Tag: featured

Inkuru y’uko hari ibihugu bikoresha “Pegasus” mu butasi yatangiye gukwira Isi muri Nyakanga itangajwe bwa mbere na Washington Post n’ibindi binyamakuru 16 byihurije hamwe, aho bivugwa ko hari nimero ibihumbi 50 zishobora kwinjirirwa.

U Rwanda rushyirwa mu majwi mu bihugu bikoresha iyo porogaramu cyo kimwe n’ibindi 10 birimo Mexique, Azerbaijan, Kazakhstan, Hongrie, Togo, Maroc, u Buhinde, Leta Zunze Ubumwe z’Abarabu, Bahrain na Arabie Saoudite.

Bivugwa ko ku ruhande rw’u Rwanda hari abantu 3500 telefoni zabo zishobora kumvirizwa hakoreshejwe iyi porogaramu.

Mu kiganiro Umukuru w’Igihugu yagiranye na RBA kuri iki Cyumweru tariki ya 5 Nzeri 2021, yongeye kubazwa niba rwaba rukoresha Pegasus, asubiza ko rutanayigeze kandi ko rwabisobanuye inshuro nyinshi.

Perezida Kagame yavuze ko ubutasi bwatangiye gukorwa kera kuva umuntu yabaho ndetse ko hari uburyo bwinshi bwifashishwa, ariko iyo bigeze ku Rwanda, izina ryarwo rivugwamo mu buryo bwihariye n’abantu barushinja gutata binyuranyije n’amategeko ariko wabisesengura ugasanga hari ikindi kigamijwe.

Ubwo byatangiraga kuvugwa, mu bantu u Rwanda rwashinjwe gutata rwifashishije Pegasus harimo na Perezida wa Afurika y’Epfo, Cyril Ramaphosa.

Umukuru w’Igihugu yavuze ko mu gihe umubano w’u Rwanda na Afurika y’Epfo wari utangiye kuzahuka, hari abantu batabyishimiye barangije babyuririraho barushinja gukoresha Pegasus.

Yavuze ko bwa mbere mu 2019 ubwo byavugwaga ko rukoresha iri koranabuhanga, rwabisobanuye n’ubwa kabiri nabwo rukabisobanura mu buryo burambuye.

Ati “Twarabisobanuye ntekereza ko byarangiye, hanyuma birongera biragaruka, turabisobanura. Abashinzwe umutekano, abashinzwe umutekano mu by’ikoranabuhganga barabisobanura mu buryo burambuye, uko tudafite bene icyo gikoresho.”

“Ariko kimwe n’ibindi bihugu u Rwanda rukora ubutasi, kandi hari uburyo bwinshi bwo kubikora, buri wese arabizi n’abo banyamakuru barabizi. Muri make, umunyamakuru wakoze ibyo birego, birashoboka ko yabonye ayo makuru yakoresheje mu guhimba ibinyoma, binyuze mu gutata. Barabikora. Ariko twababwiye ko tudafite ibyo bikoresho.”

Umukuru w’Igihugu yavuze ko batari gutinyuka kumubaza niba u Rwanda rukora ubutasi kuko ibyo ubwabyo byisobanura kandi n’igisubizo buri wese akizi.

Ati “Iyo baza kumbaza bati u Rwanda rukora ubutasi, bazi igisubizo, ntabwo bari kumbaza kuko bo, inzego, abantu ku giti cyabo bakurikira abantu, bashaka amakuru mu buryo butandukanye.”

“Niba uri kuvuga ngo turi gukora ubutasi dukoresheje iki gikoresho, igisubizo ni OYA kandi twarabibabwiye. Abantu bacu barabibabwiye. Twaranababwiye tuti hari ibihugu mwagaragaje ko bibikoresha kandi bibyemera ariko kuri twe twarababwiye tuti Oya ntabwo tuyikoresha.”

Umukuru w’Igihugu yavuze ko u Rwanda rwabwiye abarushinja gukoresha Pegasus ko bajya kureba abantu bayihimbye, bakababaza ibihugu biyikoresha kandi ko baza gusanga rwo rutarimo.

Ati “Tuti kuki mutajya kureba abo bantu bakoze iyo porogaramu yifashishwa mu butasi ngo bababwire abayifite n’abatayifite kandi murasanga u Rwanda rutayifite. Ni gute twakoresha icyo tudafite?”

Umukuru w’Igihugu yavuze ko ku mpamvu abo bantu bazi ubwabo, icyo bashaka ari ugusiga icyasha u Rwanda ku buryo bakomeza mu murongo batangiye mu myaka 27 ishize.

