Blog

Mu byiciro byabanje, iyi gahunda yitwaga BK Urumuri ishyigikira ba rwiyemezamirimo bakora imishinga itandukanye bagafashwa no kubona inguzanyo itarenze miliyoni 7 Frw gusa muri uyu mwaka yaje yitwa Urumuri aho yibanda gusa ku bafite imishinga irengera ibidukikije.

Gutangiza Gahunga ya Urumuri nshya byabereye i Kigali ku mugoroba wa tariki ya 6 Werurwe 2025.

Abashaka kuba abagenerwabikorwa ba Urumuri bagomba kuba bafite ubucuruzi bwanditse mu Rwego rw'Igihugu rw'Iterambere (RDB), bumaze amezi atandatu bukora kandi imishinga bakora ifite aho ihuriye no kurengera ibidukikije.

Abagenerwa iyo nguzanyo kandi bagomba kuba bakora imishinga itarengeje agaciro ka miliyoni 500 Frw.

Abujuje ibisabwa batanga ubusabe bwabo banyuze ku rubuga rwa internet rwa BK Foundation noneho hazatoranywemo abarenga ijana bazahabwa amahugurwa ajyanye n'ibyo bakora mu gihe cy'amezi atatu.

Nyuma hazabaho itoranya rya kabiri bahitemo ba rwiyemezamirimo 30 ba mbere bazahabwa inguzanyo kuva kuri miliyoni 5 Frw kugeza kuri 30 Frw bitewe n'umushinga.

Abo ba rwiyemezamirimo GIZ izahita ibishingira ibakire inguzanyo muri BK bazishyura mu myaka itatu nta ngwate kandi bagume no muri porogaramu y'amezi atandatu yo kubaha amahugurwa ajyanye n'ibyo bakora.

Umujyanama mu bya Tekiniki mu mushinga w'ubukungu bwisubira muri GIZ Rwanda, Ikirezi Anitha yavuze ko impamvu bateye inkunga Urumuri ari uko basanze ihuje na gahunda yabo yo kurengera ibidukikije.

Yagize ati 'Twari dusanzwe dutanga inkunga mu mishinga yo kurengera ibidukikije ariko tubona ari ngombwa gukorana b'ibigo by'imari kuko twe imishinga tuba dukoraho irarangira kandi byo bihoraho.Twasanze gahunda ya Urumuri ihuje n'ibyo dushaka kuko ifasha mu gutegura ba rwiyemezamirimo bagafata inshingano zo kwaka amafaranga kandi nyuma hari abandi bazayakenera bakayishyura.'

Umunyamabanga Nshingwabikorwa wa BK Foundation, Karangwayire Ingrid yavuze ko Gahunda ya Urumuri kuri ubu imaze kuba ubukombe mu guteza imbere ba rwiyemezamirimo bato.

Ati 'Dushaka gufasha abatugana gutera imbere ariko tutabagamijeho inyungu.Muri iyi gahunda tumaze gufasha ba rwiyemezamirimo barenga 200 kandi 60% muri bo ni abagore bishyura neza. Bari badusabye kongera amafaranga tubaha none GIZ yadufashije kuyongera. Twishimira ko abantu bagera kuri 600 bashya babonye akazi muri iyo mishinga twahaye inguzanyo.'

Umumyamabanga Uhoraho muri Minisiteri y'Ibidukikije, Cyiza Béatrice yavuze ko urumuri ari imwe muri gahunda z'abikorera zifasha iyo minisiteri muri gahunda y'Igihugu yo kurwanya ihindagurika ry'ibihe.

Yavuze ko Gahunda ya Urumuri ari umusanzu ukomeye cyane w'abikorera mu gukusanya ubushobozi bwo gushyira mu bikorwa gahunda y'Igihugu yo kurwanya ihindagurika ry'ibihe kugeza mu 2030 izakenera miliyari 11$ ariko hakaba hamaze kuboneka miliyari 6$.

Gahunda ya Urumuri yibanda cyane kuri ba rwiyemezamirimo b'urubyiruko, abagore ndetse n'abafite ubumuga.

