Blog

Yabitangaje ku wa 13 Mutarama 2025 ubwo yatangizaga ku rwego rw'Igihugu ibikorwa by'urugerero rw'abasoje amashuri yisumbuye biswe Inkomezabigwi mu kiciro cya 12.

Byatangirijwe mu Karere ka Kamonyi mu Murenge wa Runda, hashyirwa ibuye ry'ifatizo aho intore z'ako karere zizubaka isoko rito, irerero n'inzu izatangirwamo serivisi z'ikoranabuhanga rishingiye kuri internet.

Dr. Bizimana yavuze ko urugerero rufasha urubyiruko rusoje amashuri yisumbuye kwanga umugayo no gukunda umurimo nk'indangagaciro baba bakwiye gukomezanya, icyakora avuga ko hakiri ikibazo cy'ubwitabire budahagije.

Ati 'Mu myaka yashize hakunze kugaragara ikibazo cy'ubwitabire buke kandi abana bose basoje amashuri yisumbuye baba bagomba kurwitabira ariko hari abataza. Ni yo mpamvu ubu twazanyemo impinduka yo kubahuriza hamwe muri buri karere mu itorero ryihariye ritegura urugerero ryabaye mu mpera za Ukuboza 2024 rimara iminsi itatu.'

Yavuze ko byazanye impinduka nziza kuko abanyeshuri babashije gusobanurirwa neza urugerero na gahunda ziteganyijwe babasha kumva ibyo bazakora.

Yavuze muri uyu mwaka bazakurikirana uko urubyiruko rwitabira n'ibyo rukora bafatanyije n'inzego z'ibanze, aboneraho gusaba ababyeyi kumva neza akamaro k'urugerero bityo bakarukundisha urubyiruko.

Ati 'Ababyeyi bagomba kumva akamaro ka gahunda y'urugerero kuko iyo bamaze kuyumva bayumvisha abana babo. Nta mubyeyi byashimisha kugira umwana wirirwa imbere ya televiziyo cyangwa kuri telefone kuva mu gitondo kugeza nijoro. Iyo bagiye ku rugerero bibafasha kubona ubundi bumenyi ariko bikanabarinda ibibarangaza bavana ku mbuga nkoranyambaga bitari byiza.'

Niyonkuru Patience uri mu bazitabira urugerero yavuze ko rubafasha guhugira mu byubaka urubyiruko kandi byubaka b'Igihugu.

Ati 'Kuza mu rugerero bituma hari izindi ngeso mbi tutajyamo kuko tutazibonera umwanya ahubwo dufatanya n'abandi, nko gufasha abatishoboye. Bidufasha kandi gushyira mu bikorwa ibyo twize kuko harimo nk'ababa barize ubwubatsi bakabukoresha.”

Akarere ka Kamonyi kamaze imyaka ine yikurikiranya kaza imbere mu kwitabira ibikorwa by'urugerero ku bwinshi, aho muri uyu mwaka gafite abazarukora bose hamwe bangana na 1596.

Ku rwego rw'igihugu abatangiye urugerero rw'Inkomezabigwi icyiciro cya 12 kuri uyu wa 13 Mutarama 2025 ni 69.270, bigateganywa ko bazasoza ku wa 28 Gashyantare 2025.

MINUBUMWE igaragaza ko kuva mu 2013 urugerero rwatangira, rumaze gukorwa n'abagera ku 559.686.

Minisitiri w'Ubumwe bw'Abanyarwanda n'Inshingano Mboneragihugu, Dr.Bizimana Jean Damascène yasabye ababyeyi kumva neza akamaro k'urugerero bityo bakarukundisha urubyiruko

Minisitiri w'Ubumwe bw'Abanyarwanda n'Inshingano Mboneragihugu, Dr.Bizimana Jean Damascène ari kumwe na Guverineri w’Intara y’Amajyepfo, Kayitesi Alice, mu gutangiza urugerero ku rwego rw’igihugu. Igikorwa cyabereye mu Karere ka Kamonyi

