Tag: featured

Ahari inyubako z’iri shuri, mu myaka ya 1954 hari ishuri ryigisha ubuvuzi, nyuma y’imyaka itandatu mu 1960 rirahinduka riba ishuri ryitwaga EGENA (Ecole de la Gendarmerie Nationale) kugeza mu 1995.

Mu 2001 nibwo ryaje guhindura izina ryitwa Ishuri rihugura Abapolisi (National Police Academy), ariko bigeze mu 2013 rishyirwa ku rundi rwego rihinduka Ishuri Rikuru rya Polisi (National Police College) ari na bwo ryatangiye gufungurira amarembo n’abo mu bindi bihugu bya Afurika.

Benshi mu bapolisi bakuru b’u Rwanda, abayobora inzego zitandukanye za Polisi y’Igihugu barinyuzemo. Ni cyo kimwe n’abajya mu butumwa bwa Loni bwo kubungabunga amahoro na bo akenshi barinyuramo bagahabwa amasomo yihariye.

Kuri iyi nshuro, rigiye gutanga impamyabushobozi ku cyiciro cya cyenda cy’abiga amasomo yo ku rwego rwo hejuru mu miyoborere azwi nka “Senior Command and Staff Course”.

Usibye ibyo kandi ritanga impamyabumenyi za Kaminuza ku bufatanye na Kaminuza y’u Rwanda, ku buryo Umupolisi uryigamo usibye ubumenyi mu by’umwuga, asoza afite n’impamyabumenyi yemewe kugeza ku cyiciro cya gatatu cya Kaminuza (Masters).

Mu masomo atangwa ku bufatanye na Kaminuza y’u Rwanda (UR) harimo ay’ikoranabuhanga mu bya mudasobwa; ajyanye n’ubumenyi bwa siyansi bushyigikira ibikorwa by’amategeko (Forensic Science) n’andi ahesha umuntu impamyabumenyi za Kaminuza mu mwuga wa Gipolisi. Ibyo binajyana n’amasomo ya “Cadet” afasha umuyeshuri kurangiza ari umupolisi by’umwuga.

Uyu munsi bibarwa ko nibura abanyeshuri baturutse mu bihugu 22 bya Afurika bagannye iri shuri bagahabwa amasomo yo ku rwego rwo hejuru mu by’imiyoborere.

Umuyobozi w’iri shuri, CP Christophe Bizimungu, yasobanuye ko abamaze kwiga mu masomo ya “Senior Command and Staff Course” bose hamwe ubu ari 259, barimo 194 b’abanyarwanda.

Ati “Abo ni abayobozi bakuru muri Polisi, ni umubare munini mu by’ukuri.”

CP Bizimungu yavuze ko umusanzu ryatanze ari munini, kandi ugaragarira mu mikorere y’abayobozi ba Polisi barangije muri iri shuri ubona itandukaniro.

Ati “Abapolisi benshi ku rwego rw’igihugu bayobora inzego za Polisi ari mu ntara, ari ku buyobozi bukuru bwa Polisi, abenshi barangirije hano babona amasomo yo ku rwego rwo hejuru, ku buryo tubona ko ayo masomo yagize akamaro cyane.”

CSP Marie Rose Kampire ni umwe mu bapolisi b’u Rwanda bamaze umwaka muri iri shuri ari guhugurwa. Uyu mugore yinjiye muri Polisi y’u Rwanda mu 2011, nk’umu-engineer uzobereye ibyo gukora indege (Aircraft maintenance).

Ni urugero rw’umwe mu bapolisi b’u Rwanda ufite ubumenyi bwihariye mu kintu runaka kandi bafite ubunyamwuga mu kazi ke ko gusigasira ubusugire bw’abanyarwanda n’ibyabo.

Amaze umwaka akarishya ubwenge muri iri shuri, aho yigiye amasomo ari mu byiciro bitatu by’ingenzi. Harimo ajyanye n’ubuyobozi n’imiyoborere; ajyanye no gushaka amahoro no kurwanya amakimbirane cyo kimwe n’ajyanye no kuyobora ibikorwa byo gushaka amahoro mu Muryango w’Abibumbye.

CSP Kampire yavuze ko ubumenyi yavomye muri iri shuri, buzamufasha mu kazi ke bunafashe by’umwihariko urwego akorera.

Ati “Bizamfasha gusoza inshingano zanjye neza, kandi bifashe na Polisi y’u Rwanda kugirirwa icyizere n’abanyarwanda binyuze mu murimo unoze.”

CSP Modeste Bisangwa amaze imyaka 16 ari umwarimu muri iri shuri na mbere y’uko ryitwa Ishuri Rikuru rya Polisi y’u Rwanda. Ashinzwe amasomo ahabwa Abofisiye bakuru.

Asobanura ko iri shuri rifite ubushobozi buhagije, binyuze mu mahugurwa abarimu bahabwa ku buryo bagira ubumenyi bubabashisha kwigisha abantu bakuru, hakiyongeraho n’imikoranire na Kaminuza y’u Rwanda.

Ati “Ku bijyanye n’ibikoresho, iri shuri rirabifite ndetse ubu turaganisha mu gukoresha ikoranabuhanga. Twaranabitangiye ku buryo mu gihe kiri imbere buri munyeshuri wese azaba akoresha mudasobwa ye, dufite n’uburyo bw’ikoranabuhanga butangirwamo ibizamini. Aho ni ho tugana kandi turabona ko turi mu nzira zo kuhagera.”

Mu bihugu byohereza abanyeshuri benshi kwiga muri iri shuri, harimo Namibia, Kenya, n’ibindi byo muri Afurika. Mu bagiye gusoza amasomo uyu mwaka, harimo SSP Muhamed Riziki Ally woherejwe na Polisi y’Igihugu muri Kenya.

Yavuze ko mu mwaka amaze yiga, amasomo yahawe ari ingenzi cyane ku rwego rushinzwe umutekano mu guhangana n’ibibazo biriho muri iki gihe.

Ati “Ubumenyi twakuye hano, buzagirira akamaro twe ubwacu n’inzego tubarizwamo. Harimo nk’ibijyanye n’imiyoborere, bitwigisha uko dukora yaba mu karere tubarizwamo, uko duhuriza hamwe n’abandi hari abatekereza ko umutekano ureba inzego ziwushinzwe, oya, ahubwo ureba buri wese. Aya masomo rero azadufasha kumenya uko duhuza n’abafatanyabikorwa mu kumenya uko tugomba gukorana.”