Umunyamabanga Nshingwabikorwa wa BK Foundation, Karangwayire Ingrid yagaragaje ko gahunda ya Urumuri imaze kuba ubukombe mu guteza imbere ba rwiyemezamirimo bato

Umuyobozi wa GIZ mu Rwanda, Maik Schwarz ni umwe mu batangije Gahunda ya Urumuri

Umumyamabanga Uhoraho muri Minisiteri y'Ibidukikije, Cyiza Béatrice yavuze ko urumuri ari imwe muri gahunda z'abikorera zifasha iyo minisiteri muri gahunda y'Igihugu yo kurwanya ihindagurika ry'ibihe

Hasobanuwe uburyo Gahunda ya Urumuri izafasha ba rwiyemezamirimo bato

Gahunda ya Urumuri izafasha ba rwiyemezamirimo 30

Ba rwiyemezamirimo b’urubyiruko bari mu bitabiriye gutangiza Gahunda ya Urumuri

Bafashe ifoto y’urwibutso

Muri rusange iyi nama yari yubakiye ku kureba uburyo iteka rya Minisitiri rigena imikorere n'imitegurire y'ihuriro/Sosiyete ishinzwe gukurikirana no gucunga uburenganzira bw'umutungo mu by'ubwenge (Collective Management Organisation – CMO) ryashyirwa mu bikorwa n'ibisabwa byose bijyanye no gukusanya no gutanga amafaranga y'ingurane (Royalties) agenewe abahanzi. 

Ibi biteganywa n'itegeko No 055/2024 ryo ku wa 20/06/2024 rigamije kurengera umutungo bwite mu by’ubwenge ko hazashyirwaho iteka rya Minisitiri rizafasha mu ishyirwa mu bikorwa itegeko ryavuzwe haruguru. 

Muri iyi nama yabereye kuri Serena Hotel kuri uyu wa Kane tariki 7 Werurwe 2025, Minisitiri w’Ubucuruzi n’Inganda mushya, Sebahizi Prudence yavuze ko kurengera umutungo mu by'ubwenge ari ingenzi mu kurinda no gushima imbaraga n'impano z'abahanzi, abahanga mu guhanga ibihangano, ndetse n'abavumbuzi.

Yongeyeho ko kugira urwego rukomeye rw'uburenganzira ku mutungo mu by'ubwenge ndetse na Sosiyete 'Collective Management Organisation — CMO', ikora neza bizafasha abahanzi kubona inyungu ivuye mu bihangano byabo, bikabageza ku mwuga urambye kandi ubafitiye inyungu.

Umunyamabanga Uhoraho muri Minisiteri y'Urubyiruko n'Iterambere ry'Ubuhanzi, Ngabo Brave, we yavuze ko iyi sosiyete igiye gushyirwaho ari igisubizo ku mpungenge z'abahanzi, kuko bamaze igihe bagaragaza ko batabona inyungu ikwiye ivuye mu bihangano byabo.

Perezida w'Inama y'Igihugu y'Abahanzi, Niragire Marie France, yashimiye Leta y'u Rwanda ku mbaraga ishyira mu guteza imbere ubuhanzi no kubuhindura umwuga ubasha gutunga ababukora.

Amakuru agera kuri InyaRwanda, avuga ko iyi Sosiyete 'CMO' izatangira iri mu biganza by'Ikigo cy'Igihugu Gishinzwe Iterambere (RDB), hanyuma nimara guhabwa ibyangombwa byose ndetse n'ibikoresho byo gukoresha mu kugenzura ahakoreshejwe ibihangano by'abahanzi (System), izegurirwa abikorera.

Ingingo y'itegeko ya 350 y'itegeko N° 055/2024 ryo ku wa  20/06/2024 ryerekeye kurengera umutungo bwite mu by'ubwenge ivuga ko 'Ubuyobozi bubifitiye ububasha bukusanya ibihembo by'uruhushya byavuye mu gukoresha ibikomoka ku bihangano, uburenganzira bw'abahanzi n'uburenganzira bushamikiyeho kandi bukabisaranganya ku bafite uburenganzira.'

Rigakomeza rivuga kandi ko 'Iteka rya Minisitiri ufite umuco mu nshingano rigena uburyo bw'ikusanywa n'isaranganya ry'ibihembo by'uruhushya byavuye mu gukoresha ibikomoka ku bihangano, uburenganzira bw'abahanzi, uburenganzira bushamikiyeho rikorwa.'

Iyi Sosiyete ya 'CMO' izasimbura Sosiyete Nyarwanda y’abahanzi [Rwanda Societey of Authors/RSAU], yari imaze imyaka irenga 15 ifasha abahanzi kubona amafaranga ava mu bihangano byabo.

