Tag: featured

Resitora Umucyo yabaye ifunzwe

Veneranda Bankudiye, ari we nyiri iyo resitora, avuga ko na we yatunguwe kandi ababazwa no kumva ko abanyeshuri agaburira bagize ibibazo biturutse ku biryo yabagaburiye ku wa Gatandatu tariki ya 18 Nzeri 2021, ariko ikimushimisha ni uko nta n’umwe wahasize ubuzima, kandi ubu bakaba barakize bose.

Anavuga ko nyuma y’iki kibazo, yasuwe n’inzego z’umutekano ndetse n’abashinzwe isuku mu Karere ka Huye, bakemeranywa ibyo agiye guhindura kugira ngo birusheho kugenda neza, ariko akaba yaratunguwe n’uko yasabwe gufunga tariki 23 Nzeri 2021, igihe yahawe kitararangira.

Agira ati “Nari nagaragarije itsinda rishinzwe isuku ku Karere ko abanyeshuri ngaburira baba banyishyuye mbere, twemeranywa ibyo nkosora, hanyuma bakazagaruka kureba ko nabyubahirije ku itariki 20 Ukwakira 2021. Ariko natunguwe n’uko gitifu w’umurenge yanzaniye ibaruwa impagarika uyu munsi tariki 23 Nzeri 2021.”

Ubwo hafungwaga, hari abanyeshuri bari baje kurya, hanyuma babwirwa ko bajya kurira muri resitora Happiness iri imbere muri Kaminuza, na ho nyiri Resitora Umucyo asabwa kubasubiza amafaranga angana n’iminsi yari isigayemo.

Icyakora, mu banyeshuri bari basanzwe baharira harimo n’abari barwaye, hari abavuga ko batasubira kurira muri resitora y’imbere muri Kaminuza, kuko ngo na mbere bari bayisize, hanyuma bajya kurira muri iyo yafunzwe.

Umwe muri bo yagize ati “Njyewe ku giti cyanjye ntabwo nasubirayo, kuko impamvu yahankuye na n’ubungubu iracyahari. Ni impamvu yanjye ku giti cyanjye, ariko cyane cyane uburyo umuntu abona serivisi, kuko aho umuntu ashaka ibyo akenera, ntabwo ahakunda kimwe hose. Aho ubona baguhereza cyangwa bakwakira neza kurusha abandi ni ho ukunda cyane.”

Yunzemo ati “Ahangaha nibahafunga burundu, njyewe ku giti cyanjye nzashaka ukundi mbaho”.

Umuyobozi w’Akarere ka Huye, Ange Sebutege, avuga ko iriya resitora itafunzwe burundu, kuko ngo aho bizagaragarira ko nyirayo na nyiri inzu ikoreramo bakosoye ibyo basabwe, izemererwa kongera gufungura.

Yafunzwe yariragamo abanyeshuri babarirwa muri 300 nk’uko bivugwa na Bankundiye.

Mu gikorwa cyo gutangiza igihembwe cy’ihinga cya 2022 A, cyabereye mu Kibaya cya Mugogo, giherereye mu Kagari ka Gisesero Umurenge wa Busogo, ku wa kane tariki 23 Nzeri 2021, abahinga muri icyo kibaya bifatanyije n’ubuyobozi gutera imbuto y’igihingwa cy’ibigori y’ubwoko bwa RHMH 1520, ku buso bwa Ha 78 zigize iki kibaya.

Abahinzi ngo biteguye gukurikiza inama bagirwa n’abashinzwe ubuhinzi, ku buryo bizeye kuzabona umusaruro uhagije.

Ndaruhutse Pascal uhinga muri icyo kibaya, yagize ati “Twari tumaze iminsi mu bikorwa byo gutegura imirima kugira ngo tutazakererwa ihinga. Twishimiye kuba ubuyobozi bwaduteye ingabo mu bitugu, tukifatanya nabwo mu gikorwa cyo gutera igihingwa cy’ibigori dukoresheje ifumbire y’imborera n’imvaruganda. Nyuma y’iki gikorwa, natwe tugiye gukomerezaho indi mirimo ijyanye no kubyitaho nko kubimenera, kubibagara, ari nako twubahiriza n’izindi nama tugirwa n’abashinzwe ubuhinzi, kugira ngo tuzabone umusaruro ufatika”.

