Blog

Akarere ka Nyanza gafite igice cyitwa Amayaga mu mirenge ya Ntyazo, Muyira, Kibirizi, Kigoma na Busoro; yose izwiho kwera imyumbati nk'uko biri no mu Karere ka Ruhango bihana imbibi.

Iyo utembera muri aka gace, ugenda ubona ubuso bunini buhinzeho imyumbati y'imbuto nshya iherutse gutuburwa igakwirakwizwa mu baturage, ndetse ukabona n'ibitanda binini byanitseho imyumbati yinuwe.

Gusa ariko, bamwe mu bahinzi bayejeje ntibamwenyura nk'uko byakagombye, ahubwo barataka igihombo kuko ngo babuze isoko ry'umusaruro wabo.

Niyomugabo Charles, umuhinzi w'imyumbati ufite hegiitari eshatu wo mu Karere ka Nyanza, Umurenge wa Kigoma, Akagari ka Butara, Umudugudu wa Kigufi, yabwiye IGIHE ko ubu imyumbati iri kubura isoko kandi bo barayihinze bahenzwe.

Yavuze ko ikilo cyayo kitarenza 200Frw, ibyo we na bagenzi be bafata nk'igihombo.

Ati 'Ubu ikilo amenshi ni 200Frw, kandi mu minsi yatambutse umuhinzi yahingaga yishyimye kuko byari 500 Frw no hejuru yayo, wahinga bikagira icyo bikumarira. Ubu twarahombye cyane, kuko tuvuge niba nari mfite nk'aho nakura nka miliyoni 3Frw ubu na miliyoni imwe kuvamo ni ikibazo, kandi twashoye amafaranga menshi.''

Mutabazi Jean Baptiste, wo mu Mudugudu wa Buhaza, Akagari ka Gati, mu Murenge wa Muyira, muri Nyanza, nawe avuga ko imyumbati baheruka guhinga ku bwinshi ubu yabuze isoko.

Ati 'Ubu iragurishwa 200 Frw, ariko iyaba nayo yabonekaga byibura, urayitindikira warabuze n'ukubaza!''

Ni nako biri kandi kuri Sova Eric w'imyaka 20 nawe wo mu Murenge wa Muyira.

Uyu avuga ko yari yarahinze imingoti ine y'imyumbati, yizeye kwiteza imbere nk'urubyiruko, ariko ubu ikaba iri kumuhombera iborera mu murima kuko nta soko yayibonera.

Ati 'Nateganyaga gusarura nkakomeza kwagura ubuhinzi, nkongeramo n'ubworozi bw'inkoko, ariko ubu binsubije inyuma, kandi umuntu aba akishakisha.''

Niyomugabo na bagenzi be, basaba ubuyobozi ko bwabavuganira bukabashakira abashoramari bayigura kuko ngo kugeza ubu uruganda rw'imyumbati rwa Kinazi narwo ruvuga ko rutabasha kugura umusaruro w'abahinzi bose.

Ati 'Iyo ugiye ku ruganda gusaba ko bakugurira, nk'ubu (itariki twavuganiyeho) bakubwira ngo uzagerwaho muri Kamena umwaka utaha, ngo abandi babanje barangiye, kandi ubwo yaba iri gupfa ubusa.''

Niyomugabo yavuze bigoye kwishakira isoko kuko bo bari baramenyereye abacuruzi bazaga kubahahira mu cyaro, ariko ubu bakaba batakiza.

Mugenzi we, Mutabazi nawe ati 'Leta idushishikariza gukora, igashyiraho abafashamyumvire mu buhinzi, igashyiramo abagoronome, ariko byamara kwera, ibyo twashoye bigahomba, ingaruka zikaba ubukene ku muturage wo hasi.''

'Twumva Leta yashyiraho ingamba zo kujya idufatira umusaruro ikawujyana no mu bihugu byo hanze, kuko uruganda rumwe mu Mayaga ntiruhagije ku myumbati ihera, mba numva n'abaruturiye barira ko babuze isoko.''

Umuyobozi w'Akarere ka Nyanza wungirije Ushinzwe Iterambere ry'Ubukungu, Kajyambere Patrick, yavuze ko ubusanzwe ibiciro byajyaga bihindagurika bitewe n'igihe runaka, ariko ko atari azi iby'iki kibazo kivugwa n'abahinzi, akabizeza ko bagiye kongera kuvugana n'uruganda rwa Kinazi ndetse n'abandi baguzi bo ku ruhande, mu gushaka isoko.

Ati 'Tugiye kubikurikirana, dukorane n'uruganda, ariko tunemera ko twareba n'abandi baturutse ahandi, kugira ngo twuzuzanye dushake isoko.''

Kugeza ubu, mu Karere ka Nyanza, imyumbati ihingwa ku buso busaga hegitari 7000, kikaba ari igihingwa ngandurarugo, ariko kizana n'amafaranga.

