Blog

Ibi babigaragaje mu nama yabereye i Kigali, kuri uyu wa 29 Mutarama 2024, yateguwe n'Ihuriro Rishinzwe Amazi, Isuku n'Isukura muri Afurika (AfWASA) ku bufatanye na leta y'u Rwanda. Yari igamije kurebera hamwe uko hanozwa imicungire myiza y'amazi cyane cyane mu bice by'icyaro.

Iyi nama yahuje abayobozi b'uturere 12 twatoranyijwe mu bihugu bitandatu byo muri Afurika birimo u Rwanda, Ethiopia, Cameroun, Uganda, Ghana na Malawi. Bihaye umukoro w'uko bagiye kwegera abaturage bakareba ibibazo bafite bituma batabona amazi meza, kugira ngo bishakirwe umuti.

U Rwanda rwatoranyijwe gukorerwamo uwo mushinga kubera rukomeje kugaragaza ubushake ndetse n'ubushobozi bwo guteza imbere ibikorwaremezo by'amazi, isuku n'isukura ku baturage.

Mu mbogamizi bagaragaje zituma amazi meza akiri ingorabahizi mu bice by'icyaro zirimo imiyoboro y'amazi yangirika ntisanwe, amavomero akiri make, imiyoboro isaza ntisimburwe, ariko ubu bavuga ko hagiye gufatwa ingamba kugira ngo ibyo byose bishakirwe ibisubizo birambye.

Umuyobozi w'Akarere ka Rulindo, kari muri tubiri twatoranyijwe mu Rwanda, Mukanyirigira Judith, yavuze ko ibikorwaremezo by'amazi byari byarangiritse bigiye kuvugururwa kandi n'ibikiri bizima bisigasirwe.

Ati 'Amazi ni ubuzima, abaturage badafite amazi meza ubwo murumva icyo bivuze, uyu mushinga rero uje ari igisubizo, uje kudufasha kurinda mbere na mbere ibikorwaremezo dufite kugira ngo bitazangirika, ariko nitubona n'ubushobozi, tubyongere mu bwiza no mu bwinshi kugira abaturage babone amazi meza kandi ahagije.'

Umuyobozi w'Akarere ka Luuka, mu ntara ya Busoga, muri Uganda, Wakaze Simon, yavuze ko abaturage bagendaga ibilometero byinshi bajya gushaka amazi meza, rimwe na rimwe ugasanga bavomye n'amazi mabi yo mu bishanga.

Ati 'Abantu benshi barwaraga indwara ziterwa n'amazi mabi, kandi isuku yari nke cyane. Ariko kuva iyi gahunda yatangira iwacu, abaturage barimo kubona amazi meza, isuku yarimakajwe.'

Umuyobozi ushinzwe ibikorwa no guteza imbere ubunyamwuga muri AfWASA, Dr. Eng. Simon Kenfack, yavuze ko hakusanyijwe inkunga ingana n'ibihumbi 600 by'Amadolari yo gufasha utu turere gusana, kuvugura no gusimbuza ibikorwaremezo by'amazi byangiritse.

Ati 'Guhura n'abayobozi bo mu nzego z'ibanze bidufasha kumenya ibibazo by'ibura ry'amazi meza biri mu baturage hasi, no kugira ngo bagire ubumenyi buhagije bwo gucunga ibyo bikorwaremezo, ariko tunabatere inkunga kugira ngo ibyangiritse bivugururwe.'

Umuyobozi Mukuru muri Minisiteri y'Ibikorwaremezo, ushinzwe amazi isuku n'isukura, Maniraruta Gemma, yavuze ko iyi gahunda ya AfWASA ije gutera ingabo mu bitugu gahunda ya leta yo kuvugurura imiyoboro y'amazi yari imaze igihe kinini idakoreshwa.

Abayobozi bihaye umukoro w'uko bagiye kwegera abaturage, bakareba ibibazo bihari bituma batabona amazi meza, bishakirwe umuti

Mu mbogamizi bagaragaje zituma amazi meza akiri ingorabazi mu bice by'icyaro, zirimo imiyoboro y'amazi yangirika ntisanwe n'amavomero akiri make

Abayobozi b'uturere 12 twatoranyijwe mu bihugu bitandatu byo muri Afurika, bateraniye i Kigali mu gutangiza umushinga w’uburyo hanozwa imicungire myiza y’amazi

Byabereye mu Mudugudu wa Giseke, Akagari ka Muhororo, Umurenge wa Kirimbi mu Karere ka Nyamasheke ku wa 28 Mutarama 2025.

Uyu muhinzi akibona magazine imwe n'amasasu 22 bigaragara ko ahamaze igihe kinini yahise abimenyesha ubuyobozi bw'inzego z'ibanze nabwo bubimenyesha inzego z'umutekano.

