Webrwanda Backend

Blog

  • Kigali-Bumbogo: RIB yasabye Ababyeyi kutanduza abakiri bato Umwanda w'Ingengabitekerezo ya Jenoside #rwanda #RwOT

    Ntirenganya Jean Claude, umukozi w'Urwego rw'Igihugu rw'Ubugenzacyaha-RIB mu ishami ryo gukumira ibyaha, aganira n'abaturage b'Umurenge wa Bumbogo, Akarere ka Gasabo ho mu Mujyi wa Kigali kuri uyu wa 26 Werurwe 2025, yasabye Ababyeyi n'abantu bakuru kureka kwikoreza imitwaro y'Ingengabitekerezo ya Jenoside abakiri bato. Ati' Umubyeyi wese, Umuntu mukuru w'Umunyarwanda turamusaba kudakoreza umuzigo w'Ingengabitekerezo abana bacu babyiruka.

    Ntirenganya, avuga ko abantu bakuru babaye muri izo Ngengabitekerezo, ko ndetse bazigishijwe igihe kirekire bityo hakaba hakiboneka bake batarahinduka. Abo kimwe n'abameze nk'abo, yababwiye ati' Ntabwo uwo muzigo w'Ingengabitekerezo ya Jenoside abakuru bikoreye kuko abenshi bayigishijwe igihe kirekire, uyu munsi tugomba kuba tuwikoreza abana bacu'.

    Akomeza avuga ko abana bavuka uyu munsi bahura n'izo ngaruka za Jenoside ndetse zikabageraho bataranayibayemo. Yibutsa ko badakwiriye kwikorezwa urwo ruhererekane rw'amacakubiri n'izindi ngeso mbi. Ati' Ibyo tugomba kubica burundu bikaba amateka mu Gihugu cyacu'.

    Ntirenganya, avuga ko nubwo RIB yasuye Abanyabumbogo muri Gahunda yo kubegereza Serivise itanga, isaba ko buri wese agira uruhare mu gukumira ibyaha ariko by'umwihariko; Iby'ihohoterwa rishingiye ku gitsina, ubujura, Ibyifashisha ikoranabuhanga n'ibindi byiganje. Yabasabye kandi kujya batangira amakuru ku gihe.

    Abanyabumbogo, basabwe guhumuka bagaha agaciro ibibafitiye akamaro, ibitabafitiye akamaro bakabisiga inyuma. Bibukijwe ko Jenoside yakorewe Abatutsi nta n'umwe mu banyarwanda itagizeho ingaruka, ko bityo buri wese akwiye gusubiza amaso inyuma akava mu kwijandika mu byaha.

    Kuba hari bamwe bagaragaza ingengabitekerezo ya Jenoside cyane mu gihe Abanyarwanda begera ibihe by'Iminsi ijana yo Kwibuka Jenoside yakorewe Abatutsi, Ntirenganya Jean Claude avuga ati' Abo ng'abo ni babandi bakiyifite muri bo, badashaka guhinduka ngo ibavemo burundu, batarumva neza icyiza cyo kuba umwe icyo bitugejejeho'.

    Ntirenganya, akomeza abwira buri wese kwibuka no kuzirikana ko Jenoside yakozwe n'Abanyarwanda, igakorerwa Abanyarwanda, ko kandi ingaruka zayo ntawe zitagezeho. Asaba ko uwayigizemo uruhare wese kimwe n'abayihakana bakanayipfobya badakwiye guhishirwa, ko ufite amakuru akwiye kuyatanga hagamijwe gukumira ikibi.

    Uwimana Louise, atuye mu Kagari ka Nyagasozi Umurenge wa Bumbogo. Ashima kuba RIB yabegereye nk'abaturage ikaza kubaganiriza, ibabwira imikorere yayo ndetse n'imikoranire ikwiye kuranga uru rwego rw'Ubugenzacyaha-RIB n'Abaturage mu gukumira no kurwanya ibyaha.

    Avuga ku cyo yungukiye mu biganiro RIB yabahaye, yagize ati' Icyo nkuyemo ni uko twese nk'Abanyarwanda tugomba kumenya ko turi Abanyarwanda, icyatumye habaho Jenoside tukakirinda hanyuma buri wese akamenya ngo ni gute nabana neza na mugenzi wanjye tukirinda n'ubundi ibyatujyanye muri Jenoside yakorewe Abatutsi mu 1994'.

    Uwimana Louise/Umuturage Bumbogo.

    Uwimana, avuga ko ababaswe n'ibikorwa bibi by'ingengabitekerezo ya Jenoside n'abayihakana badakunze kwigaragaza ariko ngo bahari nubwo atari benshi. Kuri we, avuga ko nubwo yaba umwe akwiye kugaragazwa kuko ikibi kitagombera kuba mu bwinshi ngo kitwe cyo cyangwa cyanduze ibyiza.