Mugenzi we witwa Ntahwidakiriza Jean Baptiste ati “Iyi mbuto twateye, igikurikiyeho ni uko tuzayibungabunga kugeza ubwo izaduha umusaruro ufatika, biturinde inzara ari na ko dusagurira n’amasoko”.

Umuyobozi w’Akarere ka Musanze, Nuwumuremyi Jeannine, yabwiye abaturage ko kongera umusaruro ku buso, bishingira ku kubahiriza amabwiriza agenga ubuhinzi.

Yagize ati “Kugira ngo twongere umusaruro ku buso bwa Ha, ni uko dukoresha inyongeramusaruro yaba iy’imbuto nziza z’indobanure, ifumbire y’imborera n’imvaruganda; kandi bikajyana n’uko umuhinzi asura umurima we kenshi, akawuhozaho ijisho, agatera n’imiti ikumira ibyonnyi n’indwara bishobora kugaragara mu murima we ngo bitangiza ibihingwa”.

Akomeza avuga ko inzego zose zifite aho zihuriye n’iterambere ry’ubuhinzi, harimo abajyanama b’ubuhinzi mu midugudu, abafashamyumvire n’abashinzwe ubuhinzi mu Mirenge yose y’ako Karere, biteguye gukorana bya hafi n’abahinzi, kugira ngo umusaruro ugerweho mu buryo bufatika.

Abahinga mu kibaya cya Mugogo ngo bazitwararika kugira ngo bazabone umusaruro ufatika

Izamuhaye Jean Claude, Umukozi mu Kigo RAB ushinzwe Ishami ry’ibihingwa agira inama abahinzi bo mu Karere ka Musanze, kimwe n’abo mu gice cy’Amajyaruguru n’amajyaruguru ashyira Uburengerazuba, kwihutisha imirimo yo gutera imbuto z’ibihingwa byatoranyijwe, ku buryo nibura mu cyumweru gitaha (ni ukuvuga mu mpera z’ukwezi kwa Nzeri), bagombye kuba barangije iyo mirimo; kuko ari imvura, imbuto n’ifumbire, byose byabonekeye igihe.

Muri iki gihembwe cy’ihinga cy’igihe cy’umuhindo, mu Karere ka Musanze ibigori, ibirayi n’ibishyimbo, ni byo byihariye ubuso bunini bw’ibihingwa byahujweho ubutaka.

Mu mezi atanu ari imbere i Kigali haraba habonetse abakobwa 30 b’abamotari

Uwo muryango uvuga ko ku ikubitiro guhera muri uku kwezi kwa Nzeri 2021, aba mbere 60 bo mu Mujyi wa Kigali bazamara amezi atanu, 30 baziga gutwara moto, abandi 30 bige gutera borudire (bordures) ku mihanda hamwe no gusasa amakaro n’amapave.

Umuyobozi wa Centre Marembo, Nicolette Nsabimana avuga ko iyo myuga ikorwa ahanini n’abantu b’igitsina gabo, ndetse ko abayikora badashobora kuba abashomeri na rimwe.

Nsabimana avuga ko yagiranye amasezerano n’ibigo bibiri, kimwe cy’ubwubatsi kizigisha abakobwa kuba abafundi, ikindi cyigisha gutwara ibinyabiziga kikazatoza abatwara moto, kandi bose mu mezi atanu bakazaba bagaragaza ubumenyi batojwe.

Nsabinama yagize ati “Mu mezi atanu abo bafundi b’abakobwa bazaba bazi kubaka bya kinyamwuga, abiga moto na bo bazahabwa moto 10 bigiraho zizaba zanditseho ngo ‘Byuka Bakobwa’ (izina ry’umushinga), nyuma yaho tuzakorana na banki kugira ngo tubasabire moto bazajya bishyura gake gake, twebwe tubishyurire inyungu irengaho”.