Ni amasasu bikekwa ko yaba yarahatabwe mu gihe cya Jenoside yakorewe Abatutsi mu 1994, kuko ako gace ari ko Interahamwe zanyuzemo zihungira muri Repubulika Iharanira Demukarasi ya Congo, hanaba ingabo z'Abafaransa zari muri Opération Turquoise.

Umuvugizi wa Polisi y'u Rwanda mu Ntara y'Iburengerazuba, SP Karekezi Twizere Bonaventure, yashimye uyu muturage ko yihutiye gutanga amakuru.

Ati 'Turasaba abaturage gukomeza gutanga amakuru ku kintu cyose kidasanzwe babonye, aho kwihutira kugikoraho. Ibi bijyana n'ikibazo cy'abana batoragura ibikoresho by'amashanyarazi n'ibindi bita injyamani, bishobora gushyira ubuzima bwabo mu kaga.''

Ibi bibaye hashize ukwezi n'igice mu Murenge wa Bushenge w'Akarere ka Nyamasheke, abana b'abahungu babiri bahiraga icyarire mu ishyamba ry'umuturage, bahabonye grenade na yo byagaragaraga ko ihamaze igihe kinini.

SP Karekezi Twizere Bonaventure yasabye ababyeyi kwigisha abana kwirinda gukinisha ibikoresho nk'ibyo igihe babibonye, ahubwo bakihutira kubimenyesha ubuyobozi, kugira ngo habeho ubufatanye mu gukumira ibyago no kubungabunga umutekano.

Mu Karere ka Nyamasheke umuhinzi wacaga imirwanyasuri yasanze magazine n’amasasu mu murima we

Kontaro ni amasezerano abantu bagirana agaragaza inshingano cyangwa icyo buri wese asabwa mu gikorwa runaka.

Munyabuhoro Olivier wiga muri ILPD ibijyanyeno no gutegura no kugenzura amasezerano yatangaje ko ubumenyi yungutse burimo ko habaho kontaro zo ku rwego rw'abantu babiri cyangwa amatsinda, ayo imbere mu gihugu ndetse n'ayo ku rwego mpuzamahanga.

Yavuze ko mu byo bize bibukijwe kumenya kugenzura neza niba mu nyandiko y'amasezerano hagaragara inshingano za buri ruhande rurebwa n'ayo masezerano.

Ati “Twigishijwe ko mu gutegura amasezerano ugomba kugenzura niba nta cyuho usizemo kuko ari cyo kiba inkomoko yo kutumvikana. Ukareba uti 'ese mu kazi tuzakora, twatekereje uko twazakemura ibibazo byazavukamo mu bwumvikane?'

'Ikintu cya mbere amasezerano aba amaze, ni ukugerageza kurinda ko havuka ibibazo, no mu gihe bivutse, kumenya gushyiraho inzira zishobora gutuma ibyo bibazo mubisohokamo bidasabye ko hazamo umucamanza.'

Mu byo kwitaho mbere yo gukora amasezerano n'umuntu cyangwa ikigo, harimo kumenya ko yujuje imyaka y'ubukure, kuba ari muzima mu mutwe, kumenya ko yujuje ibikenewe mu kazi umukeneyemo n'ibindi.

Mugenzi we witwa Uwase Raissa, yavuze ko nubwo habaho n'amasezano atanditse (contrat verbal), ariko abantu baba bakwiye kwitabira kugirana amasezerano yanditse kuko ari na yo atanga icyizere cyuzuye ku mpande zombi zayagiranye.

Yagize ati “Amasezerano yanditse aba afite ibimenyetso, mu gihe kuvugana gusa, bishoboka ko bwacya umuntu yahindutse, mu gihe iyo yanditse ukamuhinduka, ajya mu rukiko akabona umurengezi.'

Uwase yahamije ko bahuguwe ku birimo amakosa akunze gukorwa, nko kutagaragaza uburyo bwo kwishyura imisoro, aho usanga abantu bishyuye kabiri muri kontaro imwe, kuko batigeze bashyiramo uburyo bwo gusora, ugasanga kubikemura bisabye kwiyambaza inkiko.

Umuyobozi Ushinzwe Amasomo muri ILPD, Ngayabandusha Viateur, yabwiye IGIHE ko iri somo bariha abanyeshuri kuko bazi neza ko amasezerano y'imikoranire ahora akenewe mu buzima bwa buri munsi.

Ati “Ibikorwa byacu mu buzima bwa buri munsi bishingiye ku masezerano. Navuga amasezerano y'akazi, ubucuruzi, ubugure, n'ayandi. Isomo rya 'contract' ni ingezi cyane ku banyeshuri bacu, kuko bavanamo ubumenyi bujyanye na kwita ku bikubiye mu masezerano, kumenya gukora amasezerano atandukanye, gukora amasezerano afite ingingo zose zakabaye mu masezerano akozwe neza, gushobora kugaragaraza inshingano buri ruhande rufite mu masezerano n'ibindi.'