Abasoza amasomo muri iri shuri basabwa gukoresha ubumenyi bahawe mu guhindura imikorere yabo bwite n’aya bagenzi babo.

CP Bizimungu ati “Bamaze umwaka hano babana, abanyarwanda n’abanyamahanga, hari ubushuti bagiye bagirana ku buryo imikoranire yabo ikwiriye kwiyongera, bakamenya ko bakwiriye gukoresha uwo mubano kugira ngo bateze imbere inzego bakorera, tugafatanya twese kugira ngo duhangane n’ibibazo biterwa n’umutekano muke.”

Polisi y’Igihugu irashaka ko iri shuri rijya ku rwego rwo hejuru ku buryo isura yaryo iba ntangarugero. Ibyo bizajyana no kwimakaza ikoreshwa ry’ikoranabuhanga, gushyiraho inyubako zigezweho kandi nyinshi no kuvugurura amasomo ritangirwamo.

Iri shuri ryafunguwe na Perezida Kagame mu 2013, ritangira kuba ikiraro cy’ubumenyi bw’abapolisi mu bijyanye n’imiyoborere ku buryo magingo aya benshi mu bari mu buyobozi bukuru bwa Polisi y’u Rwanda barinyuzemo

Uhereye ibumoso: Dr Agée Shyaka Mugabe wigisha muri Kaminuza y’u Rwanda; IGP Dan Munyuza; Minisitiri w’Ubutegetsi bw’Igihugu, Gatabazi JMV n’Umuyobozi w’iri shuri, CP Christophe Bizimungu ubwo bari mu nama iheruka yiga ku mahoro, umutekano n’ubutabera yabereye muri iri shuri

CP Christophe Bizimungu uyobora iri shuri yavuze ko abarirangizamo baba bafite inshingano zo guhangana n’ibibazo by’umutekano byugarije Isi

Minisitiri w’Ubutabera unafite Polisi mu nshingano, Busingye Johnston, ubwo yitabiraga umuhango wo gutanga impabumenyi ku barangije muri iri ishuri mu mwaka ushize wa 2020

Abiga muri iri shuri bakora ingendoshuri zitandukanye mu gihugu. Aha bari basuye Ingoro y’imibereho y’abanyarwanda iri mu Karere ka Huye mu Ntara y’Amajyepfo

Kabinda Kalimina

Nyuma yo kwitsa umwuka gato, bwana Kalimina yaratangiye ati “Nkorera itangazamukuru mwa bantu mwe. Turi ibiremwamuntu. Tugomba guhembwa”.

Kugira ngo yumvikanishe ko atari ikibazo yihariye ahubwo agisangiye na bagenzi be bakorana kuri KBN TV, yongeyeho ati “Tumaze igihe tudahembwa”.

Kennedy K Mambwe, Umuyobozi wa ‘KBN TV, abinyujije ku rubuga rwa ‘Facebook’ rw’iyo Televiziyo yanenze ibyo bikorwa bya Kalimina.

Mambwe yavuze ko uwo munyamakuru witwa Kalimina ngo yari yasinze. Yagize ati “Twe nka ‘KBN TV, twamaganye imyitwarire y’ubusinzi yagaragaye muri ‘video’ yakwirakwijwe ku mbuga nkoranyambaga bikozwe n’umwe mu banyamakuru bacu badakora ku buryo buhoraho (part-time) mu gihe yari agiye kuvuga ingingo z’ingenzi z’amakuru”.

Uwo muyobozi yakomeje ashima imikorere myiza ubundi isanzwe iranga abakozi b’iyo Televiziyo, kuko ngo bafite impano ndetse n’ubunyamwuga bwo ku rwego rwo hejuru, ibyo ngo bikaba ari byo byabaranze guhera mu myaka ibiri ishize.

Yavuze ko Televiziyo ya ‘KBN TV’ yashyizeho uburyo bwiza ndetse n’inzira abakozi bayo banyuzamo ibibazo byabo.

Ati “Ku bw’ibyo rero, imyitwarire Kalimina yaraye agaragaje, ntisanzwe kandi ntihura n’abo turi bo twe nka Televiziyo”.

Mambwe yavuze ko ubu harimo gukorwa iperereza ryo kumenya ukuntu uwo munyamakuru wari wasinze yagiye kuri televiziyo, kandi hari ibihano byo mu buryo bw’imyitwarire bizafatirwa uwo ari we wese waba yarabigizemo uruhari.

Ku rubuga rwa ‘Facebook’, Kalimina mu kugaragaza ishingiro ry’ibyo yakoze, yagize ati “Yego rwose, narabikoze kuri Televiziyo bigaragara, kuko kuba abanyamakuru benshi batinya kuvuga, ntibisobanuye ko batagomba kuvuga”.

Abanyeshuri n’abarezi bo muri Kaminuza ya Kigali Ishami rya Musanze basobanurirwa amateka ya Jenoside by’umwihariko Abatutsi biciwe mu cyahoze ari Cour d’Appel Ruhengeri

Batangaza ibyo bahereye ku bantu bamaze iminsi bumvikana mu biganiro binyuzwa ku mbuga nkoranyambaga, bahakana Jenoside cyangwa abayivuga bitandukanye n’ukuri nyako. Abakora ibyo bikorwa bafata nk’ibigayitse, hakaba harimo n’abacitse ku icumu rya Jenoside yakorewe Abatutsi.

Mushinzimana Bernard ukuriye Umuryango w’Abanyeshuri barokotse Jenoside yakorewe Abatutsi, muri Kaminuza ya Kigali Ishami rya Musanze yagize ati “Mu bihe bitambutse, twagiye twumva abataye umurongo nyakuri w’amateka yacu, bari mu gihugu cyangwa hanze yacyo, bakayagoreka atari uko bayobewe ukuri nyako, dore ko benshi ari n’injijuke harimo n’izacitse ku icumu rya Jenoside”.

Ati “Nta rwego runaka dukwiye kuba twishingikiriza ko tubarizwamo, cyangwa ko duhagarariye ngo dupfobye amateka yacu. Uwaba abikora ku bw’inyungu ze cyangwa iz’abandi bagamije ko dusubira mu manga, tubafata nk’abasenya indangagaciro z’Abanyarwanda, akaba ariyo mpamvu tubaha ubutumwa bubasaba kureka gutana. Nibave ku izima, dutahirize umugozi umwe mu kubaka igihugu cyacu”.