Kanyarwanda Jonas wo mu Murenge wa Muyira, muri Nyanza, avuga ko nubwo batareka guhinga imyumbati, ariko ubu inyungu yayo muri iki gihe ari ntayo

Imbuto y’imyumbati iherutse gutangwa mu turere two mu Ntara y’Amajyepfo, yatangiye gutanga umusaruro n’ubwo abayihinga bataka kutabona abaguzi iyo yeze

Henshi uhasanga ibitanda byanitseho imyumbati yinuwe igiye kuma, ariko nta cyizere cy’isoko bene yo bafite

Sova Eric, umusore ukiri muto wari waratangiye kwiyegurira ubuhinzi ubu ababajwe no kuba umusaruro w’imyumbati ye uri guhomba

Iri murikabikorwa ry'iminsi ibiri ryasojwe ku itariki 13 Ukuboza 2024. Ryabereye i Kigali rihuriza hamwe ibigo bimurika ibyo bikora, biganira ku mahirwe ahari mu bijyanye n'ishoramari mu by'ubwubatsi, bisangira inaribonye ndetse n'imbogamizi zigihari.

Mu muhango wo gusoza iryo murikabikorwa, Umuyobozi wungurije wa PSF, Kimenyi Aimable yavuze ko igitekerezo Mr Roof yagize cyo guhuriza hamwe abakora ubucuruzi mu by'ubwubatsi bose kuva ku bashushanya imbata z'inzu kugeza ku isakaro ari ikintu gikomeye cyane.

Yagize ati 'U Rwanda ni Igihugu kiri gutera imbere cyane no mu rwego rw'ubwubatsi ariko usanga abahabwa serivise zabwo hari izo batabona neza kubera kudakorera hamwe. Umuntu ashobora gufungura 'quincaillerie' akabikora ku giti cye ntamenyane n'abakeneye ibyo acuruza ngo bakorane, uwubaka inzu, ushyiramo imitako cyangwa se n'ufite igitekerezo kijyanye n'ubwubatsi ntibahure nk'abari mu mwuga umwe ngo habeho imikoranire'.

Yakomeje avuga ko 'Nka PSF dushyigikiye cyane iki gitekerezo cya 'Under one roof' kuko cyahuje abantu bose bari mu mwuga baraganira bituma uwabaka amenya aho ibikoresho biva, abakeneye inguzanyo bahura n'ibigo by'imari bizitanga mu bwubatsi kandi biborohereza iyo ari benshi n'indi mikoranire inyuranye. N'ibindi bihugu byateye imbere usanga hahabaho gukorana kw'abantu bari mu mwuga umwe bigatuma bakora ibikorwa binini'.

Umuyobozi w'ibikowa by'ubucuruzi mu Kigo gishora Imari mu bijyanye n'Ubwubatsi cya UDL, Rubangura Claudette yavuze ko iryo murikabikorwa baryitezeho umusaruro ufatika mu bijyanye n'ubwubatsi.

Ati 'Ntekereza ko imurikabikorwa nk'iri rizatanga umusaruro ukomeye mu rwego rw'ubwubatsi no ku gihugu muri rusange. Ibyo bizazamura ubukungu binyuze mu guhanga imirimo mishya no guteza imbere ubumenyi kuko by'umwihariko twanaganiriye ku cyuho mu bijyanye n'ubumenyi kigihari. Nashishikariza n'ibindi bigo gutegura imurikabikorwa nk'iri Mr Roof yakoze'.

Umuyobozi Mukuru wa Mr Roof, Fatima Soleman yavuze ko kimwe mu bintu by'ingenzi bikenewe mu bijyanye n'ubwubatsi ari uguhuza imbaraga abantu bakamenyana kandi ko iryo murikabikorwa ryafashije kubigeraho.

Ati 'Twamenye ko abantu benshi bakora mu by'ubwubatsi bari bakeneye uru rubuga kugira ngo bungurane ubumenyi kandi banahure n'abandi bakora muri uyu mwuga bamaze kubaka izina ndetse n'ingaga z'abanyamwuga mu by'ubwubatsi. Twishimiye uburyo abakora muri izo nzego bose bahuriye muri iri murikabikorwa ariko by'umwihariko hari harimo n'abadakora mu by'ubwubatsi ariko batanga serivise abubatsi bakenera'.

Fatima yongeyeho ko urwego rw'ubwubatsi mu Rwanda rurimo amahirwe y'ishoramari yo kubyaza umusaruro kuko rugize 10% by'Umusaruro Mbumbe w'Igihugu kandi rukaba ruri gukura cyane bijyanye n'iterambere ry'Igihugu.

Iryo murikabikorwa mu by'ubwubatsi ryateguwe na Mr Roof ribaye ku nshuro ya mbere ari na ryo rya mbere ribaye muri urwo rwego Rwanda, rikaba rizajya riba buri mwaka.