Meya wa Kamonyi, Dr. Nahayo Sylvere na we yeretse urubyiruko ibyiza by’urugerero

Minisitiri Dr. Bizimana ubwo yatangizaga ku rwego rw’Igihugu ibikorwa b’urugerero rw’Inkomezabigwi icyiciro cya 12

Abari ku rugerero mu Karere ka Kamonyi bazakora imirimo itandukanye nko kubaka isoko rito, irerero n'inzu izatangirwamo serivise z'ikoranabuhanga rishingiye kuri internet

Akarere ka Kamonyi gafite abazakora urugerero bangana na 1596

Intore ziri ku rugerero zerekanye ubumenyi zimaze kunguka ku bijyanye n’uburere mboneragihugu

Ministriri Dr. Bizimana ashimira uwari ahagarariye izindi ntore zo mu Karere ka Kamonyi, ahatangirijwe urugerero rudaciye ingando ku rwego rw’igihugu

Niyonkuru Patience uri mu bazitabira urugerero rw'Inkomezabigwi icyiciro cya 12 yavuze ko rubafasha guhugira mu byubaka urubyiruko kandi byubaka b'igihugu

Ni amakuru yatangajwe n'Ibiro by'Umukuru w'Igihugu, ku mugoroba wo ku wa 13 Mutarama 2024, mu itangazo ryavugaga ko bahuriye i Abu Dhabi muri Leta Zunze Ubumwe z'Abarabu.

Aba bayobozi bombi bitabiriye inama ya 'Abu Dhabi Sustainability Week' igamije kurebera hamwe uburyo bwo kongera ubufatanye mu guhangana n'ingaruka z'ihindagurika ry'ibihe, inzitizi zigashakirwa ibisubizo.

Muri iyi nama, hanafatwa ingamba zigamije guteza imbere ikoreshwa ry'ingufu zisubira kandi zitangiza ikirere.

Hazanarebwa ku ikoranabuhanga rigezweho, ryafasha ibihugu bitandukanye kurushaho kugana muri uyu murongo wo kurengera ibidukikije no guhangana n'ingaruka z'ihindagurika ry'ibihe.

U Rwanda na Nigeria bifatanya mu bya dipolomasi, politiki n'ibindi. Bifitanye amasezerano mu ngeri z'ingenzi zirimo imikoranire mu by'umutekano, ibijyanye no gutwara abantu n'ibintu mu ndege, n'ay'ubufatanye mu bya tekiniki aho abaganga bo muri Nigeria bafatanya n'abo mu Rwanda mu kubungabunga ubuzima bw'abaturage.

Umubano w'u Rwanda na Nigeria kandi urangwa n'ibintu byinshi birangajwe imbere no gushyigikirana mu ngeri zitandukanye.

Nko ku wa 29 Gicurasi 2023 Perezida Kagame yifatanyije n'abakuru b'ibihugu n'abandi bayobozi bo hirya no hino muri Afurika no hanze yayo mu birori by'irahira rya Perezida wa 16 wa Nigeria, Bola Tinubu.

Tinubu yari yatsinze amatora ya perezida yabaye muri Gashyantare 2023, aho yatowe n'abantu miliyoni 8,8 ahita asimbura Muhammadu Buhari wari usoje manda ze ebyiri.

Biteganyijwe ko Perezida Kagame kandi azitabira ibirori byo gutanga ibihembo bizwi nka 'Zayed Sustainability Prize awards' bigiye gutangwa ku nshuro ya 16.

Ibi bihembo bitangwa na UAE, bigamije kuzirikana abagira uruhare mu guhanga udushya no kurema ibisubizo bigamije guhangana n'ingaruka z'ihindagurika ry'ibihe.

Ibigo bito n'ibiciriritse n'imiryango itegamiye kuri leta ni bamwe mu bahabwa ibi bihembo.

Perezida Kagame kandi azageza ijambo ku bandi bayobozi n'abakuru b'ibihugu, ku munsi wa mbere w'iyi nama.