    Kugikwiriye gukorwa mu kurwanya abahakana n'abapfobya Jenoside yakorewe Abatutsi, by'Umwihariko mu gihe Abanyarwanda tugiye kwinjira mu minsi ijana yo Kwibuka Jenoside yakorewe Abatutsi, agira ati' Mbere ya byose ni uko buri Munyarwanda agomba kumva y'uko kurwanya Jenoside ari uruhare rwa buri wese'.

    Akomeza agira ati' Numva igikwiye gukorwa ari ukuzirikana, ukubumbatira ubumwe bwacu nk'Abanyarwanda, tukaba hafi y'Abarokotse ariko kandi tukibanda k'Urubyiruko n'abana bacu bakiri batoya kugira ngo bya bitekerezo by'ivangura be kubikurana kandi na none uwagize ingorane agakurira muri uwo muryango na none tukamuba hafi kugira ngo tumwereke ko ari Umunyarwanda kandi byanze bikunze iyo umuntu yigishizwe ibyiza akurana icyiza'.

    Ntirenganya Jean Claude, umukozi w'Urwego rw'Igihugu rw'Ubugenzacyaha-RIB ushinzwe gukumira ibyaha, asaba buri wese guca ukubiri n'ingengabitekerezo ya Jenoside ndetse n'ibindi bisa nayo birimo; Ivangura n'amacakubiri ayo ariyo yose, Ibyaha byo guhakana no gupfobya Jenoside yakorewe Abatutsi.

    Asaba kandi abakuru bagifite muri bo ingengabitekerezo ya Jenoside kurwana nayo ubwabo ariko batabisohoye ngo babishyire mu rubyiruko cyangwa ngo bagire undi w'undi bajya gutura uwo mutwaro mubi, umusaraba wabo w'ibibi byabananiye.

    Ati' Uwo musaraba bafite biwikoreza abana bacu kuko ntabwo aribo bakoze Jenoside nubwo bagihura n'ingaruka zayo. Iyo karande twabayemo yo kwigishwa amateka mabi y'uruhererekane, uyu munsi ihinduke tubwire abana bacu amateka y'ukuri nyayo ya Jenoside, tubabwire ko Abanyarwanda turi Umwe, tubereke icyo kuba Umwe bitumariye nk'Abanyarwanda n'icyo bizabagezaho no mu gihe gitana ndetse n'abo bazabyara'.

    Urwego rw'Igihugu rw'Ubugenzacyaha-RIB, mu korohereza abaturage n'abarugana bose kuyigezaho amakuru agamije gufasha mu gukumira no kurwanya ibyaha rwashyizeho imirongo itishyurwa iyo uhamagaye. Iyo ni; 166 uhamagara utanga amakuru ku byaha. 3512 ya Isange One Stop Centre. 116 yo gutabariza Umwana wahohotewe. Wanifashisha kandi imbuga nkoranyambaga arizo; X @RIB_Rw cyangwa ukanyura kuri www.rib.gov.rw
    Munyaneza Théogène

    Source : https://www.intyoza.com/2025/03/27/kigali-bumbogo-rib-yasabye-ababyeyi-kutanduza-abakiri-bato-umwanda-wingengabitekerezo-ya-jenoside/

  • U Bubiligi bwavuze ku basirikare bufite mu Burasirazuba bwa Congo – #rwanda #RwOT

    Minisitiri Prévot yasobanuye ko aba basirikare bari mu kigo cya gisirikare cya Kindu mu Ntara ya Maniema ihana imbibi na Kivu y'Amajyaruguru na Kivu y'Amajyepfo, mu butumwa bw'umuryango w'Ubumwe bw'Uburayi (EU) bwo gufasha ingabo za RDC.

    Mu gihe bivugwa ko u Bubiligi bwohereje ingabo zo gufasha iza RDC kurwanya umutwe witwaje intwaro wa M23, Minisitiri Prévot yasobanuye ko ubufasha abasirikare b'Ababiligi batanga atari ubwo kujya ku rugamba.

    Umubano w'u Rwanda na RDC ntumeze neza kuva mu ntangiriro za 2022, aho kugira ngo hashakwe igisubizo, u Bubiligi bwakomeje kwiyegereza RDC, byifatanya mu kurushinja gufasha abarwanyi ba M23 ndetse birusabira ibihano.

    Nubwo Minisitiri Prévot agaragaza ko ubufasha ingabo z'u Bubiligi ziha iza RDC ari buto, bisa n'aho hari umugambi w'igisirikare utarahishurwa igihugu cyabo gifite muri RDC no mu karere muri rusange.