Abitabiriye iryo murikabikorwa bakora mu ngeri zinyuranye zihura n’ubwubatsi

Umuyobozi wungurije wa PSF, Kimenyi Aimable ashimira Fatima Soleman ku bw’iryo murikabikorwa

Umuyobozi Mukuru wa Mr Roof, Fatima Soleman yavuze ko kimwe mu bintu by'ingenzi bikenewe mu bijyanye n'ubwubatsi ari uguhuza imbaraga

Rubangura Claudette yavuze ko iryo murikabikorwa ryitezweho kuzamura ubwubatsi

Kuri uyu wa 14 na 15 Ukuboza 2024, umuhanzi Christopher Maurice Brown wamamye nka Chris Brown ari gutaramira mu gihugu cya South Africa mu mujyi wa Johannesburg kuri sitade ya FNB.

Abafana 94, 736 baguze amatike yo kwinjira mu gitaramo cya Chris Brown mu gihe kitarenze isaha imwe n’iminota 38 kuko nyuma yaho amatike yari yamaze gushira ku isoko.

Ubundi Chris Brown yari yarateguye igitaramo kimwe muri South Africa ariko nyuma yo kubona ko amatike arenga 94,000 abaye nk’igitonyanga mu nyanja, yahisemo kwiyongeza ikindi gitaramo kugira ngo ashimishe abafana be mu gihugu cya South Africa.

Nyamara nubwo abantu benshi bari bamwishimiye, abarenga 30,000 baharanira uburenganzira bw’umugore muri Afurika y’Epfo, bagerageje gushaka uko bahagarika iki gitaramo kubera ibyaha Chris Brown yakoze by’ihohotera ku bagore byumwihriko ibyo yakoreye Rihanna ariko bifata ubusa.

Kuri uyu wa 14 Ukuboza, umuhanzi Chris Brown yakoze igitaramo cy’akataraboneka muri FNB Stadium ahari abafana barenga 94,000 biganjemo inkumi bari baje kwirebera ibi birori biba gacye muri Africa.

Chris Brown yaririmbye zimwe mu ndirimbo ze zikunzwe muri iki gihe harimo sensational, Angel Numbers,…

Kuri uyu wa 15 Ukuboza, Chris Brown arongera akorere igitaramo cya Kabiri muri South Africa nkuko biteganyijwe.

Chris Brown yaherukaga gutaramira muri Africa mu mwaka wa 2012 mu gihugu cya Nigeria ubwo yari yishyuwe Miliyoni y’amadorali, 2013 muri Ghana ntabwo yishyuwe Miliyoni y’amadorali, 2016 muri Kenya icyo gihe yari yishyuwe $887,000.

FNB Stadium yuzuye abafana barenga 94,000 baje kureba Chris Brown 

Abiganjemo inkumi zambaye imyenda iriho ibirango bya Chris Brown, baje gutaramana na Chris Brown 

Buri nkumi yose muri South Africa yikozeho

Akanyamuneza ni kose kuri Chris Brown uri gutaramira abafana be barenga 94,000

Ntegekurora Léonidas wigisha amateka mu ishuri rya ES Rukomo SOPEM mu karere ka Nyagatare, yavuze ko yatse inguzanyo ya miliyoni 2 Frw mu Umwalimu SACCO, imubera imbarutso yo kwiteza imbere.

Uyu mugabo yongeyeho make yari yarizigamiye aguramo hegitari imwe y'ubutaka, ayihingaho ibigoli, na byo biramukundira birera, kuko havuyemo toni 5.

Ati 'Nahise ntekereza umushinga wo Korora inkoko, mfata imishwi 200 ndaza ndayorora, ndayikurikirana ku mezi ane ziba zatangiye gutera, inkoko zimpa amagi mbona ibintu bitangiye kugenda neza, ndatekereza nti nkeneye ifumbire ku isambu.'

Ntegekurora yanatangiye umushinga wo korora ingurube zimuha ifumbire y'imborera, akayivanga n'imvaruganda bituma ubuhinzi bwe butera imbere.

Ati 'Ubu mfite ingurube 16, ariko izibyara ni enye ubwo umuntu agenda agurisha bitewe n'ubushobozi bwo kuzigaburira.'

Ntegekurora kandi ngo yamaze kubona yishyuye inguzanyo ya mbere afata indi ya miliyoni 10 Frw ashinga iduka mu Mujyi wa Nyagatare.

Yakomeje avuga ko ubu yiteje imbere mu buryo bugaragara kandi ko nubwo akora indi mirimo y'ubucurizi bitabangamira akazi k'uburezi kuko ubu afite abakozi bita ku bikorwa bye by'ishoramari na we akigisha yumva atekanye.

