Tag: featured

Ni uruzinduko yagiriye muri uwo mudugud ku gicamunsi cyo kuri uyu wa Gatanu tariki 06 Kanama 2021, ubwo yari aherekejwe na Minisitiri w’Ububanyi n’amahanga mu Rwanda, Dr Vincent Biruta, bakirwa na Minisitiri w’Ubutegetsi bw’igihugu, Gatabazi JMV wavuze ko urwo ruzinduko ruri mu rwego rwo gusura ibyiza bitatse u Rwanda, no kureba uburyo u Rwanda rukomeje kwishakamo ibisubizo.

Yagize ati “Aje gusura umudugudu w’icyitegererezo wa Kinigi, ariko murabyumva ko n’aho yanyuze yarebye ibyiza bitatse u Rwanda, abaturage, amazu, ibikorwa remezo, ibikorwa by’ubuhinzi byose yabibonye, ariko noneho by’umwihariko azanywe no gusura umudugudu w’icyitegererezo kugira ngo arebe uburyo igihugu cy’u Rwanda cyishakamo ibisubizo”.

Arongera ati “Ni umurongo Nyakubahwa Perezida wa Repubulika, Paul Kagame, yatanze wo gutuza abaturage neza, ndetse aje no kureba ibyiza nyaburanga biri ahangaha, ari ibirunga ari inyamaswa zirimo ndetse n’aya mahoteli yakira ba Mukerarugendo. Ibyo byose biri mu rugendo rw’umukuru w’igihugu cya Santrrafurika, ariko muri uyu mudugudu w’icyitegererezo ni cyo gikorwa cy’umwihariko kimuzanye”.

Minisitiri Gatabazi yavuze ko mu byo uwo mukuru w’igihugu ashyize imbere mu gusura harimo ivuriro rya Kinigi, Abaturage batujwe mu mudugudu w’icyitegererezo bagize imiryango 144 ituye muri uwo mudugudu watwaye asaga miliyari 26 z’Amafaranga y’u Rwanda.

Ni umudugudu wubatsemo ibikorwa remezo binyuranye birimo imihanda, ishuri ry’icyitegererezo rya Kampanga ririmo ibyangombwa byose bifasha abanyeshuri kwiga ikoranabuhanga (smart Classrooms) ndetse n’urugo mbonezamikurire rw’abana bato rwita ku mikurire y’abana, guhabwa ubumenyi no gukangura ubwenge bwabo.

Ni umudugudu watujwemo Abanyarwanda bari batuye muri ako gace mu buryo bw’akajagari, bubakirwa uwo mudugudu mu rwego rwo kubafasha gutura hamwe kandi neza, kunga ubumwe, gusangira ubuzima ndetse no kugezwaho mu buryo bworoshye ibikorwaremezo birimo amazi n’umuriro.

Bamwe mu batujwe muri uwo mudugudu, baragaragaza uburyo bakomeje kwishimira abashyitsi babasura muri iyi minsi, by’umwihariko Umukuru w’igihugu cya Santrafurika, bavuga ko babangamiwe n’icyorezo cya Covid-19 cyatumye batamubyinira ngo babakire uko bikwiye ndetse banasabane.

Sibomana Saidi ati “Erega ntawe wabura kwishima, kubona umukecuru wanjye n’umusaza bari mu myaka 70 bari mu nzu nk’iyi, bibaha amasaziro meza. Tunezerwa cyane iyo tubonye abashyitsi bakomeye nk’aba badusura, natwe twumva ko dufite agaciro gakomeye”.

Arongera ati “Twamwiteguye neza amasuku yari yose mu mudugudu wacu, ikibazo n’iyi Covid-19 uyu mushyitsi waturutse mu mahanga twari kumubyinira, tugira tuti ‛Kagame Mwungeri we’, kubera ibyiza amaze kutugezaho. Twabyishimiye rwose, Perezida wacu akomeze atubanire mu mahanga, umushyitsi azagire urugendo ruhire”.

Minisitiri Gatabazi avuga ko Umudugudu w’icyitegererezo wa Kinigi, ushobora kuba umurongo mwiza wafasha abaturage ba Santrafurika nk’igihugu cyagize ibibazo by’intambara, aho abaturage baho bakeneye gutuzwa neza, ibyo bikaba byabunganira kandi n’u Rwanda rukagira ibindi rwigira kuri icyo gihugu binyuze muri urwo rusinduko.