Ngayabandusha, yakomeje avuga ko ikiruta ibindi kiba kigamijwe, ari uko iyo amasezerano akozwe neza, bigabanya amakimbirane ku bayagiranye, bityo bikagabanya imanza zigana mu nkiko, n'iterambere rikiyongera.

Munyabuhoro Olivier(uri ku ruhande wambaye ikote) yavuze ko nyuma y’aya masomo biteze kuzaba ari impuguke mu gukora amasezerano muri iyi isi ivuduka mu majyambere

Umuyobozi Ushinzwe Amasomo muri ILPD, Ngayabandusha Viateur, yavuze ko amasezerano ari ikintu cya ngombwa mu mikoranire, akanarinda imanza nyinshi zitari ngombwa

Muri ILPD, abanyeshuri bahiga bashima ko bahabwa amasomo n’ababa bakora neza neza mu byo bigisha, babifiteho inararibonye, bityo bikabongerera ubumenyi biruseho

Kuva mu 2021, inzego z'umutekano z'u Rwanda (RSF) ziri muri Mozambique mu bikorwa byo gutsinsura ibyihebe byari byarayogoje Intara ya Cabo Delgado iri mu Majyaruguru y'icyo gihugu.

Kuva icyo gihe ingabo z'u Rwanda na Polisi y'u Rwanda batanze umusanzu ukomeye mu kwirukana ibyihebe mu bice bitandukanye, zigarura ubuzima mu bice byose, abari barahunze basubira mu byabo.

Urubuga rwa Minisiteri y'Ingabo ruragaragaza ko abasirikare n'abapolisi bari kwitegura kujya mu butumwa bwo kugarura amahoro muri Cabo Delgado bahawe impanuro kuri uyu wa 30 Mutarama 2025.

Umuyobozi wa Diviziyo y'ingabo z'u Rwanda zirwanira ku butaka zirwanisha ibifaru, Maj Gen Wilson Gumisiriza, wari uhagarariye Ubuyobozi bw'Ingabo z'u Rwanda, yasabye abagiye koherezwa mu butumwa gukomeza kurangwa n'indangagaciro za RDF zirimo ikinyabupfura no gukorera hamwe kugira ngo bazahagararire u Rwanda neza.

Ubutumwa bw'inzego z'umutekano z'u Rwanda muri Mozambique bukubiye mu masezerano ibihugu byombi byagiranye ku busabe bwa Mozambique mu 2021.

Intagondwa za Ahlu-Sunna Wa-Jama'a zigaruriye intara ya Cabo Delgado, kuva mu 2017 kugeza mu 2021, bica abaturage b'inzirakarengane bagera ku 3000, benshi baciwe imitwe, ibyo byanatumye abagera ku bihumbi 800 bava mu byabo, bahungira mu nkambi imyaka ine yose.

Mu 2022 inzego za gisirikare z'u Rwanda na Mozambique zasinye amasezerano yo kwagura imikoranire hagamijwe kurushaho gushyira imbaraga mu bikorwa biri kubera i Cabo Delgado no kubaka ubushobozi bw'inzego z'umutekano z'imbere mu gihugu.

Mbere y'uko ingabo z'u Rwanda zihagera, ingabo za SADC zari zaratangiye guhangana n'ibyihebe mu Ntara ya Cabo Delgado kuva mu 2017 zarananiwe kubitsinda.

Maj Gen Wilson Gumisiriza yasabye Abasirikare n’Abapolisi bagiye koherezwa muri Mozambique kurangwa n’indangagaciro za RDF

Inzego z’Umutekano z’u Rwanda zafashije Cabo Delgado kugarukana amahoro n’umutuzo

Mu ntangiriro z'iki cyumweru ubwo habaga urugamba rwo kubohoza Umujyi wa Goma, abasirikare ba RDC batsinzwe ndetse n'imitwe bafatanyije, bafashe icyemezo cyo kurasa ku butaka bw'u Rwanda, mu Karere ka Rubavu.

Kugeza ku wa 28 Mutarama 2025, ibi bikorwa byari bimaze kugwamo Abanyarwanda icyenda, mu gihe abandi benshi bakomeretse.

Iyi myitwarire y'Ingabo za FARDC ni imwe mu ngingo zagarutsweho na Perezida Paul Kagame mu nama yamuhuje na bagenzi be bayobora Ibihugu byo mu Muryango wa Afurika y'Iburasirazuba.

Iyi nama yari mu murongo wo kurebera hamwe icyakorwa ku ntambara ikomeje kuyogoza Uburasirazuba bwa RDC, ndetse n'ikibazo cya M23 gisa n'ikirengagijwe, kikaba gishakirwa ibisubizo bya gisirikare kandi hakwiriye ibya politiki.