Yari igizwe n'abanyamuziki, abanditsi, abakora za Cinema n'abashushanya. Yashinzwe muri 2010 itangira gukora mu mwaka wa 2016 ishyizweho n'itegeko rirebera ubuhanzi n'abahanzi bose bafite ibihangano bifatika bigomba kurindwa ngo birengerwa ku nyungu z'abanyirabyo n'imiryango yabo.

Iyi sosiyete mu gihe imaze ikora ikurikirana, ikishyuriza abahanzi ndetse ikabagezeho amafaranga avuye mu bihangano byabo kugeza imyaka irenze 50. RSAU yari isanzwe ifite abanyamuryango barenga 600.

Umuyobozi w'Urugaga rw'Abahanzi, Intore Tuyisenge yabwiye InyaRwanda, ko bishimiye kuba Guverinoma igiye gushyiraho indi sosiyete izafasha abahanzi nyuma ya RSAU.

Ati 'Byadushimishije cyane nk'abahanzi kuko imbogamizi nyinshi RSAU yahuye nazo, zari zishingiye ku bantu batayumvaga, zizavaho. Kuko iyi izaba ikorera mu kigo cya Leta ari nayo igifasha.'

Akomeza ati 'Ikindi Leta mu izina rya Minisiteri y'Ubucuruzi n'Inganda, batwemereye kuzakoresha ikoranabuhanga mu kureba ahakoreshwa ibihangano no gusaranganya amafaranga avamo, bityo bifashe abahanzi kurushaho kugirira icyizere iyo sosiyete ya 'CMO'.

Intore Tuyisenge yavuze ko 'N'ubwo hari ibitaregenze neza ntitwabura gushimira byimazeyo umusanzu wa RSAU yatanze ari nawo musingi uzubakirwaho mu gukosora aho bitagenze neza no gukemura imbogamizi zose RSAU yahuye nazo.'  

Uhereye ibumoso: Umuyobozi w'Inama y'Igihugu y'Abahanzi, Niragire Marie France washinze Genesis Tv, Minisitiri w’Ubucuruzi n’Inganda mushya, Sebahizi Prudence, Umunyamabanga Uhoraho muri Minisiteri y'Urubyiruko n'Iterambere ry'Ubuhanzi, Ngabo Brave n'umuhanzikazi Butera Knowless mu nama yize ku ishyirwaho rya Sosiyete ya 'CMO'

  

Abarimo Dj Pius wamamaye mu bihangano binyuranye, umunyamakuru wamamaye nka Prof Mbata (uwa mbere ivuye ibumoso), Abayisenge Christian wa Isibo TV (Uwa Kabiri uvuye ibumoso) ndetse na Valents wamamaye muri filime zirimo ‘Impanga Tv’ (Uwa Gatatu uvuye iburyo)

  

Umuyobozi w'Inama y'Igihugu y'Abahanzi, Niragire Marie France washinze Genesis Tv

  

Minisitiri w’Ubucuruzi n’Inganda mushya, Sebahizi Prudence

  

Umunyamabanga Uhoraho muri Minisiteri y'Urubyiruko n'Iterambere ry'Ubuhanzi, Ngabo Brave 

Uhereye ibumoso: Umuhanzi Massamba Intore, umuhanzi Justin Nsengimana ndetse n'Umunyamabanga Uhoraho muri Minisiteri y'Urubyiruko n'Iterambere ry'Ubuhanzi, Ngabo Brave

Byatangajwe kuri uyu wa 07 Werurwe 2025, ubwo RRA yamurikaga ku mugaragaro umunsi wahariwe ubushakashatsi bugamije kunoza serivisi z'isoresha.

Ni umunsi wari ufite insanganyamatsiko igaruka ku cyakorwa kugira ngo ubushake mu gutanga imisoro no kubahiriza amategeko abigenga bwiyongere nta we uhaswe.

Komiseri Mukuru wa RRA, Ronald Niwenshuti, yavuze ko mu 2022 bari bageze kuri 75% by'abishimiye serivisi bahabwa ku bijyanye n'imisoro n'amahoro, agaragaza ko bakomeje guharanira ko iyo mibare yakwiyongera.