Ati “Ni umurongo mwiza ushobora no kujyanwa muri Santrafurika, na bo baciye mu bibazo nk’ibyo twaciyemo n’ubwo twebwe twanyuze muri Jenoside yakorewe Abatutsi, ariko na bo bafite intambara nyinshi bamazemo igihe abaturage bahunga birukanka, na bo bakeneye gutuzwa bakaba bakora kimwe mu bikorwa yasuye hano mu Rwanda na byo bikaba byakorwa iwabo. Hanyuma kandi na we aratugira inama ku cyo abona twarushaho kunoza, ni yo mpamvu yahisemo kuza gusura uyu mudugudu n’uruzinduko muri rusange yagiriye mu gihugu cy’u Rwanda”.

Reba Video y’uru ruzinduko rwa Perezida Touadéra mu Kinigi

Abahinzi mu mirimo yo kwita ku bihingwa ngo bizabahe umusaruro ufatika

Icyo kibaya kiri ku buso bwa Ha 79, cyari cyarashegeshwe n’ibiza. Abagituye n’abahafite imirima barakuwe mu byabo, kubera kurengerwa n’amazi batagifite icyizere cyo kuzongera kukibyaza umusaruro.

Bamwe mu baturage bahafite imirima yari yararengewe n’ayo mazi, barimo uwagize ati: “Kitaratunganywa twari twarazahajwe n’imibereho mibi, bitewe n’uko muri icyo gihe imirima yari yararengewe n’amazi, tutagifite icyizere cyo kuzongera kuyihinga. Twamaze imyaka isaga irindwi tutabona aho dukura za minerivale z’abana, inzara yaradutangatanze impande zose, kuko ntaho gukubita isuka twari tukigira. Muri macye twari mu buzima bwo kwiheba”.

Kuri ubu ayo maganya yose yarashize, babikesha umushinga wo kubungabunga icyo kibaya, urimo gushyirwa mu bikorwa n’Inkeragutabara, aho zifatanya n’abahafite amasambu, mu bikorwa byo gukurikirana no gutunganya imigende iyobora amazi, gusibura ibibare n’ibindi bikorwa bitandukanye. Abaturage bahamya ko byafashije mu gukamya amazi yari yaracyuzuye, none kuri ubu abahafite imirima barahinga bakeza imyaka, nk’uko byahoze mbere kitararengerwa.

Kigali Today iheruka kunyarukira muri icyo kibaya, ihasanga abahinzi bashishikariye imirimo yo kuhira igihingwa cy’ibirayi gihinzwe ku buso bugari mu bugize icyo kibaya, abandi babitera imiti.

N’akanyamuneza kenshi, bagira bati “Twishimira ko Umukuru w’Igihugu cyacu, Paul Kagame, yaduhaye inkunga yo gutunganya iki kibaya. Yatugiriye akamaro mu buryo bukomeye cyane, aho ubu dusigaye duhinga tukeza, iyi ikaba ibaye inshuro ya gatatu tugihinga tukabasha gusarura nta nkomyi”.

Ik kibaya kiri ku buso bwa Ha 79

Mu basaga 700 bahawe akazi mu mirimo yo kwita kuri icyo kibaya cya Mugogo, harimo n’abahafite imirima, baboneyeho kwibumbira muri Koperative bagamije guhuza amaboko, aho banakusanya amafaranga buri uko bejeje umusaruro, bakagira macye bakura ku wo baba bagurishije, bakayazigama, kugira ngo abafashe mu kunganira imirimo yo kubungabunga icyo kibaya.

Ngendahayo Jean, Umuyobozi w’Ishami ry’Ubuhinzi, Ubworozi n’umutungo kamere mu Karere ka Musanze, asaba abaturage bahinga muri icyo kibaya, kugihozaho ijisho, kugira ngo n’igihe umushinga wo kukibungabunga uzaba usoje ibikorwa bo bazakomeze.

Yagize ati “Dusaba abaturage cyane cyane abafite amasambu muri kiriya kibaya, gukomeza kugira uruhare mu kuhabungabunga, aho imirimo yo kugitunganya ikorerwa bagahora basa n’abiga uko bikorwa, bakurikirana uko imirimo yo kucyitaho ikorwa, kugira ngo n’igihe umushinga uzaba wasoje, bo ubwabo bazabe babasha kubyikorera”.

