Tag: featured

Itangazo rya Komisiyo y’amatora rivuga ko gutegura ibikorwa by’amatora no gushaka ingengo y’imari byatangiye tariki 2 Nzeri kugera tariki 23 Ugushyingo 2021.

Ibikorwa byo kwakira ubusabe bw’abashaka kujya mu nama njyanama y’akarere bizatangira tariki 11 kugera tariki 20 Ukwakira 2021.

Tariki 23 Ukwakira 2021 hazaba amatora ya komite y’umudugudu, naho tariki 30 Ukwakira hatorwe biro y’inama njyanama y’akagari.

Tariki 13 Ugushyingo nibwo hazaba amatora y’abajyanama b’akarere naho tariki 19 hatorwe komite nyobozi z’uturere.

Komisiyo y’amatora mu Rwanda ivuga ko tariki 26 Ugushyingo hazaba hamaze gutangazwa ibyavuye mu matora mu Turere, mu Ntara no ku rwego rw’igihugu.

Iteka rya Minisitiri rimenyesha isubukurwa ry’amatora ryatangajwe na
Minisitiri w’Ubutegetsi bw’Igihugu.

Inama y’Abaminisitiri yateranye ku wa 01 Nzeri 2021 imaze kubisuzuma no
kubyemeza yategetse isubukurwa ry’amatora akurikira ayari yarasubitswe kubera inzitizi ntarengwa y’ubukana bw’icyorezo cya COVID-19.

Inama y’abaminisitiri yategetse ko haba itora ry’abayobozi b’inzego z’ibanze ku rwego rw’Umudugudu, urw’Akagari, urw’Umurenge n’urw’Akarere.

Yasabye ko haba Itora ry’abagize Komite Nyobozi y’Inama y’Igihugu y’Abagore, iry’abagize Komite Nyobozi y’Inama y’Igihugu y’Urubyiruko n’iry’abagize Komite Nyobozi y’Inama y’Igihugu y’Abantu bafite ubumuga mu nzego z’imitegekere y’Igihugu.

Iyo nama yasabye ko ibikorwa by’amatora bitangira muri Nzeri 2021 hakurikijwe gahunda y’amatora ya Komisiyo y’Igihugu y’Amatora.

Ubusanzwe wasangaga Akarere gafite abajyanama 38 na 39 cyangwa bakaba hejuru ya 20 bitewe n’imirenge ikagize. Itegeko rishya rigena ko uyu mubare ugabanywa.

Usibye kuba umubare wagabanutse kandi harifuzwa ko abagize njyanama bajya baba ari abantu bafite ubumenyi butandukanye ku buryo bazajya babasha guha akarere ibitekerezo bigafasha mu iterambere.

Aba bajyanama bazajya batorwamo umunani rusange bazajya batorerwa ku rwego rw’akarere. Abazajya baba bagize njyanama y’akarere 30% bagomba kuba ari abagore.

Muri bo kandi hazajya habamo Umuhuzabikorwa w’Inama y’Igihugu y’Urubyiruko ku rwego rw’Akarere, Umuhuzabikorwa w’Inama y’Igihugu y’Abagore ku rwego rw’Akarere, Umuhuzabikowa w’Inama y’Igihugu y’Abafite ubumuga ku rwego rw’Akarere ndetse na Perezida w’Abikorera mu Karere.

Hagaragajwe ko icyatumye uyu mushinga utegurwa harimo ingingo z’itegeko ryihariye rigenga Umujyi wa Kigali zari zisanzwe mu itegeko zakuwemo hasigara ibirebana n’imitunganyirize n’imikorere by’Akarere n’inzego z’imitegekere zikagize.

Minisitiri w’Ubutegetsi bw’Igihugu, Gatabazi Jean Marie Vianney, yabwiye RBA ko iri tegeko rizafasha mu miyoborere y’akarere cyane cyane kuri njyanama, no mu iterambere abaturage bifuza.

Abagize Njyanama z’uturere ni bamwe mu bagira uruhare rukomeye mu iterambere ry’uturere kuko bafasha abayobozi mu kugena imiyoborere ikwiye.

Abadepite batoye itegeko rigenga Akarere, umubare w’abagize Inama Njyanama uragabanywa

Iyi nama itegurwa n’Umuryango wo mu Busuwisi uzwi nka ‘WPC Foundation’ hagamijwe kuganira kuri Politiki y’ububanyi mpuzamahanga n’ubukungu.

