Blog

Abo banyamuryango barenga 300 bageze mu zabukuru bose bahabwa inkunga y'ingoboka.

Babwiye RBA ko batanze umusanzu kuva mu 2015, koperative yabo itangira maze mu 2016 baguramo inzu y'ubucuruzi ya miliyoni 30 Frw ngo ijye ibafasha kubona icyo bikenuza.

Bashinja ubuyobozi bw'iyo koperative kubarira amafaranga ku buryo ntacyo iyo nzu ibamariye kuko nta nyungu na nkeya bigeze bayibonamo.

Mukarusanga Thérèse yagize ati 'Iyo nzu ntituzi amafaranga yinjiza n'asohoka.'

Mugenzi we, Mutangana Joseph ati 'Iyo nzu twayubatse tugira ngo igire icyo itumarira ku nkunga twahabwaga na Perezida ngo twikenure.Twamaze kuyubaka tugira ngo hari icyo izatumarira ariko nta n'ifaranga na rimwe ndayiryaho. Dukeneye ubuvugizi ngo turebe ko twasaza neza.'

Abo banyamuryango kandi bavuga ko ubu bifuza ko iyo nzu igurishwa bakagabana ayivuyemo n'inyungu zagiye zivamo kuko bashaje ndetse abandi bakaba bagenda bitaba Imana.

Uwurukundo Thérèsie ati 'Baduhamagazaga mu nama za buri gihe ntizigire icyo zitumarira uretse kwica imirimo. Ndifuza ko iyi nzu igomba gushyirwa ku isoko tukagabana avuyemo ariko n'inyungu zavuyemo kuva mu 2015'.

Umuyobozi w'iyo koperative, Mukabera Vestine yavuze ko amafaranga make yagiye ava mu bukode bw'iyo nzu yagiye akoreshwa mu kuyisana, andi ahabwa abari abanyamuryango bagiye basezera.

Ati 'Hari ibihumbi 560 Frw twahaye abantu 36 bavuye muri koperative yacu. Ayo yose ni amafaranga yavaga kuri iyo nzu kandi kuva mu 2016 nta bwizigame abanyamuryango bagiye batanga, bategereza gusa ava mu bukode kandi iyo tutabonye umukiliya uyikodesha nta handi ava'.

Umuyobozi wungirije w'Akarere ka Nyamagabe ushinzwe Iterambere ry'Ubukungu, Habimana Thadée yavuze ko nk'ubuyobozi bagiye gukurikirana icyo kibazo.

Yagize ati 'Simpamya ko uko babivuga ari ko byagenze tutarajya gukora ubusesenguzi n'ubugenzuzi ngo tumenye niba ayo mafaranga barayariye. Hari igihe ugenda ugasanga habayemo ibindi bibazo abanyamuryango badasobanukiwe. Tuzagenda turebe ikibazo kirimo tubafashe'.

Inzu y'ubucurzi bubatse buri munyamuryango yayitangagaho 3500 Frw buri kwezi akuwe ku nkunga y'ingoboka igenerwa abageze mu zabukuru.

Koperative Imbere Heza VUP Gasaka igizwe n'abanyamuryango bageze mu zabukuru 348.

Abagize koperative y’abageze mu zabukuru i Nyamgabe barasaba gusubizwa amafaranga bubatsemo inzu ntibabone inyungu

Ku wa Gatanu tariki 10 Mutarama 2025, benshi mu bakurikirana imyidagaduro yo mu Rwanda bakiranye ubwuzu inkuru y’uko Mutesi Jolly ari mu rukundo n’umuherwe wo muri Tanzania.

Ntibyateye kabiri, Miss Mutesi Jolly yahise atera utwatsi urukundo rwe na Lugumi Saidi ucuruza intwaro? avuga ko Instagram yiwe yibwe bityo uwayibye akaba ariwe wanditse ko ari mu rukundo.

Ni ubutumwa bwanyujijwe ku rubuga rwa Instagram aho Lugumi yanditse ngo “Warakoze kunkunda.” Hanyuma Mutesi Jolly asubiza agaragaza ko ibintu bimeze neza.

Nyuma yagiye ku rubuga rwa X avuga ko ibiri kuri Instagram atari ukuri kuko bamwibye konti ye.