Perezida Kagame yabwiye bagenzi be ko hari Abanyarwanda benshi bahitanywe n'aya masasu yavuye i Goma, ndetse asezeranya ko hari icyo azabikoraho.

Ati 'Mu minsi ibiri cyangwa itatu ishize twapfushije abantu, habayeho kurasa cyane guturutse mu Burasirazuba bwa Congo, i Goma. Hapfuye abantu babarirwa mu binyacumi, hakomereka ababarirwa mu magana, ibyo mu buryo budashidikanywaho tuzabyitaho. Nta kubishidikanyaho.'

Mbere yo kugera kuri iyi ngingo, Perezida Kagame yari yabanje kugaragaza ko uburyo ibihugu by'amahanga biri kwitwara muri iki kibazo bubabaje.

Yatunze urutoki ibihugu nka Afurika y'Epfo bikomeje gukoreshwa na Perezida Félix Antoine Tshisekedi wa RDC muri iyi ntambara.

Ati 'Mu minsi ibiri ishize, ku wa Mbere n'uyu munsi mu gitondo [ku wa Gatatu] naganiriye na Perezida wa Afurika y'Epfo wanshatse ngo tuganire kuri iki kibazo kubera uruhare bafite mu Burasirazuba bwa Congo, ari hariya yigira nk'umuntu uri gukora inshingano zo kubungabunga amahoro kandi afite ingabo zirwana zifatanyije na FDLR, ndetse arwana na M23 ku mategeko ya Tshisekedi kubera ko avuga 'ko aba ari abantu badakwiriye kuba bari muri Congo, ngo baturuka mu Rwanda'.'

Perezida Kagame yashimangiye ko M23 atari Abanyarwanda, ndetse agaragaza ko mu bihe bitandukanye Tshisekedi ubwe yagiye yemera ko ari Abanye-Congo.

Ati 'M23 ntabwo ari Abanyarwanda, aba ni Abanye-Congo ndetse igihe kimwe arabyemera ubundi ikindi gihe akavuga ngo 'murabona ku gice kimwe ni yego (ni Abanyecongo) ariko ikindi gice gikomoka mu Rwanda.''

Yakomeje agaragaza ko atumva uburyo abayobozi b'ibihugu bemera gukoreshwa muri ubu buryo.

Ati 'Ni gute abayobozi b'ibihugu byacu twemera ko ibi bikomeza kuba iteka ryose ndetse tukemera ko dukwiriye gukoreshwa na Tshisekedi cyangwa undi uwo ari we wese umushyigikiye.'

Ku wa Gatatu tariki 29 Mutarama 2025, Minisitiri w'Ingabo wa Afurika y'Epfo, Angie Motshekga, yatangaje ko Perezida Cyril Ramaphosa, yaganiriye na Perezida Kagame, amuburira ko Ingabo z'u Rwanda nizikomeza kurwanya Ingabo za Afurika y'Epfo mu Burasirazuba bwa Congo, bizafatwa nko gutangiza intambara.

Ni ingingo na yo Perezida Kagame yagize icyo avugaho muri iyi nama y'abayobozi ba EAC.

Ati 'Ndetse Afurika y'Epfo ikanatinyuka gutera ubwoba ku bishobora kuba nyuma y'ibyo, birumvikana dutegereje kubona ibyo bikangisho byabo.'

Perezida Kagame yavuze ko ibi Afurika y'Epfo ikangisha yagakwiye kuba yarabikoresheje ikemura ikibazo cy'umutekano muke mu Burasirazuba bwa RDC, cyangwa mu guhangana n'abo irwana na bo muri iyi ntambara.

Yagaragaje kandi ko uyu munsi hari ikibazo cy'uko usanga ibiganiro bya Nairobi na Luanda byashyizweho mu gukemura ibibazo, nta musaruro bitanga kubera ko ababirimo barushije uburemere impamvu yabyo.

Ati 'Ibiganiro bya Nairobi byahindutse ibiganiro bya Uhuru, ibiganiro bya Luanda byabaye nk'aho udashobora kuvuga ikintu kidashimisha Perezida Lourenço, ibi ntacyo bifasha mu guhangana n'ibibazo bikomeye nk'iki duhanganye na cyo uyu munsi. Kubera ko bidashobora gukemurwa birangira dufite ibibazo nk'ibihari aka kanya.'

Perezida Kagame yashimangiye ko atumva uko Tshisekedi akomeje gutsimbarara ku ntambara kandi bimaze kugaragara ko nta musaruro itanga.

Ati 'Ntabwo numva uko Tshisekedi akomeza gutekereza ko azakemura ibibazo bifite aho bihuriye n'uburenganzira bw'abantu, akoresheje igisirikare, abica, abarasa azana ingabo ziteguye gufasha nk'iz'u Burundi by'umwihariko, ntabwo nzi niba ibyo byarafashije mu minsi mike cyangwa ibyumweru bishize bakora ibyo.'