Amakuru dukesha Ibiro by’Umukuru w’Igihugu avuga ko Perezida Kagame yageze Abu Dhabi kuri uyu wa 30 Nzeri 2021.

Perezida Kagame ni umwe mu bazitabira iyi nama izatangira kuva ku wa 1 kugeza ku wa 3 Ukwakira 2021.

Biteganyijwe ko iyi nama izahuriza hamwe abayobozi batandukanye, abahanga mu ngeri zinyuranye, abanyamakuru n’abacuruzi bakomeye. Aba bose batoranywa hagendewe ku izina rikomeye bafite, kandi imigabane yose ikaba ihagarariwe.

Iyi nama igiye kuba ku nshuro ya 14 kuko iya mbere yabaye mu 2008, ibera mu bihugu bitandukanye; iy’uyu mwaka ikaba iteganyijwe kubera Abu Dhabi.

Perezida w’u Rwanda Paul Kagame yageze Abu Dhabi, aho azitabira ‘World Policy Conference’

Abarobyi baganiriye na Kigali Today bavuga ko biteguye kujya mu mazi ariko babuzwa n’uko bamwe mu bayobozi n’abandi badafite imitego yujuje ubuziranenge none abafite imitego yemewe babujijwe nabo kujya mu mazi.

Umwe utashatse ko amazi ye atangazwa yagize ati “RAB yasabye ko hakoreshwa imitego yujuje ubuziranenge, ariko abayobozi bacu ntayo bagira, byatumye n’abayifite tubigenderamo kuko umuyobozi ntiyaguha uburenganzira kandi nawe atemerewe.”

Itangazo rya Minisiteri y’Ubuhinzi ryanditswe tariki ya 23 Nzeri rivuga ko gukoresha no gucuruza ibikoresho byangiza uburobyi bibujijwe, icuruzwa ry’ibikoresho by’uburobyi n’ubworozi bwo mu mazi risabirwa uruhushya rutangwa na RAB.

Minisiteri y’Ubuhinzi n’Ubworozi yasabye aborozi bakorera mu Kiyaga cya Kivu ko imitego ikoreshwa kuroba isambaza mu makipe yemewe ari umutego ufite ijisho rya mm 6 kuzamura, umutego w’icyerekezo ufite mm9 na 10.

Imitego iroba ingudu igomba kuba ijisho rya inch 1,5, naho Tilapia umutego ugomba kuba ufite ijisho rya inch 4 kuzamura.

Itangazo riburira abantu bose ko inzitiramubu, umutego ukozwe n’urudodo rumwe uzwi nka Kaningini utemewe.

Mukasekuru Mathilde umuyobozi muri Ministere y’Ubuhinzi avuga ko ikibazo cyatewe n’abarobyi batubahiriza amasezerano bagiranye na Minisiteri y’ubuhinzi.

Agira ati; “Byatangiye 2019 tubasaba gukuraho imitego ifite amaso ya 4, batwizeza ko bazajya babikora buri mwaka aho 2020 bagombaga kureka imitego ifite ijisho rya 5, 2021 hagakoreshwa imitego yemewe ariko nubu baracyakoresha imitego itemewe.”

Kimwe mu kibazo gikomeje kugora uburobyi bukorerwa mu kiyaga cya Kivu ni imitego itemewe ikoreshwa, abarobyi bakavuga ko ikoreshwa n’abayobozi b’amakoperative, abayobozi b’amahuriro ya Koperative hamwe nababaha ruswa.

Ku mugoroba tariki ya 30 Nzeri biteganyijwe ko hakorwa inama ihuriwemo n’abayobozi b’amakoperative akora uburobyi mu kiyaga cya Kivu, Guverineri w’Intara y’Uburengerazuba, Abayobozi b’uturere dukora ku kiyaga cya Kivu, Minisitiri w’Ubuhinzi n’ubworozi n’umuyobozi wa RAB kugira ngo haganirwe uko ikibazo cy’imitego itemewe cyacika mu kiyaga cya Kivu.

Imitego itemewe ishyirwa mu majwi kuba nyirabayazana yo kuroba amafi n’isambaza bitarakura, bigatuma hafatwa igihe cyo gufunga ikiyaga kugira ngo isambaza zibone umwanya wo kororoka.