    Tariki ya 17 Werurwe 2025, indege y'Ingabo z'u Bubiligi yavuye i Bruxelles, yerekeza i Kinshasa, ikomereza muri Kindu ku munsi wakurikiyeho. Yasubiye i Kinshasa, ihava tariki ya 20 Werurwe.

    Tariki ya 21 Werurwe, iyi ndege itwara abantu 16 yagarutse mu karere ka Afurika y'Ibiyaga Bigari, igwa i Bujumbura mu Burundi, isubira i Bruxelles ku munsi wakurikiyeho.

    Ingabo z’u Bubiligi zikorana n’abasirikare bo mu mutwe w’ingabo zitabara aho rukomeye muri RDC

    Source : http://igihe.com/amakuru/u-rwanda/article/u-bubiligi-bwemeje-ko-bufite-abasirikare-batandatu-mu-burasirazuba-bwa-rdc

  • Sudani y'Epfo: Ingabo z'u Rwanda zambwitswe imidali y'ishimwe – #rwanda #RwOT

    Ni igikorwa cyabereye ku cyicaro cy'Ingabo z'u Rwanda, RWANBATT-2, mu Kigo cya Gisirikare cy'Ingabo za Loni i Malakal ku wa 26 Werurwe 2025.

    Umuyobozi w'Ingabo ziri mu butumwa bwa Loni muri Sudani y'Epfo, Lt. Gen. Mohan Subramanian, yashimye uruhare rwa Leta y'u Rwanda mu bikorwa byo kugarura amahoro, ikinyabupfura n'umuhate w'abasirikare b'u Rwanda n'uruhare ntagereranywa mu kugarura amahoro.

    Yanashimye uruhare rukomeye batayo ya RWANBATT-2 yagize mu bikorwa byo gutabara abakozi ba Loni bendaga kwicwa n'inyeshyamba zitwa White Army mu gace ka Nassir.

    Umuyobozi Mukuru uhagarariye u Rwanda muri Sudani y'Epfo akaba n'Uwungirije wa UNMISS ushinzwe ibikorwa bya gisirikare, Brig. Gen Louis Kanobayire, yavuze ko ingabo z'u Rwanda zigira uruhare mu gucunga umutekabo zifatanyije n'ingabo z'igihugu, kugenzura iyubahirizwa ry'uburenganzira bwa muntu no gufasha mu butasi hagamijwe kurinda umutekano w'abaturage.

    Umuyobozi wa RWANBATT-2, Lt. Col. Charles Rutagisha, yavuze ko imidali bambitswe igaragaza ishema ryo kuba barangije amezi icyenda mu butumwa bwo kugarura amahoro muri Sudani y'Epfo, ahamya ko byongerera imbaraga ababirimo.

    Yashimiye abayobozi bose ba UNMISS, Guverinoma ya Sudani y'Epfo n'izindi ngabo ziri muri ubu butumwa ku ruhare rukomeye bagira mu gufasha kuzuza inshingano.

    Magingo aya u Rwanda ni urwa gatatu mu kugira abasirikare n'abapolisi benshi mu butumwa bwa Loni bwo kugarura amahoro.

    Ingabo z’u Rwanda zashimiwe uruhare zigira mu gutabara abakozi ba Loni n’abasivile

    Ingabo z’u Rwanda ziri muri UNMISS zavuze ko imidali y’ishimwe izongerera umuhate mu byo zikora

    Source : http://igihe.com/amakuru/u-rwanda/article/sudani-y-epfo-ingabo-z-u-rwanda-zambwitswe-imidali-y-ishimwe

  • Birashoboka ko ari ikimwaro cy'ingabo ze zatsinzwe na M23 – Dr. Mulefu ku magambo ya Perezida w'u Burundi – #rwanda #RwOT

    Dr. Mulefu yabwiye RBA ko asanga Perezida Ndayishimiye adafitte ibisobanuro byo guha abaturage ku bwo gutsindwa kw'ingabo z'u Burundi zari zifatanyije n'iza RDC kurwanya M23.

    Ibyo bituma akomeza gushakira impamvu ku Rwanda, avuga ko rufite gahunda yo gushoza intambara ku gihugu cye kugira ngo abenegihugu be bahugire kuri ibyo binyoma.

    Ati 'Ese byibuze ntibyaba bishobora kuba bituruka ku kimwaro cy'ibyababayeho bageze muri RDC [Ndayishimiye] akavuga ati 'ibi bintu turabisobanurira dute abaturage bacu nitutavuga ko ibirimo biba ari u Rwanda'?'

    Dr. Mulefu yavuze ko ayo magambo ya Perezida Ndayishimiye ashobora guteza umwuka mubi cyangwa umutekano muke mu Karere k'Ibiyaga Bigari.