Yagize ati 'Ndashaka ko buri kimwe turi kuvuga cyangwa icyo duteganya gukora icyo ari cyo cyose, tubanze twumve neza ibiri kuba mu buryo buzima, ubundi dushingiye kuri ibyo dukomeze, wenda dushobora kugira aho tugera. Ariko nidukomeza ibi bintu byo kuratana ibyiza kuri buri umwe no kuba abantu bigira beza ariko bikarangira buri wese aharanira inyungu ze, aho guharanira inyungu duhuriyeho nk'abantu bo muri Afurika y'Iburasirazuba, ntabwo mbona uko tuzatanga umusanzu ufatika mu gushaka igisubizo.'

Perezida Kagame atangaje ibi mu gihe Leta ya RDC yakomeje gushimangira ko itazigera igirana ibiganiro na M23. Ni ibintu byatumye uyu mutwe wubura imirwano, ndetse wigarurira ibindi bice byinshi birimo n'Umujyi wa Goma, uheruka gufata.

“Mr Chairman, Your Excellencies, I want us that for whatever we are saying and whatever we intend to do we capture the context rightly and then proceed based on that, and maybe we can get somewhere. Otherwise if we keep saying good things to each other, being nice, and then each… pic.twitter.com/T7AYAdBSF9

— Presidency | Rwanda (@UrugwiroVillage) January 29, 2025

Perezida Kagame yasezeranyije kuzagira icyo akora ku masasu yarasiwe i Goma, akica Abanyarwanda

Muri Nzeri 2024, nibwo PCK Entertainment yatangaje jo umuhanzi Drama T agiye gukora uruhererekane rw'ibitaramo muri Canada aho yari gufashwa kubitegura na nyiri PCK Entertainment witwa Rashid Hungu.

Uyu musore w'umurundi yari gutaramira mu mijyi ya Toronto, Ottawa, Montreal, Quebec, Edmonton, Winnpeg na Vancouver. Icyo gihe rero PCK atangaza ibyo, yahise asaba abantu babyifuza gufata uyu muhanzi hanyuma bakamwishyura.

Benshi mu bategura n'abamamaza ibitaramo muri Canada, bahise basamira hejuru ayo makuru yo kuzana Drama T mu bitaramo mu mijyi itandukanye hanyuma bishyura PCK nyiri ugutumira Drama T.

Nyuma y'aho, PCK yishyuye igice cy'amafaranga yumvikanye na Drama T hanyuma amwizeza ko n'ababyinnyi be n'abandi bifuza kuzana azabashakira visa ziberekeza mu gihugu cya Canada kugira ngo bazabone uko bataramana nk'uko bari babyumvikanye.

Ku rundi ruhande, bamwe mu bategura ibitaramo muri Canada bari batangiye kwishyura uyu mugabo amafaranga yo kugira ngo azabazanire Drama T hanyuma abataramire aho baherereye mu mijyi itandukanye muri iki gihugu.

Nyuma y'uko Drama T ataramiye muri Canada mu mijyi micye, yahise atabwa muri yombi hanyuma udufaranga yari yakoreye baratugwatira bamushinja gukorana na PCK kandi yarabeshye abantu kubazana muri Canda akabarya amafaranga.

Kuri iyi ngingo PCK yavuze ko atabashije kubona uko azana iyo miryango muri Canada.

Nyuma y'uko Drama T avuye mu gitaramo adacyuye aye yose ndetse ntataramire mu mijyi yose, PCK yanze gusubiza amafaranga bamwe mu bari baramwishyuye kugira ngo abahe Drama T muri icyo gihe yari gutaramira muri Canada.

Nyuma y'uko PCK adakoranye neza na Drama T, byatumye Juno Kizigenza adakomeza imishinga yari afite yo gutaramira muri Canada dore ko ku wa 04 Ukwakira 2024 aribwo yatangaje ko agiye gutaramira muri Canada ariko abantu bagategereza amatariki amaso agahera mu kirere.

Uyu mugabo yongeye gutera gapapu umudamu w'umunyarwanda witwa Chantal washakiye ibyangombwa ababyinnyi n'abaririmbyi Kidum ngo ajye gutaramira muri Canada ariko PCK amaze kumenya yabonye ibyangombwa, ahita amupapura uwo mudamu hanyuma barakorana.

Mu kiganiro cyanyuze ku rubuga rwa TikTok, Drama T yashinje ubuhemu PCK ku bwo kumufungisha no kutamwishyura amafaranga yose nk'uko bari bayumvikanye ndetse amushinja no kuba atari yasubiza amafaranga abari barayamuhaye kugira ngo Drama T azaririmbire mu mijyi itandukanye.

