Blog

Muri ayo mafaranga yose, hamaze kugaruzwa gusa miliyari 44,9 Frw.

Iby'aya mafaranga byagarutseho n'ubuyobozi bwa Banki y'u Rwanda y'Amajyambere, BRD, mu busabane hagati y'Abanyarwanda baba mu mahanga bwabaye mu mpera z'icyumweru gishize, ku wa 03 Mutarama 2025.

Ubu busabane bwari bwitabiriwe n'Abanyarwanda barenga 130 baba mu bihugu birenga 40 byo ku migabane yose y'Isi, bakiriwe na Minisitiri w'Ububanyi n'Amahanga n'Ubutwererane, Amb Olivier Nduhungirehe.

Icyo gihe yababwiye ko 'Kugera ku ntego za NST2 bizasaba imbaraga no gukomeza ubufatanye n'inzego bireba harimo na mwe bagize umuryango w'Abanyarwanda baba mu mahanga.'

Kuva inguzanyo yo kwiga yatangira gutangwa mu 1980, yatangwaga na Minisiteri y'Uburezi, bigenda bihinduka kugeza ubwo mu 2008 izo nshingano zimuriwe mu Kigo cy'Igihugu cyari gishinzwe gutanga inguzanyo [SFAR].

Mu 2013 hamaze guhuzwa ibigo byari biri muri Minisiteri hagasigara Urwego rw'Igihugu Rushinzwe Uburezi bw'Ibanze [REB], SFAR yinjijwemo nk'ishami rishinzwe gutanga inguzanyo ku banyeshuri.

Mu 2016, BRD yahawe inshingano zo gukomeza gutanga inguzanyo no kwishyuza abari bakirimo umwenda wa miliyari 70,9 Frw bazihawe mbere.

Ubwo yagezaga ubutumwa ku Banyarwanda baba mu mahanga, Umuyobozi w'Ishami rishinzwe inguzanyo na buruse zihabwa abanyeshuri bo mu mashuri makuru na Kaminuza muri BRD, Wilson Rurangwa, yasabye abigiye kuri iyi nguzanyo gutangira gutekereza kuyishyura.

Ati 'Minisitiri yabivuze, muri gahunda y'iterambere ya NST2, intumbero ni ukubaka ubukungu bushingiye ku bumenyi, ibyo rero ntabwo twabigeraho hatarimo kwiga. Abenshi muri hano twagize amahirwe yo kwigira ku nguzanyo, n'ubwo twayigiyeho tugomba no kwishyura kugira ngo n'abandi bana bashobore kugira ayo mahirwe.'

Yakomeje agira ati 'Murumva ko tugifite urugendo rurerure. Diaspora, igihe kirageze kugira ngo muri mwe abazi ko mwabonye ayo mahirwe Leta ikabaha inguzanyo mukajya kwiga ubu mukaba mufite uko mubayeho kuko mwagize ayo mahirwe, turabasaba ko namwe mwagira icyo mukora kugira ngo umwana w'Umunyarwanda ashobore kugira ayo mahirwe nk'ayo twagize twese.'

BRD igira inama abasabye n'abasaba inguzanyo muri BRD gufunguza konti muri BRD Minuza, kugira ngo babashe kujya bakurikirana amakuru yerekeye amafaranga bishyura cyangwa abakoresha babo babakata ku mushahara niba agera muri BRD, kuko bagenda babona impinduka hakurikijwe igikorwa cyakozwe.

Iyo basanze umuntu wigiye ku nguzanyo ya leta yarishyuye amafaranga menshi, arayasubizwa. Urugero muri Nyakanga 2024, miliyoni 300 Frw zari zimaze gusubizwa abishyujwe amafaranga menshi.

Umuyobozi w'Ishami rishinzwe inguzanyo na buruse zihabwa abanyeshuri bo mu mashuri makuru na Kaminuza muri BRD, Wilson Rurangwa, yasabye abigiye kuri inguzanyo gutangira gutekereza kuyishyura, mu rwego rwo gufasha abakiri kwiga nabo bakeneye iyi nguzanyo

Abanyarwanda baba mu mahanga basabwe kwishyura inguzanyo bigiyeho no gukurikirana bakamenya amakuru y’ubwo bwishyu

Muganga Robert ni umusaza w’imyaka 76 y’amavuko utuye i Gacuriro mu Murenge wa Kinyinya Akarere ka Gasabo, avuga ko yiyemeje kugira umuco wo gukora siporo, aho ayikora mu gihe cy’amasaha 2 agenda n’amaguru.