Perezida Paul Kagame yahuye na mugenzi we wa Nigeria, Bola Ahmed Tinubu, aho bitabiriye inama ya 'Abu Dhabi Sustainability Week' igamije kongera ubufatanye mu guhangana n'ingaruka z'ihindagurika ry'ibihe

Perezida Paul Kagame yahuye na mugenzi we wa Nigeria, Bola Ahmed Tinubu baganira ku ngingo zitandukanye

Ibaye Album ya kabiri uyu mukobwa agiye gushyira ku isoko nyuma ya 'My Dreams' yamurikiye Abakunzi be muri Nyakanga 2023. Kuva icyo gihe kugeza n'uyu muhanzi iri ku mbuga zitandukanye zicururizwaho umuziki. 

Bwiza avuga ko mu rwego rwo kuyishyira ku isoko mu buryo bwiza yahisemo kuzamurikira iyi Album mu Mujyi wa Bruxelles mu Bubuligi, ku wa 8 Werurwe 2025.

Ni mu gitaramo cya mbere agiye kuhakorera, aho azataramana n'abahanzi bavugwamo nka The Ben. Ni igitaramo avuga ko yateguye abifashijwemo na Sosiyete ifasha abahanzi ya Team Production ihagarariwe n'abarimo Justin.

Bwiza yavuze ko yahisemo kwita iyi Album '25 Shages' 'Kubera ko ngejeje imyaka 25 y'amavuko'. Ati 'Ni impamvu nyinshi zatumye nita Album yanjye '25 Shades' kubera ko kuva nkiri muto, ndi umwana wakuranye inzozi nyinshi cyane numvaga nzageraho kandi nkagera ku ntsinzi mbifashijwemo nanjye ubwanjye, umuryango wanjye, Imana, ndetse n'igihugu cyanjye.'

Uyu mukobwa yavuze ko ubwo azaba akora iki gitaramo tariki 8 Werurwe 2025, azaba yizihiza imyaka 25 izaba ishize abonye izuba. Ati 'N'iyo mpamvu nzaba ndimo kwizihiza (iyi sabukuru) bimwe mu byo ngenda ngeraho kuva nkiri muto, kugeza uyu munsi mbifashijwemo namwe.'

Bwiza yatumiye abatuye mu Mujyi wa Bruxelles no mu nkengero kuzitabira igitaramo cye bwite, kandi avuga ko azaba ari kumwe n'abandi bahanzi bakoranye azatangaza mu gihe kiri imbere.

Umujyanama wa Bwiza, Uhujimfura Jean Claude yabwiye InyaRwanda, ko bajya guhitamo ririya zina ahanini batekereje ku buzima bw'imyaka isatira itatu ishize uyu mukobwa ari mu muziki babihuza kandi n'imyaka 25 izaba ishize abonye izuba.

Ati '25 Shades twayikoze dushaka kwerekana Bwiza w'imyaka 25 mu mpande z'ubuzima bwose. Bwiza w'umuhanzikazi uyu munsi, Bwiza uba mu buzima bw'abaturage utera ibiti, Bwiza ukoze ubukangurambaga, Bwiza wakinnye mu ikipe y'Igihugu ya Basketball y'abato uyu munsi hakaba hari abandi bamufatiraho urugero. Rero, ni Bwiza w'imyaka 25 mu mpande zose z'ubuzima bwe.'

Uhujimfura yavuze ko mu myaka 25 ishize Bwiza abonye izuba, harimo urugendo rw'umuziki n'ubuzima busanzwe 'ari nabyo bizumvikana mu ndirimbo 12 zigize Album ye'.

Bwiza aherutse kubwira Televiziyo Rwanda binyuze mu kiganiro 'Versus', ko ubwo yinjiraga mu muziki Nyina yamusabye guhora yiragiza Imana.

Ati 'Nibuka cyane inama za mama na data, ubundi data yifuzaga kuzaba umunyamuziki njya kuza muri muzika rero yarambwiye ati ugiye kubaho mu nzozi zanjye kuko nabyifuje kera uzabikore neza ntibizaguhindure uwo uriwe, uzagume mu murongo wawe.'