Urukuta rwanditseho amazina ya bamwe mu biciwe mu cyahoze ari Cour d’Appel Ruhengeri bahashyize indabo mu rwego rwo kubunamira

Mu muhango wo kwibuka ku nshuro ya 27 Jenoside yakorewe Abatutsi, wateguwe na Kaminuza ya Kigali ishami rya Musanze, mu biganiro bigaruka ku mateka abanyeshuri n’abarezi bayo bagejejweho na Nzabonimana Emmanuel, umuhuzabikorwa wa CNLG mu turere twa Musanze na Burera, yibanze ku kubereka ukuntu za Kaminuza zo mu gihe cya mbere ya Jenoside yakorewe Abatutsi, zakoreshejwe mu gucurirwamo imigambi yo koreka igihugu mu mateka mabi.

Ibyo ngo byagizwemo uruhare na bamwe mu rubyiruko rwazigagamo na bamwe mu bari abarezi babo, bemeye gutakaza ubunyabwenge n’ubunararibonye bari bafite, Jenoside iba babirebera kandi banayigiramo uruhare.

Twizerimana Clement, umuyobozi ukuriye ishami ry’imiyoborere myiza mu Karere ka Musanze, ahamya ko nyuma y’imyaka 27 ishize Jenoside yakorewe Abatutsi ihagaritswe, ubu hari icyizere cy’uko baba abanyeshuri biga muri kaminuza n’abarezi, barushaho kubaka imibanire y’abanyarwanda izira amacakubiri binyuze mu bushakashatsi bakora.

Twizerimana yabasabye ko mu bushakashatsi bakora burushaho kwibanda ku mateka y’igihugu

Yagize ati “Za Kaminuza ziba zirimo abantu bize, bakora ubushakashatsi, bushingiye ku bintu byinshi, birimo n’amateka kuri Jenoside zindi zagiye zibaho ku isi. Igishimishije ni uko iyo duhuriye hamwe gutya, twibukiranya na bo umwihariko w’amateka y’igihugu cyacu, n’ukuntu umugambi wo kurimbura Abatutsi wagiye ucurirwa no muri za Kaminuza. Aho abantu bitwaga ko bize ariko bakagira ubumenyi butagira ubumuntu, ari bo bagize uruhare mu kucyoreka”.

Ati “Urubyiruko ruri kuminuza ubu n’abarezi babo, icyizere dufite kuri bo, cyubakiye ku kuba baramaze kwiyumvamo ko icyo bashyize imbere, ari ukurushaho kubaka ubumwe n’imibanire izira umwiryane n’amacakubiri bituma bagendera kure ingengabitekerezo ya Jenoside. Icyo tubasaba ni ugukomeza kongera ingufu mu gukora ubushakashatsi busigasira kwa kuri kw’amateka y’u Rwanda, kugira ngo dukomeze tugamburuza abakomeje kugaragara bacuruza ibinyoma”.

Ku ruhande rw’umuyobozi w’iyi Kaminuza Dr Leoprd Hakizimana, asanga iterambere ritashoboka mu gihe abantu baba bimitse ingengabitekerezo ya Jenoside. Kwibuka Jenoside akaba ari umwanya mwiza wo kugira ngo urubyiruko rusobanurirwe ukuri kw’amateka, bityo bibafashe kubaka ubudasa n’indangagaciro z’abanyarwanda.

Abanyeshuri n’abarezi bo muri Kaminuza ya Kigali, banagejejweho ubuhamya bw’ukuntu abari bahungiye mu cyahoze ari Cour d’Appel Ruhengeri bahizeye ubutabera, bahiciwe mu gihe cya Jenoside yakorewe Abatutsi, bakajyanwa kujugunywa mu byobo byari byaracukuwe ahaje kubakwa urwibutso rwa Muhoza. Aha hombi bahashyize indabo mu rwego rwo kunamira no kuzirikana ubugome bw’indengakamere bw’abakoze Jenoside.

Mu kunamira inzirakarengane z’Abatutsi bazize Jenoside bashyize indabo ku mva iri mu rwibutso rwa Muhoza

Abitabiriye uyu muhango umubyeyi witwa Nyirahabimana Chantal, warokotse Jenoside yakorewe Abatutsi, wo mu Murenge wa Muhoza, bamushyikirije amafaranga ibihumbi 100 mu rwego rwo kumwunganira mu mibereho.

Baratanga ubutumwa bukubiyemo amabwiriza yo kwirinda Covid-19

Nk’uko bisobanurwa n’Umunyamabanga Nshingwabikorwa w’Umurenge wa Gashora, Kadafi Aimable, ngo bategura gutangiza ubwo bukangurambaga, bategekereje abafatanyabikorwa babafasha gutanga ubwo butamwa bukagera ku bantu benshi kandi vuba.

Ni muri urwo rwego bahisemo gukorana n’abatwara abantu n’ibintu ku magare na moto (Abamotari n’Abanyonzi), kuko mu kazi kabo ka buri munsi ngo bahura n’abantu benshi kandi na bo ubwabo bitewe n’uko akazi kabo gakorwa, usanga bakenera ubwirinzi cyane kugira ngo batandura icyorezo cya Covid-19.

Kadafi Aimable yagize ati “Abamotari n’abanyonzi ni abantu bahura n’abantu benshi ku buryo batanga ubutumwa kuri abo bahura na bo. Ikindi kuriya baheka abantu, ubona ko baba begeranye cyane, bisaba ko na bo bibutswa kugira ubwirinzi kuri bo no ku bagenzi batwara”.

Ni igikorwa cyatangiye ku ya 23 Kamena 2021, ariko gikomeza kuko ubu ngo abo bamotari n’Abanyonzi baza kujya mu tundi dusantere dutandukanye tw’aho mu Murenge wa Gashora batagezemo ejo, bagendana n’ubuyobozi bw’uwo Murenge, bagenda batanga ubutumwa bujyanye no kwirinda icyorezo cya Covid-19.

Kadafi Aimable (uri ku igare), Umunyamabanga Nshingwabikorwa w’Umurenge wa Gashora

N’ubwo icyiciro cy’abamotari n’abanyonzi ari cyo cyabaye icya mbere mu kwitabira ubwo bukangurambaga, Ubuyobozi bw’Umurenge wa Gashora ngo bwatekereje no gukorana n’ibindi byiciro birimo abikorera (PSF) ndetse n’amadini n’amatorero kuko na bo bahura n’abantu benshi ku buryo bafasha mu gutanga ubutumwa ku babagana.

