Tag: featured

Ni ubutumwa yatanze kuri uyu wa Kane, tariki ya 25 Ugushyingo 2021, mu Nama yiga ku myitwarire ikwiriye abagabo ariko idahohotera abagore n’abakobwa.

Iyi nama yateguwe na Perezida wa Repubulika Iharanira Demokarasi ya Congo (RDC), Félix Tshisekedi ari na we uyoboye Umuryango wa Afurika Yunze Ubumwe (AU) muri uyu mwaka.

Yahuriranye n’Umunsi Mpuzamahanga wo kurwanya Ihohoterwa rishingiye ku gitsina by’umwihariko irikorerwa abakobwa n’abagore. Ibikorwa byo kurwanya iri hohoterwa bimara iminsi 16, bizasozwa ku wa 10 Ukuboza 2021, umunsi wizihizwaho uburenganzira bw’ikiremwamuntu.

Inama yabereye i Kinshasa ifatwa nk’amateka mashya mu gukangurira ibihugu byo muri Afurika kugira uruhare mu kurwanya ihohoterwa rikorerwa abakobwa n’abagore.

Yitabiriwe n’abakuru b’ibihugu barimo Perezida Kagame, Nana Akufo Addo wa Ghana, Macky Sall wa Sénégal, Denis Sassou-Nguesso wa Repubulika ya Congo, Faure Gnassingbé wa Togo na Perezida Félix Tshisekedi wa RDC.

Barimo kandi Umuyobozi w’Ihuriro ry’Abagore bari mu Nzego z’ubuyobozi muri Afurika (AWLN), Ellen-Johnson Sirleaf wabaye Perezida wa Liberia, Umuyobozi wa Komisiyo ya AU, Moussa Faki Mahamat n’abandi.

Perezida Kagame yavuze ko abagabo bakomeza kurebera ihohoterwa rikorerwa abakobwa n’abagore nyamara bazi ko ari bibi kandi bifite ingaruka ku iterambere.

Yagize ati “Nta wahakana ko abagabo ari bo bahohotera abagore n’abakobwa. Abagabo bafite inshingano zidasanzwe zo kuvuga ariko no kugaragaza ibikorwa.’’

Umukuru w’Igihugu yavuze ko hakwiye kwimakazwa uburyo bwo kubaka ubushobozi bw’abagore binyuze mu gushyiraho amategeko n’inzego zibitaho.

Yatanze urugero rw’u Rwanda rwashyizeho Ikigo Isange One Stop Center gifasha kwita, kuvura, kumva no gukurikiranira hafi abakorewe ihohoterwa rishingiye ku gitsina.

Kugeza ubu mu gihugu hose hari ibigo 40 bitanga izo serivisi mu masaha 24 buri munsi.

Perezida Kagame yavuze ko igihe kigeze ngo ibihugu bikorere hamwe bigamije kurandura ihohoterwa rikorerwa abagore.

Yakomeje ati “Uburinganire burenze kuba inshingano, ni uburenganzira budashobora gukurwaho. Tugomba kwiyemeza guhangana n’imyumvire mibi ikigaragara mu bahungu n’abagabo bamwe na bamwe bagifata guhohotera abagore n’abakobwa nk’ibisanzwe. Nidutahiriza umugozi umwe, tuzarandura iki kibazo.”

Iyi nama yagarutse ku ngamba zikwiye gufatwa n’abagabo bari mu nzego z’ubuyobozi mu kwirinda no kurandura ihohoterwa rikorerwa abakobwa n’abagore muri Afurika mu byiciro byose.

Umuyobozi wa Komisiyo ya AU, Moussa Faki Mahamat, yashimangiye ko igihe kigeze ngo abagabo batange umusanzu wabo mu gushyira iherezo kuri iki kibazo.

Ati “Nicyo gihe cyo kuzirikana ko gushyira iherezo ku ihohoterwa rikorerwa abakobwa n’abagore bidakwiye guharirwa abagore gusa, ni urugamba rwa bose.’’

“Nishimiye kubona abakuru b’ibihugu mu bukangurambaga bwo guhangana n’ihohoterwa rikorerwa abari n’abategarugori. Hakenewe kwemeza no gushyira mu bikorwa amasezerano ya AU mu kurandura ihohoterwa rikorerwa abagore mu buryo bukwiye.’’

Ellen-Johnson Sirleaf yavuze ko iyi nama bizeye ko izavamo ikintu kidasanzwe ugereranyije n’izindi zabayeho mu bihe byashize.

Yagize ati “Turizera ko mwe bakuru b’ibihugu mwakoresha ubuyobozi bwanyu mu kuzana impinduka kandi zigashyirwa mu bikorwa. Turizera ko kuri mwe gushyira iherezo ku ihohoterwa rikorerwa abagore mubifata nk’inzira nziza iganisha ku iterambere ry’umugabane n’icyerekezo cya 2063.’’

Ibihugu bya Afurika byashyize umukono ku masezerano atandukanye agamije kurandura ihohoterwa rikorerwa abakobwa n’abagore. Aya masezerano arimo ayerekeye Uburenganzira bwa Muntu n’ubw’Abaturage na Raporo y’Ibanze ku Masezerano y’Inyongera yerekeranye n’Uburenganzira bw’Abagore muri Afurika (Amasezerano ya Maputo) yo muri Nyakanga 2003.