Umuyobozi wa Centre Marembo, Nicolette Nsabimana

Yakomeje agira ati “Aba bana b’inzirakarengane bagomba kubona ikintu bakora kuko iyo turangaye gato n’izindi nda zizamo”.

Nsabimana avuga ko hafi y’ibigo byigisha abo bakobwa hari amarerero asigarana abana babo, ndetse ko buri mukobwa azajya ahabwa amafaranga ibihumbi 50 buri kwezi yo kumufasha, kandi n’umwana we akazajya agenerwa amafaranga ibihumbi 10 (buri kwezi mu mezi atanu ari imbere).

Nsabimana avuga ko nyuma y’amezi atanu ubwo umushinga uzaba ushobora kugaragaza umusaruro mwiza, azakorana n’abaterankunga (b’Abanya-Canada basanzwe bamufasha), bagashinga ishuri ryigisha nibura abakobwa 500 buri mezi atanu bo hirya no hino mu gihugu.

Nsabimana avuga ko bafite ubutaka buri ku buso bwa hegitare eshanu bashobora kuba bakubakaho ishuri mu gihe bazaba babonye ubushobozi.

Umuryango ‘Centre Marembo’ uvuga ko imyuga abakobwa bagiye kwigishwa ari isanzwe imeze nk’iyahariwe n’abagabo, yunguka cyane kandi yoroshye kubona, ku buryo umuntu ataba azi kuwukora ngo agire ikibazo cy’ubukene.

Twaganiriye n’abakobwa bazajya batwara abagabo cyangwa abahungu bagenda bicaye inyuma yabo kuri moto, rimwe na rimwe usanga bagenda babakorakora, tubabaza uburyo bazabyitwaramo.

Uwitwa Grace Uwimanizanye w’imyaka 23, avuga ko mu gihe yakumva umugabo cyangwa umuhungu agenda amukorakora, yabanza agaparika moto ku ruhande akamwihaniza, harimo no kuba yabimenyesha inzego zishinzwe kurwanya ihohoterwa.

Inama yo gutangiza umushinga wiswe ‘Byuka Bakobwa’ yabereye i Kigali

Uwimanizanye yagize ati “Namubwira ko ntakiri wa wundi umuntu akoraho ngo ‘oya, oya’ kandi ntari guhakana, nahita mparika moto nkabanza nkamwibutsa ko twumvikanye ko mujyana akagera aho ajya, ariko ko tutumvikanye ibyo kugenda antereta, ankorakora”.

Minisiteri y’Uburezi (MINEDUC) mu ijwi ry’Umujyanama wa Minisitiri, ivuga ko isanzwe ishima ubufasha bw’umuryango Centre Marembo, cyane cyane ubujyanye no gufasha abana b’abakobwa kwitinyuka bagakora nk’ibyo abahungu n’abagabo bakora.

Gatabazi Pascal avuga ko bafitiye icyizere uwo muryango ko uzagera ku ntego wiyemeje.

Iyi raporo igaragaza ko 1.466.966 bakingiwe nyuma y’uko ku wa 23 Nzeri 2021, abahawe dose ya kabiri y’urukingo rwa Covid-19 bari 60.165 mu gihe abafashe iya mbere bari 26.369 byatumye umubare wabo ugera kuri 2.029.038.

U Rwanda rwashyize imbaraga mu bikorwa byo gukingira abaturage barwo ndetse hari icyizere ko mu bihe biri imbere, batangira gusubira mu buzima busanzwe mu gihe bakomeza kwirinda ndetse n’inkingo zikaboneka.

Icyizere cyabyo kigaragarira mu ngamba nshya zigenda zifatwa zirimo gufungura ibikorwa bitandukanye birimo n’utubari, twakomorewe ku wa 21 Nzeri 2021 nyuma y’amezi 18 twari tumaze dufunze.

U Rwanda rwizere ko nibura uyu mwaka uzarangira hakingiwe 30% by’Abaturarwanda. Ni mu gihe umwaka utaha byitezwe ko hazaba hakingiwe nibura 60%.

Minisante kandi yatangaje ko kuri uyu wa Kane, abantu 314 bashya banduye COVID-19 mu bipimo 11.168 mu gihe batatu binjijwe mu bitaro kugira ngo bitabweho n’abaganga.