Ati “Tuzakomeza gukora icyo twumva ko kiboneye ku bwacu, dusobanure ibitari ukuri.”

Iri koranabuhanga bivugwa ko iyo rihujwe na nimero y’umuntu runaka, rihita ryibasira telefoni ye binyuze kuri WhatsApp n’izindi mbuga nkoranyambaga cyangwa se mu gisa na “missed calls”.

Rishobora guha urikoresha password za nyiri telefoni, rikamufasha gusoma ubutumwa bwe no kumva ibyo avugana n’abandi.

Ikindi ni uko rishobora kwifashisha GPS rikerekana aho nyiri telefoni ari. Bivugwa ko rishobora kubona amakuru yo kuri telefoni z’ubwoko ubundi bizwi ko bwizewe ku mutekano nka iPhone cyangwa zikareba n’ubutumwa bwo kuri application zizwiho kuba zizewe kurusha izindi nka Signal.

Ku muntu ufite telefoni ikoresha camera, iri koranabuhanga rishobora gutuma yifungura ku buryo umuntu uri kurikoresha ashobora kubona amashusho y’aho nyirayo ari.

Pegasus igurishwa igihugu cyangwa imiryango itegamiye kuri leta. Mu kuyikoresha hagurwa uburenganzira (license). Bivugwa ko igiciro kizwi n’umuguzi n’ugurisha, gusa ngo license imwe ishobora kugura miliyoni 100 Frw.

Mu 2016, byavugwaga ko NSO Group yishyuzaga ibihumbi 650 $ [asaga miliyoni 650 Frw] kuri telefoni cyangwa se mudasobwa 10. Gusa mbere habanza kwishyurwa ibihumbi 500 $ (miliyoni zirenga 500 Frw) yo gushyira (installation) iyo porogaramu muri mudasobwa.

Perezida Kagame yavuze ko abakomeje gusebya u Rwanda atazi impamvu babikora ariko akeka ko bituruka ku mateka maremare anafite aho ahuriye na Jenoside yakorewe Abatutsi.

Yavuze ko hari n’abavuye mu Rwanda bakoze ibyaha bitandukanye birimo no gusahura igihugu, atanga urugero kuri Ndagijimana JMV wabaye Minisitiri w’Ububanyi n’Amahanga wa mbere w’u Rwanda nyuma ya Jenoside, wibye amafaranga yagombaga kwifashishwa mu gufungura za Ambasade ariko akagenda avuga ko yari agiye kwicwa.

Ati “Ndibuka ubwo twafataga ubutegetsi mu 1994, Minisitiri w’Ububanyi n’Amahanga wa mbere uba mu Bufaransa, ubu yirirwa mu itangazamakuru asebya Guverinoma ariko uwo mugabo yabaye Minisitiri mu gihe gito, kugira ngo u Rwanda rufungure Ambasade zari zarafunze, abadipolomate basubireho, simbizi hari uwakoze amakosa ahari amuha amafaranga mu ntoki aragenda ntiyagaruka.”

Abantu bamushyigikira ngo ni abigisha u Rwanda indangagaciro, ariko ubu afite ukwishyira ukizana ku buryo arwigisha politiki rukwiriye kugenderaho.

Ati “Buri wese usakuza hariya hanze, mbaza ndakubwira cyangwa se wasanga usanzwe ubizi, ngo ni bande n’abaturage basanzwe bazakubwira, ngo uyu yafashe ku ngufu, uyu yaribye, ariko bagera hariya bagahabwa ijambo.”

Perezida Kagame yashimangiye ko u Rwanda rudakoresha Pegasus ndetse ko rutigeze ruyikoresha

Yabigarutseho mu kiganiro yagiranye na Televiziyo Rwanda ku Cyumweru tariki ya 5 Nzeli 2021 cyagarutse ku ngingo zitandukanye zirimo izijyanye no kurwanya Covid-19, ububanyi n’amahanga, n’ibindi.

Umukuru w’Igihugu yatangaje ko Ingabo z’u Rwanda zagiye muri Mozambique kurwanya umutwe ugendera ku matwara y’idini ya Islam wateje umutekano muke ukigarurira Intara ya Cabo Delgado.

Yavuze ko ubwo u Rwanda rwasabwaga na Mozambique ubufasha, rwiyemeje gukoresha ubushobozi rufite na cyane ko ubukenewe atari bwinshi nk’uko abantu babitekereza.

Ati “Bisaba abantu bazi icyo bashaka, bafite ubushobozi mu buryo runaka, kandi dutekereza ko tubufite rero twemera gukorana na Mozambique mu kubohora agace kabo n’abaturage babo bari bamaze igihe mu bibazo mu myaka ine ishize.”