Perezida Kagame yavuze ko hakenewe gushyirwa imbaraga mu guhindura imyumvire y’abagabo n’abasore batagira icyo bakora mu kurwanya ihohoterwa rikorerwa abakobwa n’abagore

Perezida Félix Tshisekedi wa RDC yavuze ko hakenewe imbaraga mu guhangana n’iki kibazo cyugarije Afurika n’Isi

Perezida Kagame aganira na mugenzi we wa RDC, Félix Tshisekedi (ibumoso) na Macky Sall wa Sénégal

Perezida Kagame na Perezida Félix Tshisekedi wa RDC mu bakuru b’ibihugu bitabiriye iyi nama, banayitangamo ikiganiro

Perezida wa Sénégal, Macky Sall yashimiye Félix Tshisekedi wateguye inama igamije kurebera hamwe icyakorwa mu guhangana n’ihohoterwa rikorerwa abagore muri Afurika

Umuyobozi wa Komisiyo ya AU, Moussa Faki Mahamat, yashimangiye ko guhangana n’ihohoterwa rikorerwa abari n’abategarugori bidakwiye guharirwa abagore gusa

Nyuma y’iyi nama abayobozi bakuru bafashe ifoto y’urwibutso

Ingabo z’u Rwanda zigira uruhare mu bikorwa biteza imbere abaturage harimo no kubaha serivisi z’ubuvuzi

Ubwo bushakashatsi nk’uko buboneka ku rubuga https://www.iapb.org/fr/learn/vision-atlas/causes-of-vision-loss/ bwagaragaje ko abantu bagera kuri Miliyoni 161 ku Isi, bafite ikibazo cyo kutabona neza ibintu bibari kure, mu gihe abagera kuri Miliyoni 510 ku Isi bo bafite ikibazo cyo kudashobora kubona neza ibintu bibegereye.

Abo bafite ibyo bibazo byo kutabona neza, ngo bashobora kubona neza bifashishije amadarubindi ajyanye n’ibibazo bafite, cyangwa se bakabagwa hagamijwe gukosora ibibazo bafite bityo bakongera kureba neza.

Mu mpamvu ziri ku isonga mu gutuma abantu batakaza ubushobozi bwo kubona neza, harimo indwara y’Ishaza. Kuri urwo rubuga bavuga ko abantu bagera kuri Miliyoni 100 ku Isi, batakaje ubushobozi bwo kubona neza, bitewe n’Ishaza.

Muri abo Miliyoni 100, abagera kuri Miliyoni 17 barahumye burundu ntibakibona na gato, mu gihe abandi bagera kuri Miliyoni 83 bo ngo bafite ikibazo cyo kutabona neza. Abafite ibyo bibazo ngo bashobora kongera kubona mu gihe bagiye kwibagisha iyo ndwara y’ishaza kwa muganga.

Izabukuru cyangwa se kuba umuntu atangiye gusaza, na yo ni imwe mu mpamvu zikomeye zituma umuntu atangira gutakaza ubushobozi bwo kubona neza. Abantu bagera kuri Miliyoni 8 ku Isi, batakaje ubushobozi bwo kubona neza bitewe n’uko bageze mu zabukuru. Muri abo Miliyoni 8, abagera kuri Miliyoni 1.9, barahumye burundu.

Indi mpamvu ikomeye mu zitera ubuhumyi cyangwa ibibazo byo kutabona neza, ni iyitwa ‘Le glaucome’, irangwa no kwangiza imitsi ishinzwe kujyana amakuru ku bwonko.

Kubera icyo kibazo cya ‘glaucome’ abantu bagera kuri Miliyoni ku Isi, batakaje ubushobozi bwo kubona neza, muri abo, abagera kuri Miliyoni 3.6 barahumye burundu, mu gihe abagera kuri Miliyoni 4.2 bo bafite ibibazo byo kutabona neza. Gusa ku bantu bafite ikibazo cya ‘glaucome’ ngo bashobora kukivuza kikarangira kitarabatera ubuhumyi kuko ngo kirarangira.

Indi mpamvu ikomeye yongera ibyago byo gutakaza ubushobozi bwo kubona neza, cyangwa se guhuma, ni Diyabete yo kugira isukari nyinshi. Iyo Diyabete ngo hari ubwo ibangamira imikorere y’amaso, kubera ko yangiza imitsi y’amaraso ituma amaso akora neza.

Ku rubuga https://www.avogel.co.uk bavuga ko mu mpamvu zitera ibibazo byo kutabona neza ndetse bikaba byavamo n’ubuhumyi ku bantu b’igitsina gore, harimo ‘menopause’ (igihe umugore aba atakijya mu mihango). Iyo bamwe mu bagore bageze mu bihe bya ‘menopause’ ngo batangira kugira ibibazo byo kutabona neza, kugira amaso yumagara n’ibindi bishobora no kuba impamvu y’ubuhumyi igihe umuntu ativuje kare.

Nta muntu wishwe n’icyo cyorezo kuri uwo munsi, abamaze kwitaba Imana bose hamwe ni 1,341.