Muganga avuga ko nta gahunda afite yo guhagarika gukora siporo, ibintu ajyanisha no kwita ku mirire ye kugira ngo arusheho kugira ubuzima bwiza.

Ku rundi ruhande, abakiri bato nabo bavuga ko muri uyu mwaka wa 2025, biyemeje kurushaho gukora siporo kuko ibafasha kugira ubuzima bwiza.

Abakora mu bijyanye n’ubuzima bavuga ko gukora siporo ari kimwe mu bifasha abantu kwirinda indwara zirimo nk’indwara zitandura, zirimo umuvuduko w’amaraso, diyabete ndetse na kanseri.

Minisitiri w’Ubuzima Dr.Sabin Nsanzimana avuga ko abantu bakwiye kumenya ibyo bakora ngo birinde indwara. Yagize ati “Nigeze gusaba abantu guhaguruka iminota mike, bitewe n’uko kwicara umwanya munini ari intandaro y’indwara zinyuranye. 

Iyo urebye muri rusange, ku munsi hari abantu bamara amasaha 7 cyangwa 8 bicaye, iyo batwara imodoka baba bicaye, hari abicara umwanya munini bari mu kazi, iyo bagiye mu kiruhuko ku manywa nabwo aho bagiye baricara, abandi ugasanga bicaye mu nama, iyo ubaze ayo masaha yose hari igihe ashobora kugera no kuri 12.”

“Hari abagera mu rugo bakicara bareba televisiyo, ubundi nyuma yaho bakajya kuryama. Icyo ni ikibazo gihangayikishije kandi niyo mpamvu iza ku isonga mu gutera indwara zitandura. 

Ibyo rero bigomba guhinduka kugira ngo twirinde, ibibazo by’indwara tubona ku bana, abantu bakuru ndetse no ku baganga, aho tubona ibibazo bikomeye tutabonaga mu myaka 20 ishize. Nitutagira icyo duhindura bizatuma igice kinini cy’ubuvuzi kizajya kibanda mu gusana cyangwa kuvura ibyo twakabaye twarakumiriye.”

Minisante ivuga ko mu kwita ku buzima bw’abaturage harimo no kongera umubare w’abaganga b’inzobere aho nk’ikigo cya IRCAD, umwaka ushize warangiye kimaze kwigisha abaganga babaga hatabayeho kubabaza umubiri cyane barenga 300.

Src: RBA

Kuva cyatangizwa mu 1956, abakinnyi nka Alfredo Di Stefano, Johan Cruyff, Cristiano Ronaldo na Lionel Messi bagiye bagaragaza ubuhanga budasanzwe, bakaba ab’imbere mu kwegukana iki gihembo. 

Nyamara, mu mateka yacyo hari abakinnyi benshi bahamya ko bakorewe akarengane ntibagihabwe mu gihe bari bararushije abandi bose mu kibuga. Muri iyi nkuru, turagaruka ku bakinnyi 9 bamenyekanye bivugwa ko bibwe Ballon d'Or nk’uko tubicyesha ikinyamakuru Goal.

9. Virgil van Dijk (2019)

Mu mwaka wa 2019, Virgil van Dijk yari umutima wa Liverpool ubwo yegukanaga UEFA Champions League. Uyu myugariro yakoze amateka mu bwugarizi, atanga n’umusaruro w’ibitego 10 mu mikino 50 ya Liverpool. 

Nyamara, yatsinzwe na Lionel Messi ku majwi arindwi gusa, n’ubwo Van Dijk yari amaze gutsinda Messi mu mikino ya Champions League ubwo Liverpool yasezereraga Barcelona mu buryo butazibagirana.

Jurgen Klopp, umutoza watozaga Liverpool, icyo gihe yagize ati: “Sinigeze mbona undi myugariro wagize umwaka mwiza nk’uwo Van Dijk yagize.”

8. Wesley Sneijder (2010)

Wesley Sneijder yafashije Inter Milan gutsinda Barcelona no kwegukana UEFA Champions League mu mwaka wa 2010. Yanagejeje u Buholandi ku mukino wa nyuma w'Igikombe cy'Isi, anaba umwe mu bakinnyi batsinze ibitego byinshi muri iryo rushanwa. 

Nyamara, ntiyabashije no kujya mu bakinnyi batatu ba mbere mu gihe Lionel Messi yahabwaga Ballon d’Or, nubwo atari yarigaragaje ku rwego rwiza muri uwo mwaka.