Intara ya Cabo Delgado ifite ubuso bungana na 82.625, ukoze imibare wasanga iruta u Rwanda inshuro 3,1. Perezida Kagame yavuze ko ibyo byihebe byashakaga kuyirenga hanyuma bigafata n’ibindi bice.

Hashize ukwezi n’iminsi 27 u Rwanda rwohereje muri Mozambique ingabo n’abapolisi 1000, ubu zifatanyije n’Ingabo za Mozambique zabashije kubohora ibice byinshi n’abaturage batangira guhunguka.

Kuva izo ngabo zakoherezwa muri Mozambique hari abatangiye kuvugwa ko ari ubutumwa butewe inkunga n’u Bufaransa mu kurengera imishinga y’ishoramari ry’Abafaransa iri muri iyo ntara.

Perezida Kagame yavuze ko kugeza ubu, u Rwanda rukoresha ubushobozi bwarwo rudategereje undi uwo ariwe wese.

Ati “Dufite ubushobozi buhagije dushobora gusaranganya n’abavandimwe. Nta muntu udutera inkunga muri ibi […] gusa ndatekereza ko umusaruro uruta cyane amafaranga twashoye.”

Yahishuye kandi ko nubwo Mozambique itegeranye n’u Rwanda cyane, kugerayo ari urugendo rw’amasaha abiri mu ndege. Ikindi kandi ni uko bimwe mu byihebe biri mu Ntara ya Cabo Delgado, harimo n’Abanyarwanda.

Ati “Bamwe muri ibyo byihebe, twabonye ko baturuka mu bice bitandukanye harimo n’u Rwanda. Twabonye ko harimo Abanyarwanda, hari Abanya-Uganda, Abanye-Congo, Abarundi, Abanya-Tanzania bose barahagarariwe. Muri kariya gace, ibyo byihebe bituruka mu bihugu bitandukanye.”

Agace kari kuberamo imirwano muri Cabo Delgado, karimo umutungo kamere ufatika urimo na Gas. Yashowemo imari na TotalEnergies y’asaga miliyari 20 z’amadolari ashobora kwiyongera akagera kuri miliyari 50$ mu mushinga wiswe LNG, Liquefied Natural Gas.

Gusa muri iki gihe kubera ibikorwa by’ibyo byihebe, uyu mushinga warahagaze. Mu gihe amahoro yaba yagarutse, byitezwe ko imirimo izasubukurwa.

Perezida Kagame yavuze ko kugeza ubu, Ingabo n’Abapolisi 1000 u Rwanda rwohereje zihagije, nta kibazo gihari gisaba ko hakongerwa izindi. Gusa mu gihe byaba bibaye ngombwa, byasuzumwa bigendanye n’ibikenewe.

Yabajijwe ibijyanye n’imikoranire n’Ingabo za SADC, avuga ko kugeza ubu hari imikoranire myiza, Ingabo z’u Rwanda ziri muri Cabo Delgado zivugana, zihura n’izo zindi ziriyo ku buryo imikoranire iba myiza.

Ati “Hari akazi kenshi, ntabwo numva ko bisaba igihugu kimwe cyangwa umufatanyabikorwa umwe kugira ngo atange ubufasha […] tuzakorera hamwe, ariko birumvikana ni Abanya-Mozambique bo ba nyiri gihugu bazaha umurongo uko ibintu bigenda.”

Umutwe w’iterabwoba urwanira muri Mozambique mu Ntara ya Cabo Delgado witwa “Ahlu Sunnah Wa-Jama” gusa imbere mu gihugu abaturage bawita “Al Shabaab”.

Bibarwa ko abaturage barenga 3000 ari bo bamaze kwicwa n’ibyo byihebe, mu gihe abavuye mu byabo bo barenga ibihumbi 700.

Perezida Kagame yavuze ko mu byihebe byigabije Intara ya Cabo Delgado harimo n’Abanyarwanda

Ntabwo bizwi neza icyo aba barwanyi bashaka, impamvu batangije urugamba n’ibindi nk’ibyo

RIB ivuga ko gusambanya abana bibatera ihungabana

RIB kandi iributsa ababyeyi n’abandi babonye umwana wasambanyijwe kwihutisha ibirego hakigaragara ibimenyetso kuko iyo bikerewe bishobora gusibangana, cyangwa ukekwaho icyaha akaba yacika ubutabera.