Kadafi ati “Turategura uko tuzakorana n’abafatanyabikorwa bo mu cyiciro cy’abikorera, ni ukuvuga abacuruzi, kuko abaturage bacu bahahira mu maduka yabo, bagire ubwirinzi kugira ngo banafashe umuturage ubagana kwirinda. Niba umukiriya yinjiye mu iduka, akomeze kwirinda akurikije uko asanze umucururuzi yirinze, n’ibindi bisabwa nko gukaraba intoki neza mbere yo kwinjira mu iduka, kwinjira umwe umwe kugira ngo bategerana cyane mu iduka, ibyo byose abacuruzi bakabikurikirana”.

Umwe mu bamotari bari muri ubwo bukangurambaga, Nkeramugaba Wellars, ubarizwa muri Koperative Cotamobu-Ubufatanye ukorera muri Santere ya Ramiro, mu Kagiri ka Ramiro mu Murenge wa Gashora, yavuze ko bavuganye n’ubuyobozi bw’Umurenge wa Gashora, bakumva ko na bo bakwiye gutanga umusanzu wabo mu kurwanya icyorezo cya Covid-19.

Yagize ati “Twavuganye n’umurenge, twemeza ko tugiye kuzenguruka mu dusantere dutandukanye two mu Murenge wa Gashora twibutsa abantu kwirinda icyorezo cya Covid-19, twabwiraga abacuruzi ibyo basabwa gukora n’uko bagomba kwirinda. Ni ibintu bidahenze cyane kuko aho twazengurutse hose ntihari kurenza litiro imwe ya Lisansi, kandi umuntu akaba atanze umusanzu we. Twe turirinda uko bishoboka, ubu mfite umuti wo gutera muri ‘kasike’ n’uwo gukoraba mu ntoki, kandi n’aho duhagaze tuba twambaye agapfukamunwa n’ubwo hatabura abateshuka ariko turibukiranya”.

Twizerimana Damien, we ni Umuyonzi, atwara abantu n’ibintu ku igare, ako kazi ubu ngo akamazemo imyaka itandatu akorera aho muri Sentere ya Ramiro mu Murenge wa Gashora, avuga ko yagiye mu bukangurambaga bwo kurwanya Covid-19 kugira ngo atange urugero rw’uko na we yirinda bityo n’abandi barebereho.

Ati “Uko twakoze ubukangurambaga, twagendaga turi ku murongo duhanye intera nibura ya metero ebyiri, twambaye udupfukamunwa neza, kugira ngo dutange n’urugero ku batureba. Natwe abanyonzi turirinda mu kazi kacu, ngira umuti nkarabya umukiriya mbere yo kumutwara, njyewe umuntu utambaye agapfukamunwa sinshobora kumutwara ku igare ryanjye, kandi kuko ndi mu bayobozi b’Abanyonzi bakorera kuri ako gasantere ka Ramiro, ubwo mpita mbuza n’abandi banyonzi kumutwara kandi bakabyumva kuko ni ngombwa kwirinda”.

Abayobora amadini n’amatorero na bo basabwa kujya bibutsa abayoboke babo ko icyorezo cya Covid-19 kigihari, ndetse ko n’ingamba zo kucyirinda zigomba kubahirizwa aho umuntu ari hose. Muri urwo rwego ngo ubuyobozi bw’Umurenge wa Gashora burategura kujya bujya mu nsengero bugasaba umwanya wo gutanga ubutumwa bujyanye no kwirinda Covid-19.

Iyo Poste de Santé yubatse mu Mudugudu wa Kabavomo, iherutse gutahwa ku mugaragaro ihita itangira gutanga serivisi z’ubuvuzi.

Umuyobozi w’Ikigo Nderabuzima cya Runyombyi, Mugisha Liliane, yabwiye IGIHE ko kuri Poste de Santé ya Nteko batanga serivisi z’ubuvuzi z’ibanze zirimo gusuzuma abarwayi, gukingira abana, kuboneza urubyaro, gupima abagore batwite n’izindi.

Bamwe mu baturage bo mu Mudugudu wa Kabavomo bavuga ko bishimiye ko batazongera gukora urugendo rurerure bagiye kwivuza.

Mwunguzi Félecien ati “Mbere twajyaga kwivuza ku Kigo Nderabuzima cya Runyombyi tugakora urugendo rw’amasaha nk’atatu kugira ngo tuhagere. Ubu turishimye kuko dusigaye twivuriza hafi.”

Sebareme Anastase na we avuga ko kuba bahawe Poste de Santé bibaruhuye ikiguzi cy’amafaranga batangaga bagiye kwivuza ku Kigo Nderabuzima.

Ati “Kujya i Runyombyi byatugoraga kuko umurwayi twamuhekaga mu ngombyi tukagenda nk’amasaha atatu. Uwategaga moto yishyuraga ibihumbi bitandatu kugenda no kugaruka. Turishimye kuko tuzajya twivuriza hafi turuhutse imvune twagiraga n’ayo mafaranga twatangaga.”

By’umwihariko bifuza aho abagore babyarira

Abaturage bo mu Kagari ka Nteko baganiriye na IGIHE bifuza ko Poste de Santé yabo yakongerwamo serivisi y’aho abagore babyarira (Maternité) kuko iyo hari umugore ufashwe n’inda nijoro bibagora kumugeza ku kigo nderabuzima akaba yabyarira mu nzira.

Sebareme Anastase ati “Ikintu kitugoye twifuza ko badufasha ni ukuduha serivisi yo kubyaza kuko iyo umubyeyi afashwe n’inda kugera i Runyombyi biratugora akaba yabyarira mu nzira cyangwa agahura n’ibibazo.”

Umuyobozi w’Ikigo Nderabuzima cya Runyombyi, Mugisha Liliane, yavuze ko iki cyifuzo gifite ishingiro kuko byafasha ababyeyi.

Umuyobozi w’agateganyo w’Akarere ka Nyaruguru, Gashema Janvier, yavuze ko icyifuzo cy’abo baturage bacyakiriye kandi babiganira n’inzego bireba kugira ngo bishyirwe mu bikorwa kuko mu Rwanda imiyoborere ishingira ku byifuzo by’abaturage.