U Rwanda rufite intego yo gukingira Covid-19 nibura 60% by’abaturage barwo, bangana na miliyoni 7.5 bagomba kuba bakingiwe bitarenze Kamena 2022.

Tariki 21 Nzeri 2021 u Rwanda rwakingiye burundu 10% by’abaturage mu guhashya ubwandu bwa COVID-19, rugera ku ntego y’ishami ry’Umuryango w’Abibumbye ryita ku Buzima (OMS) ryateganyaga ko ari cyo gipimo kizaba kigezweho ku isi.

Muri Gicurasi 2021, Umuyobozi mukuru wa OMS, Dr Tedros Adhanom Ghebreyesus, yashyizeho intego mpuzamahanga ku 10% by’abatuye ibihugu byose bazakingirwa mu mpera za Nzeri 2021, naho 40% ikaba yagezweho mu mpera z’Ukuboza 2021, na 70% hagati ya 2022.

Umunyamabanga Mukuru w’Umuryango w’Abibumbye yasabye ko imirwano yo muri Ethiopia ihagarara, yibutsa ko “nta mwanzuro wa gisirikare” ushobora kuba warangiza intambara muri icyo gihugu cya Afurika.

Minisitiri w’intebe wa Ethiopia Abiy Ahmed, uherutse no guhabwa igihembo cy’amahoro cyitiriwe Nobel, yavuzweho kuba yagiye ku rugamba gutanga amabwiriza muri iyo ntambara imaze hafi umwaka.

Mu ijambo yavugiye muri Colombia, Umunyamabanga wa LONI Antonio Guterres yasabye ko intambara yo muri Ethiopia ihagarara vuba na bwangu kandi nta yandi mananiza.

Ni intambara yatangiye mu kwezi k’Ugushyingo 2020, mu Ntara ya Tigray, ikaba ishyamiranya ingabo za Leta ya Ethiopia n’iziharanira ubwigenge bw’abaturage ba Tigray ( Tigray People’s Liberation Front ‘TPLF’).

Muri Nyakanga 2021, intambara yageze no mu tundi duce tubiri two mu Majyaruguru ya Ethiopia, kandi inyeshyamba zigakomeza kugenda zisatira Umurwa Mukuru wa Ethiopia, Addis Ababa.

Mu itangazo ryashyizweho umukono n’umuvugizi wa Leta zunze ubumwe za Amerika, yagize ati “Nta mwanzuro wa gisirikare ushoboka mu ntambara ya Ethiopia,” ashimangira ko inzira y’ibiganiro (diplomacy) ari yo ishoboka.

Muri iryo tangazo yongeyeho ko impande zombi zihanganye muri iyo ntambara zagombye guhagarika intambara, zikubahiriza uburenganzira bwa muntu, zikemerera abatanga imfashanyo kuzigeza ku baturage no kurinda abasivili.

Abantu basaga ibihumbi, ngo bamaze gutakariza ubuzima muri iyo ntambara kuva itangiye, abasaga Miliyoni ebyiri bahunga ibyabo, mu gihe abagera ku bihumbi 400 muri Tigray barimo kwicwa n’inzara.

Perezida Kagame na mugenzi we wa RDC, Félix Tshisekedi mu nama yiga ku myitwarire y’abagabo irwanya guhohotera abagore n’abakobwa

Ni inama yari yatumiwemo na mugenzi we wa RDC, Félix Antoine Tshisekedi ikaba yigaga ku ruhare rw’abagabo mu guteza imbere imyitwarire idahohotera abagore n’abakobwa.

Ku manywa yo kuri uyu wa Kane tariki 25 Ugushyingo 2021 nibwo Perezida Kagame yageze i Kinshasa yakirwa na Tshisekedi mu biro bye (Palais de la Nation), hari haje n’abandi bakuru b’Ibihugu bya Afurika y’Iburengerazuba.

Perezida Kagame yashimiye Tshisekedi kubera ubutumire yamwoherereje amusaba kwifatanya na we muri iyo nama, avuga ko ari ingirakamaro mu kurwanya ihohotera rikorerwa abagore n’abakobwa.

Yagize ati “(Inama) irashimangira ko uruhare rw’abagabo mu guhohotera abagore n’abakobwa rwacika burundu. Afurika igomba kubigiramo uruhare”.

Umukuru w’Igihugu cy’u Rwanda yakomeje avuga ko ubutumire bwa mugenzi we wa Congo(RDC) buje mu gihe gikwiriye cyo kuvugurura ubushuti n’ubufatanye bw’ibihugu by’ibivandimwe (u Rwanda na RDC).

Perezida Kagame avuga ko ibiganiro yagiranye na Tshisekedi ari ingenzi cyane mu bijyanye n’amahoro n’iterambere, bidafitiye inyungu ibihugu byombi gusa ahubwo byungukira Akarere no hanze yako muri rusange.

I Kinshasa kandi Perezida Kagame yahahuriye na bagenzi be barimo Perezida wa Togo Fauré E Gnassingbé, Nana Akufo-Ado wa Ghana, Macky Sall wa Senegal na Denis Sassou-Nguesso wa Repubulika ya Congo(Brazaville).

Karegeya yongeye kumenyakana mu ntangiriro za 2014 ubwo umurambo we bawusangaga mu cyumba ya Hotel Michelangelo muri Afurika y’Epfo, yishwe anigishijwe imigozi.