'Mama wanjye kubera ko ari umukirisitu cyane yarambwiye ati sinzigere njya kure y'Imana cyangwa ngo njye mu bindi nibagirwe Imana. Nyogokuru yansabye kubahesha ishema.'

Bwiza ari mu muziki kuva ku wa 29 Mutarama 2019, ndetse ibihangano bye birenga 59 amaze gushyira ku muyoboro we wa Youtube byarebwe n'abantu barenga Miliyoni 28. Ni mu gihe afite aba-Subscribers barenga ibihumbi 339.

Bwiza yatangaje ko agiye kumurika Album ye ya Kabiri yise “25 Shades”

Bwiza yavuze ko azataramira mu Bubiligi tariki 8 Werurwe 2025 yizihiza imyaka 25 ishize ari mu muziki  

Bwiza yavuze ko Album ye yayise “25 Shades” mu rwego rwo kumvikanisha impande zose zigize ubuzima bwe 

Bwiza aherutse gutangaza ko yaragije Album ye Coach Gael ndetse n’umuhanzikazi Tonzi

KANDA HANO UBASHE KUREBA INDIRIMBO 'BEST FRIEND' BWIZA YAKORANYE NA THE BEN

“>

Abapolisi bahawe impanuro n'Umuyobozi mukuru wa Polisi Wungirije Ushinzwe Ibikorwa, CP Vincent Sano, bagize itsinda rizaba ryitwa RWAFPU3-7 ririmo abagore 85 n'abagabo 75.

Mu butumwa Polisi y'u Rwanda yanyujije ku rukuta rwa X, yavuze ko abahuguwe bagiye gusimbura abari bamaze umwaka mu kazi.

Iti 'Umuyobozi mukuru wa Polisi wungirije ushinzwe ibikorwa, CP Vincent Sano arimo guha impanuro itsinda ry'abapolisi 160 rigizwe n'ab'igitsina gore benshi bitegura kujya mu butumwa bw'Umuryango w'abibumbye bwo kubungabunga amahoro mu gihugu cya Sudani y'Amajyepfo. Iritsinda ryahawe impanuro rizasimbura irindi rimaze igihe cy'umwaka muri ubyo butumwa.'

Iri tsinda ry'abapolisi rishya rizagenda riyobowe na SSP Donata Nyinawumuntu.

Barasimbura itsinda RWAFPU3-6 rigizwe n'umubare munini w'abapolisikazi, riyoborwa na Senior Superintendent of Police (SSP) Angelique Uwamariya, ndetse muri Nzeri 2024 ryambitswe imidali y'ishimwe ry'akazi.

Ubwo bambikwaga iyo midali, SSP Uwamariya yashimiye UNMISS, ahamya ko bakomeje gushyira imbaraga nyinshi mu gucunga umutekano w'abaturage b'abasivili, babifatanya n'ibikorwa byo guteza imbere imibereho myiza yabo no kurwanya icyo ari cyo cyose gishobora kubangamira uburenganzira bw'ikiremwamuntu n'ishyirwa mu bikorwa ry'amasezerano y'amahoro, ashimira abapolisi ayoboye uko babyitwayemo badakanzwe n'imbogamizi bagiye bahura na zo.

Itsinda RWAFPU3-6, mu mwaka rimaze mu butumwa, ryatanze umusanzu wo guhugura abapolisi bo mu gihugu cya Sudani y'Epfo mu byerekeranye no kugarura ituze rusange na tekiniki za Polisi zifashishwa mu bikorwa byo gufata no gufunga abakekwaho ibyaha.

Itsinda rigiye kujya muri Sudani y’Epfo riyobowe na SSP Donata Nyinawumuntu

Bahawe impanuro n’Umuyobozi wa Polisi Wungirije ushinzwe ibikorwa, CP Vincent Sano

Abapolisi bagiye kujya mu butumwa bw’amahoro muri Sudani y’Epfo barimo abagore benshi ugereranyije n’abagabo

Umukuru w'Igihugu yakiriwe n'Umunyamabanga wa Leta muri Minisiteri y'Ububanyi n'Amahanga, Sheikh Shakhboot Nahyan Al Nahyan.