Nyamara nubwo yabivuze atyo, mu byumweru bitanu bishize, uyu mugabo yatanze igitekerezo ku mashusho ya Miss Mutesi Jolly agaragaza agatima hanyuma Jolly nawe amusubirisha akandi gatima.

Kuri iki Cyumweru tariki 12 Mutarama nabwo, Mutesi yongeye kuvuga ku by’urukundo avugwamo n’uyu muherwe, ashimira abakomeje kumuba hafi muri iki gihe benshi bakomeje kumuvugaho ibyo yita ‘ibihuha, ari nako yihaniza abari kwemeza uru rukundo.

Ati: “Urukundo ni ikintu cyiza cyane, kandi igihe cyose ruzaza mu buzima bwanjye nzarwakira nta gushidikanya kandi mu buryo bwanjye.”

Yakomeje abwira abakomeje kumuvugaho inkuru yita ibihuha, bakomeje kumwibasira bavuga ko akundana n’umuherwe, avuga ko yiteguye guhangana na bo, aboneraho no kugaragaza ko atewe ishema n’abakomeje kujya impaka z’uko akundana n’umuntu utunze agatubutse.

Ati: “Gukundana cyangwa kudakundana n’umuherwe, iyi niyo mpaka yonyine nifuza ko abantu bagira ku mugabo wanjye mu by’ukuri.”

Said Lugumi ni umucuruzi uzwi cyane ukomoka muri Tanzania. Ni nyiri Sosiyete yitwa Lugumi Enterprises, ikora ibikorwa byihariye mu by'ikoranabuhanga ryifashishwa mu iperereza (forensic ICT services) ndetse no mu gutanga ibisubizo by'imikorere mu bijyanye no gucapa (corporate printing solutions).

Umutungo nyakuri wa Said Lugumi ntaho utangazwa ku buryo wawumenya, ariko nk'umuyobozi wa sosiyete ikomeye kandi y'icyitegererezo, bikekwa ko afite umutungo ukomeye.

Mutesi Jolly yagaragaje ko atewe ishema n’urukundo akomeje kuvugwamo n’umuherwe umurusha imyaka 24 

Lugumi Saidi wateye iya mbere mu guhamya urwo akunda Miss Mutesi Jolly 

Uko umukino uri kugenda umunota ku munota;

43′ APR FC yongeye kurata uburyo ku mupira Niyomugabo Claude ahaye Niyibizi Ramadhan arekura ishoti rinyuze hejuru y’izamu kure

42′ Dusabimana Jean Claude yeretswe ikarita y’umuhondo ku ikosa yari ikoreye Nshimiyimana Yunusu

41′ Dushimimana Olivier muzungu akorewe ikosa mu rubuga rw’ikipe ye 

38′ Rachid Mapoli w’Amagaju FC ahawe booo n’abafana ba APR FC nyuma yuko yari azamutse acenga neza ariko yagera imbere y’izamu akarekura ishoti rinyuze kure 

36′ Amagaju Fc nyuma yo gusatirwa cyane nayo yarabonye uburyo imbere y’izamu ku mupira Ciza Husen Seraphin yarabonye imbere y’izamu ariko Nshimiyimana Yunusu aratabara

35′ Nyamukangagira yongeye kurata ikindi gitego cyabazwe! Ruboneka Jean Bosco ahaye umupira Tuyisenge Arsene nawe awushyira kwa Niyibizi  Ramadhan arekura ishoti rikubita igiti cy’izamu maze Dushimimana Olivier agiye gusobyamo biranga

32′ APR FC irase igitego cyabazwe ku mupira mwiza Dauda Yussif yarahaye Ruboneka Jean Bosco acenga ba myugariro b’Amagaju FC nawe awushyira kwa Tuyisenge Arsene wari usigaranye  n’umunyezamu arekura ishoti gusa Twagirumukiza Clement aratabara

30′ Mugisha Gilbert aryamye hasi ari kwitabwaho n’abaganga nyuma yuko atewe umupira mu nda

27′ Biragaraga ko abakinnyi ba APR FC batari batangira guhuza 100% muri uyu mukino,Aliou Souane yarazamuye umupira muremure ashaka Dushimimana Olivier Muzungu ariko birangira umurenganye

25′ APR FC ikomeje gushaka igitego hakiri kare, Ruboneka Jean Bosco azamuye umupira muremure abarimo Nshimiyimana Yunusu bagerageza gushyiraho umutwe ariko uba muremure urabarengana