Umuvugizi w’Inkiko, Mutabazi Harrison, yabwiye IGIHE ko umwanzuro watangajwe kuri uyu wa Kane, tariki 30 Nzeri 2021, i Nyanza aho urukiko rufite icyicaro.

Umucamanza yavuze ko ibimenyetso ubushinjacyaha bwatanze bigaragaza ko Idamange ahamwa n’ibyo ashinjwa.

Idamange w’imyaka 42 y’amavuko yatawe muri yombi ku wa 15 Gashyantare 2021, nyuma y’iminsi akoresha imbuga nkoranyambaga agatangaza amagambo arimo gushishikariza abantu gukora imyigaragambyo imbere y’Ibiro by’Umukuru w’Igihugu.

Uyu mugore yatangiye kuvugwa cyane mu itangazamakuru muri Gashyantare 2021, mbere y’aho ntabwo yari azwi na mba. Yifashishije YouTube maze akajya atambutsa ibiganiro birimo imvugo zagaragajwe nk’izigumura abaturage.

Umunsi yafatiweho yari amaze gutangaza ikiganiro cyaje gikurikira ikindi yakoze yise “Amasengesho”. Mu kiganiro cye cya nyuma, yumvikana asaba Abanyarwanda bose kujya mu Ngoro y’Umukuru w’Igihugu ngo bakigaragambya, bitwaje za Bibiliya.

Ubwo yatangiraga kwifashisha imbuga nkoranyambaga atambutsa ibiganiro bye, abantu benshi baramwamaganye, kugeza n’aho bamwe mu muryango we barimo abavandimwe be bitandukanyije na we kugera no ku mugabo babyaranye.

Uyu mugore yaburanye ahakana ibyaha ashinjwa, akavuga ko nta muntu wishwe n’amagambo yavuze, kandi ko ntacyo aricyo cyo kuba yahamagarira abaturage ngo bamukurikire. Yavuze ko atari umuyobozi, nta n’ishyaka arimo ku buryo abaturage bari kumuyoboka.

Idamange yahamijwe ibyaha yari akurikiranyweho birimo birimo guteza imvururu cyangwa imidugararo muri rubanda, gutanga amakuru y’ibihuha yifashishije ikoranabuhanga no gupfobya Jenoside

Minisitiri Muheshimana na Guverineri w’Intara y’Amajyepfo, Kayitesi Alice, batera Soya

Ni muri urwo rwego MINAGRI itangaza ko hari ingamba zo kongera umusaruro wa soya aho yatangiye gushishikariza abahinzi guhuza ubutaka bunini kugira ngo bongere umusaruro w’icyo gihingwa, gikungahaye ku ntungamubiri zikenerwa n’abakuru n’abato ndetse n’amatungo.

Minisitiri w’Ubuhinzi n’ubworozi, Dr. Geraldine Mukeshimana, avuga ko uruganda rwa Shisha kibondo rukora ibyo kurya by’abana, n’izindi nganda zitunganya soya zidahazwa n’iboneka mu Rwanda, ari yo mpamvu abahinzi bakwiye kwitabira kuyihinga, MINAGRI na yo igashaka imburo ishobora gutanga umusaruro uhagije.

Mu nganda zikenera umusaruro wa soya kandi ngo harimo n’izishobora gukenera Toni ibihumbi 15 ku mwaka, ariko ikaba ikiri nkeya, mu gihe igiciro cyayo cyo kitajya kimanuka kuko nibura gishobora kugera ku mafaranga 800frw ku kilo kimwe.

Agira ati “Kugeza ubu ntiturabona ikibazo cy’isoko rya soya ku bazihinga, turifuza ko umusaruro wakwiyongera kugira ngo ziriya nganda ziwukeneye zibone uko zikora, n’abahinzi babone amafaranga biteze imbere”.

Mu Murenge wa Kibangu batangiye guhinga Soya ku buryo bwa kijyambere

Mu rwego rwo kongera umusaruro wa soya, ku wa 29 Nzeri 2021 mu Karere ka Muhanga mu Murenge wa Kibangu ahahujwe ubutaka kuri Ha 70, hatangirijwe Igihembwe cy’ihinga 2022 A ku rwego rw’Igihugu, ahagiye guhingwa soya ku buso bwatunganyijweho amaterasi y’indinganire.

Abaturage bo mu Murenge wa Kibangu bavuga ko ari ubwa mbere bagiye guhinga Soya ku buso buhujwe, kuko ubundi bayihingaga mu kajagari kandi bagakoresha imbuto zisanzwe ari na yo mpamvu umusaruro wabaga mukeya.