Ikomeza yerekana ko kuri ubu abarembye ari 14 mu gihe abasezerewe mu bitaro ari bane.

Minisante kandi igaragaza ko mu masaha 24 ashize, abantu barindwi barimo abagabo bane n’abagore batatu bishwe n’icyorezo cya COVID-19.

23.09.2021 Amakuru mashya | Update | Mise à jour

Twihanganishije imiryango y’abagore 4 n’abagabo 3 bitabye Imana / Condolences to families of 4 women and 3 men who passed away / Condoléances aux familles de 4 femmes et 3 hommes qui sont décédés pic.twitter.com/PnwTlIlPMO

— Ministry of Health | Rwanda (@RwandaHealth) September 23, 2021

U Rwanda rwabaye kimwe mu bihugu bitatu byahawe ubwo burenganzira ku wa Kane tariki 23 Nzeri 2021, hamwe na Chili na Koweit.

Akanama k’u Burayi kuri Covid-19 gahora kavugurura urwo rutonde buri byumweru bibiri kabanje gusuzuma ingamba buri gihugu kitari muri EU cyafashe mu kwirinda no kurwanya icyorezo cya Covid-19.

Kuva u Burayi bwafata ingamba muri 2020 zo gukumira abaturuka hanze yabwo mu rwego rwo kwirinda Covid-19, bumaze kwemerera ibihugu 14 birimo n’u Rwanda, kurekura ababituye bagatembera kuri uwo mugabane.

Ibyo bihugu ni Australia, Canada, Chile, China, Jordan, Kuwait, New Zealand, Qatar, Rwanda, Saudi Arabia, Singapore, South Korea, Ukraine na Uruguay.

Mu byo u Burayi bugenderaho bwemerera abaturage batari ababwo kubutemberamo harimo kuba umuntu yarahawe urukingo rwa Covid-19, kuba ari umuntu ukomeye (umuyobozi n’undi muntu ufatwa nk’ingenzi), cyangwa se kuba ari umuturage uturutse mu bihugu byakuriweho amabwiriza yo gukumirwa.

U Rwanda ruri mu bihugu bya Afurika biza imbere mu kuzamura imibare y’abarindwa Covid-19, aho kugeza ubu abamaze guhabwa urukingo nibura doze ya mbere barimo gukabakaba miliyoni ebyiri, abamaze guhabwa doze zombi nabo bakaba barenga miliyoni imwe n’ibihumbi 400.

Yabivugiye mu Nama y’Umuryango w’Abibumbye yiga ku mirire, ubuzima, ubuhinzi n’ibindi bibazo byugarije abatuye Isi birimo imihindagurikire y’ikirere yiswe “United Nations Food Systems Summit”. Yabaye kuri uyu wa 23 Nzeri 2021 hifashishijwe ikoranabuhanga.

Ku wa 26 Nyakanga 2021 ni bwo hari habaye inama yo kuyitegura, mu gihe igitekerezo cyayo cyatanzwe n’Umunyamabanga Mukuru wa Loni, Antonio Guterres, mu 2019.

Yitabiriwe n’abandi barimo Perezida w’Inteko Rusange ya Loni, Abdulla Shahid; Minisitiri w’Intebe w’u Butaliyani, Mario Draghi n’abandi bakuru b’ibihugu na za Guverinoma bo hirya no hino mu Isi.

Mu ijambo Perezida Kagame yagejeje ku bayitabiriye, yabanje gushimira Guterres ku bwo kuzana igitekerezo cyayo dore ko ari yo ya mbere ibayeho igaruka ku mirire n’ibiribwa nk’ibintu byageza ku iterambere rirambye.

Yibukije ko ari byo bigize kimwe cya cumi cy’ubukungu bw’Isi aho byihariye miliyari 8.000$.

Yakomeje ati “Muri Afurika, 70% by’abafite imyaka y’ubukure bakora mu buhinzi n’imishinga ibushamikiyeho; ariko imirire n’ibiribwa ku Mugabane wacu bihora bijegajega ndetse bidahagije. Aya ni amahirwe akomeye yo kongerera umuvuduko iterambere rigeza ku ntego z’amajyambere arambye.”