7. Erling Haaland (2023)

Haaland yatsinze ibitego 52 mu mikino 53, afasha Manchester City gutwara igikombe cya UEFA Champions League, Premier League, na FA Cup mu mwaka wa 2023.

Nyamara, Lionel Messi yegukanye Ballon d’Or bitewe cyane n'intsinzi ya Argentina mu gikombe cy'Isi cya 2022. Umutoza w'u Budage, Lothar Matthaus, yavuze ko byari “ukubogama gukomeye” kwanga guha Haaland iki gihembo.

6. Cristiano Ronaldo (2018)

Luka Modric yegukanye Ballon d’Or mu 2018 nyuma yo gufasha Croatia kugera ku mukino wa nyuma w’Igikombe cy’Isi. Nyamara, Cristiano yari yatsinze ibitego 44 muri uwo mwaka, harimo 15 muri Champions League. Ibi byatumye abafana ba Ronaldo bemeza ko yarenganyijwe.

5. Deco (2004)

Deco yegukanye ibikombe bitatu muri 2004 hamwe na FC Porto ya Jose Mourinho, harimo UEFA Champions League. Yatsinze ibitego icyenda, atanga imipira 25 yavuyemo ibitego, kandi yahawe igihembo cy’umukinnyi mwiza w'umwaka muri UEFA. Nyamara, Andriy Shevchenko ni we wahawe Ballon d’Or, nubwo atari yaratanze umusaruro nk'uwa Deco.

4. Franck Ribery (2013)

Franck Ribery yari ku rwego rwo hejuru ubwo Bayern Munich yegukanaga igikombe cya Champions League, Bundesliga, na DFB-Pokal mu mwaka wa 2013. Yagize uruhare mu bitego 34 muri uwo mwaka, ariko Ballon d’Or yahawe Cristiano Ronaldo n’ubwo Real Madrid itigeze yegukana igikombe na kimwe.

3. Vinicius Jr (2024)

Vinicius Jr yari amaze kuba icyamamare mu mwaka wa 2024, atsinda ibitego by'ingenzi, birimo hat-trick yatsinze Barcelona mu mukino wa nyuma wa Super Cup. Yafashije Real Madrid gutwara La Liga na Champions League, ariko Ballon d’Or yahawe Rodri wa Manchester City, bituma abafana ba Vinicius bavuga ko iki gihembo cyibwe.

2. Robert Lewandowski (2020 & 2021)

Lewandowski yagize imyaka ibiri idasanzwe, atsinda ibitego 55 mu mwaka wa 2020, ariko Ballon d’Or ntiyatanzwe uwo mwaka kubera Covid-19. Nubwo yatsinze ibitego 62 mu 2021, Ballon d’Or yahawe Lionel Messi, bitera uburakari bwinshi mu bakunzi ba Lewandowski.

1. Thierry Henry (2003)

Henry yagize umwaka mwiza cyane mu 2003, atsinda ibitego 24 muri Premier League, anatanga imipira yavuyemo ibitego 25. Ni we mukinnyi wenyine wigeze gutsinda ibitego 20 no gutanga imipira 20 mu mwaka umwe muri Premier League. Nyamara, Pavel Nedved ni we wahawe Ballon d’Or, n’ubwo Henry yari ku rwego rwo hejuru.

Izi moto zikoranye ubwenge n'ubushishozi buhanitse, biziha igikunduro ku bazirebesha amaso ndetse no ku bazikoresha bitewe n'umusaruro zitanga.

Mu gihe abaguzi ba mbere ba moto z'iyi sosiyete batahwemye kugaragaza ibibazo bya batiri bya hato na hato, Umuyobozi wayo, Tony B. Adesina, yashimangiye ko Gorilla 2.0 ikoranye ubuhanga kuko batiri zayo zakozwe mu gihe kirenga umwaka kandi zikaba ari nta makemwa.

Yagize ati 'Ubu batiri yacu ishobora kugenda ibilometero 90 itarazima, aho aharambuye ho ishobora kugenda ibilometero birenga 100.'

Nsengiyumva Emmanuel usanzwe ari umumotari mu Mujyi wa Kigali, wakoreshaga ikiragano cya mbere cy'izi moto, yatangaje ko Gorilla 2.0 iziye igihe.

Ati 'Nagendaga ibilometero hagati ya 60 na 70 nishyuye 1.680 Frw ariko ubu Gorilla 2.0 irampa ibilometero 90 nishyuye amafaranga amwe yo gushyiramo umuriro.'