    Ibyo kandi abihurizaho na Amb.Fatuma Ndangiza uri mu badepite bahagarariye u Rwanda mu Nteko Ishinga Amategeko y'Umuryango wa Afurika y'Ibirasirazuba (EALA).

    Yavuze ko amagambo y'Umukuru w'Igihugu cy'u Burundi azasubiza inyuma bikomeye intambwe mu bya dipolomasi iri guterwa n'ibihugu byombi mu guhosha umwuka mubi umaze iminsi ututumba.

    Ati 'Njye numvishe ari ijambo rintangaje kandi ukabona bitari bikwiye cyane cyane ko ubuyobozi bw'ibihugu byombi tuzi ko bumaze igihe buri mu biganiro mu rwego rwa dipolomasi byo gushakisha umuti w'ikibazo.'

    'Biratangaje kuba Perezida w'ikindi gihugu avuga u Rwanda ariko akaruvuga mu buryo bwo gushakisha intambara n'ubushotoranyi bidafite ishingiro.'

    Minisitiri w'Ububanyi n'Amahanga n'Ubutwererane, Amb. Nduhungirehe Olivier, abinyujije ku rububa rwa X yavuze ko amagambo ya Perezida Ndayishimiye ababaje kuko hari intambwe yari imaze guterwa mu mubano w'ibihugu byombi harimo no guhosha intambara y'amagambo.

    Dr. Mulefu Alphonse yatangaje ko amagambo ya Perezida w’u Burundi ashobora kuba aterwa n’ikimwaro cy’uko Ingabo ze zatsinzwe na M23

    Source : http://igihe.com/amakuru/u-rwanda/article/birashoboka-ko-ari-ikimwaro-cy-ingabo-ze-zatsinzwe-na-m23-dr-mulefu-ku-magambo

  • Inyungu ya BPR Bank Rwanda Plc yageze kuri miliyari 29,7 Frw – #rwanda #RwOT

    Mbere yo kwishyura umusoro, iyi banki yungutse 43,1 Frw mu 2024, izamuka ryatewe n'ibikorwa by'iyi banki birimo guteza imbere ikoreshwa ry'ikoranabuhanga ndetse no kwegera abakiliya.

    Iyi nyungu yagizwemo uruhare n'izamuka ry'inyungu yakwa ku nguzanyo iyi banki itanga, yazamutseho 23%, ikagera kuri miliyari 80,3 Frw.

    Hagati aho, amafaranga abitswa n'abakiliya nayo yazamutseho 13% agera kuri miliyari 757,1 Frw. Ibi kandi byajyanye n'izamuka rya 8% ku nguzanyo iyi banki itanga, zageze kuri miliyari 620,6 Frw, ibigaragaza uruhare rw'iyi banki mu iterambere ry'u Rwanda.

    Umuyobozi Mukuru wa BPR Bank Rwanda Plc, Patience Mutesi, yavuze ko iyi banki yagize inyungu ishimishije bitewe no kongera imbaraga mu mikoranire n'ibigo bito n'ibiciriritse.

    Ati 'Inyungu twagize ishimangira urwego duriho ku isoko. Inyungu ya mbere y'umusoro yageze kuri miliyari 43,1 Frw, ibigaragaza izamuka rishimishije mu bucuruzi bwacu. Iri zamuka ryagizwemo uruhare n'izamuka rya 23% yaturutse ku nyungu yakwa ku nguzanyo, izamuka ry'inguzanyo dutanga mu bigo bito n'ibiciriritse ndetse n'ishoramari twakoze.'

    Yashimangiye ko uyu mwaka, iyi banki yashyize imbaraga mu guteza imbere ikoranabuhanga, gukorana n'ibigo bito n'ibiciriritse ndetse no kongera imbaraga muri gahunda yo gutera inkunga imishinga y'iterambere rirambye, itangiza ibidukikije.

    Ati 'Twishimiye ahazaza kandi dufite intego yo gutanga serivisi gukorana neza n'abakiliya bacu, abanyamigabane ndetse n'umuryango mugari dukorera.'

    Umuyobozi w'Inama y'Ubutegetsi ya BPR Bank Rwanda Plc, George Rubagumya, yavuze ko abanyamigabane bazagabana 13,7% by'inyungu iyi banki yinjije, nyuma yo kwishyura imisoro.

    Ati 'Umusaruro ushimishije twagize watumye Inama y'Ubutegetsi isaba ko amafaranga yishyurwa inyungu ku migabane.'

    Ni ubwa mbere iyi banki igiye kwishyura imigabane ku banyamigabane bayo, aho izakoresha 13.7% by'inyungu bya miliyari 29,7 Frw iyi banki yungutse nyuma y'umusoro.