23′ Tuyisenge Arsene abonye umupira ari mu rubuga rw’amahina arihindukiza arekura ishoti gusa umupira ukubita mu bituza bya Tuyishime Emmanuel umupira ujya muri koroneri itagize icyo itanga

21′ Pavelh Ndzira afashe umupira wa mbere kuva umukino watangira ku ishoti ryari rirekuwe na Ndayishimiye Edouard

19′ Nyuma yuko abonye ibyo guhererakanya bitari gukunda uwitwa Aliou Souane afashe umwanzuro arekura ishoti rirerire ari inyuma gusa umupira uragenda unyura hejuru y’izamu kure

16′ Aliou Souane ahaye umupira muremure Dushimina Olivier Muzungu washoboraga nawe kuwuhindura mu rubuga rw’amahina bikaba byagira icyo bibyara ariko ntiyabikora asubiza inyuma

12′ Amagaju Fc abonye kufura impande y’umurongo ugabanyamo ikibuga kabiri ku ikosa Niyibizi ramadhan yarakoreye Malanda Destin gusa itewe na Matumona ba myugariro ba APR FC bakura umupira imbere y’izamu nta nkomyi

10′ Umukinnyi w’Amagaju FC,Nkurunziza Seth  aryamye hasi aho ari kwitabwaho n’abaganga nyuma yuko agonganye nuwa APR FC

8′ Amakipe yombi nta nimwe irabona uburyo buremereye imbere y’izamu ry’indi, APR FC niyo iri kugerageza guhererekanya ariko ikabikorera mu rubuga rwayo

5′ Kiza Seraphin yarabonye umupira wa mbere imbere y’izamu rya APR FC ariko Niyibizi Ramadhan aratabaar ahita awumwaka ataragira icyo awumaza

3’  Ikipe ya APR FC niyo iri guhererekanya umupira igerageza igerageza gushaka aho yamenera

2′ APR FC ibonye uburyo bwa mbere ku mupira Mugisha Gilbert yarasunikiye mu rubuga rw’amahina  Tuyisenge Arsene nawe aragenda arekura ishoti gusa Twagirumukiza Clement umupira awukuramo

1′ Umukino utangijwe n’Amagaju FC ariko Dushimimana Olivier ahise awaka Kiza Useni seraphin

15:00′ Umukino uratangiye

14:54’Abasifuzi bagiye kuyobora uyu mukino ni Twagiramukiza Abdoul uri hagati,Karangwa Justin(umusifuzi wa mbere w’igitambaro), Nsengiyumva Jean Paul(umusifuzi wa kabiri w’igitambaro) mu gihe umusifuzi wa kane ari Kayitare David.

14:51′ Amagaju FC agiye gukina uyu mukino ubusatirizi bwayo buyobowe na Kiza Husen Seraphin umaze gutsinda ibitego 8 muri shampiyon mu gihe umukinnyi wa APR FC ufite byinshi ari Mamadou Lamine Bah n’ibitego 3

14:39′ Uyu mukino ugiye kuba nyuma yuko muri iyi Sitade n’ubundi ku munsi wejo hari hakiniwemo umukino Mukura Vs yatsinzemo Rayon Sports ibitego 2-1

14:38’Amakipe yombi arimo arishyushya mbere yuko acakiranira mu kibuga

Abakinnyi 11 ba APR FC babanje mu kibuga;Pavelh Ndzila, Niyomugabo Claude, Aliou Soaune, Nshimiyimana Yunussu, Niyigena Clement, Dauda Yussif, Ruboneka Jean Bosco, Niyibizi Ramadhan, Mugisha Gilbert Dushimimana Olivier na Tuyisenge Arsene.

Abakinnyi 11 b’Amagaju FC babanje mu kibuga;Twagirumukiza Clement ,Nkurunziza Seth,Shema Jean Baptiste,Dusabe Jean Claude,Matumona Wakonda,Tuyishime Emmanuel,Semageni Cyrille,Rachid Mapoli ,Malanda Destin,Ndayishimiye Eduard na Kiza Husen Seraphin.

Mu mukino ikipe Amagaju FC iheruka gukina muri shampiyona yatsinzwe na Rutsiro FC ibitego 2-1 naho APR FC yo yatsinze Marine FC ibitego 2-1.