Kugeza ubu, PCK Entertainment yatangaje ko izakorana n'umuhanzi Israel Mbonyi mu bitaramo ateganya gukorera muri Canada nubwo benshi mu bagakoranye nawe batabanye neza ndetse hakaba hari ubwoba bw'uko ibi bitaramo bya Mbonyi bishobora kutaba nk'uko byagakwiriye.

Drama T yari gutaramira mu mijyi itandukanye muri Canada

Kuva mu Ukwakira, inta kanunu k’ibitaramo bya Juno Kizigenza

PCK Entertainment niyo iri gutegura ibitaramo bya Israel Mbonyi

Drama T arashinja ubwambuzi PCK wamutumiye mu bitaramo muri Canada

Rashid Hungu uzwi nka PCK arashinjwa ubwambuzi n’abo bakoranye mu kuzana Drama T muri Canada 

Umva ibyo Drama T na PCK bavuga ku bitaramo Drama T yagakwiye kuba yarakoreye mu mijyi myinshi ya Canada. Ni ikiganiro cyabereye ku rubuga rwa TikTok

“>

Uyu mukobwa yabigarutseho mu kiganiro cyihariye yahaye InyaRwanda, nyuma y’uko ku wa 27 Mutarama 2025, atangajwe ku rutonde rw’abahanzi 10 bo ku Mugabane wa Afurika, bahataniye igikombe cya Prix découvertes RFI 2025.

Boukuru aherutse gushyira ku isoko Album ya mbere, ndetse mu myaka ibiri ishize yakoze ibihangano byinshi byatumye atumirwa hirya no hino mu maserukiramuco akomeye ku Isi. Yiyandikishije nyuma y’uko mu 2023, u Rwanda rwabuze uruhagararira muri iri rushanwa.

Ariko mu 2021, u Rwanda rwari rwahagarariwe na Kaya Byinshi, ni mu gihe Mike Kayihura yahagarariye u Rwanda mu 2020. Kuva iri rushanwa ryatangizwa, Yvan Buravan niwe wenyine wabashije kwegukana iri rushanwa, n’ubwo abarimo Mani Martin bari baragerageje ariko biranga.

Boukuru yabwiye InyaRwanda, ko yatangiye gutanga ubusabe bw’iri rushanwa mu Ukwakira 2024, ndetse agaragara ku rutonde rw’abanyempano 40 bemerewe gukomeza muri iri rushanwa, kugeza ubwo byageze ku bantu 10 ba nyuma.

Yavuze ko kwitabira iri rushanwa, ahanini byashingiye cyane ku muhate we no gushaka gutera ikirenga mu cya Buravan. Ati “Ndishimye cyane, ndanezerewe, ndi mu bakobwa bacye bashima Imana kuri iyi si.

'Prix découvertes RFI ni igihembo cyahataniwe na nyakwigendera Yvan Buravan kandi azaba no kubasha ku gitsindira, rero kuba yaratsinze njye ni impamvu ya mbere kandi yonyine ihagije kuba nakwitabira, ariko indi mpamvu ni uko mbishoboye. Intego ya mbere mfite njyewe ni ukuba umwe mu ba mbere ku rwego rw’amahanga. Rero, iyi ng’iyi ni intambwe ya mbere nari nteye.”

Boukuru asobanura kwitabira iri rushanwa nk’amahirwe yabonye, ariko kandi byahuriranye n’uko “ibisabwa byose nari mbifite.”

Yanavuze ko kwiyandikisha muri iri rushanwa, yashingiye ku mahirwe ritanga, ririmo ibitaramo bibera hirya no hino mu bihugu bikoresha ururimi rw'Igifaransa “n’ibindi nkeneye nk’umunyamuziki.”

Uyu mukobwa yavuze ko kwiyandikisha muri iri rushanwa, ahanini bisaba ko umuhanzi aba afite ibikorwa birimo nka Album, Extended Play (EP), yarakoze ibitaramo binyuranye imbere y’abantu, kuba abarizwa mu gihugu gikoresha ururimi rw’Igifaransa n’ibindi.

Mu busanzwe abiyandikisha batangiraga muri Mata buri mwaka, ariko kuri iyi nshuro byabaye mu Ukwakira, bisozwa mu Ukuboza 2024.

Boukuru yavuze ko bwari bwo bwa mbere yiyandikishije muri iri rushanwa “Kuko nibwo nabonaga ko mfite ibikorwa byahangana ku rwego Mpuzamahanga.”

Yavuze ko abakunzi b’umuziki basabwa kumutora mu matora ari kubera kuri Internet azasozwa tariki 16 Gashyantare 2025. Amatora abera ku rubuga rwa RFI.

Uyu mukobwa yumvikanishije ko afite icyizere cyo gutwara iri rushanwa ashingiye “Mu kuba mfite impano, mu kuba mfite buri kimwe cyose gikenerwa kugirango mbashe gutsinda.”

Ati “Igisabwa cyose kirahari, gusa mu irushanwa harimo abatsinda n’abadatsinda. Gusa, iki gikombe ndabyizeye ko ari icyacu.”