Umushinga wo kukibungabunga utaratangira ikibaya cya Mugogo cyari cyararengewe n’amazi

Uwo muyobozi avuga ko hari indi nyigo irimo gukorwa, ku bufatanye n’Ikigo cy’igihugu gishinzwe umutungo kamere w’amazi, yitezweho kuzakemura ikibazo cy’amazi yangiza ikibaya cya Mugogo mu buryo butanga igisubizo kirambye.

Iki gihembo gikomeye, yagihawe nk’umuntu watanze umusanzu ugaragara mu rwego rw’imari no mu ishyirwa mu bikorwa ry’imishinga migari iteza imbere ibikorwaremezo mu Rwanda.

Amb. Gatete, yagihawe mu nama ivuga ku buyobozi n’ibikorwa by’ubugiraneza yateguwe na Forbes ifatanyije n’ikigo cyo mu Bwongereza cya Foreign Investment Network (FIN) gishora imari mu bihugu bikiri mu nzira y’iterambere ndetse kikanatera inkunga imishinga y’iterambere muri Afurika.

Minisitiri Gatete yashimye igihembo yahawe, avuga ko atewe ishema no kuba umwe mu bagize Guverinoma y’u Rwanda watanze umusanzu mu rwego rw’imari no mu ishyirwa mu bikorwa ry’imishinga iteza imbere ibikorwaremezo byafashije kuzamura ubukungu bw’u Rwanda ku rugero rwa 8% buri mwaka kugeza mu 2019.

Yagize ati “Iki gihembo ni ishimwe ku buyobozi bacu, ku bo dukorana muri guverinoma, abafatanyabikorwa mu guteza imbere ibikorwaremezo ndetse no ku baturage b’u Rwanda muri rusange.”

Yavuze ko u Rwanda rwashyize ingufu mu bikorwa bitandukanye, birimo kubaka imihanda mu bice by’imijyi n’ibyaro bigafasha mu koroshya ingendo n’ubuhahirane hagati y’imijyi n’ibyaro, ndetse u Rwanda rukaba ruri ku mwanya wa gatatu muri Afurika mu kugira imihanda yujuje ubuziranenge.

Amb Gatete yakomeje avuga kandi ko u Rwanda rwashyize ingufu mu bijyanye no kugeza amashanyarazi ku baturage kandi hari intego y’uko mu 2024 abanyarwanda bose bazaba bafite umuriro w’amashanyarazi.

Yongeyeho ati “ ibikorwaremezo byubatswe mu Rwanda birimo Kigali Convention Center, amahoteli, Kigali Arena, n’ikibuga gishya cya Golf, byateje imbere ubukerarugendo ndetse n’ubukungu bw’igihugu, aho hari indi mishinga iri gushyirwa mu bikorwa nk’ikibuga cy’indege cya Bugesera.

“Ibi byose twabigezeho tubikesheje umuyobozi wacu w’icyerekezo, Nyakubahwa Perezida Paul Kagame.”

Minisitiri w’Ibikorwaremezo, Amb Claver Gatete yahembwe nk’umwe mu Banyafurika bazanye impinduka

Yahawe igihembo cy’indashyikirwa gitangwa na Forbes

Raporo y’Ishami ry’Umuryango w’Abibumbye ryita ku bidukikije, UNEP, ‘Food Waste Index 2021’ igaragaza ko buri rugo rwo mu Rwanda rumena ibiro 164 by’ibiryo buri mwaka, bivuze ko hamenwa toni 2.075.405 z’ibiryo buri mwaka nk’uko The New Times yabitangaje.

Iyi raporo yerekana ko i Burundi hamenwa toni 1.184.127 z’ibiryo mu ngo, Repubulika Iharanira Demokarasi ya Congo hakamenwa toni 8.912.903 mu gihe Kenya yo imena 5.217.367 naho ku Isi hose hakamenwa toni miliyoni 570 z’ibiryo zingana na 61% by’ibiryo byose bimenwa.

Iyi raporo ivuga ko ibi biryo bigira uruhare rukomeye mu kohereza imyuka ihumanya ikirere, ari na yo iteza ihindagurika ry’ikirere.