Ati “Nk’uko mubizi imiyoborere y’igihugu cyacu ishingiye ku muturage, ibyifuzo by’abaturage rero ni byo dushingiraho iyo dukora. Icyifuzo cyabo twaracyumvise kandi gifite agaciro; icyo dukora ubu ni ukubiganira n’inzego bireba ndetse kugira ngo hajye ‘Materinité’ bisaba ko twagura n’inyubako, ibyo na byo bikazitabwaho mu gutegura igenamigambi ku buryo abo baturage bazasubizwa.”

Gashema yasabye abaturage gukomeza gutanga neza umusanzu w’ubwisungane mu kwivuza kugira ngo bivuze bitabagoye kandi serivisi bahabwa kwa muganga zikomeze kuba nziza.

Poste de Santé bagerejwe yubatse mu Mudugudu wa Kabavomo mu Kagari ka Nteko

Umuyobozi w’Agateganyo w’Akarere ka Nyaruguru, Gashema Janvier, yavuze ko icyifuzo cy’abo baturage bacyakiriye kandi bazabiganira n’inzego bireba kugira ngo bishyirwe mu bikorwa

Poste de Santé bagerejwe yubatse mu Mudugudu wa Kabavomo yatangiye gutanga serivisi z’ubuvuzi

[email protected]

Iyi nyubako iherereye mu Mujyi wa Kayonza, yasambuwe n’imvura yaguye mu mpera za 2018, kuva icyo gihe ibiro by’Akagari byimuriwe mu yindi nyubako.
Ibi byatumye hahinduka igihuku ku buryo bamwe mu rubyiruko bahanywera ibiyobyabwenge cyangwa abajura bakaba ari ho bihisha nk’uko abaturage babivuga.

Umwe yagize ati “Izi ndabyo zitajya zikatwa zituma hihisha abajura ku mugoroba; ushobora kuhanyura umuntu akakwambura isakoshi akahirukira ukamubura, hashize imyaka myinshi hasambutse ariko ubuyobozi ntabwo bwigeze bushaka gusana iyi nzu.”

Undi muturage yavuze ko muri iyi nzu hirirwa urubyiruko rwinshi bakeka ko banahanywera urumogi. Ati “Njye kumugoroba mpabona urubyiruko rwinshi rw’abasore rushobora no kuba ruhanywera ibiyobyabwenge nta wamenya, icyo twasaba ubuyobozi ni uko bavugurura iyi nzu hakongera kuba heza ibigunda bakabikuraho.”

Umuyobozi w’Akarere ka Kayonza, Murenzi Jean Claude yabwiye IGIHE ko kuva aka Kagari kasamburwa n’umuyaga bahise bakimurira ahahoze hakorera Akarere ka Kayonza, avuga ko imirimo yo kubaka ibiro by’Akagari gashya izakorwa mu ngengo y’imari y’umwaka utaha izatangira muri Nyakanga.

Yagize ati “Kari mu two tugiye kubaka, kazubakwa bundi bushya guhera hasi, ingengo y’imari yari itaraboneka ariko mu ngengo y’imari y’umwaka utaha kazubakwa.”

Uyu muyobozi yavuze ko ibijyanye no kuhasukura bagiye kuhitaho kugeza igihe imirimo yo kubaka ibiro by’Akagari gashya izatangirira mu ngengo y’imari izatangira muri Nyakanga 2021.

Imyaka ibaye itatu ahari ibiro by’Akagari hasambuwe n’imvura

Ubuyobozi bw’Akarere ka Kayonza buvuga ko buteganya kubaka iyi nzu bundi bushya mu ngengo y’imari y’umwaka utaha

Aya makimbirane yabaye ku wa Gatatu ahagana saa saba z’umugoroba, ubwo iyi miryango yari yagiye gushyingura yasanze hasigaye imva imwe kandi yose yari yishyuye imva mbere y’igihe.

Mu gihe bari bakirimo gushyamirana, ni bwo haje undi muntu wishwe na Covid-19, ashyingurwa muri ya mva yari isigaye, bituma imiryango itangira gushaka ubundi buryo bwo gushyingura.

Iragaba Fidele wari waje gushyingura umubyeyi we, yavuze ko koperative ya Ihumure rya Rubavu yagize uburangare bukomeye mu kugena uburyo abantu bashyingurwa.

Ati “Biragaragara ko iyi koperative ifite abakozi bake, ariko hari n’ikibazo cy’abantu bari kwitaba Imana ari benshi bigaragara ko muri iki cyumweru biyongereye…ntabwo twashyinguye umubyeyi wacu mu cyubahiro kugeza ubu, urabona ko abenshi bigendeye.”

Museveni Calvin na we wari waje gushyingura, yavuze ko bishyuye imva yo gushyinguramo umukecuru wabo ariko bagasanga aho bari bushyingura hari gushyingurwa undi.

Ati “Naje gushyingura umukecuru wanjye kandi hano wishyura mbere. Iminsi ibiri irashize tubahaye inyemezabwishyu ariko tubabajwe no kugera hano tugasanga imva bari baduhaye barimo kuyishyinguramo undi muntu, ni ukuvuga ko umubare w’abapfuye uruta imva zagenwe.”

Museveni yasabye ko koperative icunga iri rimbi yagize uburangare, kuko amakimbirane hagati y’imiryango yatewe n’uko batamenyeshejwe uburyo bwo gushyingura bunyuze mu mucyo.

Ati “Tukigera hano, habaye gushyamirana kuko hari imirambo ine kandi hari imva imwe, byaduhungabanije kuko hari abantu bataha kure bashobora gufatwa n’amasaha, twasabaga ko badufasha bakazana rwiyemezamirimo ubishoboye.”

Umuyobozi wa Koperative Ihumure rya Rubavu icunga Irimbi rya Karundo Nkundakozera Jonas, yemera aya makosa yose, akavuga ko byatewe n’impfu ziyongereye.

Ati’’N’ikibazo cy’abakozi kirimo ariko icyabiteye ni ubwinshi bw’abantu bitabye Imana. Ejo [hashize] twashyinguye abantu batanu imva zose zirara zirangiye, nibwo bwa mbere bibayeho mu myaka 20 tumaze dukorera hano.”

Yakomeje asobanura ko bishoboka ko abantu bishwe n’icyorezo cya Covid-19 batumye iyi mibare yiyongera.

