarugendo mu Rwanda.

Mu bindi byemeranyijwe harimo guteza imbere uburezi, ubugeni, ingendo, ubukerarugendo n’amahoteli, umuco n’ubuhinzi.

Umuyobozi Mukuru w’Ikigo cy’Igihugu gishinzwe ibyoherezwa mu mahanga ku ruhande rwa Ghana, Afua Asabea Asare, yavuze ko ubu bufatanye bw’ibihugu byombi ari itangiriro ry’urugendo mu gushaka amahirwe y’ahandi hashorwa imari.

Ambasaderi w’u Rwanda muri Ghana, Dr Aissa Kirabo Kacyira, yashimiye iki gihugu ku bwo kwakirana yombi abanyarwanda, avuga ko igihe kigeze ngo agaciro ka Afurika gahabwe intebe, bikazatuma Isoko Rusange rya Afurika ritera imbere.

Ibiganiro bigamije guteza imbere ishoramari n’ubukerarugendo hagati y’u Rwanda na Ghana birakomeje

Umuyobozi Mukuru w’Ishami ry’Ubukerarugendo no kubungabunga za Pariki muri RDB, Kageruka Ariella, yavuze ko amasezerano y’ubufatanye yasinywa vuba ibikorwa bigatangira

Mu gihe gito mu Rwanda haratangira ruganda rukora chocolat

Mu kwezi gushize kwa Gicurasi 2021, nibwo Umunyamabanga wa Leta muri Minisiteri y’Imari n’Igenamigambi, Richard Tushabe, yagejeje ku Nteko Ishinga Amategeko, imbanziriza mushinga y’ingengo y’imari yari iteganyijwe gukoresha muri uyu mwaka utaha wa 2021/22, yagennye ko u Rwanda ruzakoresha miliyari 3.807 Frw.

Ni ingengo y’imari yiyongereye ku kigero cya 9,8% ugereranyije n’iyari yakoreshejwe mu mwaka uri kurangira kuko yo yari miliyari 3.464,8 Frw bisobanuye ko iziyongeraho miliyari 342,2 Frw.

Itegeko riteganya ko abagize Inteko Ishinga Amategeko batanga ibitekerezo kuri iyo mbanzirizamushinga, ibyo bitekerezo bigashyikirizwa Guverinoma, hakagira ibishingirwaho ingengo y’imari ivugururwa nyuma igatangazwa mbere y’uko tariki 30 Kamena zigera kuko umwaka w’ingengo y’imari utangira ku wa 1 Nyakanga.

Biteganyijwe ko muri iki Cyumweru ari bwo Minisitiri w’Imanari n’Igenamigambi, Dr Uzziel Ndagijimana azatangaza ingengo y’imari.

Amakuru IGIHE yamenye ko hari zimwe mu mpinduka guverinoma yakoze ari nayo mpamvu habayeho gutinda gutangaza ingengo y’imari.

Umunyamabanga wa Leta muri Minisiteri y’Imari n’Igenamigambi, Richard Tushabe, aherutse kubwira abagize Inteko Ishinga Amategeko, imitwe yombi, ko muri miliyari 3.807 Frw u Rwanda ruteganya gukoresha harimo 67% angana na miliyari 2.543,3 Frw akomoka mu mutungo w’imbere mu gihugu, ni ukuvuga mu misoro ahanini.

Ni mu gihe inkunga z’amahanga ari miliyari 612,2Frw zingana na 16% by’ingengo y’imari yose; na ho inguzanyo z’amahanga ni miliyari 651,5 Frw zingana na 17%.

Gahunda z’ibikorwa biteganyijwe mu ngengo y’imari ya 2021/22 zatoranyijwe hashingiwe ku buryo zifasha kugera ku ntego z’iterambere igihugu cyihaye nk’uko bikubiye muri gahunda ya Guverinoma y’imyaka irindwi ndetse no guhangana n’ingaruka z’icyorezo cya Covid-19.

Inkuru bifitanye isano: Imiterere y’ingengo y’imari ya 2021/22: Uko izakoreshwa, imishinga migari n’ibindi

Minisitiri w’Imari n’Igenamigambi, Dr Uzziel Ndagijimana agiye gutangaza ingengo y’imari ya 2021/2022