Kuri uyu wa Kabiri, Perezida Kagame ari bwifatanye na Perezida wa UAE, Sheikh Mohamed bin Zayed Al Nahyan n'abandi bayobozi b'ibikuru b'ibihugu, abafata ibyemezo, abahagarariye ibihugu byabo n'abandi bitabiriye iyi nama.

Perezida Kagame kandi azitabira ibirori byo gutanga ibihembo bizwi nka 'Zayed Sustainability Prize awards' bigiye gutangwa ku nshuro ya 16. Ibi bihembo bitangwa na UAE, bigamije kuzirikana abagira uruhare mu guhanga udushya no kurema ibisubizo bigamije guhangana n'ingaruka z'ihindagurika ry'ibihe. Ibigo bito n'ibiciriritse n'imiryango itegamiye kuri leta ni bamwe mu bahabwa ibi bihembo.

Perezida Kagame kandi azageza ijambo ku bandi bayobozi bakuru b'ibihugu, ku munsi wa mbere w'iyi nama.

Iyi nama ihuriza hamwe abayobozi batandukanye, imiryango itari iya leta, abahanga mu by'ihindagurika ry'ibihe, inzego z'abikorera, abahanga ibishya, abashakashatsi n'abandi.

Igamije kurebera hamwe inzitizi zigihari mu guhangana n'ingaruka z'ihindagurika ry'ibihe, inzitizi zigashakirwa ibisubizo. Kimwe mu bibazo bikomeye bihari, ni uko igipimo cy'ubushyuhe ku Isi gikomeje kwiyongera.

Urugero, umwaka wa 2024 ni wo mwaka woherejwemo imyuka myinshi yangiza ikirere, ndetse ni na wo mwaka washyushye cyane kurusha indi yose, kuva ibipimo by'ubushyuhe byatangira gupimwa.

Muri iyi nama, hanafatwa ingamba zigamije guteza imbere ikoreshwa ry'ingufu zisubira kandi zitangiza ikirere, hakarebwa ku ikoranabuhanga rigezweho, ryafasha ibihugu bitandukanye kurushaho kugana muri uyu murongo.

Perezida Kagame yageze muri Abu Dhabi muri Leta Zunze Ubumwe z’Abarabu

Perezida Kagame yagiranye ibiganiro n’Umunyamabanga wa Leta muri Minisiteri y’Ububanyi n’Amahanga, Sheikh Shakhboot Nahyan Al Nahyan

Perezida Kagame yakiriwe mu cyubahiro gikwiriye Umukuru w’Igihugu

The Ben yakunze kumvikana cyane ashima uruhare Uncle Austin yagize mu rugendo rwe rw'umuziki nk'umuhanzi wigenga. Ndetse mu myaka 15 ishize bakoranye indirimbo bise 'Tugumane' yamamaye mu buryo bukomeye, ariko kuva kiriya gihe ntibongeye guhurira mu bihangano. 

Uncle Austin usanzwe ari umunyamakuru wa Kiss Fm, yabwiye InyaRwanda ko bifashe imyaka 15 kugira ngo yongeye gukorana na The Ben ahanini bitewe n'inshingano za buri umwe no kuba The Ben yarakoreraga cyane umuziki muri Leta Zunze Ubumwe za Amerika.

Yavuze ko iyi indirimbo iri mu zigize Album ye ya nyuma ya Kane agiye gushyira hanze mbere y'uko ahagarika umuziki. Avuga ko ibi byanatumye ahitamo guha umwanya umuhanzi mushya witwa Lloav uririmba muri iyi 'Mon Coeur' yakoranye na The Ben.

Ati 'Nk'ibisanzwe intego nihaye ni iyo kuzamura abahanzi bashya, niyo mpamvu rero muri iyi ndirimbo yanjye nashyizemo Lloav kandi ubona ko yabikoze neza. Uretse iyi ndirimbo nshyize hanze nakoranye na The Ben, hari n'izindi zirenga ebyiri twakoranye nazo zizasohoka muri uyu mwaka.'