Iyi sosiyete kandi yemereye abamotari bose bakoreshaga ikiragano cya mbere cy'izi moto ko bose bagiye guhindurirwa batiri zabo ku buntu ndetse banahabwe gahunda ihamye y'uburyo bizakorwamo.

Leta y'u Rwanda iherutse guteguza ko moto zikoresha lisansi cyangwa ibindi biteza imyuka ihumanya ikirere zitazongera kwandikwa mu Mujyi wa Kigali guhera tariki ya 25 Mutarama 2025.

Ubuyobozi bwa S.U.L E-Mobility bwasobanuye ko gahunda yayo yo kuzana moto za Gorilla 2.0 ijyanye no gushyigikira umurongo wa Leta y'u Rwanda wo guteza imbere serivisi yo gutwara abantu n'ibintu itangiza ikirere.

Nizeyimana Jean Pierre wahagarariye Minisiteri y'Ibidukikije mu gikorwa cyo kumurika izi moto, yasobanuye ko imwe mu mpamvu u Rwanda rwashyizeho gahunda yo kugabanya ibinyabiziga bikoresha lisansi ari uko rushaka kurengera ubuzima bw'abantu.

Ati 'Bimwe mu bitera indwara zijyanye n'ubuhumekero cyane harimo nk'indwara ya Asthma akenshi usanga biterwa n'ibinyabiziga byinshi bikoresha lisansi.'

Uwera Flora wahawe moto ya Gorilla 2.0 ndetse n'amasezerano yo kuyihagararia mu gihugu nk'umumenyekanishabikorwa mu gihe cy'umwaka, yagaragaje ko gukorana na S.U.L E-Mobility byamuteje imbere kandi ko iyi arindi ntambwe imugeza ku iterambere rirambye nk'umugore wiyemeje kwiteza imbere.

Yagize ati 'Iyi moto iroroshye kuyitwara, ntabwo igoye kuyitwara. Itanga inyungu zidasanzwe kuko ku giciro cya litiro ya lisansi kiri hejuru (1640 Frw) kimpa kugenda ibilometero biri hagati ya 40-50, ntaho bihuriye n'iyi moto ya Gorilla 2.0 impa ibilometero 90 nishyuye 1680 Frw yonyine yo gushyiramo umuriro wuzuye.'

Kimwe mu bibazo byibazwagaho na benshi cyari sitasiyo zo gushyira umuriro muri ibi binyaziga ndetse no kuba ibi binyabiziga bidashobora kurenga intara bijya mu yindi kubera ikibazo cy'izi sitasiyo ziri hake mu mujyi wa Kigali, zikaba hafi ya ntazo hanze yawo.

Ubuyobozi bwa S.U.L E-Mobility bwamaze impungenge abafite ibi bibazo binyuze mu mikoranire ya hafi na sosiyete itanga izi serivisi zo gushyira umuriro muri moto n'imodoka z'amashanyarazi yitwa EVP, iki kibazo kiri gukemuka.

Jerry Ndayishimiye ushinzwe ubucuruzi no kumenyekanisha ibikorwa bya S.U.L E-Mobility yagize ati 'Ku bufatanye bwacu na EVP, ubu hari sitasiyo 4 mu mujyi wa Kigali zikora harimo RUBIS gisimenti, Kinamba Meru, Kacyiru ugana Faisal ndetse na Meru Kimisagara.'

Yakomeje agira ati 'Hari izindi sitasiyo 9 ubu zarangije kubakwa ziteganyijwe gufungurwa muri izi ntangiriro z'umwaka harimo Miduha, Kimironko kuri Meru, gare ya Remera kuri sitasiyo ya Oryx, Nyamarimbo ya mbere, Nyamirambo ya kabiri, Kagugu, Rwezamenyo hafi na RIB, Giporoso ku muhanda uva Alpha Palace ujya Kabeza na Nyamata.

EVP iteganya kugeza sitasiyo 200 hose mu gihugu mu gihe cy'imyaka itatu, binyuze mu masezerano ifitanye na RUBIS, ORYX, MEREZ, MERU, GAS OIL, PETROL CITY, n'Umujyi wa Kigali.

Ubuyobozi bwa S.U.L E-Mobility bwatangaje ko mu mpera z'uyu mwaka wa 2025, moto zikoresha amashanyarazi zayo ziri hagati ya 4500 na 5000 zizaba zageze ku isoko ry'u Rwanda.