Ndikubwimana Ezechiel wigisha muri Nyanza TSS mu Karere ka Nyanza we yagaragaje ko yahawe inguzanyo ya miliyoni 2 Frw akaguramo isambu, asigaye ayaguramo imashini zibaza ku buryo ubu zimwinjiriza amafaranga atubutse.

Kuva mu 2021 yashinze ibarizo ririmo imashini eshatu zigezweho, ndetse ubu yanashinze inzu icuruza ibikoresho by'ubwubatsi.

Ati 'Ubu ndi umwarimu w'umubaje, ucuruza ibikoresho by'ubwubatsi.'

Aba barimu bombi bagaragaza ko bazakomeza gukora neza umwuga wabo kuko ari wo bakesha ibindi bikorwa by'iterambere.

Ubuyobozi bwa Umwalimu SACCO bugaragaza ko abarimu ba Leta bahabwa inguzanyo ku nyungu ya 11% mu gihe umwalimu wo mu mashuri yigenga ahabwa inguzanyo ku nyungu ya 13%.

Minisitiri w'Intebe Dr. Edouard Ngirente yasabye abarimu bose gukoresha ubumenyi bafite barera abana b'u Rwanda ngo bazagirire igihugu akamaro, ariko bakanaba umusemburo w'impinduka mu bice batuyemo.

Ati “Mwarimu yatanze amasomo ku ishuri, yareze umwana w'igihugu ariko n'aho atuye akagenda atubera urugero, akagenda abera urugero abandi Banyarwanda kuko ubumenyi mufite ntabwo bukora gusa ku ishuri.'

Mwarimu Ntegekurora yiteje imbere abikesha inguzanyo ku mushahara yasabye mu Umwalimu SACCO

Abarimu barenga 1200 bari bitabiriye umunsi mpuzamahanga wabo

Ni ihuriro ryamuritswe ku wa Gatanu tariki 13 Ukuboza 2024.

Iri huriro rishyirwaho n'iteka rya Minisitiri w'Intebe ryo ku wa 30 Ugushyingo 2022 rigenga Komite Ngishwanama mu by'Amazi ku rwego rw'Igihugu.

Inshingano z'iri huriro zirimo gutanga inama ku ngingo zijyanye no kubungabunga amazi, kurwanya imyuzure, kugena ibikwa ry'amazi, kurwanya amapfa n'ibindi bijyanye n'umutungo kamere w'amazi no gutanga inama ku mishinga cyangwa ku mishinga y'amategeko yerekeye imicungire y'amazi ku rwego rw'Igihugu, akarere ndetse no ku rwego mpuzamahanga.

Umuyobozi w'Ikigo Gishinzwe Umutungo Kamere w'Amazi mu Rwanda (RWB), Dr. Emmanuel Rukundo, yavuze ko iri huriro ryitezweho gutanga ibisubizo byugarije umutungo kamere w'amazi.

Ati 'Iri huriro ni indi ntambwe itewe mu kubungabunga umutungo kamere w'amazi mu buryo burambye. Guhuriza hamwe abafatanyabikorwa batandukanye ni ukubaka umusingi w'ubufatanye mu guhanga udushya no gukemura ibibazo byugarije umutungo kamere w'amazi.'

Umunyabanga Uhoraho muri Minisiteri y'Ibidukijije, Cyiza Beatrice, yavuze ko ihuriro ry'abafatanyabikorwa mu by'amazi rigaragaza ko hakenewe ubufatanye mu nzego zose.

Ati 'Gushyiraho iri hururiro birashamangira ko gucunga umutungo kamere w'amazi mu buryo burambye bitareba gusa leta ahubwo ari inshingano zihuriweho na bose. Iri huriro rizatuma umutungo kamere w'amazi urindwa, ucungwa neza ndetse ukoreshwe mu guteza imbere ubukungu n'imibereho myiza.'

Umuhango wo kumurika iri huriro wahujwe no gusinya amasezerano y'imikoranire hagati y'Ikigo Gishinzwe Umutungo Kamere w'Amazi mu Rwanda (RWB), Rwanda Mountain Tea Ltd, ARCOS Network na IUCN Rwanda.

Aya masezerano asinywe ku nshuro ya mbere mu Rwanda, agamije guhuriza hamwe imbaraga mu kubungabunga icyogogo cya Giciye mu karere ka Nyabihu.

Iki cyogogo cyugarijwe n'ibibazo birimo isuri, imyuzure, bigira ingaruka ku ngomero z'amashanyarazi za Giciye za Rwanda Mountain Tea Ltd.

Iri huriro rigizwe n'abayobozi b'ibigo bya Leta birimo Ikigo k'Igihugu gishinzwe umutungo kamere w'amazi mu Rwanda (RWB) arinacyo kiyoboye iri huriro, Ikigo Gishinzwe Isuku n'Isukura no gukwirakwiza amazi mu Rwanda (WASAC), Ikigo cy'Igihugu gishinzwe ingufu REG, Ikigo gishinzwe imicungire y'ibidukikije mu Rwanda (REMA) n'Ikigo gishinzwe guteza imbere ubuhinzi n'ubworozi mu Rwanda (RAB).