Ati 'Kugira ngo dukomereze muri uwo mujyo twihaye intego muri gahunda yacu y'igihe kirekire kugira ngo tuzamure iyo mibare, tuve kuri 75% byibuze tugere kuri 90% mu 2028/2029. Twizera ko icyo gihe tuzaba turi ikigo gitanga serivisi by'uzuye aho kuba abashyira mu bikorwa ibyo itegeko riteganya.'

Imwe mu mishinga itandukanye iri gufasha RRA kuzamura icyo kigero harimo kwimakaza ikoranabuhanga nko guteza imbere urubuga rwayo, kwita kubabagana byisumbuye, guhugura abasora binyuze mu bukangurambaga butandukanye, gutanga serivisi hifashishijwe ikoranabuhanga n'ibindi bijyanye no gutanga amakuru.

Yashimangiye ko mu gihe usora ahawe serivisi nziza, bizatanga umusaruro mwinshi mu bijyanye n'inshingano zo gusora abikoze ku bushake bidasabye kumubwiriza, ibinatanga umusaruro mu gukusanya imisoro yigashishwa mu bikorwa bitandukanye.

Umuyobozi Mukuru Ushinzwe Imari muri Banki Nkuru y'u Rwanda, Dr. Thierry M. Kalisa, yagaragaje ko ubushakashatsi nk'ubu ari ingenzi cyane ariko asaba ko hashyirwa n'imbaraga mu bijyanye no kongerera ubushobozi abakora ubushakashatsi.

Ati 'Nta bushakashatsi bukozwe gahunda yo gufata gushyiraho politiki zitandukanye yashingirwa ku bitekerezo by'umuntu ku giti cye aho gushingira ku kuri kw'ibihari. Niba ushaka ubushakashatsi bufite ireme uba ukeneye n'ababukora b'inzobere bivuze ko kububakira ubushobozi ari ingenzi.'

Atanze urugero nko muri BNR yavuze ko iyi banki ikomeje gushyira imbaraga mu bushakashatsi aho nko mu myaka 12 ishize yahaye akazi abafite ubumenyi buri hejuru ndetse yohereza abandi gukarishya ubumenyi.

Muri icyo gihe bavuye ku muntu umwe wari ufite Impamyabumenyi y'Ikirenga, Ph.D, mu bukungu bagera kuri batandatu barimo n'umwe wize imibare ndetse abandi batanu bari mu masomo yabo ya Ph.D, byose hagamijwe kwimakaza ubushakashatsi buteza imbere ubukungu bw'Igihugu.

Umuyobozi Mukuru Wungirije w'Urwego rw'Igihugu rw'Imiyoborere, RGB, Dr. Félicien Usengumukiza yavuze ko mu bintu umunani bigenderwaho mu bushakashatsi ngarukamwaka ku miyoborere bukorwa na RGB, buzwi nka Rwanda Governance Scorecard (RGS), bitatu muri byo birebana ako kanya n'iyi gahunda ya RRA yo guteza imbere ubushakashatsi.

Ibyo birimo kurwanya ruswa gukorera mu mucyo, kubazwa inshingano, gutanga serivisi inoze n'ibijyanye n'ubukungu n'imiyoborere ihuriweho.

Muri ubwo bushakashatsi bwamuritswe mu 2024, inkingi ijyanye no kurwanya ruswa no gukorera mu mucyo yavuye kuri 88.97% yari iriho mu 2023, igera kuri 86.64% mu 2024 na ho iy'imiyoborere abaturage bagizemo uruhare kandi idaheza iri mu zazamutse mu manota kuko kuri ubu ifite 85.84% ivuye kuri 84.04%.

Umusoro ni wo nkingi y'ubukungu bw'u Rwanda no kwishakamo ibisubizo, bidasabye ko igihugu cyishingikiriza ku nkunga z'amahanga. Mu 2023/2024 RRA yakusanyije imisoro irenga miliyari 2619,2 Frw bingana na 99,3% by'intego yari yahawe, ndetse mu 2024/2025 bigateganywa ko izakusanya miliyari 3061,2 Frw, ibingana na 54% by'ingengo y'imari y'igihugu.