    Ku rundi ruhande, umutungo rusange umaze kugera ku gaciro ka miliyari 971,8 Frw.

    Umuyobozi Mukuru wa BPR Bank Rwanda Plc, Patience Mutesi, yavuze ko iyi banki yagize inyungu ishimishije bitewe no kongera imbaraga mu mikoranire n'ibigo bito n'ibiciriritse

    Umuyobozi w'Inama y'Ubutegetsi ya BPR Bank Rwanda Plc, George Rubagumya, yavuze ko abanyamigabane bazagabana 13,7% by'inyungu iyi banki yinjije, nyuma yo kwishyura imisoro

    Source : http://igihe.com/amakuru/u-rwanda/article/inyungu-ya-bpr-bank-rwanda-plc-yageze-kuri-miliyari-29-7-frw

  • Rayon Sports izakirira Mukura VS muri Sitade Amahoro, umukino wa Kiyovu na Police FC wimuwe – iby'umunsi wa 22 wa Rwanda Premier League #rwanda #RwOT

    Guhera kuri uyu wa Gatanu tariki ya 28 Werurwe 2025, imikino ya shampiyona y'u Rwanda ya Rwanda Premier League irakomeza hakinwa umunsi wa 22.

    Mu mimikino itegerejwe cyane, harimo umukino uzahuza ikipe ya Rayon Sports iyoboye urutonde rwa Shampiyona ndetse n'ikipe ya Mukura VS.

    Ni umukino uzakinwa kuri uyu wa Gatandatu tariki ya 29 Werurwe 2025 ukazabera kuri Sitade Amahoro i Remera guhera ku isaha ya Saa kumi n'Ebyiri n'igice z'umugoroba.

    Nk'uko Rayon Sports yabitangaje kwinjira kuri uyu mukino byashyizwe ku mafaranga ibihumbi Bibiri, ibihumbi Bitatu ahasanzwe, ibihumbi 20 na 30 mu myanya y'icyubahiro.

    Hari kandi itike y'Amafaranga ibihumbi, 100 ndetse na Miliyoni imwe ahazwi nko muri Sky Box.

    Usibye uyu mukino uzaba kuri uyu wa Gatandatu, indi mikino izakinwa kuri guhera kuri uyu wa Gatanu aho AS Kigali izakina na Gasogi United.

    Muri AS Kigali, ni uko Bayingana Innocent wari wirukanywe muri AS Kigali yasubijwe mu mirimo uhereye kuri uyu wa kane.

    Ibi bije nyima y'uko Bayingana yari yasezerewe mu mirimo nyuma y'uko Rayon Sports itsinze ikipe y'Umujyi wa Kigali ibitego 2-1.

    Umukino wagombaga guhuza ikipe ya Kiyovu SC na Police FC wari bukinwe kuri uyu wa Gatandatu, Rwanda Premier League yanzuye ko uyu mukono uzakinwa kuri cyumweru.

    Kiyovu nk'ikipe izakira, uyu mukino uzatangira ku isaha ya Saa cyenda zuzuye uzakurikirwe n'uzahuza APR FC na Vision FC.

    Uko imikino y'umunsi wa 22 iteganyijwe yose gukinwa:

    The post Rayon Sports izakirira Mukura VS muri Sitade Amahoro, umukino wa Kiyovu na Police FC wimuwe — iby'umunsi wa 22 wa Rwanda Premier League appeared first on RUSHYASHYA.

    Source : https://rushyashya.net/rayon-sports-izakirira-mukura-vs-muri-sitade-amahoro-umukino-wa-kiyovu-na-police-fc-wimuwe-ibyumunsi-wa-22-wa-rwanda-premier-league/?utm_source=rss&utm_medium=rss&utm_campaign=rayon-sports-izakirira-mukura-vs-muri-sitade-amahoro-umukino-wa-kiyovu-na-police-fc-wimuwe-ibyumunsi-wa-22-wa-rwanda-premier-league

  • Ingabo za Sudani zigaruriye ibice bikomeye bya Khartoum, RSF ikomeje kwihagararaho mu Burengerazuba #rwanda #RwOT

    Mu cyumweru gishize, ingabo za Sudani (SAF) zongereye ibikorwa bya gisirikare bigamije kwigarurira ibice bikomeye by'umurwa mukuru Khartoum, birimo Ingoro ya Perezida n'ikibuga cy'indege, aho mbere byari bikiri mu maboko y'umutwe wa Rapid Support Forces (RSF).

    Raporo z'abaturage ba Khartoum zivuga ko ku wa Gatatu abarwanyi ba RSF batangiye gusimburwa n'ingabo za leta mu duce dutandukanye tw'umujyi, bikaba byarafatwaga nk'intambwe ikomeye ku ruhande rw'igisirikare cy'igihugu mu ntambara imaze imyaka ibiri ishegeshe Sudani.