Umwe muri bo agira ati “Wasangaga tuvanga soya, amateke n’ibigoli, ibihingwa bikagenda bicuranwa, ariko ubu batwigishije guhinga kijyambere ku buryo ifumbire twakoresheje nta gushidikanya ko tuzabona umusaruro uhagije kandi batubwiye ko tuzabona isoko”.

Soya yahinzwe ku buso bwatunganyijweho amaterasi

Muri uwo murenge wa Kigangu bafite umuhigo wo guhinga kuri Ha 70 muri iki gihembwe cy’ihinga n’ikizagikurikira, aho nibura bateganya kweza toni n’igice kuri buri Ha, bikaba biteganyijwe ko hagiye gushakwa n’indi mbuto irumbuka cyane ya Rwasoy20, ishobora kuzatanga toni eshatu kuri ha yitaweho neza.

Abahinga mu Gishanga cy’Agatobwe bifuza ko cyatunganywa, bikabakuriraho imyuzure ituma barumbya

Abahinga muri iki gishanga bavuga ko bacyitunganyirije mu mwaka wa 2017. Icyo gihe baciyemo amapariseri yo guhingamo, bakora n’imiferege itwara amazi, ariko ibi ntibibuza ko mu gihe cy’imvura nyinshi amazi yuzuramo, akabatwarira imyaka.

Ayo mazi yuzura mu mirima yabo ni ava mu kagezi k’Agatobwe kayinyuramo, andi akava mu muhanda wa kaburimbo uherutse gutunganywa, andi na yo akava mu gasantere ka Karama.

Uwitwa Thaciana Mukanshaka, ahinga hafi y’umuhanda wa kaburimbo. Agira ati “Iyo imvura yaguye ari nyinshi haratwarwa, tugasarura utwagiye turokoka. Hatwawe kurusha guhera mu mwaka ushize kubera uriya muhanda, kuko umucanga wawumanutsemo warenze ku bigori.”

Yungamo ati “Bari bavuze ko uruzi bazaruyobya ngo barebe yuko hatakongera gutwarwa, ariko ntibirakorwa. Turahinga ari ugupfa guhinga.”

Placidie Uwitonze we ahinga mu gice kimanukiramo amazi aturuka ku gasantere ka Karama. Avuga ko amazi ahamanuka ari menshi cyane ku buryo atwara inyongeramusaruro baba bahinganye n’imyaka.

Agira ati “Rwose uwadufatira amazi aturuka mu gasantere ka Karama yaba akoze, ayahaturuka ahura n’ay’Agatobwe, ifumbire igahita ishiramo tugahomba gutyo.”

Emmanuel Nzabirinda avuga iby’ibihombo bagiye baterwa n’imyuzure agira ati “Imyuzure iraduhombya muri rusange, ariko njyewe ku giti cyanjye nigeze guhinga block zigera muri eshanu z’ibigori. Buri block nagombaga kuyisaruramo umufuka w’ibigori, ariko nasaruyemo umufuka umwe muri zose.”

Nyuma yaho ngo yahinze ibirayi muri ya mablock atanu, ariko yose hamwe ngo nta mufuka yakuyemo kuko amazi yaretse mu murima hanyuma ibirayi bikabora.

Umuyobozi w’Akarere ka Huye, Ange Sebutege, avuga ko muri rusange mu Karere ayobora hakiri ibishanga biri ku buso busaga hegitari 748 bikeneye gutunganywa, kandi ko bateganya kuzabitunganya binyuze mu mirimo y’amaboko ihabwa abakene muri gahunda ya VUP.

Ati “Haracyakorwa inyigo. Ntabwo bizakorerwa rimwe ariko gahunda ni iy’uko bizakorwa n’abaturage babigizemo uruhare.”

Ibi ngo bizafasha ko haramutse hagize icyangirika, ba baturage bagize uruhare mu kubyubaka bagikosora.

RBC na RRP+ batangije ubukangurambaga bwiswe U=U bwo gusaba abafite agakoko gatera SIDA kunywa neza imiti bahabwa

Umuyobozi muri RBC ushinzwe ubuvuzi bw’indwara zandurira mu mibonano mpuzabitsina na Hepatite, Dr Janvier Serumondo, avuga ko ibi byavuye mu bushakashatsi bwakozwe ku rwego mpuzamahanga.