Umuvugizi wa RIB, Dr. Murangira Thierry, avuga ko mu bukangurambaga bumaze icyumweru bukorerwa mu Karere ka Muhanga mu gukumira no kurwanya ibyaha, byagaragaye ko hari ingero z’abana bazana ibirego bamaze igihe babyaye bikaba bisaba kuzapimisha utunyangingo twa DNA ku bana n’abakekwaho kwitwa ba se, iyo ikaba ari inzira igorana kuko isaba kunyura mu nkiko.

Agira ati “Turihanangiriza abasambanya abana kuko bari kutwicira ejo hazaza h’Igihugu, turabibutsa ko hari ibihano bikarishye kandi turasaba n’ababyeyi b’abana basambanyijwe kwihutira kugana RIB kugira ngo umwana arenganurwe”.

Abantu bashobora kubaho badasambanya abana

Umuyobozi ishinzwe gukumira ibyaha muri urwo rwego, Jean Claude Ntirenganya, yavuze ko nyuma yo gutahura ko abana basambanywa batwita bagashyingirwa, nabwo ari ukubahohotera kuko ingo zabo zitubakwa.

Agira ati “Abantu babayeho badasambanya abana ntacyo byabatwara, yenda uwo irari ry’umubiri riganjije agasambana n’abakuru kuko ibyo ntawabikubaza, ariko gusambanya umwana ni ukumusigira ihungabana, kubyara imburagihe, guta amashuri kandi ari wo murage abana basigaranye”.

Ntirenganya avuga ko umwana ushowe mu busambanyi imburagihe bishobora kumutera ihungabana ryo gusarira gukora imibonano mpuzabitsina birenze urugero, cyangwa akayizinukwa, gucibwa mu muryango, incyuro za buri munsi, kwitwa indaya no kwiyahura ku mukobwa wahohotewe.

Agira ati ” Rimwe na rimwe hari igihe umwana atekereza nabi kubera guhozwa ku nkeke, nyamara haracyariho igaruriro ryatuma umwana wahohotewe yitabwaho akabugabungwa kuko kumugira igicibwa ari uguha icyuho uwamuhohoteye”.

Gushyingira umwana ntaho bitaniye no kumufata ku ngufu

Ntirenganya avuga ko hari abajya gushyingira abana batewe inda cyangwa babyaye imburagihe rinwe na rimwe n’abayobozi bakabigiramo uruhare, nyamara ngo usanga n’ababashyingira bataremya izo ngo kuko baba batarakundanye.

Dr. Murangira Thiery, Umuvugizi wa RIB

Agira ati “Umwana w’imyaka mike ntabwo aba azi uko ingo zubakwa, nta mwana urera undi ashyingiwe ku muntu umurusha imyaka. Niba agiye atwite cyangwa ahetse ejo akaba akurikijeho undi maze wa mugabo yamara kumuhaga akaba aramutaye byose biturutse ku kuba nta makuru yatanzwe kare ngo uwahohoteye umwana akurikiranwe”.

Abana basaga 6,000 ni bo babarurwa ko basambanyijwe umwaka ushize wa 2020, RIB ikaba itangaza ko ubukangurambaga mu kurwanya ibyaha birimo no gusambanya abana buzakomeza hirya no hino mu gihugu, kugira ngo abantu banasobanurirwe uko barwanya icyo cyaha.

Amavubi na Kenya banganyije igitego 1-1

Ikipe ya Kenya ni yo yafunguye amazamu ku munota wa 11 w’umukino, cyatsinzwe na kapiteni w’iyi kipe Michael Olunga, nyuma y’umupira wahinduwe mu rubuga rw’amahina, umunyezamu Emery Mvuyekure awukuramo ariko ntiyawugumana, ba myugariro Rwatubyaye na Salomon Nirisarike basiganira ku mupira Olunga ahita abatsinda igitego.

Ku munota wa 21 w’umukino Amavubi yaje kwishyura igitego ku mupira wari uvuye kuri Haruna Niyonzima, ugeze mu rubuga rw’amahina ba myugariro ba Kenya ntibabasha gukiza izamu , Rwatubyaye Abdul ahita awohereza mu izamu.

Mbere y’uko igice cya mbere kirangira rutahizamu Byiringiro Lague gukomereka ahita ajyanwa kwa muganga, aza gusimburwa na Meddie Kagere.

Mu gice cya kabiri cy’umukino umutoza Mashami Vincent yakoze impinduka ebyiri, aho Twizeyimana Martin Fabrice yasimbuye Muhire Kevin, naho Twizerimana Onesme asimbura Haruna Niyonzima.