Amajwi y'abafana azashingirwaho n'Akanama Nkemurampaka mu kwemeza uzegukana iri rushanwa rya Prix Découvertes RFI 2025. Akana Nkemurampaka katangajwe, gahagarariwe n'umunyamuziki Angélique Kidjo wakoranye na RFI mu bihe bitandukanye.

Aba banyempano 10 batangajwe, batangiye amagerageza kuva tariki 20 Ugushyingo 2025, kugeza ubwo kuri uyu wa Kabiri bemeje 10 ba nyuma.

Hashingiwe cyane ku mwihariko wa buri wese, uburyo asobanura ibihangano bye n'igihugu cye ndetse n'uko yiteguye mu gihe cyose yaba atsindiye iri rushanwa.

Abahanzi 10 bahatanye ni Boukuru (Rwanda), Gregory Laforest (Haiti); DINA M (Madagascar), Jenny Paria (DRC), Joyce Babatunde (Cameroon), Queen Rima (Guinea), Seepage (DRC), Sahad (Senegal), Straiker (Guinea), ndetse na Yewhe Yeton (Benin).

Umuhanzi uzatsindira Prix Découvertes RFI y'uyu mwaka azatangazwa ku wa 18 Gashyantare 2025 mu birori bizatambuka imbona nkubone ku rubuga rwa Facebook.

Akanama Nkemurampaka kazamuhitamo kazaba karangajwe imbere n'umunyamuziki wo muri Nigeria, Angélique Kidjo

Prix Découvertes RFI itegurwa ku bufatanye na Sacem, Institut Français, Umuryango Mpuzamahanga w'Abavuga Igifaransa na Unesco.

Kuva iri rushanwa ryatangira kuba rimaze kwegukanwa n'abarimo Tiken Jah Fakoly (Côte d'Ivoire), Rokia Traoré (Mali), Didier Awadi (Sénégal), Amadou na Mariam (Mali), Maurice Kirya (Uganda) na Soul Bang's (Guinée), King Lesh (2021), Waye (2020), Céline Banza (2019) naYvan Buravan (2018).

Umuhanzi utwaye iki gihembo ategurirwa ibitaramo bikomeye mu bihugu bitandukanye byo ku mugabane wa Afurika akanakorera igitaramo i Paris mu Bufaransa.

Uretse guhabwa igihembo anagenerwa amayero 10,000 [Ni ukuvuga asaga Miliyoni 10 Frw]. 

Mu 2021, u Rwanda rwahagarariwe na Kaya Byinshi ubarizwa mu inzu ifasha abahanzi mu bya muzika ya Green Feery Music. Uyu mukobwa yisanzuye mu njyana ya Pop ariko n'izindi arazizi.

Mu 2020, u Rwanda rwahagarariwe na Mike Kayihura, ni mu gihe Social Mula yahatanye muri iri rushanwa mu 2019.

Boukuru yatangaje ko yiyandikishije muri Prix Decourtes RFI ashaka gutera ikirenge mu cya Yvan Buravan

  

Boukuru yavuze ko yabanje kuboneka mu banyempano 40 bageze mu cyiciro kibanziriza icya nyuma

 

Boukuru yavuze ko ibikorwa bye birimo Album n’ibitaramo yagiye akora, ari bimwe mu byatumye yandikwa muri Prix Decourteve

 

Boukuru aherutse gushyira hanze Album ye ya mbere yise “Gikundiro” iriho indirimbo zitsa ku ngingo zinyuranye 

KANDA HANO UBASHE KUMVA IKIGANIRO TWAGIRANYE NA BOUKURU UHATANIYE PRIX DECOUVERTES RFI

“>

Saa Cyenda z'amanywa kuri uyu wa Gatatu nibwo twambutse twinjira mu Mujyi wa Goma, ku mupaka ku ruhande rwa RDC nta bantu benshi bari bahari, hari bake bisanzwe, barimo abava n'abajya mu Rwanda cyane ko nyuma y'aho imirwano ihagarariye, ushaka kwambuka yatangiye kwemererwa.

Abarwanyi b'umutwe wa M23 nibo bagenzura umupaka ndetse ucyinjira ubabona hirya ni hino, abari ku muhanda baganira n'abaturage baba bacaracara hafi aho. Mu mihanda yinjira ahantu hatandukanye, nta bantu benshi baba barimo.

Amaduka ntabwo arafungura nk'uko bisanzwe, gusa abakora ubucuruzi baganiriye na IGIHE bavuze ko ibintu byari bigoye mu minsi kuva ku wa Mbere kugera ku wa Kabiri, ariko kuva aho agahenge kabonekeye, biteguye gutangira ibikorwa byabo.