Ku wa 4 Ukwakira 2024, Uncle Austin wamamaye mu ndirimbo zirimo nka 'Nzakwizirikaho', 'Ndagukunda nzapfa ejo', yifashishije konti ye ya Instagram, yagaragaje ko agiye gusohora Album yise 'London', izina risanzwe rifitwe n'umukobwa we.

Yavuze ko ashingiye ku bikorwa amaze gukora mu muziki, ndetse n'urugendo rw'abo yagiye afasha mu bihe bitandukanye, iyi Album ishyize akadomo ku rugendo rwe rw'umuziki. Yavuze ko yayitiriye umukobwa we kubera ko 'Iyo utarabyara ntumenya urukundo'. Ati 'Ni igisobanuro cy'urukundo kuri njye.'

Uncle Austin yavuze ko iyi Album izaba iriho indirimbo 12, ndetse hariho izo yakoranye n'abahanzi banyuranye bo mu bice bitandukanye. Avuga ko abahanzi yifashishijeho ari ubwa mbere bakoranye, kuko atigeze yiyambaza cyane abo bakoranye mu bihe bitandukanye.

Uyu mugabo yavuze ko iyi Album ayiteguye mu gihe cy'imyaka ibiri, kandi ijonjora ry'indirimbo yakubiyeho ntiryamworoheye, kuko hari nyinshi zasigaye.

Ati 'Ni Album nagiye nkora ntaragira igitekerezo cy'uko ariyo Album yanjye ya nyuma. Icyabaye ni uko hari indirimbo narangije gukora, nzikura kuri Album none nkaba ntazazisohora, nafashe izindi nongeraho izindi.'

Indirimbo zarangiye ntabwo zose zajya kuri Album. Mfite indirimbo nka 50, ni ukuvuga ngo nyuma yaho sinzi niba nzazitanga cyangwa nkazigabira abantu.'

Uyu mugabo usanzwe akorera Kiss Fm, yavuze ko indirimbo ziri kuri iyi Album zakozwe n'abarimo Producer Element, Prince Kiiiz, Roda, Nessim n'abandi bari hagati ya batandatu ndetse n'umunani.

Yavuze ko ataramenya niba buri ndirimbo iri kuri iyi Album izasohokana n'amashusho yayo 'kuko sindabona amafaranga yo kuzikora zose.

Uncle Austin yatangaje ko imyaka 15 yari ishize adakorana indirimbo na The Ben ahanini bitewe n'inshingano za buri umwe

 

Uncle Austin yavuze ko indirimbo yakoranye na The Ben iri mu zigize Album ye ya nyuma ya Kane 

Uncle Austin yongeye gufata akaboko abahanzi bashya, agaragaza impano ya Lloav waririmbye mu ndirimbo ye

 

Austin avuga ko agiye gushyira hanze Album ye ya kane izaba ariyo ya nyuma akoze mu rugendo rwe rw'umuziki. Avuga ko idasanzwe kuri we, kuko ipfundikiye umuziki we, kandi ifite igisobanuro kinini kuko yayitiriye umukobwa we 

KANDA HANO UREBE AMASHUSHO Y'INDIRIMBO 'MON COEUR' YA UNCLE AUSTIN, THE BEN NA LIOAV

“>

Isoko rya Kibungo ni rimwe mu masoko amaze igihe kinini, kuri ubu iyo uryinjiyemo usanga hari zimwe mu nzu zisa nabi, izindi zararobotse amasima.

Abacururiza muri izi nzu z'isoko babwiye IGIHE ko bahura n'ibihombo biterwa no kuva kwazo ndetse n'ibindi bibazo bigendanye no kuba zishaje.

Uwamahoro Usher ucururiza muri iri soko yavuze ko inzu bakoreramo ziva, sima zikaba zarashaje kandi n'amarange akaba ari aya kera ku buryo bituma bakorera ahantu hari umwanda mwinshi.