Rigizwe kandi n'Ikigo cy'igihugu gishinzwe Ubwikorezi(RTDA), Ikigo cy'u Rwanda gishinzwe guteza imbere imiturire (RHA), Ikigo cy'Igihugu Gishinzwe Ubutaka (NLA), Ikigo gishinzwe Ubumenyi bw'Ikirere (RMA), Uhagarariye Minisiteri ishinzwe ibikorwa by'Ubutabazi (MINEMA), Umuyobozi w'ishyirahamwe ry'abikorera (PSF) n'Umunyamabanga Nshingwabikorwa w'Ihuriro ry'imiryango itegamiye kuri Leta ku bidukikije (RENGONF).

Ihuriro ry’abafatanyabikorwa ryitezweho gukemura ibibazo bigaragara mu micungira y’amazi

Umunyabanga Uhoraho muri Minisiteri y'Ibidukijije, Cyiza Beatrice, yavuze ko ihuriro ry'abafatanyabikorwa mu by'amazi rigaragaza ko hakenewe ubufatanye mu nzego zose.

Umuyobozi wa RWB, Dr Emmanuel Rukundo yavuze ko iri huriro ryitezweho gutanga ibisubizo byugarije umutungo kamere w'amazi.

Leta yasinyanye amasezerano n’abikorera n’imiryango itari iya leta mu gucunga icyogogo cya Giciye

Florentino Perez Rodriguez yavutse mu kwezi kwa 3 ku itariki 8 mu 1947, avukira muri Espagne. Uyu mugabo yize muri kaminuza yitwa Polytechnic Madrid ndetse ni n’umushoramari ukomeye muri Espagne.

Perez yatorewe bwa mbere kuba umuyobozi wa Real Madrid muri 2000 atsinze mu matora uwari usanzwe ayiyobora witwa Lorenzo Sanz wari waratwaye igikombe cya Champions League mu 1998.

Icyo gihe hari n'icyizere ko yanabahesha icyo muri 2000, ariko Perez we yavugaga ko Real Madrid ifite ibibazo by'amafanga azabikemura akanazana n'abakinnyi bakomeye barimo Luis Figo yahise akura muri Fc Barcelona bituma amutsinda mu matora, aba umuyobozi mushya wa Real Madrid.

Guhera ubwo uyu mugabo yatangiye urugendo rukomeye rwinjiza abakinnyi bakomeye muri Real Madrid kuko mu 2001 yahise agura Zidane amakuye muri Juventus kuri Miliyoni 77.5 z'amayero, mu 2002 agura Ronaldo, mu 2003 agura David Beckham, mu 2004 agura Michael Owen. 

Guhera ubwo Real Madrid yari yinjiye mu gice cyo gutwara ibikombe bikomeye kubera ko yahise atwara ibikombe bibiri bya shampiyona ya Espagne anatwara igikombe 1 cya Champions League mu myaka 8 gusa.

Imyaka Florentino Perez yari yaratorewe kuyobora Real Madrid yarangiye mu 2009 ariko yahise yongera ariyamamaza aba ari na we unatorwa kubera ko ni we wenyine wari witeguye gutanga arenga Miliyoni 57 z'amayero azajya mu ikipe.

Akimara gutorwa, yahise yongera kugura abandi bakinnyi bakomeye barimo: Kaka yakuye muri Milan, Cristiano Ronaldo yakuye muri Manchester United kuri Miliyoni 80 z'amapawundi, Valencia, Karim Benzema yakuye muri Olympique Lyonnais kuri miliyoni 30 z'amayero, Xabi Alonso yavanye muri Liverpool kuri miliyoni 30 z'amayero ndetse anagura umutoza ukomeye Jose Mourinho mu mwaka wa 2010.

Nyuma y'imyaka itatu Mourinho amaze gutwara igikombe cya shampiona ya Espagne afite amanota 100 akanagera muri kimwe cya kabiri cya Champions League, yahise yirukanwa asimbuzwa Carlo Anchelotti ndetse banashaka abandi bakinnyi bakomeye barimo Gareth Bale wavuye muri Tottenham, bahita batwara Champions League ya 10 muri 2013.

Mu bakinnyi Florentino Perez yaguze harimo Cristiano Ronaldo 

Muri 2014 Perez yahise agura abandi bakinnyi bari bigaragarije mu gikombe cy'isi barimo James Rodriguez, Toni Kroos na Keylor Navas. Perez abonye Anchelotti bitari kuvamo neza, yahise agura uwari waramubereye umukinnyi Zidane amugira umutoza maze atwara ibikombe 3 bya Champions League mu myaka 3 yikurikiranya, 2016, 2017 na 2018.