Intoki zatangiye gutungwa u Rwanda nk’igihugu yari amaze imyaka hafi itandatu ahunze, yaranatangije umutwe w’iterabwoba ugamije guhungabanya umutekano warwo. Inshuro nyinshi u Rwanda rwahakanye uruhare urwo ari rwo rwose mu rupfu rw’umugabo wahoze ari ‘Colonel’ ataramburwa ipeti.

Inkiko zo muri Afurika y’Epfo nta na hamwe zigeze zigaragaza ibimenyetso simusiga by’ukuboko kwa Guverinoma y’u Rwanda muri urwo rupfu.

Abari ba soma mbike ba Karegeya bamugaragaza nk’umuntu wari igitangaza, byanagaragaye uyu mwaka muri Mata ubwo umunyamakuru Michela Wrong yamwandikagaho igitabo cyihariye, nyamara akagisoza nta na hamwe agaragaje amakosa Karegeya we ubwe yaba yaragize uruhare mu iherezo rye.

Agasuzuguro mu gisirikare, gutegeka u Rwanda nka Uganda

Karegeya yavukiye i Mbarara mu Majyepfo y’Uburengerazuba bwa Uganda. Yize muri Kaminuza ya Makerere aho yakuye impamyabumenyi ya Kaminuza mu by’amategeko. Yanabaye mu gisirikare cya National Resistance Army cyafashije Perezida Museveni guhirika ubutegetsi bwa Milton Obote.

Muri Uganda, Karegeya yakoze mu rwego rw’Ubutasi. Kuva mu 1994 u Rwanda rumaze kubohorwa, yayoboye ishami rishinzwe ubutasi bwo hanze kugeza mu 2004. Yanabaye Umuvugizi w’Ingabo z’u Rwanda.

Imyitwarire ye mibi mu ngabo, muri rubanda yatangiye kumenyekana mu 2005 ubwo yafungwaga n’inzego za gisirikare zimushinja imyitwarire mibi, akamara amezi atandatu mu bihano.

Ibihano asa nk’uwabirangije yarabaye umurakare kuko akibivamo yanze gusubira mu kazi kugeza ubwo Gen James Kabarebe wari Umugaba Mukuru w’Ingabo, amwihamagariye amumenyesha gusubira mu kazi undi akamutera utwatsi.

Amaze kwanga gusubira mu kazi, mu gisirikare byagaragaye ko ari ubugande no gushaka gutoroka, atabwa muri yombi muri Gicurasi 2006.

Nyuma y’amezi abiri, ni ukuvuga tariki 13 Nyakanga 2006 urukiko rwa gisirikare rwamuhamije ibyaha, akatirwa igifungo cy’amezi 18 no kwamburwa impeta za gisirikare ari naho yamburiwe ipeti rya ‘Colonel’ yari afite.

Karegeya icyo gihe yari abaye umwe mu basirikare bakuru bake bakoze amateka, yo kugaragaraho imyitwarire mibi kugeza ubwo bambuwe amapeti.

Hari mugenzi we byari byarabayeho mu 1999 nyuma yo guhamywa ibyaha byo kwigabiza imitungo y’abaturage.

Mu Ugushyingo 2007, The New Times yanditse ko Karegeya yarekuwe, agasubira mu rugo rwe i Kigali. Uwo munsi nibwo amakuru ye mu Rwanda aheruka, andi yagiye atangazwa arimo urujijo kugeza ubwo we yiyemereraga ko yageze muri Afurika y’Epfo mu 2008.

Hari inyandiko yashyizwe hanze na Wikileaks yaturutse muri Ambasade ya Amerika mu Rwanda muri Werurwe 2008, yavugaga ko Karegeya ashobora kuba yarahunze akiva muri gereza mu Ugushyingo 2007, agatoroka anyuze muri Uganda we n’umuryango we.

Umunyamakuru Michaela Wrong wari inshuti ye y’akadasohoka, yiyandikiye ko umunsi Karegeya yafunguriweho, atigeze arara mu Rwanda.

Amaze kwakirwa n’inshuti nk’umuntu uvuye muri gereza, ngo yafashe inzira igana i Nyagatare. Ntabwo yambukiye ku mupaka wa Kagitumba nk’abandi, yambukiye mu bihuru biri hafi aho ahingukira muri Uganda mu gace yakuriyemo, akomereza i Kampala aho yavuye agana muri Tanzania. Nyuma y’amezi abiri, Karegeya yerekeje muri Afurika y’Epfo.

Mu minsi ya mbere muri Afurika y’Epfo, Karegeya yirinze kuvuga no kwigaragaza. Hari inyandiko za Wikileaks zigaragaza ko umugore we Leah Karegeya, yigeze kubwira umwe mu bakozi ba Ambasade ya Amerika mu Rwanda, ko umugabo we akiri kumenyera Afurika y’Epfo, ari nako ashakisha imibereho.

Ibintu byahindutse mu 2010 ubwo Kayumba Nyamwasa wahoze ari Umugaba w’Ingabo, yamusangaga mu buhungiro muri Afurika y’Epfo nyuma yo gutoroka ubutabera bwa gisirikare i Kigali.