Uko amakipe yombi ahagaze kugeza ubu, ikipe y’Amagaju FC iri ku mwanya wa 9 n’amanota 18, mu gihe APR FC yo iri ku mwanya wa 2 n’amanota 31.

Uyu ni uwa Gatatu ikipe y’Amagaju FC igiye gukina na APR FC kuva yakongera gukina icyiciro cya mbere mu mwaka ushize w’imikino nyuma y’uko yari yaramanutse mu Cyiciro cya Kabiri mu 2019.

Imibare yerekana ko mu mikino 11 ya shampiyona iheruka imaze guhuza aya makipe yombi,APR FC yatsinzemo 8 , Amagaju FC nta n’umwe yatsinzemo mu gihe banganyijemo 3.

Uyu mukino uhuriranye n’uko Amagaju FC arimo arizihiza isabukuru y’imyaka 90 ibayeho. Iyi kipe iri mu makipe akuze mu Rwanda yashinzwe mu 1935.

Abakinnyi ba APR FC bishyushya

Ubwo abakinnyi ba APR FC bageraga kuri sitade 

Abamaze kugera muri Sitade mpuzamahanga ya Huye biganjemo abafana ba APR FC 

Mu Ukwakira 2023 nibwo iri shuri ryafunguye amarembo i Kigali. Ni ishuri rizajya ritanga amasomo agamije guteza imbere imiyoborere myiza ku Mugabane wa Afurika.

Biteganyijwe ko umuhango wo kurifungura ku mugaragaro uzaba ku wa Kabiri tariki 14 Mutarama 2025.

Ryashibutse ku muryango African School of Governance Foundation washinzwe ku bitekerezo birimo ibya Perezida Paul Kagame, Hailemariam Desalegn wahoze ari Minisitiri w'Intebe wa Ethiopia n'abandi bakuru b'ibihugu bya Afurika.

Iteka rya Minisitiri w'Uburezi, Nsengimana Joseph, ryemerera African School of Governance, gutangira gukora mu Rwanda, rikanayiha ubuzimagatozi. Rigaragaza kandi ko rizajya ritanga amasomo y'icyiciro cya gatatu cya kaminuza.

Iri teka ryasohotse ku wa 07 Mutarama 2025, rigaragaza ko rigomba gutangira gukurikizwa ku munsi ryatangarijweho mu Igazeti ya Leta ya Repubulika y'u Rwanda.

Amosomo iri shuri rizajya ritanga ni ay'icyiciro cya gatatu cya kaminuza mu bijyanye n'Imiyoborere arimo Master of Public Administration [MPA], Master of Public Administration in Natural Resource Governance [MPA-NRG] na Master of Public Administration in Human Development [MPA-HD].

Hazajya hatangwa kandi amahugurwa y'igihe gito ku bashaka gukarishya ubumenyi mu bijyanye n'imiyoborere.

Ryitezweho kuzatanga ubumenyi bugamije gufasha Afurika kwigobotora ibibazo bitandukanye bijyanye n'imiyoborere, hahugurwa urubyiruko rutandukanye kugira ngo rugire uruhare kuri ejo hazaza.

Prof Kingsley Moghalu wahoze ari Guverineri wa Banki Nkuru ya Nigeria ni we muyobozi mukuru w'iri shuri.

Prof. Anna Lucy Mdee usanzwe ari umwarimu muri Kaminuza ya Leeds mu Bwongereza, ni we muyobozi mukuru wungirije ushinzwe amasomo, Nkurunziza Mark nawe akaba umuyobozi ushinzwe ibikorwa n'imari.

Mu bagize inama y'ubutegetsi y'iri shuri harimo Donald Kaberuka wahoze ari Umuyobozi wa Banki Nyafurika Itsura Amajyambere [BAD], Francis Gatare uherutse kugirwa Umujyanama wihariye muri Perezidansi ya Repubulika n'abandi.

Iri shuri rifite icyicaro mu nyubako yahoze ikoreramo Urwego rw'Igihugu rw'Iterambere, RDB, ku Gishushu mu Karere ka Gasabo.