Abakinnyi umutoza Mashami Vincent yabanje mu kibuga

Mvuyekure Emery , Omborenga Fitina, Imanishimwe Emmanuel, Rwatubyaye Abdul, Nirisarike Salomon, Mukunzi Yannick, Bizimana Djihad, Niyonzima Haruna,Muhire Kevin, Kagere Meddie na Tuyisenge Jacques

Andi mafoto yaranze uyu mukino

Prezida Kagame avuga ko Uganda ubwayo ari yo izakemura ikibazo kiri hagati yayo n’u Rwanda

Yabitangaje kuri iki Cyumweru tariki ya 05 Nzeli 2021, ubwo yari mu kiganiro yagiranye na RBA.

Abajijwe ku gikorwa kugira ngo Abanyarwanda bongere bahahirane n’Abagande, Perezida Kagame yavuze ko ikibazo cy’umubano w’ibihugu byombi kitoroshye ugereranyije n’uko abaturage b’ibihugu byombi bafatwa.

Ati “Iyo urebye uko Abanyarwanda bafatwa muri Uganda n’uko Abanya-Uganda bafatwa mu Rwanda, nta munya-Uganda ugira ikibazo mu Rwanda. Ariko hafi Abanyarwanda bose uretse ko basigaye batinya no kujyayo, abariyo, abajyayo bagenda bikandagira kandi hari benshi bamaze no kubizira ahubwo”.

Umukuru w’Igihugu yatanze ingero z’Abanyarwanda benshi bafungirwa muri Uganda, abakubitirwayo bikabaviramo ubumuga, abakorerwa iyicarubozo ndetse n’abamburwa imitungo yabo.

Yavuze ko ibikorwa na Uganda bigomba kuba ari umurongo wa Politiki y’igihugu kuko ubu ngo n’ikibazo cyose kibaye cyitirirwa u Rwanda.

Yagize ati “Nk’ubu ndetse no mu mvugo, ikibazo cyose kibaye cyane cyane icy’umutekano cy’igihugu ubwacyo cyihariye bavuga ko kigomba kuba cyavuye mu Rwanda, ni yo bidafite aho bihuriye na busa cyangwa Umunyarwanda wabisanzwemo.”

Yakomeje agira ati “Ni igisobanuro cya buri kibazo cyose, buriya n’iyo haba habaye ikibazo cya Covid-19, nk’uko twese tugifite, isi yose ifite icyo kibazo, uzagira utya wumve umuyobozi ndetse muri Uganda avuze ko ikibazo cya Covid-19 giturutse mu Rwanda cyangwa gitewe n’u Rwanda, buri kibazo cyose n’ikidafitanye isano n’u Rwanda”.

Yavuze ko impamvu yumva bigoranye kubikemura ari uko atazi impamvu ibikorwa byose byegekwa ku Rwanda.

Ikindi ni uko ngo bizwi neza ko hari abantu baba muri Uganda, bahanyura cyangwa bafashwa na Uganda kugirira nabi u Rwanda.

Yavuze ko hari benshi bari mu nkiko, hakaba abakatiwe kubera ibikorwa bafatiwemo bigamije kugirira nabi u Rwanda babifashijwemo na Uganda.

Ariko na none ngo hari n’abandi bantu bari mu bihugu nka Afurika y’epfo n’ibindi bitandukanye bafite ibikorwa bakorera muri Uganda bigamije kuzagirira nabi u Rwanda.

Yongeyeho ko hari n’ibindi byinshi byandikwa mu bitangazamakuru kandi bifite ingero zifatika bigaragaza ko Uganda ifasha abashaka kugirira nabi u Rwanda.

Ikindi ngo ikibazo gihangayikishije ni uko hari n’Abagande bavuga Ikinyarwanda ariko ari abaturage b’icyo gihugu mu buryo bwemewe, ariko bitewe n’uburyo bafatwa muri Politiki bagirirwa nabi babashinja ko batumwe n’u Rwanda.

Perezida wa Repubulika Paul Kagame yavuze ko icyo bahisemo nk’Igihugu ari ukubirekera Abagande kugira ngo babikemure.

Ati “Icyo twahisemo rero twebwe, ni ukubireka uko bimeze, ni ukubirekera ba nyirabyo na none ngo babikemure.”

Yavuze ko abantu birukanywe mu mashuri, abafunzwe, abakorewe iyicarubozo, abambuwe imitungo yabo muri Uganda bamaze kuba benshi cyane.

Yavuze ko bagiye babiganira n’abayobozi ba Uganda rimwe na rimwe bakavuga ko atari ukuri, batabizi cyangwa ko ababikoze bazakurikiranwa ariko ntihagire igikorwa.