Dr Serumondo yagize ati “Iyo ufata imiti neza kwa muganga barapima virusi ntibazibone, icyo gihe ubasha kuba utakwanduza abandi, ni cyo bivuze. Ariko ntibivuga ko wakize, bisaba gukomeza iyo gahunda kuko uba ugifite virusi nke cyane zitagaragazwa n’ibipimo”.

Avuga ko gufata imiti neza bivuze kudasimbuka umunsi n’umwe, ndetse no kubahiriza isaha umuntu asanzwe ayifatiraho.

Kugeza ubu imiti igabanya ubukana bwa SIDA iracyari ibinini, n’ubwo ngo hazagera igihe umuntu akajya yitera urushinge inshuro nk’ebyiri mu mwaka.

Dr Serumondo avuga ko iki gisubizo gishobora kuzaza mu myaka iri imbere ariko atamenya neza.

RBC hamwe n’Urugaga rw’Abafite Virusi itera SIDA mu Rwanda (RRP+), batangije ubukangurambaga bwiswe “Uwagabanyije Virusi=Utanduza Virusi (U=U)”, bugamije kubwira abafata imiti igabanya ubukana bwa SIDA kubikora neza kugira ngo barinde ubuzima bwabo n’ubw’abandi, ndetse banakumire akato bahabwaga.

Abafite virusi ya SIDA bafata imiti neza ubu ntabwo ibagaragaraho, ndetse nta n’ubwo bashobora kwanduza abandi

Umunyamabanga Nshingwabikorwa wa RRP+, Sage Semafara, avuga ko mu banyamuryango barenga ibihumbi 140 bari hirya no hino mu gihugu, 91% bageze ku rwego rwo kutagaragaza virusi itera SIDA ndetse no kutanduza abandi, kubera gufata neza imiti bahabwa.

Ati “Amahirwe yo kubaho ku bafite virusi itera SIDA yariyongereye, ushobora kubaho ubuzima bwose Imana yakugeneye, ubu wapfa wisaziye nk’undi wese udafite virusi itera SIDA”.

Avuga ko gahunda yo gufata imiti neza imaze kugabanya kwiheba n’akato, ndetse ko umugabo n’umugore ubu babana bakarambana umwe afite virusi undi ntayo afite, kandi bakabyara umwana udafite virusi.

Umugabo w’imyaka 64 witwa Kamanzi Simon, avuga ko yamenye ko yanduye virusi itera SIDA mu mwaka wa 2001(ubu hashize imyaka 20), ariko agakeka ko yayanduye mu mwaka wa 1995.

Kamanzi w’umufundi, ahora atwara igare buri munsi kuva i Nyagasambu aza i Kigali mu kazi akongera agasubirayo, nta kibazo na kimwe afite kuva yatangira kunywa imiti igabanya ubukana bwa SIDA.

Kamanzi ati “Hari igihe abantu bageze ubwo bavuga ngo ‘uriya musaza arabeshya, twari tuzi ko agomba gupfa none igihe cyo gupfa cyararangiye’, igare ndaritwara kandi mfite imbaraga, nzahitanwa n’ikindi kitari SIDA, ibanga nta rindi, ni ugufata imiti neza”.

Kamanzi ni umwe mu bakorerabushake (abajyanama b’urungano) barenga 5,000 bari hirya no hino mu gihugu biyemeje kwegera abandi bafite virusi itera SIDA, kugira ngo babarinde kwiheba, babafashe gufatira imiti ku gihe, kurwanya akato no gukangurira abantu kujya kwipimisha bakamenya uko bahagaze.

Ikigo RBC kivuga ko u Rwanda hari aho rumaze kugera ku ntego z’Ishami ry’Umuryango w’Abibumbye rishinzwe kurwanya SIDA (UNAIDS), ziteganya ko mu mwaka wa 2030 abenegihugu bangana byibura na 90% bazaba bipimisha SIDA bakamenya uko bahagaze.

Izo ntego kandi zigakomeza zivuga ko mu bisanze baranduye virusi itera SIDA, byibura 90% bagomba kubona imiti, ndetse ko mu bari ku miti byibuze 90% bagomba kuba batagaragaza virusi.