Umuyobozi Wungirije w’Ishami ryo mu Rwanda ry’Umuryango w’Abibumbye wita ku biribwa ku isi (FAO), Otto Vianney Muhinda, yavuze ko kumena ibiryo n’imyaka bigomba kwirindwa mu buryo bwose kuva bigisarurwa kugera ku Isoko aho bicuruzwa no kugera ku bantu babigura.

Yagize ati “Mu ngo ibiryo byangirikira mu bubiko, aho bitegurirwa ndetse na nyuma yo kubiteka, kandi ibi ni ibintu byashakirwa ibisubizo. Nk’urugero, tubona amahoteli amwe muri Kigali amena ibiryo bitariwe ku munsi. Gusa hari gahunda yo guha abashonje ibyo biryo biba bitariwe nka bumwe mu buryo bwo kwirinda kumena ibiryo no gufasha abashonje.”

“Abantu bahaha ibiryo nibo ba mbere babimena, kandi ni inshingano za buri wese kugabanya ibiryo bimenwa uko abishoboye. Gusa turi gufatanya n’abandi kurebera hamwe uburyo twagabanya ibiryo bimenwa binyuze mu bukangurambaga tuzaha abaturage tukabigisha uko bashobora kubigabanya.”

Umuhanga mu bijyanye n’imirire, Gerard Ruzindana yabwiye The New Times ko imbarutso yo kumena ibiryo ituruka mu mitegurire mibi y’ibikenerwa mu rugo, agira inama abantu ko bakwiriye guhaha ibyo bamara aho kugura ibizahunikwa mu nzu igihe kirekire.

“Kumena ibiryo mu ngo bishobora kwirindwa, abantu bakabika ibiryo ahantu biguma byumye bakabirinda ko byatoha kugira ngo bitabora[…] ikindi buri rugo rukwiriye guhaha ibyo ruzateka byibura mu gihe cy’iminsi irindwi aho kubihunika mu nzu bikamara igihe, ari na ho byangirikira.”

Raporo ku bushakashatsi rusange ku birebana no kwihaza mu biribwa no ku mirire (CFSVA) yo mu 2018 yagaragaje ko 81.3% by’abanyarwanda badafite ikibazo cy’imirire ariko ingo 467.000 zitabona ibiryo bihagije.

Abantu bagirwa inama yo guteka ibyo bamara kugira ngo birinde kumena ibiryo

Ni umuhango wari uyobowe na Minisitiri w’Ubutabera akaba n’intumwa nkuru ya Leta Johnston Busingye.

Muri uyu muhango kandi hari umuyobozi mukuru wa Polisi y’u Rwanda, IGP Dan Munyuza, Umuyobozi wungirije ushinzwe ibikorwa bya Polisi, DIGP/OPs Felix Namuhoranye, Umuyobozi wungirije ushinzwe imiyoborere n’abakozi, DIGP/AP Jeanne Chantal Ujeneza.

Mu bagiye mu kiruhuko cy’izabukuru harimo ba komiseri bane, ba ofisiye bakuru batandatu, ba ofisiye bato 102, abapolisi bato 80 n’abandi 24 batashye kubera impamvu z’uburwayi n’abasubijwe mu buzima busanzwe kubera impamvu zitandukanye ziteganywa n’amategeko.

Minisitiri Busingye yashimiye abagiye mu kiruhuko cy’izabukuru ku murava n’ubwitange bagaragarije Igihugu cyabo bikaba bitumye basezererwa mu buryo bwiyubashye.

Yagize ati “Bamwe muri mwe bari ku rugamba rwo kubohora Igihugu ndetse baba mu bashinze iki gipolisi cy’umwuga. Uyu ni umwanya wo gusubiza amaso inyuma tukareba urugendo rwanyu, mu gaciro, ubumwe, amahoro n’umutekano mwarwaniraga. Ni umwanya wo kuzirikana no kwishimira umusanzu wa buri muntu muri mwe muri iyi nzira yo kubohora Igihugu, kandi urwo rugamba ruracyakomeza. Mwakoreye Igihugu gishima.”

Yakomeje abasaba kuzakomeza kuba intangarugero aho bazaba bari hose, abasaba kuzakomeza kurangwa n’ikinyabupfura.