Mu mwaka ushize w'imikino Perez yatwaye igikombe cya shampiyona ndetse n'igikombe cya Champions League. Mu bikombe bikomeye Perez amaze gutwarana na Real Madrid ari umuyobozi harimo 7 bya Champions League na 7 bya shampiyona ya Espagne (La Liga).

Uyu mugabo azwiho kwizeza abakinnyi gutwara Ballon d'Or bikarangira bazitwaye. Bamwe mu bakinnyi bamaze gutwarana Ballon d'Or nawe harimo: Luis Figo mu 2001, Ronaldo mu 2002, Fabio Cannavaro mu 2006, Luka Modric mu 2018, Karim Benzema mu 2022 ndetse na Cristiano Ronaldo watwaye Ballon d'Or 4 bari kumwe.

Florentino Perez afatwa nka Perezida wa mbere ku Isi mu makipe 

Ibi bikoresho byatanzwe ku wa Gatanu, tariki ya 13 Ukuboza 2024, mu Karere ka Nyanza, Umurenge wa Muyira mu Kagari ka Gati.

Ni igikorwa cyari kigamije kunganira Leta mu kugeza amashanyarazi ku baturage no guteza imbere ikoreshwa ry'imbabura zifasha kugabanya ibicanwa ndetse n'ingaruka z'imyotsi ku buzima.

Umuhango wo gushyikiriza abaturage ibi bikoresho witabiriwe n'inzego zitandukanye zirimo Minisiteri y'Ibikorwaremezo (MININFRA), Ubuyobozi bw'Akarere ka Nyanza, Energy Private Developers (EPD) ndetse n'abaturage b'uturere twagenewe iyi nkunga.

Mu ijambo rye, Umuyobozi Nshingwabikorwa wa BK Foundation, Karangwayire Ingrid, yavuze ko iyi nkunga igamije gufasha abaturage kubona umucyo mu ngo zabo, abana bakiga neza, kandi haterwa intambwe yo kurengera ibidukikije.

Yagize ati “Ibi twabitekereje tugamije kugira ngo mugire umucyo mu rugo, abana babashe kwiga, mucane neza kandi mudahenzwe, ariko munarengera ibidukikije. Tuzi ko mugicana inkwi ariko kandi mugomba kurengera ibidukikije, ni yo mpamvu twabahaye aya mashyiga ngo mubashe gucana ariko murengera ibidukikije.”

Energy Private Developers na MININFRA bashima ubufatanye bwa BK Foundation

Umuyobozi Mukuru wungirije wa EPD, Uwizeye Jean Claude, yavuze ko ihuriro ryabo rigizwe na kompanyi zigera kuri 200 zikora mu bijyanye n'ingufu zirimo izikomoka ku zuba, ku mazi, ibicanwa, n'abashakashatsi muri urwo rwego; aho bose barajwe ishinga n'iterambere ry'Abanyarwanda mu by'ingufu.

Yavuze ko biyumvamo umuhate wo gushyigikira gahunda ya Leta yo kugeza amashanyarazi kuri bose, ari nayo mpamvu batekereje kwihuza na BK Foundation kugira ngo batange umusanzu wabo kuri icyo kibazo.

Ati 'Twashatse uburyo bwo kugira ngo namwe mutaragerwaho n'amashanyazi, muzinjire mu minsi mikuru mucaniwe, mufite urumiri.''

Yakomeje ashima BK Foundation yabateye ingabo mu bitugu kugira ngo iki gikorwa kigerweho, aho bo batanze 30% naho BK Foundation igatanga 70% by'igiciro cy'igikorwa cyose.

Ati 'Mu bihe bishize twakoraga bitugoye, aho byadusabaga kwisunga abaterankunga bo hanze, ariko ubu BK Foundation iradufashije kandi turayishima cyane, bizatuma dufatanya na Leta kugera kuri NST2 ndetse tunagere kure muri 2050.''

'Turahamagarira n'abandi bikorera, kugera ikirenge mu cya BK Foundation bagafasha mu kurengera ibidukikije.''

Umuhuzabikorwa w'ishami rishinzwe ingufu muri Minisiteri y'Ibikorwaremezo, Nirere Marion, yavuze ko ibikorwaremezo by'ingufu ari ikintu gikomeye cyane kandi gihozwaho ijisho n'igihugu, ndetse ko urwego rwose rutanzemo umusanzu ruba rukoze ikintu cyiza kandi kizana impinduka.

Ati 'NST1 twayisoje tutageze ku ntego, kuko turi kuri 77%, ariko turifuza ko nibura mu 2029, Abanyarwanda bose bazaba bacana kuko tuzi ko aho umuriro wageze impinduka zigaragara.''

Yongeyeho ati 'Turifuza kugera kure hashoboka, ni nayo mpamvu dusaba ko n'abandi bikorera barebera kuri BK Foundation tugakameza gutera imbere.''