Prof Kingsley Moghalu wahoze ari Guverineri wa Banki Nkuru ya Nigeria ni we muyobozi mukuru w'iri shuri

Umujyanama wa kabiri muri Ambasade y'u Rwanda mu Buhinde, Mwepesi Emile yavuze ko imikorananire myiza y'ubufatanye hagati y'u Rwanda n'u Buhinde ari yo yatumye hashyirwaho igabanyirizwa ry'igiciro mu bitaro Abanyarwanda benshi bivurizamo mu Buhinde.

Yagize ati “Umubare munini w'Abanyarwanda baza kwivuriza mu Buhinde bivuriza mu Bitaro bya Medanta biri muri Leta ya Haryana. Bahabwa igabanyirizwa rya 15% ry'ibiciro, ku bufatanye bw'ibitaro na Ambasade y'u Rwanda.”

Yakomeje avuga ko ibihugu byombi byazamuye umubano ku rwego rwo hejuru mu bijyanye n'ubufatanye mu nzego zose.

Yatangaje ko indwara ziza ku isonga mu zo Abanyarwanda bajya kwivuza mu Buhinde ari kanseri, gusimbuza ingingo zirwaye, kubagwa amagufa no kwivuza umutwe udakira.

Igiciro cyo gusimbuza impyiko muri ibyo Bitaro bya Medanta biri mu Murwa Mukuru New Delhi, kiva ku bihumbi 12$ kugeza ku bihumbi 15$ (ari hagati miliyoni 16.764 Frw na miliyoni 20.955 Frw).

Bisobanuye ko Umunyarwanda ujya gusimbuza impyiko mu Bitaro bya Medanta yagombaga kwishyura miliyoni 16.764 Frw agabanyirizwa akishyura 14.249.400 Frw, bivuze ko iyo 15% aganyarizwaho arenga miliyoni 2.5 Frw.

Mugabo Yvette ni umwe mu bagiye kuvuza umubyeyi we mu Bitaro bya Medanta binivurizamo n'abandi Banyafurika, aho avuga ko yahamaze ukwezi kumwe kandi ko serivisi bahawe kuva bagera Buhinde zari nta makemwa.

Aganira na RBA yagize ati 'Twageze ku kibuga cy'indege mu masaha ya nijoro cyane, ibitaro byohereza imodoka iza kudufata itujyana kuri hoteli ducumbitsemo. Kubera umubano mwiza igihugu cyacu gifitanye n'u Buhinde mu buvuzi, badukurikirana neza ndetse ku Banyarwanda hari igabanyirizwa ku biciro badushyiriyeho. Twasanze u Buhinde bwita ku barwayi cyane hakagira igihinduka.”

Imitangire myiza ya serivisi mu bitaro byo mu Buhinde ishingiye ku kuba ari igihugu gifite ikoranabuhanga riteye imbere mu buvuzi ndetse n'ibitaro bifite uburambe n'inzobere mu kuvura indwara zikomeye ku rwego rw'Isi.

Ubushobozi bw''bikorwaremezo by'ubuvuzi mu Buhinde bumaze igihe kinini kuko nk'Ibitaro byitwa Apollo biri i New Delhi byubatswe mu 1986 bifite abaganga ibihumbi umunani, farumasi nyinshi n'ibitanda byakira abarwayi ibihumbi 10.

U Buhinde bufite ubuvuzi buteye imbere mu ndwara zitandukanye zirimo iz'umutima, kanseri, gusimbuza ingingo, ubugororangingo, kubaga ibibyimba, kubaga umugongo n'izindi.

Abanyarwanda bari hagati ya 20 na 30 boherezwa kwivuriza mu Buhinde buri kwezi.

Abanyarwanda bivuriza mu Buhinde bemerewe igabanyirizwa rya 15%

Ni mu butumwa abatwara moto mu Mujyi wa Kigali bahawe mu mpera z'iki cyumweru, ubwo basurwaga n'Ishami rya Polisi rishinzwe umutekano wo mu muhanda (TRS) muri parikingi zitandukanye zabashyiriweho mu Mujyi wa Kigali.

Ni mu gihe kugeza ubu mu Mujyi wa Kigali kuva hatangijwe gahunda yo gushyiraho parikingi zagenewe abatwara abagenzi kuri moto, kuri ubu habarurwa izigeze ku munani zimaze gukorwa, akaba ari gahunda izakomeza hirya no hino mu gihugu.