Umukuru w’Igihugu yavuze ko ari ngombwa ko hakorwa amavugurura hakarushaho kongerwa ingufu bishorwamo “zirimo kongera ishoramari mu ikoranabuhanga ribika rikanasesengura amakuru, ikoranabuhanga mu gutunganya ibikomoka ku nyamaswa n’ibimera, serivisi z’imari zoroshye kuzigeraho n’utundi dushya.”

Yemeje ko ibyo bizanafasha muri ibi bihe Isi yose ikomeje gushaka uko yakwigobotora ingaruka za COVID-19.

Yakomeje agira ati “Kuri Afurika, intego nyamukuru ni ugushyira iherezo ku mirire mibi irangwa ku Mugabane no kuba wahanga amaso ibiribwa bituruka hanze yawo, ndetse hagahangwa imirimo mishya.”

Perezida Kagame kandi yabwiye abitabiriye iyo nama ko Ikigo Nyafurika gishinzwe Iterambere (NEPAD) cyafashije Common African Position (CAP) Kuyishyigikira hibandwa ku bintu bintu bitanu birimo gushyiraho ingamba zirebana n’amafunguro yuje intungamubiri, ubuhunikiro bw’ibiribwa no kwagura gahunda zo kugaburira abanyeshuri.

Hanibanzwe ku gushyigikira amasoko y’imbere muri Afurika hanagurwa ubucuruzi bwaho n’inzira ibiribwa binyuzwamo kugeza bigeze ku bari bubirye.

Icya gatatu cyakozwe ni ukongera ishoramari mu buhinzi rikagera ku 10% by’ibyo Leta zishoramo amafaranga; icya kane kiba korohereza abahinzi bato no kugenzura ko abagore bagera ku mitungo ibyara inyungu; naho icya gatanu ni ukwagura uburyo bwo kurengera abababaye n’ubw’amakuru y’imihindagurikire y’ibihe.

Perezida Kagame yagize ati “Kuzuza inshingano ngo ibi bikorwa bigerweho hazaba harimo amagenzura ahoraho y’Umushinga wita ku Iterambere ry’Ubuhinzi muri Afurika (CAADP). Uburyo bw’ishoramari bushya bushobora kwihutisha iterambere, ari bwo gushora imari mu birebana n’amafunguro no kuboneza imirire byasabwe na Banki Nyafurika Itsura Amajyambere.”

Yavuze ko iyo nama ishyizeho intangiriro y’ukundi kwiyemeza gushya mu bufatanye mpuzamahanga bukenewe kugira ngo havugururwe ibirebana n’ibiribwa n’imirire ndetse bijyane n’intego z’iterambere rirambye.

Ati “Ubu ni wo mwanya ngo Isi ihagurukire iki kibazo, dushyire hamwe.”

Antonio Guterres yavuze ko guhindura ibijyanye n’amafunguro n’imirire nidashoboka gusa ahubwo bikenewe, ati “Ibiryo ni ubuzima, ibiryo ni icyizere”.

Abayobozi b’ibihugu na za Guverinoma bitabiriye iyi nama bagiye batanga ubutumwa bibanda cyane ku mirire yuje intungamubiri n’ibishobora gufasha mu kuba ibiribwa byagera kuri bose.

Perezida Paul Kagame yagaragaje ko Afurika yifuza gushyira iherezo ku guhanga amaso ibiribwa biva hanze yayo

Minisitiri Gatabazi yasobanuye ibyo gufungura utubari mu byiciro

Minisitiri Gatabazi avuga ko nk’uko byakozwe mu nsengero ngo zemererwe kongera gufungura, ari na ko biza kugenda ku gufungura utubari, nyuma y’amezi 18 dufunze kubera kwirinda iwkirakwira rya Covid-19.

Minisitiri Gatabazi avuga ko hagiye kandi kwigwa ibihano bishya bizajya bihabwa abatubahirije amabwiriza yo gufungura utubari igihe azaba atubahirijwe kandi yaramenyeshejwe ibyo yitwararikaho.