Abakangurira abandi gufatira imiti ku gihe bahawe ibihembo n’ibikoresho bibafasha

Dr Serumondo avuga ko kugeza ubu abipimisha bakamenya uko bahagaze bageze kuri 86%, abanduye bafata imiti bakaba ari 97% ndetse abatakigaragaza virusi kubera gufata imiti neza ubu ngo bangana na 90%.

Nyuma y’umwaka wa 2030 ubwo UNAIDS izaba irimo gutanga indi ntego y’imyaka 15 yo kugira byibura 95% bipimisha, 95% bahabwa imiti na 95% batagaragaza virusi, u Rwanda rwo ngo ruzaba rwarayigezeho kera.

Ubukangurambaga bwa U=U n’ubwo buzamara amezi atatu bukorwa ku buryo bw’umwihariko na RRP+ ku bigo nderabuzima, RBC iteganya ko ari gahunda izakomeza igihe cyose SIDA ikivugwa mu Rwanda.

Ibyo ahanini biterwa n’uko gahunda yo gusaranganya inkingo ku isi mu bihugu bikennye izwi nka Covax, itashoboye kubona dose zihagije ngo zigere hose uko bikwiye.

OMS ivuga ko Seychelles, Maurice na Maroc bageze ku kigero kinini cyo gukingira, kuko bageze hejuru ya 40%.

Ibyo ngo babifashijwemo na gahunda zabo zikomeye zo gukingira, ingano y’igihugu ndetse n’abaturage bacyo.

Ibindi bihugu byabashije kugera ku ntego y’isi yo gukingira icyorezo cya Covid 19 uko bikwiye ni Tunizia, Eswatini, Cape verde, Botswana, Comoros, Zimbabwe, Guinee equatorial, Afurika y’Epfo, Mauritania, Lesotho n’u Rwanda.

Igitangazamakuru cy’Abongereza, BBC, kivuga ko Abanyafurika 4% ari bo bakingiwe byuzuye ugereranije na 60% mu Muryango w’Ubumwe bw’ibihugu by’Uburayi (EU).

Covax yari yarateguye kugeza muri Afrika dose zigera kuri miliyoni 300, ariko yashoboye kugura dose miliyoni 5 zonyine nyuma yuko ibihugu bikize biguze byinshi bigashyira mu bubiko bwabyo.

Messengers Singers

Umuyobozi wa Messengers Singers, Ishimwe Emile, aganira n’Itangazamakuru yavuze ko indirimbo Urahambaye yakiriwe neza n’abakunzi b’indirimbo zo kuramya no guhimbaza Imana, bibatera imbaraga zo kwifuza gutaramira abakunzi babo bifashije ikoranabuhanga (YouTube).

Ati “Indirimbo kugeza ubu yakiriwe neza cyane. Byatumye dutekeza ku yindi mishinga tugiye gukurikizaho, harimo igitaramo tuzakorera kuri YouTube ndetse n’Indirimbo twatangiye gukora muri studio”.

Ishimwe ati “Messengers Singers izakora igitaramo cyo kuramya no guhimbaza Imana mu mpera z’umwaka hifashishizwe ikoranabuganga rya YouTube”.

Indirimbo ‘Urahambaye’ irimo amagambo y’Isanamutima hari aho baririmba bati ‘Mana nyir’irema urahambaye, nta kiriho nakimwe kitagenwe nawe duciye mu mitima inyuzwe tukwerereza shimwa”.

Iyo ndirimbo yakozwe na Bruce & Boris mu buryo bw’amajwi mu gihe amashusho yayo yafashwe, anatunganywa na Mucyo Serge.

Messengers Singers igizwe n’abaririmbyi umunani, bafite umwihariko wo kugira amajwi anyura amatwi.

Messengers Singers yamenyekanye mu ndirimbo nyinshi zitandukanye harimo Umusumari, Iyo avuze, Nyuma ya byose na Izi impamvu, yakunzwe cyane mu Rwanda no mu mahanga.

Ibihangano by’iri tsinda bikundwa na benshi ariko bikaba umwihariko ku bayoboke b’Itorero ry’Abadivantisiti b’Umunsi wa Karindwi.

Messengers Singers yashinzwe ku wa 30 Kamena 2009, igizwe n’abaririmbyi umunani, yatangiriye ivugabutumwa rinyuze mu ndirimbo muri Collège Adventiste de Gitwe mu Karere ka Ruhango mu Majyepfo y’u Rwanda, kugeza ubu ifite album ebyiri z’amajwi na album imwe y’amashusho.