Yavuze ko kandi banafite ikibazo cy'umuriro ushiramo hagashira iminsi ibiri batari bagurirwa undi kuko ngo ugurwa n'ubuyobozi bw'Akarere.

Furaha Venantie we yavuze ko benshi bakorera muri izi nzu bazijyamo zarangiritse bikaba ngombwa ko bazisanira, bagasiga amarange ndetse bakanasana ibyangiritse byose ariko ngo akarere ntikabasubize amafaranga baba bakoresheje.

Ati 'Twifuza ko bajya badusubiza ayo mafaranga yacu tuba twakoresheje. Ku bijyanye no kuba inzu ziva rero, zirava cyane cyane nk'ubu njye nometsemo ibintu bihafata, abayobozi baje kuhareba batubwira ko bazahadukorera ariko ntabwo baraza. Ni ibintu biduhombya kuko iyo amazi aviriye imyenda yacu ijyamo ibizinga tugahomba.'

Kwihangana Promesse we yagize ati 'Hano harava cyane ku buryo amazi ateza ibibazo ku bicuruzwa, twagerageje kwisanira ariko si ibintu birambye. Urumva niba inzu iva amazi akaba yakwinjira mu muceri cyangwa mu kawunga biguteza igihombo, iyo umuriro ubuze iyo minsi ibiri ku mugoroba nta bakiliya tubona kandi binongera abajura. Turasaba ubuyobozi kudukemurira ibi bibazo.'

Umuyobozi w'Akarere ka Ngoma wungirije ushinzwe Iterambere ry'Ubukungu, Mapambano Nyiridandi Cyriaque, yabwiye IGIHE ko ibibazo byose biri muri iri soko babizi ndetse banashyizeho itsinda ribisesengura, avuga ko bakiri gushaka ingengo y'imari kugira ngo babikemure.

Yagize ati 'Isoko ryacu ni irya kera rimaze igihe tugenda turisana sana n'ubu tugiye kongera kurisana. Turimo no gushaka igisubizo kirambye cyo kuba twariha abikorera bakaba barikora mu buryo abandi bo mu turere twa Muhanga, Musanze n'ahandi bagiye bakora amasoko yaho, ni umushinga ukiri gutekerezwaho. Abari kurikoreramo rero twababwira ko turi gushaka ingengo y'imari yo kubaterera iryo range, gusana ahava n'ibindi.'

Visi Meya Mapambano yavuze ko hari abakozi b'Akarere basuye iri soko banamenya ibibazo byose biririmo. Yijeje abarikoreramo ko mu minsi mike bizakemurwa.

Ku bijyanye n'ikibazo cy'umuriro yavuze ko bagiye gukorana na komite y'isoko ku buryo uzajya ugurwa undi urimo utari washiramo.

Abacururiza mu isoko rya Ngoma bashinje ubuyobozi bw'akarere imikorere idahwitse ibahombya

Izi nzu zarangiritse cyane

Zimwe mu nzu z'iri soko zarangiritse cyane bitewe no kuba ziva

Ibi yabitangarije kuri Televiziyo y'Igihugu ubwo haganirwaga ku byaranze ikiganiro Perezida Paul Kagame yagiranye n'abanyamakuru mu cyumweru gishize.

Ku ngingo ijyanye no gusimbuza abayobozi bagize Guverinoma bamwe bataramara kabiri muri izo nshingano, Perezida Kagame yavuze ko impinduka zose zikorwa zishingiye ku nyungu z'abaturage; ibituma igihe abona zikenewe ahita azikora hatitawe ku zindi mpamvu izo ari zose.

Senateri Uwizeyimana Evode yavuze ko zimwe mu impamvu zituma hari abayobozi muri Guverinoma basimbuzwa batamazemo kabiri, harimo no kuba hari abagirirwa icyizere bagatangira kwirebaho cyane.