Kayumba na Karegeya bunze ubumwe, bashakira hasi kubura hejuru icyo aricyo cyose cyajegeza ubutegetsi bw’u Rwanda bahoze bakoramo. Mu 2011 bashinze umutwe wa RNC, bafite intego zo gukuraho ubutegetsi mu Rwanda bakoresheje imbunda.

Muri icyo gihe kandi, mu bice bitandukanye bya Kigali hatangiye guterwa ibisasu bya gerenade zihitana inzirakarengane, ibintu byaherukaga mu 1994 muri Jenoside yakorewe Abatutsi.

Inzego z’iperereza i Kigali zakoze ibishoboka byose, ziza kubona ibimenyetso simusiga birimo n’abafashwe batera ibyo bisasu, bagaragaza ko Kayumba Nyamwasa na Karegeya aribo babiri inyuma.

Patrick Karegeya yahunze amaze kurangiza igihano cy’amezi 18 yari yarakatiwe n’inkiko za gisirikare ku bwo gusuzugura

Urukiko rwa gisirikare rumaze kumva ibimenyetso by’ubushinjacyaha dore ko abaregwa bo bari barahunze, rwahanishije Kayumba Nyamwasa na Theogene Rudasingwa igifungo cy’imyaka 25 naho Gerard Gahima na Patrick Karegeya bakatirwa igifungo cy’imyaka 20.

Umusesenguzi, inzobere akaba n’umwanditsi kuri Politiki, Dr Kimonyo Jean Paul muri Mata uyu mwaka, yabwiye IGIHE ko Karegeya na Kayumba kugumuka kwabo kwatangiye mu wa 1998.

Muri iyo myaka, muri FPR Inkotanyi hari harimo ibibazo bikomeye byiganjemo bamwe mu bayoboke bari barataye umurongo bakishora mu byaha bya ruswa, icyenewabo n’ibindi.

Byasabye inama rukokoma ziswe Kicukiro I na Kicukiro II kugira ngo hashakwe umuti, ababikora barihangirizwa.

Dr Kimonyo ati “Muri “Kicukiro II” ni bwo ubuyobozi bwa FPR bwagaragarije abanyamuryango ibibazo bihari, hafatwa n’ingamba abakekwaho ibyaha bya ruswa n’icyenewabo barahagarikwa ndetse hashize iminsi Guverinoma iravugururwa.”

Kayumba na Karegeya bari bari muri abo batunzwe agatoki n’abayoboke ba FPR. Karegeya kandi ngo ni umwe mu bashakaga ko u Rwanda ruyoborwa nk’uko Uganda imeze.

Ati “Bamwe muri bo, wabonaga bakomeye kuri Uganda cyane. Bariya bantu bashakaga kuzana imiyoborere y’u Bugande bakayikoresha mu Rwanda, abayoboke ba FPR ni byo banze.”

Hejuru yo gushinga umutwe witwara gisirikare, Kagereya yatangiye guhuza ibikorwa bya RNC na FDLR, umutwe u Rwanda rufata nk’uw’iterabwoba wiganjemo abagize uruhare muri Jenoside yakorewe Abatutsi.

Nubwo u Rwanda rwahakanye ko rutigeze rugira uruhare mu rupfu rwa Karegeya, abayobozi barwo bakunze kugaragaza ko nta mpuhwe rufitiye Karegeya ku kuba yarapfuye kuko na we atarwifurizaga icyiza.

Mu kiganiro Perezida Paul Kagame yigeze kugirana na Jeune Afrique muri Mata 2019, yagize ati “Ni ko bimeze, ariko ntibisobanuye ko ari twe twabibazwa. Iyo umwe mu banzi banjye apfuye, uko byagenda kose, ntuzategereze ko habazaho impuhwe nyinshi zinturutseho.”

Andrew Mwenda yigeze kuvuga ko Karegeya yahigwaga n’abantu benshi cyane abo yaba yarahemukiye ubwo yari akuriye ubutasi bw’u Rwanda, ishami ryo hanze, ku buryo urupfu rwe rutabazwa u Rwanda gusa.

Uwo munyamakuru yanavuze ko Patrick Karegeya muri Afurika y’Epfo yari yarinjiye mu bucuruzi bw’intwaro butagira amategeko, aho uguketse mu bo mukorana ahita akwikiza ngo utamuvamo.

Yakiriwe na Minisitiri w’Intebe wa Repubulika Iharanira Demokarasi ya Congo, Sama Lukonde. Iyi nama yateguwe n’Umuryango wa Afurika yunze Ubumwe bigendanye n’amahame yawo yo kurwanya ihohotera rikorerwa abagore.

Igomba kuyoborwa na Perezida wa RDC uyobora AU muri iki gihe.

Insanganyamatsiko yayo igaruka ku myitwarire ikwiye abagabo idahutaza abakobwa n’abagore.

Abakuru b’ibihugu na za Guverinoma bayitabiriye, bategerejweho gutanga ibisubizo bihamye n’ingamba zigamije kurwanya ihohotera rikorerwa abagore n’abakobwa.

Perezida Kagame ni umwe mu bakuru b’ibihugu badahwema kugaragaza ko bashyigikiye uburinganire bw’umugabo n’umugore kandi ko bakwiriye guhabwa amahirwe angana.