Ati “Ubundi twashyinguraga umuntu mwe cyangwa babiri mu cyumweru, hakaba n’ubwo ibyumweru bibiri bishira nta muntu [dushyinguye] ariko ejo twashyinguye abantu batanu. Turemera uburangare bwa koperative ariko tugiye kwikosora.”

Akarere ka Rubavu kamaze iminsi gafite ubwiyongere budasanzwe bw’icyorezo cya Covid-19 bwatewe ahanini n’abaturage baturutse muri Repubulika Iharanira Demokarasi ya Congo bahunga iruka rya Nyiragongo.

Ku itariki ya 24 Kamena 2021, abantu 73 banduye Covid-19, bavuye kuri 83 bari bayanduye umunsi wari wabanje.

Irimbi rya Kirundi ryabereyemo amakimbirane y’imiryango yari ije gushyingura ikabura imva

Abaturage bashyinguye ku mugoroba

Bamwe bari barambiwe batashye birinda gufatwa n’amasaha

Imvururu z’imiryango yari yaje gushyingura ikabura imva yatewe n’uko abantu bitabye Imana ari benshi

Byarinze bigera ku masaha y’umugoroba abaturage bari gushyingura

Baje gushyingura birangira bahindutse abafundi

Barwaniye imva imwe kubera ko izo bishyuye zashyinguwemo abandi bantu

Biyubakiye imva ku irimbi

Icyo cyaha cyabereye mu Mudugudu wa Kavumu mu Kagari ka Nyeranzi ku wa 8 Kemena 2021. Dosiye ye yamaze kugezwa mu bushinjacyaha kugira ngo nikimuhama ahanwe hakurikijwe amategeko.

Uwo mugabo w’imyaka 46 y’amavuko yari asanzwe abana n’umugore we nta makimbirane azwi bafitanye usibye kumutegeka ku mutungo ntatume yisanzura mu kuwukoresha.

Umunyamabanga Nshingwabikorwa w’Umurenge wa Gushubi, Nsanzimana Theogène, yabwiye IGIHE ko uwo mugabo yasanze umugore we ari kotsa ibigori ahita amufata akaguru agatsindagira mu ziko amubwira ko ibyo yakoze yari yarabimubujije.

Ati “Ngo yari yaramubujije kujya mu mirima y’ibigori ngo bibanze byere, umugore rero aragenda ajya gucamo ibyo kotsa. Abifite rero arimo kubyotsa, umugabo araza afata akaguru agatsindagira mu ziko aho yari arimo kokereza ibigori karashya ku ivi.”

Nsanzimana avuga ko bidakwiye ko abashakanye bapfa ubusa kugera aho umwe atwika undi, bityo bakomeje kwigisha abantu kubana neza birinda guhohotera.

Uwo mugabo akimara gutwika umugore we akaguru yahise afatwa ashyikirizwa Urwego rw’Igihugu rw’Ubugenzacyaha (RIB) rumukorera dosiye ishyikirizwa ubushinjacyaha.

Amakuru agera ku IGIHE yemeza ko mu ibazwa uwo mugabo yemeye ko yatwitse umugore we akavuga ko yabitewe n’ubusinzi.

Ubushinjacyaha ku rwego rwisumbuye rwa Huye buvuga ko uwo mugabo yemera ko yasanze umugore we mu rugo ari kotsa ibigori amukubita urushyi arangije amutsindagira ukuguru mu ziko.

Icyaha cyo gukubita cyangwa gukomeretsa akurikiranweho kiramutse kumuhamye, yahanishawa igifungo kigera ku myaka 15 n’ihazabu ya miliyoni 5 Frw nk’uko giteganywa kandi kigahanishwa ingingo ya 121 y’itegeko No 68/2018 ryo ku wa ku wa 30/08/2018 riteganya ibyaha n’ibihano muri rusange.

Kuri ubu uwo mugore yatangiye gukira kuko amaze igihe yivuza ubushye.

Dosiye y’uwo mugabo ukurikiranweho gutwika umugore we yamaze gushyikirizwa ubushinjacyaha mu Karere ka Huye

[email protected]

Kuva mu 1994, u Rwanda rwiyemeje kubaka iterambere ridaheza, ruza gutekereza ku cyerekezo ‘Vision 2020’, gikubiyemo intego zaryo, ishyiraho inzego z’imiyoborere zagombaga gutuma zigerwaho n’abantu bagomba kuzikurikirana.

Imwe mu nzitizi ya mbere yadindije iterambere ry’u Rwanda muri ibyo bihe, yari ukubona abantu bafite ubushobozi bagombaga gukora mu nshingano zitandukanye, ari nayo mpamvu uwarangizaga amashuri yisumbuye yabaga ategerejwe ku isoko ry’umurimo, uwarangije kaminuza akaba akarusho.

Uretse kutabona abakozi bafite ubushobozi, hari n’ikibazo cy’imikoranire itameze neza hagati y’abakozi mu kigo kimwe, bigaterwa n’impamvu zirimo ikimenyane, imyumvire idakwiye n’ubunyamwuga buke muri rusange.

Ibi bibazo byatumye mu 2008, hashyirwaho Komisiyo Ishinzwe Abakozi ba Leta (NPSC) ifite inshingano zo kunoza imikorere y’abakozi ba Leta, kuva mu buryo batoranywa mbere yo kwinjira mu kazi, uko bagenzurwa n’uko bashyira mu bikorwa inshingano zabo.

  Komisiyo yarumye ihuhaho

Iyi Komisiyo yagize uruhare mu kuzamura imikorere myiza y’abakozi ba Leta ariko ntiyakemuye ibibazo by’imikorere byose kuko yitaye ku by’ubushobozi buke mu kazi gusa, irenza ingohe ibyo kuzamura imyitwarire mbonezamirimo.

Ibi byatumye ibibazo byo kutumvikana, ubugambanyi n’andi makimbirane bikomeza kumvikana mu bakozi ba Leta, binatuma mu 2014, hakorwa ubushakashatsi bwo kureba imiterere yabyo.

Ubu bushakashatsi bwerekanye ko mu bitera ayo makimbirane, harimo kudakorera hamwe, abayobozi birengagiza amategeko, kudahanahana amakuru ku mikorere ya buri wese n’ibindi.