Ati “Muzakomeze kurangwa n’ikinyabupfura no kuba intangarugero aho muzaba muri, aho mutemberera, aho musengera ndetse n’aho mujyana abana banyu ku mashuri. Muzabe ba ambasaderi kandi mukomeze gukorera Igihugu cyanyu mufatanije n’abandi baturage musanze.”

Minisitiri Busingye yakomeje avuga ko abaturarwanda baryama bagasinzira neza bakumva batuje kubera abapolisi bakora amanywa n’ijoro. Yavuze ko ibi ari igipimo cyiza cy’icyizere abaturarwanda bafitiye Polisi y’u Rwanda.

Yaboneyeho gushima uruhare Polisi y’u Rwanda ikomeje kugaragaza mu kurwanya icyorezo cya COVID-19 binyuze mu kugenzura iyubahirizwa ry’amabwiriza yo kurwanya iki cyorezo ndetse hanatangwa ubutumwa bwo kukirinda.

Umuyobozi wa Polisi y’u Rwanda, IGP Dan Munyuza yashimiye abapolisi bagiye mu kiruhuko cy’izabukuru, abashimira uruhare rwabo mu kubaka igipolisi cy’umwuga ndetse no gushimangira ituze n’umutekano w’Igihugu.

Ati “Umurava n’urukundo mwagaragarije Igihugu cyanyu bizakomeza kwibukwa kandi ibyo mwaharaniye bizakomeza gusigasirwa n’abandi bapolisi musize inyuma.”

IGP Munyuza yakomeje abibutsa ko n’ubwo bagiye mu kiruhuko cy’izabukuru, umusanzu wabo wazongera gukenerwa igihe icyo aricyo cyose. Yabasabye gukomeza gusigasira ibyo baharaniye kandi bakanabigeraho, abasaba kuzakomera ku ndangagaciro no kwiyubaha byari bisanzwe bibaranga mu kazi kabo.

ACP (Rtd) Anthony Kulamba, wavuze mu izina ry’abapolisi bagiye mu kirihuko cy’izabukuru, yashimiye umukuru w’Igihugu Perezida wa Repubulika Paul Kagame wayoboye urugamba rwo kubohora Igihugu.

Yagize ati “Mu izina rya bagenzi banjye turashimira Nyakubahwa Perezida wa Repubulika wayoboye urugamba rwo kubohora Igihugu agahagarika Jenoside yo mu 1994 yakorerwaga abatutsi, akunga abanyarwanda ariyo nkingi ya mwamba mu kubaka Igihugu gishya kandi cyuje amahoro buri muntu wese yishimira uyu munsi.”

ACP(Rtd) Kulamba yakomeje ashimira umukuru w’Igihugu ku kuba ari umuyobozi w’icyerekezo, umusingi w’inzego zikomeye n’imiyoborere myiza. Yavuze ko Polisi y’u Rwanda ari rumwe mu nzego z’Igihugu zikomeye zashinzwe ku miyoborere ye, avuga ko we na bagenzi be bishimira kuba bamwe muri uwo muryango.

Yavuze ko we na bagenzi be bishimira kuba barakoreye Igihugu cyabo kugeza ubwo bakorewe umuhango wo kubasezera mu buryo bw’icyubahiro.

Yavuze ko basezerewe mu kazi bakoraga ka gipolisi ariko bazakomeza gukorera Igihugu bafatanije n’abandi bayobozi b’Igihugu ndetse n’abaturage mu rwego rwo gukomeza gusigasira ibyagezweho.

Minisitiri Busingye yashimiye abagiye mu kiruhuko cy’izabukuru ku murava n’ubwitange bagaragarije Igihugu cyabo

IGP Dan Munyuza yashimiye abapolisi bagiye mu kiruhuko cy’izabukuru ku ruhare rwabo mu kubaka igipolisi cy’umwuga

ACP(rtd) Anthony Kulamba yavuze ko nubwo bagiye mu kiruhuko cy’izabukuru, we na bagenzi be bazakomeza gufatanya n’abandi banyarwanda gusigasira ibyagezweho

Abasezerewe mu cyubahiro biyemeje gukomeza gutanga umusanzu mu kubaka igihugu

Uyu Mukuru w’Igihugu yasuye uyu mudugudu kuri uyu wa Gatanu, tariki ya 6 Kanama 2021; yari aherekejwe n’abayobozi batandukanye barimo Minisitiri w’Ububanyi n’Amahanga n’Ubutwererane, Dr Biruta Vincent n’uw’Ubutegetsi bw’Igihugu, Gatabazi Jean Marie Vianney.