Inshuro nyinshi yanakunze kugaragaza ko umugabo ukubita umugore cyangwa se umuhohotera mu bundi buryo adakwiriye kwihanganirwa ahubwo akwiriye guhanwa by’intangarugero.

Mu 2017 ubwo yagezaga ijambo ku bagore bibumbiye mu rugaga rushamikiye ku muryango FRP Inkotanyi, yagize ati “Muri Leta abagore buzuyemo, abo bantu bakubita abagore mubarekera iki, mubihanganiriye iki, niba hari n’abagore bakubita abagabo ubwo nabyo ni imico mibi nabyo tuzabirekera abagore muhane bagenzi banyu.”

Yakomeje avuga ko kuzamura abagore no guteza imbere Abanyarwanda bose atari ineza ahubwo ari inshingano kuko guteza imbere umugore ari uguteza imbere igihugu.

Ati “Niyo mpamvu ikintu cyo kuvuga ngo guteza abagore imbere, abagore b’u Rwanda kubaha uburyo ntabwo ari ineza tubagirira gusa, ni inshingano. Ntabwo ari uguhitamo gusa ngo uzabikora cyangwa ushobora no kutabikora, ahubwo ni ugutekereza neza.”

Yakomeje agira ati “Hari ibintu bivugwa n’ubu bigasa n’aho abenshi aribwo bakibivumbura, bivuga ngo guteza imbere umunyarwandakazi cyangwa abadamu muri rusange, abagore ku Isi hose, ngo ntabwo byashoboka umugabo atabigizemo uruhare ni inshingano y’umugabo, ibyo twe twabimenye kera.”

Perezida Kagame yavuze ko abumvise nabi politiki yo guteza imbere umugore, bakiyumvisha ko ari ukumugira nk’umugabo bibeshya, ko ahubwo ikigamijwe ari ukuzuzanya no gukorera hamwe atari uguhangana.

Perezida Kagame ubwo yageraga ku kibuga cy’indege i Kinshasa

Perezida Kagame aganira na Minisitiri w’Intebe wa Repulika Iharanira Demokarasi ya Congo, Sama Lukonde

SOLA ni ishuri rukumbi ryigamo abakobwa gusa muri Afghanistan, rikaba ryarimuriwe mu Rwanda by’agateganyo.

Abakobwa 250 bo muri iri Shuri rikuru ryigisha ibijyanye n’Imiyoborere muri Afghanistan rizwi nka ‘School of Leadership Afghanistan (SOLA)’ bageze mu Mujyi wa Kigali ku wa 24 Kanama 2021.

Bahisemo kuhakomereza amasomo mu gihe igihugu cyabo cyarimo ibibazo by’umutekano muke byatewe no kongera gufata ubutegetsi kw’Aba-Taliban.

Mu butumwa yashyize ku rukuta rwe rwa Twitter, Shabana Basij-Rasikh, yavuze ko bakiranywe ubwuzu.

Ati “Twakiriwe nk’abari mu rugo. Ndashimira Abanyarwanda na Perezida Kagame ku bw’urugwiro beretse abakobwa bo muri SOLA. Turi abanyamuryango ba Diaspora ya Afghanistan kandi Isi yaduhaye ikaze. Ndashima.’’

Finding home, far from home – I am so thankful for the kindness the people of #Rwanda and President @PaulKagame/@UrugwiroVillage have shown my @solaafghanistan community. We are members of the #Afghan diaspora, and the world is welcoming us. #HappyThanksgiving https://t.co/nbZCZTT5Ai

— Shabana Basij-Rasikh (@sbasijrasikh) November 25, 2021

Yabutangaje ku nkuru ishingiye ku gitekerezo yanyujije muri The Washington Post, asobanura uko abakobwa bo muri Afghanistan bisanze mu Rwanda n’uko bakiriwe.

Ku mugoroba ubanziriza uwa kabiri, Shabana Basij-Rasikh yahuriyeho na Perezida Kagame, yari afite amatsiko yo kubonana na we nk’uwagize uruhare mu gufasha abakobwa kubona ubuhungiro.

Ubwo yamenyeshwaga gahunda yo guhura na Perezida Kagame, yaranezerewe kuko hari byinshi yashakaga kumuganiriza no kumumenyesha.

Ati “Natangiye gutekereza ku buryo nzabara inkuru zigaragaza urugwiro rudasanzwe Abanyarwanda beretse buri wese mu bagize SOLA kuva twagera hano muri Kanama. Nashakaga kuvuga ku bupfura, kwita ku bantu n’ubumuntu.’’

Mu gitekerezo cye yanyujije muri Washington Post, uyu mugore yatanze urugero rw’umukino wahuje ikipe y’abagabo bo muri Afghanistan n’abakozi bo mu Rwanda bakora muri SOLA n’ikipe yatoranyijwe mu Banyarwanda baturiye ishuri bigamo, ukarangira batsinzwe ibitego 7-1.

Yavuze ko barushijwe cyane kugeza aho nyuma y’umukino umwe mu Banya Afghanistan yashinje Umunyarwanda bakinanaga kuba maneko w’urundi ruhande ariko icyo kiganiro cyasojwe bombi baseka.