Perezida Kagame yavuze kandi ko nk’u Rwanda badashobora kugirira nabi Abanya-Uganda cyangwa undi munyamahanga uje mu Rwanda kubera ko igihugu cyabo cyagiriye nabi u Rwanda cyangwa Abanyarwanda.

Ati “Twe icyo twakoze ni ukutagirira nabi Abanya-Uganda cyangwa abandi banyamahanga bose ngo kubera ko igihugu cyabo cyatugiriye nabi cyangwa cyagiriye nabi Abanyarwanda, icya kabiri ni ukubaka ubushobozi bwo kwirinda kugira ngo ibikomoka aho ngaho bitazagira ubwo bitugirira nabi. Icya gatatu ni ugukomeza kubaza ababikora impamvu babikora hashakishwa uko amaherezo bizarangira”.

Yakomeje agira ati “Ariko ntabwo byarangira kubera ko ntabwo ari twe tubigena, uko birangira ntabwo ari twe byaturukaho, uko birangira bizaturuka ku babikora cyangwa ababigena hanze y’igihugu cyacu. Aho nta bushobozi tuhafite, ba nyirabyo ni bo bazahitamo icyo bakora.”

Yasabye Abanyarwanda kutajya muri Uganda kuko ibizababaho bariyo ntacyo u Rwanda rwabikoraho.

Ariko na none yasabye Abanya-Uganda koroshya kubera ko nta mpamvu yo kugirira nabi Abanyarwanda.

Perezida Kagame yongeye guhakana ibivugwa ko u Rwanda rukoresha ‘Pegasus’

Perezida Kagame avuga ko abanyamakuru mpuzamhanga bafite imyumvire y’igihe kirekire yo guharabika u Rwanda, rimwe na rimwe bakanabigereka ku muntu umwe ari we Perezida wa Repuburika.

Umukuru w’Igihugu avuga ko abantu banditse amakuru y’uko u Rwanda rwaba rwumviriza rukananeka ibindi bihugu rukoresheje Pegasus ntacyo bashingiyeho babyandika, haba ku kuba u Rwanda rwemera ko rwakoresheje iryo koranabuhanga yemwe ngo nta n’ubwo abakoze iryo koranabuhanga bigeze babazwa niba u Rwanda rwaba rurikoresha.

Agira ati “Abo banditse ibyo, twababwiye ko tudakoresha ririya koranabuhanga, abambaza ngo u Rwanda rwaba rwumviriza cyangwa runeka igisubizo baragifite, abantu cyangwa ibigo bafite ubushobozi bwo kumviriza iby’abandi bakumva ibyo bakeneye kumva hifashishijwe inzira nyinshi, icyo ni kimwe”.

Yongeraho ati “Ku bibaza rero niba dukoresha Pegasus tuneka abandi, igisubizo mbaha ni ‘OYA’ mu nyuguti nkuru, kandi si ubwa mbere tubibabwira. Twanababwiye ko hari abakoresha ririya koranabuhanga banabyiyemerera, ariko twe twababwiye ko nta Pegasus dufite nta n’ubwo tuyikoresha”.

Umukuru w’Igihugu avuga ko abashinja u Rwanda gukoresha ikoranabuhanga rya Pegasus mu kuneka no kumviriza abandi, bakwiye kujya kubaza ba nyiri porogaramu niba u Rwanda rwaba ruri mu mubare w’abayihawe.

Agira ati “Kuki batajya ku bakoze iriya porogaramu ngo bababaze abantu baba barikoresha n’abatarikoresha, yenda bashobora kubibabwira nkeka ko bakwibonera ko u Rwanda rudafite ririya koranabuhanga, ni gute se twakoresha ibintu tudafite! Mpamya ko bazi impamvu badutsindira gukoresha ririya koranabuhanga, ni ukugira ngo basige icyasha u Rwanda”.

Perezida Kagame avuga ko nta gitangaje kiri mu bahimba amakuru nk’ariya, kuko u Rwanda rumaze imyaka myinshi rwumva ibirego byinshi bidafite ishingiro kandi nta mwanya wo kwisobanura uhari, ngo nta koranabuhanga rya Pegasus riri mu Rwanda kandi nta n’irihakoreshwa, ngo igisubuzo rero kikaba ari ‘Oya’.

Mu minsi ishize ni bwo ikipe yaPolice FC yari yatandukanye n’umutoza Haringingo Francis werekeje mu ikipe yaKiyovu Sports, kugeza ubu ikaba nta mutoza yari ifite.

Francis Nuttall, umutoza mushya wa Police FC

Mu itangazo rigenewe abanyamakuru yanyujije ku rubuga rwa Twitter, Police Fc yatangaje ko yashyizeho umwongereza Francis Nuttall Elliott nk’umutoza muri uyu mwaka w’imikino wa 2021/2022.