    Intambara yatangiye muri Mata 2023, ubwo habaga ukutumvikana gukomeye hagati y'ingabo za leta na RSF ku bijyanye n'ubutegetsi. Kuva icyo gihe, imirwano yakwiriye hirya no hino mu gihugu, cyane cyane mu murwa mukuru Khartoum na Darfur.

    Kuva RSF yagira ijambo rikomeye mu gihugu, yabashije kwigarurira ibice bikomeye birimo Ingoro ya Perezida, ikibuga cy'indege cya Khartoum ndetse n'utundi duce turi hafi y'umurwa mukuru.

    Ku wa Gatatu, igisirikare cya Sudani cyatangaje ko cyafashe inkambi yitwaga Teiba al-Hasnab, imwe mu nkingi za RSF muri Khartoum. Ku rundi ruhande, RSF ntiyahise itanga igisobanuro kuri ibyo byatangajwe.

    Minisitiri w'Itangazamakuru wa Sudani, Khalid Aleiser, unavugira guverinoma igenzurwa n'ingabo, yanditse kuri X (yahoze ari Twitter) ati: 'Iki ni igihe gikomeye kandi kidasanzwe mu mateka ya Sudani. Khartoum yongeye kuba iy'Abanya-Sudani nk'uko bikwiye.'

    Gutsinda kwa gisirikare kwa SAF bishobora kugira ingaruka zikomeye ku ntambara ihanganishije impande zombi. Mu gihe SAF yaba igaruriye byimazeyo umurwa mukuru, byafasha guverinoma kugerageza kugarura umutekano no gukuraho ibihome by'imitwe yitwaje intwaro mu mujyi.

    Ariko, gufata Khartoum ntibivuze iherezo ry'intambara, kuko RSF ikomeje kugenzura ibice binini byo mu burengerazuba bwa Darfur, hamwe n'utundi turere tw'igihugu.

    Uretse ingaruka za gisirikare, intambara yatumye Sudani ihura n'akaga gakomeye k'imibereho mibi y'abaturage. Imiryango itabara imbabare ivuga ko imirwano yahungishije abarenga miliyoni 14, benshi muri bo bakaba babaye impunzi mu bihugu bituranye na Sudani.

    Muri icyo gihe, abagera kuri 28,000 bamaze kumenyekana ko bishwe, nubwo umubare nyawo ushobora kuba urenze uwo.

    Kuba ingabo za Sudani zafashe ibice bikomeye bya Khartoum bishobora gufungura imiryango ku miryango itanga imfashanyo, kugira ngo ibashe kugeza ibiribwa, imiti, n'ibindi bikenerwa ku baturage bari mu kaga. Ibi bishobora kugabanya inzara yugarije abaturage b'uturere twasigaye mu ntambara.

    Nubwo ingabo za leta ziri gutsinda muri Khartoum, RSF ntiratsindwa burundu, kandi amahirwe yo kubona amahoro arambye mu gihugu aracyari make, kuko impande zombi zanze ibiganiro by'amahoro inshuro nyinshi. Haracyarebwa niba igisirikare cya Sudani kizabasha kurandura RSF burundu cyangwa niba iyo ntambara izakomeza gukwira no mu bindi bice by'igihugu.

    Gutsinda kwa gisirikare kwa SAF bishobora kugira ingaruka zikomeye ku ntambara ihanganishije impande zombi.

    Source : https://kasukumedia.com/ingabo-za-sudani-zigaruriye-ibice-bikomeye-bya-khartoum-rsf-ikomeje-kwihagararaho-mu-burengerazuba/

  • RIB yataye muri yombi abakozi batatu b'Akarere ka Kayonza – #rwanda #RwOT

    Aba bakozi batawe muri yombi mu bihe bitandukanye kuva tariki ya 21 n'iya 26 Werurwe 2025.

    Mu batawe muri yombi harimo Mbasha David wari Umuyobozi w'imirimo rusange mu Karere, Kayigire Anselme wari Umuyobozi ushinzwe Imari mu Karere na Nzaramyimana Emmanuel, wari rwiyemezamirimo ufite Ikigo cy'Ubwubatsi yitwa E.T.G Ltd.

    Hanatawe muri yombi kandi Sibomana Charles wari usanzwe ari umukozi ushinzwe ingengo y'imari mu Karere ka Kayonza.

    Umuvugizi wa RIB, Murangira B. Thierry yabwiye IGIHE ko Mbasha David, Kayigire Anselme na Sibomana Charles bakurikiranyweho icyaha cyo kunyereza umutungo wa Leta mu gihe Nzaramyimana Emmanuel we akurikiranyweho icyaha cy'ubufatanyacyaha kuri iki cyaha.