Bamwe mu baturage batangiye gusogongera ku byiza by'ibi bikoresho, babwiye IGIHE ko byamaze guhindura ubuzima bwabo, bashima abafatanyabikorwa babibagejejeho barangajwe imbere na BK Foundation.

Nkundakozera Felix, umwe muri bo, ati 'Nari nituriye ku gishanga muri 'Gahuru' none umucyo waransanze, iwacu harabona, kandi ni ubuntu kuko bambwiye ko ncana umuriro w'izuba. Uretse icyo, twajyaga tugura inkwi za 1500 Frw tukazicana iminsi itatu gusa, none twahawe imbabura irondereza bikatwungura, ubu izo tuzicana hafi ibyumweru bibiri.''

Mugenzi we witwa Twagirimana Anne Marie, nawe yavuze ko umurasire yahawe watumye abana be biga, ubu bari kwigira ahantu habona dore ko bari no mu bizamini, yongeraho ko n'imbabura yahawe igiye kubakiza indwara z'ubumekero ziterwa n'imyotsi kuko batandukanye nayo.

Umuyobozi w'Akarere ka Nyanza wungirije Ushinzwe Iterambere ry'Ubukungu, Kajyambere Patrick, yasabye abaturage kuzafata neza ibikoresho bahawe kugira ngo indi nkunga izaboneka ntizaze ije gusubira ku bahawe mbere, ahubwo izajye ku bandi bataragerwaho.

Kugeza ubu, imibare itangwa na Minisiteri y'Ibikorwaremezo igaragaza ko gahunda ya NST1 yarangiye abagerwaho n'amashanyarazi ari 77%, intego ikaba ari uko mu 2029 bazagera ari 100%, aho abazaba bagerwaho n'umuyoboro mugari (on grid) bazaba 75%, naho abazaba bacana bakoresheje izindi ngufu bakazaba ari 25%.

Umuyobozi Nshingwabikorwa wa BK Foundation, Ingrid Karangwayire, yavuze ko inshingano zabo ari ukuzamura imibereho myiza y'Abanyarwanda

Umukozi ushinzwe ingufu muri Minisiteri y’Ibikorwaremezo, Nirere Marion, yashimye ubwitange bwa BK Foundation, asaba ko n’ibindi bigo byabareberaho mu kunganira Leta

Umuyobozi Mukuru wa EPD, Muhizi Serge Wilson yashimye BK Foundation yabashyigikiye mu kugeza amashanyarazi n’imbabura zirondereza ibicanwa ku baturage ba Nyanza na Ruhango

Umuyobozi Nshingwabikorwa wa BK Foundation, Karangwayire Ingrid, ashyikiriza umwe mu baturage imbabura

Twagirimana Anne Marie wo mu Karere ka Nyanza, yabwiye abayobozi ko yatandukanye n’umwijima

Twagirimana Anne Marie, ubwo yerekaga abashyitsi uko acana amashanyarazi yahawe ku buntu na BK Foundation ifatanije na Enery Private Developpers(EPD)

Akazi ko kubagezaho amashanyarazi akomoka ku zuba katangiye

Iyi mbabura izwiho kurondereza ibicanwa cyane, bityo bigatuma irengera ibidukikije

Iki gikorwa cyatangijwe ku mugaragaro, kizasiga ingo 141 zihawe imirasire n’imbabura zirondereza inkwi 141, byose bikazatwara arenga miliyon 40 Frw

Aba mbere batangiye guhabwa izo mbabura zirondereza ibicanwa

Izi mbabura zatanzwe zirondereza ibicanwa inshuro nyinshi ugereranyije n’andi mashyiga asanzwe

Uru rubyiruko rwari rumaze amezi atandatu rwigishwa imyuga ijyanye n'ubwubatsi ndetse no gukora ibijyanye n'amashanyarazi. Bigishwaga n'Umuryango BRAC International, binyuze mu mushinga wayo ugamije guteza imbere urubyiruko witwa 'Youth Empowerment Accelerator for Health.'

Uru rubyiruko ruvuga ko rwiteze impinduka mu mibereho yarwo kuko abenshi bari bugarijwe n'ubushomeri.

Si urwo rubyiruko gusa rwahawe ibikoresho kuko n'amakoperative atanu akora umwuga w'uburobyi mu Kiyaga cya Kivu yahawe ibikoresho byo kwifashisha muri ako kazi.

Umuyobozi uhagarariye aya makoperative, Sibomana Darius, avuga ko ibi bije kubafasha gukemura ikibazo cy'ibikoresho bari bafite. Yagize ati 'Hari ibikoresho tutari dufite ariko tugize amahirwe BRAC itwongereye ibikoresho, ni na ko n'abanyamuryango batari babifite bagiye kubihabwa kugira ngo bakomeze bateze imbere imibereho yabo.'