Agira ati “Gufungura utubari mu byiciro ntabwo ari ukuvuga ngo harafungura udukomeye utundi dusigare, oya ahubwo ni ugufungura nyuma yo gusuzuma niba akabari kujuje ibisabwa. Tugiye kwiga uko akabari kagomba kuba gateye n’ibyo inama z’umutekano zitaguye mu turere zizaganiraho”.

Yongeraho ati “Dufite inshingano nk’abayobozi n’inzego zitandukanye zo kwicara tugatekereza ibikwiye kuba byubahirizwa. Uko akabari gateye mu buryo bwo kwirinda, kuba ahantu hari umwuka uhagije tukanashishikariza abantu gukorera hanze hari umwuka uhagije, gushyiraho abibutsa abantu gukurikiza amabwiriza n’ibindi byatuma gakora nta ngaruka zo gukwirakwiza Covid-19”.

Avuga ko hari utubari twahinduye amazina tukitwa za resitora na Caffé kugira ngo tubone uko dukora, abo na bo bakaba basabwa kubahiriza amabwiriza, abafite utubari bakaba basabwa kurinda abakiriya babo.

Agira ati “Nyir’akabari agomba kurinda akabari ke, akarinda abakiriya be n’abakozi be na we ubwe akirinda. Akarere n’inzego z’ibanze baribwicare bashyireho itsinda rishinzwe kugenzura imikorere y’utubari”.

Abacuruza utubari n’abigurira agacupa bishimiye gukomorerwa

Bamwe mu bacuruza utubari bavuga ko biteguye kongera gukora bubahiriza amabwiriza yo kwirinda Covid-19, kuko bari bamaze igihe bategereje ko na bo bakomorerwa bakongera gukora ku ifaranga.

Umuyobozi w’akabari kitwa Zenith ko mu mujyi wa Muhanga, avuga ko muri Covid-19 bari barahinduye inyito y’akabari kakitwa Resitora kugira ngo bakomeze gukora aho bacuruzaga ahanini ibyo bapfunyikira abakiriya.

Avuga ko banakomeje kwitegura bashyiraho uburyo bwo kwirinda Covid-19 no kuvugurura inyubako ku buryo ibyo basabwa byose biteguye kubyubahiriza kugira ngo bongere gukora nk’uko bisanzwe.

Agira ati “Twiteguye gukora nk’uko byari bisanzwe, twishimiye ko badukomoreye ariko natwe turashyiraho akacu kugira ngo hatazabaho kongera kudohoka tugafungirwa bidateye kabiri, twiteguye gukorana n’inzego zibishinzwe kugira ngo dukurikize amabwiriza”.

Umwe mu batuye umujyi wa Muhanga utashetse ko amazina ye atangaza avuga ko kongera gufungura utubari ari amahirwe yo kongera gusabana nyuma y’uko ubuzima bw’ibyishimo bwasaga nk’ubwahagaze.

Agira ati “Abagabo nta wari uherutse kwicarana n’undi nta gihunga ngo baganire, ubu twongeye kubona umudendezo n’iyo wakanywaga wihishe wabaga nta cyizere cy’uko batakagufatana, ubu umutima usubiye hamwe twishimiye uriya mwanzuro kandi tuzakomeza kwitwararika ku mabwiriza”.

Biteganyijwe ko utubari dutangira gufungura kuri uyu wa 23 Nzeri 2021, nyuma yo kugenzura buri kabari ibyo gasabwa kuzuza kugira ngo kemererwe gufngura.

Rutaganda avuga ko ibyo yakoraga yari azi neza ko bihanirwa n’amategeko akabisabira imbabazi

Ubwo yerekwaga itangazamakuru kuri uyu wa Gatatu tariki 22 Nzeri 2020, kuri sitasiyo ya polisi ya Remera, Augustin Rutaganda yemeye ko yiyitiriye urwego rwa polisi akaba yari amaze amezi arenga atanu abitangiye.