    Ati 'Barakekwaho kuba barakoze iki cyaha mu bihe bitandukanye mu 2022. Iperereza ry'ibanze rigaragaza ko bishyuye ikigo kitari cyo arenga miliyoni 67 Frw ihagarariwe na Nzaramyimana Emmanuel wahise ayabikuza kandi ataramugenewe.''

    Abafashwe bafungiye kuri Station ya RIB ya Nyarugenge mu gihe dosiye yabo yoherejwe mu Bushinjacyaha ku wa 26 Werurwe 2025.

    Icyaha cyo kunyereza umutungo bakurikiranyweho giteganywa n'ingingo ya 10 y'itegeko nimero 54/2018 ryo kuwa 13 Kanama 2018 ryerekeye kurwanya ruswa.

    Ugihamijwe ahanishwa igifungo kuva ku myaka irindwi kugeza ku myaka 10 hakiyonegeraho n'ihazabu y'Amafaranga y'u Rwanda yikubye inshuro kuva kuri eshatu kugeza kuri eshanu z'agaciro k'umutungo yanyereje.

    Ni mu gihe ubufatanyacyaha n'icyitso muri ibyo bikorwa ahanwa n'ingingo ya 84 y'itegeko nimero 68/2018 ryo ku wa 30 Kanama 2018 riteganya ibyaha n'ibihano muri rusange. Ubihamijwe ahanwa nk'uwakoze icyaha.

    RIB yasabye abantu bose kwirinda ibikorwa byo kunyereza umutungo wa Leta kuko bigira ingaruka mbi ku iterambere, ihamya ko uzabifatirwamo wese azahanwa nk'uko amategeko abiteganya.

    RIB yataye muri yombi abakozi batatu b’Akarere ka Kayonza

    Source : http://igihe.com/amakuru/u-rwanda/article/rib-yataye-muri-yombi-abakozi-batatu-b-akarere-ka-kayonza

  • NCDA yanyuzwe n'ibikorwa bya Kuza-Kids birwanya igwingira mu bana – #rwanda #RwOT

    Umushinga Kuza-Kids ushyirwa mu bikorwa n'Umuryango Protect Citizen kuva muri Nzeri 2024.

    Uwo mushinga ukorana n'amarerero abiri yo mu Karere ka Rulindo harimo irya Bukinga rirererwamo abana 25 bato b'ababyeyi basarura icyayi n'irindi rya Kiruli mu Murenge wa Base rirerwamo abana 150 bafite kuva ku myaka itatu.

    Ingo mbonezamikurire uwo mushinga ukoreramo uzitera inkunga y'ibikoresho nkenerwa mu gukangura ubwonko bw'abana n'ibindi bitandukanye.

    Uhugura kandi abarezi babo ku buryo bwiza bwo kubitaho n'ababyeyi ku gutegura indyo yuzuye kandi ugakurikirana uko bishyirwa mu bikorwa.

    Gusura ibikorwa by'uwo mushinga byabaye ku wa 26 Werurwe 2025 byitabirwa n'Ubuyobozi bwa Kuza-Kids, NCDA, ubuyobozi bw'inzego z'ibanze n'abandi bafatanyabikorwa b'uwo mushinga.

    Umuyobozi Mukuru Wungirije wa NCDA, Munyemana Gilbert, yavuze ko ingo mbonezamikurire za Kuza-Kids zirimo ibikoresho bihagije n'ibindi bisabwa byose bifasha abana gukura neza.

    Yashimye uburyo ibyo bikorwa by'izo ngo mbonezamikurire bifasha ababyeyi kwita ku bana babo neza by'umwihariko abana b'abasoromyi b'icyayi batitabwagaho uko bikwiye kubera akazi k'ababyeyi babo.

    Yagize ati 'Umufatanyabikorwa nka Kuza-Kids ufata icyemezo cyo gutangira umushinga nk'uyu wo kwita ku bana ni ikintu twishimira. Turahamagarira n'abandi bafatanyabikorwa bose n'ababyeyi kugira ngo ibyo twabonye hano bibe urumuri rutuma n'ahandi iyo serivise ikomeza kunozwa.'

    Meya wa Rulindo, Mukanyirigira Judith yavuze ko kuba uwo mushinga ukorera mu karere ayoboye ari umusanzu ukomeye cyane mu kugabanya igwingira mu bana.

    Yagizeti 'Izi ngo mbonezamikurire za Kuza-Kids ziri ku rwego rwisumbuye ku zo dusanzwe dufite ariko twifuza ko n'izindi zizamuka zikamera nka zo. Zizajya zitanga umusanzu ukomeye cyane abaturage bajye bazikoreraho ingendo shuri bazirebereho uko izindi ngo mbonezamikurire zigomba kuba zimeze.'