Umuyobozi w'Agateganyo w'Akarere ka Rusizi ushinzwe imibereho myiza y'abaturage, Uwimana Monique, yasabye abahawe ibikoresho kubibyaza umusaruro.

Yagize ati “Icyo tutifuza kubona ni uko ibi bikoresho twabisanga ku isoko babigurisha kuko twabibahaye kugira ngo bigire aho bibakura bigire ahandi bibageza.”

Cicely Holland uyoboye uyu mushinga wo gufasha urubyiruko yavuze ko gufasha urubyiruko biri mu murongo wo kuzamura ubukungu kuri bose ndetse no kuhazaza h'igihugu, cyane ko urubyiruko rugize igice kinini cy'Abanyarwanda.

Ati “Turizera tudashidikanya ko aya masomo ndetse n'ibikoresho bahawe bazabyifashisha mu kubinjiriza amafaranga bakazamura imibereho yabo, iy'imiryango yabo ndetse n'umuryango nyarwanda muri rusange.'

Umuryango BRAC International usanzwe ukorera mu turere twa Rusizi na Huye aho ufasha urubyiruko rwabyariye iwabo ndetse n'urwacikirije amashuri.

Umuyobozi w'Agateganyo w'Akarere ka Rusizi ushinzwe imibereho myiza y'abaturage, Uwimana Monique, yasabye abahawe ibikoresho kubibyaza umusaruro

Cicely Holland yavuze ko ibi bikoresho byatanzwe mu rwego rwo gufasha urubyiruko kwiteza imbere

Urubyiruko rukora uburobyi mu Kiyaga cya Kivu ruri mu rwafashijwe kubona ibikoresho

29′ Koruneli ya Rayon Sports nyuma y’umupira wari uzamuwe na Prince Elenga abakinnyi ba AS Kigali Bakawurenza. Koruneli yatewe neza na Kevin nuko Nkubana Marc aratabara.

23′ Koruneli ya AS Kigali yari itewe na Onyeabor Franklin, Umupira Khadime Ndiaye awukuramo neza cyane.

17′ Iyabivuze Isse yari atanze umupira kwa Chabalala wateye umupira agaramye, ukanyura ku ruhande.

12′ Kufura itewe na Muhire Kevin igaruwe na Franklin Onyenka’

11′ Kufura ya Rayon Sports nyuma y’ikosa rikorewe Bugingo Hakim ubwo yashakaga gushota’

4' AS Kigali itangiye umukino ikinira inyuma, iri guha amahirwe abakinnyi ba Rayon sports kuko Fall Ngagne ateye umutwe ujya ku ruhande rw'izamu rtya Hakizimana Adolphe'

1′ Adama Bagayogo yari atunguye AS Kigali ateye ishotiu umuzamu Hakizimana Adolpher awukuramo

Abakinnyi babanje mu kibuga ku ruhande rwa AS Kigali ni Hakizimana Adolphe, Nkubana Marc, Akayezu Jean Bosco, Tharicisse, Rucogoza Aimable, Flanklin Onyenka, Iyabivuze Osee, Ntiruhwa Aime, Buregeya Prince, Armel Gislain na Shaban Hussein.

Abakinnyi babanje mu kibuga ku ruhande rwa rayon Sports ni Khadime, Serumogo, Bugingo, Aimable, Yousou, Richald, Roger, Kevin, Fall ngagne, Adama, Elenga Kanga.

Abakunzi ba rayon sports uko bagiye bageera kuri Kigali Pele Stadium

Abakinnyi ba AS Kigali  bari kwishyushya mbere y’uko umukino utangira

Abakinnyi ba Rayon Sports bari kwishyushya mbere y’umukino

Uko abakinnyi ba AS Kigali bageze kuri Kigali Pele Stadium

Uko abakinnyi ba Rayon sports bageze kuri Kigali Pele Stadium

Kuri uyu wa Gatandatu itariki 14 Ukuboza 2024-25, AS Kigali yakiriye Rayon sports mu mukino w'umunsi wa 13 wa shamoiyona y'u Rwanda Rwanda Premier League 2024-25.

Ni umukino ukomeye cyane uguye guhuza amakipe amze iminsi ayoboye shampiyona y'u Rwanda, kuko AS Kigali ni iya kabiri naho Rayon Sports yo ni iya Gatatu. Mu ggihe AS Kigali yatakaza uyu mukino, APR FC yamaze gutsinda Mukura niyo yaguma ku mwanya wa kabiri.

Ni umukino Rayon Sports ishaka gutsinda kugira nmgo ikomeze kuyobora shampiyona y'u Rwanda, cyane ko mukeba bawo APR FC iri kuyirya isataburenge, kuko yamaze kugira amanita 25.

 

AMAFOTO: Ngabo Serge  Inyarwanda.com