Uyu mutoza Francis Nuttall Elliott yatoje amakipe yo ku mugabane wa Afurika arimo Gor Mahia muri 2016, aho yayivuyemo ajya kuba umutoza wungirije muri Zamalek, aza kwerekeza muri Ghana aho yatoje Hearts of Oak (2017-2018), hagati ya 2018 na 2019 atoza Al Hilal Obeid yo muri Suda,naho muri 2020 atoza Township Rollers yo muri Botswana.

Perezida wa Repubulika, Paul Kagame

Perezida Kagame yabitangarije mu kiganiro n’abanyamakuru n’abaturage kuri uyu wa 05 Nzeri 2021 ku bitangazamakuru bya RBA, aho yavuze ko urwo ruganda rwakora inkingo rugakora n’imiti byo kugoboka Afurika n’u Rwanda, nyuma y’uko bigaragaye ko ibihugu bikize bikunze kuba ari byo byihaza mu miti n’inkingo.

Avuga ko u Rwanda na Afurika bikeneye kwihaza, atari gusa kuba hari icyorezo cya Covid-19, ahubwo hanakenewe kugira ibyo bikorera byakorerwa muri Afurika cyangwa mu Rwanda.

Icyakora ku rundi ruhande Perezida Kagame avuga ko icyorezo na cyo kiri mu byatumye u Rwanda rutekereza uruganda ndetse n’uburyo bwo gukemura ikibazo, kuko igihe urukingo rwabonetse ibihugu bikize ari byo byahise bibona urwo rukingo bitangira gukingira abantu babyo.

Agira ati “Ibihugu bikize bikomeye ni byo byahereweho ko bibona urukingo rwa Covid-19 bitangira gukingira abantu babyo mu gihe muri Afurika n’u Rwanda, twategereje igihe kirekire cyane n’igihe ziziye ziza abantu barembye. Abandi babona inkingo twe tugomba gutegereza n’iyo tugiye kuzibona bigasaba ko tubanza gusabiriza, bituma umuntu aremba ibyo rero bigenda byibutsa abantu ko icyagerageza kubikemura ari uko twakwikorera inkingo”.

Perezida Kagame avuga ko kwemererwa gukora inkingo harebwe byinshi u Rwanda rwujuje birimo n’uko rwitwaye mu guhangana na Covid-19, aho byabaye nk’ibyatunguye amahanga kubera uko rwashyize imbaraga mu kwirinda icyorezo.

Agira ati “Nta cyoroha n’iki cyo cyari gikomeye kurushaho, ariko hari byinshi byahereweho nk’ukuntu twifashe muri Covid-19 aho isi yose yabonye ko tutabonye urukingo rukiboneka kandi n’ubu turacyashakisha, ariko uko babonye twabyifashemo babona ko biri ku rwego rwo hejuru muri Afurika no ku isi hose”.

Avuga ko u Rwanda rwari mu bihugu bike ku isi, Umunyarwanda yemerewe kugenda mu bihugu byo hirya no hino mu gihe cya Covid-19, na byo biri mu byashingiweho ngo rwemererwe gukora inkingo.

Agira ati “Ukuntu abantu bashoboye gukora batyo badafite urukingo nta n’ubushobozi bwo hejuru bafite, na byo biri mu byashingiweho u Rwanda rwemererwa gushinga uruganda rukora inkingo”.

Perezida Kagame avuga ko uruganda ruzanagira uruhare mu guhangana n’icyorezo cya Malariya gikunze kwibasira ibihugu byinshi ku mugabane wa Afurika, kandi iby’ingenzi bimaze kugerwaho rukazakora n’imiti itandukanye ndetse n’izindi nkingo zikenewe.

Perezida Kagame avuga ko icyorezo cya Covid-19 ntaho kirajya kandi ingamba zo kukirwanya na zo zikomeje, kabone n’ubwo ntawe wamenya igihe kizahagararira.

Kuri uyu wa Gatandatu tariki 04/09 mukarere ka Nyanza habereye irushanwa ry’umukino uzwi nka Duathlon,irushanwa rikomatanya imikino ibiri(gusiganwaku maguru ndetse no gusiganwa ku magare), mu gihe iyo hiyongereyeho gusiganwa mu mazi(koga)witwa Triathlon.

Iri rushanwa “Nyanza Culture Duathlon Challenge” ryakinwaga ku nshuroyaryoya kabiri,rikaba ryari rimaze imyaka ibiri ritaba kubera icyorezo cya COVID-19, mu gihe ubusanzwe iri rushanwa ryagizwe ngarukamwaka aho rizajya riba mu gihe cy’umuganura.