Ati 'Ubundi minisitiri aba ashinzwe gukorera rubanda. Ariko hari ubwo agenda ukagira ngo minisiteri ni iye akayitiranya n'umutungo we. Hari nubwo umuntu aremera mu nshingano noneho agakuza izina rye aho gukuza ibyo akora ngo bigaragare. Ibyo bijya bibabaho mu buyobozi kandi Umukuru w'Igihugu aba abibona'.

Senateri Uwizeyimana yavuze kandi ko hari abayobozi bananirwa inshingano bitewe no kwizererera cyane mu bumenyi bwo mu ishuri bafite ntibakorane n'abandi.

Ati 'Ugasanga nk'umuntu araje aje kuba minisitiri ariko yigirira icyizere bikabije adashaka gukorana n'abo asanze. Nyamara hari ibyihutirwaga mu gukora, ibyatangiye n'ibyategereza abo asanze baba bafiteho amakuru. Abantu bakora neza ni abakorerea hamwe nubwo nka ministiri aba ari we uri ku ruhembe kuko ari we perezida yahaye inshingano'.

Yakomeje ati 'Hari n'abaza bavuye muri kaminuza zikomeye ku Isi bagomba kuba ari abahanga bitewe n'aho bize. Hari igihe aza mu rwego rumurusha imbaraga za politiki ariko rutamurusha ubwenge. Ibyo abantu bajya baza bakabigwamo, intege nke zikaba ari bo zigaragaraho'.

Senateri Uwizeyimana Evode yavuze ko hari abayobozi muri Guverinoma batamara kabiri bitewe no kwirebaho

Ni icyemezo cyatangajwe kuri uyu wa Mbere tariki 13 Mutarama 2025, n'Ibiro bya Minisitiri w'Intebe.

Jean-Guy Afrika asimbuye kuri uyu mwanya Francis Gatare wagizwe Umujyanama wihariye muri Perezidansi ya Repubulika ku wa 20 Ukuboza 2024.

Yari asanzwe akorera Banki Nyafurika y'Iterambere, African Development Bank.

Kuva mu 2006-2008 Afrika yari Umuyobozi mukuru ushinzwe guteza imbere ibyoherezwa mu mahanga mu cyahoze ari Ikigo cy'igihugu gishinzwe ishoramari no guteza imbere ibyoherezwa mu mahanga, RIEPA. Iki kigo cyaje guhuzwa na RDB mu 2008.

Kuva mu 2008-2010 yagizwe inzobere ishinzwe gusesengura ingamba na politike, umwanya yavuyeho ajya gukorera AFDB, aho yatangiye akora nk'inzobere ishinzwe politike y'ubuhinzi.

RDB ni urwego rwashyizweho n'Itegeko nº 46/2013 ryo ku wa 16/06/2013. Ifite inshingano zo kwihutisha iterambere ry'ubukungu mu Rwanda hashyigikirwa iterambere ry'urwego rw'abikorera.

Ifite kandi inshingano zo kugira uruhare mu gutegura no gushyira mu bikorwa politiki n'ingamba bigamije kwihutisha ibikorwa byose by'iterambere ry'ubukungu no gufasha Leta n'urwego rw'abikorera kubigiramo uruhare rugaragara, gushyira mu bikorwa politiki n'ingamba bigamije guteza imbere ishoramari ry'abenegihugu n'iry'abanyamahanga mu Rwanda hagamijwe kwihutisha iterambere ry'ubukungu.

Mu bindi ishinzwe harimo gushyira mu bikorwa politiki n'ingamba bigamije guteza imbere ibijyanye no kohereza ku masoko yo mu karere n'ayo ku rwego mpuzamahanga ibicuruzwa na serivisi byongerewe agaciro, uretse ibiri mu nshingano z'izindi nzego; guteza imbere urwego rw'ubukerarugendo, kugira uruhare mu kugena no gushyira mu bikorwa politiki n'ingamba birebana n'ubukerarugendo no kubungabunga pariki z'Igihugu n'ahandi hantu hakomye mu birebana n'ubukerarugendo.

Jean-Guy Afrika yagizwe Umuyobozi Mukuru wa RDB