Komiseri Mukuru wa RRA, Ronald Niwenshuti yavuze ko mu 2029 abishimira serivisi z’imisoro bahabwa bazaba barageze kuri 90%

Umuyobozi Mukuru Ushinzwe Imari muri Banki Nkuru y'u Rwanda, Dr. Thierry M. Kalisa, yasabye ko RRA yakomeza gushyira imbaraga mu kubakira ubushobozi abashakashatsi bayo

Umuyobozi Mukuru Wungirije w'Urwego rw'Igihugu rw'Imiyoborere, RGB, Dr. Félicien Usengumukiza aganiriza abashashatsi bitabiriye umunsi RRA yahariye ubushakashatsi

Haganiriwe ku ngingo zitandukanye zatuma abasora bitabira ku bushake bwabo

Abantu b’ingeri zitandukanye bitabiriye umunsi RRA yahariye ubushakashatsi

Amafoto: Rusa Willy Prince

Ni icyemezo cyafashwe nyuma y'aho ahari hasanzwe hubatswe iki kigo nderabuzima bigaragaye ko ari hafi y'igishanga, ndetse bikaba byaratumye inyubako zitangira kwiyasa mu buryo buteye ubwoba.

Ishimwe Yvonne utuye mu Kagari ka Kageyo, yatangaje ko iyo imvura iguye bagiye kwivuza baba bafite ubwoba bw'uko inyubako z'iki kigo nderabuzima zabagwira, kuko inkuta zose zasataguritse kugeza hasi.

Ati 'Hari nubwo tubura aho twivuriza kubera ko hashaje.''

Ntawumvayabo we yavuze ko hari abarwayi benshi batinya kurara kuri iki kigo Nderabuzima batinya ko imvura iramutse iguye izi nzu zabagwira.

Umuyobozi w'Akarere ka Kayonza, Nyemazi John Bosco, yavuze ko gusatagurika kw'inkuta z'Ikigo Nderabuzima cya Kageyo babona ko hari ingaruka bishobora kuzateza ari na yo mpamvu bafashe icyemezo cyo kubaka inyubako nshya.

Ati 'Ni ikigo Nderabuzima kirimo ibyiciro bibiri, icyiciro cya mbere ni ukubaka inzu y'ababyeyi nyuma hakazubakwa ibindi byumba bitangirwamo izindi serivisi. Iyi nzu y'ababyeyi yubatswe mu buryo yanakwakira izo serivisi mu gihe izindi nzu zitari zubakwa.''

Meya Nyemazi yavuze ko bazafatanya na Minisiteri y'Ubuzima mu kunoza no kwihutisha serivisi hagendewe ku zizajya zihatangirwa kuko ubu hiyongereyemo iyo kubyaza.

Iki kigo Nderabuzima gishya kizuzura gitwaye miliyari 1 Frw azatangwa n'Akarere ndetse n'undi mufatanyabikorwa. Hazaba hari inzu y'ababyeyi n'izindi zitangirwamo ubuvuzi busanzwe.

Magingo aya ikigo Nderabuzima cya Kageyo giha serivisi abaturage ibihumbi 11.

Inkuta z’ikigo nderabuzima cya Kageyo zariyashije

Habanje kubakwa inzu y’ababyeyi hakazubakwa izindi nyubako

Ku wa 4 Werurwe 2025 abaturage bo mu Mudugudu wa Ruhuha mu Kagari ka Simbwa mu Murenge wa Kabarore bavuze ko baraye batewe n'agatsiko k'abasore batanu bitwaje intwaro gakondo zirimo imihoro.

Abo baturage babwiye BTN ko abo bagizi ba nabi bagendaga bakomeretsa uwo bahuye na we wese.

Umwe yagize ati 'Bari abantu batanu bafite imitarimba, ibyuma n'imihoro noneho batatu bansanga mu nzu abandi babiri basigara ku irembo. Nabonye bashaka kunyica ngerageza kurwana na bo ariko bankubita inkoni, umwe yahise antema.'

Undi yagize ati 'Baje umugore wanjye bamukubita inkoni mu musaya, ngerageje kumurwanirira baba bankubise umuhoro mu mutwe ngo nshike intege. Umugore yahize avuza induru barasohoka.'

Abo bagizi ba nabi bamwe muri bo barabamenye kuko bari bamaze iminsi mike bacumbitse muri uwo mudugudu, igiteye urujijo kikaba ko nta kintu bigeze biba.

Umuvugizi wa Polisi y'u Rwanda mu Ntara y'Iburasirazuba, SP Twizeyimana Hamdun yavuze ko urwo rugomo rwaturutse ku businzi ndetse bamwe mu barukoze bakaba batawe muri yombi mu gihe abakomerekejwe bo bajyanwe kwa muganga.