Kubera ko yakoraga akazi ko gutwara imbangukiragutabara, ngo ahantu haberaga impanuka akahagera yageragezaga uburyo bushoboka bwose bwo kubona nimero ya telefone y’umushoferi wakoze impanuka, yaba kuyimwiyakira cyangwa kuyishaka mu bundi buryo, hanyuma akazamuhamagara yiyise umupolisi uzi iby’iyo mpanuka kandi akeneye kumufasha, ubundi akabona kumusaba amafaranga bitewe n’ubufasha yabaga yamusezeranyije ko agiye kumuha.

Rutaganda avuga ko iyo yageraga ahantu hakorewe impanuka agiye gutwara uwagonzwe, yasabaga nimero uwamugonze amubwira ko polisi iza kumufasha, bamara gutandukana akazamuhamagaza indi nimero amubwira ko ari umupolisi ushaka kumufasha.

Ati “Umwe namusanze aho yakoreye impanuka ntwaye ambulance, we yari ategereje ko polisi iza kumufasha mu gupima impanuka, noneho njyewe mubwira ko abapolisi bashobora kumufasha, nyuma nza kumuhamagara mubwira ko namufasha kugira ngo bamusubize ibyangombwa bye, yemera kumpa amafaranga. Yanyoherereje ibihumbi 100 bwa mbere nyuma arongera anyoherereza ibihumbi 31, mu by’ukuri ikintu kimbesheje hano ndi umunyacyaha ndemera n’icyaha, ngasaba imbabazi”.

Rutaganda avuga ko ubushukanyi yabukoreye abantu batatu, akaba yarafashwe amaze kubambura Amafaranga y’u Rwanda agera hafi ku bihumbi 200.

Anicet Manirafasha wambuwe na Rutaganda amafaranga asaga ibihumbi 100, avuga ko yagongeye umwana ahitwa kwa Kiruhura, agahita ahamagara polisi n’imbangukiragutabara, bose bakaza nyuma birangiye azaguhamagarwa n’umuntu atazi.

Ati “Dushoje mbona nimero ya 0788375184 irampamagaye, imbwira ko ntamuzi ariko yari ari ahabereye impanuka, ko nakomeza ngakurikirana uwo murwayi nkita ku buzima bwe. Yakomeje kujya ampamagara ambwira ibigomba gukorwa, nyuma yaho ku munsi ukurikiyeho yarampamagaye, ambwira ngo ninohereze amafaranga ibihumbi 100 yo gufasha umurwayi nyohereza kuri iyo nimero.

Ati “Nyuma y’isaha imwe arambwira ngo ninohereze ayandi ngo ya yandi yabaye macyeya, nkimara kumuha amafaranga yarekeye aho, namuhamagara nkumva telefone ye ntayiriho, nahise njya kuri polisi kuyibwira ikibazo nahuye nacyo”.

Umuvugizi wa polisi y’u Rwanda, CP John Bosco Kabera, avuga ko igihe cyose abanyabyaha bazakomeza kwiyitirira inzego nta mahirwe bazabigiriramo kuko bazafatwa kandi bagahanwa.

Ati “Uriya n’umushoferi w’imbangukiragutabara, ahantu habaga impanuka bahamagara imbangukiragutabara akajyayo agafata amakuru y’abakoze impanuka, yarangiza agahita abatelefona amaze kugeza umurwayi mu bitaro, akiyita umupolisi, agatangira agashaka uburyo abarya amafaranga ababeshya ko azabafasha. Tumufashe amaze guhabwa ibihumbi bigera muri 200, uriya muntu rero wiyitaga opeje ko ashinzwe gupima impanuka, ntabwo ari byo kuko yiteye ibibazo, namushyira mu cyiciro cy’abantu biha inshingano zitari izabo bazazira, kubera ko biyitiriye icyo batari cyo”.

Abaturage barasabwa kujya bashishoza mbere y’uko bakorana n’abantu biyitirira inzego runaka, kuko buri rwego rugira aho rukorera hamwe n’ibiruranga bakajya bahagera, bakareba niba ibyo babwiwe ari ukuri mbere yo kugira ikindi bakora.

Kwisegura: Mu nkuru aho twari twanditse ko uyu mushoferi ari umukozi w’ibitaro bya CHUK si byo, kuko serivisi y’imbangukiragutabara akoramo ibarirwa mu kigo cy’igihugu gishinzwe ubuzima (RBC)