Ubu bwumvikane buke no kucana intege mu bakozi ba Leta kandi biri mu muburo Umukuru w’Igihugu yahaye Minisitiri w’Intebe, Dr. Edouard Ngirente wari winjiye mu nshingano avuye gukora muri Banki y’Isi. Perezida Kagame yamusabye kwima amatwi abazashaka kumusubiza inyuma mu kazi ke.

Icyo gihe yagize ati “Icya mbere, buriya azagira abajyanama, bamubwira bati ‘ibyo ntabwo bikorwa hano’, yajya gukora ikintu kizima, bakamubwira ngo ‘oya, siko bigenda hano’, bakamwitambika imbere, cyangwa yajya gukora ikintu kubera ko afite amatwara mashya bakamubwira ngo ‘cisha make ba uretse, ntudusanze aha se?’ Ubwo wowe uzanye ibintu biri aho bikabya. Niba batarakugeraho, bazakugeraho.”

  Igihombo cy’imigirire kirasangirwa

Mu Nama Nyunguranabitekerezo yarebeye hamwe uburyo bwo guteza imbere imikorere mbonezamirimo (professional ethics) mu bakozi ba Leta, hagaragajwe ko imyitwarire mibi yabo ibagiraho ingaruka, ikagera ku bigo bakoramo n’abaturage bareberera.

Umunyamabanga Uhoraho muri Minisiteri y’Ubutegetsi bw’Igihugu, Dusengiyumva Samuel, yavuze ko “Urwego rw’ibyo abaturage bifuza kuri Leta rwarazamutse cyane kuko barajijutse, ndetse ko bimwe mu byo bakenera kuri Leta bafite ubushobozi bwo kubyiha, icyo bakeneye ni uko dushyiraho uburyo bworoshya kubona izo serivisi kuko iyo bitagenze gutyo bibatwara umwanya n’amikoro atari ngombwa.”

Uku kudatanga serivisi ziboneye kandi byagaragajwe nk’intandaro y’ibyaha birimo icya ruswa, itangwa kugira ngo umuturage abone serivisi yakabaye abona ariko imikorere mibi, irimo kudasubirizwa igihe, ikamudindiza.

Umuyobozi w’Umuryango Mpuzamahanga Urwanya Ruswa n’Akarengane, Transparency International Ishami ry’u Rwanda, Marie Immaculée Ingabire, yavuze ko abayobozi badasubiza abaturage, “Basa nk’abibwira ngo wandega he?” bigatuma abaturage bashaka izindi nzira zirimo gutanga ruswa.

Mu bushakashatsi bwashyizwe hanze muri Gicurasi 2020, ikigero cya ruswa mu nzego z’ubuyobozi cyari 51.4%. Uretse abaturage bahomba kubera serivisi mbi badahabwa, Leta nayo irahomba kuko icyizere igirirwa kigabanuka.

Abanyarwanda bizeye Leta ku kigero cya 71.3%, mu gihe intego ari uko uwo mubare ugera kuri 90% mu 2024.

Umuyobozi Wungirije mu Rwego rw’Igihugu rw’Imiyoborere, RGB, Dr. Niyishaka Emmanuel, yavuze ko ‘imyitwarire idahindutse byazagorana ko uyu muhigo weswa’.

Umunyamabanga Nshingwabikorwa wa Komisiyo y’Igihugu Ishinzwe Abakozi ba Leta, Angelina Muganza, yavuze ko igihombo cy’imikorere mibi y’abakozi ba Leta kinangiza umutungo wa Leta, utikirira mu manza z’amafuti ishorwamo kubera uburangare bw’abayobozi.

Yavuze ko amafaranga Leta ihomba yikubye kabiri mu 2019, agera kuri miliyoni 520 Frw avuye kuri miliyoni 224 Frw mu 2018, ndetse aratumbagira agera kuri miliyoni 970 Frw mu 2020.

Muganza yavuze ko ikibabaje ari uko muri izo miliyoni 970 Frw, izigera kuri 761 Frw n’ubundi zari zikwiye guhabwa abazitsindiye bitarinze kugera mu nkiko.

Yongeyeho ati “Hari aho twasanze abayobozi barirukanye abakozi mu buryo budakurikije amategeko, bakavuga ngo ‘nibagende nibarega tuzabishyura’ ukibaza niba amafaranga bazishyura ari ayabo.”

Mu 2020, abakozi ba Leta bajuririye ibyemezo 374 bari bafatiwe birimo n’ibyo kwirukanwa, kandi 109 muri byo byari bifite ishingiro, bisobanuye ko byari byafashwe mu buryo bunyuranyije n’amategeko.

Muganza yavuze ko “Umwanya n’amikoro Leta itakariza muri izi manza” wakabaye ukoreshwa mu bikorwa by’iterambere.

  Dukome urusyo tutaretse ingasire

Nubwo hari igihombo Leta iterwa n’abakozi bayo, Marie Immaculée Ingabire, yavuze ko na Leta atari shyashya kuko hari ubwo idatanga ibikwiriye mu gufasha abakozi kuzuza inshingano zabo.

Yatanze urugero rw’Ikigo cy’Igihugu Gishinzwe Amashuri Makuru na za Kaminuza, HEC, yemeza ko “gifite abakozi bake cyane ugereranyije n’inshingano gifite.”

Yanakomoje ku rwego rw’Umuvunyi, “Rwahaye akazi umukozi, twagenzura tugasanga yarigeze kwirukanwa azira ibyaha bya ruswa, ukibaza ukuntu umuntu wirukanwe azize ruswa azajya kuyirwanya bikakubera ihurizo.”

Ingabire yatunze urutoki ibigo bya Leta bihora imbere y’Akanama Kagenzura Ikoreshwa ry’Umutungo wa Leta mu Nteko Ishinga Amategeko, PAC, bikamaramo imyaka itandatu cyangwa irindwi ariko ntibifatirwe ibihano.

  Leta yarahagurutse

Mu rwego rwo kongera umusaruro w’abakozi, Leta imaze iminsi mu mavugurura agamije kugera kuri iyo ntego.

Imwe mu ntambwe yatewe muri uru rugendo ni Iteka rya Perezida ryasinywe muri Gashyantare 2021, rigena imyitwarire mbonezamurimo ku bakozi ba Leta, rikubiyemo ko buri rwego rwa Leta rukwiye kugira Akanama kagizwe n’abantu batanu gashinzwe gukurikirana amakosa akorwa n’abakozi ba Leta.