Yagize ati 'Rwari urugomo rw'abantu basanzwe barwanya abanyerondo n'abaturage. Hari abantu bane bamaze gufatwa bari gukurikiranwa na RIB.'

SP Twizeyimana kandi yahumurije abo baturage bari bagize ubwoba bakeka ko abo bagizi ba nabi bagaruka.

Ati 'Turabahumuriza nta cyabaye kidasanzwe ku buryo bagira ubwoba ngo birasubira. Ni urugomo rwatewe n'ubusinzi.'

Yasabye abaturage kwirinda ubusinzi bukabije no kunywa ibiyobyabwenge kuko biteza urugomo kandi n'ababifatiwemo batagomba kwihanganirwa kubera guteza umutekano muke.

Mu Karere ka Gatsibo Polisi yataye muri yombi abagizi ba nabi baherutse kwibasira abaturage

Mu butumwa Minisiteri y'Ububanyi n'Amahanga yanyujije kuri X ku wa 07 Werurwe 2025 yakomeje iti 'Baganiriye ku buryo bwo gukomeza guteza imbere umubano w'ibihugu byombi ndetse n'ibiri kubera mu Burasirazuba bwa Repubulika Iharanira Demokarasi ya Congo.'

Umubano w'u Rwanda n'u Bugereki urahamye. Impande zombi zifatanya mu nzego zitandukanye ndetse ibi bihugu byombi bigatabarana mu gihe uruhande rumwe ruri mu mage.

Ubwo Covid 19 yari iri guca ibintu iki gihugu cyo mu Majyepfo y'Uburasirazuba bw'u Burayi cyahaye u Rwanda dose 200.000 z'inkingo zo guhangana n'icyo cyorezo. Icyo gihe hari muri Nzeri 2021 nyuma y'amezi atatu u Bugereki bwongera guha u Rwanda izindi 332.800.

Uretse mu buvuzi, ibihugu byombi bifatanya no mu nzego nk'ubwikorezi aho mu 2018 u Rwanda n'u Bugereki byasinye amasezerano mu bijyanye na serivisi z'ingendo zo mu kirere.

Muri Kemana 2024, Ikigo mpuzamahanga gitanga serivisi zijyanye n'indege, GainJet, cyatangaje ko cyatangiye gukorera ibikorwa byo kugenzura no gusana indege zacyo ku Kibuga Mpuzamahanga cya Kigali kiri i Kanombe. Mu buhinzi, Abagereki bihebeye ikawa y'u Rwanda.

Kugira ngo u Bugereki bwinjire neza muri Afurika, busanga u Rwanda ari yo marembo meza kubera ibyo rwagezeho nyuma ya Jenoside yakorewe Abatutsi.

Minisititiri Nduhungirehe yaganiriye na Gerapetritis nyuma y'umunsi umwe na bwo agiranye ibiganiro kuri telefoni na mugenzi we wa Repubulika ya Tchèque, Jan Lipavský, byagarutse ku kwagura umubano uhuriweho n'ibihugu byombi n'ishusho y'umutekano mu Burasirazuba bwa DRC.

Ni ibiganiro bibaye mu gihe mu Burasirazuba bwa RDC intambara ihuriro ry'ingabo z'icyo gihugu rihanganyemo n'umutwe wa M23 uharanira uburenganzira bw'Abanye-Congo, igikomeje nubwo hashyizweho uburyo bwo gukemura ibibazo hisunzwe ibiganiro ariko uruhande rwa RDC rukabikerensa nkana.

Aho kubyubahiriza iyo nzira y'amahoro, Kinshasa ikomeje kugira uruhare mu bikorwa biheza, ndetse bigira ingaruka zikomeye ku buzima bw'abaturage.

Nk'ubu ubutegetsi bwa RDC bwatangaje ko ibicuruzwa bituruka mu ntara zigaruriwe na M23 bigomba kujya bifatwa nk'aho ari bwo bicyambuka umupaka, ku buryo byitabwaho mu buryo bwihariye bukurikije amategeko agena imipaka.

Minister @onduhungirehe had a fruitful phone conversation with Giorgos Gerapetritis, Greek Minister of Foreign Affairs. They exchanged on ways to deepen bilateral relations and security situation in the Eastern DRC. pic.twitter.com/qPHObwjnvO

— Ministry of Foreign Affairs & Int’l Cooperation (@RwandaMFA) March 7, 2025