Hakizimana Félicien n’abamukurikiye muri “Nyanza Culture Duathlon Challenge”

Ni irushanwa ryakinwe mu byiciro bibiri ari byo icyiciro cy’abakina nk’ababigize umwuga, ndetse n’icyiciro cy’abatarabigize umwuga (Aba Veterans),bakaba bose muri rusange bari abakinnyi 23 b’abagabo gusa kukoabagore batigeze bakina.

Abatarabigize umwuga basiganwe kilometero ebyiri n’igice n’amaguru, biruka Km 20 ku igare, bongera gusoreza mu gusiganwa ku maguru nanone kilometero ebyiri n’igice.

Uwa mbere yabaye Ndayambaje Alexis wakoresheje isaha imwe, iminota ibiri n’amasegonda 14 ahembwa ibihumbi 50. Uwa kabiri aba Kayigi Ange yakoresheje 1h02’16” ahembwa ibihumbi 40. Mbaraga Alexis usanzwe ari na Perezida wa Federasiyo ya Triathlon yabaye uwa gatatu akoresheje isaha imwe, iminota ine n’amasegonda atatu,ahembwa ibihumbi 30.

Perezida w’Ishyirahamwe ry’Umukino wa Triathlon mu Rwanda Mbaraga Alexis nawe yakinnye

Mu babigize umwuga bo birutse Kilometero ebyiri n’igice ku maguru, biruka kilometero 40 ku igare, baoza nanone basiganwa ku maguru ku ntera ya Kilomtetero ebyiri n’igice n’amaguru.

Ku mwanya wa mbere haje Hakizimana Félicien wakoresheje 1h05’39” ahembwa ibihumbi 50, ku mwanya wa kabiri haje Mutijima Francois wakoresheje 1h08’15” ahembwa ibihumbi 40, naho ku mwanya wa gatatu haje Ngendahayo Jeremy wakoresheje 1h08’40” ahembwa ibihumbi 3O.

Babanje gusiganwa ku maguru

Hakurikiraho gusiganwa ku magare

Hakizimana Félicien wegukanye iri rushanwa yavuze ko atari asanzwe akina uyu mukino, yatewe imbaraga no kubona abakinnyi baheruka kwitabira irushanwa muri Centrafrika muri Nyakanga uyu mwaka baratahukanye imidali.

Ati “Icyo mbona narushije abandi ni imyitozo nakoze. Nta kipe ndabona kuko uyu mukino ni ubwa mbere nywitabiriye. Icyanteye kuwukina ni bagenzi banjye baherutse kujya gukina hanze mbona bakuyeyo umudali, nanjye ndavuga nti ibi nabibasha.”

Umuyobozi w’akarere ka Nyanza , Ntazinda Erasme wari witabiriye iri rushanwa yatangaje ko bishimiye uko iri rushanwa ryagenze ndetse biteguye no kurishyira ku ngengabihe y’amarushanwa yabo.

Yagize ati “Ni irushanwa twabonye ko rifite icyo ryongereye Umujyi wa Nyanza, twaryishimiye. Ni siporo ikenewe mu gihugu by’umwihariko mu Karere kacu kubera ko izanye ababigize umwuga ariko bakayihuriramo n’ab’i Nyanza basanzwe bakina cyangwa banyonga igare bakaniruka bya siporo isanzwe, uyu munsi na bo bakaba binjiye mu irushanwa.”

“Ni siporo dushaka gushyira ku ngengabihe y’amarushanwa yacu ku buryo buri mwaka tuzajya tuyakira.”

Perezida w’Ishyirahamwe ry’Umukino wa Triathlon mu Rwanda, Mbaraga Alexis,nawe yavuze ko bishimiye uko iri rushanwa ryagenze, by’umwihariko kuba ari naryo rya mbere bakoze mu bihe byo guhangana na COVID-19.

Yagize ati “Uko twayiteguye ni ko igenze kuko murabona muri iki gihe imitunganyirize ya siporo iragoye. Siporo ni yo ihuza abantu none ubu tubigiza hirya kugira ngo hatabaho kwanduzanya, ariko muri rusange irushanwa ryagenze neza, ni intangiriro nziza yo kugira ngo abantu bagaruke muri siporo no kwidagadura by’iki gihe.”

Yakomeje agira ati “Turashaka gushyira iri rushanwa rya Nyanza ku rwego mpuzamahanga ku buryo rizajya riba muri kiriya cy’umweru cy’Umuganura bigakomeza.”

Andi mafoto yaranze iri siganwa