Uretse iri teka, abitabiriye iyi nama banavuze ko hari ibindi bikwiye gushyirwamo imbaraga kugira ngo imyitwarire mbonezamirimo izamuke ku bakozi ba Leta.

Senateri Habiyakare François yavuze ko ibyo birimo “Kugenzura amateka y’umuntu Leta ishaka guha akazi, ntiharebwe gusa ubushobozi bw’ibyo yize n’ibyo yakoze. Dukwiye kureba no ku myitwarire ye, tukamenya uko yabanaga n’abandi, uko yitwaraga mu zindi nshingano ku buryo tuba tuzi ko hejuru y’ubumenyi n’ubushobozi bwe, anafite imitekerereze ikwiye itazatuma agera mu kazi agatangira kuba umutwaro kuri Leta.”

Mu bindi byasabwe harimo kongera amahugurwa ahabwa abakozi ba Leta ku bijyanye n’imyitwarire mbonezamurimo, kuko ubusanzwe bahugurwa ku bijyanye n’ibyo bakora, ibindi ntibyitabweho.

Amahame mpuzamahanga agena ko abakozi bakwiye guhugurwa amasaha 1000 ku mwaka.

Leta yanasabwe gukomeza kuzamura ubushobozi bw’inzego z’ibanze zirimo utugari n’imirenge, kuko ari two tugaragaramo ibibazo bya ruswa no kudatanga serivisi nziza.

Iki kibazo cyerekanwe nk’ikiri kuvugutirwa umuti kuko kuva muri Mata 2019 kugera mu Ukwakira 2020, abayobozi 163 bo mu nzego z’ibanze birukanwe kubera imyitwarire mibi.

Minisitiri w’Abakozi ba Leta n’Umurimo, Rwanyindo Kayirangwa Fanfan, yavuze ko abakozi ba Leta ari bo pfundo ry’impinduka z’iterambere.

Yagize ati “Abakozi ba Leta bagomba kugira uruhare mu kuzahura ubukungu bw’igihugu binyuze mu kuyobora impinduka zishingiye ku myumvire, imyitwarire n’imikorere itanga umusaruro by’umwihariko mu bihe bidasanzwe turimo.”

Inama nyunguranabitekerezo yabaye mu gihe hizihizwaga ku nshuro ya munani Umunsi wo kuzirikana imirimo y’Inzego za Leta muri Afurika, wahawe insanganyamatsiko igira iti ‘‘Twubake Afurika twifuza binyuze mu kwimakaza umuco n’imyitwarire mbonezamurimo ishingiye ku miyoborere itanga icyerekezo gihamye no mu bihe bidasanzwe.”

Umuyobozi w’Umuryango Mpuzamahanga Urwanya Ruswa n’Akarengane, Transparency International Ishami ry’u Rwanda, Marie Immaculée Ingabire, yavuze ko abayobozi badasubiza abaturage, “Basa nk’abibwira ngo wandega he?”

Yabitangarije mu kiganiro ‘Ubyumva ute’ cya KT Radio cyo ku mugoroba wo ku wa 23 Kamena 2021, cyari cyatumiwemo Minisitiri w’ubutegetsi bw’igihugu, Gatabazi JMV, Dr Sabin Nzanzimana n’Umuvugizi wa Polisi y’u Rwanda, CP John Bosco Kabera, kivuga ku nsanganyamatsiko ijyanye n’izamuka rikabije ry’umubare w’abandura n’abicwa na Covid-19 mu Rwanda.

Uretse kubahiriza amabwiriza yo kwirinda icyo cyorezo, hari uburyo Leta ikomeje kwita ku kibazo cya Covid-19, burimo gushakisha inkingo, aho Dr Nzanzimana yemeje ko hari icyizere cy’uko uyu mwaka urangira u Rwanda rubonye inkingo zisaga miliyoni eshatu.

Yagize ati “Icyizere kirahari, ndetse na Minisititi w’Ubuzima yagiye abisubiramo kenshi, yuko uku kwezi kwa Gatandatu kurangira cyangwa se mu ntangiro z’ukwa Karindwi, tubonye umubare utari muto w’inkingo, ku buryo dushobora kurangiza uyu mwaka wa 2021 tumaze kubona inkingo zisaga miliyoni nk’eshatu”.

Arongera ati “Icyo cyizere turagifite, ariko iby’inkingo birahinduka, biramutse hari andi mezi yiyongeyeho ubwo byaba biturutse ku bindi bibazo by’inkingo, ariko icyo cyizere cyo twarakibonye ndetse hari izamaze kwishyurwa na Leta y’u Rwanda dutegereje”.

Dr Sabin Nsanzimana, Umuyobozi wa RBC

Abajijwe ku zindi nkingo nshya zageragejwe niba u Rwanda na rwo rwiteguye kuzikoresha, Dr Nzanzimana yavuze ko bisaba ubushishozi kugira ngo bamenye ibyazo, aho yemeje ko inkingo eshatu arizo zemewe mu Rwanda, izindi Leta ikazabanza kumenya neza ibyazo.

Agira ati “Inkingo ziragenda ziboneka ari nyinshi, hari iz’u Bushinwa zagiye zikorerwaho ubushakashatsi aho tukibanza kuzigaho, hari aho zakoreshejwe zitanga umusaruro, ariko kugeza ubu inkingo twiyemeje gukoresha aha mu Rwanda ni urukingo rwa Pfizer, AstraZeneca hari ndetse n’urukingo rwa Johnson & Johnson na rwo rwaremejwe n’ubwo rutaragera hano, ariko turarwizeye ruragera mu Rwanda mu minsi iri imbere, n’izindi tuzagenda tureba imikorere yazo n’uburyo kuzibona byoroshye”.

Arongera ati “Twanze gufata inkingo zibonetse zose tudasuzumye neza, hari urundi turimo kwigaho n’ubwo OMS iherutse kurwemeza, ariko ibihugu biba bifite uburyo bwabyo, uko bibibona kuko ziranahenda, inkingo ubundi n’ubwo abantu bazibona nta kiguzi, Leta iba yashyizemo amafaranga menshi n’abafatanyabikorwa bayo, inkingo turimo gukoresha ubu Leta iba yaratangiye gushaka amafaranga ikanishyura mbere”.

Mu Rwanda abantu 391058 ni bo bamaze guhabwa inkingo za Covid-19 zo mu bwoko bwa Pfizer na AstraZeneca.