Parikingi enye ziherereye Nyabugogo mu Karere ka Nyarugenge; ahakikije ikigo abagenzi bategeramo imodoka (Gare); indi ikaba hafi ya Gare yo mu Mujyi ahazwi nka Downtown.

Mu Karere ka Kicukiro parikingi iri ku marembo ya Gare ya Nyanza izindi ebyiri zikaba zarashyizwe mu Karere ka Gasabo; ku Giporoso ahazwi nko kuri Sabans na Kimihurura.

Umuvugizi w'Ishami rya Polisi rishinzwe umutekano wo mu muhanda; SP Emmanuel Kayigi yavuze ko parikingi zashyiriweho abatwara n'abatega moto zizafasha kunoza iyi serivisi, bigakorwa mu ituze hirindwa akajagari n'umuvundo.

Ati “Gahunda yo gushyiraho parikingi za moto yitezweho guca umuvundo n'akajagari byajyaga bigaragara bikabangamira urujya n'uruza rw'ibinyabiziga. Nk'uko ibigo abagenzi bategeramo imodoka bizwi kandi bifasha koroshya iyi serivisi, turashishikariza abatwara moto nabo kubahiriza parikingi zashyizweho bakaba arizo bategererezamo abagenzi mu rwego rwo kwirinda umuvundo bateza bazenguruka mu mihanda cyangwa baparika ahatarabigenewe.”

SP Kayigi yasabye n'abagenzi batega moto kubahiriza iyi gahunda bazitegera muri parikingi kuko biri mu bizafasha mu kurwanya gukorera mu kajagari no kurwanya imwe mu myitwatire mibi yarangaga bamwe mu bamotari nko gutwara badafite uruhushya, ubujura bwo gushikuza telefoni n'amasakoshi abagenzi, guhisha cyangwa guhindura pulake n'andi makosa atandukanye.

Aya mahugurwa agenerwa abapolisi bo ku rwego rwa ba ofisiye bato abaye ku nshuro yayo ya 15, yitabiriwe mu gihe cy'amezi atanu n'abagera kuri 45 barimo; 15 bakomoka muri Sudani y'Epfo, 21 bo muri Polisi y'u Rwanda, batatu bo mu Rwego rw'Igihugu rushinzwe iperereza n'umutekano (NISS), bane bo mu Rwego rw'Igihugu rushinzwe Ubugenzacyaha (RIB) na babiri bo mu Rwego rw'Igihugu rushinzwe Igorora (RCS).

Ubwo yasozaga aya mahugurwa ku mugaragaro, Umuyobozi Mukuru Wungirije wa Polisi y'u Rwanda ushinzwe Ibikorwa, Vincent Sano yavuze ko kubaka ubushobozi ari urufunguzo rwo kubasha guhangana n'ibiteza umutekano muke bigenda bihindura isura uko isi irushaho gutera imbere.

Ati 'Mu kazi ko gucunga umutekano ku Isi muri iki gihe, bisaba ko abakozi mu nzego zose bireba bagira ubumenyi n'ubushobozi bukenewe kugira ngo babashe guhangana n'ibiteza umutekano mucye mu bihugu byacu, mu Karere ndetse n'ahandi ku isi. Ni yo mpamvu, guverinoma y'u Rwanda na Polisi y'u Rwanda by'umwihariko, bashyira imbaraga nyinshi mu kubaka ubushobozi.'

Yakomeje avuga ko 'Amahugurwa musoje uyu munsi ni ingenzi kuri Polisi y'u Rwanda, Polisi ya Sudani y'Epfo no kuri mwe ubwanyu by'umwihariko. Kuba muyasoje neza ni ibyo kwishimira mutekereza ku rugendo mwanyuzemo, ubuyobozi bw'ishuri, inteko y'abarimu na bagenzi banyu mwafatanyije amahugurwa.'

Sano yabasabye kuzihatira gushyira mu bikorwa intego z'aya mahugurwa no gukomeza kurangwa n'ishyaka n'imyitwarire myiza kugira ngo babashe kuzuza neza inshingano zabo no gutanga umusaruro.

Ati 'Aya mahugurwa agamije kongerera abayitabira ubumenyi bujyanye no gutekereza, gutegura no gukora akazi ko gucunga umutekano mu buryo burenze ubusanzwe bukoreshwa kandi bujyanye n'igihe. Hari icyizere ko ubumenyi n'ubushobozi muyungukiyemo bikubiye hamwe n'imyitwarire myiza n'ishyaka byabaranze bizabafasha gukora neza akazi aho muzaba mwoherejwe gukorera no kurushaho gutanga umusaruro.'