Perezida Touadéra wa Centrafrique yasuye ibice bitandukanye bigize Umudugudu w’Icyitegererezo wa Kinigi birimo Ikigo Nderabuzima, rimwe mu macumbi abaturage babamo, Urugo Mbonezamikurire rw’Abana bato (ECD) n’ikigo cy’amashuri abanza n’ayisumbuye.

Aho yanyuze hose yasobanuriwe imiterere y’uyu mudugudu watashywe ku wa 4 Nyakanga 2021 nk’uburyo bwo gutuza neza abaturage bavanywe mu manegeka, bakegerezwa aho bashobora kubona serivisi zose bakenera mu buzima bwabo.

Minisitiri w’Ubutegetsi bw’Igihugu, Gatabazi Jean Marie Vianney, yavuze ko imidugudu y’icyitegererezo yashyizweho na Perezida Kagame mu kwerekana uko u Rwanda rwishatsemo ibisubizo n’uko bishobora kuba inzira yafasha abandi.

Ati “[Perezida Touadéra] ubwo yasuraga ibice bigize umudugudu yari akeneye kumenya uko imidugudu y’icyitegererezo ikora, uko itekerezwa. Yibandaga ku kumenya imibereho y’abatuzwa mu mudugudu, uko ababamo batoranywa n’ibindi.’’

“Twamusobanuriye ko mu Kinigi hari ubukerarugendo bw’urwego ruhanitse aho abasura Pariki y’Ibirunga baba bashaka no kuganiriza n’abaturage. Twanamubwiye ko abaturage baturiye muri iyi pariki bahabwa amafaranga ava mu bukerarugendo. Bakabona amafaranga abafasha gukemura ibibazo by’imibereho.’’

Minisitiri Gatabazi yasobanuye ko Umudugudu ari ahantu abantu baturana hamwe mu nzu basangiye, basangiye ubuzima.

Yakomeje ati “Ndetse binajyanye no kubanisha Abanyarwanda, kuko tuzi ko arizo mbaraga zacu.’’

Yasobanuye ko nka Centrafrique yanyuze mu bibazo bikomeye, hari ibyo yakwigira ku Rwanda mu gutuza neza abaturage bayo.

Ati “Na bo nk’abantu bahuye n’intambara zinyuranye n’ubu zitararangira neza, bafite abaturage bahuye n’ibibazo by’intambara. Twe twahuye na Jenoside yakorewe Abatutsi, na bo bafite ibibazo by’abaturage bahura nabyo bijyanye n’umutekano. Iyo ibibazo bamaze kubisohokamo binyuze mu matora, bakenera kuba batuza abaturage muri ya midugudu y’icyitegererezo.’’

Perezida Faustin-Archange Touadéra, ni we watorewe kuyobora Centrafrique mu matora yabaye mu Ukuboza 2020. Icyo gihe Umutwe w’Ingabo z’u Rwanda udasanzwe ni wo wacunze umutekano mu gihe hari ubwoba bw’uko inyeshyamba zazambya ibintu.

Mu ruzinduko rwe mu Kinigi, Perezida Touadéra, yashimye ibikorwa yeretswe birimo ishuri ririmo n’ibikoresho by’ikoranabuhanga cyane ko na we yabaye umurezi; yananyuzwe n’uko abaturage batujwe n’uko inzu zubatse mu buryo bugezweho.

Perezida Touadéra yasuye Umudugudu w’Icyitegererezo wa Kinigi, ashima ibikorwa by’iterambere abawutuye begerejwe

Minisitiri Gatababazi yavuze ko intambwe u Rwanda rwateye yanabera abandi urugero.

Ati “Ikizakurikiraho ni uko iki ari kimwe mu bisubizo twishatsemo nk’Abanyarwanda ariko iyo bigiye gukorwa mu bindi bihugu nanone, aba ari igikorwa natwe twatangayo kugira ngo kibe cyagaragaza impinduka bizana mu gihugu cyacu.’’