Yakomeje ati “Iki ni cyo gihe nishimiye uburyo twakiriwe muri iki gihugu. Utera ubuse n’abantu wishyikiraho. Utsindwa unyagiwe mu kibuga iyo ikipe muhanganye ikubaha bihagije kandi itakugirira impuhwe. Baradutsinze ndetse nyuma y’umukino turaramukanya.’’

Shabana Basij-Rasikh yasobanuye ko iyo uri impunzi mu bihugu bitandukanye icyo usaba ni ukwitabwaho no gufashwa mu iyubahirizwa ry’uburenganzira.

Ati “Uyu munsi ntekereza kuri umwe mu miryango twageranye mu Rwanda; wari waranyuze mu bihe bigoye ubwo wahungiraga muri kimwe mu bihugu bituranye na Afghanistan.’’

Yavuze ko ukigera mu Rwanda wakiriwe neza, ufashwa kwisanga mu gihugu cy’amahanga.

Shabana Basij-Rasikh avuga ko icyo gihe “bakodesheje inzu nto yo guturamo. Ubwo bayigeragamo, nyirayo yabahaye inyama. Ngo yaramubwiye ati ‘ibi ni ibyawe’, vuba uzabona amasoko aho ushobora guhahira amafunguro akoreshwa n’Abayisilamu ariko ubu nguhaye iyi mpano.’’

Mu nyandiko ye yavuze ko atekereza ku Banyarwanda baturiye ahimuriwe ishuri rya SOLA mu Rwanda, bahura buri munsi ndetse bamaze kwiga amagambo y’indamukanyo ari mu ndimi zirimo Pashto na Dari, zikoreshwa muri Afghanistan.

Usibye kwiga indamukanyo zibafasha kumvikana, Abanyarwanda banababwira ko ‘bazi neza icyo kuba impunzi bisobanuye’.

Yakomeje avuga ko abo banyarwanda bahumuriza izo mpunzi bati “Tuzi uko kugwa mu gihombo bimera. Muhawe ikaze hano. Aha ni mu rugo.’’

Abanya Afghanistan na bo bashyize umuhate mu kwiga Ikinyarwanda ndetse Shabana Basij-Rasikh yavuze ko yumvise umwe muri bo asobanuza uko babaza igiciro cy’ibicuruzwa n’uburyo bwo gusubiza ko ‘gihenze.’

Tariki ya 15 Kanama 2021 Aba-Taliban bafatashe ubutegetsi nyuma y’imyaka 20 bahiritswe ku butegetsi bigizwemo uruhare na Leta Zunze Ubumwe za Amerika.

Bitewe n’imvururu zikangagwa nyuma y’iminsi icyenda abakobwa 250 n’abakozi bo muri SOLA buriye indege berekeza i Kigali aho bageze ku wa 24 Kanama 2021.

Icyo gihe bari bafite ibikapu bihekwa n’ibitwarwa mu ntoki ‘sacs à main’; bageze mu gihugu ababakiriye ba mbere si abakozi bashinzwe abinjira n’abasohoka ahubwo ni abajyanama mu by’ihungabana, ngo babahumurize.

Shabana Basij-Rasikh yavuze ko ubwo yavaga aho ishuri riri agiye guhura na Perezida Kagame yanyuze kuri umwe mu bagore bakorana amusaba kumumuhera ubutumwa.

Yaramubwiye ati “Ngiye kubonana na Perezida. Nyifuriza ibyiza.’’

Yaramusubije ati “Amahirwe masa.’’

Yamutumye kumushimira ko bafashwe neza ndetse yarabikoze.

Ati “Nabaye impunzi mbere. Twiyumvaga nk’imfungwa. Aha turatuje. Ubimubwire.’’

Shabana Basij-Rasikh yashimangiye ko buri mpunzi yishimira kubaho mu buryo budasa no kugirirwa impuhwe ahubwo ikiyumva nk’iri ‘mu rugo.’

SOLA yateganyaga ko abanyeshuri bazamara igihembwe [kingana n’amezi atandatu] mu Rwanda, bakazasubira muri Afghanistan ibintu byasubiye ku murongo.

Perezida Paul Kagame ku wa 16 Ugushyingo 2021 yakiriye mu Biro bye Shabana Basij-Rasikh washinze akaba na Perezida w’Ishuri ryigisha ibijyanye n’Ubuyobozi muri Afghanistan (SOLA) rimaze amezi atatu ryimuriye ibikorwa byaryo mu Rwanda mu buryo bw’agateganyo

Umukuru w’Igihugu yageze mu Mujyi wa Kinshasa kuri uyu wa Kane, tariki ya 25 Ugushyingo 2021, aho yitabiriye Inama yiga ku myitwarire ikwiriye abagabo ariko idahohotera abagore n’abakobwa.

Akigerayo yakiriwe ku kibuga cy’indege na Minisitiri w’Intebe wa RDC, Jean-Michel Sama Lukonde mbere yo guhura na Perezida Tshisekedi.

Nyuma Ibiro bya Perezida Kagame byananditse kuri Twitter ko Umukuru w’Igihugu yakiriwe na Félix Tshisekedi mu ngoro ye izwi nka Palais de la Nation.