    Umuhuzabikorwa w'umushinga Kuza-Kids, Ilibagiza Rose yavuze ko bishimira kuba uwo mushinga warafashije ababyeyi guhindura imyuvire mu kwita ku mirire y'abana babo bakabasha gukura neza.

    Ati 'Imyumvire y'ababyeyi igenda ihinduka, barakubwira bati 'twari tuzi ko umwana utamuhaye umugati atakura neza ariko twamenye ko n'ibyo duhinga bidukikije bishobora kubafasha twabiteguye neza.''

    Ilibagiza yavuze kandi ko uwo mushinga uteganya kwagukira no mu tundi turere kuko icyo ari igice cyawo cy'igerageza ariko ibyo umaze kugeraho bikomeje gufasha bigaragara mu mikurire y'abana.

    Mu Karere ka Rulindo habarurwa ingo mbonezamikurire zigera kuri 865 zirimo abana bagera ku 31.486 n'abarezi babo bagera ku 2.281.

    Meya wa Rulindo, Mukanyirigira Judith, yavuze ko kuba uwo mushinga ukorera mu karere ayoboye ari umusanzu ukomeye cyane mu kugabanya igwingira mu bana

    Umuyobozi Mukuru Wungirije wa NCDA, Munyemana Gilbert, yavuze ko ingo mbonezamikurire za Kuza-Kids zirimo ibikoresho bihagije n'ibindi bisabwa byose bifasha abana gukura neza

    Umuhuzabikorwa w'umushinga Kuza-Kids, Ilibagiza Rose, yavuze ko bishimira kuba uwo mushinga warafashije ababyeyi guhindura imyumvire mu kwita ku mirire y'abana babo

    Umuyobozi bw'Urwunge rw'Amashuri rwa Kiruli (ahari urugo mbonezamikurire rwa Kuza-Kids) yagaragaje ko abana bazajya bahatangirira umwaka wa mbere w'amashuri abanza bazajya baba bajijutse

    Umwe mu barezi b’abo bana avuga uburyo Kuza-Kids yamufashije kumenya uburyo bwiza bwo kubitaho

    Meya Mukanyirigira agaburira abana

    Abasuye ingo mbonezamikurire basabanye n’abana barererwamo

    Hari aho abana bato bagenewe kuryama

    Abana bo mu ngo mbonezamikurire za Kuza-Kids bigishirizwa ku bikoresho bibafasha gukangura ubwonko

    Abana bahabwa amafunguro arimo n’igikoma cyujuje intungamubiri zisabwa ngo umwana akure neza

    Abana bafashwa gukangura ubwonko bwabo

    Source : http://igihe.com/amakuru/u-rwanda/article/ncda-yanyuzwe-n-ibikorwa-bya-kuza-kids-birwanya-igwingira-mu-bana

  • Rtd. Brig Gen Frank Rusagara yitabye Imana azize Cancer – #rwanda #RwOT

    Amakuru y'urupfu rwe yatangiye kumenyekana ku gicamunsi cyo ku wa Gatatu. Yapfuye azize uburwayi bwa Cancer yari amaranye igihe kinini.

    Muri Nyakanga 2016, Umugore we Christine Rusagara nawe yari yitabye Imana azize uburwayi bwa Cancer, icyo gihe yaguye mu bitaro byo mu Bwongereza.

    Mu 2016, Rusagara yahamijwe kwamamaza nkana ibihuha no kugomesha rubanda arwangisha ubutegetsi buriho, gukora igikorwa kigamije gusebya Leta ari Umuyobozi ndetse no gutunga imbunda binyuranije n'amategeko.

    Mu 2019, Urukiko rw'Ubujurire rwamukatiye igifungo cy'imyaka 15, nyuma yo kujurira bitewe no kutanyurwa n'igihano yari yahawe n'Urukiko Rukuru rwa Gisirikare mu 2016 cyo gufungwa imyaka 20.

    Rusagara yakoze imirimo itandukanye irimo kuba umuyobozi ushinzwe ubufatanye mpuzamahanga bwa gisirikare (Defence Attaché) muri Ambasade y'u Rwanda mu Bwongereza.

    Yigeze kuba kandi Umunyamabanga uhoraho muri Ministeri y'Ingabo, Umuyobozi w'Urukiko Rukuru rwa Gisirikare n'umuyobozi w'Ishuri Rikuru rya Gisirikare rya Nyakinama.

    Rtd. Brig Gen Frank Rusagara yitabye Imana afite imyaka 70

    Source : http://igihe.com/amakuru/u-rwanda/article/rtd-brig-gen-frank-rusagara-yitabye-imana-azize-cancer