Yavuze ko bagaragarije Perezida Touadéra ko kubaka imidugudu ari “umurongo Perezida Kagame yashyizeho wo gutuza abaturage neza no gukoresha neza ubutaka hitabwa ku kuzirikana ahakorerwa indi mirimo y’iterambere ry’igihugu.’’

Umudugudu w’Icyitegererezo wa Kinigi uherereye mu bilometero 12 uvuye mu Mujyi wa Musanze rwagati, wubatswe n’Ingabo z’u Rwanda. Ugizwe n’inzu z’amagorofa zubakiwe imiryango 144 itishoboye. Wubatswe mu buryo bugezweho ndetse ufite ibikorwaremezo byose by’ibanze hafi.

Izi nzu ziwugize zubatswe mu buryo bw’amagorofa, aho buri imwe ifite ibyumba bitatu n’uruganiriro, ubwiherero n’ubwogero bubiri kandi bwose buri mu nzu n’igikoni cyo mu nzu.

Buri muryango watujwe muri izi nzu wahawe kandi ibikoresho by’ibanze birimo matelas, ibitanda, intebe na televiziyo.

Uyu mudugudu kandi wubatswemo ibikorwaremezo bitandukanye birimo amashuri y’incuke, abanza n’ayisumbuye, ivuriro, agakiriro kazajya gakorerwamo imirimo y’ubukorikori itandukanye, inzu izajya ikorerwamo ubworozi bw’inkoko, ibiraro n’ibindi.

Imirimo yose yo kubaka uyu mudugudu ugezweho wa Kinigi yarangiye itwaye 26 611 466 699 Frw arimo agera kuri 8 047 653 297 Frw yagiye mu bikorwa byo kubaka inzu zo guturamo, 1 589 619 026 Frw yagiye mu bikorwa byo kubaka ikigo nderabuzima na 3 350 166 058 Frw yubatse ikigo cy’amashuri n’irerero.

Ibikorwa byo kugurira imiryango ituye muri uyu mudugudu inka 102 n’inkoko 8000, kubaka agakiririro, gutera ubusitani n’ibiti by’imbuto byo byatwaye 1 874 637 199 Frw, mu gihe indi mirimo nko kubaka imihanda, kuhageza amashanyarazi gutera ibiti no guha ingurane abari bahatuye byatwaye arenga miliyari 11 Frw.

Perezida wa Centrafrique, Faustin-Archange Touadéra ubwo yageraga mu Mudugudu w’Icyitegererezo wa Kinigi yakiriwe na Minisitiri w’Ubutegetsi bw’Igihugu, Gatabazi Jean Marie Vianney

Perezida Touadéra yasuye Urugo Mbonezamikurire y’Abana bato rwa Kampanga, asobanurirwa serivisi zitandukanye zihabwa abakiri bato zirimo kubaha ifunguro ryuzuye no kubigisha

Imiterere y’Umudugudu w’Icyitegererezo wa Kinigi uherereye mu Karere ka Musanze mu Majyaruguru y’u Rwanda

Perezida Touadéra yari aherekejwe na Minisitiri w’Ububanyi n’Amahanga n’Ubutwererane, Dr Biruta Vincent n’uw’Ubutegetsi bw’Igihugu, Gatabazi Jean Marie Vianney

Perezida Touadéra wa Centrafrique yeretswe uko ikoranabuhanga ryatangiye kwimakazwa mu myigire y’abanyeshuri

Uyu Mukuru w’Igihugu yanyuzwe n’uburyo amashuri afite ibikorwaremezo bifasha abanyeshuri kubona ubumenyi

Yasuye ibice bitandukanye bigize Umudugudu w’Icyitegererezo wa Kinigi watujwemo imiryango 144

Perezida Touadéra yakiriwe n’abayobozi batandukanye

Yasobanuriwe ibikorwa bitandukanye biri mu Mudugudu w’Icyitegererezo wa Kinigi

Minisitiri w’Ubutegetsi bw’Igihugu, Gatabazi Jean Marie Vianney yagendaga asobanurira Perezida Touadéra imiterere y’uyu mudugudu

Perezida Touadéra wa Centrafrique yanyuzwe n’iterambere yasanze ryegerejwe abatuye mu Kinigi

Amafoto: Niyonzima Moïse

Video: Hakizimana Alain