Perezida Kagame ndetse n’abandi bakuru b’ibihugu bitandukanye bya Afurika bateraniye i Kinshasa aho bitabiriye Inama ku myitwarire ikwiriye abagabo ariko idahohotera abagore n’abakobwa. Yateguwe na Perezida Tshisekedi ari na we uyoboye Umuryango wa Afurika Yunze Ubumwe (AU) muri uyu mwaka.

Perezida Kagame yavuze ko itegurwa ry’iyi nama ryabayeho mu gihe gikwiye cyo kongera kunoza umubano n’imikoranire hagati y’u Rwanda na RDC.

Yakomeje avuga ko ari ingenzi ko habaho ibiganiro ku mikoranire ihuriweho iganisha ku kubaka amahoro, iterambere n’ituze ‘bitari hagati y’ibihugu byacu gusa ahubwo no mu karere n’ahandi.’

Ati “Wakoze Perezida Tshisekedi ku butumire bwo kwitabira iyi nama y’ingenzi ku buringanire, ihohoterwa rikorerwa abakobwa n’abagore ndetse n’uruhare rw’abagabo mu guharanira ko ihohoterwa rikorerwa abagore n’abakobwa rirandurwa. Afurika ifite umusanzu ikwiye gutanga.’’

Iyi nama yahawe insanganyamatsiko igaruka ku myitwarire ikwiye abagabo idahutaza abakobwa n’abagore. Iziga ku ngamba zikwiye gufatwa n’abagabo bari mu nzego z’ubuyobozi mu kwirinda no kurandura ihohoterwa rikorerwa abakobwa n’abagore muri Afurika mu byiciro byose.

Abakuru b’ibihugu bayitabiriye barimo Perezida Kagame w’u Rwanda, Cyril Ramaphosa wa Afurika y’Epfo, Macky Sall wa Sénégal, Nana Akufo-Addo wa Ghana n’abandi.

Inama bitabiriye yateguwe ku bufatanye bwa AU n’Ihuriro ry’Abagore bari mu Nzego z’ubuyobozi muri Afurika (AWLN) riyoborwa na Ellen-Johnson Sirleaf wabaye Perezida wa Liberia.

Umujyanama wihariye wa Perezida Tshisekedi ushinzwe Urubyiruko no kurwanya ihohoterwa rikorerwa abagore, Chantal Mulop, aheruka kuvuga ko iyi nama izagaruka ku myanzuro ikwiye mu guhangana n’ihohoterwa rikorerwa igitsinagore.

Yasobanuye ko hakwiye gufatwa imyanzuro iboneye mu guhangana n’iki kibazo kiri mu bigitsikamira iterambere ry’umugabane wa Afurika ahanini kubera ‘ihohoterwa rishingiye ku gitsina’, ‘inda zitateganyijwe mu bangavu’, ‘kudahabwa uburenganzira ku butaka’ no ‘guhezwa mu nzego zifata ibyemezo.’

Mu 2020, Afurika n’Isi byahuye n’ubwiyongere bw’ihohoterwa rikorerwa abagore ahanini kubera ishyirwaho rya Guma mu rugo no guhagarika ingendo nk’ingamba zafashwe mu kwirinda ikwirakwira rya COVID-19. Imibare yerekana ko nibura muri Guma mu rugo y’amezi atatu, dosiye zifitanye isano n’ihohoterwa ryiyongereyeho miliyoni 15.

Ku Isi nibura umugore umwe muri batatu aba yarakorewe ihohoterwa ndetse nta gikozwe iyi mibare yakomeza gutumbagira.

Imibare yo mu mwaka ushize yerekana ko abakobwa barenga milyoni 50 bari munsi y’imyaka 14 muri Afurika bafite ibyago byo kwangirizwa imyanya ndangagitsina mu gihe abagore barenga miliyoni 115 bashatse batarageza imyaka y’ubukure.

Indi nkuru wasoma: Perezida Kagame yageze i Kinshasa mu nama yiga ku myitwarire ikwiriye abagabo idahohotera abagore

Perezida Kagame yakiriwe na mugenzi we wa Repubulika Iharanira Demokarasi ya Congo (RDC), Félix Tshisekedi

Perezida Kagame yageze i Kinshasa kuri uyu wa Kane, tariki ya 25 Ugushyingo 2021. Yakiriwe mu cyubahiro gikwiriye Umukuru w’Igihugu

Perezida Kagame yakiriwe na mugenzi we wa RDC, Félix Tshisekedi afata nk’umuvandimwe

Abakuru b’ibihugu byombi bagiranye ibiganiro byibanze ku kurshaho kunoza umubano wabyo

Perezida Kagame yashimye Félix Tshisekedi wateguye Inama yiga ku myitwarire ikwiriye abagabo ariko idahohotera abagore n’abakobwa

Perezida Kagame yavuze ko umubano mwiza uri hagati y’u Rwanda na RDC ukwiye no kugera mu Karere no mu bindi bihugu

Abakuru b’ibihugu bagiranye ibiganiro baherekejwe n’abayobozi bakuru. Perezida Kagame yari kumwe n’abarimo Minisitiri w’Ububanyi n’Amahanga, Dr Vincent Biruta (uwa gatatu ibumoso) na Ambasaderi w’u Rwanda muri RDC, Vincent Karega

Amafoto: Village Urugwiro