Ba Ofisiye 45 basoje amahugurwa ku mikorere ya kinyamwuga n'ubuyobozi

Akarere ka Ngoma ni kamwe mu twubatswemo ibikorwaremezo byinshi muri iyi myaka ya vuba byanatumye gahinduka nyabagendwa.

Ibyo bikorwaremezo birimo stade, hoteli, imihanda myiza ya kaburimbo izenguruka aka Karere, umuhanda ugahuza na Bugesera n'ibindi byinshi.

Nubwo bimeze gutyo, umuntu wagendereye aka karere agorwa no kubona imodoka mu masaha ya nimugoroba, kuko nyinshi mu modoka zitwara abagenzi Saa Kumi n'Ebyiri ziba zisoje, izindi zikarangiza gutwara abagenzi saa Moya zuzuye, nyuma yaho biragoye ko wabona imodoka igutwara.

Umwe mu baturage IGIHE yasanze muri gare ya Ngoma yagize ati 'Biratangaje kubona umuntu aje gutega agiye Kayonza cyangwa i Kigali kuva Saa 18:30 kugeza nka saa Moya akaba atabona imodoka, ni ibintu bibabaje cyane umujyi nk'uyu wakabaye wagutse ku buryo igihe cyose umuntu aziye yakabonye imodoka imutwara.'

Umumotari witwa Nshimiyimana umaze igihe kinini akorera muri aka karere yavuze ko hari abagenzi benshi bakura mu byaro babageza muri gare bagasanga ahantu hose bafunze ku buryo nta modoka babona.

Yasabye ubuyobozi kugerageza gukorana n'abikorera hakaboneka imodoka zishobora gukomeza gutwara abantu kugeza nibura Saa Tatu z'ijoro.

Tuyisenge Emmanuel we yagize ati 'Iyo ugeze hano muri gare saa Moya z'ijoro nta modoka wahabona, ni ibintu bibangamye cyane kuko urumva iyo uje muri gahunda zawe muri Ngoma bigusaba kwicara ucungana n'amasaha bikanatuma udakora ibyo wateguye utuje kuko kuva Saa Kumi n'Ebyiri imodoka abantu batangira kuzirwanira kuko mu minota mike zihita zibura.'

Tuyisenge yavuze ko uku kubura kw'imodoka binatuma Umujyi wa Ngoma ukonja hakiri kare ku buryo ngo saa Moya z'ijoro ahantu hose baba banatangiye gufunga. Yavuze ko ari ibintu ubuyobozi bukwiriye kwigaho bigahindurwa kuko bituma aka gace kadatera imbere.

Umuyobozi w'Akarere ka Ngoma wungirije ushinzwe Iterambere ry'Ubukungu, Mapambano Nyiridandi Cyriaque, yabwiye IGIHE ko iki kibazo bakizi ndetse banatangiye kuganira na ba rwiyemezamirimo mu rwego rwo gushaka ibisubizo birambye.

Ati 'Natwe ikibazo twarakibonye ariko nk'uko mubizi twari tumaze igihe dushyiramo ibikorwaremezo mu Mujyi wa Ngoma, hari no kubakwa umuhanda ujya Bugesera ubu naho hamaze kujyamo imodoka zijya za Sake ziturutse i Kigali. Twakoranye inama na ba rwiyemezamirimo bakoresha imodoka zitwara abagenzi kugira ngo batangire gutekereza mu buryo bwagutse, abantu be kumva ko kurenza saa Moya uri i Ngoma ari ikibazo.'

Yavuze ko kuri ubu bari mu biganiro na ba rwiyemezamirimo kugira ngo bongere amasaha ku buryo imodoka zakongerwa amasaha zikoreraho kugeza saa Tatu z'ijoro cyangwa saa Yine. Yijeje abaturage ba Ngoma ndetse n'abagenderera aka Karere ko mu minsi mike iki kibazo kizaba cyakemutse burundu.

Abakorera n'abagenderera Akarere ka Ngoma babangamiwe no kuba nyuma ya saa Moya z'ijoro babura imodoka