Tucyinjira i Goma, twageze mu gace kitwa Quartier les Volcans, hafi aho niho hari inzu yari ituyemo abacanshuro bo muri Romania babaga mu Mujyi wa Goma. Uhasanga byinshi mu bikoresho bakoreshaga, imyambaro yabo n'ibindi.

Abaturage bo muri ako gace, wabonaga bake ku muhanda, ariko uko amasaha yagiye yicuma, batangiye gusohoka mu nzu, byageze ahagana Saa kumi n'imwe z'umugoroba, ari benshi, bicaye hanze ku mabaraza y'inzu zabo baganira.

Mamouda, ni umucuruzi w'i Goma, yabwiye IGIHE ko ku Cyumweru hari ubwoba bwinshi mu Mujyi kubera amasasu yavugaga impande n'impande, aca hejuru y'inzu ku buryo uwo munsi batashoboye gusohoka mu nzu.

Ati 'Twese twari dufite ubwoba kuko ahantu hose hari urusaku rw'amasasu no mu gace dutuyemo, ahantu hose. No ku wa Mbere byasaga n'aho ari uko, wenda ku wa Kabiri ni bwo navuga ko abantu bari batangiye guhunga, Ingabo za Guverinoma zagiye, ni bwo navuga ko hatangiye gutuza kugeza uyu munsi ku wa Kabiri.'

Mamouda, mu gace atuyemo afite Générateur itanga amashanyarazi, ni we ufasha abaturanyi be kugira ngo babashe kubona uko bashyira umuriro muri telefoni zabo kuko nta muriro w'amashanyarazi uri mu gace kabo.

Ati 'Kugeza ubu nta mazi, nta mashanyarazi […] ugomba kugenda ujya gushaka amazi, uzenguruka mu baturanyi ngo urebe ko wabona amazi, gusa njye nkoresha moteri mfasha abaturanyi gushyira umuriro muri telefone zabo.'

Ubwo imirwano yabaga hagati ya M23 na FARDC, imiyoboro imwe n'imwe ya internet yarangijwe ku buryo bigoye gutumanaho.

Mu masaha make turi i Goma, twahuye n'Umuvugizi wa M23 mu bya gisirikare, Lt Col Willy Ngoma, yari mu muhanda agenda arinzwe n'abasirikare be. Mu nzira, abaturage bamubonaga, bamukomeraga amashyi, bamupepera bigaragaza ko bishimiye abarwanyi ba M23.

Benshi bavugaga ko bizeye ko ibintu bigiye kugenda neza kuko batazongera guhohoterwa no kwibwa n'ingabo za FARC.

Uwitwa Jean Claude Etienne ati 'Umutekano uko wari umeze mbere, kuri ubu tumeze neza mbese muri make, ndagenda isaha nshakiye, ngakora ibyo nshaka, telefone mu ntoki, amafaranga mu ntoki nta kibazo.”

Mugenzi we witwa Darius yavuze ko M23 yaganiriye nabo, agasanga ni abantu bafite urugwiro rwinshi. Ati ' Bafite urugwiro, nta kibazo bafitanye natwe. Batubwiye ko nitubona abasirikare ba FARDC tubabwira bakabishyikiriza bagashyira hasi intwaro.'

'Bavuze ko nta kibazo bafitanye n'abaturage ikibazo bagifitanye na Tshisekedi ahari ariko twe ntacyo badutwaye. M23 bitwara neza ntabwo ari nk'Ingabo za FARDC, zo mushobora guhura ufite telefone bakayikwaka ariko aba bafite ikinyabupfura cyinshi si nk'abandi.'

Yakomeje agira ati 'Abasirikare ba M23 ni abantu beza, nta bibi bakora nka FARDC, mbega ntiwatinyuka kwegera abasirikare ba FARDC uko uri kwegera aba M23. Abasirikare ba FARDC bari baratujujubije ubu urabona turi kugendana za telefone, mu bihe byashize ntiwari kubasha gutemberana telenone mu ntoki.'

Mu Mujyi wa Goma hari ibikorwa bimwe na bimwe byakomeje gukora nubwo intambara iri kuba. Nka Hotel Serena, imwe mu zikomeye i Goma, ubuzima bumeze nk'ubusanzwe nubwo abakiliya bagabanutse. Abakozi bose bari mu kazi, ndetse basobanura ko ubwo intambara yabaga, imirwano yabereye hafi yayo ariko ko itamaze igihe kinini.

Ukinjira i Goma, usanganirwa n’urujya n’uruza rw’abantu nubwo atari benshi cyane nk’iminsi isanzwe

Abaturage baba bagenda bisanzuye nta kintu bikanga

Imodoka z’abarwanyi ba M23 zigaragara hirya no hino mu mujyi zigenzura umutekano

Abarwanyi ba M23 basobanura ko batewe ishema n’ibyo bagezeho mu minsi mike bakagarura amahoro i Goma

Amafoto: Niyonzima Moise